Toqup kingorna inuuneq — Biibilimi qanoq allassimasoqarpa?

„Issumit pivutit, issunngussaatillu.“ — 1 MOSES 3:19.

1, 2. (a) Toqup kingorna inuuneq pillugu inuit qanoq assigiinngitsunik isumaliuteqartarpat? (b) Tarneq pillugu Biibili qanoq ajoqersuuteqarnersoq paasisinnaassagutsigu suna paaseqqaartariaqarparput?

„NAASSAANNGITSUMIK anniartitsinermik isumaliutersuut Guutimik pinngortitaminut asannittumik upperisamut naapertuutinngilaq. . . . Ukiualunnguani kukkuluttortarsimanerit pillugit, iluarsiniarnissaannut periarfissinneqarnaniluunniit, tarnip naassaanngitsumik pillagaanissaanik upperisaqarneq silaqassutsimut sumulluunniit akerliuvoq,“ hindu isumaliutersortartoq Nikhilananda taama oqarsimavoq.

² Ullumikkut inuppassuit Nikhilananda isumaqatigalugu naassaanngitsumik anniartitaanissamik ajoqersuut iluarinngilaat. Allat nirvanamik isumaliutersuut taomillu ataasioqatiginnilernissamik isumaliutersuut paasiuminaatsittarpaat. Allaat uppernertik Biibilimik tunngaveqarnerarlugu oqartartut akornanni tarnip suunera toquguttalu tarneq qanoq pissanersoq assigiinngitsunik isumaqarfigineqarput. Biibilili tarneq pillugu qanorpiaq ajoqersuuteqarpa? Tamanna akissutissarsiniarlugu oqaaseq hebriiarisooq oqaaserlu griikerisooq Biibilimi „tarneq“-mik nutserneqartut qanoq isumaqarnersut paasiniartariaqarparput.

Tarneq Biibili naapertorlugu

3. (a) Oqaaseq Allakkani Hebriiarisuuniittoq suna „tarneq“-mik nutserneqartarpa; qanorlu isumaqavippa? (b) 1 Moses 2:7-imi qanoq takutinneqarpa oqaatsimi „tarneq“-mi inuk tamarmi pineqartoq?

³ Oqaaseq hebriiarisooq „tarneq“-mik nutserneqartoq tassaavoq næʹfæsj, oqaaserlu taanna Allakkani Hebriiarisuuni 754-eriarluni atorneqarpoq.  Næʹfæsj qanoq isumaqarpa? Oqaatsinik qinerlerfissiaq The Dictionary of Bible and Religion naapertussagaanni oqaatsimi tamatumani pineqarajuppoq „pinngortitaq uumassuseqartoq tamarmi, inuk tamarmi“. Assersuutigalugu, Mosesimik allakkat siulliit 2:7-imi Jehova Guutip issumit inuliorneranik allaaserisaq issuarlugu Korintumiunut agdlagkat sujugdlît 15:45-mi ima allassimavoq: ’Inuk siulleq, Adam, tarninngorpoq uumasoq.’ Malugiuk biibilini kalaallisuunngortitani ilaatigut nutserneqarsimasutut allassimanngimmat Adam tarnilinngortoq, kisianni allassimalluni tarninngortoq — soorlu nakorsanngortoq tassaalersartoq nakorsaq. Taamaattumik oqaatsimi „tarneq“-mi inuk tamarmi pineqarpoq.

