Inuusuttut — Immikkoortitsisinnaassusersi Ineriartortissiuk!

’Inersimasut nerisassamik mattusuumik pisariaqarput, tassa misigisaqartarnermit sungiusagaasunik sianissutillit ajunngitsorlu ajortorlu immikkoorsusiisigut ilisarisinnaallugit.’ — EPRÎARIT 5:14.

1, 2. (a) Ullumikkut qanoq atugaqartoqarpa, kristumiut siulliit Efesusimiittut atortariaqagaannut naleqqiullugu? (b) Pissutsit suut navianartunut illersuutaasinnaappat, qanorlu ilillutik pissutsit tamakku ineriartortinneqarsinnaappat?

’MIANERSOQQISSAARITSI saqilluarniarlusi, ilisimaatsutut pinnasi ilisimatuutulli; ullullu piginnaaffiusut asiutinnaveersigik, ullut ajormata’. (Evfisumiut 5:15, 16) Apustili Paulusip oqaatsinik tamakkuninnga allassimaneraniilli ’inuit ajortut salloqittaapiluttullu ajoriartorsinnararaat tammartitsisarlutillu tammartitaasarlutillu’. ’Ulluni ajornartuni’ imaluunniit nutsigaq nutaanerusoq naapertorlugu „ulluni navianartuni“ inuuvugut. — 2 Timûtiuse 3:1-5, 13; Phillips.

² Taamaattorli navianartunit siuninniittunit ajoquserneqarnissat pinngitsoorsinnaavat ’paasisimasaqarneq, ilisimasaqarneq isumatussuseqarnerlu’ ineriartortikkukkit. (Ussatit 1:4) Ussatit 2:10-12-imi allassimavoq: „Tassa ilisimassut uummatinni pigilissagakku ilisimasaqarnerullu nuannaalersissammatit. Isumatusaarnerup paarissavaatit, siuneqarnerullu sernigissavaatit. Annaatissavaatsit aqqummit ajortumit, inunnit eqqunngitsumik mumingasumillu oqaluttunit.“ Qanorli ilillutik piginnaassutsit tamakku ineriartortinneqarsinnaappat? Eprîarit 5:14-imi ima akissutissaqarpoq: ’Inersimasut nerisassamik mattusuumik pisariaqarput, tassa misigisaqartarnermit sungiusagaasunik sianissutillit ajunngitsorlu ajortorlu immikkoorsusiisigut  ilisarisinnaallugit.’ Piginnaassutsit allat assigalugit, immikkoortitsisinnaassuseqalernissaq sungiusarneqartariaqarpoq. Griikerit oqaasiat Paulusip atugaa isumaqavippoq ’eqaarsaartartutut sungiusarneqartoq’. Qanoq ilillutit sungiusalersinnaavit?

Immikkoortitsisinnaassutsit ineriartortiguk

3. Aalajangigassaqaraanni qanoq ililluni immikkoortitsisinnaassutsini atorsinnaavaa?

³ Malugiuk ajunngitsumik ajortumillu immikkoortitsisinnaassutsit ’misigisaqartarnermit’ sungiusarneqararmat. Aalajangigassaqaruit eqqoriaaneq, kajumissisitaalluni iliorneq imaluunniit inuit allat maliinnarnissaat silatusaarnerugunanngilaq. Silatuumik aalajangissaguit immikkoortitsisinnaassutsit atortariaqarpat. Qanoq ilillutit? Siullermik pissutsit misissoqqissaartariaqarpatit piviusut paasiniarlugit. Pisariaqarpat aperisarit. Paasiguk sunik periarfissaqarnersutit. Ussatit 13:16-imi allassimavoq: „Silatuup silassorissutsimigut suut tamaasa suliarisarpai.“ Tulliullugu paasiniaruk inatsisit najoqqutassiallu Biibilimeersut suut aalajangigassannut attuumassuteqarnersut. (Ussatit 3:5) Taamaaliussaguit soorunami Biibilimik ilisarsisariaqarputit. Taamaattumik Paulusip kajumissaarpaatigut ’mattusuumik nerinissatsinnut’ — sallusuissutsip ’silissusia takissusialu itissusialu kingissusialu’ ilikkaqqullugit. — Evfisumiut 3:18.

