’Inuuneq piviusoq’ nuannaarutigiuk

JEHOVA GUUTIP ittuinnartoqarneranik misigisimaneq inuit uummataannut ikkussimavaa. (akugdlîssup oĸausê 3:11, nutsigaq pisoqaq) Tamanna pissutaalluni qanoq iliorsinnaanngissuseq misigisarparput toqup nalaakkaangatigut, peqatigitilluguli tamatuma malartitassaanngitsumik inoorusunnermik tunisarpaatigut.

Guutip oqaasiata isumassarsiarititaata, Biibilip, tupinnangaartumik neriuuteqalersippaatigut. (2 Timûtiuse 3:16) Jehova, nammineq asanninnermut ersiutaasoq, inunnik pinngortitsinavianngilaq naassaanngissutsimik paasinnissinnaatillugit ukiualuinnaallu inuunissamut eqqartuullugit. Guutip kinaassusianut akerliulluinnassaaq pinngortippatigut pissutsit atukkavut naalliuutigisussanngorlugit. ’Uumasutut sianissuseqanngitsutut inunnguuseralugu pisarineqarlunilu suujunnaartussatut’ pinngortitaangilagut. — 2 Pîtruse 2:12.

Jehova Guutip Adam Evalu ittuinnartoqarneranik misigisinnaatillugit pinngortikkamigit, ’ajunngilluinnartumik’ suliarisimavai; naassaanngitsumik inuusinnaanngorlugit pinngortissimavai. (1 Moses 1:31) Kisianni alianaraluartumik inuit aappariit siulliit namminneq aalajangersinnaassusertik atornerluppaat Pinngortitsisumillu inerteqqutaa erseqqissoq naalanngillugu, taamaalillutillu naammalluinnartuunerigaluartik annaavaat. Tamatuma kingunerisaanik toqupput kinguaaminnullu ajorti toqulu kingornussaritillugu. — 1 Moses 2:17; 3:1-24; Rûmamiut 5:12.

Biibilip inuuneq toqulu paasissaanngitsutut eqqartunngilai. Allassimavoq toqusunut ’suliassaqanngimmat pilersaarusiorfissaqaraniluunniit, ilisimasassanillu ilisimassummilluunniit pissarsiassaqarani’, toqusullu ’sunnguamilluunniit ilisimasaqanngitsut’. (Nalunaajaasup oqaasii 9:5, 10)  Allatut oqaatigalugu toqungasut toqungasuupput. Tarnip toqujuitsuunera Biibilimi ajoqersuutigineqanngilaq, taamaattumillu toqungasut qanoq issusiat paasiuminaatsorujussuunngilaq. — 1 Moses 3:19; Tussiaat 146:4; Nalunaajaasup oqaasii 3:19, 20; Hesekiel 18:4. *

Guuti siunertaqarsimavoq; nunarsuaq „asuliinnaq“ pinngortissimanngilaa. Piliarisimavaa „inoqartussanngorlugu“ inunnit naammalluinnartunit paratiiserpalaartunik avatangiiseqartunit, Guutillu siunertani allanngortissimanngilaa. (Jesaja 45:18; Malaki 3:6) Siunertanilu tamanna naammassiniarlugu ernini nunamut aallartissimavaa. Toqumut allaat ilumoornermigut Jesus Kristus inuiaat ajortimit toqumillu utertinneqaatissaannik aqqutissiuivoq. Jesus oqarpoq: ’Silamiut Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ — Juánase 3:16.

