Neriuut kisaraarput, asanninneq kajumississutigaarput

’Maannali uku pingasut atapput: Upperneq neriunnerlu asanninnerlu; asanninnerli taakkua annersaraat.’ — 1 KORINTUMIUT 13:13.

1. Paulusip qanoq ililluni mianersoqquaatigut?

APUSTILI Paulusip mianersoqquaatigut uppernikkut umiiarsinnaasugut. Allappoq ’uppertariaqartugut tarnikkullu ilerasuutigisaqarnata; taamaannissaq ilaasa isumakkeerpaat uppersutsimikkut umiiarlutik’. (1 Timûtiuse 1:19) Ukiuni hundredelinni siullerni u.n.s. umiarsuit qisummik sanaajusarput. Qisuit atorneqartut pitsaassusiat sanasullu pikkorissusiat umiarsuup imarsiutaalluarsinnaaneranut aalajangiisuusarpoq.

2. Umiarsuaq uppernerup pia sooq qajannaatsuusariaqarpa, taamaattumillu uagut qanoq iliortariaqarpugut?

² Uppernerup ’umiarsuaa’ inuiaat imarsuaanni mallersuni ingerlasariaqarpoq. (Jesaja 57:20; sarĸúmersitat 17:15) Taamaattumik qajannaatsuusariaqarpoq, uagullu tamatumunnga akisussaavugut. Ukiuni hundredelinni siullerni juutit Romamiullu silarsuaanni ’imarsuaq’ mallersorsuanngormat Judas ima allassimavoq: ’Ilissi, asanartusi ukorsii, upperisassigut illernangaartukkut ineriartorteqatigiigitsi, qinusarlusi anersaakkut illernartukkut. Guutimut asanartittuinnaritsi Naalakkatta Jesus Kristusip naakkinninnera ilimasuutigalugu inuunermut naassaanngitsumut.’ (Jûtarse 20, 21) Judasip eqqaagamiuk ’uperisassaq iluartunut tunniussaareersoq’ assoruutigineqartariaqartoq, oqaatsit ’upperisaq illernangaartoq’ isumaqarsinnaapput kristumiut ajoqersuutigisaat tamarmik, ilaatigut  annannissamik nutarsiassaq nuannersoq. (Jûtarse 3) Jesus upperisamut tamatumunnga tunngaviuvoq. Kristumiut upperisaat aalajangiulluinnassagutsigu aalajaatsumik uppissuseqartariaqarpugut.

Upperusiortunut annilaanganeq qanoq iliuuseqarfigineqarsinnaava?

3. Ilaasa qanoq ilillutik upperusiortunut annilaanganeq iluaqutiginiarpaat?

³ Ukiuni kingullerni inuppassuit ataatsikkut imminornerat, inuarnerit peqqarniisaarniallu saassussineri upperusiortunut eqqumiitsunut arlaleriarlutik attuumassuteqartarsimapput. Paasinarpoq inuppassuit, ilaatigut naalakkersuisut isumakuluttut, innuttat, pingaartumik meeqqat, upperusiortunut navianartunut taamaattunut illersorumagamikkik. ’Silap matuma guutia’ qularnanngitsumik pinerluttuliornernut amiilaarnartunut tamakkununnga pissutaavoq, taamaalillunilu upperusiortunut annilaanganeq, Jehovap innuttaasa assortornissaannut atorsinnaasani, pilersissimallugu. (2 Korintumiut 4:4; sarĸúmersitat 12:12) Ilaasa pissutsit tamakku iluatsitaarniartarsimavaat sulinitsinnut assortuineq pilersinniarlugu. Nunat ilaanni „upperusiortunut navianartunut“ akiuiniarnersuaq aallartinneqarsimavoq, Jehovallu Nalunaajaasui kukkusumik taakkununnga ilaasorineqartarput. Tamanna pissutigalugu Europami nunat ilaanni illumiit illumut oqaluussinerput artornarsarneqarpoq Biibilimillu atuaqqissaaqatigisimasatta ilaat atuaqqissaarunnaarsimapput. Aamma qatanngutitta ilaat nikallungalersimapput.

