’Inunnik tunissutit’ pingaartikkit
’Inunnik tunissutit’ pingaartikkit
’Ilisariniarsigik ilissinni suliaqartut, . . . suliaallu pillugu ataqqingaarlugit asallugillu.’ — 1 TÁSALÛNÍKAMIUT 5:12, 13.
1. aps 20:35 naapertorlugu tunissutinik tunisineq qanoq sunniuteqartarpa? Assersuummik taasaqarit.
’TUNISINEQ tigusinermit pilluarnarneruvoq.’ (apustilit suliait 20:35) Eqqaamaviuk qanga kingullermik Jesusip oqaasii taakku ilumoortut misigisimanerlugu? Immaqa asangaakkat tunissummik tunigakku misigaat. Immaqa tunissut tamanna peqqissaarluinnartumik qinersimavat, tunisap pingaartitaanik tunisiniaravit. Tigusisup kiinaa nuannaarpaseqisoq takullugu nuanneqaaq. Eqqortumik pissuteqarluni tunisineq asanninnermut ersiutaasarpoq, asanninnerlu tamanna pilluarnarpoq.
2, 3. (a) Sooq Jehovamit pilluarnerusoqarsinnaanngila, sunalu pillugu uummataata nuannaarutigai ’inunnik tunissutit’ tunniussimasani? (b) Guutip tunissutai qanoq iliorfigiumanngilavut?
2 Jehovamit, ’tunissutinik tamanik ajunngitsunik’ tunisisumit pilluarnerusoqarsinnaanerpa? (Jâko 1:17; 1 Timûtiuse 1:11) Tunissutai tamarmik asanninnermik tunniunneqartarput. (1 Juánase 4:8) Pingaartumik ’inunnik tunissutit’ Guutip Kristus aqqutigalugu ilagiinnut tunniussimasai taamaapput. (Evfisumiut 4:8) Utoqqaanertanik ilagiinnik paarsisussanik aaqqissuussineq Guutip innuttaminut asanningaarneranut ersiutaavoq. Angutit taakku piumasaqaatit Biibilimi eqqaaneqartut tunngavigalugit toqqarneqarsimapput. (1 Timûtiuse 3:1-7; Títuse 1:5-9) Paasilluarpaat ’savarpannik qajassuussissallutik’, taamaattumillu ’savaatit’ paarsisutik asannittut qujamasuutigisariaqarpaat. (apustilit suliait 20:29; Tussiaat 100:3) Jehovap savaatai taamaalillutik qujamasunnerisigut uummataa nuannaartittarpaat. — Uss 27:11.
3 Guutip tunissutai piluariumanngilavut qujasuitsuujumanatalu. Taamaattumik immitsinnut ima aperisariaqarpugut: Utoqqaanertat ilagiinni suliassartik qanoq isigisariaqarpaat? Ilagiillu qanoq ilillutik ’inunnik tunissutit’ taakku pillugit qujamasunnertik ersersissinnaavaat?
’Suleqatigaatsigut’
4, 5. (a) Paulusip ilagiit sumut assersuuppai, sunillu assigiissuteqarpat? (b) Paulusip assersuusiaa qanoq ilinniutigisinnaavarput immitsinnut isiginninnerput iliorfiginninnerpullu eqqarsaatigalugit?
4 Jehovap utoqqaanertat ’inunnik tunissutit’ tunniussani ilagiinni oqartussaassuseqartissimavai. Soorunami utoqqaanertat oqartussaassusertik atornerlukkusunngilaat, nalunngilaat inunnut naammalluinnanngitsunut taama pisoqariaannaasoq. Taamaattumik ilagiinnut naleqqiullutik imminnut qanoq isiginnttariaqarpat? Apustili Paulus tamatuminnga paasissutissiivoq. Nassuiareeramiuk sooq Guuti ’inunnik tunissutinik’ tunisisoq nangilluni allappoq: ’Asanninnikkut ilumoorluta niaqorisamut tamatigut alliartoqqulluta, tamassa Kristusimut; taassumannga aallarnerluni timi iluunngarmi katiterneqartoq ataasinngortitaallunilu ujallut tamaasa ikiortigalugit, ilami tamarmik immikkut uuttugarsiaasa sunniineri missiliorlugit, timip alliartornissaattut naammassiartorpoq asanninnikkut imminik ineriartortilluni.’ (Evfisumiut 4:15, 16) Paulusip taamaalilluni ilagiit, utoqqaanertat ilanngullugit, timimut assersuuppai. Soorlu takussagipput arlalinnik assigiissuteqarpoq.
