Attaveqatigiilluarneq — Aappariittut ingerlalluarnissamut matuersaat

1778-imi Robert Barron parnaarsaammik marloqiusaasumik, ullutsinni parnaarsaatit sananeqarneranni suli assilineqartartumik, nassaartutut akuerisaavoq. Parnaarsaatip tamatuma asseqanngissutigaa qiversarfiit marluk ataatsikkut kivinniarlugit matuersaat atorneqartariaqarmat.

TAAMATUTTAAQ aappariinneq ingerlalluassappat uiusoq nuliaasorlu isumaqatigiillutik suleqatigiittariaqarput. Aappariinnerup ingerlalluartup nuannersortai misigerusukkaanni imaluunniit ammaaniaraanni attaveqatigiilluarneq pingaartuuvoq.

Attaveqatigiilluarneq sunik nassataqarpa

Attaveqatigiilluarneq sunik nassataqarpa? Oqaatsinik qinerlerfissiami oqaaseq attaveqatigiinneq ima nassuiarneqarpoq: „Paasissutissanik ingerlatitseqqinneq taartigeeqatigiinnerluunniit, eqqarsaatinik imaluunniit misigissutsinik oqalunnikkut, allakkatigut ussersornikkulluunniit.“ Taamaattumik attaveqatigiinnerup nassatarivaa misigissutsinik eqqarsaatinillu allamut saqqummiussinissaq. Attaveqatigiilluarnerlu ineriartornartunik, qiimmannartunik, ileqquulluartunik, nersornartunik tuppallersaanermillu ilaqarpoq. — Evfisumiut 4:29-32; Filípimiut 4:8.

Attaveqatigiilluarneq tatiginninnermik paaseqatigiinnermillu tunngaveqarpoq. Pissuserisat tamakku atuutissapput aappariinneq inuuneq naallugu atasussatut naatsorsuutigineqarpat, aappariillu marluullutik ingerlalluarnissartik aalajangiusimappassuk. Aappariinneq taamaattoq pillugu allaatigisami atuakkiortoq Joseph Addison ukiut 1800-ssaanni inuusoq oqarsimavoq: „Inuit marluk inuppassuit akornannit imminnut qinersimasut tuppallersaqatigiinniarlutik iluarusutsinniarlutillu, toqumit avissaartitaanissap tungaanut inussiarnersuunissaq, asannitsuunissaq, pissuserissumik periaaseqarnissaq, isumakkeerfiginnittuunissaq, naammagittartuunissaq, nuannaartuunissarlu akisussaaffigilerpaat aapparisallu sanngiiffii piginnaaffiilu soqutigalugit.“ Inooqatigiinneq taamaattut pilluarnartorujussuusinnaavoq. Pissutsit tamakkua naleqangaartut aappariinneq kusanartunngortissavaat uiusoq nuliaasorlu imminnut pitsaasumik attaveqatigiilluarpata.

Attaveqatigiilluarnissamut akornutaasinnaasut

Inuit amerlanersaat nuannaarlutik, aap, qiimmassimaaginnaavillutik katittarput. Amerlasuunulli qiimmassimaarneq qaangiutipallattarpoq, isumalluarnerlu annikillisarpoq. Eqqortumik iliorlutik qulanngikkaluarnerat immaqa pakatsinermik, kamannermik, akeqqersimaarnermik nuannarinninnginnerujussuarnermillu taarserneqassaaq. Maannakkullu aappariit „toqumit avissaartitaanissap tungaanut“ naammagittarniaannartariaqalerput. Aappariinnerup ingerlalluarnissaanut attaveqatigiilluarneq pingaaruteqartoq pitsaanerulersinniaraanni atatiinnarniaraanniluunniit, akornutaasoqarpoq ajugaaffiginiagassanik.

