Inuusuttut — Anersaaq silamiorpaluttoq assortorsiuk

’Anersaaq silamiusoq pisaarinngilarput, kisianni anersaaq Guutimit pisoq.’ — 1 KORINTUMIUT 2:12.

1, 2. (a) Inuusuttut silamiuusut inuusuttullu Jehovap Nalunaajaasuisa ilagiivinniittut sunik assigiinngissuteqarpat? (b) Nalunaajaasut inuusuttut amerlanersaat sooq nersortariaqarpat?

„INUUSUTTORTAVUT nikallungasimallutik ajattorneqartarlutillu pikitsitsisarput,“ Australiamiut aviisianni The Sun-Herald-imi allassimavoq. Nangilluni eqqaaneqarpoq „eqqartuussiviit allattugaasa takutikkaat [ukiup siulianut naleqqiullugu] inuusuttut sualuttumik pinerluuteqarlutik unnerluutigineqartut 22 procentinik amerlisimasut. . . . Ukiunut 60-kkut qiteqqunnerannut naleqqiullugit inuusuttut imminortartut pingasoriaammik amerlisimapput . . . Kinguaariinnilu avissaarsimaneq tassaalersimavoq qunnersuaq inuusuttut amerliartuinnartut nakkarfissaat, ikiarornartut, imigassat imminillu aseruineq atorlugit piviusunit qimaanikkut.“ Nunami ataasiinnarmi pissutsit taamaanngillat. Nunarsuaq tamakkerlugu angajoqqaat, ilinniartitsisut eqqarsartaatsikkullu peqqissutsimik sulisartut inuusuttut qanoq innerat isumakuluutigeqaat.

² Jehovallu Nalunaajaasuisa ilagiivinni inuusuttut anersaakkut ittumik peqqissut silarsuup matuma inuusuttortaanit allaanerujussuupput! Naammalluinartuunngikkaluarput. ’Inuusuttut kajungerisaat qimarratiginiarlugit’ ilungersuussisariaqarputtaaq. (2 Timûtiuse 2:22) Ataatsimulli isigalugit inuusuttut taakkua qunusuillutik eqqortuusoq aalajangiuttarpaat silarsuup tatineranut nakkaannarnatik. Ilissi inuusuttusi Satanip ’qoqassiniarnerinut’ ajugaaniartusi nersortariaqarpusi. (Evfisumiut 6:11) Apustili Johannesitut oqarfigerusuppassi: ’Allaffigereerpassi ilissi, inuusuttusi ukorsii, nakuugassi Guutillu oqaasia ilissinniittuarmat, ajortorlu artorsartikkassiuk.’ — 1 Juánase 2:14.

3. Oqaaseq ’anersaaq’ qanoq isumaqarsinnaava?

³ Taamaattorli ajortoq ajugaaffigiuassagussiuk Biibilimi ’anersaamik silamiuusumik’ taaneqartoq assortortuartariaqarparsi. (1 Korintumiut 2:12) Griikerit oqaasiinik qinerlerfissiaq naapertorlugu oqaaseq ’anersaaq’ isumaqarsinnaavoq ’inuup tarnaanut sunniisoq aqutsisorlu’. Assersuutigalugu inuk kamajasuuppat oqarsinnaavugut taanna ajortumik ’anersaaqartoq’. ’Anersaaq’ illit pigisat imaluunniit isummat qinersinissannut aalajangiisuuvoq; iliuutsit oqalunnerillu aquttarpai. Soqutiginartumik inuit ataasiakkaarlutik aammalu eqimattatut isigineqarlutik aalajangersimasumik ’anersaaqarsinnaapput’. Apustili Paulusip kristumiut eqimattat ima allaffigai: ’Naalakkatta Jesusip Kristusip saammaannerata anersaarsi najorliuk.’ (Fîlimût 25) Silarsuaq manna qanoq ittumik ’anersaaqarpa’? ’Silarsuaq tamaat ajortup [Satan Diaavulup] pissaaneqarfigigamiuk’ silarsuup anersaava peqqinnartuusinnanngilaq, ilaa? — 1 Juánase 5:19, NV.