4. Sooq Guutip najoqqutassiaasa ilisarinissaat pingaaruteqarpa?

⁴ Naammalluinnanngitsuugatta ajortuliorajullutalu taamaaliorneq pisariaqavippoq. (1 Moses 8:21; Rûmamiut 5:12) „Uummat tamanit annerusumik tatigisassaanngitsuuvoq. Katsorsagassaanngilaq,“ Jeremia 17:9-mi allassimavoq. Guutip najoqqutassiaanit siulersorneqanngikkutta imminut salloqittarluta ajortoq ajunngitsutut isumaqarfigilersinnaavarput — uinipput piumatuujummat. (Naleqqiuguk Jesaja 5:20.) Tussiaasiortoq allassimavoq: „Qanoq ililluni inuusuttup ingerlavini minguitsuutissinnaavaa? Tassa oqaatsisit maleruarunigit. Maleruagassiannit silassorissisinneqarpunga, taamaattumik uumigaakka aqqutit eqqortuunngitsut tamaasa.“ — Tussiaat 119:9, 104.

5. (a) Sooq inuusuttut ilaasa ’eqqunngitsut ingerlavigaat’? (b) Qatanngutip arnap inuusuttup qanoq ililluni angajoqqaaminnit ilikkakkani ilumoornersut misissorsimavaa?

⁵ Sooq inuusuttut ilaasa kristumiutut perorsarneqarsimagaluartut aqqutit eqqortuunngitsut ingerlavigaat? Imaassinnaanerpa taakkua ’sianigisimanngisaannaraat sunaasoq Guutip peqqusaa ajunngitsoq iluarisassarlu naammalluinnartorlu’? (Rûmamiut 12:2) Ilaat immaqa angajoqqaatik peqatigalugit ataatsimiigiartarput Biibilimilu ajoqersuutigineqartut tunngaviunerusut ilaat oqaatigisinnaallugit. Aperineqarunilli upperisartik uppernarsaqqullugu imaluunniit Guutip oqaasiani itinerusut ilaat nassuiaqqullugit, paasinarsisarpoq ilisarsinerat tupaallannartumik annikitsuusoq. Inuusuttut taamaattut tammartikkuminartuupput. (Evfisumiut 4:14) Illittaaq taamaakkuit soormi allanngortitsinissat aalajangerukku? Qatanngut arnaq inuusuttoq ima oqaluttuarpoq: „Atuaqqissaartalerpunga. Imminut aperivunga: ’Qanoq nalunngissinnaavara tassaasoq upperisaq ilumoortoq? Qanoq nalunngissinnaavara Guuteqartoq Jehovamik atilimmik?’“ * Biibili peqqissaartumik misissoramiuk uppernarsaavigineqarpoq angajoqqaaminit ilikkakkani ilumoortuusut! — Naleqqiuguk apustilit suliait 17:11.

6. Qanoq ililluni ’Naalakkap, Jehovap, iluarisassaa sunaasoq misilittarniarneqarsinnaava’?

⁶ Jehovap najoqqutassiaanik ilisimasaqaruit ’Naalakkap iluarisassaata sunaaneranik misilittaaniarnissaa’ piuminarnerussaaq. (Evfisumiut 5:10) Taavami pisumi aalajangersimasumi silatuumik iliornissat pillugu nalorniguit? Jehova siulersortinnissannik qinnuigiuk. (Tussiaat 119:144) Angajoqqaannik kristumiumilluunniit inersimalluartumik oqaloqatigiissutigiuk. (Ussatit 15:22; 27:17) Siulersortissagaanni Biibilimik aamma Napasuliaq Alapernaarsuiffiup Peqatigiiffiata naqititaanik misissueqqissaarneq iluaqutaasinnaavortaaq. (Ussatit 2:3-5) Immikkoortitsisinnaassutsit atornerujartorukku pitsaanerulissaaq.

 Sukisaarsarnikkut siuneqassuseq

7, 8. (a) Festernermut peqataassanerluni aalajangissagaanni qanoq ililluni immikkoortitsisinnaanini atorsinnaavaa? (b) Biibilimi aliikkusersuineq qanoq oqaatigineqarpa?