4. Sooq assortuinerup nikallortittariaqanngilaatigut?

⁴ Assortorneqarnerulli nikallungatittariaqanngilaatigut, akerlianik kristumiutut ilumoornitsinnik qularunnaarnerulissagaluarpaatigut. (Matîuse 5:11, 12) Ukiuni hundredelinni siullerni kristumiut aamma upperusiortutut pikitsitsiumasutut pasillerneqarput tamaginnilu assortorneqarlutik. (apustilit suliait 24:5; 28:22) Taamanikkulli apustili Peterip uppeqatini tuppallersarpai ima allalluni: ’Asanartusi ukorsii, tupigusuutigeqinasiuk ilissinnit ikualaneq misilinneqaatissaalluni ilissinnut pisoq, tupinnartumik pineqarsorinasi, soorluli Kristus anniarnerisigut peqatigigissi, taamatut tipaatsugitsi, naalannassusiata saqqummerfissaanissaaq qiimmattarlusi tipaatsoqqullusi.’ (1 Pîtruse 4:12, 13) Tamatumunnga tunngatillugu ukiuni hundredelinni siullerni siulersuisoqatigiinnut ilaasortaq ima allassimavoq: ’Qatanngutikka, tamalaanik misilinneqaraangassi tipaatsuutigiinnarsiuk, nalunnginnassi uppersusersi misilinneqaruni nikallujuinnermut sunniutaassasoq; nikallujuinnerli sulinermik inersimalluinnartumik kinguneqassavoq, inersimalluinnaqqullusi innarlueqqullusilu, sumik inorsarfeqarnasi.’ (Jâko 1:2-4) Soorlu anorersuit umiarsuup imarsiutaalluarsinnaaneranut misilitsinnerusartut assortuinerup anorersuisa uppernerup umiarsuaata qajannassusii ersersissavaat.

 Annikilliornerit nikallujuissutsimik kinguneqarsinnaapput

5. Misilinneqaraluarluta uppernikkut aalajaattuarutta suna qulakkeersinnaavarput?

⁵ Kristumiup aatsaat annikilliornerup anorersui anigoreerunigit nalunngissinnaavaa nikallujuissuseqarnerluni aalajaatsumillu uppissuseqarnerluni. Nikallujuissuserput ’sulinermik inersimalluinnartumik kinguneqassaaq’ aatsaat ’inersimalluinnarluta, innarluilluta sumillu inorsarfeqanngikkutta’, aamma aalajaatsumik uppissutsimik inorsarfeqarata. Paulus ima allappoq: ’Tamatigut Guutip kiffaasut malunnartinniarpugut ilalaangaarluta, annikillisaraangatta, ajorsaraangatta, qussalagaangatta.’ — 2 Korintumiut 6:4.

6. Sooq ’naalliunnartut allaat usorsitsaatigisariaqarpavut’, tamatumalu qanoq ililluni neriunnerput nakussatsissavaa?

⁶ Annikilliornerup anorersui misilikkaangatsigik periarfissaqartarpugut takutissallugu uppissuserput umiarsuartut qajannaatsutut ajoquteqanngitsutullu ittoq. Paulusip kristumiut Romamiittut ima allaffigai: ’Naalliunnartut allaat usorsitsaatigaavut, ilisimagatta naalliulluni nikallujuitsunngornartartoq, nikallujuillunilu misiligaalluarnartartoq, misiligaalluarlunilu neriuttunngornartartoq, neriullunilu pakatsinassanngitsoq.’ (Rûmamiut 5:3-5) Misilinneqaraluarluta aalajaatsuugutta Jehovap iluarissavaa. Tamatumalu neriunnerput nakussatsissavaa.

Sooq ilaat umiiartartut

7. (a) Paulusip oqaasii naapertorlugit ilaat suna pillugu anersaakkut umiiarsimappat? (b) Suna pillugu ilaat ullumikkut uppernermit tunussisimappat?

