’Inunnik tunissutit’ Jehovap savaataanik paarsisut

’Qutsissumut pavunnarluni tigusat aallaruppai, inunnillu tunissutinik tunisilluni.’ — EVFISUMIUT 4:8, NV.

1. Qatanngut arnaq kristumiu utoqqaanertat ilagiinniittut pillugit qanoq allassimava?

„QUJANAQ soqutigalutalu isumagilluartaratsigut. Qungujukkaangassi, misiginneqataagaangassi soqutiginnikkaangassilu ilumoortuaannarpusi. Tusarnaarnissassinnut Biibililu tunngavigalugu anersaakkut nakussatsinniarluta oqaaseqarnissassinnut piareersimajuaannarpusi. Qinusarpunga taamaattussaannartut isigileqqunasi.“ Qatanngutip arnap kristumiup ilagiinni utoqqaanertat taama allaffigisimavai. Ersarippoq paarsisut kristumiut ilumoorlutik soqutiginninnerat uummammigut killinneqaatigisimagaa. — 1 Pîtruse 5:2, 3.

2, 3. (a) Jesaja 32:1, 2 naapertorlugu utoqqaanertat misiginneqataasut qanoq ilillutik Jehovap savaatai isumagisarpaat? (b) Qanoq ilinikkut utoqqaanertaq tunissutitut isigineqarsinnaava?

² Jehovap utoqqaanertat savaatiminik paarsisussat tunniussimavai. (Lúkarse 12:32; Juánase 10:16) Jehovap savaatini pingaartippai, Jesusip aava akisungaartoq atorlugu pisiaralugit. Taamaattumik Jehovap nuannaraa utoqqaanertat savaatit naakkinnittumik iliorfigigaangatigik. (apustilit suliait 20:28, 29) ’Naalagaajumaartut’ taakku siulittuutaasumik ima allaatigineqarput: „Tamarmik assigissavaat anorersuarmut oqquiffik sialussuarmullu oqqiffik, inoqajuitsumi kuunnguit kuuttut, nunami imissaaleqisumi qaarsorsuup alanngortaa.“ (Jesaja 32:1, 2) Aap, Jehovap savaatai illersussallugit nakussatsissallugillu tuppallersassavaat. Utoqqaanertat ilagiinnik naakkinnittumik paarsisut taamaalillutik Guutip ilimagisaatut iliorniarput.

³ Utoqqaanertat taamaattut Biibilimi ’inunnik tunissutitut’ eqqaaneqarput. (Evfisumiut 4:8) Tunissut eqqaaneqaraangat eqqarsaatigisarparput pisariaqartitsinerup matussutissinnissaanik imaluunniit tunisaq nuannaartinniarlugu tunniunneqartoq. Utoqqaanertaq tunissutaasinnaavoq piginnaanini ilagiit iluaqutissaannut atorunigit ilorrisimaarnissaannut peqataalluni. Qanoq ililluni taamaaliorsinnaava? Tamanna Paulusip Evfisumiut 4:7-16-imi allassimasamigut akivaa, tassani Jehovap savaatiminut asannittumik soqutiginninnera erseqqissarpaa.

’Inunnik tunissutit’ — suminngaaneerpat?

4. Tussiaat 68:19-ip eqquutitinnissaanut Jehovap qanoq ililluni ’qutsissumut qullarpa’, ’inunnillu tunissutit’ kikkuuppat?

⁴ Paulusip oqaatsit ’inunnik tunissutit’ atoramigit kunngi Davidip Jehova pillugu oqaaserisimasai issuarpai: „Qutsissumut qullarputit, tiguakkat aallaruppatit, [inuit tunissutaasut, NV] tigusiffigaatit.“ (Tussiaat 68:19) Israelikkut ukiorpassuit nunami neriorsuutigisami najugaqareermata Jehova assersuutitigut Zionip qaqqaanut ’qullarpoq’ Jerusalemilu Davidip kunngeqarfiani illoqarfinni pingaarnersanngortillugu. ’Inunnilli tunissutit’ kikkuuppat? Tassaapput nuna ajugaaffigineqarmat tigusatut aallarunneqarsimasut. Tigusat taakkua ilaat kingusinnerusukkut illernartuutiliami sulinermi Levikkuusunut ikiortaalerput. — Esra 8:20.