Qangarsuaq Guuti neriorsuivoq „qilak nutaaq nunalu nutaaq“ pinngortikkumaarlugit. (Jesaja 65:17; 2 Pîtruse 3:13) Tamatuma kinguneraa kristumiunik ilumoortunik eqimattanik aalajangersimasunik amerlasusilinnik qilammiittussanik toqqaasariaqarnera. Taakku Jesus Kristus peqatigalugu naalakkersuisuni pingaarnersaassapput. Biibilip taakku ’qilammiup naalagaaffianik’ oqaatigai, ’nunamiittullu’ naalakkersussavaat. (Matîuse 4:17; 12:28; Evfisumiut 1:10; sarĸúmersitat 5:9, 10; 14:1, 3) Guutiitsuussuseq tamaat piuneerutereeruniuk nunarsuarpullu tamaat salereeruniuk Guutip atuutilersissavai inuiaqatigiit naapertuilluartut, imaluunniit „nuna nutaaq“. Taakkununngalu ilaassapput inuit pissutsit ajortut maannakkut atuuttut piuneerussaanissaanni qanittukkut pisussami sernigiumaagai. (Matîuse 24:3, 7-14, 21; sarĸúmersitat 7:9, 13, 14) Neriorsuutigineqartutut makititsinikkut inuuleqqittussat taakkununnga ilanngutissapput. — Juánase 5:28, 29; apustilit suliait 24:15.

Taamanikkussaq ’inuuneq piviusoq’

Nunami paratiisiusumi inuunermik nuanningaartumik allaatigineqartoq uppernarsarlugu Guuti oqarpoq: ’Ata! Suut tamaasa nutaanngortippakka.’ (sarĸúmersitat 21:5) Inuiannut Guutip tupinnartuliariumaagai tamakkiisumik paasineq ajornarluinnarpavut. Guutip nunarsuaq tamaat paratiisinngortikkumaarpaa, Edenip naatsiivianik pinngortitsinermisulli. (Lúkarse 23:43) Edenip naatsiivianisulli naammattorsuarnik nuannaarutissaqassaaq soorlu qalipaatinik, nipinik nerisassanillu misilittassanik. Piitsuussuseq peerutissaaq nerisassaaleqisoqarunnaarlunilu, piffissaq taanna pillugu Biibilimi allassimavoq: ’Siulliit peermata.’ (sarĸúmersitat 21:4; Tussiaat 72:16) Kingorna oqartoqanngisaannassaaq: „Napparsimavunga,“ nappaatit naassaanngitsumik nungutinneqarsimassammata. (Jesaja 33:24) Aap, anniaatinut pissutaasut tamarmik peerutissapput, aamma inuit akeratoqaat toqu. (1 Korintumiut 15:26) ’Nunamik nutaamik’, Kristusip naalakkersuinerata ataani inuiaqatigiinnik nutaanik, takorruukkami alianaangaartumi apustili Johannesip tusaavaa nipi oqartoq: ’Qulliit tamaasa isaanit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaasavoq.’ Sunami alla annerusumik tuppallersaataallunilu nuannaarutaassava neriorsuutip Guutimeersup tamatuma eqquutitinneqarneranit?

Biibilip siunissami inuunissaq allaatigigamiuk erseqqissarpaa pingaartumik pissutsit inuit ileqqorissaarnikkut anersaakkullu tunngasunik neriugisaat naammaginartuusussat. Manna tikillugu anguniarlugit sorsuutigisimasaralui tamarmik taamanikkut piviusunngussapput. (Matîuse 6:10) Tamakkununnga ilaavoq naapertuilluarneq, kissaatigisaq piviusunngorsimanngitsoq amerlanertigut inuit ajortut inunnik sanngiitsunik naqisimannillutillu naalagaaffiginnittarsimammata. (Nalunaajaasup oqaasii 8:9) Tussiasiortup Kristusip naalakkersuinerata ataani pissutsit atuuttussat ima siulittuutigai: „Iluarneq ulluini inerilluarsimassaaq, pigissaarnerlu angeqisoq atugaassaaq.“ — Tussiaat 72:7

Naligiissitaaneq anguniagaavoq alla amerlasuut pilliuteqarfigisimasarujussuat. Guutip ’pinngoqqiffimmi’ immikkoortitsisarneq atuukkunnaarsissavaa. (Mattæus 19:28) Tamarmik assigiimmik ataqqisaassapput. Naligiinneq naalakkersuisunit sukannersunit inunnut pinngitsaaliissutaassanngilaq. Akerlianilli assigiinngisitsinermut pissutaasut peerneqassapput,  taakkununnga ilaapput piumatussuseq pingaarniarnerlu, inuit imminnut naalagaaffigilerniartarnerannut pigisarpassuarnillu katersiniartarnerannut pissutaasartut. Esajasip siulittuutaani ima allassimavoq: „Illuliorumaarput nammineq inigisassaminnik viinnequtinillu ikkussuillutik inerititai nerisassaminnik. Illuliussanngillat allamiut inissaannik ikkussuissanatillu takornartat nerisassaannik.“ — Jesaja 65:21, 22.

