Qanoq ililluta inuit Jehovamut palligunnissaannut ikiorsinnaagivut

’Allakkut Ataatamut pisoqarsinnaanngilaq, uakkut kisianni.’ — JUÁNASE 14:6.

1. Jesusip makissimasup ajoqersukkani sumik peqquai, Jehovallu nalunaajaasuisa peqqussut tamanna maleruarmassuk sumik kinguneqarpa?

JESUS KRISTUSIP ajoqersukkani ima peqquai: „Inunnik inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqanut kuillugit.“ (Matîuse 28:19, NV) Ukiut qulit kingulliit ingerlaneranni Jehovap nalunaajaasuisa 3.000.000-t sinnillit Jehovamut palligunnissaannut ikiorsimavaat. Taakku kuisissimapput taamaalillutillu Guutimut tunniulluinnarsimallutik taassuma piumasaatut iliorniarnertik takutillugu. Nuannaarutigaarput Guutimut qanittumik attaveqalernissaannut ikiorsinnaagatsigik. — Jâko 4:8.

2. Naak nutaat amerlasuut kuisissimagaluartut qanoq pisoqarsimava?

² Nunalli ilaanni ajoqersukkanik nutaanik amerlasuunik kuisittoqarfiusuni oqaluussisartut tamatumunnga assingusumik amerliartorsimanngillat. Soorunami toqusoqartarpoq — agguaqatigiissillugu ukiut tamaasa oqaluussisartut 1 procentiat. Taamaattorli ukiuni kingullerni amerlasuut uniinnarsimapput. Suut pissutaappat? Allaaserisami matumani tulliuttumilu misissussavarput inuit qanoq ilillutik Jehovamut palliguttartut, sunalu pissutigalugu ilaat uniinnartut.

Oqaluussinitta siunertaa

3. (a) Jesusip ajoqersukkaminut suliassiissutaa qanoq inngilip sarĸúmersitat 14:6-imi eqqaaneqartup suliassaanut assingussuteqarpa? (b) Inuit Guutip naalagaaffianik tusarliussamut soqutiginnilersinnissaannut periaaseq suna pitsaalluinnarpa, sunali ajornartorsiutaava?

³ Maannakkut ’ulluni kingullerni’ Jesusip ajoqersugai suliassinneqarput ’Naalagaaffimmik nutaarsiassaq nuannersoq’ pillugu ’paasisaqartitsinissamik’. (Daniel 12:4; Matîuse 24:14, NV) Suliassaq tamanna ’inngilip iivangkiiliumik ittuinnartumik oqaatigisassaqartup nunamiusunut tamanullu inuiaqatigiissunut immikkullu naggueqatigiisunut immikkullu oqaasilinnut immikkullu inuiaasunut’ suliassaanut assinguvoq. (sarĸúmersitat 14:6) Silarsuarmi matumani nunap piinik pingaartitsiffiusumi amerlanertigut inunnik Guutip naalagaaffianut soqutiginnilersitsineq Jehovamullu palligunnissamut ikiuunneq sunniuteqarnerpaaq tassaavoq nunarsuarmi paratiisiusumi inuunermik naassaanngitsumik neriuummik oqaluttuussineq. Paratiisissamik neriuutip tupinnarluinnartup tikkuarnera pissusissamisoorpoq, kisianni inuit Paratiisissami inuunissaq anguniaannarlugu Guutip innuttaanut ilaalerpata tamanna aqquserngup ameqisup inuunermut sammisup aqqutiginissaanut naammanngilaq. — Matîuse 7:13, 14.

4. Jesusip aamma inngilip qilaap missaagut timmisup oqaasii naapertorlugit oqaluussinerput sumik siunertaqarpa?

 ⁴ Jesus oqarsimavoq: ’Tassaavorli inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ (Juánase 17:3) Inngilip qilaap missaagut timmisup ’iivangkiiliumik ittuinnartumik oqaatigisassaqartup’ nunarsuarmiut ima oqarfigai: ’Guuti mianerisiuk, taannalu naalannartissiuk, eqqartuussivissaa nalliummat; pallorfigisiullu qilammillu nunamillu immamillu ermillu puilasarfiinik pinngortitsisoq.’ (sarĸúmersitat 14:7) Tassuuna paasinarsivoq nutaarsiassamik nuannersumik oqaluussinerup pingaartumik siunertarigaa inunnik Jehovamut Jesus Kristus aqqutigalugu palligutsitsinissaq.

