Ilaqutariittut Guutip oqaasia atuaqqissaartarsiuk

’Timiusaannaq inuup inuussutiginngilaa, oqaaserli sunaluunniit Guutip qarnanit anisoq inuussutigisaraa.’ — MATIUSE 4:4.

1. Ilaqutariinni qullersaasut meeqqaminnik Jehovap aqqutigeqqusaanik ajoqersuinissaannik akisussaaffik pillugu Biibilimi qanoq allassimasoqarpa?

JEHOVA GUUTI arlaleriarluni ilaqutariinni qullersaasut meeqqamik ajoqersornissaannik akisussaaffeqarnerannik eqqaasissimavai. Ajoqersuisarneq tamanna meeqqat ullumikkut inuunerannut iluaqutaavoq aammalu siunissami inuunissamut piareersarnissaannut ikiuutaasinnaalluni. Inngilip Guutimut sinniisup Abraham oqarfigisimavaa inoqutai ajoqersussagai ’Jehovap aqqutigeqqusaa maleruassammassuk’. (1 Moses 18:19) Angajoqqaat Israelikkuusut peqquneqarput meeqqatik nassuiaatissagaat Guutip qanoq ililluni Israelikkut Egyptenimit aniguisissimagai Sinajillu Qaqqaani Horebimiittumi Inatsisiminik tunillugit. (2 Moses 13:8, 9; 5 Moses 4:9, 10; 11:18-21) Ilaqutariinni ittuusut kristumiut kajumissaarneqarputtaaq qitornatik ’perorsaqqullugit inertertaqqullugillu Jehovamit’. (Evfisumiut 6:4) Aamma angajoqqaani aappaa kisimi Jehovamut kiffaaguni, taassuma meeqqami Jehovap aqqutigeqqusaanik ajoqersornissaa noqqaassutigisariaqarpaa. — 2 Timûtiuse 1:5; 3:14, 15.

2. Aappariit meeraqanngippata ilaqutariittut atuaqqissaaqatigiinneq pisariaqarpa? Nassuiaruk.

² Tamanna ima paasisariaqanngilaq aappariit meeraqarunik aatsaat ilaqutariittut Guutip oqaasianik atuaqqissaaqatigiittariaqartut. Uiusoq nuliaasorlu meeraqanngikkaluarlutik aappariittut atuaqqissaaqatigiikkunik takutissavaat anersaakkut ittunik pingaartitsillutik. — Evfisumiut 5:25, 26.

3. Sooq ilaqutariit atuaqqissaaqatigiinnerata aalajangersimasuunissaa pingaaruteqarpa?

³ Ajoqersuineq iluaqutaanerpaasarpoq aalajangersimasumik tunniunneqartaruni, soorluttaaq Jehovap puilasuitsumi Israelikkut paasitikkai: ’Inuup iffiaannaq inuussutiginngilaa, oqaaserli sunaluunniit Guutip qarnanit anisoq inuussutigisarpaa.’ (5 Moses 8:3) Pissutsit ilaqutariit atugaat apeqqutaallutik, ilaqutariit ilaasa sapaatip-akunneri tamaasa atuaqqissaaqatigiinnissamik pilersaaruteqarput; allat ullut tamaasa sivikitsumik atuaqqissaaqatigiittarput. Qanorluunniilli pilersaaruteqaraluarussi atuaqqissaaqatigiinnissarsi allanit akornuserneqartittarniaqinasiuk. Atuaqqissaarnissamut ’piffissamik pisiariniaritsi’. Piffissaqarfigissagaanni pilliuteqartariaqarpoq, tamannali imminut akilertarpoq.  Tassami ilaquttavit inuunerat pineqarpoq. — Evfisumiut 5:15-17, NV; Filípimiut 3:16.

Anguniagassatut eqqaamasariaqakkat

4, 5. (a) Moses aqqutigalugu Jehovap angajoqqaat meeqqaminnik ajoqersuinerminni sumik pingaartumik anguniagassaqartippai? (b) Ullumikkut tamanna maleruassagutsigu suna pisariaqarpa?

⁴ Ilaqutariit atuaqqissaaqatigiinnerat siulersoraangakku pitsaanerussaaq aalajangersimasunik ersarissunillu anguniagaqaruit. Assersuutigalugu tulliuttuni eqqaaneqartut eqqarsaatigisinnaavatit.

