Isumakuluppallaaleqinak

’AQAGUSSAQ isumakuluutigeqinasiuk, aqagussaq piminik isumakuluutissaqassammat. Ullup erloqinarnera ullormut naammattarpoq.’ (Matîuse 6:34) Ullumikkut tamatta silarsuarmi ulapiffiusumi tatineqarfiusumilu inuugatta Jesusip unnersuussutaa tamanna atorluarsinnaavarput.

Piviusorsiussaguttali ajornartorsiutitta, aalajangigassatta, suliarisariaqakkatta akisussaaffigisattalu isumakuluutigiunnaarnissaat upperisinnaavarput? Inuit millonilikkuutaat isumatsassimapput, pilluaallutik erloqissuteqarlutillu. Taamaattumik eqqissisaatinut sinissaatinullu dollarit millionilippassuit atorneqartarput.

Sumi killeqartariaqarpa?

Akisussaaffigisavut, suliassavut, aalajangigassavut ajornartorsiutivullu — nukinginnartuugaluarpata nukinginnartuunngikkaluarpataluunniit — pilersaarusiorlugillu piareersaaffigisariaqarpavut. Biibilimi kajumissaarneqarpugut suliassap annerusup aallartinnginnerani ’ingikkallassasugut akissaa naatsorsorlugu’. (Lúkarse 14:28-30) Taamaaliussagutta periarfissat, kingunerisinnaasaallu eqqarsaatigisariaqarpavut piffissallu, nukiit aningaasallu atortariaqakkat naatsorsorlugit.

Qanoq pisoqarsinnaanera eqqarsaatigeqqissaarneqartariaqarpoq, kisianni pisinnaasut tamaviisa eqqarsaatigineqarsinnaanngillat taamaaliorniarnerlu isumalluarnartuunani. Assersuutigalugu ilaquttavit isumannaatsuunissaat pillugu angerlarsimaffinni ikuallattoqalissagaluarpat qanoq iliornissat eqqarsaatigisinnaavat. Immaqa kalerrisaarutit putsumik malussajasut qatserutillu pisiarisinnaavatit. Immaqa ajunaalernermi illunnit qanoq aniffiusinnaasut siumut eqqarsaatigissavatit. Kisianni silatusaarluni atoriaannaasumik pilersaarusiornerup taavalu ingasappallaartumik pisariaqanngitsumillu isumakulunnerup akornanni killit qanoq ilinikkut qaangerneqartarpat? Taamaattoqartarpoq pisinnaasunik nalorninartunik ilimananngitsunillu assigiinngitsorpassuarnik eqqarsaatersorluni imminut erloqisikkaanni, amerlanersaat immaqa takorluuinerinnaasut. Eqqarsaatit isumakullernartut sapersissinnaavaatsit isumaqalersillutillu arlaannik arajutsisaqartutit imaluunniit ilaquttavit illersorneqarnissaannut naammattumik iliuuseqarsimanngitsutit. Isumakulunnerup taama ittup immaqa allaat sinissaarutsissinnaavaatit.

Mosesip Farao sassarfigaa

Jehova Guutip pruffiitini Moses mersernartumik suliassippaa. Siullermik Mosesip Israelikkut sassarfigissavai paasitillugillu Egyptenimit aniguinissaannut nammineq siulersuisussatut Jehovamit toqqarneqarsimalluni. Aappassaanik Mosesip Farao sassarfigisussaavaa peqqullugulu Israelikkut aallarnissaannut  akuerseqqullugu qinnuigissallugu. Kiisalu Mosesip inuit millionilikkuutaat inoqajuitsukkut nunamut akeqqersimaartunik inulimmut siulersussavai. (2 Moses 3:1-10) Taamaaliortussaanera annilaanganarpoq, Mosesilli akisussaaffini pissutigalugu isumakuluppallaalerpa?

Ersarippoq Moses isumakuluuteqartoq. Jehova ima aperaa: „Israelikkut ornillugit oqarfigigukkit siuaasaasa Guutiata aallartikkaanga, taakkualu Guutip aqqa apeqqutigippassuk taava qanoq akissavakka?“ Jehovap akissutissaqartippaa. (2 Moses 3:13, 14) Mosesip aamma eqqarsaatigaa Faraop upperiumanngippani qanoq pisoqassanersoq. Jehovap pruffiitini akeqqippaa. Moses naggataamik ajornartorsiuteqarpoq — miserratiginngilaa ’oqallorissuusimanngisaannarluni’. Tamanna qanoq iliuuseqarfigineqarsinnaava? Jehovap isumagaa Aron Moses sinnerlugu oqalunnissaa. — 2 Moses 4:1-5; 10-16.