5 Timi amerlasuunik assigiinngitsunik avateqarpoq, ataasiinnarmilli niaqoqarluni. Timilli pisatai tamarmik, allaat nukiit, sianiutit imaluunniit taqqat minnerpaartaat, pisariaqartinneqarput. Tamarmik naleqarput timillu peqqissusianut kusanassusianullu ilasillutik. Tamatumunnga assingusumik ilagiinniittut inuttut assigiinngitsorujussuupput, tamarmilli immikkut — meeqqat, inersimasut, peqqissut napparsimasullu — ilagiit anersaakkut peqqissusiat kusanassusiallu peqataapput. (1 Korintumiut 12:14-26) Kinaluunniit misigissanngilaq naleqanngitsuulluni pingaaruteqartumillu iliuuseqarsinnaanani. Soorunami aamma kinaluunniit tamatuma akerlianik misigisariaqanngilaq allanit pitsaanerusoraluni, tamarmimmi, savanik paarsisut savallu, timimut ataasiinnarmut avataapput, timimut ataasiinnarmik niaqulik, tassa Kristus. Paulusip asanninneq, isumaginninneq ataqqinninnerlu ersersittariaqakkavut kusanartumik allaatigai. Taamaannera paasigamikku utoqqaanertat anneruniajuitsuussapput ilagiinnilu inissisimaffitsik oqimaaqatigiissumik isigissallugu.
6. Paulusip qanoq takutissimavaa apustilitut oqartussaassuseqaraluarluni maniguuttuulluni?
6 ’Inunnik tunissutit’ taakku uppeqatimik inuunerat uppernerallu naalagaaffiginianngilaat. Paulus apustilitut oqartussaassuseqaraluarluni maniguulluni Korinthimiut ima allaffigai: ’Uppersutsissinnut naalagaanianngikkaluarpugut, tipaatsussutsissinnilli suleqatigaatsigut aalajangerlusi upperassi.’ (2 Korintumiut 1:24) Paulus isumaqanngilaq qatanngutimi uppernerannut inooriaasiannullu naalagaassalluni. Tamanna pisariaqanngitsutut isigaa, eqqaagamiuk tatigalugu tassaareersut angutit arnallu aalajaatsut eqqortuliorusukkamik Jehovap peqatigiissortaanut ilaasut. Nammineq pilluni angalaqatinilu Timoteus pillugu ima oqarporlusooq: ’Ilagalusi nuannaarluta Guutimut kiffartornermik suliassaqarpugut.’ (2 Korintumiut 1:1) Tamanna maniguunnermut piviusumut ersiutaavoq.
7. Utoqqaanertat maniguuttut ilagiinni suliassartik pillugu sumik paasisaqarpat, ’suleqatitillu’ qanoq tatigaat?
7 Ullumikkut ’inunnik tunissutit’ aamma ’tipaatsussutsitsinnut suleqataassapput’. Taamaattumik utoqqaanertat maniguuttut nalunngilaat namminneq allat Guutimut kiffartornermi naammassisinnaasaannut aalajangiisuussaanatik. Nalunngilaat allat kiffartornerulernissaannut kiffartornerullu pitsaanerulernissaannut kajumissaarisinnaallutik, Guutimulli kiffartorneq uummammik kajumittumik pilerfeqartariaqartoq. (Naleqqiuguk 2 Korintumiut 9:7.) Tatigaat ’suleqatit’ nuannaartut sapinngisamik iliuuseqassasut. Taamaattumik qatanngutitik tipaatsullutik Jehovamik kiffartornissaannut ikiorusuppaat. — Tussiaat 100:2.