Silarsuup anersaavata ilisarinissaa

4, 5. (a) Efesusimi ilagiinniittut kristumiunngunngikkallaramik anersaamit qanoq ittumit sunnerneqartarsimappat? (b) ’Silaannarmut naalagaasoq’ kinaava, ’silaannarlu’ sunaava?

⁴ Paulus ima allassimavoq: ’Ilissi pinerlunnissinni ajortissinnilu toqungagaluarassi siornagut saqiffigisassinni silarsuup matuma pissuserisaa missiliorlugu silaannarmut anersaamullu naalasseriinnerup qitornaani maanna sunniisumut naalagaasoq malillugu, taakku ilagalugit uaguttaaq tamatta siornagut angalasartugut uinitta pilerissusii malillugit uinngullu eqqarsaatittalu piumasaat naammassisarlugu, pissuseqarpugullu kamannermut qitornaalluta arlavut ilagalugit; Guutilli . . . uummartippaatigut.’ — Evfisumiut 2:1-5.

⁵ Kristumiut Efesusimiittut sallusuissut ilikkarsimanngikkallaramikku sianiginngisaminnik ’silaannarmut naalagaasoq’, Satan Diaavulu malissimavaat. ’Silaannaq’ tassaanngilaq Satanip inngilipiluisalu najugaqarfiat. Paulus taama allammat Satan Diaavulu inngilipiluilu suli qilammiissinnaatitaapput. (Naleqqiuguk Job 1:6; sarĸúmersitat 12:7-12.) Oqaaseq ’silaannaq’ isumaqarpoq anersaaq imaluunniit eqqarsartaaseq Satanip silarsuaata ilisarnaatigisaa. (Naleqqiuguk sarĸúmersitat 16:17-21.) ’Silaannaq’ assigalugu anersaaq tamanna sumi tamaaniippoq.

6. ’Silaannaq sunniisoq’ sunaava, qanorlu ililluni inuusuttorpassuarnut sunniuteqartarpa?

⁶ ’Silaannarli sunniisoq’ qanoq paasisariaqarpa? Tassani pineqarunarpoq ’silaannaap’ tamatuma inunnut sunniuteqangaarnera. Paulus oqarpoq anersaaq tamanna ’naalasseriinnerup qitornaani sunniisoq’. Silarsuup matuma anersaava naalasseriinnermik pikitsitsinermillu kinguneqartarpoq, sunniinerlu tamanna ilaatigut ilagisartakkanit tatineqarnikkut malugineqarsinnaavoq. Niviarsiaraq nalunaajaasoq oqarpoq: „Atuarfimmiikkaangavit allat tamarmik tamatigut pikitsitsinialaarnissannut kajumissaartarpaatsit. Unioqqutitsilaaruit meeqqat allat ataqqinerulissavaatsit.“

Silarsuup anersaava qanoq ersersinneqartoq

7-9. (a) Ullumikkut silarsuup anersaava inuusuttut iliuusaasigut ersertartunik taasaqarit. (b) Najukkassinni tamakku malugisarpigit?

⁷ Ullumikkut inuusuttut akornanni silarsuup matuma anersaava qanoq ersersinneqartarpa? Ilaatigut peqquserlunnikkut pikitsitsinikkullu. Atuagassiat ilaanni nalunaarutigineqarpoq ilinniarnertuunngorniartut 70 procentii oqarsimasut atuarfimmi peqqusersiorsimallutik. Oqaasipiluit, soqqusaatsumillu mitallersumillu oqalunnerit aamma nalinginnaapput. Ilaanni Job aamma apustili Paulus oqaaseqarsimapput ilaasa mitallerpalussorisinnaasaannik eqqortumik uumitsassimanertik ersersinniarlugu. (Job 12:2; 2 Korintumiut 12:13) Kisianni naakkittaatsumik mitallerneq inuusuttorpassuit atortagaat tassaanerusarpoq oqaatsikkut atornerluineq.