Apeqqutigisani akineqarmata Guutimut upperluni Moses Jehovap peqqusineratut iliorpoq. Faraomut sassaruni qanoq pisoqarnissaanik eqqarsaatinik isumakullernartunik imminut erloqisinnani Moses ’Jehovap peqqussutaa malillugu iliorpoq’. (2 Moses 7:6) Isumakulunnermik qunulersimagaluaruni uppernermik nakimaatsuunermillu suliassami naammassinissaanut pisariaqartunik amigaateqassagaluarpoq.

Mosesip suliassaminut oqimaaqatigiissumik isumaqarnera Paulusip ’silatusaarutaasumik’ taasimasaanut assersuutaalluarpoq. (2 Timûtiuse 1:7; Títuse 2:2-6) Moses silatusaarsimanngikkaluaruni suliassani merserisimassagaluarpaa, immaqalu suliassaq akuerisimassanngikkaluarlugu.

Eqqarsaatitit aqukkit

Ulluinnarni uppernikkut allatigulluunniit misilinneqaraangavit qanoq qisuariartarpit? Annilaangasarpit akornutaasinnaasut unamminiarnartullu siuninniittut kisiisa eqqarsaatigalugit? Imaluunniit tamakku oqimaaqatigiissumik isigisarpigit? ’Isumakuluutit siumuugassaanngillat,’ taama ussateqarpoq. Sooq immaqa pinngisaannartussat ernumassutigissavigit? Biibilimi allassimavoq: „Isumakuluuteqarnerup inuk artorsaatissittarpaa.“ (Ussatit 12:25) Tamanna aalajangernissap kinguartiterneranik kingusinaarneranillu kinguneqarajuppoq.

Isumakulunnerulli pisariaqanngitsup anersaakkut ajoqutaanera navianarnerungaarpoq. Jesus Kristusip takutippaa ’naalagaaffimmik oqaatsimik’ pingaartitsineq pisuussutit salloqittaataasut pissaanerannit aamma ’silap matuma piinik isumakulunnermit’ ipitinneqarluinnarsinnaasoq. (Matîuse 13:19, 22) Soorlu kakillarnaqutit naatsiassat sorlaninnissaat inerititaqarnissaallu akornusersinnaagaat, taamatulli ippoq aqussinnaanngisanik isumakuluuteqarpallaartarnerup anersaakkut siumukarnissatsinnik Guutillu nersornaatissaanik inerititaqarnissatsinnik akornusiisarnera. Ilaasa allaat aserornartunik isumakuluuteqarnermit Jehovamut tunniulluinnarnissartik tunulliussimavaat. Isumaliorput: ’Tunniulluinnarnerami eqqortinngitsoorukku?’

Apustili Paulusip oqaluttuuppatigut anersaakkut sorsunnitsinni ’eqqarsaatit tamaasa tigusatut kiffartortillugit Kristusimut naalattunngortinniassagivut’. (2 Korintumiut 10:5) Akerarsuatta, Satan Diaavulup, nuannaarutigissagaluarpaa isumakuluutivut atorlugit nikallungatissinnaagunisigut timikkullu, misigissutsikkut anersaakkullu sanngiillisilluta. Nalornisoorneq iluaqutigalugu mianersunngitsut napitinnissaat pikkoriffigisorujussuuaa. Taamaattumik Paulusip kristumiut mianersoqquai ’Diaavulu inissaqartinnaveeqqullugu’. (Evfisumiut 4:27) ’Pissutsit aaqqissuussaanerata matuma guutigimmani’ Satan iluatsitsilluni ’uppinngitsut isumaat tappiillisissimavai’. (2 Korintumiut 4:4, NV) Uagulli isumarput taassuma pissaaneqarfiginngisaannarliuk!

