’Nikanartinnermik assuuseritsi’
’Nikanartinnermik assuuseritsi’
’Anneruniartut Guutip akerartorpai, nikanartittulli saammaattarlugit.’ — 1 PÎTRUSE 5:5.
1, 2. Pissutsit assigiinngilluinnartut marluk suut inuit ileqqulersuutaannut sunniuteqartorujussuusarpat?
PISSUSERISINNAASAT Guutip oqaasiani eqqaaneqartut ilaat marluk imminnut akerleriilluinnarput. Tamarmik inuit ileqquinut sunniuteqartorujussuusarput. Ilaat tassa ’nikanartinneq’ imaluunniit maniguunneq. (1 Pîtruse 5:5) Maniguunneq ima nassuiarneqarsinnaavoq: „makitassuuniannginneq anneruniannginnerlu; nammineq naleqarnerminik anneruniajuitsumik isiginninneq“. Maniguunneq pissusiuvoq Guutip iluarisaa.
2 Tamatumunnga akerliusoq tassa makitassuseq, ima nassuiarneqarsinnaasoq: „naleqqutinngitsumik imminut angisuusorineq makitasuumik ilioriaatsimik kingunilimmik“. Makitasooq imminuinnaq eqqarsaatigisarpoq, inuillu allat soqutiginagit imminut nunap piinik allanillu namminissarsiorluni iluaqutissarsiorluni. Biibilimi eqqaaneqarpoq makitassuseq qanoq kinguneqarsimasoq: ’Inuit ilaat inoqatiminnut ajoqutaasumik pissaaneqarpallaartarput.’ Allassimavortaaq ’sinngagiinneq’ ’anorip tiguniarsarinertut’ ittoq, inuk toquguni „pigisani nassatarisinnaannginnamigit“. Makitassuseq taama ittoq Guutip akuerisinnaanngilaa. — Nalunaajaasup oqaasii 4:4; 5:14; 8:9.
Silarsuarmi isumaqarfiginninneq nalinginnaasoq
3. Isiginnittaaseq suna silarsuarmi atugaangaarpa?
3 Pissutsit taakkua arlaat suna ullumikkut silarsuup ilisarnaatigaa? Silarsuarmi isiginnittaaseq qanoq ittoq malunnarnerpaava? Atuakkami World Military and Social Expenditures 1996-mi allassimavoq: „Peqqarniitsumik nakuuserneq eqqarsaatigalugu ukiut 1900-kkut ukiunit hundredelinnit allanit tamanit ajornerpaapput.“ Ukiuni hundredelinni makkunani naalakkersuinikkut aningaasatigullu pissaaneqarniarneq inuiaqatigiissutsikkullu, upperisarsiornikkut naggueqatigiissutsikkullu assortuunnerit pissutigalugit inuit 100 millionillit sinnerlugit toqunneqarsimapput. Aamma inuit nalinginnaat akornanni namminissarsiorneq atugaanerulersimavoq. Aviisimi Chicago Tribune-imi allassimavoq: „Nalitsinni innuttaaqatigiit ’nappaataasa’ ilaat tassaapput siunertaqanngitsumik nakuuserneq, meeqqanik atornerluineq, imerajunneq, aids, inuusuttuaqqat imminortarnerat, ikiaroortarneq, peqatigiillutik aqqusinerni inupiluuserniartartut, pinngitsaaliilluni arnerineq, uersagaqarneq, naartuersitsineq, tiingasulersaarutit, . . . sallunerit, salloqittaanerit, peqquserluttumik naalakkersuineq . . . eqqortoq eqqunngitsorlu ileqqussatigut najoqqutassatut atorunnaarsimapput.“ Atuagassiami UN Chronicle-imi mianersoqqusilluni allassimavoq: „Innuttaaqatigiit aseroriartorput.“
4, 5. Silamiut isiginnittaasiat qanoq ililluni Biibilip ulluvut pillugit siulittuutaani eqqorluartumik allaatigineqarpa?
