Kiap eqqarsaatitit ilusilersortarpai?

„KIALUUNNIIT oqarfigissanngilaanga qanoq eqqarsassanersunga! Aamma kialuunniit oqarfigissanngilaanga qanoq iliussanersunga!“ Aalajangersimarpalulluni taama oqaasilik nakimanngivilluni imminut tatigivoq. Illit taamaattarpit? Soorunami kialluunniit allap aalajangiissussinnaanngilaatit. Kisianni ajunngitsumik siunnersuisoqarpat ingerlaannaq itigartinnissaa silatusaarnerussava? Silatuumik aalajangernissannut ikiuisoqarsinnaannginnerpa? Aamma qulakkeerluinnarsinnaaviuk sianiginagu eqqarsaativit allanit ilusilersorneqannginnissaat?

Assersuutigalugu sorsunnersuaq kingulleq sioqqutitsiarlugu Joseph Goebbelsip, Hitlerip isumaqatissarsiortarnermut ministeriata, Tysklandimi filmiliortarneq nakkutigisarilerpaa. Sooq? Paasigamiuk tassuuna „inuit isumaannik taamaattumillu ileqquinik sunniilluarsinnaalluni“. (Propaganda and the German Cinema 1933-1945) Qularnanngitsumik tusarsimassavat periaaseq tamanna periaatsillu allat qanoq misigittaatsigisumik sunniuteqarluartigisumillu atortarsimagai inuit — inuit nalinginnaasut silassorissullu — nazistit isumaliutersuutaannut maleruutiinnartinniarlugit.

Tassami, eqqarsaatitit iliuutsitillu tamatigut tusarnaakkavit misigissusiinit isumaannillu arlaatigut sunnerneqartarput. Tamannali soorunami ajortuusariaqanngilaq. Ilinnut ajunnginnerpaaginnarnik kissaassisut — soorlu ilinniartitsisuvit, ikinngutivit angajoqqaavillu — siunnersuutaat ilitsersuutaallu iluaqutigingaassavatit. Tassaappatali inuit imminnuinnaq soqutigisut namminnerlu eqqarsaatimikkut tammartitaasimallutillu ajortunngorsimasut, soorlu Paulusip ’tammartitsisunik’ taasimasai, mianersorit! — Títuse 1:10; 5 Moses 13:6-8.

Taamaattumik imminut tatigivallaarlutit isumaqaqinak allanit sunnerneqarsinnaanngitsutit. (Naleqqiuguk 1 Korintumiut 10:12.) Qularnanngitsumik maluginagu allanit sunnerneqareerputit — immaqa nassuerutigerusutannit akulikinnerusumik. Assersuutigiinnarlugu eqqarsaatigikkit pisiniarfiliaraangavit pisiarisartakkatit. Tamakku tamatigut nammineq silatusaarlutit qinertarsimavigit? Imaluunniit inunnit allanit isertortukkuugajuttukkut nakutitseriaasumik kinguneqarluartumillu sunnerneqarsimavit? Taamaattoq isumaqarpoq nutaarsiassalerisoq Eric Clark. Ima oqarpoq: „Ussassaaruterpassuarnik sunniiniartoqartuaannarmat sunniuteqarnerat maluginngitsoortarparput, malugittaalliartortillutalu sunnertikkiartornerussarunarpugut,“ Aamma allappoq inuit aperineqaraangamik ussassaarutit qanoq sunniuteqartiginersut „amerlanersaasa miserratiginngikkaat sunniuteqarluartartut, isumaqarlutilli namminneq sunnerneqarneq ajorlutik“. Inuit isumaqarajupput allat tamarmik sunnertiasuusut, namminnerli taamaannatik. „Soorlu tassa  kisiartaalluta sunnerneqarsinnaanngitsut.“ — The Want Makers.

Satanimit ilusilersorneqartut?

Ulluinnarni ussassaarutinit sunnerneqartarnerit pinngitsoorani navianartunik kinguneqartariaqanngillat. Allamilli sunniisoqarpoq navianarnerungaartumik. Biibilimi ersarissumik takutinneqarpoq Satan tammartitsiniaallaqqissuusoq. (sarĸúmersitat 12:9) Tunngaviusumik isumaqartarpoq soorlu ussassaarutilerisoq ima oqarsimasoq: ’Pisiniartut marlutsigut sunnerneqarsinnaapput — pilerisaarlugit sungiussisillugilluunniit.’ Isumaqatissarsiortartut ussassaarutilerisullu periaatsit nakutitsiniutit atorlugit eqqarsaatitit sunnersinnaappatigik, Satan taamaaliorniarnermini pillaqqinnerungaassaaq! — Juánase 8:44.