4. Kristumiut Allagaataanni Griikerisuuni oqaaseq suna „tarneq“-mik nutserneqartarpa; oqaaserlu qanorpiaq isumaqarpa?

⁴ Oqaaseq Kristumiut Allagaataanni Griikerisuuni 100-t sinnerlugit „tarneq“-mik nutserneqartoq tassaavoq psychēʹ. Soorlu næʹfæsj-imi taamaattoq oqaatsimi tamatumani inuk tamarmi pineqarpoq. Oqaatsit makku malugeriakkit: ’Maanna tarniga siooravoq.’ (Johannes 12:27) ’[Tarnillu] tamarmik siooralerput.’ (apustilit suliait 2:43) ’Inuit [oqaatsimit „tarneq“-mik isumalimmit nutsigaq] tamarmik naalakkersuisunut akimanernut naalattuugilit.’ (Rûmamiut 13:1) ’[Tarnit] nikallortut tuppallersarsigik.’ (1 Tásalûníkamiut 5:14) ’Tamannami inuit qassinnguit (tamassa tarnit arfineq-pingasut) annaffigaat imikkut.’ (1 Pîtruse 3:20) Psychēʹ-mi, soorlu næʹfæsj-mi taamaattoq, nalunanngitsumik inuk tamarmi pineqarpoq. Oqaatsinik qinerlerfissialiortoq Nigel Turner naapertussagaanni oqaaseq psychēʹ isumaqarpoq „inuup, kinaassusillip, timip Guutip rûah-nik [anersaavanik] najuussisimasup ilisarnaataa. . . . Inuk tamarmi pineqarpoq.“

5. Uumasut tarniuppat? Nassuiaruk.

⁵ Oqaaseq „tarneq“ inunnuinnaanngitsoq Biibilimi atorneqarpoq, aammali uumasunut atorneqarluni. Assersuutigalugu uumasut imarmiut pinngortinneqarnerat Môrsasip agdlagai sujugdlît 1:20-mi allaaserineqarpoq. Guuti ima peqqusivoq: ’Imaq ujamerialerli uumasunik tarnilinnik ujamerissanik.’ Ullup pinngortitsiffiup tulliani Guuti ima oqarpoq: ’Nunamit pinngorlit uumasut tarnillit, tamarmik immikkut pissusillit: nersutaatit, paarmortullu, nunallu nersutai, tamarmik immikkut pissusillit.’ — 1 Môrsase 1:24; naleqqiuguk Môrsasip agdlagaisa sisamait 31:28.

6. Oqaatsimik „tarneq“-mik Biibilip atueriaasia qanoq oqaatigineqarsinnaava?

⁶ Tassa Biibilimi oqaaseq „tarneq“ atorneqaraangami pineqartarpoq inuk uumasorluunniit imaluunniit inuup uumasulluunniit inuunera. (Takujuk  quppernermi 14-imi ungaluusaq.) tarnip suuneranik Biibilip nassuiaataa paasiuminartuuvoq, aalajangersimaqqissaarluni inuillu isumaliutersuutaannit paasiuminaatsunit upperisapalaavinillu sunnersimaneqarani. Taamaattumik ima aperisariaqarpugut: Inuk toqugaangat tarneq qanoq pisarpa?

Toqungasut ilisimanngillat

7, 8. (a) Biibilimi toqungasut qanoq innerat qanoq oqaatigineqarpa? (b) Biibilimi allassimaffinnik tarnip toqusinnaaneranik takutitsisunik eqqaasaqarit.

⁷ Toqungasut qanoq innerat Nalunaajaasup oqaasii 9:5, 10-mi erseqqissumik allaaserineqarpoq: ’Toqungasut sunnguamilluunniit ilisimasaqanngillat . . . toqusut inaanni ornikkanni suliassaqanngilaq pilersaarusiorfissaqaraniluunniit, ilisimasassanillu ilisimassummilluunniit pissarsiassaqarani.’ Aap, toqu tassaavoq piunngissuseq. Tussiaasiortorlu allappoq inuk toquguni ’kingumut issunngussasoq, pilersaarutaalu ulloq taanna maangaannassasut’. (Tussiaat 146:4) Tassa toqungasut ilisimanngillat susinnaanatillu.