5. (a) Paulusip qanoq takutippaa Tussiaat 68:19 kristumiut ilagiissaannut eqquutitinneqartoq (b) Jesus qanoq ililluni ’qutsissumut pavunnarpa’?

⁵ Efesusimiunut allakkamini Paulusip takutippaa  tussiaasiortup oqaasii kristumiut ilagiissaannut annertunerusumik eqquutitinneqartut. Tussiaat 68:19 issuarlugu Paulus ima allassimavoq: ’Tamattali immikkut Kristusip tunioraanermini uuttuutigisaa missiliorlugu saammaannermik tunineqarpugut. Tamanna pillugu ima oqaaseqarpoq: „Qutsissumut pavunnarluni tigusat aallaruppai, [inunnillu tunissutinik tunisilluni, NV]“’ (Evfisumiut 4:7, 8) Tamaani Paulusip takutippaa tussiaammi Jesus Guutimut sinniisutut pineqartoq. Jesus aalajaannermigut ’silarsuarmut ajugaavoq’. (Juánase 16:33) Aamma toqumut Satanimullu ajugaavoq Guutip toqusunit makitimmani. (apustilit suliait 2:24; Eprîarit 2:14) Ukiumi 33-mi Jesus makissimasoq ’qilaat tamarmik qulaannut’ pavunnarpoq — tassa pinngortitat qilammiusut tamarmik qulaannut. (Evfisumiut 4:9, 10; Filípimiut 2:9-11) Ajugaasuulluni Jesus akeqqanit ’tigusaqarpoq’. Qanoq ililluni?

6. Ukiumi 33-mi u.n.s. piinsip ulluaniilli Jesusip makissimasup qanoq ililluni Satanip illua iserfigaa, ’tigusallu’ qanoq iliorfigai?

⁶ Nunarsuarmiikkallarami Jesusip Satanimit pissaaneqarnerulluni takutippaa inngilipilunnit tigusaasimasut aniguisikkamigit. Jesus Satanip ’illuanut’ isertutut illuni taanna qilersorpaa pigisaalu tigullugit. (Matîuse 12:22-29) Takorlooriaruk Jesus makitinneqareeruni ’qilammilu nunamilu piginnaaneq tamarmi imminut tunniussaammat’ qanoq tigusaqarsinnaassasoq! (Matîuse 28:18) Ukiumi 33-mi piinsip ulluaniilli Jesusip makissimasup Guutimut sinniisuulluni Satanip ’illua’ piiaaffigilerpaa ’tigusat aallarullugit’ — inuit Satanimit naalakkersorneqarsimasut ajortimillu toqumillu inussiaasut aniguisillugit. ’Tigusat’ taakku ’Kristusimut kiffaalerput kajumillutik Guutip peqqusaa suliaralugu’. (Evfisumiut 6:6) Jesusip taamaalilluni ’tigusat’ Satanip pissaaneranit aniguisippai Jehovamullu sinniisuulluni ’inunnik tunissutitut’ ilagiinnut tunniullugit. Takorlooruminarpoq Satan qanoq kamatsigisimassasoq isigitilluni Jesusip ’tigusat aallarummagit’ namminerlu iliuuseqarsinnaanani!

7. (a) ’Inunnik tunissutit’ ilagiinni qanoq kiffartorpat? (b) Angutit utoqqaanertatut kiffartortut Jehovap sumik periarfissippai?

⁷ Ullumikkut ’inunnik tunissutit’ taamaattut ilagiinni nassaarineqarsinnaappat? Aap! Nunarsuaq tamakkerlugu Guutip innuttaasa ilagiissaanni 87.000-init amerlanerusuni utoqqaanertatut suleruloortarlutik ’iivangkiiliulersaartutut, paarsisutut ajoqersuisutullu’ kiffartortarput. (Evfisumiut 4:11) Satanip nuannaarutigissagaluarpaa utoqqaanertat ilagiit paarinerluppatigik.  Guutilli Kristus aqqutigalugu utoqqaanertat ilagiinnut tunniukkamigit tamanna siunertarinngilaa. Akerlianik Jehovap angutit taakku ilagiinnut iluaqutissatut tunniussimavai, taassumunngalu nassuertussaapput savaatit paarisatik pillugit. (Eprîarit 13:17) Illit utoqqaanertatut kiffartoruit Jehovap nuannersumik periarfississimavaatit qatanngutinnut tunissutaaninnik takutitsisinnaanissannut. Taamaannersutit takutissinnaavat akisussaaffiit assigiinngitsut pingaartut sisamat naammassigukkit.