⁸ Ingasappallaartumik aliikkusersuusorniarneq aamma silarsuup anersaavanut ilaavoq. Imerniartarfiliarnerit, technofestit * sualuttumillu festernerit inuusuttorpassuit nuannaraat. Inuusuttut silarsuup anersaava pikitsitsiumatooq imminnut ilisarnaassiuttarpaat atisanik ’hip-hop’-iusunik atisalersornermikkut allanilluunniit nutaalianik eqqumiitsunik, soorlu ’piercing’-imik (timip pisataanik putoorinermik) atuinermikkut. (Naleqqiuguk Rûmamiut 6:16.) Nunap piinik pigisanik pingaartitsivallaarneq aamma silarsuup anersaavanut ilisarnaataavoq. Atuagassiaq ilinniartitsinermut tunngasoq naapertorlugu „ussassaarutiliortut tamatigorluinnaq meeqqat saassuttarpaat periaatsit assigiinngitsut atorlugit nioqqutissanik assigiinngitsorpassuarnik ussassaarutinik“. USA-mi inuusuttut high schoolimit soraarummeersimasut TV-kkut ussassaarutinik 360.000-inik isiginnaareersimasarput. Ilagisartakkavittaaq tatisinnaavaatsit pisinissannut. Niviarsiaraq 14-inik ukiulik oqarpoq: „Kikkut tamarmik tamatigut aperisarput: ’Tujuluit, jakkit, qarlitilluunniit sumik ilisarnaateqarpat?’“

⁹ Biibilip nalaaniilli Satanip peqqinnanngitsumik nipilersorneq atortarsimavaa minguttuumik ileqqulersuuteqarneq siuarsarniarlugu. (Naleqqiukkit 2 Moses 32:17-19; Tussiaat 69:13; Jesaja 23:16.) Taamaattumik tupinnanngilaq erinarsuutit tiinganilersaarutinik — ilaannikkullu kanngunartumik — imaluunniit oqaasipilunnik imallit nipilersornerlu nunujuitsumik pileritsannartumillu rytmelik nuannarineqartarmata. Silarsuup minguttuumik anersaavanut ersiut alla tassaavoq kinguaassiuutitigut kanngunartuliorneq. (1 Korintumiut 6:9-11) The New York Times-imi allassimavoq: „Inuusuttuaqqat akornanni atoqatigiinneq tassaalersimavoq akuerineqarnissamut aqqut . . . Ilinniarnertuunngorniarfinni ilinniartut annerit pingasuugaangata marluk kinguaassiuutitigut atoqateqareersimasarput.“ The Wall Street Journal-imi allaaserisami meeqqat arfineq-pingasut aqqaneq-marlullu akornanni ukiullit „kinguaassiuutitigut atoqateqartalernerusimanerannut“ uppernarsaatit eqqaaneqarput. Atuarfimmi siunnersuisoq soraarneq oqarpoq: „Maannakkut 6. klassemi atuartut naartulersimasut takussaaneruleqaat.“ *

Silarsuup anersaava ajattoruk

10. Ilaqutariinni kristumiuni inuusuttut ilaat qanoq silarsuup anersaavanut nakkarsimappat?

¹⁰ Ajoraluartumik kristumiut inuusuttut ilaat silarsuup anersaavanut nakkaassimapput. „Angajoqqaakka kristumioqatikkalu najuutsillugit pissuserisaartarpunga,“ niviarsiaraq Japanimiu oqarpoq. „Allamilli aamma inooriaaseqarsimavunga.“ Niviarsiaraq alla Kenyameersoq oqarpoq: „marloqiusamik inooriaaseqarnikuuvunga, festertarlunga, rockimik nipilersukkat tusarnaartarlugit ikinngutipiloqarlungalu. Nalunngikkaluarpara eqqunngitsuliorlunga, isiginngitsuusaaginnarsimavarali neriullunga nammineerlutik peerukkumaartut. Taamaanngilarli ajorneruliinnarlunilu.“ Niviarsiaraq Tysklandimeersoq oqarpoq: „Silamiunik ikinnguteqarnera aallarniutaavoq. Taava pujortartalerpunga. Angajoqqaakka annersinniarpakka, imminuinnarli annersippunga.“

11. Alapernaarsuisut qulit ajortumik nalunaaruteqarlutik utermata Kaleb qanoq ililluni allat maliinnarnissaat pinngitsoortissinnaavaa?

