Naligiinngisitaaneq — Guutip siunertarisimavaa?

Akissutaa paasiuminarpoq: Naagga. Takoriartigu sooq taamaannersoq.

GUUTIP siunertarisimavaa inuit tamarmik inuunermik nuannaaruteqarnissamik pilluarnissamillu assigiimmik periarfissaqassasut. Inuup pinngortinneqarnera pillugu ima allassimavoq: „Guuti oqarpoq: ’Inunnik pinngortitsisa immitsinnik assililluta uatsitut ittussanik, naalagaasussanik aalisakkanut immamiittunut timmissanullu qilaap ataaniittunut nersutaatinullu nersutinullu nujuartanut nunamiittunut tamanut nunamilu paarmortunut tamanut.’“ Pinngortitani nunamiittut naammassereerlugit ’Guutip pinngortitani tamaasa isigai, ilumullu ajunngingaarput’. — 1 Moses 1:26, 31.

Ullumikkut silarsuarmi inuiassuit alianartumik naligiinngisitaasut Guutip ’ilumut ajunngingaartunik’ taasinnaavai? Ilimananngilaq, ’Guutimi asassutaavoq’. (1 Juánase 4:8) Taanna ’nakerisarsiortuunngitsutut’ allaaserineqarpoq, aamma „assuarnaatsuupput suliai, naapertuilluartuupput aqqutigisai tamarmik. Guutiuvoq aalajaatsoq, peqqusersuitsoq; iluartuuvoq naapertuilluartuullunilu“. (5 Moses 10:17; 32:4; naleqqiuguk Job 34:19.) Apustili Peter ima oqarsimavoq: ’Ilumut paasilerpara inuup kinaassusia Guutip pinngikkaa, kisianni inuiaqatigiinni tamani kinaluunniit mianerinnitsini iluarnermillu sulisoq nuannarigaa.’ — apustilit suliait 10:34, 35.

Guuti asassutaammat, nakerisarsiortuunngimmat, iluartuummat naapertuilluartuummallu qanoq ililluni inuit pilluarnissamut assigiimmik periarfissinnagit pinngortissinnaavai? Inunnik kinaassusersiorsinnaatitsineq aaqqissuussinermullu naligiinngisitaanermik ilisarnaatilimmut inissitsiterineq Guutip pissusianut naapertuussinnaanngilaq. Siunertarisimavaa tamarmik ’ataqqinassutsikkut piginnaatitaaffitsigullu naligiillutik inunngussasut’. Ullumikkulli takusinnaavarput taamaanngitsoq. Sooq?

Naligiinngisitaanerup pissutaa

Guutip inuit naligiitsillugit pinngortimmagit imaanngilaq sutigit tamatigut assigiissasut siunertarigaa. Assigiinngitsunik piginnaaneqarsinnaapput, soqutigisaqarsinnaallutik pissuseqarsinnaallutillu. Aamma assigiinngitsunik inissisimaffeqarsinnaapput oqartussaassuseqarsinnaallutillu. Assersuutigalugu angut arnarlu sutigut tamatigut assigiinngillat, Guutilli arnaq angummut „tulluartumik“ pinngortissimavaa. (1 Moses 2:18) Ersarippoq angajoqqaat meeqqallu assigiimmik oqartussaassuseqanngitsut. Tamakku assigiinngissutigigaluarlugit tamarmik — angutit, arnat meeqqallu — tunngaviusumik pisariaqartitamik matuneqarnissaat, pilluarnermut pisariaqartumut, piginnaatitaaffik Guutimeersoq assigiimmik nuannaarutigisussaavaat. Tamarmik ataqqinassutsikkut Guutimullu attaveqarnerminni naligiittussaapput.

Guutip erneri anersaajusut, inuit sioqqullugit pinngortitaasut, aamma assigiinngitsunik suliaqarput akisussaaffeqarlutillu. (1 Moses 3:24; 16:7-11; Jesaja 6:6; Jûtarse 9) Taamaakkaluartoq killigititat iluanni inuunermik nuannaarutiginninnissamut pilluarnissamullu, Guutimit tunissutaasunut, periarfissamikkut naligiipput. Taamaalillutik nuanningaartumik Guutitulli nakerisarsiortuunngillat.