⁷ Paulusip ’umiiarnissamut’ mianersoqqusigami eqqarsaatigaa, ilaasa ’ilerasuutigisaqannginnertik isumakkeersimagaat’ uppernertillu annaallugu. (1 Timûtiuse 1:19) Taakkua ilagaat Hymenæus Alexanderilu, sallusuissut qimallugu mitallerlutillu uppernermik tunussisimasut. (1 Timûtiuse 1:20; 2 Timûtiuse 2:17, 18) Ullumikkut sallusuissummit tunussisut ’kiffaq ilumoorlunilu silatooq’ oqaatsikkut ’unatarpaat’ ima oqarlutillusooq: ’Naalagara mulugallarpoq.’ (Matîuse 24:44-49; 2 Timûtiuse 4:14, 15) Taakkua aaqqissuussaanerup matuma ajortup naggatissaata qanillinera miserratigisarpaat, katersallu kiffatut ittut anersaakkut eqqumasut isornartorsiortarlugit Jehovap innuttai piffissap ilungersunassusianik eqqumaffiginneqqusarmatigik. (Jesaja 1:3) Tunussisut taakkua iluatsitsillutik ’ilaat uppersusiatigut killormuulersippaat’ anersakkut umiiarnerannik kinguneqartumik. — 2 Timûtiuse 2:18.

8. Ilaat qanoq ilillutik uppernikkut umiiarsimappat umiarsuartillu uppernerup pia ’kivitillugu’?

⁸ Kristumiut allat uppernikkut umiiarsimapput ilerasuutigisaqannginnertik taamaatissimagamikku silarsuullu matuma inuulluapilukkumatussusia kinguaassiuutitigullu kanngunartuliornera nakkarfigalugit. (2 Pîtruse 2:20-22) Ilaasa allat umiarsuartik uppernerup pia ’kivitiinnarpaat’ isumaqaramik aaqqissuussaanissaq  nutaaq suli killingusaakkut ersersimanngitsoq. Paasitinneqarsinnaannginnamik siulittuutit aalajangersimasut ilaat qaqugorpiaq eqquutissanersut, ’Jehovap ullua’ eqqarsaatimikkut kinguartippaat uppernerlu ilumoortoq qimallugu. (2 Pîtruse 3:10-13; 1 Pîtruse 1:9) Aaqqissuussaanerup matuma imarsuaani isortumi mallersumilu imarsioqqilerput. (Jesaja 17:12, 13; 57:20) Ilaat ilagiit kristumiut ilagiunnaarsimagaluarlugit suli isumaqarput taakku ilumoortumik upperisaqartut. Uppernerli nikallujuissuserlu silarsuassap nutaap Jehovap neriorsuutigisaata utaqqinissaanut pisariaqartut amigaatigigunarpaat. Isumaqarput Paratiisissaq muluallaartoq.

9. Kristumiut tunniulluinnarsimasut ilaat qanoq iliorsimappat, tamannalu pillugu suna eqqarsaatigeqqissaartariaqarparput?

⁹ Nunarsuup ilaani kristumiut tunniulluinnarsimasut ilaasa umiarsuarmi uppernerup piani ’tingerlaatertik millilersimagunarpaat’. Umiarsuaq kivilersimanngikkaluarpoq, kisianni tingerlaatit tamaasa isivinnagit ingerlalluarnatillu tissukaannarput. Neriuutigalugu ’Paratiisi qanilluinnartoq’ ilaat qajassuarnatik noqqaassuteqarluarsimapput. Oqaluussinermi ilungersuussisimapput ataatsimiinnerillu ataatsimeersuarnerillu tamaasa najuuffigisarlugit. Maannakkulli isumaqaramik neriuutissaq ilimagisamissut piaartigisumik pivisunngussanngitsoq, siornatigutut noqqaassuteqarumajunnaarsimapput. Taamaattumik oqaluussinermi ilungersuussinnginnerulerput, aalajangersimanngitsumik ataatsimiigiartalerlutik isumaqalerlutillu ataatsimeersuarnerni saqqummiussassat tamaasa najuuffigisariaqarnagit. Allat nuannaarniutinut nunallu piinik pigisaqarniarnermut piffissaq annertunerusoq atortalersimavaat. Taamaattumik inuunerput Jehovamut tunniulluinnarsimagatsigu misissoriartigu suna inuunitsinni kajumississutigisariaqaripput. Paratiisissap qaqugu piviusunngornissaanik ilimagisarput ilumut kiffartornermi ilungersuussinitsinnut aalajangiisuussava?