⁸ Guutip Adamimut eqqartuussut nalunaarutigigamiuk ima oqarpoq: ’Issumit pivutit, issunngussaatillu.’ (1 Moses 3:19) Adam Guutip issumit pinngortinngikkallarmani uumassusilinngikkallarmanilu piunngilaq. Toqugami piunngissutsimut tamatumunnga uterpoq. Pillaatisiaa tassaavoq toqu — tassaanngitsoq silarsuarmut allamut pisinneqarneq. Adam toqummat tarnaa qanoq piva? Eqqaamassavarput oqaaseq „tarneq“ Biibilimi atorneqaraangat pineqaannartarmat inuk nammineq. Taamaattumik oqarutta Adam toqusoq, isumaqarpoq tarneq Adamimik atilik toqusoq. Immaqa tamanna tarnip toqujuitsuuneranik upperisaqartunut eqqumiikkaluarpoq. Biibilimili allassimavoq: „Inuk [tarneq] ajortuliortoq taanna kisimi toqussaaq.“ (Hesekiel 18:4) Mosesimik allakkat pingajui 21:1-imi ’inuk [tarneq] toqungasoq’ eqqartorneqarpoq. Nasiræerillu peqquneqarsimapput ’[tarnip] toqusup timaanik pallitaqassanngitsut’. — 4 Moses 6:6.

9. Biibilimi oqaatigineqarmat Rakelip ’tarnaa anisoq’ qanoq paasisariaqarpa?

⁹ Kisianni Môrsasip agdlagai sujugdlît 35:18-imi Rakelip aappassaanik ernertaarnermini toqunera alianartoq ima eqqaaneqarpoq: ’Tarnaalu animmat, toqugamimi, Ben-Onimik atserpaa, angutaatali Benjaminimik taavaa.’ Allassimaffiup tamatuma ersersippaa Rakel iluminiittoqarsimasoq toqunermini qimaguttumik? Naamik. Eqqaamassavarput oqaaseq ’tarneq’ aamma isumaqarsinnaammat inuuneq inuup pigisaa. Taamaattumik pisumi tassani oqaaseq „tarneq“ isumaqaannarpoq Rakelip ’inuunera’. Taamaattumik ’Tarnaa animmat’ „Testamentitoqaq“-mi kalaallisuunngortitami nutaami nutserneqarsimavoq „Rakel anerningilerluni“, nutsikkanilu allani „inuunini naalermat“ (Knox) kiisalu „inuunermi qimammani“ (Bible in Basic English). Arlaannik eqqumiitsumik Rakelip ilaanik toqunerata kingorna uumaannartoqarsimaneranik malunnartoqanngilaq.

10. Uillarnerup ernerata toqumit makititaasup tarnaata uternera qanoq paasisariaqarpa?

¹⁰ Taamatuttaaq ippoq uillarnerup erneranik oqaluttuaq kúnginik agdlagkat sujugdlît, kapitali 17-imi oqaluttuarineqartoq. Versi 22-mi allassimavoq Elias nukappiaqqamik qinnussisoq, ’nipaalu Jehovap tusaraa merlertup tarnaa iluanut utertillugu uummartillugulu’. Aamma tassani ’tarneq’ isumaqarpoq ’inuuneq’. Taamaattumik kalaallisuunngortitami atortussaatitaasumi nutaami ima nutserneqarsimavoq: „Nukappiaraq anersaartoqqilerpoq uummarlunilu.“ Aap, nukappiaqqamut utertoq tassaavoq inuuneq, tassaanani suna tigussaanngitsoq. Tamanna nukappiaqqap anaanaanut Eliasip oqaasiinut naapertuuppoq: „Takuuk, ernerit [inuk kinaassusilik tamarmi] uuavoq.“ — 1 Kunngit 17:23.

Anersaaq suua?

