Jesus Kristusip utertitsissutaanera — Guutip annannissamut aqqutigititaa

’Guutip silamiut ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ — JUÁNASE 3:16.

1, 2. Inuiaat atugaat nassuiaakkit.

TAKORLOORIARUK nappaateqartutit pilanneqanngikkuit qularnanngivissumik toqussutigisassannik. Qanoq misigissagaluarpit pilanneqarnissaq ilinnut akisuuallaarpat? Immaqa allaat ilaquttavit ikinngutivillu katillutik akiliutigisinnaasaat pilanneqarnissannut naammanngillat. Inuuneq taama aarlerinartorsiortinneqaraluarpat isumatsassimanassaq!

² Inuiaat tamarmik tamatumunnga assingusumik atugaqalersimapput. Siuaasavut siulliit Adam Evalu naammalluinnartutut pinngortinneqarsimapput. (5 Moses 32:4) Naassaanngitsumik inuunissaminnut Guutillu neriorsuutaanik matuminnga piviusunngortitsinissaminnut periarfissineqarsimapput: „Kinguaassiorlusi amerliartoritsi nuna tamakkerlugu ilissinnullu naalatsigitillugu.“ (1 Moses 1:28) Kisianni Adamip Evallu Pinngortitsisertik pikitsitsiffigaat. (1 Moses 3:1-6) Naalannginnerat pissutigalugu Adam Evalu namminneq ajortiliulerput, aammali kinguaavi inuusussat tamarmik ajortiliusussanngorput. Soorlu angut aalajaatsoq Job kingusinnerusukkut oqartoq: „Minguitsoq minguttuumit pinngorsinnaava? Ataatsimilluunniit taamaattoqarsinnaanngilaq.“ — Job 14:4.

3. Qanoq ililluni toqup inuit tamakkerlugit tikissimavai?

³ Taamaalilluni ajortip nappaatitut tamatta ’tuniluuffigisimavaatigut’, Biibilimi allassimammat ’tamarmik ajortuliorput’. Tamanna toqumik kinguneqartarpoq. Aap, ’ajortip akissarsiarititaa tassa toqu’. (Rûmamiut 3:23; 6:23) Tamatta toqumit aniguisinnaanngilagut. Inuit tamarmik ajortuliortarput, taamaattumillu inuit tamarmik toqusarlutik. Adamip kinguaarimmatigut taama pissusilerneqarluta inunngorsimavugut. (Tussiaat 51:7) Paulus allassimavoq: ’Taamaattumik soorlu inukkut ataasiusukkut ajorti silarsuarmut tikiuttoq ajortikkullu toqu tikiulluni, taamalu toqup inuit tamakkerlugit tikikkai, tamarmik ajortuliormata.’ (Rûmamiut 5:12) Tamannali isumaqanngilaq annannissamik neriuutissaqanngitsugut.

Ajorti toqulu peerneqassapput

4. Sooq inuit namminneq nappaatit toqulu peersinnaanngilaat?

⁴ Ajorti kinguneralu toqu peerneqassappat suna pisariaqarpa? Ersarippoq inuup kialuunniit pilersissinnaasaa sunaluunniit naammassanngitsoq. Tussiaasiortoq ima kappialavoq: „Akiliutissarmi utertitsiniutissaq inummut angivallaassaqaaq naammanngilluinnassallunilu.  Kialuunniit inoqanni inuuginnartissinnaanngilaa ilivermut aqqarnaveersillugu.“ (Tussiaat 49:9, 10) Imaassinnaavoq peqqinnartunik nerisaqarnikkut katsorsartinnikkullu inuunerput ukiualunnik sivitsortissinnaagipput, taamaattorli ilatta kialuunniit ajortiliussuseq inunnguuserisarput peersissinnaanngilaa. Ilatta kialuunniit utoqqaliartortarnerup sunniutaa aserujassuseq unitsissinnaanngilaa inuttullu naammalluinnassuseq Guutip aallaqqaammut siunertarisimasaa timitsinnut uterteqqissinnaanngilaa. Paulus ingasaassinngilaq allakkami Adamip ajortuliornera pissutigalugu inuiaat ’naalatsigititaasut piunngitsumut’, imaluunniit soorlu The Jerusalem Bible-imi allassimasoqartoq, ’siunertarigaluartik angusinnaanngikkaat’. (Rûmamiut 8:20) Qujanartumilli Pinngortitsisup taamaatissimanngilaatigut. Ajortip toqullu inaarutaasumik peerneqarsinnaanissaat isumagisimavaa. Qanoq ililluni?