¹¹ Taamaattoq silarsuup anersaava assortorneqarsinnaallunilu ajattorneqarsinnaavoq. Kalebip maligassiaa eqqarsaatigiuk. Alapernaarsuisut qulit qunusut nuna neriorsuutigisaq pillugu ajortumik nalunaaruteqarmata, taassuma Josuallu qunutinneqarumanatik allat maliinnarumanngilaat. Qunusuillutik ima oqarput: „Nuna angallavigalugu misissugarput ajunngitsorujussuuvoq. [Jehovap] nunamut tassunga isertikkumaarpaatigut imminut saammaannartissimagutta, nunataariniartigumi nuna taanna immummik tungusunnitsuummillu kuuttoq.“ (4 Moses 14:7, 8) Sooq Kalebip tatineqaraluarluni nakkaannarsimanngila? Jehova Kaleb pillugu oqarpoq: „Kaleb kiffara allaasumik anersaaqarpoq.“ — 4 Moses 14:24.

’Allaasumik anersaaqarit’

12. Sooq oqaluttarneq eqqarsaatigalugu ’allaasumik anersaaqarneq’ pingaaruteqarluinnarpa?

¹² Ullumikkut ’allaasumik anersaaqassagaanni’, silarsuup inuinit allaanerusumik eqqarsartaaseqassalluni, qunusuillunilu nukittussuseqartariaqarpoq. Ilaatigut taamaaliorsinnaavutit mitallerluni ataqqinninngitsumillu oqalunnaveersaarlutit. Soqutiginartumik qallunaat oqaasiat ’sarkasme’ (mitallerpalunneq) naggueqarpoq griikerit oqaasiannik ’qimmitut neqaajaaneq’-mik isumalimmik. (Naleqqiuguk Galâsiamiut 5:15.) Soorlu qimmip kigutini atorlugit saarngit neqaajartarai, mittallerluni ’quiasaarniartup’ allat ataqqinaataajarsinnaavai. Kisianni Kulorsamiut 3:8-mi kajumissaarneqarpugut ’makku tamaasa iperaqqullugit: ajuallanneq, kamanneq, iluaatsuliorneq, mitallerneq, oqaatsit kanngunartut qanitsinnit aninnaveerlugit’. Ussatit 10:19-imi allassimavoq: „Oqaluppallaaraanni ajortulioqqajaanartaqaaq, silatuujuvoq oqqaminik naalakkiisartoq.“ (Ussatit 10:19) Allamit ajuallatsinneqaruit nunullutit ’ulussap illuattaaq maniuk’. Immaqa kingorna kisimiillusi eqqissillutit ajuallatsitsisoq oqaloqatigisinnaavat. — Matîuse 5:39; Ussatit 15:1.

13. Inuusuttut qanoq ilillutik pigisat oqimaaqatigiissumik isigisinnaavaat?

¹³ Aamma ’allaasumik anersaaqarsinnaavugut’ nunap piinik oqimaaqatigiissumik isiginnittaaseqarluta. Soorunami kusanartunik pigisaqarusunneq pissusissamisuuginnarpoq. Jesus Kristusip nammineq minnerpaamik ’ilulleq’ imaluunniit ’annoraaq’ pitsaasoq ataaseq pigisimavaa. (Juánase 19:23, 24) Pigisalli pingaartinneqarpallaaleraangata angajoqqaatillu akissaqarfigisinnaanngikkaluagaannik qinnuigiuaannarukkit imaluunniit inuusuttut allat ilaarniaannarukkit, imaassinnaavoq silarsuup anersaava ilinnut ilimaginngisannit sunniuteqarnerusoq. Biibilimi allassimavoq: ’Silarsuarmiittummi suut tamarmik, uinimmut pilerinartut isinullu pilerinartut usorsitsaarutillu inuunerup matuma pii, Ataatamit pinngillat, silarsuarmilli pipput.’ Aap, silarsuup anersaavanut nunap piinik pingaartitsivallaartitsisumut ajugaaffigineqaqinak! Pigisavit naammaginissaat ilikkarniaruk. — 1 Juánase 2:16; 1 Timûtiuse 6:8-10.

