„Nunarsuup isuinut “ qaammaqqusersueqataavoq

APUSTILI Paulus „nunarsuup isuinut “ anersaakkut qammaqqusersuisutut atorneqarsimavoq. Tamatuma kingunerisaanik ’inuunermik naassaanngitsumik pissaqaqqusaasut’ amerlasuut uppertunngorput. — apustilit suliait 13:47, 48; Jesaja 49:6.

Aamma anersaakkut qaammaqqusersuerusussuseq William Lloyd Barrymi, Jehovap Nalunaajaasuisa Siulersuisoqatigiivinut ilaasortaasimasumi ersarippoq, kristumiutummi ilungersuussilluni qasusuillunilu inuusimavoq. Qatanngut Barry juulip ulluisa 2-ianni 1999-imi toquvoq, Hawaiimi ataatsimeersuarnermut peqataatilluni.

Lloyd Barry New Zealandimi 1916-imi decembarip 20-ani inunngorpoq. Anaanaata ataataatalu tamanna sioqqullugu sallusuissut Biibilimeersoq, C. T. Russellip atuakkiaani Napasuliaq Alapernaarsuiffiup Peqatigiiffiata naqitertitaani, saqqummersinneqartoq soqutigilersimavaat. Taamaattumik qatanngut Barry ilaqutariinni kristumiutut tunniulluinnarsimasuni alliartorpoq.

Naak timersorneq ilinniartitaanerlu soqutigigaluarlugit ilisimatuussutsikkullu ilinniagaqaraluarluni, qatanngutip Barryp anersaakkut ittut pingaartinnerujuarpai. 1939-mi januaarip aallaqqaataani tamakkiisumik kiffartulerpoq, Australiami Peqatigiiffiup immikkoortortaqarfiani Betelikkormiunut ilaalerami. 1941-mi Peqatigiiffik naalakkersuisunit inerteqqutigineqalermat, qatanngut Barry allaffimmi suliuarpoq, ilaannikkut uppeqatimi kajumissaarneqarnissaannik allatsinneqartarluni. Oqaluussinermilu maligassaalluartutut siuttuusarpoq.

1942-mi februaarimi qatanngutip Barryp tamakiisumik kiffartortoq alla aappartaraa. Nuliata asasaata, Melbap, ukiut ingerlaneranni nunarsuup ilaani assigiinngitsorpassuarni aalajaalluni suleqatigiuarsimavaa. Nunami allami kiffartulernissamut pingaartumik iliuuseqarput USA-mi Napasuliaq Alapernaarsuiffiup Atuarfiata Gileadip klasseata 11-annut ilaagamik. Inuppassuit ’nunarsuup isuitut’ isigisaannut, Japanimut, aallartitaapput. 1949-mi novembarimi Japanimut tikikkamik illoqarfimmi umiarsualiviusumi Kobemi ajoqersuiartortitatut kiffartulerput. Taamanikkut Japanimi nutaarsiassamik nuannersumik oqaluussisartut 12-innaapput. Qatanngutip Barryp Japanimiut oqaasii ileqquilu ilikkarpai, Japanimiullu ukiuni 25-ni tulliuttuni kiffartoqatigisani asangaalerlugit. Inuit ’inuunermik naassaanngitsumik pissaqaqqusaasut’ asammagit Japanimi qatanngutit amerliartuinnartut takulluarsinnaavaat, taamaattumillu ukiuni qulilinni arlalinni immikkoortortaqarfimmi nakkutilliisutut kiffartorluarsimavoq.

1975-ip qeqqata tungaani Japanimi nalunaajaasut 30.000-t missaanniilersimammata, Barrykkut New Yorkimut Brooklynimut nuutsinneqarput. Kristumiutut tanitatut qatanngut Barry Jehovap Nalunaajaasuisa Siulersuisoqatigiivinnut ilaasortatut kiffartornissaminut toqqarneqarpoq. (Rûmamiut 8:16, 17) Allattut allaffianni sulilissagami misilittagaqarluarnini iluaqutigingaarpaa. Nunani assigiinngitsuni immikkoortortaqarfinnilu assigiinngitsuni kiffartorsimagami Naqiterisitsisut Ataatsimiititaliaannut ilaasutut piukkunnaateqarluarpoq.

Taamattoq qatanngutip Barryp nunat kangianiittut inuilu nuannariuarpai. Atuarfimmi Gileadimi atuartut Betelikkormiullu nalunngilaat oqalugiaraangami oqaaseqaraangamilu ajoqersuiartortitat pillugit nuannersunik oqaluttuarisarai. Qatanngutip Barryp nammineq misigisani qiimmatsalluni oqaluttuarigaangamigit ’nunarsuup isuinut’ Guutip naalagaaffia pillugu oqaluussissutiginninneq uummarissarpaa. Misigisimasaasa ilaat eqqaaneqarput inuunerminik oqaluttuaani The Watchtower-imi 15. septembarimi 1960-imoortumi.

Qularinngilarput qatanngutip Barryp maannakkut ’Kristus kingornusseqatigalugu’ suli ’inuunermik naassaanngitsumik pissaqaqqusaasut’ soqutigissagai. Soorunami inuit taassuminnga angutitut anersakkut ittunik pingaartitsisutut Jehovamut tunniulluinnartutut Guutillu innuttaanik asannittutut ilisimannittut asannittullu tamarmik maqaasissavaat. Taamaattorli nuannaarutigaarput qatanngutip Barryp nunarsuarmi inuunermi naanera tikivillugu aalajaattuarmat. — sarĸúmersitat 2:10. (wE 1/10 99)

[Qupp. 8-mi assiliartaq]

Lloyd Barry aamma John Barr 1988-imi qinerlerfissiaq Insight on the Scriptures saqqummersinneqarmat

[Qupp. 8-mi assiliartaq]

Atuarfiup Gileadip klasseata 11-ani atuarsimasut ukiut 40-t qaangiummata Japanimi naapeqatigiittut