5. Jehovap Israelikkunnut inatsisaatigut qanoq takutinneqarpa taassuma naapertuilluassuseq qanoq pingaartitsigigaa?

⁵ Jehovap „innarluissut naapertuilluarnerlu nuannarai“. (Tussiaat 33:5) Inatsisit Israelikkunnut tunniussaasa takutippaat oqimaaqatigiissuseq naapertuilluassuserlu kinaassusersiunngitsoq ilungersuutigigai. Assersuutigalugu inatsisini tamakkunani erseqqissarneqarpoq ’inuuneq inuunermik naleqartinneqassasoq’. Allatut oqaatigalugu Israelikkuusoq inummik toqutsiguni toqutap inuunera nammineq inuunerminik akilertariaqarpaa. (2 Moses 21:23, 24; 4 Moses 35:21) Taamaalilluni naapertuilluassuseq Guutimeersoq naammassineqarsimassaaq. — Naleqqiuguk 2 Moses 21:30.

6. (a) Sooq Adam toqutsisumik taaneqarsinnaava? (b) Inuuneq qanoq ittoq Adamip annaavaa, pilliullu qanoq ittoq pisariaqarpa naapertuilluassuseq naammassineqassappat?

⁶ Adam ajortuliorami toqutsisunngorpoq. Qanoq ililluni? Nammineq ajortiliunini — taamaattumillu toqu — kinguaassaminut tamanut kingornussassatut ingerlateqqikkamiuk. Adamip naalannginnera pissutigalugu maannakkorpiaq timivut utoqqaliartortarlutillu toqujartortarput. (Tussiaat 90:10) Adamilli ajortuliornera tamatumannga sualunnerusumik kinguneqarpoq. Eqqaamajuk Adamip kinguaassaasalu annaasimasaat tassaaginnanngimmat inuuneq nalinginnaasoq ukiunik 70-inik 80-inilluunniit sivisussusilik. Inuuneq naammalluinnartoq — aap, inuuneq naassaanngitsoq — annaavaa. Taamaattumik naapertuilluassuseq malillugu ’inuuneq inuunermik naleqartinneqassappat’, inuuneq qanoq ittoq tamatumani tunniunneqartariaqarpa? Ersarippoq tassaasariaqartoq inuuneq naammalluinnartoq — inuuneq Adamip inuuneratut naammalluinnartunik kinguaassiorsinnaassusilik. Pilliutitut tunniunneqaruni inuunerup naammalluinnartup naapertuilluassuseq naammassiinnassanngilaa aammali ajortip kinguneratalu toqup peerneqarluinnarnissaannik periarfissiissalluni.

Ajortip akissaa akilerneqarpoq

7. Oqaaseq ’utertitsissut’ nassuiaruk.

⁷ Akiliut ajortimit utertinneqarnissatsinnut pisariaqartoq Biibilimi ’utertitsissut’-mik taaneqarpoq. (Tussiaat 49:8) Oqaaseq taanna aamma akiliummut inummik aallarussisup tigusami utertinneqarnissaanut tunngatillugu piumasaanut atorneqartarpoq. Soorunami utertitsissut Jehovap pilersitaa aallarussinermut imaluunniit tigusaqarnermut attuumassuteqanngikkaluarpoq. Taamaattoq akiliut utertinneqaatissaq pineqarpoq. Hebriiarit oqaasiat ’utertitsissut’-mik nutserneqartoq oqaluutitut atorneqaraangami eqqorluartumik isumaqartarpoq ’matuaa’. Ajortimut akiliutaassappat utertitsissut naammaqqissaartumik matussutissaasariaqarpoq matumunnga: Adamip inuttut inuuneranut naammalluinnartumut.

8. (a) Utertitsinermik periaaseq nassuiaruk. (b) Uagut ajortiliusugut qanoq utertinneqarsinnaavugut?