⁷ Maannakkut misissoriartigu qanoq immikkoortitsisinnaassuseq pissutsini assiginngitsuni atorneqarsinnaasoq. Takorlooriartigu festernermut qaaqquneqartutit. Immaqa allaat naqitikkatigut qaaqquneqarputit, allassimavorlu inuusuttut allat amerlasuut aggissasut. Kisianni aningaasartuutinut matussutissanik akileeqqussuteqarpoq. Ilaassavit?

⁸ Tamatumani immikkoortitsisinnaassuseqartariaqarputit. Siullermik eqqorluartumik paasiniaagit. Inuit qassit peqataassappat? Kikkut? Qaqugu aallartissava? Qaqugu naassava? Qanoq pisoqassava? Kina festernermi nakkutilliissava? Taava Register til Vagttårnets publikationer-imi * immikkoortut „Selskabeligt samvær“ (Katerisimaarnerit) aamma „Underholdning“ (Aliikkusersuinerit) qupperarneqarsinnaapput. Tassani innersuussutigineqartut misissorukkit suna paasinarsissava? Ersarippoq Jehovap nuannaarniarluni katerisimaarnerit ajorinngikkai. Nalunaajaasup oqaasii 8:15-imi allassimavoq ’inunnut allamik pilluaatissaqanngimmat taamaallaat nerinermik, imernermik nuannaarnermillu’. Jesus Kristusip aamma katerisimaarnerit najuuffigisarpai minnerpaamillu ataasiarluni katiffissiornermut najuulluni. (Lúkarse 5:27-29; Juánase 2:1-10) Ingasaassinngitsumik iliuuseqarutta katerisimaarnerit taamaattut iluaqutaasarput.

9, 10. (a) Katerisimaarnerit ilaannut atatillugu qanoq navianaateqarsinnaava? (b) Festernermut peqataassanerluni aalajangertinnagu imminut qanoq aperisoqarsinnaava?

⁹ Katerisimaarnerilli aaqqissorneqarluanngippata ajornartorsiuteqarsinnaavoq. Korintumiunut agdlagkat sujugdlît 10:7, 8-mi oqaluttuarineqarpoq ajortunik ilagisaqarneq qanoq kanngunartuliornermik Israelikkullu 23.000-it ilumuunngitsut toqunerannik kinguneqartoq. Rûmamiut 13:13-imi allamik ilungersunartumik mianersoqqussuteqarpoq: ’Ullukkut pisartutut ippinnanngitsumik saqisa, nerisorsuit imerajuttullu ileqqoqatiginagit, piitaannatalu kanngunartulioratalu, saqitsaannatalu annerussinatalu.’ (Naleqqiuguk 1 Pîtruse 4:3.) Festernermut inuit qassit peqataasinnaanerannik aalajangersimasumik peqqussutigineqarsinnaanngilaq. Kisianni misilittakkat takutippaat festertut amerlanerujartoraangata nakkutilliineq artornarnerusartoq. Katerisimaarnerit angivallaanngitsut aaqqissorneqarluartullu ’imerajooqatigiinngornissaat’ ilimananngilaq. — Galâsiamiut 5:21, Byington.

¹⁰ Misissuitillutit qularnanngitsumik aamma allamik apeqqutissaqassaaq, assersuutigalugu: Festernermi inersimalluartunik inersimasoqassava? Kina akisussaaffeqassava? Festerneq nuannersumik ineriartornartumillu katerisimaaqataanissamik siunertaqarpa, imaluunniit iluanaarniutigineqassava? Kikkut peqataasinnaanissaannut killeqarpa? Sapaatip-akunnerata naaneraniissappat unnuarujortinnagu naassava, najuuttut ullup tulliani kristumiut kiffartornerannut peqataasinnaaniassammata? Nipilersorneq qitinnerlu atorneqassagunik kristumiutut najoqqutassiat malillugit ingerlanneqassappat? (2 Korintumiut 6:3) Immaqa taama aperineq sapernarsinnaagaluarpoq,  kisianni Ussatit 22-3-mi mianersoqqussuteqarpoq: „Silatuup perluk qanilliartortoq malugisarpaa qimarnguffissarsiortarlunilu, isumaatsorli soqutigittaalliuinnartarpoq tamannalu ajunaarutigisarlugu.“ Aap, navianartut pinngitsoortinneqarsinnaapput immikkoortitsisinnaassuseqarnikkut.