Aapparisap paasissutissanut kissaatigisanulluunniit aalajangersimasunut qanoq qisuariarnissaanut siooraneq attaveqatigilluarnissamut akornutaasinnaavoq. Assersuutigalugu aapparisap asanninnerata annaanissaa siooragineqalersinnaavoq timikkut nappaateqarneq paasineqarpat imaluunniit innarluuteqaleraanni. Qanoq ililluni pilatsinnissaq isikkumik allanngortitsilluinnartussaq imaluunniit sulisinnaassusermik annaasaqartitsisussaq aapparisamut oqaatigineqarsinnaava? Taamatut pisoqartillugu ammasumik oqaloqatigiinnissaq aatsaat taama pisariaqartigilissaaq, siunissarlu qanoq isikkoqassanersoq eqqarsaatigilluarlugulu pilersaarusiortariaqarput. Aapparisaq suli asanerarlugu oqaluttuunneratigut, akulikitsumik attuualaarinikkut ersersinneratigut, inuttut soqutiginninneq takutinneqarsinnaavoq aappariilluarnermullu ineriartuutaassalluni. Ussat manna pingaartumik aappariinnermi atuuttariaqarpoq: „Ikinngutaasup asannissutsi tamatigut takutittarpaa, eqqarliusorlu erniusimavoq annikilliornermi ikiortissaalluni.“ — Ussatit 17:17.

Attaveqatigiilluarnermut akornutaasinnaasoq alla tassaavoq kamanneq. Eqqorluartumik oqartoqarsimavoq aappariit pilluartut tassaasut inuit marluk isumakkeerfiginnillaqqissut. Taamatut oqaatigineqartumut naapertuutissagaanni aappariit apustili Paulusip siunnersuutaa atoriaannaasoq ilungersorlutik malinniartariaqarpaat: ’Seqineq tarrisinnaveersiuk narrutsassimanissinni.’ (Evfisumiut 4:26) Kamakkunnaarluni siunnersuut tamanna malinniaraanni maniguulluni attaveqatigiittoqartariaqarpoq. Aappariilluartuni aappariit imminnut puttarsisaqarfigiuartanngillat kamaattuaannarnatik assortuuttuaannarnatillu. (Ussatit 30:33) Guuti malinniarusuppaat, taanna ‘kamaassiuaannangitsuummat’ (Jeremia 3:12) Uummatikkut imminnut isumakkeerfigissapput. — Matîuse 18:35.

Attaveqatigiinnissamut qanoq ittumulluunniit akornutaasinnaasoq alla tassaavoq nipangersimaffiit nuanniitsut. Tassaasinnaapput naalliutsitaasutut isikkoqarneq, anersaarulunnerit, soqutiginninngitsutut ileqqulersorneq piaaralunilu aapparmik oqaloqatiginninnginnissamik aalajangiussisimaneq. Taamatut ileqqulersornermikkut arlaannik iluarinngisaqarnermik aapparisaq paasitinniarneqartarpoq. Nipangersimaannarnikkulli inussiarniitsuunikkullu aappariinnermik aserorterinermut taarsiullugu aappariinneq ineriartortinneqarsinnaavoq ammasumik inussiarnersumillu misigissutsinik oqaatiginninnikkut.

Aappaasoq oqalukkaangat aappaasup ilaannakuusumik tusarnaarpani tusarnaanngivilluniluunniit attaveqatigiilluarneq siuarsarneqarnavianngilaq. Immaqa tusarnaarluarnissamut sianissutsikkut misigissutsikkullu nukissaqanngilagut qasuallaarpugut imaluunniit ulapippallaarluta. Assortuunnerit pilersinnaapput pilersaarutinik paatsooqatigiinnikkut aapparisap isumaqatigiissutitut ersarissutut naatsorsuussaralui, aappaasulli aatsaat tusarneragai, pissutaallutik. Ersarippoq attaveqatigiilluannginneq ajornartorsiutinut taamaattunut pissutaasoq.

Qanoq ililluni attaveqatigiillualertoqarsinnaasoq

Asannittumik oqaloqatigiinnissamut piffissaqarnissaq pingaaruteqarpoq. Ilaasa piffissaq ima annertutigisoq fjersynimut imaluunniit allat inuunerinik malinnaanermut atortarpaat allaat namminneq inuunerminnut piffissaqarpiartaratik. Attaveqatigiilluarnermik ineriartortitsissagaanni fjernsynip qaminnissaa amerlasuutigut pingaaruteqartarpoq.

