Kia allat qanoq innerat soqutigaa?

„Naqisimaneqartut qullii“ sarfartunngorsimapput sakkortuut. Qulliit taakkua silarsuarmi tamarmi naqisimaneqarnemit eqqugaasunit amerlaqisunit kuutsinneqarput. Akulikitsumik misigisimapput ’tuppallersaasussaqaratik’ imaluunniit qanoq innerminnik soqutiginnittoqanngitsoq. — Nalunaajaasup oqaasii 4:1.

NAAK qullilisoqangaarsimagaluartoq inoqarpoq allat naalliuutaannik paasinnikkusunngitsunik. Allat atugarliorneri isiginngitsuusaarpaat soorlu Jesusip assersuutaasa ilaanni palasi Levikkuusullu angut saassunneqartoq, tilliffigineqarluni toqungajattorlu aqqusernup sinaanut qimaannarsimagaat. (Lúkarse 10:30-32) Nammineq ilaquttatillu ajortinnatik, allat qanoq innerat eqqarsaatigineq ajorpaat. Soorlu oqartut: ’Allat qanoq innerat sussagakku?’

Tupaallaatigisariaqanngilarput. Apustili Paulusip siulittuutigaa amerlasuut „ulluni kingullerni“ inuujumaartut „asanniuitsut“. (2 Timûtiuse 3:1, 3) Qimerluuisup ullumikkut amerlasuut misigittaassusiat assuaraa. „Irlandemiut pissusitoqaat kingornuttagaallu allanik paarsineq imminullu tunniusimaneq, taarserneqarsimavoq imminut salliutilluni pissuseqarnermik.“ Silarsuarmi tamarmi amerlasuut namminneq soqutigisatik pingaarnerutippaat, allat qanoq innerat soqutiginngilluinnarlugu.

 Tamarmik paarineqartariaqarput

Allanik paarsineq soqutiginninnerlu ullutsinni amigaataalersimaqaat. Assersuutigalugu eqqaajuk Tysklandimi angut kiserliortoq „fjersynimi sioraani issiasoq nanineqartoq — juullip nalaani toqunerminit ukiut tallimat qaangiuttut“. Taanna „avinnikoq, innarluutilik kisermaaq“ maqaasineqarsimanngilaq, inuunerup atugarititai alianartut pillugit narrutsassimasoq, aatsaalli illumut akiliutigisartagai aningaaserivimmi uninngasuutai nungummata. Qanoq innera soqutigineqarsimanngilaq.

Aamma eqqarsaatigikkit pissaanilinnit, piumatuunit naalagaaffigineqartut eqqugaasut ikiorneqarsinnaanngitsut. Nunap ilaani 200.000-it toqupput (innuttaasut sisamararterutaat) „naqisimaneqarnermit kaannermillu“ nakuusernikkut nunaaatiminnik arsaarneqareerlutik. Imaluunniit eqqarsaatigikkit meeqqat amiilaarnartunik taassaanngitsunik iliuuseqarfigineqarsimasut. Nalunaarusiami allassimavoq: „Procentinngorlugu amerlassusillit meeqqat [nunat ilaanni] naakkittaatsuliornernut amerlangaartunut isiginnittuusimasut — toqoraanernut, unataanernut pinngitsaaliinernullu, ilaanni meeqqanit allanit piliarineqartunit — ingasalluinnarput.“ Tupinnanngilaq eqqunngitsuliornernit taamaattunit eqqugaasoq qiaatigaluni aperippat: „ernumagineqanngilanga?“

FN-ip nalunaarusiaa malillugu inuit 1,3 milliardet nunani ineriartorfiusuni ullormut 1 dollar ataallugu inuussutissaraat. Qularnanngilaq eqqarsaatigisimassagaat qanoq innertik soqutigineqarnersoq. Qimaasunut tusintilippassuarnut aamma taamaappoq „nuanniitsumik qinigassaqartunut tammaarfimmi ajorluinnartumiinnissaq nunamiluunniit tikilluaqqusaaffiunngitsumi imaluunniit nunagisamut sorsunnermik ikinnerussutillilluunniit akerleriinnerannit suli avissaartuussimaffiusumut uterniaraluarnissaq,“ avisimi The Irish Times-imi nalunaarusiami allassimavoq. Nalunaarusiap taassuma eqqarsaatersuut nikallornartoq imaraattaaq: „Sequnngerit, pingasunullu kisitsillutit, meeraq toqoqqammerpoq — ullumikkut meeqqat 35.000-it nerisakilliornermik nappaammilluunniit pinngitsoortinneqarsinnaasumik toqussuteqassapput.“ Tupinnanngilaq amerlasuut neriuutaarulluinnarnerminni narrutsassimanerminnilu ikioqqullutik nilliammata. — Takuuk Job 7:11.

Kisianni taamaattariaqarpa? Piviusorsiornerua upperissallugu qanoq innerput eqqarsaatigiinnarnagu, aammali atugarliuutit unitsinnissaannut anniaatit aliasuutillu iluarsiiviginissaannut pissaaneqartumik nassaassaqartoq.

[Qupp. 3-mi suminngaanneernera]

A. Boulat/Sipa Press