Ilumut soqutigineqarpugut

INUIT tusintillit takutippaat allat soqutigalugit. Misigittaallutik imminuinnarlu eqqarsaatigalutik allat ajornartorsiutaat nammineq susassarinngitsutut isiginngilaat. Sapinngisartik tamaat iliorput allaat inuunertik navianartorsiortillugu, allat anniaataat millisarniarlugit. Suliassarli annertoqaaq, pissaanernilli nakooqisunit aqussinnaanngisaannit ajornarnerulersinneqarpoq.

Annertusaataapput piumatussuseq, politikkimik suliaqartut peqquserlunneri, sorsunnerit pinngortitallu nukingisa ajunaartitsinerisa aserorluinnarsinnaavaat „kaannersuaq qaangerniarlugu silatusaarnerpaamik aalajangersimasumillu anguniagaqarluni iliuuserineqartut,“ ajunaarfiusumi sulisoq oqarpoq. Kaannersuup atuukkunnaarsinnissaa ikiuiniaqatigiiffiit ajornartorsiutaasa amerlasuut ilaannaraat ataaseq. Aammattaaq akiorniarpaat nappaatit, piitsuussuseq naapertuilluannginnerlu sorsunnerullu kingunerisaanik naalliuutit taassaanngitsut. Ajornartorsiutilli qaangerneqangajalerpat?

Ajunaarnermi ikiuiniaqatigiiffiup aqunneqarnerani qullerssaasoq oqarsimavoq ’silatusaartumik  aalajangersimasumillu anguniagaqarlutik’ ikiuuttut kaannersuaq naalliuutillu qangerniarlugit, Jesus Kristusip assersuutaani samariamiumik naakkinnittumik oqaluttuarineqartumut assersuunneqarsinnaasut. (Lúkarse 10:29-37) Nangillunilu oqarpoq, qanorluunniilli annertutigisumik ilioraluarpata, eqqorneqartut amerliartorput. Taamaattumik aperivoq: „Samariamiu naakkinnittoq qanoq iliussava ullut tamaasa ukiorpassuarnilu ingerlavigisani aqqutigisaruniuk sapaatip-akunnerilu tamaasa aqqusernup sinaani ujajaaffigineqarsimasumik nassaartaruni?“

Tunniutiinnarnissaq ajornassanngeqaaq ’nappaammut’ toqussutaasinnaasumut taaneqartumut ’isumaginninnermi qasoqqaneq’, pakatsisimanermilu tunniutiinnarluni. Pimoorullugu allanik soqutiginnittut tunniutiinnaratillu, nersugassaapput. (Galâsiamiut 6:9, 10) Angut tuluit aviisiannut Jewish Telegraph allappoq Jehovap nalunaajaasui nersorlugit Nazistit nalaanni Tysklandimi „juutit tusintilippassuit Auschwits-imi atugarliuutiminnit inuunertik pigalugu aniguinissaannut ikiorsimammatigit“. Nangippoq: „Nerisassaaleqisoqarnerani nerisassaminnik qatanngutivut [juutit] aveqatigisarpaat!“ Nalunaajaasut pigisatik atorlugit sapinngisartik tamaat allat ikiornerat ingerlattuarpaat.

Piviusorli unaavoq nerisassatigut ikiuinerit suulluunniit immini inuit atugarliuutaat atorunnaarsissinnaanngimmagit. Mannali arlaannaatigulluunniit inuit misigittartut iliuuserisimasarpassuinut nikassaanerunngilaq. Atugarliuutinik annikillisitsiniarluni iliuuserineqartut tamarmik, iluaqutaapput. Siusinnerusukkut taaneqartut Jehovap nalunnajaasuisa tigusaqatimik atugarliuutaat annikillisissimavaat, naggataatigullu nazistit aqutsinerat nungutinneqarpoq. Silarsuarmili aaqqissuussaaneq naqisimaneqarnermut pisuusoq suli atuuppoq, sulilu inunnik allanik soqutigisaqanngitsunik ulikkaarpoq. Aap, „panatut ittunik kiguteqartunik savittullu ittunik alleroqartunik taamalu piitsunik ikiortissaqanngitsunillu nunamit nungusaasunik.“ (Ussatit 30:14) Immaqa eqqarsaatigisimavat sooq taamaannersoq.

Sooq piitsoqarlunilu naqisimannittoqarpa?

Jesus Kristus ilaanni oqarpoq: ’Piitsunik najorteqaannarpusi, piumasaraangassilu ajunngitsuliorfigisinnaavasi.’ (Mákorse 14:7) Jesus isumaqarpa piitsuussuseq naqisimanninnerlu atuuttuassasut? Isumaqarpa, ullumikkut ilaasa isumaqarnerattulli, atugarliuutit pilerssaarummut Guutimeersumut ilaasut inuit periarfissinniarlugit allanut qanoq soqutiginnitsiginerminnik takutitsinissaannut? Naamik, paasitinniaannarpaa maannakkut aaqqissuussaaneq atuutsillugu piitsuussuseq inuunermut ilaajuassasoq. Kisianni Jesusip aamma nalunngilaa Ataatami qilammiusup aallaqqaammulli siunertarinngikkaa pissutsit taamaattut nunami atuunnissaat.