‘Naammattunngornissaq’ pisariaqartinneqarpat

8. Tamatta ilaannikkut qanoq iluarsarneqartariaqarpugut?

⁸ Siullermik Paulus oqarpoq ’inunnik tunissutit’ ’iluartut naammattunngoqqullugit’ tunniunneqarsimasut. (Evfisumiut 4:12) Griikerit oqaasiat ’naammattunngorneq’-mik nutserneqartoq isumaqarpoq sunik ’aaqqissuineq’ imaluunniit ’iluarsaaneq’. Inuttut naammalluinnanngitsuugatta ilaannikkut eqqarsariaaserput, isumarput ileqqulersuutivullu Guutip eqqarsaataanut piumasaanullu naleqqussarlugit ’iluarsarneqartariaqarpugut’. Jehovap asannilluni ’inunnik tunissutit’ tunniussimavai pisariaqartumik iluarsaanneqarnissatsinnut. Qanoq ilillutik taamaaliorpat?

9. Utoqqaanertat qanoq ilillutik ilagiinniittoq eqqunngitsuliorsimasoq iluarsinniarlugu ikiorsinnaavaat?

⁹ Ilaannikkut pisariaqarsinnaavoq utoqqaanertap ilagiinniittumik ajortuliorsimasumik immaqalu ’misiginngitsoorluni pinerluttumik’ ikiuinissaa. Qanoq iliortariaqarpa? Taanna ’iluarsisinniartariaqarpaa anersaamik qanilaartumik,’ Galâsiamiut 6:1-imi allassimavoq. Taamaattumik utoqqaanertaq siunnersuigaangami oqalorujunnanilu naveersisariaqanngilaq. Siunnersuinerup kajumissaarineq siunertaraa, ’sioorasaarineq’ siunertarinagu. (2 Korintumiut 10:9; naleqqiuguk Job 33:7.) Eqqunngitsuliortoq immaqa kanngusoreeqaaq, paarsisullu asannittup nikallulersikkumanngilaa. Tunngaveqarluartumik siunnersuineq oqaassinerluunniit asanninnikkut tunniunneqartoq iluaqutigalugu eqqunngitsuliortoq eqqortumik eqqarsartalerlunilu ileqqulersuuteqalersinnaavoq. — 2 Timûtiuse 4:2.

10. Allat iluarsisissagaanni sumik nassataqarpa?

¹⁰ Jehovap kiffami naammattunngornissaannut ’inunnik tunissutinik’ tunigamigit utoqqaanertat innuttaminut nutaamik nukissaqalersitsinissaat maligassaalluarnissaallu siunertaraa. (1 Korintumiut 16:17, 18; Filípimiut 3:17) Allanik naammattunngorsaaneq eqqunngitsuliuutigisanik naqqiinerinnaanngilaq, tassaavortaaq aalajaatsut eqqortumik ingerlanissaannut ikiuineq. * Ullumikkut inuuneq taama ajornartorsiuteqarfiutigisoq nikallulertoqarsinnaavoq, amerlasuullu qiimmassarneqarnissaq pisariaqartippaat nikallujuissagunik. Ilaat Guutip eqqarsaataanut naapertuuttumik eqqarsarnissaminnut inussiarnersumik ikiorneqartariaqarput. Assersuutigalugu kristumiut aalajaatsut ilaasa imminut naammaginnginneq ajukkunnerlu akiortariaqarpaat. ’Nikallortut’ taakku immaqa isumaqarput Jehovap asalersinnaanavianngikkaatik, kiffartuussinertillu akuerinavianngikkaa naak ilungersuussilluinnaraluarlutik. (1 Tásalúníkamiut 5:14) Guutilli kiffani taama isigineq ajorpai.

