’Eqqissivik’ qanillivoq!
’Eqqissivik’ qanillivoq!
„Suut tamarmik aalajangersimasumik piffissaligaapput: . . . sorsuffissaqarpoq eqqissivissioqatigiiffissaqarlunilu.“ — NALUNAAJAASUP OQAASII 3:1, 8.
1. Ukiuni 1900-kkunni sorsunneq eqqissinerlu eqqarsaatigalugit pissutsit eqqumiitsut suut atuussimappat?
INUIT amerlanersaasa eqqissinissaq erinigeqaat. Ukiut 1900-kkut ukiut hundredelinnut allanut tamanut naleqqiullugit eqqissinermik amigaateqarfiunerusimaqaat. Tamanna eqqumiikkaluarpoq, eqqissineq aatsaat taama ilungersuutigineqartigimmat. 1920-mi Folkeforbundi pilersinneqarpoq. 1928-mi isumaqatigiissut Kellogg-Briand-imik taaneqartoq, qinerlerfissiaq naapertorlugu „sorsunnersuup siulliup kingorna eqqissivissioqatigiinniarnerit pingaarnersaat“, „silarsuarmi inuiaqatigiinnit tamangajannit . . . sorsunnerit naalakkersuinermut atatillugu atorneqaqqusaannginnissaat siunertaralugu“ atsiorneqarpoq. Taava 1945-mi FN Folkeforbundimut taarsiullugu pilersinneqarpoq.
2. FN sumik anguniagaqarpa, tamannalu anguniarlugu iluatsitsisimanerpa?
2 Folkeforbundi assigalugu, FN-ip silarsuarmi eqqissinerup isumannaallisarnissaa siunertaraa. Killilimmilli angusaqarsimavoq. Sorsunneqanngikkaluarpoq sorsunnersuit marluk assigisaannik. Taamaattorli sorsunnerit minnerusut qulilinnik arlallit pissutigalugit inuit hundredetusindilikkuutaat isumakkut eqqissinerminnik, pigisaminnik akulikitsumillu inuunerminnik piaaffigineqartarput. Upperisinnaavarput FN-ip ukiut 2000-kkut eqqissinissamut allanngortissinnaagai?
Eqqissinerup piviusup tunngavia
3. Sooq uumisuisoqartillugu piviusumik eqqissineqarsinnaanngila?
3 Inuiaat inuiaqatigiillu eqqisseqatigiissappata akaarinninneq immini naammanngilaq. Tassami, kialuunniit uumigisani eqqisseqatigisinnaanerpai? 1 Juánase 3:15 naapertorlugu taamaattoqarsinnaanngilaq: ’Kinaluunniit qatanngumminik uumissuisoq inuarsimasuuvoq.’ Soorlu oqaluttuarisaanermit takuneqarsinnaasoq uumissuinersuaq nakuusernermik kinguneqarajuttartoq.
4. Kikkut kisimik eqqissineq misigisinnaavaat, aamma sooq?
4 Jehova tassaammat ’Guuti eqqissisaasoq’, inuit eqqissineq misigisinnaavaat aatsaat Guutimik asannittuugunik najoqqutassiaanillu naapertuilluartunik ataqqinnittuugunik. Aap, Jehovap kikkulluunniit eqqissinermik tuninianngilai. „’Guutiitsut eqqissivissaqanngillat,’ oqarpoq Guutiga.“ Taamaappoq guutiitsut Guutip anersaavanit illernartumit, eqqissinermik inerititaqartumit, siulersorneqarumaneq ajormata. — Rûmamiut 15:33; Jesaja 57:21; Galâsiamiut 5:22.
5. Kristumiut ilumoortut qanoq iliorsinnaanngivippat?
5 Inoqatinut sorsunneq kristumiut ilumoortut iliuuserisinnaanngivippaat, soorlu kristumiuunerartut akulikitsumik, ingammillu ukiuni 1900-kkunni makkunani, taamaaliorsimasut. (Jâko 4:1-4) Kristumiut Guuti pillugu ajoqersuutit eqqunngitsut ’sorsuffigaat’, sorsunnerli taamaattoq inunnik ikiuiniarneruvoq, ajoqusiinissamik siunertaqarnani. Upperisarsiornikkut assigiinngissutit pissutigalugit inunnik malersuineq imaluunniit inuiaqatigiissutsimut atatillugu timikkut ajoqusiineq kristumiussutsimut ilumoortumut akerliulluinnarput. Paulusip kristumiut Romamiittut ima allaffigai: ’Ajornanngippat sapinngisassinnik inuit tamaasa eqqissiveqatiginiarsigik.’ — Rûmamiut 12:17-19; 2 Timûtiuse 2:24, 25.
