Inuuninni Iluatsitsigit!
Inuuninni Iluatsitsigit!
„Pilluarpoq guutiitsut siunnersuutaat malillugit ingerlanngitsoq, . . . Qanoq iliornermini tamani iluatsitsisaraaq.“ — TUSSIAAT 1:1, 3.
1. (a) Inuusuttut silamiut amerlasuut inuunermi iluatsitsineq qanoq isigaat? (b) Inuk pilluartoq Biibilimi qanoq allaatigineqarpa?
INUUNERMI iluatsitsineq — qanoq paasisariaqarpa? „Niuernermut tunngasutigut iluatsitsinissara pingaarnerpaamik anguniagaraara,“ angut inuusuttoq oqarpoq. Arnaq inuusuttoq oqarpoq: „Ilaqutariittut pilluarnissaq kissaatigilluinnarpara.“ Arnaq inuusuttoq alla oqarpoq: „Neriuutigisakka tassaapput illu nuannersoq, biili pitsak . . . namminissarsiorunarpunga.“ Kisianni aningaasat, ilaqutariit suliffilluunniit akissaatigissoq inuunermik iluatsilluarnissaanut qulakkeerisinnaanngillat. Tussiaat 1:1-3-mi allassimavoq: „Pilluarpoq guutiitsut siunnersuutaat malillugit ingerlanngitsoq . . . kisianni [Jehovap] inatsisaanik nuannarisaqartoq . . . Qanoq iliornermini tamani iluatsitsisaraaq.“
2. Pilluarneq piviusoq sumi nanineqarsinnaava, aatsaallu qanoq ililluni anguneqarsinnaava?
2 Biibilimi allassimaffimmi tamatumani neriorsuutigineqarpoq inuup kialuunniit neqeroorutigisinnaanngikkaa — iliuutsit tamarmik iluatsikkumaartut! Kisianni aningaasatigut iluanaarutissaq pineqanngilaq. Biibilimi mianersoqqusilluni allassimavoq: ’Aningaasanik piumatuunermit ajortut tamalaat naasarmata.’ (1 Timûtiuse 6:10) Pilluarneq piviusoq Guutip iluarisaanik iliornikkut — inatsisinillu maleruaanikkut — anguneqartarpoq. Aatsaat taamaalioruni inuunermi iluatsitsisinnaavoq pillualersinnaallunilu. Immaqa Jehovap inatsisaasa maleruartariaqarnissaat qanorlu iliornermik peqquneqarnissaq ilaasa iluarissanngilaat. Jesusili oqarsimavoq: „Pilluarput anersaakkut pisariaqartitaqarnerminnik miserratiginninngitsut.“ (Matîuse 5:3, NV) Nalunngikkaluarlugu nalugaluarluguluunniit anersaakkut pisariaqartitaqartutut pinngortitaavugut, ilaatigut Guutip ilisarinissaanik siunertaanillu paasisaqarnissamik pisariaqartitaqarluta. Taamaattumik pilluarneq piviusoq angusinnaavarput aatsaat pisariaqartitat tamakku matussutissikkutsigik Jehovallu inatsisai maleruarutsigik.
Sooq Guutip inatsisai pisariaqartikkivut
3. Sooq Jehovap ’ingerlavissatsinnik aalajangigassaqarnissaa’ nuannaarluta akuerisinnaavarput?
3 Pruffiiti Jeremias allassimavoq: „[Jehova], nalunngilara inuup ingerlavissani nammineq aalajangigassarinngikkaa angutillu aalajangigassarinngikkai qanoq ingerlanissani alloriartarnissanilu. (Jeremia 10:23) Inuit tamarmik, inuusuttut utoqqaallu, taamaapput. Qanoq ingerlavissatta aalajangernissaanut ilisimassuseqarnata, misilittagaqarnatalu ilisimasaqanngilagut; taamaaliornissamummi pisussaaffeqanngilagut. sarĸúmersitat 4:11-mi allassimavoq: ’Jehova, Guuterput, ilinnut pigititassaapput naalannaat ataqqinaallu pissaanerlu, illit suut tamaasa pinngortikkakkit, illillu peqqusakkut ipput pinngortitaallutillu.’ Pinngortitsisuugami „inuunerup puilaffia“ Jehovamiippoq. (Tussiaat 36:10) Taamaattumik qanoq inuusariaqarnitsinnik allanit tamanit ilisimasaqarneruvoq. Inatsisiminik tunisimavaatigut, nuannaarnermik piiaaffigiumanata, kisianni suna iluaqutigissagipput nalunnginnamiuk. (Jesaja 48:17) Guutip inatsisai sumiginnarutsigik inuunermi iluatsitsinavianngilagut.