11. Sooq oqaaseq „anersaaq“ inuup ilaanut timitaqanngitsumut toqup kingorna uumaannartartumut tunngasinnaanngila?

¹¹ Biibilimik nutsikkat ilaanni allassimavoq inuk toqugaangat ’anersaavata qimattaraa, kingumullu issunngorluni’. (Tussiaat 146:4, NV) Tassa imaappa inuup toqunerata kingorna anersaap timitaqanngitsup timi qimattaraa uummaannarlunilu? Taamaannavianngilaq, tussiaasiortormi aamma oqarpoq inuup ’pilersaarutai ulloq taanna maangaannartartut’ (’eqqarsaatai tamarmik soraartartut’, The New English Bible). Taavami anersaaq suua, qanorlu ililluni inuk toqugaangat ’qimaguttarpa’?

12. Oqaatsit hebriiarisuut griikerisuullu Biibilimi „anersaaq“-mik nutserneqartartut qanoq isumaqarpat?

 ¹² Oqaatsip Biibilimi „anersaaq“-mik nutserneqartup (hebriiarisut: ruʹach; griikerisut: pneuʹma) nagguigaa oqaluut „anersaartorpoq“-mik isumaqartoq. Biibilimi kalaallisuunngortitami nutaami „anersaavata qimappaa“-mik nutsernagu allassimavoq ’anerningertoq’. (Tussiaat 146:4) Oqaaserli „anersaaq“ „anerneq“-mit isumaqarnerujussuuvoq. Nunarsuaq tamakkerlugu ulersuaqarnerani inuit uumasullu nungutitaasut pillugit Mosesimik allakkat siulliit 7:22-mi ima allassimavoq: „Qinngamikkut uumassutaasumik anersaaqartut [hebriiarisut: ruʹach], tassa nunamiittut tamarmik, toqupput.“ Tassa oqaaseq „anersaaq“ isumaqarsinnaavoq uumassut pinngortitani uumassuseqartuni tamaniittoq, inunni uumasunilu, anersaartornikkullu atatinneqartoq.

13. Toqunermi anersaap Guutimut utertarnera qanoq paasisariaqarpa?

¹³ Soormiuna Nalunaajaasup oqaasii 12:7-imi oqaatigineqartoq inuk toqugaangat ’anersaaq Guutimut tunniussisiminut utertartoq’? Tassa imaappa anersaaq iluamik oqaatigalugu silaannarsuakkoorluni Guutimut utertartoq? Naamerluinnaq. Eqqaamassavarput anersaaq tassaammat uumassut. Uumassut peerukkaangat Guuti kisimi uumassuseqalersitseqqissinnaavoq. Anersaaq ’Guutimut tunniussisiminut utertarpoq’, tassa inuup siunissami inooqqilernissaminut periarfissaa Guutip aalajangigassarilersarpaa. Guutip kisimi inuk anersaaqalerseqqissinnaavaa imaluunniit uumassuseqalerseqqissinnaavaa inuunermut utertillugu. (Tussiaat 104:30) Tamannali Guutip siunertaraa?

’Makissaaq’

14. Lazarusip qatanngutai arnat qatanngutiminnik annaasaqartut tuppallersarniarlugit Jesus qanoq oqarpa?

¹⁴ Illoqarfeeqqami Betaniami, Jerusalemimit kilometerisut pingasutut ungasitsigisumiittumi, Mariap Martallu qatanngutimik Lazarusip piaarpallaartumik toqunera aliasuutigaat. Jesusip aliasoqatigai, Lazarus qatanngutaalu arnat asagamigit. Jesusip qanoq ililluni arnat taakku tuppallersarsinnaavai? Oqalualaarummik pinnani sallusuissummilli oqaluttuunnerisigut. Jesus ima oqaannarpoq: ’Qatanngutit makissavoq.’ Taava Jesus ilivermukarpoq Lazarusilu makitillugu — angut ulluni sisamani toqungasimasoq uummarteqqippaa! — Juánase 11:18-23; 38-44.

