Inuuneq nuannaraajuk?

„QAAMANEQ takulara.“ Oqaaserineqartut naapertorlugit Italiamiu atuakkiortoq Giacomo Leopardi toqungajalerluni imminik isumaginnittunut taama oqarpoq. Oqaatsit eqqaasippaatigut inuup inuunini piginiarsuaartaraa, qaamaneq inuunermut atalluinnarmat.

Inoorusunneq tamanna ingerlatsisuuvoq pingaaruteqartoq amerlanernik ulorianartunik ingalassimatitsisartoq tamanillu inuunerup pigiinnarnissaanut iliuuseqartitsisartoq. Tassuuna inuit uumasunit, inoorusussusermik pigisaqarlutik pinngortitaasunit, allaaneruallaanngillat.

Kisianni inuuneq qanoq ittoq inuunerissallugu anguniagarissallugulu naleqarpa? Timikkut ittumik piunissaq — anersaartorsinnaaginnarneq angalasinnaanerlu — immini anguniagassaanngilaq. Aammattaaq nalerisimaarnivik anguneqarsinnaanngilaq inuuneq sunik tamanik angusaqarfigisassatut isigigaanni. Epikuriiarit inuunerup qanoq ittariaqarneranik isiginnittaasiata „nerillutalu imeqisa, aqagu toqussagatta“ inuit nuannaarnerulersikkajunngilai. (1 Korintumiut 15:32) Soorunami inuit arlalinnik timikkut pisariaqartitaqarput, aammattaarli kulturimut tunngasunik inooqatigiinnermullu tunngasunik soqutigisaqarput, pisariaqartitat anersaakkut ittut eqqaassanngikkaanni, qutsinnerusoqarneranik upperisaqarnermut atassuteqartut. Alianaraluartumik inuit hundredemillionillit arlallit, milliardiliunngikkunik, nunarsuarmi tamarmi inuttut atugarisat ajorluinnarnerat sunniivigineqapilunnerlu pissutigalugit inuusinnaanerup minnerpaaffiani inuupput. Timimik pisariaqartitaasa matussutissaqartinnissaannik pingaarnerutitsisut tamarmik — nerilluni, imerluni, pigisaqarluni imaluunniit kinguaassiuutit tungaatigut pisariaqartitani kisiisa nammatitsillugit — annerusumik minnerusumilluunniit nersutitut inuupput, tamannalu nalerisimaarnermik killilerujussuarmik tunisisarpoq. Eqqortumik oqaatigalugu inuunerup tunniussinnaasai siunertaqarluarnerusut atorluanngilaat, inummik silassorissumik naammagisimaalersitsisartut misigissutsikkullu pisariaqartitanik matussutisiisartut. Aammattaaq nammineq kissaatigisaannarminnik namminissarsiortunik naammassinninniartut, inuunermi pitsaanerpaamik annaasaqaannassanngillat, inuilli inooqatigisatik aamma ajoqusissavaat, allallu soqutigisaannik siuarsaaniarneq ajorlutik.

Eqqartuussisoq inuusuttunik pinerlunniartartunik suliaqartartoq oqarpoq „ileqqussatigut maligassat nakkaakkiartornerat, maligassanik ajortunik nersorinninnerit aamma pisuunngupallanniarluni iliuusiusartut iluatsinnerat“ pisooqataasut „ingasaassilluni unammillernerup anersaavanik siuarsaanermut“. Kingunerivaa ileqqorlunneq inooqatigiinnut ajoqutaasoq aamma inuusuttunik aseruisoq, pingaartumik ikiaroorniutinik atuillutik aallartittunut.

Inuuneq tupinnaannartumik tunniussassarpassuaqarpoq — sumiiffinnut nuannersunut angalasoqarsinnaavoq, soqutiginartunik atuarlunilu misissuisoqarsinnaavoq, allat nuannersumik katerisimaaqatigineqarsinnaapput nipilersukkanillu tusarnersunik tusarnaarluni. Aap, nalerisimaalersitsisinnaasunik allarpassuarnik sammisassaqarpoq. Biibilip Guutianut, Jehovamut, upperluartut inuunermik nuannarisaqarnissaminnut suli  amerlanerusunik pissutissaqarput. Upperisap ilumoortup inuit nukinnik eqqissisimanermillu tunisarpai ullunik ajortunik qaangiinissaannut ikiorlugit. Guutimut ilumoortumut uppertut tatiginnillutik oqarsinnaapput: „Jehovap ikiormanga ersissanngilanga.“ (Eprîarit 13:6) Inuit Guutip asannissusianik ilisimannittut taassumannga asaneqarlutik misigipput. Asanninnera ajunngitsumik qisuariarfigaat, nuannaangaarnermillu tunineqarput. (1 Juánase 4:7, 8, 16) Sammisassaqarluarlutik namminissarsiortuunngitsumik naammaginarluartumillu inuusinnaapput. Soorlumi Jesus Kristus oqartoq: ’Tunisineq tigusinermit pilluarnarneruvoq.’ — apustilit suliait 20:35.

Alianaraluartumik inuuneq maannakkut atuuttoq aammattaaq illua tungeqarpoq. Anniaatit, naapertuilluanngissuseq, piitsuussuseq, nappaatit aammalu toqu nalinginnaapput — anniaatit atuuttut inuunermik atoruminaalluinnalersitsisartut ilaannanngui taassagaanni. Israelitoqqami kunngi Salomon pisooq, pissaneqartoq silatoorlu inunnik nuannaalersitsisinnasunik amigaateqanngilaq. Kisianni ernumassuteqarpoq — ilisimagamiuk toquguni pigisani „erloqilluni“ pissarsiarisimasani, ’ilisimassaqassutsi pikkorissutsilu atorlugit ilungersorluni’ angusimasani qimaannartariaqassallugit. — Nalunaajaasup oqaasii 2:17-21.

Inuunerup sivikissusia amerlanerit Salomonitulli ilisimavaat, qaangiutiaarpallaartartoq. Biibilimi allassimavoq Guutip ’ittuinnartoqarnera uummataanut tunniukkaa’ (akugdlîssup oĸausê 2:17-21 nutsigaq pisoqaq.) Inuit naassaanngitsussamik pasitsaassimasaqarnerata inuunerup sivikissusia eqqarsaatigilersittarpaat. Inuunerup toqullu siunertaqarnerannut akissut naammaginartoq nassaarinngikkaanni naggataatigut isumalluanngitsumik misigissuseqarnerup artorsalersissavaatigut isumaqalersillutalu suut tamarmik iluaqutaanngitsut. Tamatuma inuuneq nikallunganartunngortissinnaavaa.

Inuit annikilliuutaannut apeqqutinut akissutit nanineqarsinnaappat? Qaquguluunniit pissutsit inuunermik nuannersunngortitsisut ataavartitsisullu atuutilersinnaappat?