4 Pissutsit tamakku silarsuaq tamakkerlugu atuupput. Pissutsit Biibilimi siulittuutigineqartutut illuinnarput: ’Ullussani kingullerni ajornartunik nalliuttoqassaaq, inuit inuujumaarmata imminnik asasut, aningaaserituut, usorsitsaapiluttut, anneruniartut, mitallersut, angajoqqaaminnut naalanngitsut, qujasuitsut, soqqusaatsut, asanniuitsut, saammajuitsut, mamarliisut, nunujuitsut, qiningasut, ajunngitsunik uumissuisut, killuussisut, isumaatsut, ilisimatuuniartut.’ — 2 Timûtiuse 3:1-4.
5 Namminissarsiorluni isiginnittaaseq silarsuup matuma ilisarnaatigisaat taamaalilluni eqqorluartumik allaatigineqarpoq. Inuit ataasiakkaarlutik ingiarniunnerat inuiaqatigiit ingiarniunnerannut assinguvoq. Assersuutigalugu timersortartut amerlasuut ima ajugaaniartigisarput allaat allat misigissusii peqqissusialluunniit soqutiginagit. Namminissarsiorneq taama ittoq meeqqani ineriartortinneqartarpoq inersimasunngorpatalu suli assigiinngitsutigut nanginneqartarluni. Tamanna ’qinngarsuinermik, saqitsaanermik, annerussinermik, kamannermik, saqitsaagajunnermik assuariinnermillu’ kinguneqartarpoq. — Galâsiamiut 5:19-21.
6. Kia namminissarsiorneq siuarsarpaa, Jehovallu isiginnittaaseq tamanna qanoq isigisarpaa?
6 Bibilimi takutinneqarpoq silarsuup namminissarsiortumik isiginnittaasia ’Diaavulumik Satanimillu taaneqartup, inuit najugaanni nunalinnik tamanik tammartitsiniartup’ isumaqarneranut assingusoq. Satanip ullumikkut ulluni kingullerni artornartuni inuusunut sunniuteqarnera pillugu Guutip oqaasiani ima siulittuuteqarpoq: ’Eqqanaq nuna . . . Diaavulu ilissinnut aqqarmat kamattorsuulluni, piffissakissutsi nalunnginnamiuk.’ (sarĸúmersitat 12:9-12) Satan inngilipiluilu inuiannut namminissarsiortumik isumaqarneq siuarsarniarlugu noqqaassuteqarnerujartuinnarsimapput. Jehovap taama isumaqarneq qanoq isigaa? Oqaasiani allassimavoq: „Makitasuut tamaasa [Jehovap] maajunnarai.“ — Ussatit 16:5.
Jehovap maniguuttut najorpai
7. Jehovap inuit maniguuttut qanoq isigai, sumillu ilikkartillugit?
7 Maniguuttulli Jehovap pilluaqqusarpai. Jehova erinarsorfigalugu kunngi David oqarsimavoq: „Ikiortissaasuasut annaffissittarpatit makitasaarnialli kanngutsisittarlugit.“ (2 Samuel 22:1, 28) Taamaattumik Guutip oqaasiani ima siunnersorneqarpugut: „[Jehova] ujarsiuk nunap inuini makitajuitsortaasusi, peqqussutaanik maleruaasusi tamassi. Iluarsuseq noqqaassutigisiuk, makitajuissuseq noqqaassutigisiuk. Immaqa taava qimarnguissarsiumaarpusi ullormi [Jehovap] kamaffissaani.“ (Sefanja 2:3) Maniguullutik imminut ujarlersut Jehovap ilinniartittarpai isiginnittaatsimik silarsuup pianit allaanerulluinnartumik ineriartortitseqqullugit. „Inukulunnguit ingerlatittarpai naapertuilluarnikkut.“ (Tussiaat 25:9; Jesaja 54:13) Asanninnerup aqqutaani ’ingerlatittarpai’. Guutip najoqqutassiai naapertorlugit eqqortuusut aqqummut tamatumunnga tunngaviupput. Biibilimi allassimavoq asanninneq tamanna najoqqutassianik tunngaveqartoq ima sunniuteqarpoq: ’Asannittoq usorsitsaartuunanilu annerujumatuusarinngilaq, . . . namminissaminik piniartarinngilaq.’ (1 Korintumiut 13:1-8) Aamma maniguuttumik isumaqarnikkut ersersitsivigineqartarpoq.