Jehova Guutip nuna paratiisiusussatut pinngortippaa, piitsuussutsimik, eqqunngitsuliornermik naqisimaneqarnermillu atugaqarfiusussatuunngitsoq. Nalunngilaa inunnut qanoq isumaginnilluartigisoq, inuunermik nuannernerulersitsisunik annertoqisumik isumaginerisigut. Naatsiiviup angajoqqaatta siulliit Adamip Evallu inissinneqarfigisaata atia eqqaaginnarlugu tamanna takuneqarsinnaavoq. Edenip naatsiivianik taaneqarpoq, isumaqartoq „nuannaarneq“. (1 Moses 2:8, 9) Jehovap inuit pisariaqartitaannik pinngaarnerusunik piusinnaannguinnarlugit nuanniitsumik naqisimaneqartumillu inuunermik tuniinnanngilai. Piingortitsininilu naammassigamiuk, pinngortitani tamaasa takuai oqaatigaalu ’Ilumut ajunngingaartut“. — 1 Moses 1:31.

Soorli piitsuussuseq, naqisimanninneq atugarliuutillu allat taama siammarsimatigaat? Aaqqissuussaaneq ajortoq maannakkut ittoq atuuppoq pissutigalugu angajoqqaatta siulliit Guutimut pikititsinissaq qinersimammassuk. (1 Moses 3:1-5) Apeqqutinngortippaat ilumut Guutimit eqqortuliornerunersoq pinngortitaminit naalanneqarnissap piumasarinissaa. Taamaattumik Jehovap Adamip kinguaavi aalajangersimasumik piffissalerpai akuliuffigineqaratik nammineq aalajangernissaannut. Kisianni Guutip inuit ingerlanerannik soqutiginninnini ingerlatiinnarpaa. Imminut pikitsitsinerup ajoqusiinissaata iluarsiissutissaanik  aaqqissuussivoq. Ungasinngitsukkut Jehovap piitsuussuseq naqisimanninnerlu, aap atugarliornerit tamaasa nungutissavai. — Evfisumiut 1:8-10.

Ajornartorsiut inunnit aaqqiinneqarsinnaanngitsoq

Inuit pinngortinneqarneraniit ukiut hundredellit ingerlareersut, inuit Jehovap maligassiaanit qimagukkaluttuinnarsimapput. (5 Moses 32:4, 5) Guutip inatsisai najoqqutassiaalu inuit itigartittuarsimavaat taarsiulluguli imminnut akerariittuarsimapput, tamatumalu inernerisimavaa ’inuit ilaasa inoqatiminnut ajoqutaasumik pissaaneqarpallaalertarnerat’. (Nalunaajaasup oqaasii 8:9) Innuttaaqatigiinnik naapertuilluartunik inuiappassuit naalliuttut atugarliuutaannik atugaqarfiunngitsunik pilersitsiniaraluarnerit tamarmik, akerlilersorneqarput namminissarsiorlutik Guutip kisimi oqartussaassusianut naalatsigitinnissamit nammineq piumasamittut ingerlatserusunnerusunit.

Aamma allamik ajornartorsiuteqarpoq — ajornartorsiut immaqa amerlasuut upperisapalaaginnaaneralugu tunuartitassaat. Guutimut pikitsitsinermik aallartitsisup suli inuit ajortumik namminissarsiortumillu iliuuseqarnissaannut tammartittarpai. Pikititsinermik aallartitsisoq taanna tassaavoq Satan Diaavulu, Jesusillu taavaa ’silap matuma naalagaa’. (Juánase 12:31; 14:30; 2 Korintumiut 4:4; 1 Juánase 5:19) Apustili Johannesimut saqqummersinneqartumi, Satani nunami atugarliuutinut pisuunerpaasutut taaneqarpoq — tassaasoq allanit tamanit ’inuit najugaanni nunalinnik tamanik tammartitsiniartoq’. — sarĸúmersitat 12:9-12.

Ilaat inoqatiminnut qanorluunniit soqutiginnitsigigaluarunik, qaquguluunniit Satan Diaavulu peersissinnaassanngilaat imaluunniit aaqqissuussaaneq suli amerlaqisunik inuunermik naleqartoq allanngortissinnaassanngilaat. Inuiaalli ajornartorsiutaat aqqinniarlugit suna pisariaqarpa? Soqutigineqarnitsiguinnaq aqqinneqarsinnaanngilaq. Satanimik aaqqissuussaanillu naapertuilluanngitsumik tamakkiisumik peersitsinissaminut piumassuseqarlunilu pissaaneqartoq atorfissaqartinneqarpoq.