11. Utoqqaanertat qanoq ajukkuttutut misigisut ikiorsinnaavaat?

¹¹ Utoqqaanertat qanoq ilillutik taakku ikiorsinnaavaat? Asannillutik Jehovap kiffaminut tamanut immikkut isumaginninnerat pillugu allassimaffinnik takutissinnaavaat, paasitillugillu allassimaffinni tamakkunani namminneq pineqartut. (Lúkarse 12:6, 7, 24) Ikiorsinnaavaat paasitillugit Jehovap kiffamissut ’kajungersikkai’ pingaartillugit. (Juánase 6:44) Qularunnaarsinneqarsinnaapput namminneq kisimik taama misiginngitsut, Jehovap kiffai aalajaatsut ilarpassuittaaq itsaq taama misigisarsimasut. Pruffiiti Elias ilaanni ima nikallungasimatigaaq  allaat toqunissani kissaatigalugu. (1 Kunngit 19:1-4) Ukiuni hundredelinni siullerni kristumiut tanitat ilaat uummammik ’pillagassaatikkaatik’ misigipput. (1 Juánase 3:20) Tuppallernartorujussuuvoq nalunagu aalajaatsut Biibilimi eqqaaneqartut ’uatsitut misigisaqartut’. (Jáko 5:17) Aamma Napasuliaq Alapernaarsuiffik-mi Iteritsi!-milu allaaserisat kajumissinartut nikallungasut ilagalugit sammineqarsinnaapput. Utoqqaanertat asannittumik ilungersornerat taakku isumallualerseqqinniarlugit Guutimit malugineqassapput, utoqqaanertanik ’inunnik tunissutitut’ tunniussimasup malugissavaa. — Eprîarit 6:10.

Savaatit „ineriartortinnissaannut“

12. ’Kristusip timaata ineriartortinnissaa’ qanoq paasisariaqarpa, savaatillu ineriartortinneqassappata suna pisariaqarpa?

¹² Aappassaanik ’inunnik tunissutit’ taakku aamma ’Kristusip timaata ineriartortinnissaa’ siunertaralugu tunniunneqarput. (Evfisumiut 4:12) Paulusip maani oqaaseq illuliornermut atorneqartartoq atorpaa. ’Kristusip timaa’ inunnik, kristumiut tanitat ilagiissaannik, katitersimavoq. (1 Korintumiut 12:27; Evfisumiut 5:23, 29, 30) Utoqqaanertat qatanngutitik ikiortariaqarpaat anersaakkut nukittuunngornissaannut. Savaatit ’ineriartuutissaat aserorterneqaatissaat pinnagu’ sulissutigissavaat. (2 Korintumiut 10:8) Taamaaliussagamik asannittuusariaqarput, ’asanninneq ineriartuutaasarmat’. — 1 Korintumiut 8:1.

13. Paasinnittuuneq qanoq paasisariaqarpa, sunalu pillugu utoqqaanertat paasinnittuunerat pingaaruteqarpa?

¹³ Asanninnerup utoqqaanertat savaatit ineriartortinnissaannut ersersitaata ilaa tassaavoq paasinnittuuneq. Paasinnittuussagaanni allat misigeqatigisariaqarpai, taakkua qanoq eqqarsarneri misigissusiilu paasiniarlugit inuttullu killigisaat soqutigalugit. (1 Pîtruse 3:8) Sooq utoqqaanertat paasinnittuunissaat taama pingaaruteqartigaa? Pingaartumik Jehova ’inunnik tunissutinik’ tunisisoq Guutiummat misiginneqataasoq. Kiffani naalliukkaangata misigeqatigisarpai. (2 Moses 3:7; Jesaja 63:9) Killigisaat soqutigisarpai. (Tussiaat 103:14) Utoqqaanertammi qanoq ilillutik paasinnittuusinnaappat?

14. Utoqqaanertat qanoq ilillutik allanut paasinnittuusinnaappat?

¹⁴ Nikallungasumit saaffigineqaraangamik tusarnaartarput takutillugu taassuma misigissusii paasillugit. Qatanngutimik tunuliaqutaat, inuttut pissusii atugaallu paaserusuppaat. Utoqqaanertat Biibili tunngavigalugu ineriartornartumik ikiuigaangata tamanna ilagiinniittunut ilassiuminartuusarpoq, paarsisut paasinnittunit isumaginnikkusuttunillu tunniussaammata. (Ussatit 16:23) Utoqqaanertat paasinnittuugamik allat killigisaat misigissusiilu soqutigisarpaat. Assersuutigalugu qatanngutit utoqqasaat Guutimut kiffartornermi angusaqarpallaarunnaaraangamik ilerasuuteqarsinnaapput. Allat immaqa kajumissaarneqartariaqarput kiffartornermik pitsaanerulernissaanut annertusinissaanullu. (Eprîarit 5:12; 6:1) Paasinnittuunerup utoqqaanertat „oqaatsit kusanartut“ ineriartornartullu atornissaannut ikiortarpaat. (Nal 12:10) Jehovap savaatai ineriartortinneqaraangamik kajumissaarneqaraangamillu Guutimut asanninneq killissutigalugu taassumunnga kiffartornermi sapinngisartik tamaat iliuuseqarusulertarput.