14. (a) Esajasip nalaani Guutip innuttai sukisaarsarneq pillugu oqimaaqatigiinngitsumik isumaqarpat? (b) Katerisimaarnerni silamiorpaluttuni inuusuttut kristumiut ilaasa suna misigisimavaat?

¹⁴ Sukisaarsarnerit aamma eqqortumik inissisimaffeqartariaqarput. Pruffiiti Esajas allassimavoq: „Eqqanaq taakku ullaarnganit imigassarsiortartut, unnuarsuarmullu viinnisornermit sinngorullersartut. Sianaarlutik kukkilattariarsorlutillu nalliuttorsiortarput, qilaatersorlutik qarlortarlutillu viinnisorlutillu, kisianni [Jehovap] suliai takunngilaat, assaasa piliaat isiginngilaat.“ (Jesaja 5:11, 12) Ajoraluartumik kristumiut inuusuttut ilaat tamatumunnga assingusumik festertarsimapput. Inuusuttualuit kristumiut aperineqaramik unnuakkut inuusuttut naapittarfiini qanoq pisoqartarnersoq, qatanngut arnaq inuusuttoq akivoq:  „Paasoqartuaannarpoq. Ilaatigut uanga aamma ilanngunneqartarpunga.“ Qatanngut angut inuusuttoq nangippoq: „Erngunneq, pujortarneq taamaattullu atugarineqartarput.“ Qatanngut angut inuusuttoq ima nassuerpoq: „Imerpallaartoqartarpoq. Sianiitsuliortarput! Ikiaroornartoqartarporlu. Ajortorpassuit pisarput. Najuukkuit isumaqarlutit sunnerneqassanatit kukkussaqaatit.“ Pissutissaqarluartumik Biibilimi ’imerajunneq’ imaluunniit „imerajooqatigiinnerit“ uinngup suliaatut eqqartorneqarput. — Galâsiamiut 5:19-21; Byington; Rûmamiut 13:13.

15. Biibilimi sukisaarsarneq qanoq oqimaaqatigiissumik eqqartorneqarpa?

¹⁵ Sukisaarsaatit ajoqutaasut ingalassimagaluarlugit nuannaarnermik imaqartumik inuuneqarsinnaavutit. ’Guuti pilluartoq’ pallorfigaarput, taassumalu kissaatigaa inuusuttuunerit nuannaarutigissagit! (1 Timûtiuse 1:11; Nalunaajaasup oqaasii 11:9) Biibilimili ima mianersoqqussuteqarpoq: „Nuannaarniarumatooq ajorsalersittussaavoq.“ (Ussatit 21:17) Aap, sukisaarsarneq inuunermi pingaarnerpaatikkukku anersaakkut ajorsalissaatit. Taamaattumik sukisaarsaatit eqqarsaatigalugit Biibilip najoqqutassiai naapertorlugit iliuuseqartarit. Assigiinngitsorpassuarnik ineriartornartumik ajoqutaanngitsunillu nuannaarniarsinnaavutit. * — Nalunaajaasup oqaasii 11:10.

16. Kristumiut inuusuttut qanoq ilillutik takutissinnaavaat atisalersoriaatsitigut, qallikkut pikisariaatsikkut nipilersukkanillu qinersinikkut allaanerullutik?