Apustili Paulusip tamanna nalunngilaa. Isumakuluutigaa kristumioqatimi ilaat eqiingannginnamik Satanimit salloqittarneqarnissaat. Ima allappoq: ’Ernumavungali, soorlu pulateriaarsuup peqqusersuulluni Eva salloqittaraa, taamattaaq ilissi eqqarsaatisi aserussasoralugit Kristusimut peqqusersuikkunnaarsillusi.’ (2 Korintumiut 11:3) Mianersoqqussut tamanna ilumooruttariaqarparput. Taamaaliunngikkutta isumaqatissarsiornerit ussassaarutillu sunniuteqartarnerannik — ’imminnulli sunniuteqartannginnerannik’ — upperinnittut assigissavavut. Kisianni Satanip tammartitseriaasiisa sunniuteqarluartarnerat sumi tamaani inuit naakkittaatsuliortarneranni, ajortunngorsimaneranni ilumoortuusaarniarnerannilu ersareqaaq.

Taamaattumik Paulusip kristumioqatini ilungersorluni kajumissaarsimavai ’silap matuma inui ileqqoqatigeqqunagit’. (Rûmamiut 12:2) Biibilimik nutserisut ilaata Paulusip oqaasii ima nutsersimavai: „Silarsuup inuisa avatissinniittut iliortarnerisut pissusilersornissamut tatineqaqinasi.“ (Rûmamiut 12:2, Phillips) Satan sapinngisamik iliuuseqarniarpoq ilusilersuutiminut pinngitsaaliniarlutit, soorlu itsaq marriortup marraq piumasaminik allaqartinniarlugu ilisarnaateqartinniarlugulu ilusilersortarsimagaa. Nukiit Satanip atorsinnaasai tassaapput aliikkusersuinerit silarsuarmilu matumani naalakkersuineq, niuerneq upperisarsiornerlu, taakkualu sullinnissaanut piareersimapput. Qanoq annertutigisumik sunniuteqartarpa? Apustili Johannesip nalaanisulli ullumikkut annertutigaaq. Ima allappoq: „Ilisimavugut Guutimit pisugut, silarsuarli tamaat ajortup pissaaneqarfigigaa.“ (1 Juánase 5:19, NV; takujuttaaq 2 Korintumiut 4:4.) Satanip inunnik tammartitsisinnaanera eqqarsartaasiannillu ajortunngortitsisinnaanera qularutigigukku, eqqaamajuk qanoq sunniuteqarluartigisumik inuiaqatigiit Israelikkut Guutimut tunniulluinnarsimasut taamaaliorfigisimagai. (1 Korintumiut 10:6-12) Illittaaq taamaaliorfigineqarsinnaavit? Aap, isumat Satanip salloqittaasumik sunniiniarneranut ammatikkukku taamaaliorsinnaassaaq.

Paasiuk susoqartoq

Amerlanertigut peqqusersusaarnikkut sunniiniarneq eqqarsaartaatsitsinnut sunniuteqarsinnaavoq aatsaat akuerigutsigu. Atuakkiamini De Skjulte Fristere-imi Vance Packard ima allappoq: „[Isertortukkut] sunniiniartussanut illersuutissaqarluarpugut: aalajangersinnaavugut sunnerneqarumanata. Amerlanertigut qinigassaqartarpugut, susoqarnersorlu nalunngikkutsigu ilumuuvissumik aqunneqarsinnaanngilagut.“ Aamma isumaqatissarsiornermut peqquserlunnermullu atatillugu taamaappoq.

Soorunami ’susoqarnersoq’ paasissagutsigu isumarput ammasariaqarpoq ajunngitsumillu sunnertissinnaassuseqarluta. Soorlu timi peqqissuussaguni inuussutissanik ajunngitsunik pisariaqartoq taamatulli ippoq isuma. (Ussatit 5:1, 2) Paasissutissinneqannginneq ilumunngitsumik paasissutissinneqarnertut navianartigisinnaavoq. Taamaattumik isummat eqqarsaatinut isumaliutersuutinullu tammartitsisunut illersortariaqaraluarlugu, paasissutissanut siunnersuutinullu tamanut pasillikujuttumik ineriartortitsissanngilatit. — 1 Juánase 4:1.

Peqqusersuitsumik kajumissaarineq isertortukkut isumaqatissarsiornermit allaaneruvoq.  Apustili Paulusip inuusuttoq Timoteus mianersoqquaa ’inunnut ajortunut salloqittaapiluttunullu ajorsiartortunut tammartitsisartunut tammartitaasartunullu’. Nangillunili Paulus allassimavoq: ’Illilli ilinnikkatit ilinnut uppernarsakkat aalajangerfigikkit ilinniarfigisat nalunnginnakku.’ (2 Timûtiuse 3:13, 14) Isumannut isertut tamarmik annerusumik minnerusumilluunniit sunniuteqartarmata ’inuit ilinniarfigisat nalunngittariaqarpatit’ qulakkeersinnaajumallugu taakkua ilumut illit iluaqutissat namminerlu iluaqutigisatik piinnarnagit soqutigigaat.