⁵ Atuaqqissaaqatigiikkaangassi Jehova Guutimut asanninnermut kajumissaarigit. Israelikkut nuna neriorsuutigisaq iserfigitinnagu Moabip narsaataani katersuummata, Mosesip eqqaavaa inatsit Jesus Kristusip kingusinnerusukkut ’inassut siulleq annerusorlu’-mik taasaa. Inassut suna? ’Jehova Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.’ (Matiuse 22:36, 37; 5 Moses 6:5) Mosesip Israelikkut kajumissaarpai tamanna uummammiugeqqullugu qitornaminnullu ilinniartitsissutigeqqullugu. Angajoqqaat taamaaliorniarlutik ilinniagassanik uteqqiineq atortariaqarpaat, tikkuartariaqarlugulu suut pissutigalugit Jehova asasariaqaraat, aamma eqqartortariaqarpaat isummat iliuutsillu suut asanninnermut tamatumunnga akornutaasinnaasut, namminnerlu inuunerminni Jehovamut asanninnertik ersersittariaqarlugu. Meeqqatta aamma ajoqersorneqarneq taama ittoq pisariaqartippaat. ’Uummatimikkut kipineqarnissamut’ ikiorneqarnissartik pisariaqartippaat, tassa Guutimut asanninnermut akornutaasut tamaasa uummammit peerneqartariaqarput. (5 Moses 10:12, 16; Jeremia 4:4) Akornutaasinnaasut tamakkua ilagaat silarsuup piinik pilerissuseq aamma sammisartagaanut periarfissanut assigiinngitsunut peqataarusussuseq. (1 Juánase 2:15, 16) Jehovamut asanninnerput uumassuseqartariaqarpoq, killittariaqarpaatigullu Ataatatta qilammiusup iluarisaanik iliornissatsinnut. (1 Juánase 5:3) Ilaqutariittut atuaqqissaaqatigiinnersi ataavartumik iluaqutigissagussiuk, atuaqqissaarneq aqunneqartuartariaqarpoq asanninnerup tamatuma nakussatsinneqarnissaanut sunniuteqarluartumik.

6. (a) Eqqorluartumik ilisimasaqalernissamut ilaquttat ikiussagaanni suna pisariaqarpa? (b) Eqqorluartumik ilisimasaqarnerup pingaaruteqarnera Biibilimi qanoq erseqqissarneqarpa?

⁶ Guutip piumasaqaataanik eqqorluartumik ilaquttatit ilisarsitikkit. Sumik nassataqassava? Atuagassiamit atuakkamilluunniit akissutip atuaannarnissaa naammanngilaq. Angajoqqaat qitornaasalu oqaloqatigiissutigisariaqarpaat qulakkeerniarlugu sammineqartumi oqaatsit pingaarnerusut isumallu tunngaviusut ersarissumik paasisimanerlugit. Eqqorluartumik ilisarsineq immikkut pingaaruteqarpoq inuttaaq atissagutsigu, ajornartorsiuteqartilluta pingaarnerusut eqqumaffigalugit, aamma Guutip iluarisaanik iliuuseqarluta. — Filípimiut 1:9-11; Kulorsamiut 1:9, 10; 3:10.

7. (a) Apeqqutit suut ilaqutariit atuaqqissaaqatigiinnermi sammineqartut ulluinnarni atornissaannut ikiorsinnaavaat? (b) Tamatuma naleqassusia Biibilimi qanoq erseqqissarneqarpa?

⁷ Ilaquttatit ilinniarsimasaminnik atorluaanissaannut ikiukkit. Tamanna anguniarlugu ilaqutariittut atuaqqissaaqatigiikkaangassi ima aperisarit: ’Tamanna inuunitsinnut qanoq sunniuteqartariaqarpa? Maannakkut iliuuserisartakkavut allanngortittariaqarpavut? Sooq allanngortikkumasariaqarpavut?’ (Ussatit 2:10-15; 9:10; Jesaja 48:17, 18) Ilinniarsimasat qanoq atorneqarsinnaanerat sammilluarutsigu ilaquttat anersaakkut ineriartornissaannut pingaaruteqarsinnaavoq.