Ilinniagaqarnissamik qinersinikkut immikkoortitsisinnaaneq

11. Siunissaq pillugu pilersaarusiornermi inuusuttut qanoq immikkoortitsisinnaanertik atorsinnaavaat?

¹¹ Biibilimi allassimavoq siunissamut pilersaarusiorneq silatusaarnerusoq. (Ussatit 21:5) Angajoqqaatillu illit siunissat oqaloqatigiissutigereerpisiuk? Immaqa pioneerinngornissannik pilersaaruteqarputit. Allamik nalerisimaarnarnerusumik nuannaarnarnerusumillu suliassamik qinigassaqanngilaq. Pioneerinngorniaraanni atuaqqissaarnerup oqaluussinerullu pikkoriffiginerulernissaat sulissutigineqarsinnaavoq. Eqqarsaatigisimaviuk qanoq ilillutit pioneeritut imminut pilersorsinnaanerlutit? Kingusinnerusukkullu katikkusukkuit meeraqalerusullutillu, akisussaaffiit annerusut tamakku naammassisinnaavigit? Tamakku eqqarsaatigalugit oqimaaqatigiissumik piviusorsiortumillu aalajangissagaanni immikkoortitsisinnaassuseqartariaqarpoq.

12. (a) Ilaqutariit ilaat qanoq ilillutik aningaasatigut atukkanut sungiussiniarsimappat? (b) Sivikitsumik tapiusumillu ilinniagaqarneq pioneeritut kiffartornissamik anguniagaqarnermut akornutaasariaqarpa? Nassuiaruk.

¹² Immaqa ilinniakkamik takivallaanngitsumik ilinniarsinnaavutit. Inuusuttut ilaat ilaqutariit suliffiutaanni sulisinnaapput imaluunniit ikinngutiminni inersimasuni suliffiutilinni ilinniartitaasinnaallutik. Allat atuarfimmi fagit kingusinnerusukkut suliffissarsiornermi iluaqutaasut qinertarpaat. Taamaaliorneq ajornarpat angajoqqaat ilaasa eqqarsaatigeqqissaareerlugu immaqa meeqqamik atuarfimmi ilinniarnertuunngorniarfimmiluunniit atuareernerup kingorna tapiusumik ilinniaqqinnissaat isumagisinnaavaat. Taamaaliorneq siunissaq eqqarsaatigalugu inersimasutut akisussaaffeqarnissamut ingammillu pioneeritut sivisungaatsiartumik kiffartorsinnaanissamut  pilersaarusiorneq Guutip naalagaaffiata piniaqqaarnissaanik najoqqutassiamut akerliunngilaq. (Matîuse 6:33) Tapiusumillu ilinniartitaaneq pioneeritut kiffartornermut akornutaasariaqanngilaq. Assersuutigalugu oqaluussisartup inuusuttup sivisuumik pioneerinngornissani kissaatigisimavaa. Ilinniarnertuunngormat angajoqqaavisa pioneeriusut panimmi tapiusumik ilinniarnissaa isumagaat. Ilinniartilluni pioneeriusinnaasimavoq, maannakkullu pioneeritut kiffartortilluni imminut pilersorsinnaalerpoq.

