Diaavulu nappaatinut pisuua?

INUIT NAPPARSIMANISSAAT AALLAQQAAMMUT SIUNERTAANNGILLUINNARALUARPOQ. Guutip peqqilluinnartussatut naassanngitsumillu inuusussatut pinngortippaatigut. Anersaap, Satanip, angajoqqaavut siulliit, Adam Evalu, tammartippai, taamaattumillu inuit nappaateqalerlutillu anniaateqalerlutillu toqusalernerannut pisuulluni. — 1 MOSES 3:1-5, 17-19; RÛMAMIUT 5:12.

IMA paasisariaqarpa nappaatit tamarmik silarsuaannit sunniuteqarnerup toqqaannartumik kingunerigai? Soorlu allaaserisami siullermi eqqaaneqartoq, Owmadjip aanaatut amerlasuut taama isumaqarput. Kisianni Owmadjip timmilluni nappaataa, nunani kiattuni meerarpassuarnut toqumik kinguneqarajuttoq, ilumut anersaanit takussaanngitsuninngaanerpa?

Satanip inissisimaffia

Tamanna Biibilip erseqqilluinnartumik akivaa. Takutippaa siuaasat toqunikut inunnik ajoqusiisinnaasutut anersaajullutik inuujuarneq ajortut. Biibilimi allassimavoq: „Toqungasut sunnguamilluunniit ilisimasaqanngillat.“ Toqup kingorna inooqqittartumik anersaaqanngillat. Toqusut inaanni sinipput, tassanilu ’suliassaqanngilaq pilersaarusiorfissaqaraniluunniit, ilisimasassanillu ilisimassummilluunniit pissarsiassaqarani.’ (Nalunaajaasup oqaasii 9:5, 10) Toqusut inuusunik nappaateqalersitsissinnaanngilluinnarput.

Biibililli takutippaa ilumut anersaapiloqartoq. Silarsuarmi pikitsitsisoq siulleq tassaavoq anersaaq maannakkut Satanitut ilisarineqartoq. Kingusinerusukkut pikitsitsineranut anersaat allat ilaalerput, kingornalu anersaapilunnik taaneqalerlutik. Satanip anersaapiluisalu inuit napparsimalersissinnaavaat? Taamaattoqarsimavoq. Jesusip tupinnartuliornikkut ajorunnaarsitsinerisa ilagaat anersaapilunnik anisitsinerit. (Lúkarse 9:37-43; 13:10-16) Kisianni nappaatit Jesusip ajorunnaarsitaasa amerlanersaat toqqaannartumik anersaapiluit pissuussutiginngilaat. (Matîuse 12:15; 14:14; 19:2) Aamma ullumi nappaatit amerlanersaat nalinginnaasunik pissuteqartarput.

Angakkuarnermi? Ussatit 18:10-mi ima neriorsorneqarpugut: „[Jehovap] aqqa pallittaalisatut ippoq, iluartoq tassunga qimaanasuartarpoq annaanneqarlunilu.“ Jâko 4:7-mi ima allassimasoqarpoq: ’Taamaattumik Guuti naalagarsiorfigisiuk; Diaavululi akerartorsiuk, qimassavaasilu.’ Guutip kiffani aalajaatsut angakkuarnermut, pissaanernullu tupinnartunut allanut illersorsinnaavai. Jesusip oqaasii Juánase 8:32-miittut ilaatigut taamatut paasisariaqarput. ’Sallusuissutip inussiaajunnaarsissavaasi.’

’Kisianni anersaapilunngila Jobimik napparsimalersitsisoq?’ immaqa taama aperisoqassaaq. Taamaappoq. Biibilimi nassuiarneqarpoq Jobip nappaataa Satanimit pisuussutigineqartoq. Kisianni Job eqqarsaatigalugu allanit allaaneruvoq. Guutip sivisuumik Job toqqaannartumik anersaapiluit saassussinerannit illersorsimavaa. Ilaanni Satanip Jehova unammillerpaa Job misilinniaqqullugu, apeqqutillu akerleriissutaasut pingaarutillit apeqqutigineqalersut pissutigalugit, Jehovap taamanikkuinnaq kiffaminit illersuutimi ilaa peerpaa.

Guutili killiliisarpoq. Jehovap akueraa Satanip Job napparsimalersikkallarsinnaagaa kisianni toqoqqunagu. (Job 2:5, 6) Jobip naalliuutai piffissap ingerlanerani qaangiupput, Jehovallu assuarnaassusia pissutigalugu pilluaqqungaarpaa. (Job 42:10-17) Jobip assuarnaassusiatigut ileqqoreqqusat  qangarsuarli Biibilimi allaatigineqartut nalorninaallisinneqarput, inunnillu tamanit paasineqarsinnaapput. Taamatut misilinneqarneq uteqqinneqartariaqanngilaq.