Neriuut kitsamut assersuunneqarpoq

10, 11. Paulusip neriuut sumut assersuuppaa, assersuusiarlu tamanna sooq pitsaava?

¹⁰ Paulusip tikkuarpaa Jehovap Abraham neriorsoraa taassumuuna pilluaqqussutissarpassuit piviusunngortinneqassasut. Taava apustili nangippoq: ’Guutip unnersuutigisamik kingornussisussat siunnersuummi allanngujuissusianik nalunaarfigilluinnarumagamigit uppernarsaat aappiuppaa, allanngujuitsut marluk Guutip sallutigisinnaanngisai aalajaatsumik tuppalliutigissagatsigik, uagut qimaaffissarsisugut neriugisassaq saqqangiussaq aalajangiullugu. Tamanna tarnitsinnut pigaarput soorlu kisaq qajannaatsoq atasorlu.’ (Eprîarit 6:17-19; 1 Moses 22:16-18) Kristumiut tanitat qilammi toqujuitsumik inuunissamik neriugisaqarput. Ullumikkut Jehovap kiffaasa amerlanerpaartaat nunarsuarmi paratiisiusumi naassaanngitsumik inuunissamik nuanningaartumik neriugisaqarput. (Lúkarse 23:43) Neriuut tamanna piginngikkaanni uppissuseqartoqarsinnaanngilaq.

 ¹¹ Kisaq tassaavoq umiarsuarmut isumannaallisaat sakkortooq, unitsinnissaanut tissukannginnissaanullu pisariaqavissoq. Imarsiortoq kinaluunniit kisaqarnani avalassanngilaq. Paulusip arlaleriarluni umiiarsimagami nalunngilluarpaa umiarsuit kisaat imarsiortut inuunerannut aalajangiisuugajuttut. (apustilit suliait 27:29, 39, 40; 2 Korintumiut 11:25) Ukiuni hundredelinni siullerni umiarsuit motoreqanngillat naalagaasa piumasaminnik aqussinnaanissaannik. Umiarsuit sorsuutit iputinik ingerlanneqartarput, umiarsuilli allat amerlanertigut anorimit ingerlanneqartarlutik. Umiarsuaq sissamut qaarsortuumut ikkarlilluni umiulerpat naalagaa kisaannarsornissamit allamik periarfissaqanngilaq, neriuutigalugu kitsap umiarsuaq unitsissinnaagaa. Paulusip kristumiut neriuutaat ’tarnermut kitsamut qajannaatsumut atasumullu’ assersuuppaa. (Eprîarit 6:19) Akerlilersuinerup anorersuinit allanilluunniit misilinneqaraangatta neriuuterput nuanningaartoq kitsatut ittarpoq, inuttut aalajaallissutissatsinnik, uppernerup umiarsuaa pigisarput qularnissamut imaluunniit tunussinissamut ikkarleqqunagu. — Eprîarit 2:1; Jûtarse 8-13.

12. Qanoq ililluta naalakkunnaarnissaq pinngitsoortissinnaavarput?

¹² Paulusip hebriiarit kristumiut ima mianersoqquai: ’Misissoritsi, qatanngutikka, ajortumik uppinngitsumillu uummateqartoqaqqunasi Guutimut uumasumut naalakkunnaarsumik.’ (Eprîarit 3:12) Griikerit oqaasiat ’naalakkunnaarneq’-mik, imaluunniit tunussinermik, nutserneqartoq eqqortumik oqaatigissallugu isumaqarpoq „nigorpoq“ imaluunniit „ungasillivoq“. Nigornissarli, tassa umiiarnissaq, pinngitsoortissinnaavarput. Uppernerup neriunnerullu ikiorsinnaavaatigut Jehovamut attaveqartuarnissatsinnut, allaat uppernikkut misilinneqarnerup anorersuinit sualunnerpaanit eqqorneqaraluarluta. (5 Moses 4:4; 30:19, 20) Uppernerput umiarsuartut tunussisut ajoqersuutigisaannit anorlersunit aalatinneqartutut ittariaqanngilaq. (Evfisumiut 4:13, 14) Neriuullu kisaralugu Jehovap kiffaatut inuunermi atortariaqakkatsinni ’anorersuarsiorsinnaavugut’.