4. Sooq inuusuttorpassuit inuunertik aserortarpaat?
4 Assersuutigalugu, eqqarsaatigisimaviuk sooq inuusuttorpassuit inuunertik aserortaraat ikiaroortarlutik, arlalippassuarnik atoqateqartarlutik tamakkununngalu assingusumik iliortarlutik? Tussiaat 36:2, 3-mi allassimavoq: „Ajortuliassap Guutiitsoq qamuuna oqaluffigaa. Taanna Guutimik mianerinninnermik atorfissaqartitsinngilaq. Taamaattumik ajortuliassap pitsaaniarfigalugu nakutinniartarpaa unioqqutitsisinniarlugu uumissuileqqullugulu.“ Inuusuttorpassuit ’Guutimik mianerinninneq’ peqqinnartoq amigaatigaat, taamaattumillu imminnut sianiinaartarput isumaqarlutik iliuusertik kingunerlussanngitsoq. Paasiumaarpaalli najoqqutassiap allanngortinneqartussaanngitsup matuma ilumoornera: ’Inuk siaruartikkani naapertorlugit katersuiumaarpoq. Uinimminummi siaruarterisoq uinimmit aserujassummik katersuiumaarpoq. Anersaamulli siaruarterisoq anersaamit inuunermik naassaanngitsumik katersuiumaarpoq.’ — Galâsiamiut 6:7, 8.
’Ulluvut kisittarsigik’
5, 6. (a) Sooq inuusuttut ’ullutik kisittariaqarpaat’, tamannalu qanoq paasisariaqarpa? (b) ’Pinngortitsisup eqqarsaatiginissaa’ imaluunniit eqqaamanissaa sumik nassataqarpa?
5 Qanoq ililluta inuunermi iluatsitsisinnaavugut ’inuunermillu naassaanngitsumik katersiuiumaarluta’? Moses ima allassimavoq: „Ukiummi inuuffigisassavut tassa ukiut 70-it, imaluunniit 80-it, nukissaqassagutta, ukiutta ajunnginnersaat allaat sulipiloornermik ulikkaarput. Ukiummi ingerlalertoqaat, timmisugut soorlu.“ (Tussiaat 90:10) Inuusuttuulluni immaqa toqu eqqarsaatiginarpallaarneq ajorpoq, inuusuttorpassuillu toqujuitsuusoralutillusooq iliuuseqartarput. Mosesilli inuunerup alianartumik sivikissusianik eqqaasippaatigut. 70-inik 80-inilluunniit ukioqalernissamut inuuneq qulakkeerneqarsinnaanngilarluunniit. ’Periarfissatigut nalaatsornertigullu pisaratta’ allaat inuusuttut peqqikkaluartut inuuneq annaasinnaavaat. (Nalunaajaasup oqaasii 9:11) Inuunerit naleqangaartoq qanoq atussaviuk? Moses Guuti qinnuigalugu oqarpoq: „Ilinniartitsigut ulluvut kisittaqqullugit uummatitsigut ilisimalersilluta.“ — Tussiaat 90:12.