6. Ullumikkut eqqissineq piviusoq taamaallaat sumi nanineqarsinnaava?
6 Ullumikkut eqqissineq Guutimeersoq Jehova Guutip kiffaasa ilumoortut kisimik pigaat. (Tussiaat 119:165; Jesaja 48:18) Ataasiussusiat naalakkersuinikkut assigiinngissutinit akornuserneqanngilaq, sumiikkaluarlutilluunniit naalakkersuinermut kalluunnaveersaartuugamik. (Juánase 15:19; 17:14) Tamarmik ’naammattunngorlutik assigiissumik eqqarsaramik assigiissumillu isumalioramik’, eqqissinerat upperisarsiornikkut assigiinngissutinit akornusersorneqanngilaq. (1 Korintumiut 1:10) Jehovap Nalunaajaasuisa eqqissinerat tassaavoq tupinnartuliaq ullumikkut pisoq, Guutip neriorsuutigisaata matuma piviusunngorneratut: „Eqqissineq ilinnut naalaganngortissavara, iluarnerlu naalakkersortigissavat.“ — Jesaja 60:17; Eprîarit 8:10.
Sooq ’sorsuffissaqarpa’?
7, 8. (a) Naak eqqissisimagaluarlutik Jehovap nalunaajaasuisa ullut inuuffigisavut qanoq isigaat? (b) Sakku kristumiut sorsunnermut atugaasa pingaarnerpaartaat suua?
7 Naak Jehovap Nalunaajaasuisa namminneq eqqissisimagaluarlutik paasivaat maannakkut pingaartumik ’sorsuffissaqartoq’. Eqqortumik oqaatigalugu sorsunneq pineqanngilaq, inuit sakkunik pinngitsaalineqassanngimmata Biibilip tusarliussaanik ilassinninnissaannut. Taamaaliornermi Guutip kajumissaarutaanut matumunnga akerliulluinnassagaluarpoq: ’Imerusuttoq aggerli; piumasullu imeq inuunartoq akeqanngitsumik piliuk.’ (sarĸúmersitat 22:17) Inuit allamik isumataarnissaminnut pinngitsaalineqassanngillat! Jehovap Nalunaajaasuisa sorsunnerat anersaakkut ittuuvoq. Paulus allassimavoq: ’Sakkummi sorsunnermut atukkavut uinngup piginngilai, Guutimilli pissatsitaapput ippiliugarsuit aserortersinnaallugit.’ — 2 Korintumiut 10:4; 1 Timûtiuse 1:18.
8 ’Sakkut sorsunnermut atukkatta’ ilaat tassaavoq ’pana anersaap pia, tassa Guutip oqaasia’. (Evfisumiut 6:17) Pana tamanna sunniuteqartorujussuuvoq. ’Guutip oqaasia uumavoq killinnartorsuullunilu pananillu illuttut kiinalinnit tamanit ipinnerulluni pulallunilu tarnerlu anersaarlu, naggussallu paqqillu avissaartissinnaallugit, uummatillu eqqarsaatai isumaalu killisiorsinnaallugit.’ (Eprîarit 4:12) Pana tamanna atorlugu kristumiut ’isumaliutit inornarniartullu Guutimik ilisarsinermut makitaniartut tamaasa aserortersinnaavaat’. (2 Korintumiut 10:5) Taamaalillutik eqqunngitsumik ajoqersuutit, iliuutsillu ajoqutaasut aamma isumaliutersuutit, Guutip ilisimassusianut ersiutaanatik, inuinnaat ilisimassusiannut ersersitsisut ersersissinaavaat. — 1 Korintumiut 2:6-8; Evfisumiut 6:11-13.