Satanip periaasii

Tamatigungajak Satanip inuit nappaataannut attuumassuteqarnera tassaavoq Satanip inuit siulliit ussermagit, ajortuliortulli. Satan inngilipiluilu napparsimalernernut tamanut tamatigut pissuusariaqanngillat. Satanilli sianiitsumik aalajangernissatsinnut uppernittalu akerlianik iliornissatsinnut sunnersinnaavaatigut, peqqiilliornitsinnik kinguneqarsinnaasumik. Satanip Adam Evalu kussunnagilluunniit toqunngilai. Aamma nappaammik eqqunngilai. Naamik, Evali Guutimut naalanngitsuliornissaanut kajumissaarpaa, Adamillu qinerpaa naalannginnermik maligassiaa malinniarlugu. Ilaatigut tamanna nappaammik toqumillu kinguneqarpoq. — Rûmamiut 5:19.

Pruffiiti uppinngitsoq Bileamimik atillik Moabip kunngianit suliassinneqarpoq Israelikkut aarlerinartorsiortitsillutik Moabip killeqarfia eqqaani tammaartut perloqqoqqullugit. Bileamip Israelikkut perloqqullugit misilikkaluarpaa, kisianni Jehovap innuttani illersormagit iluatsinngilaa. Kingornalu Moabikkunnit Israelikkut guutipilussiornermut kanngunartuliornermullu ussassaarniarsarivaat. Periaaseq tamanna iluatsippoq Jehovallu illersuinera Israelikkut annaavaat. — 4 Moses 22:5, 6, 12, 35; 24:10; 25:1-9; sarĸúmersitat 2:14.

Qangarsuaq pisimasoq tamanna pingaartorujussuarmik ilinniarfigisinnaavarput. Guutip kiffani aalajaatsut ikiuineratigut anersaapiluit toqqaannartumik saassussinerannut illersorneqartarput. Kisianni Satanip immaqa uppernitta akerlianik iliortinniarsarissavaatigut. Immaqa kanngunartuliornissatsinnut ussassaarniarluta misilissavaa, imaluunniit løvertut uiannisaartutut ersilersinniarluta Guutip illersuineranit nigortinniarluta iliuuseqartinniassavaatigut. (1 Pîtruse 5:8) Tamannaana pissutigalugu Paulusip Satan taagaa ’toqumik pissaatilik’. — Eprîarit 2:14.

Owmadjip aanaata Hawa aarnuanik nappaammut illersuissutut atornissaanut kajumissaaraluarpaa. Hawa akuersiinnarsimagaluarpat qanoq pisoqarsimassagaluarpa? Takutissimassagaluarpaa Jehova Guuti naammattumik tatiginngikkaa, aamma tamanna pissutigalugu illersuinissaa ilimagisinnaajunnaassagaluarpaa. — 2 Moses 20:5; Matîuse 4:10; 1 Korintumiut 10:21.

Soorlu Jobimi pisimasoq Satanip kajumissaarineq aamma atorniarsarisimavaa. Satanip Job ilaqutaanik, pisuussutaanik peqqissusianillu arsaaginnanngilaa. Aammali Job nuliaminit ajortorujussuarmik siunnersorneqarpoq. Oqarpoq: „Guuti perloqquinnaruk, toquinnaruit pitsaanerummat“ (Job 2:9) Aamma ikinngutaasorisat pulaaramikku qularunnaarsinniaraluarpaat napparsimanerminut nammineq pissuusoq. (Job 19:1-3) Satanip Jobip nukillaarsimanera atornerlunniarpaa nikallulersinniarlugu Jehovallu naapertuilluarneranut tatiginninnera sanngiillisinniarlugulu. Jobilli Jehova neriuutigisatuamisut annertoqqutigiuarpaa. — Naleqqiuguk Tussiaat 55:23.

