Ilisimassummik pissarsiniarit, perorsaatissinneqarnerlu ilassiuk

JEHOVA GUUTI innuttaasa ilinniartitsisorsuaraat. Imminuinnaq tunngasunik paasissutissiineq ajorpoq, kisianni aamma qanoq ilillutik inuusariaqarneranik ilinniartittarpai. (Jesaja 30:20; 54:13; Tussiaat 27:11) Assersuutigalugu Jehovap Israelikkut ilinniartitsisunik silassorissunik tunisarpai, soorlu pruffiitit Levikkuusullu, ingammillu palasit tamatumani pingaartumik inisissimaffeqarput. (2 Israelikkut 35:3; Jeremia 18:18) Pruffiitit inuit Guutip siunertaanik pissusiinillu ilinniartittarpaat aqqumillu eqqortumik tikkuullugit. Palasit Levikkullu inuit Jehovap inatsisaanik ilinniartittussaavaat. Utoqqaanertallu ilisimassusillit pissutsit ulluinnarpaluttut siunnersuutigisarpaat.

Salomon, Davidip ernera, Israelikkut ilisimasuinit allanit ilisimassuseqarneruvoq. (1 Kunngit 5:10, 11) Pulaartuisa akimanersaasa ilaata, Sabap kunngiata arnap, Salomonip naalannassusia pisuussusialu takugamigit, alutorinnilluni oqarpoq: „Uannut oqaluttuarineqartut maanna takusama affaannilluunniit inornerupput! Ilisimassutsit pisuussutitillu tusaamanerinit annerungaarput.“ (1 Kunngit 10:4-7) Salomonip ilisimassusia sumik isertugaateqarpa? Ukiumi 1037-mi u.n.s. Israelikkunnut kunnginngorami Jehova „ilisimassusermik silatussusermillu “ qinnuigaa. Jehovap qinnut tamanna nuannarigamiuk ilisimassusermik uummammillu silatussusilimmik tunivaa. (2 Israelikkut 1:10-12; 1 Kunngit 3:12) Tamanna eqqarsaatigalugu Salomon ’3000-inik ussatiliornera’ tupinnanngilaq. (1 Kunngit 5:12) Taakkua ilaat, ’Agurip oqaasii’ aamma ’kunngip Lemuelip oqaasii’ ilanngullugit, atuakkami Biibilimi Ussatit-nik taaneqartumi katersugaapput. (Ussatit 30:1; 31:1) Oqaatsit ilumoortut tassani oqaatigineqartut Guutip ilisimassusia ersersippaat, atortuujuartuullutillu. (1 Kunngit 10:23, 24) Pilluarlutik iluatsitsillutillu inoorusuttunut tamanut oqaatsit taakku allanneqaqqaarsimanermissut suli naleqartigipput.

Iluatsittumik inuuneq ileqqorissutsikkullu minguissuseq

Ussatit allanneqarnerannut siunertaq aallaqqaataani eqqartorneqarpoq: „Ussatit Salomop Daavip ernerata Israelikkut kunngiata eqqarsaatersuutai. Ussatit ilisimassuseqalersitsisarput ilisimasaqalersitsisarlutillu, taamalu inuk paasinnilersittarlugu silatuumik oqaaserineqartunik, atuiumalersillugu anusinngorsaammik sukanneraluarluni ineriartuutaasumik, ilinniartittarlugulu naapertuilluarnermik, iluarnermik peqqusersuissusermillu. Ussatit paasisakitsoq paasisimasaqalersittarpaat inuusuttullu ilisimasaqalersittarlugit isumatussuseqalersittarlugillu.“ — Ussatit 1:1-4.