6 Ullut kisittarnissaat qanoq paasisariaqarpa? Ima paasisariaqanngilaq qanoq sivisutigisumik inuunissi isumakuluutigivallaassagaa. Mosesip Jehova qinnuigaa kiffai ilinniarteqqullugit qanoq ilillutik ullut suli inuuffigisinnaasassaasa ataqqinaatissaanut atornissaannik. Illit ullutit kisittarpigit ullut tamaasa tunissutitut erlinnartutut Guutip unnersiutiginissaanut atorneqartussatut isigalugit? Biibilimi inuusuttut ima kajumissaarneqarput: „Ugguutissaasinnaasumik eqqarsaateqarnaveersaarniarit ajunaarnartullu ilinnut nalliunnaveersimatillugit, inuusuttuunerup ullui naajammata suiallannerinnartut illutik. Pinngortitsisit eqqarsaatiginiaruk inuusuttuunerpit ulluini.“ (Nalunaajaasup oqaasii 11:10–12:1) Pinngortitsiserput eqqarsaatigissagutsigu piunerata eqqaamasarnera naammanngilaq. Pinerluttuliortup Jesus ima qinnuigigamiuk: ’Naalagaallutit tikiukkuit eqqaaginga’, isumaqaannanngilaq atini Jesusip eqqaassagaa. Kissaatigaa Jesus iliuuseqassasoq, tassa makitissaginni. (Lúkarse 23:42; naleqqiukkit Mosesimik allakkat siulliit 40:14, 23; Job 14:13.) Jehova eqqaassagutsigu iliuuseqartariaqarpugut, iluarisaanik iliortariaqarluta. Uagut Jehovamik eqqaamannittutut oqaatigineqarsinnaanerpugut?
Unioqqutitsisut usoreqinagit
7. Suna pillugu inuusuttut ilaasa Pinngortitsisoq eqqaamajunnaarsimavaat? Tamatumunnga assersuummik taasaqarit.
7 Inuusuttorpassuit Jehova puigortarpaat isumaqaramik Jehovamut nalunaajaasuussagaanni killiliinerit amerlavallaartut. Qatanngutip angutip Spaniamiup oqaluttuaraa inuusuttuulluni qanoq misiginerluni: „Silarsuaq pilerigaara sallusuissut artornarlunilu sukannerpallaarsorigakku. Tassami issiallunga atuaqqissaartariaqarpunga qilerniusalersortariaqarlungalu ataatsimiigiartarlungalu, tamanna nuannarinngilara.“ Ilaannikkut isumaqartarpit Guuti kiffartorfigigakku arajutsisaqarlutit? Immaqa tupigusuutigissavat paasigukku Biibilimik allattut ilaat aamma taama misigisimammat. Biibilimi Tussiaat 73 qupperiaruk.
8. Sooq Asafip ’anneruniartut’ usorilerpai?
8 Tussiaat manna misissoriartigu. Versi 2-mi 3-milu allassimavoq: „Isikka quaaqqajaasimapput. Narrutsaatigisaraakka [usoraakka, NV] anneruniartut, takugaangakkit guutiitsut atugarissaarlutik inuusut.“ Tussiaatip qulequtaata takutippaa Asafimit allanneqartoq. Taanna Levikkuuvoq nipilersortartuullunilu, kunngi Davidip nalaani inuulluni. (1 Israelikkut 25:1, 2; 2 Israelikkut 29:30) Naak immikkut pisinnaatitaaffeqaraluarluni Guutip naalaffiutaani kiffartorsinnaagami, iluaatsuliornerminnik pingaakujuttut usorilerpai. Atugarissaarpaseqaat; eqqissillutik toqqissisimallutillu inoorpasipput. Aap, iluatsitsinermit ’uummataat qartoraqqajaapput’. (Versi 5 amma 7) Qunutitsiumanerminnik anneruniarlutik oqalupput. (Versi 8) „Qanerminnik Qilammiu assortorpaat, oqaallu nunarsuarmi tamanut aallaqattaarpoq,“ — aap, qilammi nunarsuarmiluunniit ataqqisaqanngivipput. — Versi 9.
9. Inuusuttut ilaat qanoq ilillutik Asafitut isiginnittaaseqalersinnaappat?
9 Immaqa atuaqatitit aamma taamaapput. Ittuujuillutik kinguaassiuutitigut kanngunartuliornertik, festernertik imerujoortarnertik ikiaroortarnertillu usorsitsaatigisarpaat. Inuunerat ’nuannaarniutinik’ ulikkaartoq ilinnut kristumiutut aqqutigeqqusamut ameqisumut naleqqiukkukku, immaqa ilaannikkut pingaakujuttut usorilersinnaavatit. (Matîuse 7:13, 14) Asaf allaat ima oqarpoq: „Uummatiga minguitsuutinniarsimavara asuliinnaasumik, pinngitsuutinniarlungalu assakka asattarsimallugit, taamaattoq naalliutsitaajuarpunga, pillarneqartarlunga ullaat tamarluinnaasa.“ (Versi 13 aamma 14) Guutimik kiffartornerata assuarnaatsumillu inuunerata imminnut akilersinnaanerat qularilerpaa.