Soorlu ilaannikkut oqalunnissamut piffissaqartartoq, aamma ilaannikkut nipangernissamut piffissaqartarpoq. Angut silatooq oqarsimavoq: „Qilaap ataani pisartut suut tamarmik aalajangersimasumik piffissaligaapput: . . . nipangersimaffissaqarpoq oqaluffissaqarlunilu.“ Oqaatsilli eqqortut aamma atorneqarsinnaapput. „Ila ajunngittassusia oqaasissat piffissaasigut anillugit.“ ussatit ilaat taamaappoq. (Nalunaajaasup oqaasii 3:1, 7; Ussatit 15:23) Taamaattumik illit isummat isumaaluutitilluunniit qaqugukkut annisissallugit pitsaanerunersoq paasiniaruk. Imminut aperigit: ’Aappara qasuvippa kajumippaluunniit? Eqqartorusutara akerleriissutissaasinnaanerpa? Aapparmaana oqaatsikka sorliit kingullermik oqaloqatigiinnitsinni iluarinngikkai?’

Eqqaamasariaqarpoq sunniuteqarluarnerpaasartoq inuit takusinnaagaangassuk suleqataaneq siunnersuummilluunniit malinninneq namminneq iluaqutigissallugu. Aappariit isumaqatigikkunnaaqqajaappata immaqa aappaasoq oqassaaq: „Arlaanik iluarinngisaqarpunga, tamannalu massakkorpiaq oqaloqatigiissutigisariaqarparput.“ Oqaatsilli atorneqartut pissutsinut atukkanut naapertuussarneqassapput, kisianni pitsaanerussannguatsiarpoq imatut oqaraanni: „Asasannguaak, ippassaq oqaloqatigiissutigisarput qanorlu immaqa aaqqissinnaanissaa eqqarsaatigigakku.“ Aallarniinerit tamakkua arlaat sorleq aapparpit iluarinerussagunarpaa?

Aap, pingaaruteqarpoq oqaatsit qanoq oqaatigineqarnersut. Apustili Paulus allappoq: ’Alianaatsunik oqaaseqartaannaritsi, tarajorsimasunik.’ (Kulorsamiut 4:6) Nipivit oqaatsivillu tusaajuminartuunissaat anguniartaruk. Eqqaamajuk ’tungusunnitsuutitut kusertutut ittut inussiarnersumik oqaatsit tarnimut tungusunnitsut timimullu peqqissaataasut.’ — Ussatit 16:24

Aappariit ilaasa angerlarsimaffimminni assigiinngitsunik suleqatigiinnikkut akaareqatigiilluni attaveqatigiinnermik pilersitsisimapput. Suleqatigiinnerup taamaattup aappariit ataatsimooqatigiinnermik misigitissavai, oqaloqatigiinnissamullu piffissaqartilerlugit. Aappariit allat eqqissisimaarlutik allanillu suliaqarnatik oqaloqatigiilluarnerusarput.

Aamma aappariilluartut allat qanoq oqaloqatigiittarnerata qimerloornerat ilikkagaqarnartorujussuusinnaavoq. Qanoq ilillutik tamanna angusimavaat? Imminnut tulluuttinnerat attaveqatigiilluarsinnaanerallu namminneq suliniuteqarnikkut, naammagittassutsikkut asannittumillu soqutiginninnikkut anguneqarsimagunarpoq. Aamma ilikkagassarpassuaqarsimassagunarput, aappariilluarnermi nammineerluni takkunnavianngilaq. Taamaattumik aapparisap isumaanik soqutiginninnissaq pingaaruteqarpoq, pisariaqartitai eqqarsaatigalugit pissutsillu puullaaqinarsinnaasut annikillisinneqarsinnaapput oqaasissat eqqarsaatiginerisigut. (Ussatit 16:23) Katissimaguit taava inooqatigiuminarnissat utoqqatserfigiuminarnissallu suliniutigikkit. Taamaalillutit aappariillualernissassinnut tunngaviliisinnaassaatit.

Jehova Guutip aappariineq pilluarnartuussasoq ataavartuussasorlu siunertaraa. (1 Moses 2:18, 21) Matuersaalli aappariit marluullutik assaanniippoq. Marluk asaqatigiittut suleqatigiilluarnikkut attaveqatigiinnerup ilikkarneratigut aapparilluarnissamut ’matu’ ammarsinnaavaat. (wE 15/7 99)

 [Qupp. 31-mi assiliartaq]

Fjernsynip qaminneratigut oqaloqatigiinnissamut piffissaqarnerulertarput

 [Qupp. 32-mi assiliartaq]

Attaveqatigiilluarnerup uummatit ataavartumik asaqatigiilersissinnaavai