Asanninneq anersaarlu illernartoq kajumississutigalugit

13, 14. (a) Neriuutip kisaa sooq immini naammanngila? (b) Sumik pissuteqarluta Jehova illernartumik kiffartorfigisariaqarparput, aamma sooq?

¹³ Kristumiu aaqqissuussaanissamut nutaamut isernissaminut siumukarsinnaanngilaq Jehovamut kiffartornermut pissutiginiagaa tassaaginnarpat nunarsuarmi paratiisiusumi naassaanngitsumik inuunissamik neriuut. Neriuut kitsatut inuunermini aalajaallissutigiitigalugu, aamma uppernermut neriunnermullu atatillugu asanninneq kajumississutigisariaqarpaa. Paulusip tamanna erseqqissarpaa ima allakkami: ’Maannali uku pingasut atapput: upperneq neriunnerlu asanninnerlu; asanninnerli taakkua annersaraat.’ — 1 Korintumiut 13:13.

¹⁴ Guutimut illernartumik kiffartornitsinnut pissutiginiagaq tassaasariaqarpoq Jehovamut qamannga pisumik asanninneq taassuma uatsinnut asanningaarnera akillugu. Apustili Johannes allappoq: ’Asanninngitsup Guuti ilisarinngilaa; Guuti asassutaammat. Matumuuna Guutip asannissusia uatsinni erserpoq, Guutip ernitui silarsuarmut aallartimmagu taassumuuna inooqqulluta. Uagut asannippugut taassuma asaqqaarmatigut.’ (1 Juánase 4:8, 9, 19) Guutimut qujamasukkatta pingaartumik nammineq annannissarput eqqarsaatigiinnarnagu, taassuma aqqata illernarsisinneqarnissaa naapertuilluartumillu kisimi oqartussaassusiata qutsissinnissaa eqqarsaatigeqqaartariaqarpavut.

15. Jehovamut asanninnerput qanoq ililluni taassuma kisimi oqartussaassusianut attuumassuteqarpa?

¹⁵ Jehovap kissaatigaa kiffartorfigissagitsinni asagatsinni, Paratiisissaq kisiat pinnagu. Qinerlerfissiami Indsigt i Den Hellige Skrift-imi * allassimavoq: „Jehovamut ataqqinaataavoq taassuma kisimi oqartussaanera pinngortitaasalu tamatumunnga tapersersuinerat pingaarnerpaamik asanninnermik tunngaveqarmat. Pissutsini ajunngitsut, ilaatigut naapertuilluarnini, pissutigalugu kisimi naalagaassutsiminik asannittut, naalagaassuserminillu allanit tamanit pingaartitsisut,  kisiisa innuttamisut kissaatigai. (1Kor 2:9) Guuti, asanninnera, naapertuilluassusia ilisimassusialu, ilisimassutsimit namminneq pigisaminnit annerungaartoq, pillugit paasisaqaramik, taassuma kisimi naalagaassusiata ataani kiffartorusupput attaviitsuujumanatik. (Tus 84:10, 11)“ — Atuagaq 2, qupperneq 105.

16. Jesusimut asanninneq qanoq ililluni inuunitsinni kajumississutaava?

¹⁶ Kristumiutut Jesusittaaq asavarput uatsinnut asanninnera pissutigalugu. Paulus ima allassimavoq: ’Kristusimmi asanninnerata pinngitsaalivaatigut, isumaqaratta ataatsip tamaasa toqussutigimmagit tamaasa taava toqusimasoralugit; massalu tamaasa toqussutigai inuusut kingorna imminnut inooqqunagit, uumunngali inooqqullugit pillutik toqusumut makittumullu.’ (2 Korintumiut 5:14, 15) Kristus anersaakkut inuunitsinnut, uppernitsinnut neriunnitsinnullu tunngavippiaavoq. Jesus Kristusimut asanninnitta neriuuterput nakussatsittarpaa uppernerpullu aalajaallisittarlugu, ingammik misilinneqangaarnitsigut. — 1 Korintumiut 3:11; Kulorsamiut 1:23; 2:6, 7.