9. Sooq uinimmut ajortiliusumut akiuunnitsinni tunniutiinnassanngilagut?
9 Aamma allamik anersaakkut ittumik sorsoriaaseqarpoq, tassa uinimmut ajortiliusumut sorsunneq. Kristumiut Paulusip maligassiaa malinniartarpaat, taanna ima nassuermat: ’Timiga artorsartippara kiffaasutut ilillugu, allanut oqaluussisartunga nammineq angiluttoqqunanga.’ (1 Korintumiut 9:27) Kristumiut Kolossæmiittut kajumissaarneqarput ’avatitik nunamiusut toqulerseqqullugit: uersaanermut, mingunnartumut, illigunnernut pilerissutsinullu ajortunut piumatuunermullu, tassa guutipilussiornermut’. (Kulorsamiut 3:5) Biibilimillu allattup Judasip kristumiut oqaaqqissaarpai ’upperisassaq iluartunut tunniussaareersoq assoruutigeqqullugu’. (Jûtarse 3) Sooq taamaaliortariaqarpugut? Paulus ima akivoq: ’Uinik malillugu inuugussi toqujumaarpusi, anersaakkulli timip suliai toqunniarussigik inuujumaarpusi.’ (Rûmamiut 8:13) Oqaatsit taakku eqqarsaatigalugit ersarippoq ajortuliornermut sorsunnitsinni akiuuttuartariaqartugut.
10. 1914-imi qanoq pisoqarpa, siunissamilu qanittumi qanoq pisoqassava?
10 Nalerput aamma ’sorsuffissatut’ isigineqarsinnaavoq „ulloq Guutitta akiniaaffia“ qanillimmat. (Jesaja 61:1, 2) 1914-imi Jehovap Naalagaaffimmik Messiasikkoortumik pilersitsineranut naalagaaffiullu tamatuma Satanip aaqqissuussaaneranut sorsutinneqarneranut piffissanngorsimavoq. Inuiaat Guutimit akuliuffigineqaratik naalakkersueriaatsinik namminneq pilersissimasaminnik misiliisarnerannut piffissarititaq taamani qaangiuppoq. Guutip kunnginngortitaa Messias akueriumanagu inuit amerlanersaasa suli itigartittarpaat, soorluttaaq ukiuni hundredelinni siullerni amerlanerit taamaaliorsimasut. (apustilit suliait 28:27) Taamaattumik Guutip naalagaaffia assortorneqartarmat, Kristus ’allaat akeqqami akornanni naalagaalersimasariaqarpoq’. (Tussiaat 110:2) Qujanartumik sarĸúmersitat 6:2-mi neriorsuutigineqarpoq ’ajugaassasoq’. Taamaaliussaaq ’sorsunnissami Guutip ajugaqanngitsup ullussarsuani piumaartumi . . . hebriiarit oqaasiinik Harmagedonimik taaneqartumi’. — sar 16:14, 16.
Maannakkut ’oqaluffissaqarpoq’
11. Suna pillugu Jehova naammagittangaarsimava, naggataatigulli qanoq pisoqassava?
11 Pissutsit inuit atugaat 1914-imi allanngortinneqarneranniilli ukiut 85-it qaangiussimapput. Jehovap inuiaat ersarissumik naammagittarfigisimavai. Nalunaajaasuni pissutsit ilungersunassusiannik sianiginnitsissimavai. Inuit hundredemillionilikkuutaat inuunerat pineqarpoq. Inuppassuit taakku mianersoqquneqartariaqarput ’Jehova . . . tammarsimasoqaqqusinnginnami tamaasali allamik isumataaqqullugit’. (2 Pîtruse 3:9) Naggataatigulli ’Naalagaq Jesus qilammit saqqummissaaq pissaanermi inngilii ilagalugit,’ Guutip naalagaaffianik tusarliussamik piaaralutik akuerinnikkumanngitsunut tamanut, tassa ’Guutimik ilisimasaqanngitsunut Naalakkattalu Jesusip iivangkiiliuanut naalakkumanngitsunut, akiniutissaq aggiullugu’. — 2 Tásalûníkamiut 1:6-9.
12. (a) Sooq asuliinnassava naalliunnartoqangaarnissap qaqugu takkunnissaa eqqarsaatigissallugu? (b) Tamanna pillugu Jesus sumik mianersoqqusiva?