Ilinniartitsinermut ikiuutissat silatuumik atortakkit

8. Biibilimik atuaqqissaarnermut ikiuutissanik sunik ’kiffap ilumoorlunilu silatuup’ pilersorsimavaatigut?

⁸ ’Kiffap ilumoorlunilu silatuup’ atuaqqissaarnissamut  ikiuutissanik amerlasuunik pilersortarpaatigut. Atuagassiaq Napasuliaq Alapernaarsuiffik atuaqqissaarnermut Biibili ilanngullugu atorneqartussaq oqaatsini 131-ni saqqummersarpoq. Oqaatsini 153-ini atuakkat Biibililersaarutit, oqaatsini 284-ini atuagassiaaqqat, oqaatsini 61-ini kassettinut immiussat, oqaatsini 41-ni videobåndit oqaatsinilu 9-ni Biibilimik atuaqqissaarnermut computerimut programmi saqqummersinneqarsimapput. — Matîuse 24:45-47.

9. Ilaqutariittut Napasuliaq Alapernaarsuiffik-mik atuaqqissaaqatigiinnitsinni qanoq ililluta allassimaffinni immikkoortumi matumani innersuussutigineqartuni siunnersuutigineqartut maleruarsinnaavavut?

⁹ Ilaqutariit amerlasuut ilagiinni Napasuliaq Alapernaarsuiffik-mik atuaqqissaaqatigiinnissamut piareersartarput. Taamaaliorneq pissarsiaqarnartorujussuuvoq. Napasuliaq Alapernaarsuiffik Jehovap innuttaasa nunarsuaq tamakkerlugu ineriartornissaannut anersaakkut inuussutissanik imaqarpoq saqqummersartunilu pingaaruteqarnersaalluni. Ilaqutariittut Napasuliaq Alapernaarsuiffik atuaqqissaaraangassiuk immikkoortut atuaannarlugit apeqqutillu akiinnarlugit naammanngilaq. Pingaaruteqarpoq imarisaata paasinissaa. Allassimaffiit innersuussutigineqartut issuarneqanngitsulli qupperarnissaat piffissaqarfigisiuk. Ilaquttatit nassuiaaqqukkit allassimaffiit qanoq immikkoortumi allassimasunut attuumassuteqarnersut. — Ussatit 4:7, 23; apustilit suliait 17:11.

10. Angajoqqaat qanoq ilillutik atuaqqissaaqatigiinneq meeqqanut peqataaffigiuminarnerulersissinnaavaat nuannernerulersillugulu?

¹⁰ Meeraqarussi qanoq iliorsinnaavit ilaqutariittut  atuaqqissaaqatigiinnerup ileqquliussaannartut nuanniitsutut pinissaa pinngitsoortinniarlugu, akerlianilli ineriartornartutut, soqutiginartutut nuannaarfiusutullu ilersillugu? Atuaqqissaartillusi anguniaruk meeqqat tamarmik peqataanissaat soqutiginnillutillu malinnaanissaat. Ajornanngippat meeqqat tamarmik namminneq Biibilimik atuagassiamillu peqarnissaat isumagiuk. Jesusip asannittumik pissuseqarfiginninnera malinniarneqarsinnaavoq meeqqat nukarliit issiaqatigalugit, immaqa eqilaarlugit. (Naleqqiuguk Mákorse 10:13-16.) Ilaqutariit ittuata meeraq qinnuigisinnaavaa atuaqqissaaqatigiissutigisami assiliartat oqaaseqarfigeqqullugit. Meeqqat angajulliunerulaartut atuaqqissaarneq sioqqullugu qinnuigineqarsinnaapput allassimaffiup aalajangersimasup atuffassissutiginissaanut piareersalaaqqullugu. Inuusuttuaraaguni atuaqqissaaqatigiissutissat ulluinnarni maleruarneqarsinnaanerannik nassuiaaqquneqarsinnaavoq.

11. Ilinniartitsinermut ikiuutissanik allanik sunik peqarpugut, tamakkulu qanoq ilaqutariit atuaqqissaaqatigiinnerannut atatillugu iluaqutaasumik atorneqarsinnaappat?