Jehovap suliaani inissisimaffipput

5. Paulusip Jesusillu oqaaserisaasa suut takutippaat Guuti sullikkipput, immitsinnut sullinnata?

⁵ Apustili Paulusip uppeqatini kristumiut tanitaasut allaffigigamigit ’kiffartuussineq saammaannartitaanerup pia’ eqqaavaa oqarluni Kristusip utertitsisutitut pilliutaa tunngavigalugu Guutip inuit imminut saammaannartikkai. Paulus allappoq ’soorlu Guuti uatsigut oqaaqqissaarisoq’ aamma ’Kristus sinnerlugu qinusugut: „Guutimut saammaannarteqqugitsi.“’ Eqqarsaat tamanna qiimmaallannartorujussuuvoq! Nunarsuarmi inuunissamik neriugisalittut Kristus sinnerlugu oqariartortitaagaluarutta imaluunniit aallartitaagaluarutta puigunngisaannartariaqarparput Guuti kiffartuukkatsigu, immitsinnut sullinnata. (2 Korintumiut 5:18-20) Guutimmi inuit Kristusimut orniguttut qaaqquai ajoqersortarlugillu. Jesus ima oqarsimavoq: ’Uannut pisinnaasoqanngilaq Ataatap aallartitsisima kajungersinngippani; taavalu ullut naggatissaanni makitikkumaarpara. Pruffiitit allagaanni allassimavoq: „Tamarmillu Guutimit ajoqersorneqarsimassapput.“ Kikkulluunniit Ataatamit tusarlutik ilinniartut nungullutik ornittarpaannga.’ — Juánase 6:44, 45.

6. Jehovap qanoq ililluni inuiaqatigiit aalassatsissavai, kikkullu tamanna ilutigalugu ’illuanut’ isumannaallisarpat?

 ⁶ Qanorli ililluni Jehovap ulluni kingullerni makkunani inuit imminut palligutsittarpai ’uppernermullu iserfissaq’ taakkununnga ammartillugu? (apustilit suliait 14:27; 2 Timûtiuse 3:1) Amerlanertigut taamaaliortarpoq nalunaajaasuni pissutsit aaqqissuussaanerannut ajortumut matumunnga annannissamik aammalu eqqartuussinissamik tusarliussamik oqaluussitillugit. (Jesaja 43:12; 61:1, 2) Nunarsuaq tamakkerlugu oqaluussinerup tamatuma inuiaqatigiit aalassatsittarpai — Guutip nunarsuarmiunik eqqartuussinissaanut mianersoqqussutaagami. Tamanna ilutigalugu inuit Guutip isaani ’erlinnartuusut’ aaqqissuussaanermit matumannga aggiunneqartarput Guutillu pallorfiginninnermik ilumoortumik ’illuani’ isumannaatsumiilersarlutik. Taamaalilluni Jehovap pruffiiti Haggaj aqqutigalugu siulittuutini eqquutitippaa: „Inuiaat tamaasa aalassatsissavakka, erlinnartuutitillu maanga aggiukkumaarpaat; illuga manna pissuussutinik ulikkaassavara.“ — Haggaj 2:6, 7; sarĸúmersitat 7:9, 15.

7. Jehovap qanoq ililluni inuit uummataat ammarpai ataasiakkaarlugillu imminut ernerminullu kajungersillugit?

⁷ Inuit Guutimik mianerinnittut — ’inuiaat erlinnartuutaasa’ — uummataat Jehovap ammarpai nalunaajaasumi oqaaserisaat ’taakkununnga nalunaarsinnaanngortillugit’. (Haggaj 2:7, Jewish Publication Society; apustilit suliait 16:14) Ukiuni hundredelinni siullerni pisimasunut assingusumik Jehovap ilaannikkut inngilit atortarpai nalunaajaasuni inunnut sallusuissummik ujarlersunut imminut ikioqqusunut siulersortillugit. (apustilit suliait 8:26-31) Inuit taakku Guutip ernini Jesus Kristus aqqutigalugu pilersitaanik nuanningaartunik ilinniartinneqarnermikkut Jehovamut palliguttarput asanninnera pissutigalugu. (1 Juánase 4:9, 10) Aap, asannilluni unneqqarissumillu tunniusimalluni Guutip inuit imminut ernerminullu kajungersippai. — Jeremia 31:3.