Tassa ’ussatit Salomonip allassimasai’ qutsissumik siunertaqarput. Taakku „ilisimassuseqalersitsisarput ilisimasaqalersitsisarlutillu“. Ilisimassuseq ilaatigut isumaqarpoq pissusiviusunik paasinnissinnaaneq, ilisimasarlu tamanna atorlugu ajornartorsiutinik aaqqiisinnaaneq, anguniakkanik aalajangersimasunik angusisinnaaneq, ulorianartorsiornaveersaarsinnaaneq imaluunniit allat ikiorlugit taamaaliornissaannik. Qinerlerfissiami ima allassimasoqarpoq: „Ussatit-ni oqaaseq ’ilisimassuseq’ isumaqartarpoq inuunermik ilisimassuseq, silatuumik aalajangersinnaassuseq iluatsittumillu inuusinnaaneq.“ Ilisimasaqalernerup pingaaruteqassusia sumiginnarneqarsinnaanngilaq. — Ussatit 4:7.

 Ussatit Salomonip allassimasai aamma perorsaatissiipput. Perorsaaneq aqqutigalugu ilinniartinneqarneq pisariaqartipparput? Tamanna eqqarsaatigalugu paasisariaqarparput Biibilimut atatillugu perorsaaneq isumaqartoq perorsaatissiineq imaluunniit oqaanneqarneq. Biibilimik misissuisartoq naapertorlugu perorsaatissiineq tassaavoq „ileqqussanik paasisanik sungiusarneq namminissarsiortumillu sianiitsuliornermut periataartarnerit iluarsinnissaat “. Imminut perorsarnitta allanillu perorsaatissinneqarnitta eqqunngitsuliornaveersaartiinnarnata, aammali siumukarnissatsinnut kajumissaartarpaatigut. Ileqqussatigut minguikkusukkutta perorsaatissinneqarneq pisariaqartipparput.

Taamaalillutik Ussatit marloqiusamik siunertaqarput, atuartoq ilisimasaqartinniarlugu perorsaatissinniarlugulu. Ileqqussatigut perorsaatissiineq sianissutsikkullu piginnaassutsit assigiinngitsorpassuarnit isigineqarsinnaapput. Assersuutigalugu naapertuilluarneq iluarnerlu ileqqussanik najoqqutassiaapput Jehovap qutsissumik maligassiaanik maleruaanissatsinnut kajumissaarutaasut.

Ilisimassuseq assigiinngitsutigut paasineqarsinnaavoq, soorlu silaqassuseq paasisaqarnerluunniit, siuneqassuseq, silatussuseq eqqarsarsinnaassuserlu. Silaqassuseq paasisaqarnerluunniit tassaavoq aalajangersimasumik misissueqqissaarnikkut paasissutissat assigiinngitsut imminnut naleqqiunnerisigut qanoq attuumassuteqarnerannik paasinninneq. Siuneqassuseqaraanni pissuteqarnerup sunniuteqarnerullu imminnut qanoq attuumassuteqarnerannik paasisaqarneq pisariaqarpoq, aamma sooq iliuuseq aalajangersimasoq eqqortuunersoq eqqunngitsuunersorluunniit paasisinnaasariaqarpoq. Assersuutigalugu inuup silassorissup inuk alla navianartorsiulerpat takusinnaasarpaa, erniinnarluinnarlu navianartumut mianersoqqusinnaallugu. Kisianni pineqartoq sooq taamatut iliussalluni aalajangersimanersoq paasissagaanni pitsaanerpaamillu annaanniassagaanni siuneqassuseq pisariaqarpoq.

Silassorissut eqqarsaqqaartarput uppiasuunatillu. (Ussatit 14:15) Ajortoq siumut ilisimareertarpaat pinaveersimatitsisarlutillu. Ilisimassuseq ikiortigalugu peqqissunik eqqarsaatersorsinnaavugut isumassarsisinnaallutalu anguniagaqalersissinnaavaatigut inuunermut siunertaqalersitsisunik. Ussatit Biibilimeersut uagut ilisimassusermik pissarsiniarnissarput perorsaatissinneqarnermillu akuerinninnissarput siunertaralugit allanneqartut misissoqqissaarutsigit pissarsiffigilluassaqaagut. Allaat ’paasisakitsup’ ussatinik makkuninnga misissueqqissaartup silaqassuseq pigilersinnaavaa, ’inuusuttullu’ ilisimasaqalissapput isumatussuseqalissallutillu.