15. Jesusip oqaasii iliuusaalu Martap qanoq qisuariarfigai?

¹⁵ Martap tupigusuutiginerpaa Jesus oqarmat Lazarus ’makissasoq’? Taamaagunanngilaq, ima akimmat: Nalunngikkaluarpara ullut naggatissaanni makiffissami makikkumaartoq.’ Marta makinnissamik neriuummut uppissuseqareerpoq. Jesusip akivaa: ’Uanga makissutaallungalu inuussutaavunga; uannut uppertoq naak toqugaluaruni inuussavoq.’ (Juánase 11:23-25) Lazarusip tupinnartuliornikkut uummarteqqinneqarnera Martap uppernermigut nakussatsinneqarneranik inuillu allat uppertunngornerannik kinguneqarpoq. (Juánase 11:45) Oqaaserli ’makinneq’ qanorpiaq isumaqarpa?

16. Oqaaseq „makinneq“ qanoq paasisariaqarpa?

¹⁶ Oqaaseq „makinneq“ nutsigaavoq griikerit oqaasiannit anaʹstasis-imit, toqqaannartumik isumaqartumit „makeqqinneq“. Griikerisuumit hebriiarisuunngortitsisut anaʹstasis nutsersimavaat oqaatsimik isumaqartumik „toqusunik uummartitseqqinneq“ (hebriiarisooq techījathʹ hammethīmʹ). * Makinnerup nassataraa inuup uumassuseqannginnerminit makititaanera inooriaatsimigullu ingerlaleqqissitaanera.

17. (a) Sooq Jehova Guutip Jesus Kristusillu inunnik toqumit makititsinissartik sapersaatiginavianngilaat? (b) Iliverniittut pillugit Jesus qanoq neriorsuisimava?

¹⁷ Jehova Guuti killeqanngitsumik ilisimassuseqarami tamakkiisumillu eqqaamasinnaassuseqarluni, nalornisiginagu inummik makititsisinnaavoq. Toqusimasut inooriaaserisimasaat — inuttut pissusii, inuunerisa oqaluttuassartaat kinaassutsimikkullu ilisarnaataat tamaasa — eqqaamanissaat ajornakusoortinngilaa. (Job 12:13; naleqqiuguk Jesaja 40:26.) Soorlu Lazarusimut pisimasup takutikkaa aammattaaq Jesus Kristus toqusunik makititsisinnaavoq makititsinissamullu piumassuseqarluni.  (Naleqqiuguk Lúkarse 7:11-17; 8:40-56.) Aap, Jesus oqarpoq: ’Ullut nalliukkumaarput, taava iliverniittut tamarmik taassuma nipaa tusarumaarpaat; anillutillu makissapput.’ (Juánase 5:28, 29) Jesusip neriorsuutigaa inuit Jehovap eqqaamasai tamarmik makititaajumaartut. Taamaalilluni Biibilimi nalunaatsumik ersersinneqarpoq tarneq toqusartoq, toqumillu kipititsisinnaasutuaq tassaasoq makititaaneq. Kisianni inuit toqusimasut milliardilippassuupput. Taamaattumik kikkut makititaassappat?

18. Kikkut toqumit makititaassappat?

¹⁸ Jehovamut kiffaasimasut naapertuilluartumik inuusimasut makititaassapput. Aammali inoqarpoq millionilikkuutaanik Guutip najoqqutassiaanik naapertuilluartunik malinnikkumanerminnik ersersitsinissaminnut periarfissaqarsimanatik toqusimasunik. Immaqa Jehovap piumasaqaatai tusarsimanngilaat imaluunniit pisariaqartumik allannguinissaminnut naammattumik piffissaqarsimanatik. Aammattaaq inuit taamaattut Guutip eqqaamavai taamaattumillu makititaassapput, Biibilimimi ima neriorsuuteqarpoq: ’Toqusut makikkumaarput, iluartut iluaatsullu.’ — apustilit suliait 24:15.

19. (a) Toqusut makititaanerannut tunngasumik apustili Johannes sumik takorruisitaasimava? (b) Suut ’tatsimut innerusumut igitaappat’, tamannalu qanoq isumaqarpa?

