Atuartartut apeqqutaat

Jehovap nalunaajaasuisa ilaat upperisarsiortut illuutaannut pigisaannulluunniit tunngasumik suliffittaarnissamik neqeroorfigineqarsimapput. Suliffik taama ittoq pillugu Biibili qanoq oqarpa?

Apeqqut tamanna kristumiunut inoqutiminnik timip piisigut pilersuinissaq pillugu Timûtiusimut agdlagkat sujugdlît 5:8-mi allassimasumik maleruaarusuttunut soqutiginarsinnaavoq. Kristumiut tamanna maleruartariaqarpaat, tamatumali qanorluunniit ittumik suliffittaarsinnaatinngilaat. Nalunngilaat Guutip piumasaa pillugu Biibilimi qanoq allassimasoqartoq eqqumaffigisariaqarlugu. Ilaquttaminik pilersuerusunnerup assersuutigalugu kanngunartuliorneq toqutsinerlu pillugit Biibilimi inatsisinut unioqqutitsinerit naapertuilluartunngortinngilai. (Naleqqiutikkit 1 Moses 39:4-9; Jesaja 2:4; Juánase 17:14, 16.) Aammattaaq Babylonimit Angisuumit, silarsuaq tamakkerlugu eqqunngitsumik upperisarsiornerup naalagaaffissuanit, aninissamik peqqussut naapertorlugu kristumiut iliuuseqarnissaat pingaaruteqarpoq. — sarĸúmersitat 18:4, 5.

Silarsuarmi tamarmi Guutip kiffai suliffimmut tunngasut assigiinngitsorpassuit naammattoortarpaat. Naammattoorneqarsinnaasut tamakku tamaasa eqqartornissaat aalajangersimasunillu maleruagassiornissaat sianiitsuliornerussaaq, uagullu tamaaliornissatsinnut pisussaatitaanngilagut. (2 Korintumiut 1:24) Kristumiulli suliffissaminnik nammineerlutik qinersigaangamik eqqarsaatigisariaqagaasa ilaat tikkualaartigik. Tamakkua ilaat Vagttårnet-imi 15. oktobari 1982-imoortumi nalunngeqatiginnissutsip Guutimeersup qanoq iluaqutigineqarsinnaanera pillugu naatsumik allaaserineqarput. Qupperneq 22-mi ungalusami tunngaviusunik marlunnik apeqquteqarpoq aalajangiiniarnermilu iluaqutaasinnaasut allat eqqaaneqarlutik.

Tunngaviusumik apeqqut siulleq imaappoq: Suliffiua Biibilimi assuarineqartoq? Vagttårnet-ip akissutaani allassimavoq tillinneq, aammik atornerluineq guutipilussiornerlu Biibilimi assuarineqartut. Kristumiup Guutip iluarinngisaanik taamaattunik siuarsaanermut toqqaannartumik suliffeqarneq ingalassimasariaqarpaa.

Apeqqutip aappaa imaappoq: Taamatut suliaqarnikkut assuarineqartumut pisooqataasoqarsinnaava? Ersarippoq aningaasanoortarfinni, naartuersittarfinni atortittartulluunniit illuutaanni sulinikkut Biibilerpalaanngitsumut peqataasoqartartoq. Sumiiffinni taamaattuni natermik asaanerinnaagaluarpalluunniit oqarasuaammilluunniit paarsinerinnaagaluarpat Guutip oqaasiani assuarineqartumut pisooqataassaaq.

Kristumiorpassuit suliffimmut tunngatillugu aalajangiisariaqalersimasut paasisimavaat apeqqutinik taamaattunik eqqarsaateqarneq nammineerlutik aalajangiinissaminnut iluaqutigisimallugu.