Silassorissunut ussatit

Biibilip ussatai paasisakitsunut inuusuttunullu taamaallaat allanneqarneq ajorput. Silassorillutik tusarusuttunut tamanut allanneqarput, soorlu kunngi Salomon oqartoq: „Inuk sianisooq tamakkuninnga tusartoq suli annerusumik ilisimasaqalersittarpaat; inuk silassorissoq ilinniartittarpaat eqqarsaatit sammiveqarluarnissaannik, taamalu paasinnilersittarlugu ussatinik assersuutinillu, ilisimassuseqartut oqaasiinik oqaatsinillu isumasiorissanik.“ (Ussatit 1:5, 6) Ilisimassuseqalereersimasup ussatinik misissuinini ilisimasaqarnerulissutigissavaa, taamaalillunilu silatuup inuunerminik qanoq ingerlalluartitsisinnaanermik piginnaassutsini ineriartortissallugu.

Ussatip oqaatsit ikittut atorlugit ilumoortoq pingaarutilik oqaatigigajuttarpaa. Biibilip ussataasa ilaat paasiuminaassinnaapput. (Ussatit 1:17-19) Ilaat nalorsitsaarutitut oqaatigineqarput — oqaaserisat paatsiveerunnartut paasiuminaatsullu paasiniarneqartariaqartut. Ussatit aamma assersuutitut oqaatigineqarsinnaapput. Paasiniassagaanni piffissaq isumaliutiginneqqissaarnerlu pisariaqarput. Salomonip, ussatinik taama amerlatigisunik isumaliutiginnissimasup, ilumut annikitsualuit ussatinik paasisinnaanermut pisariaqartut tamaasa paasisimavai. Ussatinik allannermini Salomonip piginnaassuseq tamanna atuartunut ingerlatinniarsaraa. Silassorissup tamanna arajutsissanngilaa.

Anguniagassamut alloriarneq siulleq

Sumi ilisimassutsimik perorsaatissiisussamillu ujaasisinnaavugut? Salomon ima akivoq: „[Jehovamik] mianerinninneq ilisimasaqarnermut aallarniutaavoq, sianiitsulli soqutiginngilaat ilisimassut anusinngorsaallu.“ (Ussatit 1:7)  Aap, Jehovamik mianerinninneq ilisimasaqarnermut aallarniutaavoq. Ilisimasaqanngikkutta ilisimassuseqalersinnaanngilagut perorsaatissinneqarnermillu ilassinnissinnaanata. Taamaattumik aqqummi ilisimassutsimut perorsaatissiinermullu sammisumi Jehovamik mianerinninneq alloriarneruvoq siulleq. — Ussatit 9:10; 15:33.

Guutimut mianerinninneq tassaanngilaq Guutimut siooraneq, akerlianilli ataqqinningaarneq pineqarpoq. Mianerinninneq tamanna piginagu ilumoortumik ilisimasaqalertoqarsinnaanngilaq. Inuuneq Jehova Guutimit pivarput, inuuguttalu aatsaat ilisimasaqalersinnaavugut. (Tussiaat 36:10; apustilit suliait 17:25, 28) Guuti tamanik pinngortitsisuummat, taassuma pinngortitaanik misissueqqissaarneq inuit ilisimasaannut tamanut tunngaviuvoq. (Tussiaat 19:2, 3; sarĸúmersitat 4:11) Guutip aamma Biibili isumassarsiaritippaa, ’atortussaasutut ajoqersuutaalluni inerteqqutaallunilu iluarsiartuutaallunilu iluarnermullu perorsaataalluni’. (2 Timûtiuse 3:16, 17) Ilumoortumik ilisimasaqarneq tamarmi Jehovaminngaaneersuummat, ilisimasaqarnermik ujaasisoq taassuminnga mianerinnittariaqarpoq.

Inuit ilisimasaat silamiutullu ilisimassusiat Guutimik mianerinninnermik amigaateqartut, sumik naleqarpat? Apustili Paulus allappoq: ’Naak ilisimatuut? Naak allakkanik ilisimasut? Naak silap matuma killisiuigajuttui? Silap matuma inuisa ilisimassusiat Guutip sianiissusinngortinnginnerpaa?’ (1 Korintumiut 1:20) Silamiorpaluttumik ilisimassusilik Guutimik mianerinninngikkuni paasissutissat tunngavigalugit eqqunngitsumik isummertarluni imminut sianiitsunngortippoq.