Kikkut Jehovap kajungersippai?

8. Inuit qanoq ittut Jehovap kajungilersittarpai?

⁸ Jehovap imminik ujarlersut kajungersippai. (apustilit suliait 17:27) Ilaatigut inuit kristumiuuneraqatigiit akornanni, aap, silarsuaq tamakkerlugu, ’maajunnartut suliarineqartut pillugit anersaarulullutik kappialasut’ kajungersinneqartarput. (Hesekiel 9:4) Taakku tassaapput inuit „anersaakkut pisariaqartitaqarnerminnik miserratiginninngitsut“. (Matîuse 5:3, NV) Tassaapputtaaq ’nunap inuini makitajuitsortaasut’ nunarsuarmi paratiisiusumi naassaanngitsumik inuusussat. — Sefanja 2:3.

9. Jehovap qanoq ililluni takusinnaavaa inuit ’inuunermik naassaanngitsumik pissaqaqqusaanersut’, qanorlu imminut kajungilersittarpai?

⁹ Jehovap inuup uummataa atuarsinnaavaa. Kunngi Davidip ernini Salomon ima oqarfigaa: „[Jehovap] inuit uummataat tamaasa misissuiffigeqqissaartarpai eqqarsaativullu isertugaanerpaat ilisimallugit. [Jehova] ujarunni nanitikkumaarpoq.“ (1 Israelikkut 28:9) Inuup uummatikkut pissusii anersaavalu, imaluunniit isumaqarfiginninnera, tunngavigalugu, Jehovap takusinnaavaa ajortit isumakkeerfigineqarsinnaanissaannut inuillu aaqqissuussaanermi nutaami naapertuilluartumi naassaanngitsumik inuusinnaanissaannut Jehovap iliuuserisimasaanut inuup taassuma ajunngitsumik qisuariarnissaanut ilimanaateqarnersoq. (2 Pîtruse 3:13) Oqaatsini nalunaajaasumi oqaluussissutigisaat ajoqersuutigisaallu aqqutigalugu Jehovap ’inuunermik naassaanngitsumik pissaqaqqusaasut tamaasa’ kajungersittarpai, taakkulu uppertunngorput. — apustilit suliait 13:48.

10. Jehovap inuit ilaat kajungersimmagit allallu kajungersinngimmagit sooq tamanna siumut aalajangeriigaasutut paasisariaqanngila?

¹⁰ Jehova inuit ilaannik kajungersitsimmat allanillu kajungersitsinani ima paasisariaqarpa tamanna siumut aalajangeriigaasoq? Naamik! Guutip inuit aalajangersimasut kajungersikkaangamigit taakkua namminneq kissaatigisaat aalajangiisuusarput. Namminerisaminnik iliorsinnaanerat Guutip ataqqivaa. Ullumikkut Jehovap nunarsuarmiut qinersitippai, soorluttaaq ukiut 3000-t matuma siorna Israelikkut qinersitissimagai, Mosesip ima oqarfigimmagit: „Ullumi ilissinnut saqqummiuppakka inuussut pilluarnerlu, illuatungaanilu toqu perlussiornerlu. . . . Ullumi qilak nunarsuarlu ilisimannittoralugit  ilissinnut saqqummiuppakka inuussut toqulu, pilluaqqussut perloqqussullu. Inuussut qinerniarsiuk ilissi kinguaassasilu inuuginnaqqullusi! [Jehova] Guutersi asassavarsi naalassallugulu attavigittuinnarlugulu! Taava inuuginnassaasi.“ — 5 Moses 30:15-20.