Assersuutigalugu apeqqutit tamakkua marluk iluaqutiginerisigut paasinarpoq sooq Guutimut ilumoortumik pallorfiginnittoq eqqunngitsumik upperisarsiornikkut peqatigiiffimmut toqqaannartumik sulisinnaanngitsoq oqaluffimmullu tunngasunik oqaluffimmiluunniit suliaqarluni. sarĸúmersitat 18:4-mi allassimavoq: ’Taassumannga anigitsi innuttakka, ajortaasigut peqatigileqinavarsi.’ Upperisarsioqatigiinni eqqunngitsumik ajoqersuutilinni suliffeqartoq Babylonip Angisuup suliaanut ajortaanullu pisooqataassaaq. Sulisup naatsiivilerisuuguni, viceværtiuguni, sanasuuguni kukkunersiuisuuguniluunniit guutisiorneq upperisamut ilumoortumut akerliusoq siuarsassavaa. Aammattaaq oqaluffimmik kusassaasoq, aserfallatsaalisoq upperisarsioqatigilluunniit upperisarsiornikkut suliaannik suliaqartoq inuit takugunikku upperisarsioqatigiinnut taakkununnga atassusissavaat.

Taavami aalajangersimanngitsumik oqaluffimmut upperisarsiortulluunniit peqatigiiffianut sulineq pineqarpat? Immaqa ajutoornermi naqqup ataani erngup aqqutaanik ussiitsumik ussissaajartoqquneqarpoq. Oqaluffiup qalia nutarterniarlugu oqorsarniarluguluunniit neqerooruteqarnermik atsiornermillu allaanerulluinnanngila?

Tamatumani aamma assigiinngitsorpassuit takorloorneqasinnaapput. Taamaattumik Vagttårnet-imi sammineqartut tallimat sammineroriartigik:

1. Nalinginnaasumik kiffartuussinerua immini Biibilimut akerliunngitsoq? Allakkerisartoq assersuutigeriartigu. Allakkanik agguaassiffigisaani oqaluffeqarnera naartuersittarfeqarneraluunniit piinnarlugu oqartoqarumanaviarunanngilaq Biibilimi assuarineqartumik siuarsaasoq. Guutip illut tamaasa, aamma oqaluffiit naartuersittarfiillu, seqinnerfigitittarpai. (apustilit suliait 14:16, 17) Kristumiu allakkerisartuusoq isummersinnaavoq allakkanik agguaassiffigisartakkaminiittut tamaasa nalinginnaasumik ulluinnarni kiffartuullugit. Kristumiu ajutoornermi suliartoqquneqartoq aamma taamatut isummersinnaavoq. Ruujorilerisuusinnaavoq oqaluffimmi immattoornermut suliartoqquneqartoq annaassiniartartorluunniit naalagiarnerup nalaani ajortittumik annaassiniartoq. Marluullutik pissutsit inoqammut ikiuinissamut periarfissatut isigisinnaavaat.

2. Pineqartoq pisunut qanoq annertutigisumik oqartussaassuseqarpa? Kristumiu pisiniarfiutilik upperisarsiornikkut assilissanik, aarnussanik, cigarettinik aammilluunniit pølsilianik nioqquteqarnaviarunanngilaq. Pisiniarfimmik piginnittutut susoqarnera aalajangersinnaavaa. Aningaasanik iluanaarnerussammat cigarettinik upperisarsiornikkulluunniit assilissanik nioqquteqaqqullugu immaqa kajumissaarneqarpoq, aalajangiusimanninninili Biibilimik tungaveqartoq naapertorlugu iliuuseqassaaq. Pissutsit allaapput kristumiu inuussutissanik niuertarfissuarmi sulilluni karsimeeqquneqarpat, natermik qillissaaqquneqarpat allaffimmiooqquneqapalluunniit. Niuertarfimmi inniminnerneqartut tuniniarneqartullu immaqa assuarineqarsinnaapput, assersuutigalugu cigarettit pisiassallu upperisarsiornikkut nalliuttunut tunngasut, sulisulli tamakku sunniuteqarfiginngilai. *  (Naleqqiutikkit Lúkarse 7:8; 17:7, 8.) Tamanna apeqqummut tulliuttumut tunngassuteqarpoq.