Angutit ataasiussutsimik siuarsaasut

15. ’Uppeqatigiinneq’ imaluunniit ’uppernikkut ataasiussuseqarneq’ qanoq paasisariaqarpa?

¹⁵ Pingajussaanik ilagiit ’inunnik tunissutinik’ tunineqarsimapput ’tamatta apuutissagatta ataasiussusissamut, uppeqatigiilluta Guutillu erneranik ilisarseqatigiilluta’. (Evfisumiut 4:13) Oqaatsit ’ataasiussuseq’ aamma ’uppeqatigiilluta’ atorneqarmata isumaqaannanngilaq uppeqatigiinnikkut ataasiussuseqarneq aammali uppertut ataasiussuseqarnerat. Guutip aamma kiffami ataasiussuseqarnerat siuarsarniarlugu ’inunnik tunissutinik’ tunisimavaatigut. Utoqqaanertat qanoq ilillutik ataasiussuseq siuarsarsinnaavaat?

16. Sooq utoqqaanertat ataasiussuseqarluarnerat immikkut pingaaruteqarpa?

¹⁶ Siullermik pingaarnerpaamillu utoqqaanertaqatigiit  namminneq ataasiussusertik atatittariaqarpaat. Paarsisut saqitsaappata savat aamma isumakkiigaalissapput, piffissaq savaatinut atorneqarsinnaagaluartoq ataatsimiinnernut sivisunaartunut soqutaanngitsunik oqalliffiusunut atorneqassammat. (1 Timûtiuse 2:8) Utoqqaanertat inuttut assigiinngitsorujussuusinnaapput assigiinngitsunillu isumaqarsinnaallutik. Ataasiussuseqaraluarlutillu assigiinngitsunik isumaqarsinnaapput tamakkulu oqimaaqatigiissumik periaaseqarlutik ammasumik oqaloqatigiissutigisinnaavaat. Utoqqaanertat ataqqeqatigiillutik tusarnaartarunik siumut aalajangeriikkanik isumaqaratik ataasiussuseqartuarsinnaapput. Najoqqutassiat Biibilimeersut unioqqutinneqanngikkaangata tamarmik immikkut utoqqaanertaqatigiit aalajangerneri akueralugillu tapersersortariaqarpaat. Akuersaartuugunik utoqqaanertat takutissinnaavaat ’ilisimassummit pavannga pisumit’ ’eqqissisitsiniartumit isumagissumillu’ siulersorneqarlutik. — Jâko 3:17, 18.

17. Utoqqaanertat qanoq ilillutik ilagiit ataasiussuseqarnerat atatissinnaavaat?

¹⁷ Utoqqaanertat aamma ilagiit ataasiussuseqarnerat siuarsarniartarpaat. Oqaatissuaaneq, allanik ajortunik isummersuineq, assortuiumatuuneq allatigulluunniit avissaartitsinermik pisoqarpat, utoqqaanertat ingerlaannaq naleqquttumik ilitsersuissapput. (Filípimiut 2:2, 3) Utoqqaanertat immaqa paasivaat ilaat isornartorsiueqisut imaluunniit susassarinngisaminnik akuliuttut. (1 Timûtiuse 5:13; 1 Pîtruse 4:15) Utoqqaanertat taakku paasitinniassavaat taamaaliorneq Guutimit ilinniarsimasatsinnut akerliusoq, tamarmillu ’namminneq nammagassartik nammassagaat’. (Galâsiamiut 6:5, 7; 1 Tásalûníkamiut 4:9-12) Utoqqaanertat Biibili atorlugu takutissavaat Jehovap aalajangigassat amerlasuut inuup nammineq nalunngeqatiginnissusianut aalajangigassanngortittarai, allallu tamakku pillugit eqqartuuttariaqanngikkivut. (Matîuse 7:1, 2; Jâko 4:10-12) Ilagiinniittut ataasiussuseqarluarlutik kiffartoqatigiissagunik tatigeqatigiillutillu ataqqeqatigiittariaqarput. Pisariaqartitsineq naapertorlugu Biibili tunngavigalugu unnersuussinermikkut utoqqaanertat ikiortarpaatigut eqqissinerup ataasiussutsillu atatiinnarnissaannut. — Rûmamiut 14:19.