10, 11. (a) Suup Asaf allamik isumaqalersippaa? (b) Unioqqutitsisut qanoq ilillutik quasartumiippat’? Assersuummik taasaqarit.
10 Qujanartumilli Asaf isumatsassimajuaannanngilaq. Erniinnaq paasivaa guutiitsut eqqissinerat piviusuunanilu sivikitsuinnaasoq. Ima oqarpoq: „Aqqutinut quasartunut pisissavatit, ajunaarnermut ajattussavatit. Taama nungutitaagasuartigissapput! Tassanngaannaqisumik piiagaassapput annilaarnersuarmillu naggatissaqarlutik.“ (Versi 18 aamma 19) Ilutigisavit ilarpassuisa aamma ’quasartumiipput’. Siusinnerusukkut kingusinnerusukkulluunniit guutiitsuliornermik kingunerinik eqqorneqassapput, immaqa kissaatigineqanngitsumik naartulernermik imaluunniit nappaatipilummik. Ilaat parnaarussaatinneqassapput imaluunniit allaat inuunertik annaassavaat. Ajornerpaatulli Guutimit ungasissumiipput. — Jâko 4:4.
11 Oqaluussisartup inuusuttup Spaniamiup tamanna uppernarsarsinnaavaa. Inuusuttuulluni arnaq taanna marloqiusamik inooriaaseqarpoq inuusuttorpaaluit uppinngitsut ilagisarlugit. Erniinnaq ilaat — ikiaroortartuusoq — asannilersoorfigaa. Nammineq ikiaroortalersimanngikkaluarluni ikinngutini ikiaroornartunik pitsittarpaa. „Allaat kapoorlugu ikiortarpara,“ nassuerpoq. Qujanartumik qatanngut arnaq silattoqqippoq anersaakkullu peqqissiartorluni. Tupassutigeqaali tusaramiuk peeraraluami aids toqussutigimmagu. Aap, guutiitsut ’quarsartumiipput’, soorlu tussiaasiortoq allassimasoq. Ilaat inooriaasertik pissutigalugu tassangaannartumik toqusarput. Allat tamarmik — inooriaasertik allanngortinngikkunikku — qanittukkut misigiumaarpaat ’Naalagaq Jesus qilammit saqqummilersoq pissaanermi inngilii ilagalugit, innermi ikualasorsuarmi Guutimik ilisimasaqanngitsunut Naalakkattalu Jesusip iivangkiiliuanut naalakkumanngitsunut akiniutissaq aggiullugu’. — 2 Tásalûníkamiut 1:7, 8.
12. Qatanngutip inuusuttup Japanimiup qanoq paasilersimavaa Guutip inatsisaanik unioqqutitsisut usorissallugit silatusaarnerunngitsoq?
12 Taamaattumik pissutissaqanngivippoq ’Guutimik ilisimasaqanngitsut’ usorissallugit. Jehovamik ilisimasallit inuunermillu naassaanngitsumik neriugisallit usorineqartariaqarput. Qatanngutip angutip inuusuttup Japanimiup tamanna paasilersimavaa. Inuusuttuulluni ’kiffaanngissuseqarnerorusuppoq’. Ima nassuiaavoq: „Isumaqarpunga arajutsisaqarlunga. Taavali paasilerpara sallusuissut piginagu qanoq inuuneqassanersunga. Takorloorsinnaavara ukiuni 70-ini 80-iniluunniit inuussasunga taavalu toqussallunga. Jehovali inuunermik naassaanngitsumik neriugisaqartitsivoq! Tamatuma neriuutinnik pingaartitsitippaanga.“ Taamaattorli inunnit Guutip inatsisaanik maleruaanngitsunik avatangerneqaraanni ilumoorneq piuminartuunngilaq. Qanoq ililluni tatineqarneq anigorneqarsinnaava?
