Ilagisartakkanit tatineqarneq — iluaqutaasinnaava?

Tamatta allanit akuerineqarusunneq inunnguuseraarput. Arlaannaataluunniit ammut isigineqarnissaq itigartinneqarnissarluunniit kissatiginngilaa. Taamaattumik annerusumik minnerusumilluunniit ikinngutitsinnit sunnerneqartarpugut.

ILAGISARTAKKATSINNIT tatineqarutta sianigaluta sianiginataluunniit eqqarsariaasiannut ilioriaasiannullu naleqqussartarpugut. Oqaaseq nikassaanertut nipeqarajuppoq. Kisianni tikitassatsitut sunniilluarnermut sangutissinnaavarput.

Utoqqaassuseq apeqqutaanani tamarmik sunnerneqartarput

Inuusuttut kisimik ilagisartakkanit sunnerneqarneq misigineq ajorput; utoqqaassuseq apeqqutaanani tamarmik taamatut attorneqarsinnaapput. Sunnerneqarnerup malunniunnera ersarissisarpoq imminut ima aperisaleraangatta: „Allat taamaattarput; soormi uanga taamaaliorsinnaanngilanga?“ „Sooq allanit allaanerujuassaanga?“ „Allat qanormita eqqarsarlutillu oqassappat?“ „Ikinngutikka tamarmik pissiaqarlutillu katittarput, kisianni uangaanngitsoq. Arlaannik ajoquteqarpunga?“

Allanit allaanerunnginnissamut sunnerneqarneq inuusuttunik utoqqarnillu attuisarpoq, kisianni inuusuttut taakkuugajunnerupput annerpaamik sunnerneqartut. The World Book Encyclopedia-mi allassimavoq „inuusuttut amerlanersaat ilagisartakkaminni ikinngutitik ukioqatitik attavigisorujussuanngortarpaat. Inuusuttuaqqat taakkua ikinngutiminnit akuerisaanissartik angajoqqaaminnit akuerisaanissaminninngarnit pingaartinneruaat, taamalu akuerisaaneq anguniarlugu allaat pissusertik allanngortissinnaavaat.“ Atuagassiami nangilluni allassimavoq inuusuttuaqqat „isumaqartut peroriartornertik nalinginnaasoq ikinngutimik akueralutillu nuannarippatik“. Tamanna anguniarlugu „pigisat attaveqarnerillu pingaarnerutilertarpaat nuannarineqarnerminnut pingaaruteqassangatillugu, soorlu atisat aalajangersimasumik isikkullit, aqutsisinnaassuseq aamma arnaaguni angutini angutaagunilu arnani iluatitsineq“.

Aappariit immaqa paasivaat sumi najugarnissartik, qanoq ittunik biileqarnissartik, meeraqarnissartik meeraqannginnissartilluunniit, aalajangigassallu allarpassuit pillugit aalajangernitik, allat isiginnittaasiannit sunnerneqartartut — inuiaqatiminnit inunnit ilagisartakkanit imaluunniit inuiaqatigiinnit ikinnerussutilinnit ilaaffigisaminnit suna akuerisaanersoq. Allaat ilaqutariit ilaat akiligassanik annertuunik pilersitsisarput sanilimissut ikinngutimissullu pigisatigut nallersuussinnaajumallutik. Tassa amerlanertigut ilagisartakkanit tatineqarnikkut nakutitaalluta anguniakkavut, eqqarsartaaserput aalajangertarnerpullu sunnerneqartarput. Ilagisartakkanit tatineqarnerup sunniisinnaanera eqqarsaatigalugu, iluaqutaasunngortissinnaavarput nammineq ingerlavigerusutatsigut ingerlaqqinnissatsinnut ikiortigilerlugu? Aap, taamaaliorluarsinnaavugut.

 Ilagisartakkanit tatineqarneq iluaqutaasoq atorluaruk

Nakorsat peqqinnissamillu ilisimasaqartut allat nalunngilaat napparsimasuutimik isumalluartunik inoqateqarnissaat ajunngitsumillu sunniisinnaasunik avatangiiseqarnissaat qanoq pingaaruteqartigisoq. Avatangiisit taamaattut sukkanerusumik ajorunnaartitsisinnaapput. Assersuutigalugu napparsimasut avatimik ilaannik annaasaqarsimasut, sivisuumik sungiusaqqinnerminni eqqarsaatimikkullu ajorunnaarniarnerminni amerlanertigut ikiorneqartarsimapput atukkaminnut assingusunik atugaqarsimasunit, qiimmassarneqarlutik ajunngitsumillu maligaassiuunneqarlutik. Erseqqippoq ilagisartakkanit ajunngitsumik tatineqarneq iluaqutigineqarsinnaasoq pissuserissut neriulluarlutillu maligassaalluartut akornaniinnikkut.