12 Qaqugu Jehovap naammagittarnera atorunnaassava? ’Naalliunnartoqangaarnissap’ qaqugu takkunnissaa eqqarsaatigissallugu asuliinnaavoq. Jesus oqarsimavoq: ’Ullussamik taassuminnga ullulluunniit qanoq ilinissaanik ilisimasoqanngilaq.’ Aammali ima kajumissaarivoq: ’Taamaattumik eqqumagitsi, Naalakkassi tikiuffissaa nalugassiuk. . . . Ilississaaq piareersimaniaritsi, Inuup Ernera ilisimasuffiginngisassigut tikiussammat.’ (Matîuse 24:21, 36, 42, 44) Eqqortumik oqaatigalugu ima paasisariaqarpoq ullut tamaasa silarsuarmi pisartut eqqumaffigisariaqarivut annikilliornartussap angisuup pilernissaa eqqarsaatigalugu. (1 Tásalûníkamiut 5:1-5) Navianartorujussuussaaq isumaqassalluta eqqissiinnarluta inuttut allatut inuuinnarsinnaasugut qanorlu pisoqarnissaa utaqqiinnarlugu! Jesus oqarpoq: ’Mianersoritsili uummatisi putumanermut imerajunnermullu inuunerullu matuma piinik isumakulunnermut nanertorteqqunagit; ullup taassuma tassanngaannaq tikeqinavaasi.’ (Lúkarse 21:34, 35) Qularinngilluinnarparput ’anorit sisamat’ aseruisussat Jehovap ’inngiliinit sisamanit’ maannakkut tigumiarneqarallartut soraajuitsumik tigumiarneqarnavianngitsut. — sarĸúmersitat 7:1-3.
13. Inuit 6.000.000-ngajaat suna paasisimavaat?
13 Ullussap nassuerfissap tamatuma qanilliartorasuarnera eqqarsaatigalugu, Salomonip piffissamik ’oqaluffissamik’ taasaa immikkut pingaaruteqarpoq. (Nalunaajaasup oqaasii 3:7) maannakkut paasigamikku ’oqaluffissaqartoq’ Jehovap nalunaajaasuisa 6.000.000-ngajaat ilungersuussillutik Guutip kunngeqarfiata naalannassusia oqaluussissutigisarlugu ullussarsua akiniaaffik pillugu mianersoqqussisarput. Maanna ullormi Kristusip ’sorsuffigisaani’ kajumillutik sassarput. — Tussiaat 110:3; 145:10-12.
Oqartarput: ’eqqissineqarpoq, uffa eqqissineqanngitsoq!’
14. Ukiuni 600-kkunni u.n.s. kikkut pruffiitioqqusersuuppat?
14 Ukiuni 600-kkunni u.n.s. Guutip pruffiitii Jeremias Ezekielilu Jerusalemimut eqqartuussinissamik Guutimeersumik tusarliisarput tassanimiut namminissarsiortuummata Guutimullu naalanngitsuummata. Aserornissaq siulittuutigisaat ukiumi 607-imi u.n.s. nalliuppoq, naak upperisarsiornikkut siuttut nuimasut Guutip tusarliisui assortorsimagaluaraat. Upperisarsiornikkut siuttut taakku tassaapput ’pruffiitit silaqanngitsut . . . [Guutip] innuttaanik tammartitsisut eqqissineq nalunaajaatigalugu uffa eqqissineqanngitsoq’. — Hesekiel 13:1-16; Jeremia 6:14, 15; 8:8-12.