8, 9. (a) Asanninnerup najoqqutassianik tunngaveqartup kina pilerfigaa? (b) Jesusip asanninneranik maniguunneranillu ilaarsinissaq qanoq pingaaruteqartigaa?
8 Ukiuni hundredelinni siullerni Paulusip kristumiullu allat Jesusip ajoqersuineratigut asanninneq tamanna ilikkarsimavaat. Jesusillu nammineq ilikkarsimavaa Ataataminit Jehovamit Biibilimi ima allaatigineqartumit: ’Guuti asassutaavoq.’ (1 Juánase 4:8) Jesusip nalunngilaa Guutip kissaatigigaa asanninnerup inatsisaa maleruassagini, taamaaliorporlu. (Juánase 6:38) Taamaattumik inuit qunusiarineqartut, piitsut ajortuliortullu misiginneqatigai. (Matîuse 9:36) Ima oqarfigai: ’Ornissinga tamassi erloqisusi nanertugaasusilu, qasuersissavassi. Nammaatara ilissinnut pisissiuk ilinniarfigalungalu, qanilaarama uummatikkullu makitajuikkama; taava tarnissinnut qasuerfissarsiumaarpusi.’ — Matîuse 11:28, 29.
9 Jesusip ajoqersukkaminut erseqqissarpaa asanninnermi maniguunnermilu malinniarnissaat qanoq pingaaruteqartigisoq oqarami: ’Matumannga tamarmik ilisarissavaasi ajoqersugarigissi: asaqatigiikkussi.’ (Juánase 13:35) Silarsuarmut matumunnga namminissarsiortumut ilaasinnaanngillat. Taamaattumik Jesus ajoqersukkani pillugit ima oqarsinnaasimavoq: ’Silarsuup inuisa ilanngilaat.’ (Juánase 17:14) Makitasuumik namminissarsiortumillu isiginnittaaseq Satanip silarsuaanut ilisarnaataasoq ilaarumanngilaat. Akerlianik Jesusitut asannittumik maniguuttumillu isiginnittaaseqarniartarput.
10. Ullumikkut Jehova maniguuttut eqqarsaatigalugit qanoq iliorpa?
10 Guutip oqaasiani siulittuutigineqarpoq ulluni kingullerni makkunani inuit maniguuttut nunarsuaq tamakkerlugu innuttaaqatigiinnut asanninnermut maniguunnermullu tunngavilerneqartunut katersorneqassasut. Silamiut anneruniarumatunerujartuinnartut akornanni inuugaluarlutik Jehovap innuttai allaanerulluinnartumik pissuseqarput, maniguukkamik. Ima oqarput: „Qaa, majuarta [Jehovap] qaqqaanut [tassa taassuminnga pallorfiginninnermut qutsissisinneqartumut], . . . aqqutigeqqusaminik ajoqersussavaatigut ingerlavigeqqusamigullu ingerlasinnaaleqqulluta.“ (Jesaja 2:2, 3) Jehovap nalunaajaasui nunarsuaq tamakkerlugu innuttaaqatigiittut Guutip aqqutigeqqusaani ingerlasutut aaqqissorneqarsimapput. Taakkua ilagaat ’amerlangaartut kisinneqarsinnaanngitsut, inuiaqatigiit immikkullu naggueqatigiissut immikkullu inuiaasut immikkullu oqaasillit tamarmik ilaat’ amerliartuinnartut. (sarĸúmersitat 7:9) Amerlangaartut taakku maannakkut arlalinnik millioniliupput. Qanoq ilillutik Jehovamit maniguunnissaminnut ajoqersorneqartarpat?
Maniguunnissamik ajoqersorneqarneq
11, 12. Guutip kiffaasa qanoq ilillutik maniguunneq ersersittarpaat?