Nappaammik eqqorneqaraangatta, uagut aamma nikallulersinnaasarpugut. Taamaalinerani Satanip uppernitsinnut akerliusumik iliornissatsinnut usserniarasuartarpaatigut. Taamaattumik napparsimagaangatta eqqaamasariaqarparput nappaatitsinnut kingornussaasumik naammalluinnanngissuserput qularnanngitsumik pissutaasoq, pissaanerit tupinnartut pinnatik. Isak aalajaatsoq toqunissani ukiut arlallit sioqqullugu tappiitsunngorpoq. (1 Moses 27:1) Tamatumunnga anersaapiluit pissuunngillat, kisianni utoqqalineq. Rakel meerartaarniartilluni toqummat, Satan pisuunngilaq kisianni inuup qajannassusia pissuuvoq. (1 Moses 35:17-19) Ukiut ingerlaneranni upperluartut siornatigut inuusut tamarmik toqupput, angakkuarneq perloqqusinerluunniit pissutiginagit, kisianni naammalluinnanngissusertik kingornussartik pissutigalugu.

Isumaqaraani nappaatinik eqqorneqarnitsinnut tamanut anersaat takussaanngitsut pissuusut tammartitsiniutaavoq. Anersaapilunnut peqqinnanngitsumik ernumalersissinnaavaatigut. Napparsimalerutta anersaapilunnik saammarsaanissatsinnut ussernartorsiorsinnaavugut sapinngisamik ungasinniartussaagaluarlugit. Satanip  ernumalersinniarluta anersaarsiornermut ussersinnaappatigut, Guutimut ilumoortumut, Jehovamut, killuussinerussaaq. (2 Korintumiut 6:15) Guutip assortuisuanut upperisapalaaqartumik ersinermit pinnata Guutimulli ataqqinnilluni mianerinninnermit siulersorneqartariaqarpugut. — sarĸúmersitat 14:7.

Owmadji anersaapilunnut pitsaanerpaamik illersuuteqareerpoq. Apustili Paulusip oqaasii naapertorlugit Guutip ’iluartitaasutut’ isigaa uppertumik anaanaqarmat, anaanaatalu Guuti anersaavanik illernartumik najoqqullugu qinnuigisinnaavaa. (1 Korintumiut 7:14) Hawap eqqortumik ilisimasaata Owmadji nakorsiaannissaanut kajumissaarpaa, aarnuat tatiginagit.

Nappaammut pissutaasut assigiinngitsut

Inuit amerlanersaasa anersaat upperinngilaat. Napparsimaleraangamik akissaqaraangamik nakorsiartarput. Nakorsiarnerli peqqissinissamut qulakkeerutaanngilaq. Nakorsat tupinnartuliorsinnaanngillat. Inuilli amerlasuut upperisapalaanik upperisaqartut aaqqissinnaagaluartut aatsaat kingusinaareerlutik nakorsiartarput. Nakorsariaatsit upperisapalaamut attuumasuteqartut misileqqaartarpaat, iluaqutaanngikkaangaatali neriorfissatut kingullersut nakorsiartarput. Amerlasuut pisariaqangitsumik toqusarput.

Allat ilisimasakinneq pissutigalugu piaarpallaartumik toqusarput. Nappaatit ilisarnaataat maluginiarneq ajorpaat, aamma qanoq napparsimanaveersaarsinnaanissartik naluaat. Paasissutissiisarneq pisariaqanngitsunik naalliunnissamut pitsaaliueqataasarpoq. Malunnarpoq anaanaat atuarsinnaallutillu allassinnaagaangata meeraaqqat toqusartut ikinnerusartut. Ilumut ilisimasakinneq inuunermik naleqarsinnaavoq.

Aammattaaq paarsinerluneq napparsimanermut pissuusinnaavoq. Assersuutigalugu amerlasuut napparsimalertarput nerisassatik sullernit nigorsimatinneq ajoramikkik, imaluunniit igatinnatik assatik asanneq ajoramikkik. Malariaqarfinni ippernanut illersuuteqarani sininneq aamma ulorianarsinnaavoq. * Peqqikkusukkaanni amerlanertigut ’pinaveersaarineq ajorunnaarsitsinermit pitsaaneruvoq’.

Inuit millionilikkuutaat silatusaanngitsumik inooriaaseqarsimagamik napparsimalersimapput piaarpallaartumillu toqusimallutik. Imerpallaarneq, kanngunartuliorneq, ikiaroortarneq tupatornerlu pissutigalugit inuit amerlasuut peqqissusiannik ajoqusiisimavoq. Inuk tamatuminnga ileqqupiloqarnini pissutigalugu napparsimalerpat, taava kussugaaneranut anersaapiloqarneranulluunniit ersiutaava? Naamik, nammineq napparsimalernerminut pissuuvoq. Anersaapiluit napparsimanermut pissuutikkaanni ersiutaavoq nammineq silatusaanngitsumik inooriaaseqarnermut akisussaarusunnginneq.