Ilagiinni kristumiuusuni aamma taamaappoq, Jehovammi innuttami akuttoqatigiimmik katersoqatigiittarnissannut peqqussutaanut tunngaviusunut ilaavoq, imminnut ajunngitsumik sunneqatigiinniassammata. Guutip kajumissaarpaatigut ’asanninnermut ajunngitsuliornermullu kajumissaaqatigeeqqulluta oqaaqqissaaqatigeeqqullutalu’. (Eprîarit 10:24, 25) Kajumissaarinerit taamaattut nalissaqanngillat, ullutsinni silarsuarmit annertuumik ajortumik sunnersimaneqarlutalu tamaviaartitaagatta. Tamaviaartitaaneq tamanna pissutigalugu kristumiut ’assoruuttariaqarput’ anersaakkut nukittuungorumallutik. (Lúkarse 13:24) Taamaatumik uppeqatitta asannillutik tapersersuinerat pisariaqartillugulu pingaartipparput. Aamma amerlasuut ’qisuk uinimmut kapputtoq’ atortariaqarpaat, immaqa nappaateqarneq iloqiaanerluunniit. (2 Korintumiu 12:7) Allat ileqqut ajortut qaangerniarlugit nanertisimanerluunniit anigorniarlugu sorsuutigaat, imaluunniit inuunermi piumasaqaatit naammassiuminaatsippaat. Taamaattumik silatusaassaagut Jehovamut qanittumik attaveqartut kiffartuussinerminnillu nuannaarutiginnittut ilagisarutsigik. Ilagisartakkat taamaattut ineriartornartumik sunnissavaatigut ikiorlutalu ilumoorfiginnillutalu ’naggatissamut aalajaannissatsinnut’. — Matîuse 24:13.

Tassa ikinngutinik ilumoortunik toqqaanitsigut allanit sunnerneqarsinnaanerput aqussinnaavarput. Tamatumalu saniatigut anersaakkut inuussutissat ajunngitsut siunnersuutillu atoriaannaasut kristumiut ataatsimiinnerini pisinnaasatta, ikinngutitsinnit qiimmassarneqarnerput sakkortusassavaa.

Soorunami kristumiut ataatsimiinnerinut ornigunneq tamatigut ajornaatsuinnaasanngilaq. Ilaat aappaminnit tapersersorneqarpiarneq ajorput tapersersorneqanngivittarlutilluunniit. Allat qitornaqarput piareernissaallu isumagisariaqarlugu, sulilu allat angallanneqarnissaq ajornartorsiutigaat. Kisiannili tulliuttut eqqarsaatigeriakkit: Akornutaasunik tamakkuninnga unitsinneqanngikkuit, maligassiuinerpit assingusunik ajornartorsiutillit aniguiniarnissaannut kajumilersissinnaavaat. Allatut oqaatigalugu illit allallu ilittut atugaqartut maligassiuilluaannanngilasi, aammali ilagisartakkanik ajunngitsumik sunniivusi — pinngitsaaliinertaqanngivissumik.

Apustili Paulusip, amerlasuunik ajoruluuteqarlunilu ajornartorsiutinik akiorniagassaqarsimasup, kristumiut allat qiimassartarsimavai nammineq kristumiullu inersimalluartut allat maligassiatik ajunngitsut malinneqqullugit. Oqarpoq: „Assiginiarsinga, qatanngutikka, ilissinnullu maligassaassuserput missiliorlugu saqisut isiginiarsigik.“ (Filípimiut 3:17; 4:9) Thessalonikami kristumiut siulliit Paulusip maligassiuilluarnera malissimavaat. Paulusip ima allaaserai: „Uatsinnillu Naalakkamillu malinnittunngorpusi, oqaaseq anersaakkut illernartukkut tipaatsullusi ilassigassiuk, naak annikilliungaaraluartusi, taamaallusilu uppertunut tamanut Makedoniamiunut Achaiamiunullu maligassanngorpusi.“ (1 Tásalûníkamiut 1:6, 7) Ajunngitsumik isumaqarnerput maligassiuinerpullu taamatulli assingusumik ilagisartakkatsinnut sunniuteqarsinnaavoq.