⁸ Tamanna najoqqutassiamut Mosesip inatsisaaniittumut naleqqulluartuuvoq — utertitsinermut najoqqutassiamut. Israelikkuusoq piitsunngorluni Israelikkuunngitsumut pisiaritittariaqalerpat,  taava eqqarliisa ilaata utertissinnaavaa inussiamut akissap akilerneratigut. (3 Moses 25:47-49) Biibilimi allassimavoq inuttut naammalluinnanngitsutut ’ajortimut kiffaasugut’. (Rûmamiut 6:6; 7:14, 25) Utertitaassagutta qanoq akeqassava? Soorlu takoreeripput inuuneq naammalluinnartoq annaaneqarpat inuuneq naammalluinnartoq akilerneqartariaqarpoq — annerusumik minnerusumilluunniit naamik.

9. Qanoq ililluni Jehovap ajortuliornitsinnut atatillugu ’akiliutissat akilersimavai’?

⁹ Soorunami inuit naammalluinnanngitsutut inunngortarput. Ilatta ataatsilluunniit Adam naliginngilaa; ilatta ataatsilluunniit utertitsissut naapertuilluassutsip piumasarisaa akilersinnaanngilaa. Soorlu aallaqqaataani eqqaaneqartoq toqussutaasumik nappaateqartutut pisariaqartumillu pilanneqarnissamut akissaqanngitsutut ippugut. Taamaappat qujamasussannginnerpugut allap isumagippatigut akiliutissavullu akilerlugit? Jehova taamatorluinnaq iliorsimavoq. Ataasiaataasukkut ajortimit utertissimavaatigut. Allaat nammineerluta pissarsiarinngisaannagassatsinnik tuniumavaatigut. Apustili Paulus allappoq: ’Guutip saammaannermit tunissutaa tassa inuuneq naassaanngitsoq Kristus-Jesusimi Naalakkatsinni.’ (Rûmamiut 6:23) Johannesip Jesus taavaa ’Guutip savaaraa silamiut ajortaannik ersuttoq’. (Juánase 1:29) Misissoriartigu Jehovap qanoq ililluni ernini asasani ikiortigalugu utertitsissut akilersimagaa.

’Angeqqataasumik utertitsissutissaq’

10. Josef Marialu qanoq soqutiginninnermik erserstisivigineqarpat?

¹⁰ Edenimi pikitsitsinerup kingunitsiannguagut Jehovap nalunaarutigaa ’kinguaassaq’ inuiaat ajortimit utertinneqaatissaat pilersikkumaarlugu. (1 Moses 3:15) Kingorna saqqummersitsisarnermigut Jehovap kinguaariit kinguaassamut siuaasaasussat tikkuarpai. Kiisamilu Josef Marialu, Palæstinami aappassiariit, soqutiginninnermik ersersitsivigineqarput. Sinnattortilluni Josef paasitinneqarpoq Maria anersaakkut illernartukkut naartulersimasoq ernertaarumaartorlu, taannalu Josefip Jesusimik atsissagaa, taassuma ’innuttani annaassammagit ajortaannit’. — Matîuse 1:20, 21.

11. (a) Qanoq ililluni Jehovap ernermi inuttut naammalluinnartutut inunngornissaa isumagaa? (b) Qanoq ililluni Jesus tassaalersimava ’angeqqataasumik utertitsissutissaq’?

¹¹ Ilumiu taanna nalinginnaanngivippoq, Jesusimi inunngunngikkallarami qilammi inuusimavoq. (Ussatit 8:22-31; Kulorsamiut 1:15) Jehovap pissaanera tupinnartuliorsinnaasoq ikiortigalugu taassuma inuunera Mariap illiaanut nuunneqarpoq, Guutillu ernera asasaa inuttut inunngorsinnaalerpoq. (Juánase 1:1-3, 14; Filípimiut 2:6, 7) Jehovap isumagaa Jesusip ajortimit Adamimeersumit mingutsinneqarnani naammalluinnartutulli inunngornissaa. Taamaattumik Adamip annaasimasaa, tassa inuuneq naammalluinnartoq, Jesusip pigaa. Kiisami inoqalerpoq ajortip akissaanik akiliisinnaasumik. Ukiumilu 33-mi nisanip ulluisa 14-ianni Jesus taamatorluinnaq iliorpoq. Ullormi pingaarutilissuarmi tamatumani akeqqaminut toqutaatippoq, tassaalerlunilu ’angeqqataasumik utertitsissutissaq’. — 1 Timûtiuse 2:6, NV.