Savaatit illersorneqartariaqarput

18, 19. (a) ’Inunnik tunissutit’ kikkunnut illersortarpaatigut? (b) Navianartunut allanut sunut ilagiit illersorneqartariaqarpat, utoqqaanertallu qanoq iliuuseqarpat ilagiit illersorniarlugit?

¹⁸ Sisamassaanik Jehova ’inunnik tunissutinik’ tunisivoq ’aalateqqunata angalateqqunatalu ajoqersuummit nalinginnarmit anorlersumit, inuit immeraattarnerinit, qoqassiisut tammartitsisut peqqusersuunerannit’. (Evfisumiut 4:14) Griikerit oqaasiata ’immeraatarneq’-mit nutserneqartup nagguia isumaqarsorineqarpoq ’immeraanermi nakutitsivoq’ imaluunniit ’immeraatillaqqippoq’. Tunussisut periaasii tamatumunnga assingusuunnginnerpat? Tunngavilersuutit ajornannginaagaasut atorlugit Biibilip oqaasii allanngortittarpaat kristumiut ilumoortut uppernermit tammartinniarlugit. Utoqqaanertat ’amaqqut sualuttut’ taamaattut mianersuutigisariaqarpaat. — apustilit suliait 20:29, 30.

¹⁹ Jehovap savaatai aamma navianartunut allanut illersorneqartariaqarput. Savanik paarsisup Davidip ataatami savaatai nersutinut kiisortunut illersortarsimavai. (1 Samuel 17:34-36)  Ullumikkuttaaq kristumiut paarsisut isumaginnittut Jehovap ’savaatai’, sapiillutik illersortariaqarpaat, ingammik pinerluffiginninniartunut naqisimanninniartunullu illersoriarsinnaannginnerusut. Utoqqaanertat nangaanatik peqqusersusaniartut, salloqittaasut piaaralutillu Guutip iluarinngisaanik iliortut tamaasa ilagiinnit peersissavaat. * — 1 Korintumiut 5:9-13; naleqqiuguk Tussiaat 101:7.

20. Sooq ’inunnik tunissutinit’ isumagineqarluta toqqissisimasinnaavugut?

²⁰ ’Inunnik tunissutit’ qujamasuutigissallugit pissutissaqarluarpugut. Soqutiginnillutik iluarsarluta, asannittumik ineriartortilluta, ataasiussuseq siuarsarlugu qunusuillutillu illersoraangatigut asannittumik isumaginninnerat malugalugu toqqissisimanarpoq. ’Inunnilli tunissutit’ taakkua ilagiinni akisussaaffitsik qanoq isigisariaqarpaat? Qanorlu ililluta takutissinnaavarput pingaartikkivut? Apeqqutit tamakku allaaserisami tulliuttumi sammissavavut. (wE 1/6 99)

[Quppernerup ataani ilanngussat]

Eqqaamavigit?

□ ’Inunnik tunissutit’ kikkuuppat, sunalu siunertaralugu Guutip Kristus aqqutigalugu ilagiinnut tunniussimavai?

□ Utoqqaanertat qanoq ilillutik ilagiit iluarsinissaannik akisussaaffitsik naammassisarpaat?

□ Utoqqaanertat qanoq ilillutik uppeqatitik ineriartortissinnaavaat?

□ Utoqqaanertat qanoq ilillutik ilagiit ataasiussuseqarnerat atatissinnaavaat?

[Atuaqqissaarnermi apeqqutit]

[Qupp. 18-mi assiliartaq]

Utoqqaanertat nikallorsimasunik kajumissaarissagunik paasinnittuunissaat pingaaruteqarpoq

[Qupp. 18-mi assiliartaq]

Utoqqaanertat ataasiussuseqarnerat ilagiit ataasiussuseqarnerannut siuarsaataavoq