17. Jehovap pissaanermik angingaartumik sumik tunivaatigut, aamma apustilit suliáinik agdlagkat 1:8-mi aamma Evfisumiut agdlagkat 3:16-imi allassimasut pissaanerup tamatuma pingaaruteqarneranik sumik paasitippaatigut?

¹⁷ Guutimut erneranullu asanninneq inuunitsinni allanit tamanit pingaarnerpaamik kajumississutigitillugu, Jehovap aamma kajumississummik allamik tunivaatigut, taassumunnga kiffartornissamut nakussatsissutissamik. Tassaavoq pissaanera sulissutiginnittoq, anersaava illernartoq. Hebriiarit griikerillu oqaasii „anersaamik“ nutserneqartartut tunngaviusumik isumaqarnerat pissaanermut ingerlasumut, soorlu silaannarmut anorimulluunniit, tikkuussivoq. Umiarsuit tingerlaatillit soorlu Paulusip angallatigisaasa anorip pissaanera takussaanngitsoq pisariaqartippaat ornigassaminnut apuutissagunik. Uaguttaaq tamatumunnga assingusumik asanninneq Guutillu takussaanngitsumik pissaanera atorfissaqartipparput uppernerup umiarsuaata Jehovamut kiffartornermi siumut ingerlatissappatigut. — apustilit suliait 1:8; Evfisumiut 3:16.

Anguniagassamut siumukarta!

18. Suup ikiussavaatigut siunissami misilinneqarnissat suulluunniit atorsinnaanissaannut?

¹⁸ Uppernerput asanninnerpullu immaqa sualuttumik misilinneqassapput aaqqissuussaanissamut nutaamut tikitsinnata. Jehovalli kitsamik ’qajannaatsumik atasumilli’ tunisimavaatigut — tassa neriuummik nuanningaartumik. (Eprîarit 6:19; Rûmamiut 15:4, 13) Assortorneqaraangatta misilinneqaraangattaluunniit nikallujuissinnaavugut neriuuterput pissutigalugu aalajaakkutta. Misilinneqarneq aalajangersimasoq atorunnaaraangat misilinneqarnerlu nutaaq aallartitsinnagu aalajangerniartigu neriuuterput uppernerpullu nakussatsissallugit.

19. Qanoq ililluta umiarsuaq uppernerup pia ingerlavissamut eqqortumut aqussinnaavarput Guutillu silarsuassaani nutaami umiarsualivissilluta?

¹⁹ Paulus ’tarnermut kisaq’ eqqaatinnagu ima allappoq: ’Piumasarpulli tassa tamassi taamatut ilungersoqqullusi, [„tuaviorlusi“, quppernerup ataani ilanngussaq] neriunnersi naggatissamut allaat naammatsikkiartuinnaqqullugu, tassa kajumiitsunngoqqunasi, maleqqullusigilli ikku upperlutik erinitsajuillutillu unnersuutigisamik kingornussisut.’ (Eprîarit 6:11, 12) Taamaattumik Jehovamut erneranullu asanninneq kajumississutigalugu anersaarlu illernartoq pissaaneqarfigalugu umiarsuarput uppernerup pia ingerlavissamut eqqortumut aqunniartigu Guutip silarsuassaani nutaami neriorsuutigisami umiarsualivississimatserluta. (wE 15/7 99)

[Quppernerup ataani ilanngussaq]

Uteqqiinissamut apeqqutit

□ Uppernerput eqqarsaatigalugu Paulus qanoq mianersoqqusiva?

□ Ilaat qanoq ilillutik anersaakkut umiiarsimappat, allallu qanoq ilillutik arriinnerusumik ingerlalersimappat?

□ Upperisatsinnut atatillugu suna pissuserisariaqarparput

□ Suup ikiorsinnaavaatigut Guutip silarsuassaani nutaami umiarsualivissinissatsinnut?

[Atuaqqissaarnermi apeqqutit]

[Qupp. 16-imi assiliartaq]

Umiarsuaq uppernerup pia qajannaatsumik sananeqartariaqarpoq inuunerup anorersuini atasinnaassaguni

[Qupp. 17-imi assiliartaq]

Uppernikkut umiiarsinnaavugut

[Qupp. 18-imi assiliartaq]

Kristumiutut inuunitsinni neriuut kitsatut ippoq