Inuttut inuunerup naammalluinnartup nalinga

12. (a) Jesusip toqunerata Adamillu toqunerata assigiinngissutaat pingaarnerpaaq nassuiaruk. (b) Qanoq ililluni Jesus inunnut naalattunut ’naassaanngitsumik ataatanngorsimava’?

¹² Jesusip toqunera Adamillu toqunera assigiinngitsorujussuupput, assigiinngissullu tamanna utertitsissutissap qanoq naleqartiginera erseqqissarpaa. Adam toqususanngorsimavoq piaaraluni Pinngortitsisiminut naalannginnami. (1 Moses 2:16, 17) Jesusili pisuussuteqanngivilluni toquvoq, ’ajortulinnginnami’. (1 Pîtruse 2:22) Taamaattumik Jesus toqugami naleqangaartumik Adamip toqunermini piginngisaanik pigisaqarpoq, tassa inuttut naammalluinnartutut naassaanngitsumik inuusinnaatitaagami.  Tamanna pillugu Jesus toqunermini pilliutaasinnaalerpoq. Anersaatut qilaliarami pilliutimi nalinga Jehovamut sassaappaa. (Eprîarit 9:24) Taamaalilluni Jesusip inuiaat ajortiliusut ’pisiarai’ Adamilu taarserlugu inuiannut ataatanngorluni. (1 Korintumiut 15:45) Jesus taamaattumik pissutissaqarluartumik „naassaanngitsumik Ataataasoq“-mik taaneqarpoq. (Jesaja 9:6) Tamanna sunik nassataqarumaartoq eqqarsaatigeriaruk! Adam, ataataq ajortiliusoq, aallarnerfigalugu toqu kinguaavinut tamanut sunniuteqarpoq. Jesusip, ataataasup naammalluinnartup, pilliutimi nalinga atorpaa inuit naalattut naassaanngitsumik inuulersissallugit.

13. (a) Nassuiaruk Adamip ’akiligassaa’ Jesusip qanoq ililluni akilersimagaa. (b) Sooq siuaasatta siulliit ajortuliornerannut Jesusip pilliutaa matussutissiinngila?

¹³ Qanorli ililluni inuup ataatsip toqunerata inuppassuit ajortaat matussinnaavai? (Matîuse 20:28) Ukiualuit matuma siorna atuagassiami matumani allaaserisami tamanna ima assersuusiorneqarpoq: Takorlooriaruk suliffissuaq hundredelikkuutaanik sulisoqartoq. Suliffissuup naalagaa unneqqaserluttuusoq pisuulluni suliffissuaq akiliisinnaajunnaarpoq, matusariaqalerlunilu. Inuit hundredelikkuutaat maanna suliffeerupput taamaattumillu akiligassatik akilersinnaajunnaarlugit. Sulisut aappaat, qitornaat akiligassaqarfiilu inuup ataatsip taassuma unneqqaserlunneranit eqqorneqarput. Inulli pisooq ajunngitsuliorumasoq orniguppoq suliffissuullu akiligassai akilerlugit, ammarteqqillugulu. Taamatut inuup ataatsip akiligassaasa akilerneqarneratigut suliffissuup sulisorpassui, taakkua ilaqutaat akiligassaqarfiilu, ikiorneqarput. Suliffissuulli naalagarisimasaa ajunngitsorsiassanik nutaanik iluaqutiginneqataava? Naamik, parnaarussaavoq suliffinilu qaqugorsuarmut annaallugu! Taamatuttaaq Adamip kisimi akiligassaata peerneqarnera kinguaavinut millionilikkuutaanut iluaqusiivoq — Adami kisiat minillugu.

14, 15. Sooq Adam Evalu piaaralutik ajortuliortunik taaneqarsinnaappat, qanorlu taakkunannga allaanerusumik atugaqarpugut?

¹⁴ Tamanna naapertuilluartuuvoq. Adam Evalu piaaralutik ajortuliorsimapput. Aalajangerput Guuti akerlilersorniarlugu. Uagulli ajortiliusutut inunngorpugut. Qinigarisimanngilarput. Qanorluunniit tamaviaartigigaluarutta  ajortuliunngitsoorsinnaanngilagut. (1 Juánase 1:8) Ilaannikkut Paulusitut misigisarpugut, taanna ima allassimammat: ’Massa uannut ajunngitsuliorumagaluartumut inatsisaasoq manna misigisarpara ajortoq qaneqisoq. Guutimmi inatsisai inuutsikkut ilorlikkut nuannarigaluarpakka; kisianni inatsisit allat avatinniittut misigisaraakka eqqarsaatima inatsisaanut akerartortuusut, tigusatullu taakkua kiffartortippaannga ajortip inatsisaanut avatinniittunut. Uanga inukuluusunga.’ — Rûmamiut 7:21-24.