11 Guutip anersaavata innuttai kajumittut sunnertarpai ikiorlugillu silarsuup anersaavanik ajortunngortitsisumik assortuinissaannut Guutillu anersaavata inerititaanik — ’asanninnermik, tipaatsunnermik, eqqissinermik, kamaginninnermik, avaaginninnermik, ajunngissutsimik, uppernermik, saamanermik imminullu naalakkersorsinnaanermik’ — ineriartortitseqqullugit. (Galâsiamiut 5:22, 23, NV) Pissutsit tamakkua ineriartornissaannut Guutip kiffai kajumissaarneqarput ’piunngitsumik ataqqineqarnissaq piniaqqunagu kamassaaqatigeeqqunagit sinngaattaqqunnagillu’. (Galâsiamiut 5:26) Apustili Paulus aamma allappoq: ’Oqarfigaassi immissinnik isumasassaq qaangerlugu isumaqarfigeqqunasi, kisianni immissinnik annerunianngitsumik upperneq Guutip kimulluunniit agguutigititaa missiliorlugu isumaqarfigeqqullusi.’ — Rûmamiut 12:3.
12 Guutip oqaasiani kristumiut ima oqaaqqissaarneqarput: ’Saqitsaagajunnermit piunngitsumillu ataqqineqarumanermit pinnasi, kisianni qanilaarlusi ilasi immissinnit annerutinniarsigik, kialuunniit namminissani pinnagu, kisianni allattaaq iluaqutissaat piniarliuk.’ (Filípimiut 2:3, 4) ’Namminissaminik piniartoqanngikkili, aapparmili iluaqutissaanik.’ (1 Korintumiut 10:24) Aap, asanninneq ’ineriartuutaasarpoq’ namminissarsiunngitsumik oqaatsikkut iliuutsikkullu. (1 Korintumiut 8:1) Unamminiarnerit pinnagit suleqatigiinneq asanninnikkut siuarsarneqartarpoq. ’Uanga siulliussaanga’-mik eqqarsariaaseq Guutip kiffaasa atorusunngilaat.
13. Sooq maniguunneq ilinniarneqartariaqarpa, qanorlu ililluni ilinniarneqarsinnaava?
13 Naammalluinnanngissuserpulli kingornussarput pissutigalugu maniguunneq inunnguuserinngilarput. (Tussiaat 51:7) Pissuseq tamanna ilikkarneqartariaqarpoq. Meeraanermit Jehvap aqqutigeqqusaanik ilinniartinneqarsimanngikkaanni aatsaalli kingusinnerusukkut sallusuissut ilikkarsimagaanni tamanna artornarsinnaavoq. Taamaakkutta inuttut pissutsivut silarsuartoqqap isiginnittaasianit ilusilersorneqareersimasarput. Taamaattumik ilinniartariaqarparput ’Inutoqqap siornagut angalaaserisatta iperarnissaa’ ’inuttaarlu Guuti assilillugu pinngortitaq atissallugu iluartillugu illernartillugulu ilumoornikkut’. (Evfisumiut 4:22, 24) Guutip ikiuineratigut inuit eqqortumik isumallit peqquneqartutut iliorsinnaapput: ’Atiniarsigik imaattut: nallittuingaarneq avaaginninnerlu nikanartinnerlu qanilaarnerlu kamajuinnerlu.’ — Kulorsamiut 3:12.
14. Jesus qanoq ililluni pingaarneruniartuunnginnissatsinnut mianersoqqusiva?
14 Jesusip ajoqersugaasa tamanna ilinniartariaqarsimavaat. Taassumunnga inersimasuunngoreerlutik ajoqersuganngorsimagamik unammillerumatuujulaannguatsiarlutillu. Taakkua ilaasa marluk anaanaata Jesus qinnuigimmani ernermi pingaarnerutinnissaannik, ima akivoq: ’Ilisimavusi inuiaqatigiit siulersortaasa naalagaaffiginiartaraat, annertaasalu naalakkersortaraat. Ilissinili taamaassanngilaq; kisianni ilissinni angisuunngorumasup kiffartuullisi. Ilissinnilu siulliujumasoq ilaminut kiffaannaagili. Soorlumi inuup ernera [Jesus] tikiutinngitsoq kiffartorfigeqqulluni, kisianni kiffartussalluni inuuninilu akissatut tunniussallugu amerlasuut utertinneqaatissaaannik.’ (Matîuse 20:20-28) Jesusip ajoqersukkani oqaluttuukkamigit ataqqineqarniarnissaminnut taaguutit atoqqunagit ima nangippoq: ’Tamassi qatanngutigiippusi.’ — Matîuse 23:8.