Tamarmik nuannaarlutik kiffartornissaannut ikiorsigik
8. Eqqaajuk utoqqaanertat qanoq ilillutik qatanngutitik nuannaarlutik Jehovamut kiffartornissaannut ikiorsinnaagaat.
8 Ilissi utoqqaanertat, qanoq ilillusi qatanngutisi nuannaarlutik kiffartornissaannut ikiorsinnaavisigik? Maligassaalluarlusi kajumissaarsinnaavassi. (1 Pîtruse 5:3) Qatanngutit takutissigik ilungersuussillusilu kiffartorneq nuannaarutigigissi; taamaaliorussi allat ilissinnik malinninnissaannut killissavasi. Uummammit pisumik iliuuseqartut nersortarsigik. (Evfisumiut 4:29) Qatanngutit inussiarnersumik ilumoortumillu nersorneqaraangamik misigissapput iluaqutaasumik iliorsimallutik, taamaattumillu Guutimut kiffartornermi sapinngisamik pitsaanerpaamik iliuuseqarusussallutik. Iluanaarnanngitsumik naleqqiusseqinasi. (Galâsiamiut 6:4) Naleqqiussinerit taamaattut nikallornartuusarput kajumissinartuunatillu. Aamma eqqaamasariaqarparput Jehovap kiffai assigiinngitsuummata atugaallu piginnaassusiilu assigiinneq ajorlutik. Paulusitut iliortaritsi: Qatanngutisi tatiginninnermik takutissigik. Asanninneq ’tamatigut upperaraaq’, taamaattumillu uppertariaqarpugut qatanngutitta Guuti asagaat taassumunngalu iluarisaajumassuseqarnerat upperissallugu ilumoortuliorneruvoq. (1 Korintumiut 13:7) Allat ataqqigaangatsigik taakku pitsaanerulernissaminnut kajumissisinneqartarput. (Rûmamiut 12:10) Qularissanngilarput amerlanerit Guutimut kiffartornermi nuannaarlutik sapinngisamik iliuuseqassasut taamaaliornissaminnut kajumissaarneqarlutillu nakussatsinneqarunik. — Matîuse 11:28-30.
9. Utoqqaanertap utoqqaanertaqatini qanoq isigissavai nuannaarluni kiffartussaguni?
9 Utoqqaanertat maniguullutik ’suleqatitut’ imminnut misigigunik namminneq nuannaarlutik kiffartorsinnaassapput utoqqaanertaqatimillu immikkut piginnaaffii pingaartillugit. Utoqqaanertat tamarmik immikkut pisinnaatitaaffeqarlutillu piginnaassuseqarput ilagiit iluaqutigisinnaasaannik. (1 Pîtruse 4:10) Ilaat immaqa ilinniartitsillaqqissuuvoq, alla aaqqissuinermut piginnaassuseqarluarluni. Alla immaqa oqaloqatigiuminartorujussuuvoq inussiarnersuugami paasinnittuullunilu. Utoqqaanertaq kinaluunniit sunut tamanut piginnaassuseqarsinnaanngilaq. Utoqqaanertaq ilinniartitsillaqqissoq utoqqaanertanit allanit naleqarnerua? Naamik. (1 Korintumiut 4:7) Pissutissaqanngilagut allat piginnaassuseqarluarmata usorissallugit imaluunniit utoqqaanertaq alla angusimasaminik nersorneqarpat pingaanngitsutut misigissalluta. Eqqaamajuk nammineq piginnaassuseqartutit Jehovap ilinni takusinnaasaanik. Tamatta immikkut ikiorsinnaavaatigut piginnaassutsit tamakku ineriartorteqqullugit qatanngutittalu iluaqutissaannut atoqqullugit. — Filípimiut 4:13.
’Siulersortisi naalassigik tusartarlugillu’
10. Sooq ’inunnik tunissutit’ Jehovap tunniussimasai qujamasuutigisariaqarpavut?
10 Soorunami tunissut pillugu qujasariaqarpugut. ’Qujasaritsi,’ Kulorsamiut 3:15-imi allassimavoq. ’Inunnik tunissutit’ erlinnartut Jehovap tunniussimasai pillugit qanoq ililluta qujamasunnerput takutissinnaavarput? Soorunami pingaartumik Jehova tunisiumatooq qujamasuffigaarput. Qanorli ililluta takutissinnaavarput ’inuit tunissutit’ pingaartikkivut?
11. (a) Qanoq ililluta takutissinnaavarput ’inunnik tunissutit’ taakku pingaartillugit? (b) Oqaatsit ’naalassigik’ aamma ’tusartarlugit’ qanoq paasisariaqarpat?