15. Ullumikkut taakkununnga assingusunik pruffiitioqqusersoqarpa? Nassuiaruk.
15 ’Pruffiitit silaqanngitsut’ taamani inuusut assigalugit, ullumikkut upperisarsiornikkut siuttut amerlanersaasa inuit Guutip eqqartuussinissaanik qanilliartortumik mianersoqqunngitsoortarpaat. Akerlianik isumalluarlutik tikkuartarpaat naalakkersuisut assigiinngitsut naggataatigut eqqissineq isumannaassuserlu pilersikkumaaraat. Guutimut iluarisaanerminnit inunnut iluarisaajumanerullutik, inuit tusarumasaannik oqaluffigisarpaat nassuiarnagulu Guutip naalagaaffia pilersinneqareersoq kunngilu Messias erniinnaq ajugaajumaartoq. (Daniel 2:44; 2 Timûtiuse 4:3, 4; sarĸúmersitat 6:2) Pruffiitioqqusersutut ’eqqissineq nalunaajaatigaat uffa eqqissineqanngitsoq’. Isumalluarneralli qanittukkut annilaanganermit taarserneqassaaq Guutip kammanneranit eqqorneqalerunik, taassumunnga eqqunngitsumik sinniisuugamik aqqalu annertuumik ataqqinaataajarlugu. Eqqunngitsumik upperisarsiornerup silarsuarmi tamarmi naalagaaffissuata siuttui, Biibilimi arnamut atortittartumut assersuunneqartut, ataavartumik nipangersinneqassapput tammartitsillutik eqqissineq nalunaajaatigitillugu. — sarĸúmersitat 18:7, 8.
16. (a) Jehovap nalunaajaasui sutut ilisimaneqartarpat? (b) ’Eqqissinermik nalunaajaasunit uffa eqqissineqanngitsoq’ qanoq ilillutik allaanerulluinnarpat?
16 Naak siuttut nuimasut pissaanillillu ilumoortuusaarniarlutik eqqissinermik neriorsuiuaraluartut inuit Guutip eqqissinermik piviusumik neriorsuutaanik upperisaqartut tatiginninnerat sanngillisinneqanngilaq. Ukiut hundredet sinnerlugit Jehovap nalunaajaasui Guutip oqaasianik ilumoorlutik illersuisutut, eqqunngitsumik uppperisarsiornermik sapiillutik assortuisutut aamma aalajaalluinnarlutik Guutip naalagaaffianut tapersersuisutut ilisimaneqarput. Inuit eqqissineq pillugu oqaatsinik kusanarsinnaagaluarlutik tunngaveqanngitsunik tupallersaannarrumanagit, ilungersuussillutik piviusunut, tassa ullutta sorsuffissaqarnerannut, eqqumatinniarsaraat. — Jesaja 56:10-12; Rûmamiut 13:11, 12; 1 Tásalûníkamiut 5:6.
Jehova nipangersimajunnaarpoq
17. Jehova qanittukkut nipangersimajunnaassasoq qanoq paasisariaqarpa?
17 Jehovap eqqunngitsumik upperisarsiornermut aamma ’nunami kunnginut [Jehovamut] taassumalu tanitaanut isumalioqatigiipilulersunut’ eqqartuussutip naammassinninnissaanut piffissaq aalajangersimavaa. (Tussiaat 2:1-6; sarĸúmersitat 16:13-16) Salomon ima oqarsimavoq: „Guutip naapertuilluartut naapertuilluanngitsullu eqqartuuttussaavai. Pisartut tamaasa piffissalersimavai.“ (Nalunaajaasup oqaasii 3:17) Piffissaq tamanna nalliuppat Jehovap ’nipangersimanera’ atorunnaassaaq. (Tussiaat 83:2; Jesaja 62:1; Jeremia 47:6, 7) Kunngini Messiasiusoq, Jesus Kristus, aqqutigalugu ’oqalussaaq’ akeraasa paasisinnaasaannik: „[Jehova] sorsukkiartorpoq pissarsuartut, sorsuttartutut imminut sukasarpoq, pitoraannerup nalunaaqutaanik nillerpoq, nipersuarmik pissaanini akeqqaminut takutillugu: ’Sivisoorujussuarmik nipangersimasimagaluarpunga oqaasissakkalu nunuinnarsimagaluarlugit. Maannali nilliavunga arnatut ernisuttutut, anertikkartarlunga ipisaanngusutullu anersaartarlunga. Qaqqat qattornillu naasuitsunngortissavakka naasuilu tamaasa panermit toquliortillugit. Kuuit tissortikkumaarpakka masarsuillu paqqersillugit. Tappiitsut ingerlatissavakka aqqutitigut nalusaasigut, tasissersuutissavakka ingerlavitsigut nalusatigut, sioraanni taarneq qaamasunngortissavara nunalu qattunertooq narsaannanngortillugu. Tassa tamakkuninnga iliussaanga, naammassingitsuussanngilakkalu.’“ — Jesaja 42:13-16.