’Piumasat . . . nunami pili’

Guuti neriorsuivoq aaqqissuussaaneq ajortoq maanna atuuttoq nungutikkumallugu, aamma taamaaliornissaminut piumassuseqarlunilu pissaaneqarpoq. (Tussiaat 147:5, 6; Jesaja 40:25-31) Biibilimi Danialip allagaani siulittuutaasumi siulittuutigineqarpoq: „Guutip qilammiusup naalagaaffik qaqugumulluunniit atasussaq pilersikkumaarpaa, kingornalu inuiaat allat naalagaafffimmik pilersitsisinnaassanngillat. Guutip naalagaaffiata naalagaaffiit taakku tamaasa aserussavai sequmisillugit, namminerli soraajuitsumik atassavoq.’ (Daniel 2:44) Taannaavoq qilammi naalagaaffik soraajuitsoq ajunngitsuliorumaartorlu Jesus Kristusip eqqarsaatigisaa ajoqersukkani qinnummik uuminnga ilinniartikkamigit: ’Naalagaaffiit tikiulli; peqqusat qilammisut nunamissaaq pili.’ — Matîuse 6:9, 10.

Jehovap qinnutit taamaattut tusarumaarpai inuiaat ilumoorluni soqutigigamigit. Tussiaatit 72-imi siulittuutigineqartutulli Guutip ernini Jesus Kristus piginnaatissavaa, piitsut naalliuttut naqisimaneqartullu Jesusip naalakkersuineranik akuerinnittut ataavartumik atugarissaalernissaannut. Tussiaasiortoq allappoq: „Annikilliortitat kunngip [Guutip kunngiutitaata messiarsip] naapertuilluarnermik pineqartissavai, piitsut annaatissallugit, qunititsisullu sequmisillugit.. . . Annaatissavai piitsoq ikioqqulluni suaartartoq, annikilliortitarlu ikiortissaaleqisoq. Nallittussavai sanngiitsoq piitsorlu, ajorsartut inuunerat annaatissavaa. Akiliullugit iperagaatissavai qunutitaanermit persuaalliorfigineqarnermillu, inuunerat erlinnangaarmat taassuma isaani.’ — Tussiaat 72:4, 12-14.

Takorruukkami nalitsinnut attuumassuteqartumi, apustili Johannesip takuaa ’qilak nutaaq nunalu nutaaq’, aaqqissuussaaneq nutaaq Guutip pilersitassaa. Atugarliortunut tamanut tunissut tupinnangaartoq! Jehovap naammassiumaagai Johannesip siulittuutigai oqaatsinik ukungannga: ’Nipilu angingaartoq tusarpara qilammit oqartoq: Takussagissi Guutip ineqarfia inunniittoq, takkunanilu ineqarumaarpoq innuttariumaarlugillu, Guutillu nammineq najorumaarpai; qulliillu tamaasa isaanit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu  anniartoqarunnaassavoq, siulliit peermata. Issiavissaarsuarmi issiasoq oqarpoq: „Ata, suut tamaasa nutaanngortippakka.“ Uannullu oqarpoq: „Allagit, oqaatsit tamakku sallusuillutillu ilumoormata.“’ — sarĸúmersitat 21:1-5.

Oqaatsit taakkua upperisinnaavavut, sallusuillutillu ilumoormata. Erniinnaq Jehovap nunami soraarsikkumaarpai piitsuussuseq, kaanneq, naqisimanninneq, nappaatit eqqunngitsuliornerillu. Atuagassiap uuma akulikitsunik oqaatigisaatulli, takussutissarpassuaqarpoq piffissami neriorsuutit taakkua Biibilimi oqaatigineqartutulli piviusunngornissaata nalaani inuusugut. Guutip neriorsuutigisaa nuna nutaaq qanillivoq! (2 Pîtruse 3:13) Ungasinngitsukkut Jehovap ’toqu nungutissavaa piujunnaarsillugu’ aamma ’isit tamaasa qullingiarumaarpai’. Jesaja 25:8.

Taamali pisoqarnissaata tungaanut nuannarutigisinnavarput ullumikkut inoqarmat ilumoorlutik allanik soqutiginnittunik. Nuannaarnissamut pissutissaanerusoq tassaavoq Jehovap soqutigimmatigut. Erniinnaq naqisimanninneq naalliuutillu tamaasa nungutissavai.

Jehovap neriorsuutai tatigilluinnarsinaavatit. Kiffa Josua taamaaliorpoq. Qulanngivissumik tatiginnilluni itsaq Guutip innuttaanut oqarpoq: ’Tamassilu uummatissigut tarnissigullu ilisimassavarsi ajunngitsut [Jehovap] Guutissi ilissinnut neriorsuutigisaasa tamarmik ilaat ataasiinnarluunniit eqquutinngitsoorsimanngilaq.’ (Josva 23:14) Taamaatumik maannakkut aaqqissugaaneq atuukkallartillugu misilinneqarnernut atorumaagassannut tunniutiinnassanngilatit. Isumakuluutitit tamaasa Jehovamut pisikkit, isumassorumavaatit. — 1 Pîtruse 5:7. (wE 15/9 99)

[Qupp. 7-mi assiliartat]

Guutip neriorsuutaani nunami nutaami piitsoqassanngilaq, naqisimannittoqarani, napparsimasoqarani naapertuilluanngissuseqaranilu