11 ’Inunnik tunissutinik’ taakkuninnga pingaartitsinerput takutissinnaavarput piumassuseqarluta Biibili tunngavigalugu unnersuussineri maleruarutsigit aalajangernerilu akuerigutsigit. Biibilimi ima siunnersorneqarpugut: ’Siulersortisi naalassigik tusartarlugillu, tarnisi piggammatigik aperineqarunik akisussaallutik; tipaatsullutik taamaaliorsinnaaqqullugit anersaameqqunagillu, tamanna iluaqutigissannginnassiuk.’ (Eprîarit 13:17) Malugiuk siulersortivut ’naalaannarnagit’ aammali ’tusartariaqarivut’. Griikerit oqaasiat ’tusartarlugit’-mik nutserneqartoq eqqortumik isumaqarpoq ’akuersiinnarpoq’. Oqaatsit ’naalassigik’ aamma ’tusartarlugit’ oqaaseqarfigalugit Biibilimik paasisimasalik R. C. H. Lenski ima allassimavoq: „Peqqusamut isumaqataaneruvoq naalakkaanni isumaqarluni taamaaliorneq eqqortuusoq iluaqutaallunilu, akuersiinnarnerli pisarpoq . . . allamik isumaqaraanni.“ Siulersortitsinnit ilitsersuut paasigutsigu akuerigutsigulu naalannissaq piuminarpoq. Aalajangikkamulli suna pissutaasoq paasinngikkutsigu qanoq iliortarpugut?
12. Sooq akuersiinnartariaqarpugut naak aalajangersimasamut suna pissutaanersoq paasinngikkaluarlugu?
12 Taamaappat ’tusartarluta’ akuersiinnarsinnaasariaqarpugut. Sooq? Pingaartumik taakkua angutit anersaakkut piukkunnaatillit iluaqutissatsinnik siunertaqartut tatigisinnaagatsigu. Nalunngilaammi Jehovamut nassuertussaallutik savaatit imminnut paareqqusat pillugit. (Jâko 3:1) Eqqaamasariaqarparputtaaq immaqa paasissutissat peqqissaartumik aalajangernerannut tunngaviusut tamaasa paasisimanngikkivut. — Ussatit 18:13.
13. Suup ikiorsinnaavaatigut ataatsimiititaliap eqqartuussisup aalajangiinerinik akuersinissatsinnut?
13 Ataatsimiititaliap eqqartuussisup aalajangiineri eqqarsaatigalugit tusaaniartarnerpugut? Artornarsinnaagaluarpoq, ingammik ikinngutinnaaq ilaqutarluunniit ilaasortaajunnaarsinneqarpat. Tamatumanittaaq silatusaarnerussaaq tusaaniartarutta Guutillu uatsinnut ’inunnik tunissutaasa’ aalajangiinerat akueralugu. Taakkua atukkat uatsinnit piviusorsiornerusumik isigisinnaavaat, qularnanngitsumillu pissutsinik paasisimasaqarnerullutik. Amerlanertigut artorsaatigigaluarlugu ilaasortaajunnaarsitsinissaq aalajangertariaqartarpaat, ’Jehovamullu eqqartuussissuussagaanni’ akisussaaffiuvoq ilungersunartoq. (2 Israelikkut 19:6) Periarfissaqaraangamik naakkinnissuseqartarput, eqqaamallugu Guuti ’isumakkeerfiginnittartoq’. (Tussiaat 86:5) Kisianni ilagiit minguitsuutittariaqarpaat, taamaattumillu Guutip piumasaraa eqqunngitsuliortut peqqissimiumanngitsut anisitaassasut. (1 Korintumiut 5:11-13) Amerlanertigut eqqunngitsuliortup aalajangiineq tamanna akuerisarpaa. Taamannak perorsaatissinneqarneq aqqutissatuaasinnaavoq silattortitaanissamut. Anisitaasup ikinngutaasa aalajangiineq tusaaniarunikku taamaalillutik ikiorsinnaavaat perorsaatissiineq iluaqutigilersillugu. — Eprîarit 12:11.
’Ataqqingaarsigik’
14, 15. (a) Sooq utoqqaanertat soqutiginninnerput pisassaraat, soorlu 1 Tásalûníkamiut 5:12, 13-imi nassuiarneqartoq? (b) Sooq oqarsinnaavugut utoqqaanertat amerlasuut ’uatsinni suleruloortartut’?