¹¹ Naak Napasuliaq Alapernaarsuiffik atuaqqissaaqatigiissutissatut tunngaviunerusutut atortaraluarlugu puigorneqartariaqanngilaq atuaqqissaarnermut ikiuutissat saqqummersinneqarsimasut allat atornissaat. Sammisap tunuliaqutaa imaluunniit oqariaaseq Biibilimeersoq pillugu paasissutissinneqarusukkuit qinerlerfissiaq Indsigt i Den Hellige Skrift qupperarsinnaavat. Apeqqutit allat immaqa Register til Vagttårnets Publikationer-mi imaluunniit misissuinissamut computerinut programmi, Watchtower Library, Peqatigiiffiup pilersitaa atorlugu akineqarsinnaapput. Ikiuutissat tamakku pigigukkit atornissaat ilaqutariittut atuaqqissaaqatigiinnissassinnut iluaqutaasinnaaqaaq. Inuusuttut soqutigisaqarnerulersinniarlugit aamma atuaqqissaaqatigiinnissinnut atatillugu Peqatigiiffiup videoliaasa ilikkagaqarnartut ilaat isiginnaarsinnaavarsi imaluunniit tusarnaagassiat kassettinut immiussat ilaat tusarnaarsinnaallugu, kingornatigullu imarisaa oqaloqatigiissutigalugu. Ikiuutissat tamakku atorluarussigik ilaqutariittut atuaqqissaaqatigiinnersi soqutiginartunngussaaq ilaqutariillu tamarmik iluaqutigissavaat.

Ilaquttavit pisariaqartitaannut naleqquttunngorsaagit

12. Angajoqqaat ilaqutariit immikkut pisariaqartitaat isumagissallugit ilaqutariittut atuaqqissaaqatigiinneq qanoq iluaqutigisinnaavaat?

¹² Ilaqutariit amerlasuut sapaatip-akunneri tamaasa Napasuliaq Alapernaarsuiffik-mik piareersaqatigiillutik nuannarisarpaat. Ilaquttavilli maannakkut ajornartorsiutaat isumaallu eqqumaffiginiakkit. Anaanaasup suliffeqartariaqanngikkuni aamma tamakku eqqumaffigisinnaavai meeqqat ullut tamaasa atuareernerup kingorna najortarlugit. Ajornartorsiutit tamatumani iliuuseqarfigineqarasuarsinnaapput; allalli kingusinnerusukkut sammineqarnerusariaqarlutik. Ilaqutariit iluanni immikkut pisariaqartitsisoqaraangat tamakku sumiginnarneqartariaqanngillat. (Ussatit 27:12) Tassaasinnaapput atuarfimmi ajornartorsiutit imaluunniit pisutsit allat. Atuaqqissaaqatigiissutissat naleqquttut toqqakkit, ilaquttatillu siumut paasitikkit suut sammineqassasut.

13. Sooq iluaqutaassava ilaqutariit oqaloqatigiissutigippassuk piitsuussutsip akuerisariaqarnera?

¹³ Assersuutigalugu nunani amerlasuuni inuit piitsuupput; taamaattumik sumiiffinni amerlasuuni nammineq qanoq iliorsinnaanerluni oqaloqatigiissutigineqartariaqarpoq. Qularnanngitsumik amerlasuut ilaqutariittut atuaqqissaaqatigiitillutik Biibilimi najoqqutassiat tunngavigalugit ulluinnarni ajornartorsiutit takkukkumaartut qanoq anigorsinnaanissaasa sungiusarnissaat iluaqutaasutut isigissavaat. — Ussatit 21:5;  Nalunaajaasup oqaasii 9:11; Eprîarit 13:5, 6, 18.

14. Qanoq ilinikkut naleqqulluarsinnaava ilaqutariit Jehovap nakuusernermik, sorsunnermik kristumiullu kalluunnaveersaarnissaannik isiginninnera oqaloqatigiissutigippatigik?

¹⁴ Oqaloqatigiissutigisassatut pisariaqartoq alla tassaasinnaavoq nakuuserneq. Tamatta pisariaqartipparput Jehovap isiginnittaasia isummatsinni uummatitsinnilu qamuuna pigiliunnissaa. (1 Moses 6:13; Tussiaat 11:5) Tamanna ilaqutariittut atuaqqissaarnermi pineqartillugu assersuutigalugu eqqartorneqarsinnaavoq atuarfimmi qunutitsisoqarpat meeqqat qanoq iliorsinnaanersut, imminut illersornermut sungiusarnermi peqataasinnaanersut aamma qanoq ililluni aliikkutassiat tulluartut qinerneqarsinnaanersut. Silarsuarmi saqitsaannerit nakuuserfiusut nalinginnaalersimapput; nunani amerlasuuni nunap inui imminnut sorsuupput, naalakkersuinikkut naggueqatigiissutsikkullu akersuuttoqarpoq, pinerlunniaqatigiilluunniit imminnut sorsuullutik. Taamaattumik pisariaqartuusinnaavoq imminnut akersuuttunit avatangersimaneqartilluni ileqqorissaartuunerup attatiinnarnissaa qanoq anguneqarsinnaanersoq. — Jesaja 2:2-4; Juánase 17:16.