Ilagisartakkatit mianersuutigikkit!
13, 14. Sooq ilagisartakkat mianersuutiginissaat pingaaruteqarpa?
13 Misissoqqeriartigu Tussiaat 1:1-3 naapertorlugu inuup pilluartup ilisarnaatigisaa sunaanersoq: „Pilluarpoq guutiitsut siunnersuutaat malillugit ingerlanngitsoq, ajortuliortut ingerlavigisaanni uninngitsoq, mitaatilliisullu akornannut ingiffissinngitsoq, kisianni [Jehovap] inatsisaanik nuannarisaqartoq inatsisaalu eqqarsaatigalugit ullukkullu unnuakkullu. Taassuma assigaa orpik kuunnguup killingani ikkunneqarsimasoq inerititaqarfissamigut inerititaqartartoq toqujuitsunillu pilutaqarluni. Qanoq iliornermini tamani iluatsitsisaraaq.“
14 Pingaartumik malugissavarput kikkut ilagisarnerlugit pingaaruteqartorujussuusoq. Ussatit 13:20-mi allassimavoq: „Sianisuunik peqateqartoq ilisimassuseqalersarpoq, silaatsulli ikinngutaa ajortumeertussaasarpoq.“ Tamanna isumaqanngilaq Jehovamut nalunaajaasuunngitsut ilasseraanngitsumik, inussiarniitsumik soqqusaatsumillu iliorfigineqassasut. Biibilimi kajumissaarneqarpugut tullerput asaqqullugu ’inuillu tamaasa eqqissiveqatigeqqullugit’. (Matîuse 22:39; Rûmamiut 12:18) Biibililli najoqqatassiaanik maleruaanngitsut ilagivallaarutsigik taakkua ’siunnersuutaat mallillugit ingerlalersinnaavugut’.
Biibilimik atuartarnerup iluaqutissartai
15. Inuusuttut qanoq ilillutik Biibilimik atuarnissamut kajumissuseqarnerulersinnaappat?
15 Tussiaasiortup eqqaavaattaaq ’Jehovap inatsisaasa ullukkullu unnuakkullu eqqarsaatigineqarnerat’ imaluunniit atuartarnerat pilluarnermut attuumassuteqartoq. (Tussiaat 1:1, 2) Biibili atuaruminaassinnaagaluarpoq, ’paasinerlu ajornartunik ilaqarluni’. (2 Pîtruse 3:16) Biibilimili atuarneq artornartariaqarnanilu qasunartariaqanngilaq. Guutip oqaasianit ’immup piviusup kajungerinissaa’ sungiusarneqarsinnaavoq. (1 Pîtruse 2:2) Ullut tamaasa Biibili atualaartaruk. Paasisinnaanngisaqaruit misissoruk. Kingornalu atuarsimasatit eqqarsaatigikkit. (Tussiaat 77:12, 13) Aallussisinnaanngikkuit nipituumik atuarniarit. Piffissap ingerlanerani Biibilimik atuartarneq nuannaarutiginerujartussavat. Qatanngut arnaq inuusuttoq Brasiliamiu oqaluttuarpoq: „Jehova ungasissutut isigiuarsimavara. Qaammatialuilli nammineq atuaqqissaartariarama Biibilimillu atuartarneq sammineroriarakku misigivunga Jehovamut qanittumik attaveqalerlunga. Uannut piviusunngorsimavoq.“