14 ’Inunnik tunissutinik’ taakkuninnga pingaartitsinerput aamma takutissinnaavarput isumassorlugillu soqutigalugit takutikkutsigu. Ilagiit Thessalonikamiittut allaffigalugit Paulusip kristumiut qinnuigai ’ilisariniaqqullugit imminni suliaqartut, Naalakkami imminnik misissuisut imminillu eqqaasitsisartut, suliaallu pillugu ataqqingaarlugit’. (1 Tásalûníkamiut 5:12, 13) Aap, takunnginnerpavut utoqqaanertat ikiuiumatuut suleruloortut iluaqutissatsinnullu tunniuttartut? Misissoriartigu qatanngutit asanartut taakku qanoq annertutigisumik nanertuuteqartartut.
15 Taakkua ilarpassui nuliaqarlutillu meeraqarput suleruloorlutik isumagisariaqakkaminnik. (1 Timûtiuse 5:8) Utoqqaanertaq meeraqaruni taakkua piffissaa soqutiginninneralu atorfissaqartippaat. Immaqa ilinniagassaannik ikiortariaqarpai aamma sammisassat peqqinnartut piareersartariaqarlugit inuusuttut nukiisa iluaqutaasumik atornissaannut. (Nalunaajaasup oqaasii 3:1, 4) Eqqortumik iliorluni ilaqutariit anersaakkut pisariaqartitaat pingaartittarpai aalajangersimasumillu ilaquttani Biibilimik atuaqqissaaqatigiinnermi siulersortarlugit; ilaquttani oqaluusseqatigisarpai kristumiut ataatsimiinnerinut najuuteqatigisarlugit. (5 Moses 6:4-7; Evfisumiut 6:4) Puigussanngilarpulli utoqqaanertat uatsitut taamatut akisussaaffeqaannanngitsut, aammali ataatsimiinnerni pisussat piareersartariaqarpaat, paarsisutut ilagiinniittut pulaartariaqarlugit, ilagiit anersaakkut ineriartornerat siuarsarlugu, pisariaqaraangallu ataatsimiititaliani suliassanut peqataasariaqarlutik. Ilaat ataatsimeersuarnernut, naalagaaffilersaarfissanik sanaartornermut Napparsimmavinnullu Attaveqartitanut atatillugu immikkut akisussaaffeqartarput. Qatanngutit taakku ’suleruloortarput’.
16. Nassuiaruk qanoq ililluta utoqqaanertat soqutigisinnaagivut.
16 Qanoq ililluta soqutiginninnermik takutitsivigissavavut? Biibilimi ima ussateqarpoq: „Ila ajunngittassusia oqaasissat piffissaasigut anillugit.“ (Ussatit 15:23; 25:11) Eqqaasinnaavarput ilumoorluta pingaartikkivut taamaalillutalu takutillugu sulinerat taamaattussaanartut isiginngikkipput. Aamma ingasaassinianngitsumik ilimasuffigisariaqarpavut. Soorunami nangaanata ikioqqulluta qinnuigisinnaavavut, ingammik annertuumik isumakuluuteqarutta Biibilimeersumillu kajumissaarneqartariaqarutta imaluunniit Guutip oqaasianik ’ajoqersuineq sapinngitsup’ siunnersuutai pisariaqartikkutsigik. (Tussiaat 55:5; 1 Timûtiuse 3:2) Aappaatigulli eqqaamasariaqarparput utoqqaanertat ilaquttatik ilagiinniittullu allat isumagissagamikkik killeqanngitsumik piffissaqarsinnaanngitsut. Qatanngutit eqiasuitsut taakku ’misigeqatigisariaqarpavut’ pisariaqanngitsumillu piumasaqarfigiumanagit. (1 Pîtruse 3:8, NV) Periarfissaqartillutik piffissaqarfigigaangatigut soqutigigaangatigullu tamanna pingaartittariaqarparput. — Filípimiut 4:5.
17, 18. Qatanngutit arnat amerlasuut utoqqaanertanik uillit sunik pilliuteqartarpat, qanorlu takutissinnaavarput qatanngutit arnat aalajaatsut taakkua ujariatsinerat suusupaginngikkipput?