15. Nakkutilliisutut kiffartorusukkaanni qanoq isiginnittaaseqartariaqarpa?
15 Jesusimut ajoqersugavik tassaavoq uppeqatiminut kiffaq imaluunniit inussiaq. (Galâsiamiut 5:13) Ingammik ilagiinni nakkutilliisutut kiffartornissaminut piukkunnarsarniartut taamaattariaqarput. Pissaaneq imaluunniit atorfeqarneq unammissutiginaveersaartariaqarpaat, aamma ’paarisassanut naalagaaniartutut pinnatik taakkununnga maligassanngortariaqarput’. (1 Pîtruse 5:3) Angut imminuinnaq isumagisuuguni nakkutilliisunngornissaminut piukkunnaateqanngilaq. Ilagiit taanna ajoqutigissavaat. ’Ilagiinnik paarsisuuniarnissaq’ naleqqulluartuussinnaagaluarpoq, kisianni uppeqatiminut kiffartorusussuseq tunngaviusariaqarpoq. Nakkutilliisut pingaartumik maluginiarnartumillu atorfeqanngillat, taakkuli ilagiinni maniguunnerpaartaasa ilagisariaqarpaat. — 1 Timûtiuse 3:1, 6.
16. Sooq Diotrefes Guutip oqaasiani avoqqaarineqarpa?
16 Apustili Johannesip eqqunngitsumik isumalik uparuarpaa. Ima allassimavoq: ’Ilagiit allaffigigaluarpakka, Diotrefesilli taakkunani pingaarnerujumasup ilassinngilaatigut.’ Diotrefesip nammineq pingaaruteqarnini siuarsarniarlugu allat ataqqinninngitsumik iliorfigai. Pingaarniarnerali pissutigalugu Guutip anersaavanit siulersorneqarluni Johannesip Biibilimi allakkamini taanna avoqqaaraa. — 3 Juánase 9, 10.
Isiginnittaaseq eqqortoq
17. Peterip, Paulusip Barnabasillu qanoq ilillutik maniguunneq ersersissimavaat?
17 Biibilimi maligassaalluartut eqqortumik isumallit maniguuttut amerlasuut eqqaaneqarput. Peter Korneliusip angerlarsimaffianut isermat taassuma ’paariartorpaa isigaasalu saannut pallorfigalugu’. Peterilli ataqqineqarumanani ’nikuitippaa oqarlunilu: „Nikuigit, uangattaaq inuinnaavunga.“’ (apustilit suliait 10:25, 26) Paulus Barnabasilu Lystramiikkamik Paulusip angut inunnguutsiminit iloqiaasoq ajorunnaarsippaa. Taamaattumik inupassuit isumaqarput apustilit guutiusut. Paulusilli Barnabasillu atisatik alippaat, inuillu akornannut arpallutik torlulapput oqarlutik: „Angutit ukorsii, qanoq iliuleqaasi? Uaguttaaq inuuvugut ilissisut atugaqartartut.“’ (apustilit suliait 14:8-15) Kristumiut maniguuttut taakku inunnit ataqqineqarumanngillat.
18. Inngilip pissaanillip Johannesimut oqaaserisai qanoq maniguunnermut ersiutaappat?
18 Apustili Johannes ’Jesus Kristusip saqqummersitaanik’ tunineqarpoq inngili aqqutigalugu. (sarĸúmersitat 1:1) Inngilip ataasiinnaap unnuap ataatsip ingerlanerani aAssyriamiut 185.000-it toqussinnaammagit paasinarpoq Johannes ataqqinningaalersoq. (2 Kunngit 19:36) Ima allappoq: ’Tusareerlungalu takunnereerama pallorpunga inngilip tamakkuninnga uannut takutitsisup isigaasa saannut pallorfigiumallugu. Oqarfigaangalu: „Mianersorit, taamaalioqinak; kiffaqatigaarma, qatanngutivillu . . . kiffaqatigaannga; Guuti pallorfiguuk.“’ (sarĸúmersitat 22:8, 9) Inngili pissaaneqartoq taanna ilumut maniguuppoq.