13. Qanoq ililluni tapiusumik ilinniagaqarnissamut ’akissat naatsorsuutigisinnaavai’?

¹³ Ilinniartitaaneq eqqarsaatigalugu ilaqutariit tamarmik namminneq aalajangernissaminnut pisinnaatitaaffeqarlutillu pisussaaffeqarput. Ilinniagaqarneq eqqortoq qineraanni iluaqutaasorujussuusinnaavoq. Navianaateqarsinnaavorli. Tapiusumik ilinniagaqarniarnermut suna anguniagarineqarpa? Inersimasutut akisussaaffeqarnissamut piareersaanerunerpa, imaluunniit ’atugarissaarutit’ piniarneqarpat? (Jeremia 45:5; 2 Tásalûníkamiut 3:10; 1 Timûtiuse 5:8; 6:9) Assersuutigalugu angerlarsimaffimmiit allamut nuunneq ilinniartillunilu kollegiami najugaqarneq silatusaarnerussava? Paulus mianersoqqusivoq ’ajortut ikinngutigalugit ileqqut ajunngitsut aserortarmata’. (1 Korintumiut 15:33; 2 Timûtiuse 2:22) Eqqaamajuttaaq ’ullussat sivikitsut’. (1 Korintumiut 7:29) Ilinniarnissat qanoq sivisutigissava? Inuusuttuunerpit tamangajaat? Taamaappat qanoq ilillutit ’inuusuttuunerpit ulluini Pinngortitsisivit eqqarsaatiginissaanik’ kajumissaarut Biibilimeersoq maleruarsinnaaviuk? (Nalunaajaasup oqaasii 12:1) Ilinniartitaanerpit saniatigut kristumiut sammisartagaat pingaartut, soorlu ataatsimiigiarneq, oqaluussisarneq namminerlu atuaqqissaarneq, piffissaqarfigissavigit? (Matîuse 24:14; Eprîarit 10:24, 25) Eqqorluartumik immikkoortitsisinnaassuseqaruit anguniagassat anersaakkut ittut eqqaamajuassavatit angajoqqaatit peqatigalugit siunissat pilersaarutigitillugu.

Peeraqarnermi ileqqorissaarneq

14. (a) Peerariit najoqqutassiat suut maleruartariaqarpaat asanninnerminnik ersersitsisarnerminni? (b) Aappassiariit ilaat tamatumani qanoq immikkoortitsisinnaanermik amigaateqarsimappat?

¹⁴ Peeraqaraanni aamma immikkoortitsisinnaassuseqartariaqarpoq. Asasaminut misigissutsimi ersersitsiniarnissaat pissusissamisuuginnarpoq. Peerariit ileqqorissaartut Taalliat Asanninnilersaarutit-ni Salomonip allassimasaani allaatigineqartut katinnatik imminnut asanninnertik killilimmik ersersitsivigaat. (Taalliat Asanninnilersaarutit 1:2; 2:6; 8:5) Ullumikkuttaaq aappassiariit ilaat immaqa misigissapput tasiorneq, kuninneq eqitaartarnerlu ajunngitsut, ingammik katingajalernermi. Eqqaamajulli: „Silaqassutsiminik tunaarinnittoq silaatsuuvoq.“ (Ussatit 28:26) Ajoraluartumik peerariit amerlasuut siuneqassuseqarpallaarnatik ajornartorsiulersimapput. Asanninnerminnik ersersitsiviginerminni imminnut naalakkersorsinnaajunnaarsimapput; taamaalillutik mingunnartuliorsimallutillu kinguaassiuutitigut kanngunartuliorsimapput.

15, 16. Silatuumik pinaveersaartitsinerit suut aappassiariit atorsinnaavaat ileqqorissaarnissartik isumageqqullugu?

 ¹⁵ Aappassiaqaruit silatusaarneruvoq pissutsini naleqqutinngitsuni kisimiinnissarsi pinngitsoortikkussiuk. Immaqa ajunnginnerussaaq allat peqatigalugit imaluunniit sumiiffinni tamanut ammasuni naapeqatigiittarussi. Aappassiariit ilaat pissusserissaarnisartik eqqarsaatigalugu allamik ilaqartarput. Aamma eqqaamajuk Hosea 4:11-mi allassimasoq: „Viinni nutaaq innuttama silaarussutigaat.“ Imigassat immikkoortitsisinnaassutsimut ajoqutaasinnaavoq peerariillu kingusinnerusukkut peqqissimissutigisaannik iliuuseqalersissinnaallugit.

¹⁶ Ussatit 13:10-mi allassimavoq: „Makitassuseq saqitsaannermut peqqutaaginnartarpoq, silatuujupput siunnersuutinik ilassinnittut.“ Isumaqatigiinniaritsi qanoq iliuuseqarniarlusi. Asanninnissinnik ersersitsiviginissassinni killilersoritsi, tamassilu allap misigissusii nalunngeqatiginnissusialu ataqqillugit. (1 Korintumiut 13:5; 1 Tásalûníkamiut 4:3-7; 1 Pîtruse 3:16) Immaqa aallaqqaammut malussariffiusut taamaattut oqaloqatigiissutiginissaat sapernarpoq, oqaloqatigiissutigigaannili ajornartorsiutissat sualuttut pinngitsoortinneqarsinnaapput.