¹⁹ Apustili Johannes makititaasunik Guutip issiavissaarsuata saaniittunik alutornaqisumik takorruuisitaasimavoq. Takusani ima allaaserisimavai: ’Immallu toqusut imminiittut tunniuppai, toqullu toqusullu inaata toqusut imminniittut tunniuppaat; eqqartuunneqarpullu nungullutik suliatik naapertorlugit. Toqulu toqusullu inaat tatsimut innerusumut igitaapput. Tassa toqup aappaa, taseq innerusoq.’ (sarĸúmersitat 20:12-14) Eqqarsaatigeriaruk tamanna qanoq isumaqarnersoq! Toqusimasut Guutip eqqaamasai tamarmik ’toqusut inaannit’, inuiaat ataatsimut iliveqarfiannit, aniguisitaassapput. (Tussiaat 16:10; apustilit suliait 2:31) Taavagooq ’toqu toqusullu inaat’ iginneqassapput ’tatsimik innerusumik’ taaneqartumut, suujunnaarsitaalluinnarnermut assersuutaasumut. Tassa inuiaat ataatsimut iliveqarfiat atorunnaassaaq.

Siunissaq nuanningaartoq!

20. Toqusimasut millionilikkuutaat avatangiisini qanoq ittuni makititaassappat?

²⁰ Inuit millionilikkuutaat toqumit makititaagunik nunarsuarmi inoqanngitsumi uummartitaanavianngillat. (Jesaja 45:18) Alianaatsumik avatangiisilimmi uummartitaassapput, inissaqareerlutik, atisassaqareerlutik naammattorsuarnillu nerisassaqareerlutik. (Tussiaat 67:7; 72:16; Jesaja 65:21, 22) Tamakku kikkut isumagereersimassagamikkik?  Nunarsuarmi toqusunik makititsineq sioqqullugu silarsuarmi nutaami inuulereersimasut. Kikkut?

21, 22. ’Ullussani kingullerni’ inuusut qanoq nuanningaartumik siunissaqarsinnaappat?

²¹ Biibilimi siulittuutit eqquussornerisa takutippaat pissutsit aaqqissuussaanerata matuma ’ullussaani kingullerni’ inuusugut. * (2 Timûtiuse 3:1) Ungasinngitsukkut Jehova Guuti inuit akornanni pissutsinut akuliutissaaq nunarsuarmilu ajussuseq piiarlugu. (Tussiaat 37:10, 11; Ussatit 2:21, 22) Taamanikkussamut Guutip kiffai aalajaatsut qanoq pineqassappat?

²² Jehovap naapertuilluartut guutiitsunut peqatigitillugit nungutinnavianngilai. (Tussiaat 145:20) Taamaaliunngisaannarsimavormi, nunarsuarlu ajortuialeruniuk taamaaliornavianngilaq. (Naleqqiuguk Mosesimik allakkat siulliit 18:22, 23, 26.) Biibilimmi atuagartaani kingullermi eqqartorneqarput ’amerlangaartut kisinneqarsinnaanngitsut, inuiaqatigiit immikkullu naggueqatigiissut immikkullu inuiaasut immikkullu oqaasillit tamarmik ilaat’. (sarĸúmersitat 7:9-14) Aap, inuit ’amerlangaartut’ annikilliornartussarsuarmi silarsuarmik guutiitsumik maannakkut atuuttumik nungutitsiffiusumi aniguissapput, Guutillu silarsuassaanut nutaamut isersinnaatitaalissallutik. Tamaani inuit Guutimut naalakkusuttut Guutip inuit ajortimit toqumillu aniguisinniarlugit aaqqissuussimasai tamakkiisumik iluaqutigisinnaalissavaat. (sarĸúmersitat 22:1, 2) Taamaattumik ’amerlangaartut’ toqunngisaannarsinnaassapput. Ilumut siunissaq asseqanngitsoq!