19, 20. Jesusip maniguunnerata Romamiullu sakkutuuisa naalagaasalu ajugaasimaarlutik makitasuunerata assigiinngissusiat nassuiaruk.
19 Jesus maniguunnermigut maligassaalluarnerpaavoq. Guutip ernituaraa, taannalu Guutip naalagaaffiani qilammiittumi kunnginngortussaasimavoq. Inunnilli iliorfiginninnermigut Romamiut sakkutuuisa naalagaat ajugaasimasut ilaarsimanngilai. Taakkua ajugaagaangamik malinnitsitik peqatigalugit pingaartorsiornartumik ingerlaarunneqartarput. Ajugaasutut ingerlaarnerminni qamuteqartarput guultimik nagguaatsullu tuugaanik alutornarsarneqartunik hiistinik qaqortunik, imaluunniit ilaannikkut allaat nagguaatsunik, liivinik tiigerinilluunniit qimuttulinnik. Ingerlaartut ilagaat nipilersortartut ajugaasimaarluni erinarsuutinik erinarsortut. Aamma qamuteqartarpoq tiguaanermi iluanaarutinik ulikkaartunik, allanillu qamuteqartarluni sorsunnermi pisimasunik assilissanik. Kunngit, naalakkat sakkutuullu naalagaat tigusaasut ilaquttatik ilagalugit aamma ingerlaarunneqartarput, akuttunngitsumillu tamataajarlutik nikanarsarneqartarlutik. Ingerlaarnerit taamaattut pingaarniarneq makitasuunerlu ilisarnaatigisarpaat.
20 Tassaavoq Jesusip ilioriaasianut akerliulluinnartoq. Taassuma kajumilluni maniguullunilu siulittuut manna eqquutitippaa: „Takuat, kunngivit ornippaatit iluarluni, ajugaalluni piitsuullunilu; qimusserfigaa siutitooq, siutitooq piaraq!“ Qamutini sorsuutini uumasunik kusanartunik qimuttunik tikinnani, maniguulluni siutituuinnaq qimusserfigalugu tikippoq. (Sakarja 9:9; Matîuse 21:4, 5) Inuit maniguuttut nuannaarutigeqaat Jehovap Jesus maniguulluni, asannilluni, misiginneqataallunilu naakkinnittuusoq nunarsuarmut tamarmut kunngitut ivertissimammagu. — Jesaja 9:6, 7; Filípimiut 2:5-8.
21. Maniguunneq qanoq paasisariaqanngila?
21 Jesus, Peter, Paulus angutillu arnallu allat upperluartut Biibilip nalaani inuusut maniguummata uppernarsarneqarpoq maniguunneq sanngiissusiunngitsoq. Akerlianik maniguuttoq aalajaatsumik pissuseqarpoq, inuimmi taakku qunusuillutillu ilungersuussipput. Isumakkut ileqqussatigullu sapiillutik misilinneqarnerit sualuttut atorsimavaat. (Eprîarinut agdlagkat, kapitali 11) Ullumikkuttaaq Jehovap kiffaasa maniguuttut nakuussuseq taama ittoq pigisinnaavaat, Guutip maniguuttut anersaaminik illernartumik annertoqqusersormagit. Taamaattumik ima kajumissaarneqarpugut: ’Tamassimi ilissinnut nikanartinnermit assuuseritsi, anneruniartut Guutip akerartormagit, nikanartittulli saammaattarlugit. Taamaattumik nikanartinniaritsi Guutip assai pissarsuit atangerlugit, taassumunnga taamaaliffissami akitsiseqqullusi.’ — 1 Pîtruse 5:5, 6; 2 Korintumiut 4:7. (wE 1/8 99)
Uteqqiinissamut apeqqutit
□ Silarsuarmi matumani isiginnittaaseq nalinginnaasoq nassuiaruk.
□ Jehovap qanoq ililluni maniguuttut iluarai?
□ Sooq maniguunneq ilinniarneqartariaqarpa?
□ Inuit maniguuttut Biibilimi eqqaaneqartut ilaat eqqartukkit.
[Atuaqqissaarnermi apeqqutit]
[Qupp. 25-mi assiliartaq]
Inngilip Johannes oqarfigaa: ’Mianersorit, taamaalioqinak; kiffaqatigaarma.’