’Inuusunnermilli’ ajoqersorneqarneq

17. Davidip qanoq ililluni ’inuusunnerminilli Jehova qimarravigisarsimavaa’, ullumikkullu inuusuttut tamanna qanoq ilinniutigisinnaavaat?

¹⁷ Satanip napititsiniutai nakkarfiginngitsuussagutsigik eqqumajuartariaqarpugut — ilaannikkullu qunusuittariaqarluta. Immaqa ilaannikkut misigisarputit kammalaatinuinnaanngitsoq silarsuarmulli tamarmut kisimiillutit. Tussiaasiortoq David ima qinuvoq: „Illimmi neriuffigaakkit, [Jehova], inuusunninnilli qimarravigisarpakkit. Guuti, inuusunninnilli ajoqersorparma, tupinnartuliatillu oqaluttuariuarpakka.“ (Tussiaat 71:5, 17) * David qunusuinnermigut ilisimaneqarpoq. Qangali qunusuissutsini ineriartortippaa? Inuusukkallaramili! Tusaamaneqarnissaminut Goliat ajugaaffigitinnagu allaat David immikkut qunusuitsuusimavoq ataatami savaatai paarigamigit. Løveq nanorlu toqussimavai. (1 Samuel 17:34-37) Davidilli angusimasaminik tamanik Jehova ataqqivaa, oqarluni ’inuusunnerminilli qimarravigigaani’. Davidip Jehova tatigilluinnaramiuk misilinneqarnini tamaasa anigorsinnaasimavai. Illittaaq Jehova tatigigukku paasissavat ’silarsuarmut ajugaanissannut’ qunusuissuseqartissagaatit nakussatsissallutillu. — 1 Juánase 5:4.

18. Inuusuttut Guutimik mianerinnittut sumik kajumissaarneqarpat?

¹⁸ Inuusuttut tusindilippassuit qunusuillutik aalajangiussisimapput ullumikkullu nutaarsiassamik nuannersumik oqaluussisartuullutik kuisissimasut. Ilissi inuusuttut upperisarsi qunusuissusersilu pillugit Guuti qutsavigaarput! ’Aserornartut silarsuup pii nigorumallugit’ aalajangiulluinnaritsi. (2 Pîtruse 1:4) Immikkoortitsisinnaassutsit Biibilimit ajoqersorneqartoq atortuaruk. Taamaalioruit maannakkut ajunaarnissamut illersorneqassaatit, siunissamilu annannissannik kinguneqassaaq. Aap, soorlu allaaserisami tulliuttumi sammineqassasoq, inuuninni iluatsitsissaatit. (wE 1/9 99)

[Quppernerup ataani ilanngussat]

Uteqqiinissamut apeqqutissat

□ Inuusuttut qanoq ilillutik immikkoortitsisinnaanertik sungiusarsinnaavaat?

□ Kristumiut allat peqatigalugit festernermut peqataassanerlutik aalajangissagaanni inuusuttut qanoq ilillutik immikkoortitsisinnaanertik atorsinnaavaat?

□ Ilinniagaqarnissamut pilersaarusiornermi suut eqqarsaatigineqartariaqarpat?

□ Peerariit qanoq ilillutik kinguaassiuutitigut kanngunartuliornissartik pinngitsoortissinnaavaat?

[Atuaqqissaarnermi apeqqutit]

[Qupp. 15-imi assiliartaq]

Atuaqqissaarneq ilikkaraanni immikkoortitsisinnaassutsip sungiusarnissaanut iluaqutaavoq

[Qupp. 16-imi assiliartaq]

Katerisimaarnerit annertuallaanngitsut nakkutigineqarnissaat piuminarneruvoq ingasaassisoornissarlu ilimanannginneruvoq

[Qupp. 16-imi assiliartaq]

Angajoqqaat meeqqatik ikiortariaqarpaat ilinniagaqarnissaannut pilersaarusioqqullugit

[Qupp. 17-imi assiliartaq]

Allat peqatigalugit imminnut ilisariniarnissaat illersuutaasinnaavoq