Inuit naalliuuteqartarsimaqaat aammik kuisinerit inuit ataasiakkaat isumaqatigiinnginneri sorsunnerilluunniit pissutigalugit. Taamaattuarsimavoq Abel toqutaammalli ullutsinni sorsunnerit tikillugit. Eqqarsaatigiuk qanoq sivisutigisumik inuit asuliinnaagunartoq, neriullutillu ilimasussimasut eqqissineq pilersinneqarumaartoq. Paratiisimi pilerseqqinneqarsimasumi inuit tamarmik eqqissinermik nuannarisaqartuullutillu qanilaartuussapput; ’pilluangaarlutik inuuneq’ nuannaarutigissavaat. — Tussiaat 37:11.

Jesaja 11:9-mi allassimavoq: ’[Jehova]-mik ilisarsinerup nuna tamakkerumaarpaa soorlu ermit matoqqagaat immap naqqa.’ Naammalluinnanngitsuunerup kingornutatta oqaatsit taakkua annertussusiata tamakkiisumik paasinissaa ajornakusoortippaa. Ilimanarpoq suli ilinniagassarigivut, Guutimik ilisimasaqarnerup tamatuma qanoq tamakkissaneraatigut peqatigilersillugulu, taamalu nuannaarneq naammalluinnartoq pilersillugu. Kisianni Biibilip ilinniartimmatigut Jehova Guuti pissaanermigut, ilisimassutsimigut, naapertuilluarnermigut asanninnermigullu naleqanngitsuusoq, qularissanngilarput ’nunassami nutaami’ innuttaasut tamarmik qinnutaat tamaviisa tusarumaarai.

’Inuuneq piviusoq’ qularnaatsuuvoq — tiguniaruk!

Silarsuarmi ajunnginnerusumi inuuneq naassaanngitsoq amerlasuunut sinnattuinnaavoq takorluugaannaalluniluunniit. Kisianni Biibilip neriorsuutaanik ilumoorlutik upperinnittunut neriuut tamanna qularnanngivippoq. Inuuneranni kisatut ippoq. (Eprîarit 6:19) Soorlu kisap umiarsuaq uninngatittaraa sumulluunniit anaarlussaannissaa pinngitsoortillugu, inuunermik naassaanngitsumik neriuutip inuit isummamikkut aalajaatsunngorittarpaa tatiginnittunngortillugillu inuunermilu ajornartorsiutit annertuut pakkernissaannut pisinnaalersillugit allaallu anigortissinnaanngorlugit.

Qularinngissinnaavarput Guutip neriorsuutini eqquutitikkumaarai. Allaammi piviusunngornissaannut qularnaveeqqusiisimavoq, uppernarsaalluni neriorsuillunilu utertitassaanngitsumik. Apustili Paulus allappoq: ’Taamaattumik Guutip unnersuutigisanik kingornussisussat siunnersuummi allanngujuissusianik nalunaarfigilluinnarumagamigit uppernarsaat aappiuppaa, allanngujuitsut marluk Guutip sallutigisinnaanngisai aalajaatsumik tuppalliutigissagatsigik, uagut qimaaffissarsisugut neriugisaq saqqangiussaq aalajangiullugu.’ (Eprîarit 6:17, 18) Taakku ’allanngujuitsut marluk’ Guutip allanngortissinnaanngisai tassaapput neriorsuutai uppernarsaaneralu, ilimagisatsinnut tunngavigisavut.