Ajoraluartumik pinngortitat anersaajusut ilaata Guutip nakerisarsiortuunngitsumik aaqqissuussinera naammaginngilaa. Guutimit pisaminit annerusumik perusuppoq, qutsinnerusumik inissisimaffeqarusulluni. Eqqunngitsumik kissaateqarnermigut Jehovamut, Pinngortitsisutut naalagaanerpaasussaasumut, unammillilerpoq. Guutip ernerata anersaajusup pikitsitsisup taassuma kingusinnerusukkut inuit Guutip inunnut tunniussaanit annerusunik piumasaqartilerpai. (1 Moses 3:1-6; naleqqiuguk Jesaja 14:12-14.) Jehovap inunnut inuunermik nuannaarutiginnissinnaatillugit pilluarsinnaatillugillu tunissutai maanna oqimaaqatigiikkunnaarput. Pinngortitaq anersaajusoq pikititsisoq taanna, sarĸúmersitat 20:2-mi ’Diaavulumik Satanimillu’ taaneqartoq, inuit akornanni naligiinngisitaanerup pilerfigilersimavaa ajortoq.

Pissutsit qaquguluunniit allanngussappat?

Oqaaseq ataaseq atorlugu akineqarsinnaavoq: Aap!

Allannguutit kissaatiginartut kia atulersissinnaavai? Politikkikkut siulersuisut ukiuni hundredelinni sorsuutigisimagaluarpaat — qularnanngitsumik ilaasa ilumoorullugu. Iluatsippallaarsimanngillalli, amerlasuullu isummersimapput inuit akornanni naligiinngissitaanermik ajornartorsiutip aaqqinneqarnissaanik ilimasunneq piviusorsiortuunngitsoq. Guutip tamatuminnga isiginnittaasia Jesaja 55:10, 11-mi atuarsinnaavarput: „Soorlumi sialuit qaniillu qilammit nakkartartut utissanatillu nuna masatseqqaartinnagu, naggorissaqqaartinnagu inerittussalersortinnagulu, pissarsisitseqqaartinnagu siaruartigassanik iffiartugassanillu, taama ippoq oqaasera qaninnit anisoq:  Susaarluni uannut utissanngilaq, kisianni suliareqqusakka suliarissavai naammasseqqusakkalu naammassissallugit.“

Tuppallernarpoq Jehova Guutip aallaqqaammut siunertami, inuit tamarmik pilluarnissamut naligiimmik periarfissaqarnissaat, naammassiumaarlugu nalunaarsimammat. Sallusuissutip Guutiatut neriorsuutimi naammassinissaannut pisussaavoq. Qujanartumillu taamaaliornissaminut piumassuseqarlunilu pissaaneqarpoq. Qanorli ililluni tamanna pissava?

Akissutaa naalagaaffimmut Jesus Kristusip ajoqersukkaminut qinnutigeqqusaanut tunngavoq: ’Ataatarput qilammiusutit . . . Naalagaafiit tikiulli; peqqusat qilammisut nunamissaaq pili.’ (Matîuse 6:9, 10) Jehova Guutip naalagaaffini atorlugu „naalagaaffiit taakku tamaasa [ullumikkut piusut] aserussavai sequmisillugit, namminerli [Guutip naalagaaffia] soraajuitsumik atassaaq“. — Daniel 2:44.

Naalagaaffiup qilammiittup aqutsinerata ataani inuiaat nutaat pilersinneqassapput. Tamatumunnga tunngatillugu apustili Johannes Biibilip atuagartaani kingullermi ima allappoq: ’Qilak nutaaq nunalu nutaaq takuakka; qilak siulleq nunalu siulleq peermata.’ (sarĸúmersitat 21:1) Naligiinngisitaanerup nuanniitsortai, soorlu piitsuuneq, nappaatit, ilisimasaqannginneq, kinaassusersiorneq naalliuutillu allat, tamarmik peerneqassapput. *

Jehovap Nalunaajaasuisa ukiut hundredet sinnerlugit naalagaaffik tamanna innersuussutigisarsimavaat. (Matîuse 24:14) Oqaatsit naqiterneqarsimasut aqqutigalugit nammineerlutillu attaveqarnermikkut piumassuseqarlutik inuit Guutip siunertaanik Biibilimi allassimasunik ilisarsinissaannut ikiorsimavaat. Silarsuaq tamakkerlugu ilinniartitsinerisa siunissami inuit tamarmik pilluarnissamut assigiimmik periarfissaqarnissaannik neriuuteqalersiinnanngilaat, aammattaarli naligiinngisitaaneq annikillisissimavaat. Takoriartigu qanoq ililluni.

[Quppernerup ataani ilanngussaq]

 [Qupp. 5-mi issuagaq]

Inuit tamarmik inuunermik nuannaaruteqarnissamut pilluarnissamullu assigiimmik periarfissaqarnissaat Guutip siunertarisimavaa.