’Ujammit qungatsimut pinnersaatit’

Taava kunngip silatuup meeqqat inuusuttullu saaffigai: „Ernera, ataatavit oqaaqqissaarutai naalattarniakkit anaanannillu ilinniakkatit puigornagit! Tamakku tassaapput nigaliliaq kusanartoq niaqormiussaq ujamiullutillu qungatsimut pinnersaatit.“ — Ussatit 1:8, 9.

Israelitoqqami Guutip angajoqqaat meeqqaminnik ajoqersuinissaannik akisussaaffeqartippai. Mosesip ataataasut ima kajumissaarpai: „Oqaatsit taakku peqqussutillu ullumi ilinnut tunniussakka uummammiugiuassavatit. Qitornannut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ (5 Moses 6:6, 7) Aamma anaanaasut pingaarutilimmik sunniuteqartarput. Uimi oqartussaanera naapertorlugu nuliaasup hebræeriusup ilaqutariit malittarisassiannik atuutsitsisinnaavoq.

Biibilimi arlaleriarluni eqqaaneqarpoq ajoqersuineq ingammik ilaqutariinni ingerlanneqassasoq. (Evfisumiut 6:1-3) Meeqqat angajoqqaaminnut naalattut, nigaliliamik kusanartumik ujammimillu ataqqinaataasumik pisatsersorneqarsimappullusooq.

„Pinnattaaraluatik toqussutigiinnassavaat “

Ataataasup Asiamiittup ernini 16-nik ukioqartoq USA-mut ilinniariartorluni aallartinnagu ilagisartagapalaanut mianersoqquaa. Siunnersuutaa Salomonip mianersoqqussutaanit akisuaneruvoq: „Ernera, ajortuliortut maleruuffiginiaqinagit nakutinniartaraangatsit.“ (Ussatit 1:10) Salomonip aamma ajortuliortut ussassaarutaat eqqartorpai: „Ima oqarlutik: ’Ilaginiartigut! Toqutassatsinnik qamaarinnissaagut piaariinnarlutalu pinngitsuusunik terlinganeerilluta. Uumatillugit iissavavut toqusut inaat assigalugu, nungutitaalluinnarlit ilivermut aqqartitaasut assigalugit. Erlinnartuutaat suulluunniit tamaasa nanissavavut illuvullu tiguakkatsinnik immerlugit. Tamakkuninnga immeraateqatigissavatsigut, aningaasalli tamatta pigeqatigiissavavut.’ “ — Ussatit 1:11-14.

Ersarippoq ussassaarut tassaasoq pisuujuneq. Sukkasuumik pisuunngorniaramik „ajortuliortut “ allat peqquserluttunik nakuuserpaluttunillu pilersaarutiminnut ilaanissaannut napitittarpaat. Iluanaarniarlutik nakuuserniartut taakku allaat toqutsinngitsoorneq ajorput. Eqqorneqartut ’uumatillugit iisarpaat toqusut inaat assigalugu, nungutilluinnarlugit’, pigisaannik tamanik ujajaaffigisarpaat, soorlu ilerrup timi toqungasoq tamaat ungusaraa. Ajortut allat pinerluttuliornissaannut usserniartarpaat ’illutik tiguakkaminnik immerlugit’, aamma kissaatigaat  misilittagakitsup ’immeraateqatigissagaatik’. Tamanna uagutsinnut mianersoqqussutaavoq naleqquttoq. Inuusuttut pinerluttulioqatigiit ikiaroornartunillu tuniniaasut periaatsit taakkorpiat atorlugit allat pissooqataasunngortinniannginnerpaat? Amerlasuut sukkasuumik pisuunngorsinnaanissaminnut neriorsorneqarsimallutik niuerniaqataanermut unneqqarippasinngitsumut usserneqarsimannginnerpat?