Guutip neriorsuutaanut upperneq tuppallersaataangaarpoq anersaakkullu nakussatsitsilluni. Josva, Israelimiunut aqutsisuusut ilaat, taamaattumik uppissuseqarpoq. Josvap Israelikkut qimalerlugit oqalugiarfigigamigit, utoqqaavoq nalunagulu toqungajalerluni. Taamaakkaluartoq nakuussusermik ilumoornermillu unioqqutitassaanngitsumik pigisaqarpoq, Guutip neriorsuutaanik tatiginninneranik aallaaveqartumik. „Kikkulluunniit atorumaagaat“, toqu inuit tamarmik ornitaat, atortussanngorlugu oqareerluni, Josva nalunaarpoq: „Tamassi uummatissigut tarnissigullu ilisimavarsi ajunngitsut [Jehovap] Guutissi ilissinnut neriorsuutigisaasa tamarmik ilaat ataasiinnannguarluunniit qammuinnarsimanngitsoq. Tamarmik piviusunngorsimapput Guutip neriorsuutigisimasaasa ilaat ataasiinnarluunniit eqquutinngitsoorsimanngilaq.“ Aap, pingasoriarluni Josvap uterpaa Guutip neriorsuutini tamaasa eqquutitittarai. — Josva 23:14.

Guutip silarsuassamik nutaamik neriorsuutaa qanittukkut atuutilerumaartoq taamatut upperisinnaavarput. Qasusuilluta Biibilimik atuartarnitsigut Jehova kinaanersoq aamma sooq tamakkiisumik tatigisariaqarneripput paasilissavarput. (sarĸúmersitat 4:11) Abraham, Sara, Isak, Jakob allallu qanga uppernermikkut aalajaatsuussimapput Guutimik ilumoortumik Jehovamik ilisimasaqarluaramik. Neriunnertik nakussatsissutigaat, naak inuutillutik ’unnersuutigisat angumerinagit’. ’Ungasissumilli takullugit ilassivaat.’ — Eprîarit 11:13.

 Biibilip siulittuutai paasigaanni, ersarippoq ’Guutip ajugaqanngitsup ullussarsuani’, ajussutsip tamarmi nunarsuarmit piiarneqarnissaa qanillisoq. (sarĸúmersitat 16:14, 16) Angutit ilumoortut qanga inuusimasut assigalugit tatiginnilluta siunissamut neriugisarput pigiuartariaqarparput, uppernermit Guutimullu ’inuunermullu piviusumut’ asanninnitsigut kajumissisinneqarluta. Silarsuaq nutaaq taama qanitsigimmat Jehovamut upperlutillu asannittunut kajumissaarutaavoq sakkortooq. Upperneq asanninnerlu taamaattut paarilluartariaqarput ullussarsua qaneqisoq nalliuppat Guutimit akuerineqarnissaq illersugaanissarlu anguneqassappata. — Sefanja 2:3; 2 Tásalûníkamiut 1:3; Eprîarit 10:37-39.

Inuuneq nuannaraajuk? Aamma sakkortuumik kissaatigaajuk ’inuuneq piviusoq’ angussallugu — Guutimit akuerisaalluni kiffaatut inuuneq, pilluarnermik siunissaqarluni, aap, inuuneq naassaanngitsoq siunissaralugu? Tamanna anguniagarigukku taava malugiuk apustili Paulusip kajumissaarutaa allakkami ’pisuussutit allanngujaqisut isumalluutigeqqunagit Guutili isumalluarfigeqqullugu’ aamma Guutip ataqqinaatissaanut ’ajunngitsulianik pisuunngoqqulluta’. Taamaaliorutta, ’inuuneq piviusoq tigusinnaassavarput’. — 1 Timûtiuse 6:17-19.

Jehovap nalunaajaasuinit Biibilimik atuaqatigineqarnissamik neqeroorut akuerigukku ilisarsineq ’inuunermut naassaanngitsumut’ sammisoq pigilersinnaavat. (Juánase 17:3) Biibilip Ataatatta asannittumik qaaqqussutaa tamanna tamanut nalunaarpaa: „Ernera, ajoqersuutikka puigorniaqinagit inassutikkalu uummatinni pigiliullugit! Taakkuami ullunik ukiunillu amerlasuunik inuuffissaqartissavaatsit annerusumillu pilluaateqalersillutit.“ — Ussatit 3:1, 2. (wE 15/8 99)

[Quppernerup ataani ilanngussaq]