Soorunami nammineq iliuuseqarfigisinnaannngissatsinnik pisoqarsinnaasarpoq. Assersuutigalugu tappiorannartut napparsimalersitsisinnaasut mingutsitsinerluunniit pissutigalugit napparsimalersinnaavugut. Owmadjip tamanna misigaa. Sooq Owmadji timmilersoq anaanaata naluaa. Illumik ilua silataa eqqiluitsuutimmagit, igaleraangamilu arrortoqqaartarluni, meerai meeqqanut allanut naleqqiullugit qaqutigoortumik napparsimasarput. Kisianni meeqqat tamarmik ilaannikkut napparsimasarput. Tuniluunnerit assigiinngitsut timmilersitsisinnaasut 25-it missaaniipput. Qularnanngitsumik tuniluunneq soorleq Owmadjip nappaataanut pissutaanersoq qaquguluunniit paasineqarnavianngilaq.

Aaqqiissutissaq ataavartoq

Guutip nappaateqarneq pisuussutiginngilaa. ’Guutimi ajortumut ussertinnavianngilaq, namminerlu kinaluunniit ussertanngilaa.’ (Jâko 1:13) Kiffami ilaat napparsimaleraangat Guutip anersaakkut nakussatsittarpaa. „Napparsimalluni nallaviani [Jehovap] ikiussavaa, napparsimaleraluaraangat peqqissisittassavaa.“ (Tussiaat 41:4) Aap, Jehova Guutiuvoq misigittartoq; ikiorusuttarpaatigut ajoquserusunnata.

Jehova nappaammik ajornartorsiutinut ataavartumik aaqqiisutissaqarpoq — Jesusip toqunera makinneralu. Jesusip utertitsissummik pilliutaaneratigut inuit eqqortuliorusuttut ajortiliunerminnit utertinneqarsimapput, siunissamilu peqqilluinnarnissartik nunamilu paratiisiusumi naassaanngitsumik inuunissartik nuannaarutigisinnaassavaat. (Matîuse 5:5; Juánase 3:16)  Jesusip tupinnartuliai ajorunnaarsinneqarnissamut ataavartumut Guutip naalagaaffiata ataani pisussamut qilanaartuutaapput. Guutip aamma Satan inngilipiluilu peersissavai. (Rûmamiut 16:20) Jehovap imminut uppertunut pissussat nuanningaartut piareersimavai. Naammagittaannarlutalu qasusuittariaqarpugut.

Tamatuma tungaanut Guutip Biibili aqqutigalugu kiffanilu ilumoortut qatanngutigiissutut silarsuarmi tamarmi najugaqartut aqqutigalugit ilisimassutsimik atorluarsinnaasumik anersaakkullu unnersuunneqarnermik tunisarpaatigut. Takutippaatigut qanoq ililluta ileqqupiluit peqqissutsinnut ajoqutaasut pinaveersaarsinnaagivut. Aamma ajornartorsioraangatta ikiuisinnaasunik ilumoortunik ikinngutinik tunisimavaatigut.

Jobimut pisimasoq uteqqilaariartigu. Angakkumik ikiortissarsiorsimaguni, iliuuserisinnaasami ajornersaat iliuuserisimassagaluarpaa. Guutip illersuineranit nigorsimassagaluarpoq aamma pilluaqqussutissarpassuit misilinneqarnermi ingasattut kingorna pisassani annaasimassagaluarpai. Guutip Job puigorsimanngilaa, uaguttaaq puigussanngilaatigut. Ajoqersugaq Jakob ima allappoq: ’Jobip ilalaarsusianik tusarsimavusi, [Jehovallu] aniguiffigititaa ilisimavarsi, [Jehova] nallittuillunilu isumassuinertoqimmat.’ (Jâko 5:11) Uaguttaaq Guutip piffissaa nalliuppat nuanningaartunik pilluaqquneqarumaarpugut, ajorsinngikkutta.

Owmadji qanoq piva? Anaanaata Napasulia Alapernaarsuiffik-up atuagassiaqataani, Iteritsi!-mi allaaserisami siunnersuutit atorsinnaasut eqqaavai. * Allaaserisap siunnersuutai malippai Owmadjilu akuukkaminik imertillugu. Ullumi niviarsiarannguaq peqqillunilu aaqqissimavoq. (wE 1/9 99)

[Quppernerup ataani ilanngussat]

[Qupp. 29-mi assiliartaq]

Jehovap nappaammik ajornartorsiut aaqqilluinnarsinnaavaa