Kunngi silassorissoq mianersoqqusilluni ima oqarpoq: „Ernera, tamakku ilaginiaqinagit, ingerlaviat ingerlaviginiaqinagu! Taakkumi ajortup tungaanut arpakkasuartarput aammillu kuisinissamut pinasuartarlutik.“ Qularutiginagu oqarsinnaavoq ajunaarumaartut: „Iluaqutaanngilaq napiaaniutit ivertikkaanni timmissat tamarmik isigineranni. Ikkuali imminnut qamaaripput napiaaniuserlutillu namminneq napitiffissaminnik. Taama pineqassapput iluanaarniapiluttut tamarmik, pinnattaaraluatik toqussutigiinnassavaat.“ — Ussatit 1:15-19.

„Iluanaarniapiluttut tamarmik “ aserornissamut ingerlapput. Inunnut allanut qamaarinninnertik namminneq ajoqutigissavaat. Piaaralutik ajortuliortut allamik isumataarniarpat? Naamik. Naak napiaaniutit takunngitsuugassaanngikkaluartut timmissat tamakkua tungaannaaviannut timmipput. Piumatussutsiminnit tappiillutik ajortut taamatut pinerluttuliortuaannassapput, naak qaquguluunniit taamaaliornerminnut akisussaatinneqassagaluarlutik.

Kina ilisimassutsip nipaanut tusarnaarniarpa?

Ajortuliortut inooriaasertik ajunaarnersuarmik kinguneqassasoq nalunnginnerpaat? Inooriaatsimik qanoq kinguneqarnissaanik mianersoqquneqarsimappat? Ilisimasaqannginnertik utoqqatsissutigisinnaanngilaat, ilisimassut paatsoorneqarsinnaanngitsoq aqqusinerni nalunaarutigineqarmat.

Salomon ima allappoq: „Ilisimassut aqqusinermi nipituumik torlulavoq inuit eqiteruffigisartagaanni tamani nipini tutsiutitillugu. Qarmat qaavanniilluni torlulavoq, illoqarfiup isaaffiini ammasuni ima oqaluppoq.“ (Ussatit 1:20, 21) Aqqusinermi ilisimassut nipituumik torlulavoq inuit tamarmik tusarsinnaaqqullugit. Israelitoqqami illoqarfiup isaaffiini utoqqaanertat silatuumik siunersuisarput eqqartuussisarlutillu. Jehovap oqaatsimini, Biibilimi, inunnit tamanit atuarneqarsinnaasumi ilisimassutsip ilumoortup nanineqarsinnaanissaa isumagisimavaa. Kiffaasalu Biibilip tusarliusaa sumi tamaani oqaluussissutigalugu ulapputigaat. Guutip ilumut ilisimassutsip kikkunnut tamanut nalunaarutigineqartarnera isumagaa.

Taava ilisimassuseq ilumoortoq qanoq oqarpa? Oqarpoq: „Ilissi nakutikkuminartut qanoq sivisutigisumik nakutikkuminartuunersi iluariinnassavisiuk? Qanoq sivisutigisumik mitaatilliisut nuannariinnarlugu mitaatilliiuassanerpat . . .? Torlulagaluarama tusarumanngilasi, assaga isaakkaluarakku ilaginnarparsi.“ Sianiitsut ilisimassutsip torlulanera arajutsigamikku, „qanoq iliornermik inerittui nerissavaat “. Namminneq ’tunussinertik eqqasuuteqannginnertillu nungutitaassutigissavaat’. — Ussatit 1:22-32.

Kisianni ilisimassutsip torlulaneranut tusarnissaminut piffissaqarniartoq qanoq pissava? Taanna „aarlerinaatsumik najugaqassaaq eqqissillunilu inuussalluni ajortunik aarlerigisaqarnani “. (Ussatit 1:33) Taamaattumik Biibilip ussatai arajutsinagit ilisimassummik pissarsiniartunut perorsaatissinneqarnermillu ilassinnittunut ilaaniarta! (wE 15/9 99)

[Qupp. 30-mi assiliartaq]

Ilisimassuseq ilumoortoq inunnit tamanit pissarsiarineqarsinnaavoq