11. Israelikkut inuuneq qineritsik qanoq ilillutik takutittussaasimavaat?

¹¹ Malugiuk Israelikkut inuuneq qinissammassuk ’Jehova asagunikku naalakkunikku attavigittuinnarunikkulu’. Tamanna oqaatigineqarmat Israelikkut nuna neriorsuutigisaq suli pigilersimanngilaat. Moabip narsartaanniipput Jordanillu kuussuagut ikaarnissaminnut Kana’anillu nunaanut isernissaminnut piareersarlutik. Pissusissamisuuginnarpoq ’nuna ajunngitsoq aallariarfittooq immummik tungusunniitsuummillu kuuttoq’ qanittukkut pigiligassartik eqqarsaatigimmassuk. Erinigisaalli aatsaat piviusunngussaaq Jehova asallugulu naalallugulu attavigittuinnarunikku. (2 Moses 3:8) Mosesip tamanna erseqqissarpaa oqarami: „Ullumi ilissinnut peqqussutigisattut iliorussi [Jehova] Guutersi asallugu aqqutigeqqusaalu ingerlavigalugit peqqussutaalu ileqqoreqqusaalu oqaaqqissaarutaalu maleruarlugit, taava inuuginnassaasi amerlasoorsunngorumaarlusilu. [Jehovap] Guutissi pilluaqqujumaarpaasi nunami iserfigisassassinni pigiligassassinnilu.“ — 5 Moses 30:16.

12. Oqaluussinerput ajoqersuinerpullu eqqarsaatigalugit qanoq ililluta Israelikkut ilinniarfigisinnaavavut?

¹² Tamanna maannakkut ulluni kingullerni oqaluussinitsinni ajoqersuinitsinnilu ilinniutigisinnaannginnerparput? Nunami paratiisissaq eqqarsaatigalugulu oqaluussissutigaarput. Sallusuissummilli ilassinnittut, uagut imaluunniit oqaluussinerput pissutigalugu ajoqersuganngortut, arlaannaataluunniit neriorsuutit eqquunnissaat misigissanngilaa namminissarsiorluni Guutimut kiffartoruni. Israelikkut assigalugit uagut ilinniartitavullu ilinniartariaqarpugut ’Jehova asassallugu, naalassallugu attavigittuinnassallugulu’. Kiffartornitsinni tamanna eqqaamajuarutsigu inuit taassumunnga palligutsinnissaannut Guuti suleqatigissavarput.

Guutip suleqatai

13, 14. (a) Korintumiunut agdlagkat sujugdlît 3:5-9 naapertorlugu qanoq Guutimut suleqataalersinnaavugut? (b) Amerliartortoqartillugu kina ataqqineqassava, aamma sooq?

¹³ Paulusip Guutimut suleqataaneq tamanna nunalerinermik assersuusiorpaa. Ima allappoq: ’Apollos kinaammat? Paulusilu kinaammat? Kiffaapput, taakkunatigut uppertunngorpusi, massalu Naalakkap taakkununnga immikkut tunissutigisai missiliorlugit. Uanga ikkussuivunga, Apollos imerterivoq, Guutilu naajartortitsivoq. Taamaattumik ikkussuisorluunniit imerterisorluunniit pinngillat, kisianni Guuti naajartortitsisoq. Ikkussuisoq imerterisorlu ataasiupput; tamarmilli immikkut akissarsissapput immikkut suliniarnertik missiliorlugu. Uagummi Guutip suleqatigaatigut; ilissi tassa Guutip naatsiivia, Guutip illuliaa.’ — 1 Korintumiut 3:5-9.

¹⁴ Guutip suleqataatut ilumoorluta ’naalagaaffimmik oqaaseq’ inuit uummataannut ikkuttariaqarparput. Soqutiginnittuni tamani ’imerterisariaqarpugut’ pulaaqqiigaangatta Biibilimillu atuaqqissaaqateqaraangatta piareersaalluarsimanitsigut. ’Issorissoqarpat’, tassa ajunngitsumik uummatilik nanigutsigu, Jehova suleqataassaaq sallusuissut Biibilimeersoq, ’naatsiiassatut’, naajartortissallugu inerititaqartillugulu. (Matîuse 13:19, 23) Inuk taanna Jehovap imminut ernerminullu kajungersissavaa. Imaappoq: oqaluussisartut amerliartoraangata Jehovap inuit uummataat sunnersimasarpai, sallusuissutillu ’naatsiiassartai’ naajartortillugu taamaalillunilu nutaat imminut ernerminullu kajungersillugit.