¹⁵ Utertitsissulli pissutigalugu neriuutissaqarsinnaavugut. Jesus tassaavoq kinguaassaq „nunarsuarmi inuiaqatigiit tamarmik“ Guutip neriorsuutaa naapertorlugu ’pilluaqqunarsissutissaat’. (1 Moses 22:18; Rûmamiut 8:20) Jesusip pilliutaa tunngavigalugu taassumunnga uppertut tamarmik annertuumik periarfissineqarput. Periarfissat tamakkua ilaat misissoriartigik.

Kristusip utertitsissutitut pilliutaa qanoq iluaqutigigipput

16. Naak ajortiliugaluarluta, qanoq ililluta Jesusip utertitsissutitut pilliutaa iluaqutigisinnaavarput?

¹⁶ Biibilimik allattup Jakobip paasivaa ’tamatta qassiinik naakkiuttartugut’. (Jâko 3:2) Kristusilli utertitsissutitut pilliutaa pissutigalugu isumakkeerfigineqarsinnaavugut. Johannes ima allassimavoq: ’Ajortuliortoqaraluarpat Ataatami illersuisoqarpugut, Jesus Kristusimik iluartuusumik, taannalu ajortitta matoorneqaatigaat.’ (1 Juánase 2:1, 2) Soorunami ajortuliorneq pingaaruteqanngitsutut isigisariaqanngilarput. (Jûtarse 4; naleqqiuguk 1 Korintumiut 9:27.) Ajortuliortooruttali uummammiugisavut Jehovamut aniatissinnaavavut tatigalugu taanna ’isumakkeerfiginnittartuusoq’. (Tussiaat 86:5; 130:3, 4; Jesaja 1:18; 55:7; apustilit suliait 3:19) Utertitsissutissap periarfissippaatigut Guutimut ilerasuuteqarnata kiffartornissatsinnik Jesus Kristusillu aqqani qinunikkut taassumunnga saaffiginninnissatsinnik. — Juánase 14:13, 14; Eprîarit 9:14.

17. Utertitsissut pissutigalugu pilluaqqussutissat suut qilanaarisinnaavavut?

 ¹⁷ Guutip siunertaata naammassineqarnissaa Kristusip utertitsissutitut pilliutaata aqqutissiorpaa: inuit naalattut paratiisimi nunarsuarmiittumi naassaanngitsumik inuussasut. (Tussiaat 37:29) Paulus ima allassimavoq: ’Guutip unnersuutai tamarmik taassumuuna [Jesusikkut] angerutaapput.’ (2 Korintumiut 1:20) Ilumoorpoq ’toqu naalagaasoq’. (Rûmamiut 5:17) Utertitsissutissap Guuti tunngavissaqartilerpaa ’qinngarsuisup kingulliup’ taassuma suujunnaarsinnissaanut. (1 Korintumiut 15:26, NV; sarĸúmersitat 21:4) Jesusip nammineq oqaaserisimasai naapertorlugit allaat toqusimasut utertitsissutitut pilliutaanera iluaqutigisinnaavaat: ’Ullut nalliukkumaarput, taava iliverniittut tamarmik [Jesusip] nipaa tusarumaarpaat; anillutillu makissapput.’ — Juánase 5:28, 29; 1 Korintumiut 15:20-22.

18. Ajorti inunnut qanoq alianartunik sunniuteqartarsimava, Guutillu silarsuassaani tamanna qanoq allanngortinneqarluinnassava?

¹⁸ Aallaqqaataanit siunertarineqartutut inuuneq piumaartussaq — ullumikkut nanertuutigisartakkanik imaqanngitsoq — eqqarsaatigigutsigu nuannaangaartariaqarpugut. Ajorti Guutimut attaveqarnitsinnut kisiat pinnagu aammali isumatsinnut, uummatitsinnut timitsinnullu ajoqutaasarpoq. Biibilimili neriorsuutigineqarpoq Guutip silarsuassaani ’ima oqartoqassanngitsoq: „Napparsimavunga!“’ Aap, inuiaat timikkut isumakkullu nappaateqarunnaassapput. Esajas ima nassuiaavoq: „Inuit tassani najugaqartut ajortiminnik isumakkeerfigineqarput.“ — Jesaja 33:24.