Ajortumik sunnertinnissaq pinaveersaaruk

Ilagisartakkanit tatineqarnerup ajoqutaasinnaasup pinngitsoortinnissaa kissaatigigutsigu, ’uinimmik malinnittut’ sunniinerat akuerinaveersaartariaqarparput. (Rûmamiut 8:4, 5; 1 Juánase 2:15-17) Taamaanngippat ilagisartakkanik tatineqarnerup ajoqusiinerata Jenovamit najoqqutassiaanillu silatuunit nigortisssavaatigut. Ussatit 13:20-mi allassimavoq: „Sianisuumik peqateqartoq ilisimassuseqalersarpoq, silaatsulli  ikinngutaa ajortumeertussaasarpoq.“ Ilagisartakkanit tatineqarnerup ajoqusiinera pissutigalugu ajortumik ingerlalersimasunik nalunngisaqarpit? Kristumiut ilaat ilagisartakkaminnit ajortumik sunnerneqarnertik pissutigalugu assersuutigalugu pigisanik pingaartitsivallaalersimapput imaluunniit ileqqorluttunngorlutik ikiaroornartunik aamma imigassamik atornerluisunngorlutik.

Allaat ilagiit kristumiut iluanni ilagisartakkanit tatineqarnermit ajoqutaasumit navianartorsiortinneqarsinnaavugut anersaakkut sanngiitsut qanittumik ikinngutiginissaat qinerutsigu. (1 Korintumiut 15:33; 2 Tásalûníkamiut 3:14) Inuit taakkua anersaakkut ittut qaqutiguinnaq oqaluusererusuttarpaat; immaqa allaat tamakkuninnga oqaluuserisaqarusuttut illaruaatigisarlugit. Taamaattut qanittumik ikinngutitut qinerutsigit ilagisartakkatut tatisinerata suliarissavaatigut, piffissap sivikitsup ingerlanerani paasilissavarput taakkunatut eqqarsartaaseqalerlutalu pissuseqalertugut. Allaat upperisami ilumoortut anersaakkullu siuariartornissamik sulissuteqartut ammut isigilersinnaavavut. — 1 Timûtiuse 4:15.

Anersaakkut ittunik sammisaqarnissamik nuannarutiginnittut Jehovamillu nuannaartitsinissaminnik anguniagaqartut ikinngutigissallugit silatusaarnerujussuussaaq. Ikinngutit taamaattut ikiussavaatigut ’ilisimassutsip pavannga pisup’ ersersinnissaanut. ’Siullermik minguitsuuvoq, aammattaaq eqqissisitsiniararaaq isumagillunilu oqaatseriarlunilu nallittuingaarlunilu ajunngitsunillu naammassisaqangaarluni kinaassusersiornanilu pisuusaarnanilu.’ (Jâko 3:17) Tamanna isumaqanngilaq inuit anersaakkut ittunik pingaartitsisut tamakku kisiisa oqaluuserisinnaagaat. Taamanngilluinnarpoq! Eqqarsaatigiinnariakkit oqaluuserisassat soqutiginartut assigiinngitsorpassuit atuagassiani Napasuliaq Alapernaarsuiffiup Peqatigiiffiata saqqummersittagaani sammineqartartut, assersuutigalugu atuagassiami Iteritsi!-mi. Oqaluuserineqarsinnaasut ineriartornartut ajunngitsullu killeqanngillat, sammisassallu assigiinngitsut amerlasuut soqutigineratigut takutissavarput inuuneq Jehovallu pinngortitarsua nuannarigivut.

Soorlu anaaleruserluni arsartartoq pikkorissoq pikkorissumik peqateqaruni pikkorinnerulersinnaasoq, ikinngutaalluartut eqqarsartaatsikkut, misigissutsikkut aammalu anersaakkut ajunngitsumik sunnersinnaavaatigut. Illua tungaatigulli ikinngutaalluanngitsut eqqunngitsumik iliuuseqalersissinnaavaatigut immaqalu allaat marloqiusamik inuuneqalersilluta. Qanoq ajunngitsiginerunnginnerpa minguitsumik nalunngeqatiginnissuteqarneq nuannaarutigissallugu imminullu ataqqineq pigalugu.

Ajunngitsumik sunnerneqartut

Amerlanersaat isumaqarput Biibilip ajoqersuutai aamma ileqqussatigut anersaakkullu piumasaqaatai ilinniassallugit ajornarpallaanngitsoq. Allaalluinnarporli tamakkua malillugit inuuneqalerneq. Soorlu assersuutit tulliuttut takutikkaat, ilagisartakkanit tatineqarnerup iluaqutaasup ikiorsinnaavaatigut tamakkiisumik Jehovamut kiffartulernissatsinnut.

Jehovamut nalunajaasoq nuliani peqatigalugu piffissaq tamaat atorlugu kiffartortoq oqaluttuarpoq ikinngutimi maligassiuinerat nammineq anguniakkaminut sunniuteqarsimasoq. Peroriartornermini assut ajoqutaasumik ilagisartakkanit tatineqarsimavoq. Imminilli akuttoqatigiimmik  oqaluussinissaminut kristumiullu ataatsimiinnerinut peqataasarnissaminut qiimmassaasut akornanni ikinngutini qinersimavai. Ikinngutinut taakkununnga atanermigut anersakkut peroriartortuarnissaminut ikiorneqarpoq.