18. Suna eqqarsaatigalugu Guutip innuttai qanittukkut ’nipangersimassappat’?
18 Jehova Guutiussutsi illersorniarlugu ’oqalulerpat’, innuttai imminnut illersuillutik oqaluttariaqarunnaassapput. Taava taakkununnga ’nipangersimaffissanngussaaq’. Guutip kiffai qangali inuusut pillugit oqaatsit makku aamma taakkununnga atuutissapput: „Tamatumuuna ilissi sorsuttussaassanngilasi. Angutit ilissi . . . uningaannarumaarpusi isiginnaarlugulu [Jehovap] qanoq ililluni annaatissagaasi.“ — 2 Israelikkut 20:17.
19. Kristusip anersaakkut qatanngutai erniinnaq sumik immikkut pisinnaatitaaffeqassappat?
19 Satan peqatigiissortaalu ajugaaffigineqarluinnassapput! Kristusip qatanngutai naalannarsisinneqartut naapertuilluassuseq pillugu ajugaanermut asseqanngilluinnartumut tamatumunnga peqataassapput, soorlu neriorsuutigineqartoq: ’Guutip eqqissisaasup Satan isikkassi ataanni aserorterasuassavaa.’ (Rûmamiut 16:20) Kiisami eqqissinissaq utaqqineqartoq piviusunngussaaq.
20. Qanittukkut qanoq iliornissamut piffissanngussava?
20 Jehovap pissaanerminik tupinnartumik ersersitsinerani tamatumani nunarsuarmi aniguisut tamarmik pilluaqqusaallutik inuussapput! Tamatuma kinguninngua angutit arnallu aalajaatsut toqusimasut makinnerannut piffissaq aalajangersagaq nalliuppat taakkunannga ilagineqalissapput. Kristusip ukiuni tusindini naalakkersuinera ilumut „naatitassanik ikkussuiffissaqarpoq . . ., nakorsaaffissaqarlunilu . . ., qarmaaqqiiffissaqarpoq . . ., illarfissaqarlunilu . . ., qittaserfissaqarlunilu . . ., asasamik pakkussivissaqarpoq . . . asanniffissaqarpoq.“ Aap, naassaanngitsussamullu ’eqqissivissaqarpoq’. — Nalunaajaasup oqaasii 3:1-8; Tussiaat 29:11; 37:11; 72:7. (wE 1/10 99)
Qanoq akissavigit?
□ Suna eqqissinermut piviusumut tunngaviua?
□ Sooq Jehovap nalunaajaasuisa ulluvut ’sorsuffissatut’ isigaat?
□ Guutip innuttaanut qaqugu ’oqaluffissaqarpa’ qaqugulu ’nipangersimaffissaqarluni’?
□ Qanoq ililluni qaqugulu Jehova nipangersimajunnaassava?
[Atuaqqissaarnermi apeqqutit]
[Qupp. 24-mi ungalusaq]
Jehovap makku aalajangersimasumik piffissalerpai
□ Gog Guutip innuttaanut saassussinissaminut pinngitsaalineqassaaq. — Hesekiel 38:3, 4, 10-12;
□ Nunami naalakkersuisut Babylon Angisuup aserornissaanik iliuuseqaqqullugit uummammiulissavai. — sarĸúmersitat 17:15-17; 19:2;
□ Savaaqqap katernaaffissaa nalliutitissavaa. — sarĸúmersitat 19:6, 7;
□ Harmagedonimi sorsunnissaq nalliutitissavaa. — sarĸúmersitat 19:11-16, 19-21;
□ Jesusip ukiuni tusindini naalakkersuilernini aallarniutigalugu Satan qilersussavaa. sarĸúmersitat 20:1-3.
Pisussat tamakku eqqaaneqarput Biibilimi allanneqaramik tulleriiaarnerat naapertorlugu. Qularinngilluinnarparput pisussat tallimat tamakku Jehovap aalajangersagaatut tulleriiaarlutik piffissalerneqarnerat eqqorlugu takkutissasut.
[Qupp. 26-mi assiliartat]
Kristusip ukiuni tusindini naalakkersuinerani ilumut
illarfissaqarlunilu . . .
asasamik pakkussivissaqarpoq . . .
asanniffissaqarpoq . . .
naatitassanik ikkussuiffissaqarpoq . . .
qittaserfissaqarlunilu . . .
qarmaaqqiiffissaqarpoq . . .