Inuuneq toqu pinnagu

23, 24. Nunarsuarmi paratiisiusumi naassaanngitsumik inuulerumaguit qanoq iliortariaqarpit?

²³ Neriuutip tupinnangaartup tamatuma piviusunngornissaa tatigisinnaavarput? Aap! Jesus Kristusimi oqarsimavoq piffissaq inuit toqusarunnaarfissaat nalliukkumaartoq. Ikinngunni Lazarus toqumit makitinngitsiarlugu taanna Martamut ima oqarsimavoq: ’Inuusoq uannut uppertoq kinaluunniit toqunaviassanngilaq.’ — Juánase 11:26.

²⁴ Nunarsuarmi paratiisiusumi naassaanngitsumik inoorusussinnaavit? Asasatit toqusimasut takoqqikkusukkaluarpigit? ’Silarsuaq pilerinartuilu nungujartorput; Guutilli peqqusaanik naammassinnittoq naassaanngitsumik atassavoq,’ apustili Johannes taama allassimavoq. (1 Juánase 2:17) Maannakkut Guutip piumasaata ilinniarnissaanut maleruarnissaanullu piffissanngorpoq. Taamaalioruit inuit millionilikkuutaat maannakkut Guutip peqqusaanik naammassinnittartut ilagalugit paratiisimi nunarsuarmiittumi naassaanngitsumik inuusinnaavutit. (wE 1/4 99)

[Quppernerup ataani ilanngussat]

Eqqaamavigit?

□ Biibilimi oqaatsit „tarneq“-mik nutserneqartartut qanoq isumaqavippat?

□ Toqunermi tarneq qanoq pisarpa?

□ Biibili naapertorlugu toqumut aaqqiissutissaq sunaava?

□ Aalajaatsut ullumikkut inuusut qanoq nuanningaartumik siunissaqarpat?

[Atuaqqissaarnermi apeqqutit]

[Qupp. 14-imi ungalusaq]

Oqaaseq „tarneq“ pinngortitatut inuunermut atorneqartoq

Oqaaseq „tarneq“ inuup uumasulluunniit inuuneranut ilaannikkut atorneqartarpoq. Tamannali Biibilip tarnermik nassuiaataanik, tassa tarneq tassaasoq inuk uumasorluunniit, allanngortitsinngilaq. Assersuutigalugu oqartarpugut inuk uumasoq, tassa uumassuseqartoq. Biibilip oqariartaasia atorlugu oqassagutta oqassaagut inuk taanna tarniusoq. Oqartoqartarportaaq inuunermik pigisaqartoq. Biibilillu oqariartaasia malillugu oqassagutta oqassaagut tarnermik pigisaqartoq.

Assersuutigalugu, Guuti Mosesimut ima oqarsimavoq: ’Angutit taakku inuussutsinnik qinuginnittut tamarmik toqupput.’ (2 Môrsase 4:19) Toqqaannartumik nutserlugu Mosesip akeraasa taassuma tarnaa persarisimavaat. (4 Môrsase 4:19; naleqqiukkit Jôrsua 9:24; ússatit 12:10.) Jesusip aamma oqaaseq taanna atorpaa oqarami: ’Inuup Ernera kiffartussalluni inuuninilu akissatut tunniussallugu [tikiuppoq]’ (Matîuse 20:28; naleqqiuguk 10:28.) Tamakkunani oqaaseq ’tarneq’ isumaqarpoq ’inuuneq’.

[Suminngaanneernera]

Mitsuitsoq: U.S. Fish and Wildlife Service, Washington, D.C./Dean Biggins

[Qupp. 14-imi assiliartat]

Tamarmik tarniupput

[Qupp. 17-imi assiliartaq]

Jesusip takutissimavaa toqumut aaqqiissutissaq tassaasoq makinnissaq

[Qupp. 18-imi assiliartaq]

’Inuusoq uannut uppertoq kinaluunniit toqunaviassanngilaq.’ — Juánase 11:26