Illuliorneq atasussaq

15. Suna assersuutigalugu Paulusip takutippaa qanoq ililluta inoqativut uppernermik ineriartortitsinissaannut ikiorivut?

¹⁵ Amerliartorneq nuannaarutigaarput, aaammali kissatigaarput ajoqersuganngorlaat Jehova asajuarlugulu naalattuarlugulu attavigittuinnassagaat. Qiimmassuseeruttut uniinnartullu takugaangatsigik aliasuutigisarparput. Tamanna pinngitsoortinniarlugu iliuuseqarsinnaavugut? Allamik assersuusiorluni Paulusip takutippaa qanoq ililluta inoqativut ikiorsinnaagivut uppernermik ineriartortitsinissaannut. Ima allappoq: ’Alla tunngaviliunneqarsinnaanngilaq kisianni tunngaviliuteriigaq taanna, tassa Jesus Kristus. Tunngavimmulli tamatumunnga kuultimilluunniit siilvimilluunniit ujaqqanilluunniit erlinnartunik qisummilluunniit ivikkanilluunniit karriiarnikunilluunniit qarmaasoqarpat taava kialuunniit immikkut suliaa ersissavoq, ullussap nalunaalliumaarmagu; innermimi saqqummerumaarpoq, kinaagaluartullu suliaa qanoq innersoq innerup misilissavaa.’ — 1 Korintumiut 3:11-13.

16. (a) Paulusip assersuusiai marluk tamarmik immikkut qanoq siunertaqarpat? (b) Sanasimasarput qanoq ililluni amigaateqarsinnaava innermullu atasinnaanani?

¹⁶ Paulusip nunalerinermik assersuusiaani peqqissaartumik ikkussuineq, aalajangersimasumik imerterisarneq Guutillu sulinermut pilluaqqusinera tamarmik naajartornissamut aalajangiisuupput. Assersuusiami allami oqaluussisartup kristumiup illuliornerminut akisussaaffeqarnera erseqqissarneqarpoq. Atortussanik pitsaasunik tunngavimmut aalajaatsumut sanaartorneq pingaaruteqarpoq. Paulus mianersoqqusilluni allappoq: ’Kinaagaluartorli qanoq ittumik qarmaasimanerluni sianiginiarli.’ (1 Korintumiut 3:10) Paratiisissami inuuneq naassaanngitsoq oqaluttuaralugu inoqativut sallusuissummut soqutiginnilersikkaangatsigik, ajoqersuinitsinni Biibilimi ilumoortut tunngaviunerusut samminiarnerusarpavut taavalu inuuneq naassaanngitsoq angujumallugu qanoq iliortariaqarneq erseqqissartarlugu? Imaassinnaanerpa ajoqersuinitsinni oqartartugullusooq: ’Paratiisissami naassaanngitsumik inuujumaguit, Biibili atuaqqissaartariaqarpat, ataatsimiigiartariaqarlutit oqaluussinermullu peqataasariaqarlutit’? Taamaaliorutta ilinniartup uppernera aalajaatsumik tunngavilerneqassanngilaq, sanasimasarpullu immaqa misilinneqarnerup innerani imaluunniit piffissap ingerlanerani atassanngilaq. Inoqativut Jehovamut kajungersikkaanni ukiualunnilu Guuti kiffartuunniarpassuk Paratiisissami inuunermik neriorsorlugit, taava ’qisummik, ivikkanik karriiarnikunillu’ qarmaanerussaaq.

Guutimut Kristusimullu asanninneq ineriartortiguk

17, 18. (a) Inuup uppernini attatiinnassappagu suna pisariaqarluinnarpa? (b) Qanoq ililluta inoqativut ikiorsinnaavavut Messias uummatimminni ineqarteqqullugu?

¹⁷ Upperneq atasinnaassaguni inuup nammineq  Jesus Kristus aqqutigalugu Jehova Guutimut attaveqarneranik tunngaveqartariaqarpoq. Inuttut naammalluinnanngitsuugatta Guuti taamaallaat erneratigut eqqisseqatigisinnaavarput. (Rûmamiut 5:10) Eqqaamajuk Jesus oqarmat: ’Allakkut Ataatamut pisoqarsinnaanngilaq, uakkut kisianni.’ Allat aalajaatsumik uppissuseqarnissaannut ikiussagutsigik, eqqaamasariaqarparput ’alla tunngaviliunneqarsinnaanngitsoq kisianni tunngaviliuteriigaq taanna, tassa Jesus Kristus’. Tamanna sumik nassataqassava? — Juánase 14:6; 1 Korintumiut 3:11.