16. Qanoq ilillutik ilagiit ataatsimiinneri pissarsiffigineqarnerusinnaappat?
16 Anersaakkut siumukassagutta ilagiit ataatsimiinneri najuuffigisariaqarpavut. ’Sianigigutta qanoq ililluta tusartugut’ ataatsimiinnerit kajumissinartorujussuusinnaapput. (Lúkarse 8:18) Ilaannikkut misigisarpit ataatsimiinnerit qasunartut? Taava imminut apereriarit: ’Uanga ataatsimiinnerit pissanganartinnissaannut qanoq iliortarpunga? Tusarnaartarpunga? Piareersartarpunga? Akisarpunga?’ Biibilimimi allassimavoq ’misissoqatigiissalluta asanninnermut ajunngitsuliornermullu kajumissaaqatigeeqqulluta’. (Eprîarit 10:24, 25) Taamaaliorsinnaavugut aatsaat peqataagutta. Taamaaliussagattalu soorunami piareersaasariaqarpugut. Qatanngut arnaq inuusuttoq oqarpoq: „Ataatsimiinnernut akeqataaneq piuminarneroqaaq piareersarsimagaanni.“
Guutip aqqutigeqqusaa ingerlavigalugu inuunermi iluatsitsisinnaavugut
17. Eqiasuilluni Biibilimik atuartoq qanoq ililluni ’orpimmut kuunnguup killingani ikkunneqarsimasumut’ assersuunneqarsinnaava?
17 Tussiaasiortup inuunermi iliornermi tamani iluatsitsisartoq ’orpimmut kuunnguup killingani ikkunneqarsimasumut’ assersuuppaa. Kuunnguit tamakku tassaasimasinnaapput orpeqalersitani ikerasaliannguit orpiit imermik pilersuinissaannut. (Jesaja 44:4) Ullut tamaasa Biibilimi atuartarutta killeqanngitsumik tangeqarsinnaallutalu pissatsissuteqarsinnaavugullusooq. (Jeremia 17:8) Ullut tamaasa pisariaqartitatsinnik pissatsinneqartarpugut, misilinneqarnikkut ajornartoornikkullu nikallujuissinnaanissatsinnut. Jehovap eqqarsaatai ilikkarsimagutsigik silatuumik aalajangersinnaanissamut ilisimassuseqassaagut.
18. Inuusuttut qanoq ilillutik Jehovamik kiffartortutut inuunermi iluatsitsisinnaappat?
18 Ilaannikkut Jehovamik kiffartorneq artornarsinnaavoq. Artornarpallaartutulli isiginaveertigu. (5 Moses 30:11) Biibilip neriorsuutigaa iliornitsinni tamani naggataatigut iluatsitsissasugut, Jehovap iluarisaanik uummataatalu nuannarisaanik iliornissarput pingaartumik anguniagarigutsigu. (Ussatit 27:11) Eqqaamajuttaaq kisimiinnginnavit. Jehovap Jesus Kristusillu ilagissavaatsit. (Matîuse 28:20; Eprîarit 13:5) Nalunngilaat inuusuttut qanoq tatineqartartut, pakatsisinngisaannassavaatsillu. (Tussiaat 55:23) Aamma ’qatanngutigiit’ angajoqqaatillu, Guutimik mianerinnittuusut, annertoqqusersinnaavaatsit. (1 Pîtruse 2:17) Taamaalillutik ikiorneqarlutillu tapersersorneqaruit aalajangerluinnaruillu Guutimik kiffartornissamut iliuuseqarniarlutit, maannakkuinnaanngitsoq naassaanngilluinnartumilli inuunermi iluatsitsissaatit. (wE 1/9 99)
Uteqqiinissamut apeqqutissat
□ Pilluarneq piviusoq sunaava?
□ Sooq Jehovap ingerlavissatsinnik aalajangigassaqarnissaa pisariaqartipparput?
□ Inuusuttut qanoq ilillutik ’ullutik kisittarsinnaavaat’?
□ Sooq pissutissaqanngila Guutip inatsisaanik unioqqutitsisut usorissallugit?
□ Inuusuttut qanoq ullut tamaasa Biibilimik atuartarnermikkut aalajangersimasumillu ataatsimiinnernut peqataasarnermikkut inuunerminni iluatsitsisinnaappat?
[Atuaqqissaarnermi apeqqutit]
[Qupp. 20-mi assiliartaq]
Inuusuttorpassuit ajunaarutaasumik iliuuseqartarput ’Guutimik mianerinninneq’ amigaatigigamikku
[Qupp. 22-mi assiliartaq]
Inuusuttut akulikitsumik puigortarpaat iliuusertik kingunerlussinnaasoq
[Qupp. 23-mi assiliartaq]
Biibilimik atuartarnissamut kajumissuseq ineriartortiguk
[Qupp. 23-mi assiliartaq]
Ataatsimiinnerit peqataaffigigaanni pissarsiffiginarnerupput