¹⁶ Atisalersoriaatsitigut qallikkullu pikisarnerni ingasaassiniartuunngikkaanni silarsuullu periaasii malinnagit silamiunit allaassuteqarnerit takutissavat. (Rûmamiut 12:2; 1 Timûtiuse 2:9) Nipilersornermik qinersininni narrutuujuguit aamma allaanerussaatit. (Filípimiut 4:8, 9) Niviarsiaraq kristumiu nassuerpoq: „Nalunngilara nipilersukkakka ilaat igittariaqaraluarlugit, nuannariinnarpakkali!“ Tamatumunnga assingusumik angut inuusuttoq nassuerpoq: „Nipilersorneq uannut nakkarfiusarpoq, nuannareqigakku. Paasigukku nipilersuut ajortortaqartoq, angajoqqaamaluunniit tamatuminnga paasitippannga, isumakkut ilungersuussisariaqartarpunga uummatiga sunnnerniarlugu, uummatikkummi nipilersorneq nuannarigakku.“ Inuusuttut, ’[Satanip] isumaliornerinik’ nalusooqinasi! (2 Korintumiut 2:11) Inuusuttut Jehovamit allamut saatsinniarlugit nipilersorneq atortarpaa! Napasuliaq Alapernaarsuiffiup Peqatigiiffiata naqititaani rap, heavy metal rockilu allatut ittoq allaaserineqarsimapput. * Soorunalimi Napasuliaq Alapernaarsuiffiup Peqatigiiffiata naqititaani nipilersoriaatsit assigiinngitsut nutaat tamaviisa sammineqarsinnaanngillat. Taamaattumik ’isumatusaarlutillu’ ’siuneqarlutit’ nipilersukkanik qinersisariaqarputit. — Ussatit 2:11.

17. (a) Porneiʹa sunaava, tamatumunngalu suut ilaappat? (b) Kinguaassiuutitigut ileqqulersuutit eqqarsaatigalugit Guutip peqqusaa sunaava?

¹⁷ Aamma ileqqussatigut minguitsuutittariaqarputit. Biibilimi ima peqqussuteqarpoq: ’Uersaaneq qimarratigisiuk.’ (1 Korintumiut 6:18) Griikerit oqaasiat uersaanermik nutserneqartoq,  porneiʹa, isumaqarpoq unioqqutitsisumik kinguaassiuutitigut iliuuseqarneq, aamma aappariinnerup avataani kinguaassiuutinik atuineq. Aamma qaneq atorlugu atoqatigiinneq, kinguaassiuutinillu attualaarneq taamaaliornermut ilaapput. Kristumiut inuusuttut arlallit taamaaliorsimapput, isumaqarlutik kanngunartuliunngikkaluarlutik. Guutilli oqaasiani ersarissumik allassimavoq: ’Tassaavoq Guutip peqqusaa ’iluarsissutissarsi, uersaaneq [kanngunartuliorneq] nigussagissi nungullusilu timisi pigisinnaassagisi iluarsiartortillusi ataqqinartillusilu.’ — 1 Tásalûníkamiut 4:3, 4.

18. (a) Inuusuttup qanoq silarsuup anersaavanit mingutsinneqarnissani pinngitsoortissinnaavaa? (b) Allaaserisami tulliuttumi suna sammissavarput?

¹⁸ Aap, Jehovap ikiuineratigut silarsuup anersaavanit mingutsinneqarnaveersinnaavutit! (1 Pîtruse 5:10) Kisianni Satanip napiarniutini toqunartut toqqortarpai, taamaattumillu navianaataat eqqumaffigissagaanni immikkoortitsisinnaassuseqartariaqarpoq. Allaaserisaq tulliuttoq inuusuttut immikkoortitsisinnaassutsimik ineriartornissamut ikiorniarlugit allanneqarsimavoq. (wE 1/9 99)

[Quppernerup ataani ilanngussat]

Uteqqiinissamut apeqqutit

□ ’Anersaaq silamiuusoq’ sunaava, qanorlu ililluni inuit sunnertarpai?

□ Ullumikkut inuusuttut qanoq ilillutik silarsuup anersaavanit sunnerneqartarpat?

□ Kristumiut inuusuttut qanoq ilillutik ’allaasumik anersaaqarsinnaappat’ oqaluttarneq sukisaarsarnerlu eqqarsaatigalugit?

□ Kristumiut inuusuttut qanoq ilillutik ’allaasumi anersaaqarsinnaappat’ ileqqussatigut aamma nipilersukkanik qinersinikkut?

[Atuaqqissaarnermi apeqqutit]

 [Qupp. 9-mi assiliartaq]

Inuusuttut amerlasuut iliuutsimikkut takutippaat silarsuup anersaavanit sunnerneqarlutik

 [Qupp. 10-mi assiliartaq]

Nipilersukkanik qinersigaangavit narrutuujugit

 [Qupp. 11-mi assiliartaq]

Silarsuup anersaava assortussagaanni qunusuittariaqarpoq