17 Qatanngutit arnat utoqqaanertanik uillit aamma soqutiginninnerput pisariaqartinnginnerpaat? Tassami uiminnik ilagiit aveqatigaat taamaalillutillu arlalitsigut pilliuteqartarlutik. Akuttunngitsumik utoqqaanertat unnukkut piffissaq ilaquttaminnut atorsinnaasaraluartik ilagiit sammisassaannut atortariaqartarpaat. Arnat kristumiut aalajaatsut amerlasuut taama pilliuteqartarput uiminnut Jehovap ’savaatai’ isumagisinnaaqqullugit. — Naleqqiuguk Korintumiunut agdlagkat áipait 12:15.
18 Qanoq takutissinnaavarput qatanngutit arnat aalajaatsut taakkua ujariatsinerat suusupaginngikkipput? Taamaaliorsinnaavugut uii pisariaqanngitsumik pisarissersunngikkutsigik. Puigussanngilarputtaaq pingaartitsinermik oqaaseqarneq qanoq iluaqutaatigisinnaasoq. Ussatit 16:24-mi allassimavoq: „Tungusunnitsuutitut kusertutut ipput inussiarnersumik oqaatsit tarnimut tungusunnitsut timimullu peqqissaataasut.“ Tamatuma ilumoornera pisimasup matuma uppernarsarpaa: Ataatsimiinnerup kingorna aappariit utoqqaanertat ilaat oqaloqatigiumavaat ernertik inuusuttuaraq pillugu. Tamanna ilutigalugu nuliaa naammagittarluni utaqqivoq. Kingorna anaanaasup utoqqaanertap nulia ornippaa oqarfigalugulu: „Qutsaviginiarpakkit uiit ilaquttama ikiornissaannut piffissaqarmat.“ Isumassuisumik qujaneq tamanna tusarlugu utoqqaanertap nuliaata nuannaarutigaa.
19. (a) Utoqqaanertat amerlanersaasa suna naammassisarpaat? (b) Tamatta suna aalajangiuttariaqarparput?
19 Utoqqaanertanik nakkutilliisunik aaqqissuussineq Jehovap ’tunissutaasa ajunngitsut’ ilagaat. (Jâko 1:17) Soorunami qatanngutit taakku naammalluinnartuunngillat, allatulli kukkusarlutik. (1 Kunngit 8:46) Amerlanertigulli ilagiit utoqqaanertaasa aalajaallutik Jehovap aaqqissuussinermik tamatuminnga siunertaa naammassisarpaat, ilagiit iluarsarlugit, ineriartortittarlugit, ataasiussusiat siuarsarlugu ilagiillu illersortarlugit. Qanortoq utoqqaanertat tamarmik immikkut aalajangerlissuk Jehovap savaatai qajassuullugit paarissagaat, taamaalillutik qatanngutiminnut ilumut tunissutaasinnaassagamik. Tamattalu ’inunnik tunissutit’ taakku pingaartinniartigik naalallugit tusartarlugillu sulinerallu asannilluta soqutigigipput takutillugu. Pissutissaqarluarpugut Jehovamut qujamasunnissatsinnut taassuma asannittumik savaatit Guutimut nuannaarlutik kiffartorsinnaanissaannut ikiuinissaminnut akisussaaffittut isiginnittunik angutinik taakkuninnga tunisimammatigut. (wE 1/6 99)
Qanoq akissavit?
□ Ilagiit inuullu timaa qanoq assigiissuteqarpat?
□ Utoqqaanertat qanoq ilillutik qatanngutitik Jehovamik nuannaarlutik kiffartornissaannut ikiorsinnaavaat?
□ Sooq siulersortitsinnut naalaannarnata aammali tusaaniartariaqarpugut?
□ Qanoq ililluta utoqqaanertat soqutigisinnaavavut?
[Atuaqqissaarnermi apeqqutit]
[Qupp. 24-mi assiliartaq]
Utoqqaanertat uummatikkut ilungersuussisut nersorneqartariaqarput
[Qupp. 25-mi assiliartaq]
Oqaluussinermi ilungersuussillutik maligassaalluarlutik utoqqaanertat ilaquttatik allallu nuannaarlutik kiffartornissaannut ikiorsinnaavaat
[Qupp. 26-mi assiliartaq]
Utoqqaanertat suleruloortartut pingaartippavut