Illit qinigassarivat. ’Silap matuma inuisa ileqqoqatiginissaat’ qinersinnaavat silarsuup matuma isumaliutersuutai eriagisaalu eqqarsaatinnut sunniuteqartillugit. (Rûmamiut 12:2) Silarsuulli matuma illit iluaqutissatit soqutiginngilai. Apustili Paulus ima mianersoqqusivoq: ’Misissoritsi ilisimaqqissaarniutitigut salloqittaatitigullu piunngitsutigut piiarneqaqqunasi, inunnit maligassarsiat . . . malillugit pisarmata.’ (Kulorsamiut 2:8) Taamaalilluni iliuuseqanngikkaluarluni Satanimit sunnertittoqarsinnaavoq taassumanngalu ’piiarneqarsinnaalluni’. Tamanna pujortarneq ajortut tupap pujuanik sunnerneqarnerannut assersuunneqarsinnaavoq. Tassa allat pujuannik najuussisarlutit sunnerneqarsinnaavutit.

Kisianni ’silaannarmik’ tamatuminnga najuussisariaqanngilatit. (Evfisumiut 2:2) Akerlianik Paulusip siunnersuutaa maleruarsinnaavat: ’Allanngoritsi isumassigut nutaanngorlusi, sianigileqqullusiuk sunaasoq Guutip peqqusaa ajunngitsoq iluarisassarlu naammalluinnartorlu.’ (Rûmamiut 12:2) Taamaaliussagaanni ilungersuussisariaqarpoq. (Ussatit 2:1-5) Eqqaamajuk Jehova kimigiiserfiginninneq ajortoq. Paasissutissiisarpoq, iluaqutigissagutsiguli tusarnaartariaqarparput eqqarsaatitsinnullu sunniuteqartittariaqarlugu. (Jesaja 30:20, 21; 1 Tásalûníkamiut 2:13) Sallusuissut ’Allakkat illernartut’, Guutip oqaasiata isumassarsiarititaasup, Biibilip, imarisaa isumatsinni pigiliukkusuttariaqarparput. — 2 Timûtiuse 3:15-17.

Guutimit ilusilersortittarit

Iluaqutissannik Guutimit ilusilersorneqassaguit naalakkusuttariaqarputit, tamannalu ersarissumik assersuusiorneqarpoq Jehovap pruffiiti Jeremias marriortup illuanukaqqummagu. Jeremiasip takuaa marriortoq ’sanaani iluatsinngikkaangat’ allamik sanalluni qanoq aallartitseqqittartoq. Jehovap taava oqarfigaa: „Ilissi Israelikkut marriortup taassuma iliorneratut iliorfigisinnaannginnerpassi? . . . Ilissi Israelikkut marrartut marriortup assaaniittutut uanga assanni ippusi.“ (Jeremia 18:1-6) Imali paasisariaqarpa Israelikkut Jehovap assaani marrartut uumassuseqanngitsutut ittuusimasut taassumalu piumasaminik ilusilersortarsimagai?

Jehovap Ajugaqanngitsutut pissaanini atunngisaannarpaa inuit piumasamik akerlianik iliortillugit; aamma suliat ajortumik kinguneqarpata akisussaaffiginngilai inuup marriortup akisussaatinneqarsinnaaneratut. (5 Moses 32:4) Iluatsinngitsoqartarpoq Jehovap ajunngitsumik ilusilersorniagai taassumannga siulersortikkumanngikkaangata. Taamaattumik marrarmit uumassuseqanngitsumit allaanerujussuuvutit. Illit nammineq piumasamik iliorsinnaatitaavutit. Tamatuma atorneratigut aalajangersinnaavat Jehovap ilusilersuilluni sunniinera ilassissanerlugu ajattussanerluguluunniit.

Tamanna tassaavoq ilinniutissaq pingaarutilik! Pitsaanerungaarpoq Jehovap oqaasiinut tusarnaaqqissaarneq pingaakujulluni ima oqarnermit: ’Kialuunniit oqarfigissanngilaanga qanoq iliussasunga’. Tamatta Jehovamit siulersorneqartariaqarpugut. (Juánase 17:3) Tussiaasiortoq David malinniaruk, taanna ima qinusimavoq: „Ingerlavigeqqusannik ilinniartinnga, [Jehova], aqqutigeqqusannik ajoqersuunnga!“ (Tussiaat 25:4) Kunngi Salomonip oqaasii eqqaamakkit: „Inuk sianisooq tamakkuninnga tusartoq suli annerusumik ilisimasaqalersittarpaat.“ (Ussatit 1:5) Illit tusaarusuppit? Taamaalioruit „isumatusaarnerup paarissavaatit, siuneqarnerullu sernigissavaatit“. — Ussatit 2:11. (wE 1/4 99)