¹⁸ Inoqatitta uppissusiat Kristus tunngavigalugu ineriartortinneqassappata ilinniartinneqartariaqarput Jesusimut asanningaalersillugit, paasilluinnaramikku taanna qanoq ililluni utertitsisuusoq, ilagiinnut niaquusoq, palasiunerusoq asannittoq aamma kunngitut naalakkersuisoq. (Daniel 7:13, 14; Matîuse 20:28; Kulorsamiut 1:18-20; Eprîarit 4:14-16) Jesus taakkununnga ima piviusuutigisariaqarpoq uummataanniillunilusooq. Qinnuttariaqarpavut soorlu Paulusip kristumiut Efesusimiittut qinnussimagai. Ima allappoq: ’Ataataq seeqqumiarfigaara, . . . naalannangaarsutsi missiliorlugu . . . [ilissi] Kristus uppernikkut uummatissinni ineqaqqullugu, asanninneq manngoqarfigalugulu tunngavigalugulu.’ — Evfisumiut 3:14-18.

19. Biibilimik atuaqqissaaqativut uummammik pisumik Jesusimik asanninnissaannut ikiorutsigik sumik nassataqassava, sumillu ilinniartittariaqarpavut?

¹⁹ Ima sanasarutta soqutiginnittut Biibilimik ilinniartitavut Jesusimik asannitsilerlugit, taava Jehova Guutittaaq asalissavaat. Jesusip asanninnera misiginneqataaneralu Jehovap pissusiinut naapertuulluinnarput. (Matîuse 11:28-30; Mákorse 6:30-34; Juánase 15:13, 14; Kulorsamiut 1:15; Eprîarit 1:3) Inuit Jesusimik ilisarsilerunik asannilerlutillu taava Jehovattaaq ilisarilerlugulu asalissavaat. * (1 Juánase 4:14, 16, 19) Biibilimik ilinniartitavut ilinniartittariaqarpavut Jesusip inuiannut iliuuserisimasaanut tamanut Jehova aallaaviusoq, taamaattumillu taanna ’Guutitut annatsitsisartutut’ qutsavigalugulu unnersiutigalugulu pallorfigisariaqaripput. — Tussiaat 68:20, 21; Jesaja 12:2-5; Juánase 3:16; 5:19.

20. (a) Qanoq ililluta inoqativut Guutimut erneranullu palligunnissaannut ikiorsinnaavavut? (b) Allaaserisami tulliuttumi suna misissussavarput?

²⁰ Guutip suleqataatut inoqativut taassumunnga erneranullu palligunnissaannut ikiorniartigik, uummammit pisumik uppernissamik asanninnissamillu ineriartortitsinissaannut ikiorlugit. Taamaalilluni Jehova taakkununnga piviusunngussaaq. (Juánase 7:28) Jesus aqqutigalugu Guutimut qanittumik attaveqalersinnaapput. Asassavaat attavigittuinnassallugulu. Piffissaq apeqqutaatinnagu asannillutik kiffartorfigissavaat, upperilluinnassagamikku piffissanngorpat Jehovap neriorsuutai nuanningaartut piviusunngussasut. (Upputit 3:24-26; Eprîarit 11:6) Inoqativulli uppernermik, neriuummik asanninnermillu ineriartortitsinissaannik ikiortillugit, aamma nammineq uppernerput nakkussatsinniartariaqarparput — umiarsuartut qajannaatsutut — anorersuit atorsinnaaqqullugit. Tamanna allaaserisami tulliuttumi misissussavarput. (wE 15/7 99)

[Quppernerup ataani ilanngussaq]

Uteqqiinissamut apeqqutit

□ Qanoq ililluta inuit Guutip naalagaaffianik tusarliussamut soqutiginnilersittarpavut, sunali mianersorfigisariaqarparput?

□ Inuit qanoq ittut Jehovap imminut ernerminullu kajungilersittarpai?

□ Israelikkut nunamut neriorsuutigisamut isissappata suna pisariaqarsimava, uagullu tamanna qanoq ilinniutigisinnaavarput?

□ Inoqativut Jehovamut erneranullu palligunnissaannut ikiorneqassappata uagut suna akisussaaffigaarput?

[Atuaqqissaarnermi apeqqutit]

[Qupp. 10-mi assiliartaq]

Inoqativut Paratiisissami naassaanngitsumik inuuneq pillugu neriuummik oqaluttuuttarpavut, pingaartumilli Jehovamut kajungersinneqarnissaat siunertaraarput

 [Qupp. 13-mi assiliartat]

Pulaaqqiitinnata piareersarluartarutta angusaqarluarsinnaavugut