15. Meeqqat qanoq atoqatigiinneq aappariinnerlu pillugit ilitsersorneqarsinnaappat?

¹⁵ Meeqqat alliartortillutik ukiutik naapertorlugit atoqatigiinneq aappariinnerlu pillugit ilitsersorneqartariaqarput. Kulturit ilaanni angajoqqaat amerlanersaasa atoqatigiinneq pillugu meeqqatik oqaloqatiginngisaannangajappaat. Meeqqat tamatuminnga oqaluttuunneqanngikkunik inuusuttunit allanit eqqorluanngitsumik paasitinneqarsinnaapput, ajorluinnartumillu kinguneqarsinnaavoq. Ajunnginnerussannginnerpa Jehova malinniaraanni, taanna Biibili aqqutigalugu ammasumik periaaserillunilu tamatuminnga unnersuussisoq? Guutip oqaasia tunngavigalugu unnersuussinerit meeqqavut ikiussavaat imminnut ataqqinermik atatitsinissaannut, nukappiaraaguni niviarsiaqqat niviarsiaraagunilu nukappiaqqat eqqortumik pissuseqarfiginissaannut. (Ussatit 5:18-20; Kulorsamiut 3:5; 1 Tásalûníkamiut 4:3-8) Siornatigut tamakku oqaloqatigiissutigisimagaluarlugit taamaalioqqinnissat nangaassutigeqinagu. Pissutsit allanngoriartortillugit uteqqiineq pingaaruteqarpoq.

16. (a) Ilaqutariit assigiinngitsut qaqugukkut atuaqqissaaqatigiittariaqarpat? Assersuutinik taasaqarit. (b) Ilissi ilaqutariittut aalajangersimasumik atuaqqissaaqatigiinnermut akornutaasut qanoq anigorsimavisigik?

¹⁶ Qaqugukkut ilaqutariittut atuaqqissaaqatigiittoqassava? Nunarsuaq tamakkerlugu Betelimi kiffartortut malinniarlugit ilaqutariit amerlasuut ataasinngornikkut unnukkut atuaqqissaaqatigiittarput. Allat piffissami allami taamaaliortarput. Argentinami ilaqutariit aqqaniliusut, taakkunannga meeqqat qulingiluaallutik, ullaat tamaasa tallimanut makittarput ilaqutariittut Biibilimik atuaqqissaaqatigiinniarlutik. Suliffinni piffissat nikerartuunerat pissutigalugu allamik periarfissaqanngillat. Taamaaliorneq piuminarpallaanngikkaluarpoq, meeqqalli isummakkut uummatikkullu paasivaat ilaqutariittut atuaqqissaaqatigiinneq qanoq pingaartigisoq. Filippinerini utoqqaanertap nuliani meeqqanilu ukiukitsut pingasut aalajangersimasumik atuaqqissaaqatigisarpai. Sapaatip-akunnerata ingerlanerani saniatigut angajoqqaavisa meeqqat tamaasa immikkut atuaqqissaaqatigisarpaat, tamarmik sallusuissummik namminerisamissut pigiliussinissaannut ikiorniarlugit. USA-mi qatanngutip arnap nalunaajaasuunngitsumik uillip ullaat tamaasa meeqqani atuarfiup bussianut ingerlaqatigisarpai. Bussi utaqqitillugu minutsit qulit missaat atorlugit Biibilimeersut naleqquttut atuarlugillu oqaloqatigiissutigisarpaat, taamaalioreeraangamik anaanaasup sivikitsumik meeqqat qinoqatigisarpai. Kunngiitsuuffimmi Demokratiskiusumi Congomi  arnap uiminit uppinngitsumit qimanneqarsimasup Biibilimik atuaqqissaaqatigiittarneq ilungersuutigisariaqarsimavaa atuarfimmi annikitsuinnarmik ilikkagaqarsimanini pissutigalugu suleruloortariaqarami. Ernerata inersimasup ikiortarpaa, sapaatip-akunneri tamaasa ilaquttani pulaartarlugit anaanani qatanngunnilu minnerusut atuaqqissaaqatiginiarlugit. Anaanaasoq maligassiuilluarpoq eqiasuilluni piareersarluartarami. Ilissinni ilaqutariittut atuaqqissaaqatigiinnerup aalajangersimasuunissaa artornarsinnaasarpa? Nikalloqinak. Aalajangersimasumik atuaqqissaaqatigiinissassinnut ilungersornersi pilluaqqoqqullugu Jehova qinnuigisaruk. — Mákorse 11:23, 24.