Jehovamut nalunaajaasoq alla allassimavoq: „Nuliaralu katikkatta ilagiinni nuuffigisatsinniipput aappariit ukiutivut taamaaqatigisavut piffissaq tamaat oqaluussisartuusut. Piffissaq tamaat oqaluussisartunngornitsinnut maligassiuinerat sunniuteqaqataavoq. Tamatuma kingorna ilagiinni oqaluussinermik pingaartitsinissap nukittorsarnissaa sulissutigaarput. Tamatumalu inerneraa amerlasuut piffissaq tamaat oqaluussisartuusugut ilannguffigimmatigut.“

Teokratiimut atatillugu anguniagaqartut ilagisarnerata Jehovamut naalattuunissaq ajornannginnerulersissavaa. Ilagisartakkanit tatineqarnerup ajunngitsup sunniutaasa tamanna ilagaat. Jehovap nalunaajaasuisa ilaat inuusuttuulluni piffissaq tamaat oqaluussisartunngorsimasoq, kingusinnerusukkullu angalalluni nakkutilliisunngorsimasoq, maannakkut Napasuliaq Alapernaarsuiffiup Peqatigiiffiata immikkoortortaqarfiisa ilaanni sulilersimavoq. Ima allappoq: „Meeraaninni eqqaamasama siulliit nuannernerpaallu ilagaat, piffissaq tamaat oqaluussisartut angerlarsimaffitsinnut pulaaraangata. Nerrivimmi suli issiavimmut ataatsimut inissaqartuaannartarpoq. Qulinik ukioqartunga nakkutilliilluni angalasup oqaluussininnut pooqattassannik tunivaanga. Pooqattaq taanna suli uannut naleqartorujussuuvoq.“

Inuusuttuaraanini kingumut eqqaallugu oqarpoq: „Ilagiinni angutit inuusuttut amerlasuut ilagiinni suliassanut peqataanissartik kissatigaat, taakkulu maligassiuinerisa taakkunatulli kissaateqarusulersippaatigut.“ Ikinngutaalluartut angut inuusuttoq taanna ikiorsimavaat soorlulusooq naarlaataalersillugu, alliartorluni orpinngorlunilu kusanartoq manngoqarluartoq. Ilissi angajoqqaat, angerlarsimaffissinnut qaaqqusisarpisi meeqqassinnut ajunngitsumik ineriartornartumillu sunniisinnaasunik? — Malaki 3:16.

Soorunami taaneqaqqammersutulli tamatta piffissaq tamaat oqaluussisartuusinnaanngilagut. Kisianni tamatta Jehovamut asanninneq ilinniarsinnaavarput ’uummatikkut iluunngarluta, tarnikkullu iluunngarluta isumakkullu iluunngarluta’. (Matîuse 22:37) Ilagisartakkanik qinersinerput aalajangeeqataasorujussuuvoq sunniuteqartoq asanninneq taamaattoq ineriartortissaneripput, taamalu inuunermut naassaanngitsumut periarfissaqarluta.

Tussiaasiortoq paasiuminartumik ajunngeqisumilli siunnersuuteqarpoq, inuunermi pilluarnivik qanoq anguneqarsinnaanersoq: „Pilluarpoq guutiitsut siunnersuutaat malillugit ingerlanngitsoq, ajortuliortut ingerlavigisaanni uninngitsoq, mitaatilliisullu akornannut ingiffissinngitsoq, kisianni [Jehovap] inatsisaanik nuannarisaqartoq inatsisaalu eqqarsaatigalugit ullukkullu unnuakkullu. Taassuma assigaa orpik kuunnguup killingani ikkunneqarsimasoq inerititaqarfissamigut inerititaqartartoq toqujuitsunillu pilutaqarluni. Qanoq iliornermini tamani iluatsitsisaraaq.“ — Tussiaat 1:1-3.

Uppernarsaataanngila nuannersoq? Naak naammalluinnanngitsuugaluartugut kukkusarlutalu, pilluarluta inuussaagut Jehovamit aqunneqartikkutta ikinngutinillu ajunngitsunit tunniussimasaanit ’silarsuarmi qatanngutitsinnit’ sunnerneqartikkutta. — 1 Pit 5:9. (wE 1/8 99)

[Qupp. 28-mi assiliartaq]

Ilagiit iluaqutaasumik sunniuteqarfigisinnaavaatigut

[Qupp. 29-mi assiliartaq]

Ilissi angajoqqaat, meeqqasi ineriartornartunik ikinngutinik iIagisartagaqarnissaannik kajumissaarsigik