Utertitsissut — asanninnermut ersiutaavoq

19. Kristus aqqutigalugu utertitsissummit qanoq killinneqartariaqarpugut?

¹⁹ Jehovap asanninnermigut ernini asasani aallartissimavaa. (Rûmamiut 5:8; 1 Juánase 4:9) Jesusillu asanninnermigut ’toqu ooqattaarsimavaa [inuit] tamaasa pillugit’. (Eprîarit 2:9; Juánase 15:13) Pissutisssaqarluarluni Paulus ima allassimavoq: ’Kristusip asanninnerata pinngitsaalivaatigut, . . . massa tamaasa toqussutigai inuusut kingorna imminnut inooqqunagit, uumunngali inooqqullugit pillutik toqusumut makittumullu.’ (2 Korintumiut 5:14, 15) Jesusip uagut pilluta iliuuserisimasaa pingaartikkutsigu suliatsigut takutittariaqarparput. Allaat toqumit aniguisinneqarnissarput utertitsissutissap ajornarunnaarsarpaa! Jesusip pilliutaa nalinginnaasutut isigalugulusooq iliuuseqartariaqanngilagut. — Eprîarit 10:29.

20. Qanoq iliortariaqarpugut Jesusip ’oqaasii’ maleruarniarlugit?

²⁰ Utertitsissummik ilumut pingaartitsinerput qanoq ililluta takutissinnaavarput? Jesus tigusaanermi siunitsiannguagut oqarpoq: ’Uannik asannittup oqaatsikka maleruassavai.’ (Juánase 14:23) ’Oqaasiinut’ ilaavoq ilungersuussilluta suliamut matumunnga peqataanissatsinnut peqqussut: ’Taamaattumik aallaritsi, inuiaqatigiillu tamaasa ajoqersuganngortissigik . . . kuillugit.’ (Matîuse 28:19) Jesus naalassagutsigu aamma anersaakkut qatanngutivut asasariaqarpavut. — Juánase 13:34, 35.

21. Sooq ukioq manna apriilip aallaqqaataani eqqaaniaalluni nalliuttorsiorneq najuuffigisariaqarparput?

²¹ Utertitsissummik pingaartitsinerput pitsaanerpaamik takutissinnaavarput Jesusip toquneranik eqqaaniaalluni nalliuttorsiornermut, ukioq manna apriilip aallaqqaataani nalliuttorsiutigineqartussamut, najuunnitsigut. * Tamanna aamma Jesusip ’oqaasiinut’ ilaavoq, nalliuttorsiornermi tamanna pilersikkamiuk ajoqersukkani ima peqquai: ’Taamaaliortaritsi eqqaallunga.’ (Lúkarse 22:19) Nalliuttorsiornermut immikkut pingaarutilimmut tamatumunnga najuukkutta Jesusillu peqqussutigisai tamaasa maleruaqqissaarutsigik takutissinnaavarput upperilluinnaripput Jesus aqqutigalugu utertitsissut tassaasoq Guutip annannissamut aqqutigititaa. Aap, ’allamik annaffissaqanngilaq’. — apustilit suliait 4:12.

[Quppernerup ataani ilanngussaq]

Eqqaamavigit?

□ Sooq inuit namminneq ajorti peersinnaanngilaat?

□ Jesus qanoq ililluni ’angeqqataasumik utertitsissutaava’?

□ Jesusip qanoq ililluni inuttut naammalluinnartutut inuusinnaatitaanini iluaqutissatsinnut atorpaa?

□ Kristus aqqutigalugu utertitsissut pissutigalugu pilluaqqussutissat suut inuiaat misigiumaarpaat?

[Atuaqqissaarnermi apeqqutit]

[Qupp. 15-imi assiliartaq]

Inuup naammalluinnartup tamatigut Adamimut naleqqulluinnartup kisimi naapertuilluassuseq naammassisinnaavaa

[Qupp. 16-imi assiliartaq]

Jesus inuttut naammalluinnartutut inuusinnaatitaavoq, taamaattumillu inuunini pilliutitut tunniussinnaallugu