Nikallujuitsuunerup pilluaqqussutissartai

17. (a) Ilaqutariittut aalajangersimasumik atuaqqissaaqatigiissagaanni suna pisariaqarpa? (b) Misilittakkap suup takutippaa ilaqutariit aalajangersimasumik Jehovap aqqutigeqqusaanik ajoqersorneqartarnerat naleqangaartoq?

¹⁷ Pilersaarusiorluarneq nikallujuinnerlu pisariaqarput aalajangersimasumik ilaqutariittut atuaqqissaaqatigiinneq anguniarlugu, kingunerili iluaqutaasorujussuupput. (Ussatit 22:6; 3 Juánase 4) Tysklandimi Franzip Hildallu meeqqat aqqanillit perorsarsimavaat. Ukiorpassuit tamatuma kingorna paniat Magdalena oqaluttuarpoq: „Kingumut qiviaraangama isumaqarpunga ullut tamaasa anersaakkut ittunik ajoqersorneqartarsimanerput pingaaruteqarluinnartuusimasoq.“ Adolf Hitlerip nalaani inuiaassutsimik pingaartitsivallaarneq ingasatsikkiartuinnarmat Magdalenap ataataata Biibili atorsimavaa ilaquttani misilinneqarnissanut piumaartunut piareersarniarlugit. Kingusinnerusukkut meeqqat minnerusut tigusaapput pinngitsaalillutillu perorsaaffinnut inissinneqarlutik; ilaat tigusarineqarput parnaarussivinnilu tigusanulluunniit inissiarsuarnut inissinneqarput. Ilaat pillagaallutik toqunneqarput. Tamarmilli uppernikkut aalajaalluinnarput — sualuttumik malersorneqarnermiinnaanngitsoq aammali aniguisunut tunngatillugu ukiuni tulliuttuni.

18. Angajoqqaat kisermaat ilungersorneri qanoq pilluaqqussutissanik nassataqarsimappat?

¹⁸ Angajoqqaat kisermaat aamma uppeqatiginngisamik aappallit amerlasuut aammattaaq meeqqamik aalajangersimasumik Biibilimit ajoqersorneqarnissaat isumagisarsimavaat. Indiami anaanap kisermaap uillarnerup meeqqami marluk Jehovamut asanninnermik pigiliussinissaat ilungersuutigisimavaa. Aliasoqaarlu ernermi Jehovap innuttai ilagisarunnaarmagit. Jehova qinnuigingaarpaa ernerminik ajoqersuinermini kukkussuteqarsimaguni isumakkeerfigeqqulluni. Erneratali ilikkarsimasani puigorsimanngilai. Ukiut qulit sinnerlugit qaangiuttut sallusuissummut uterpoq, anersaakkut siumukarluarluni kingusinnerusukkullu ilagiinni utoqqaanertanngorluni. Maannakkut nulianilu pioneeritut piffissaq tamaat kiffartorput. Aap, angajoqqaat Jehovap peqatigiissortaasalu ilaqutariit iluanni Biibilimik ajoqersuisarneq pillugu unnersuussutaannik maleruaasimasut qujamasungaarsinnaapput! Illit ilaquttanni siunnersuut tamanna maleruarpisiuk? (wE 1/7 99)

Nassuiarsinnaavigit?

□ Sooq ilaqutariittut atuaqqissaaqatigiittarneq pingaaruteqarluinnarpa?

□ Ilaqutariittut atuaqqissaaqatigiinnermi sunik anguniagaqartariaqarpugut?

□ Ilinniartitsinermut ikiuutissanik sunik pilersorneqarpugut?

□ Atuaqqissaaqatigiinneq qanoq ililluni ilaqutariit pisariaqartitaannut naleqquttunngortinneqarsinnaava?

[Atuaqqissaarnermi apeqqutit]

[Qupp. 18-imi assiliartaq]

Aalajangersimasunik anguniagaqarussi ilaqutariittut atuaqqissaaqatigiinnersi pitsaanerussaaq