Ikiorneqarsinnaavugut

Meeraq ajornartorsiuteqaleruni ataatani asannittoq saaffigisinnaavaa siunersillugu tuppallersarneqarlunilu. Uaguttaaq Ataatarput qilammiusoq ajornartorsiutitsinnik saaffigisinnaavarput. Aap, Jehovap nanertuutigisatta  isumakuluutigisattalu imminut tunniunnissaannut kajumissaarpaatigut. (Tussiaat 55:23) Meeqqatut ataataminit tuppallersarneqareeraangami isumakulukkunnaarsimasutulli uaguttaaq nanertuutigisavut Jehovamut tunniuttariaqarpavut taassumaniitiinnarlugillu. — Jâko 1:6.

Qanoq ililluta isumakuluutigisavut Jehovamut tunniussinnaavavut? Filípimiut 4:6, 7-imi allassimavoq: ’Suulluunniit pillugit isumakulunnaveeritsi, nungullugillu kissaatigisasi Guutimut nalunaarsigik torlulallusi qinullusilu qujallusilu; eqqissinerullu Guutip piata sianinernit tamanit annerungaartup uummatisi eqqarsaatisilu sernigissavai Kristus Jesusimi.’ Aap, Jehovap qinujuarnerput akillugu pisariaqanngitsumik isumakulunnermut isumatta illersorneqaatigisaanik ilutsinni eqqissinermik tunisinnaavaatigut. — Jeremia 17:7, 8; Matîuse 6:25-34.

Qinnutivut naapertorlugit iliuuseqassagutta uinikkut imaluunniit isumakkut allanit immikkoorniassanngilagut. (Ussatit 18:1) Akerlianik misissortariaqarparput najoqqutassiat siunnersuutillu Biibilimeersut suut ajornartorsiutitsinnut attuumassuteqarnersut nammineq silaqassuserput tatiginagu. (Ussatit 3:5, 6) Inuusuttut utoqqaanerusullu tamarmik ajornartorsiutit qanoq aaqqinniarsinnaaneraat qanorlu aalajangiisinnaanerat pillugit Biibilimi Napasuliaq Alapernaarsuiffiullu Peqatigiiffiata atuagassiaataani paasissutissarpassuaqarpoq. Saniatigullu kristumiut ilagiissaanni pikkorissunik misilittagaqarluartunillu utoqqaanertaqarpoq allanillu inersimalluartunik kristumioqarluni oqaloqatigisinnaasatsinnik. (Ussatit 11:14; 15:22) Misigissutsikkut sunnerneqarsimanngitsut Guutitullu tamatuminnga isiginnittaaseqartut ikiorsinnaavaatigut ajornartorsiutitta allamik isumaqarfiginissaannut. Uagut sinnerluta aalajangiissanngillat, kajumissaarillutilli tapersersuisinnaapput.

„Guuti neriuffiguuk!“

Ullut tamaasa ajornartorsiutinik atortariaqakkatsinnik naammattunik nanertuutigisaqartaratta ajornartorsiutit piviusuunngitsut isumakuluutigissallugit siunertaqanngilaq. Pisinnaasut pissutigalugit annilaangagutta ernumallutalu Jehova qinunikkut saaffigisariaqarparput. Oqaasia atuartaruk peqatigiissortaalu attaveqarfigisarlugit ilisimassummik silatusaarnermillu siunersiuillutit. Qanorluunniit atugaqassagaraluaruit paasissavat artorsinneqarnak ikiorneqarsinnaallutit.

Artorsaateqarluni ernumaqalunilu tussiaasiortoq ima tussiaasiorpoq: „Sullutit isumatsappit tarniga? Sooq ilunni aalavit? Guuti neriuffiguuk! Qaqugu aammaarlunga qutsavigiumaarakku annatsitsisiga Guutigalu.“ (Tussiaat 42:12) Uaguttaaq taama isumaqartariaqarpugut.

Aap, takkussinnaasut eqqarsaatigalugit pilersaarusiortarit ilimananngitsullu Jehovamut tunniuttakkit. ’Isumakuluutisi tamaasa taassumunnga pisissigik, isumassormasi.’ — 1 Pîtruse 5:7. (wE 15/3 99)

[Qupp. 29-mi assiliartaq]

Daviditut nanertuutigisatit isumakuluutigisatillu Jehovamut tunniuttarpigit?