3. Pineqartoq qanoq annertutigisumik akuliussimava? Niuertarfik pillugu assersuut uterfigeriartigu. Sulisup karsimi issiasup ilisivinnulluunniit ilioraasup ilaannikkuinnaq cigarettinik nioqqutissanilluunniit upperisarsiornermut tunngasinnaasunik pisiniartitsisassagunarpoq. Ulluinnarni suliaasa ilaminiinnaraa. Pissutsilli allaanerulluinnassapput niuertarfiup tupaarniarfittaani sulippat. Taava sulinera tamarmi, ullut tamaasa, kristumiut upperisaannut akerliusumut tunngassaaq. (2 Korintumiut 7:1) Tamatuma takutippaa suliffimmut tunngasunik aalajangiiniarnermi eqqunngitsumut qanoq annertutigisumik akuliusimatigissanerluni attassuteqartigissanerluniluunniit nalilertariaqartoq.

4. Kimit akissarsiaqassava, suliarlu sumi ingerlanneqassava? Pissutsit atuussinnaasut marluk eqqarsaatigeriartigik. Naartuersittarfiup avataaniit isigineqarnini pitsannguallatsinniarlugu, illup eqqaani aqqusernit ipiitsuutinniarlugit kusarnartuutinniarlugillu angummik sulisutaarniarlutik aalajangerput. Naartuersittarfimmit akissarsisarpoq, tassanili sulisanngilaq, ullorlu naallugu naartuersittarfimmi takuneqarneq ajorpoq. Tamanut kiffartuussisutut takuneqartarpoq, kimilluunniillu akissarsisaraluaruni, suliaa Biibilip ajoqersuutaanut akerliunngilaq. Pissutsit aappaat allaanerulluinnarpoq. Nunami atortittarnermik inatsisitigut akuersisumi peqqinnissamik isumaginnittoqarfiup peqqissaasoq atortittartut illuutaanni peqqinnissamik misissuisutut nappaatit kinguaassiuutitigut tunillaattartut tunillaattarnerat annikillisinniarlugu sulinera akilerneqartarpaa. Peqqinnissamik isumaginnittoqarfimmit akissarsisaraluarluni atortittartut illuutaanniinnaq kanngunartuliorneq ulorianarpallaarunnaartinniarlugu akuerisaanerulersinniarlugulu sulisarpoq. Assersuutit tamakkua takutippaat sooq kimit akissarsiaqartinneqarnerluni sumilu sulisassanerluni eqqarsaatigisariaqartoq.

5. Suliaq pineqartoq suliarigaanni qanoq sunniuteqassava? Nammineq nalunngeqatiginnissuseq ajoquserneqarsinnaava allanilluunniit mamiatsatsitsisinnaava? Nammineq allallu nalunngeqatiginnissusiat soqutigisariaqarpoq. Suliaq aalajangersimasoq (sumi sulineq akissarsinerlu ilanngullugit) kristumiut amerlanersaasa isaanni akuersaarnarsinnaagaluartoq, immaqa ataatsip suliarissaguniuk nalunngeqatiginnissusia ajoquserneqassaaq. Apustili Paulus maligassiuilluarsimasoq oqarpoq: ’Isumalluarpugut sumik ilerasuutigisaqarnata, tamatigut assuarnaatsutut iliorniaratta.’ (Eprîarit 13:18) Eqqissiunnaarutigisatsinnik suliaqartariaqanngilagut, allalli nalunngeqatiginnissusiisa allatut oqaluttuuppatigik assuarinnippalussanngilagut. Akerlianilli kristumiu immaqa isumaqarpoq suliaq aalajangersimasoq Biibilimut akerliunngitsoq, paasisimavaali tamanna suliffigileraluaruniuk ilagiinni innuttaaqatigiinnilu amerlasuut eqqissiunnaarutigissagaat. Paulusip isuma eqqortoq ima oqarluni ersersippaa: ’Taama iliorpugut kimulluunniit naakkiussutiginaveersarluta kiffartuutigisarput assuarineqaqqunagu; tamatigulli Guutip kiffaasut malunnartinniarpugut.’ — 2 Korintumiut 6:3, 4.

Oqaluffiulli illutaanut tunngasumik sulineq pillugu apeqqut pingaarnerusoq uterfigeqqeriartigu, assersuutigalugu nutaanik igalaalernera, natersuaanik saliineq kiassaataanilluunniit aserfallatsaaliniarlugu misissuineq. Qulaani pineqartut qanoq ilillutik sunniuteqarpat?

Oqartussaanermut apeqqut eqqarsaatigeqqeriartigu. Kristumiup nammineerluni suliffiutigaa pisortaaffigaluguluunniit, oqaluffimmi taamaatut suliaqassanerluni nammineerluni aalajangersinnaallugu? Kristumiup taama ittumik oqartussaassuseqartup upperisarsioqatigiit pallorfigininnermik eqqunngitsumik siuarsaanerannut iluaqutaasumik suliassamik neqerooruteqarnikkut atsioqatigiinnikkulluunniit pisussamik Babylonimut Angisuumut peqataarusussava? Nammineq niuertarfimmini cigarettinik upperisarsiornikkulluunniit assilissanik tuniniaaniarluni aalajangernerup assigiinnanngilaa? — 2 Korintumiut 6:14-16.

Kristumiu sulisuinnartut atorfeqaruni suliffimmilu suut suliarineqassanersut oqartussaaffiginagu, allanik eqqarsaatigisassaqarpoq, soorlu suliaq sumi suliarineqassanersoq qanorlu annertutigisumik akuliusimatigissanerluni. Sulisoq ataasiaannarluni issiavinnik tunniussiartoqquneqarpa inissitsitereqqulluguluunniit inoqammulluunniit ikiueqquneqarluni, soorlu qatserisartup oqaluffimmi ikuallattoqartillugu inneq siaruartinnagu qatsereqataasinnaasoq? Amerlasuut isumaqassapput pissutsit taama ittut suliffiutillip sivisuumik oqaluffimmik qalipaaneranit oqaluffilluunniit kajuminnarnerulersinniarlugu akuttoqatigiimmik naatsiivilerisarneranit allaanerulluinnartut. Taamatut akuttoqatigiimmik annertunerusumilluunniit isumaqatigiissuteqarnerup kristumiup sulisup nammineerluni oqaasii naapertorlugit upperisarsioqatigiinnut tapersersunngisaanut amerlasuunit atassuserneqarnissaa ilimanarnerulersissavaa, tamatumalu allanut aserorsaataasinnaanera ilimanarsisissavaa. — Matîuse 13:41; 18:6, 7.

Suliffimmut tunngatillugu pingaarutillit kristumiup eqqarsaatigisariaqagai maani eqqartorpavut. Pissutsit matumani saqqummiunneqartut upperisarsiornermut eqqunngitsumut atatillugu apeqqummut aalajangersimasumut attuumassuteqarput, suliffinnulli allanut aamma atorneqarsinnaapput. Pineqartuni tamani pissutsit qinunikkut eqqarsaatigisariaqarput, pissutsit pineqartut immikkoortui tassungalu tunngasortai qularnanngitsumik immikkut ittuusut soqutigalugit. Pissutsit qulaani eqqaaneqartut kristumiorpassuit ilumoortut peqqissaartumik Jehovap saani unneqqarissoorusunnerannik naapertuilluartoorusunnerannillu ersersitsisumik aalajangiisinnaatissamavaat. — Ussatit 3:5, 6; Jesaja 2:3; Eprîarit 12:12-14. (wE 15/4 99)

[Quppernerup ataani ilanngussaq]