„Pisartut suut tamarmik aalajangersimasumik piffissaligaapput“

„Qilaap ataani pisartut suut tamarmik aalajangersimasumik piffissaligaapput.“ — NALUNAAJAASUP OQAASII 3:1.

1. Inuit naammalluinnanngitsut sukkut piginnaanikippat, tamannalu ilaannikkut sumik kinguneqartarpa?

INUIT akulikitsumik oqartarput: „Siusinnerusukkut taamaaliortariaqaraluarpunga.“ Immaqaluunniit oqartarput: „Utaqqisariaqaraluarpunga.“ Oqaaserisat tamakkua takutippaat inunnut naammalluinnanngitsunut aalajangeruminaassinnaasoq qagugorpiaq aalajangersimasut suliarineqartariaqarnersut. Piginnaanikinneq tamanna pissutigalugu ilaat imminnut attaveqatigiikkunnaarsimapput. Pakatsisimanermik aliasunnermillu kinguneqartarpoq. Ajornerusumillu, ilaasa Jehovamut peqatigiissortaanullu uppernertik sanngiilisissimavaat.

2, 3. (a) Sooq Jehovap piffissamik aalajangiisarneranik akuerinninneq silatusaarnerua? (b) Biibilip siulittuutaasa eqquutitinneri eqqarsaatigalugit qanoq oqimaaqatigiissumik isiginnittaaseqartariaqarpugut?

² Jehovap inuit piginngisaannik ilisimassuseqarami piumaguni iliuutsit tamarmik kinguneri siumut nalunngereersinnaavai. Tassaavoq ’qangarsuarli nalunaarutiginnittoq qanoq pisoqarnissaanik’. (Jesaja 46:10) Taamaattumik kukkunani piffissamut eqqorluinnartumut piumasaminik iliorsinnaavoq. Uagulli naammalluinnanngitsumik piffissamik aalajangiisarnerput tatigivallaarnagu siltusaassaagut Jehovap piffissanik aalajangiisarnera akuerigutsigu!

³ Assersuutigalugu kristumiut inersimalluartut ilumoorlutik Biibilimi siulittuutigineqartut eqquutitinnissaannut piffissaq Jehovap aalajangersagaa utaqqivaat. Taassumunnga kiffartorneq ulapputigitillugu najoqqutassiaq Upputit 3:26-mi allassimasoq eqqaamavaat: „Pilluaataasarpoq [Jehovap] annaassinissaa nipangersimalluni utaqqigaanni.“ (Naleqqiuguk Habakkuk 3:16.) Tamanna ilutigalugu qularinngilaat Jehovap eqqartuussiffissaa siulittuutigineqartoq ’nalliutiaanngikkaluaruni . . . eqquutinngitsoorani piviusunngorumaartoq’. — Habakkuk 2:3.

4. Amos 3:7-mi aamma Matîuse 24:45-mi allassimasut qanoq ikiorsinnaavaatigut Jehovamik naammagittarluta utaqqisinnaanissatsinnut?

⁴ Kisianni Biibilimi allassimasut ilaat imaluunniit Napasuliaq Alapernaarsuiffiup naqitigaani nassuiaanerit ilaat paaserpianngikkutsigik, naammagittaannissatsinnut pissutissaqarnerpugut? Silatusaarnerussaaq Jehovap tamakkuninnga paasinarsititsinissaa utaqqigutsigu. „[Jehovami] qanoq iliortarinngilaq pilersaarutini kiffaminut pruffiitinut saqqummerseqqaartinnagit.“ (Amos 3:7) Neriorsuut tamanna nuannersorujussuuvoq! Paasisariaqarparpulli Jehovap pilersaarutini piffissamut nammineq  pitsaanerusorisaminut saqqummersissagai. Tamanna siunertaralugu ’kiffaq ilumoorlunilu silatooq’ akisussaaffeqartippaa innuttani ’piffissaq eqqortoq nalliuttaraangat nerisassaannik tunisaqqullugit’. (Matîuse 24:45, NV) Taamaattumik isumakuluttariaqanngilagut isumatsattariaqarnataluunniit apeqqutit aalajangersimasut suli nassuiarneqarsimanngimmata. Akerlianik tatigisinnaavarput Jehova naammagittarluta utaqqigutsigu, kiffaq ilumoorlunilu silatooq aqqutigalugu ’piffissaq eqqortoq nalliuppat’ pisariaqartitatsinnik tunissagaatigut.

5. Nalunaajaasup oqaasii 3:1-8-mi allassimasut eqqarsaatigigutsigik qanoq iluaqutigisinnaavarput?

⁵ Kunngi Salomonip silatuup sammisassat assigiinngitsut 28-it, tamarmik ’aalajangersimasumik piffissaligaasut’, eqqaavai. (Nalunaajaasup oqaasii 3:1-8) Salomonip oqaasii paasigutsigik tamatuma ikiussavaatigut Guutip isaani sammisassanut aalajangersimasunut qaqugu piffissanngortoq qaqugulu piffissanngorsimanngitsoq aalajangissallugu. (Eprîarit 5:14) Taava inuunerput paasisaqarnermut tamatumunnga naapertuutitissinnaavarput.

„Qiaffissaqarpoq illarfissaqarlunilu“

6, 7. (a) Ullumikkut suut pissutigalugit inuit isumakuluutillit ’qiasarpat’? (b) Silarsuup matuma qanoq ililluni pissutsit ilungersunaqisut maanna atuuttut suusupaginiarsarigaluarpai?

⁶ Naak ’qiaffissaqaraluartoq illarfissaqarlunilu’ kia illarfissaq pingaartinnerussannginnerpaa? (Nalunaajaasup oqaasii 3:4) Ajoraluartumilli silarsuarmi pingaartumik qianissamut pissutissaqarfiusumi inuuvugut. Tusagassiorfiit nutaarsiassanik nuanniitsunik ulikkaarput. Annilaarutigisatsinnik tusartarpavut qanoq inuusuttut atuarfimmi atuaqatitik aallaagaat, angajoqqaat qitornatik atornerluttaraat, peqqarniisaarniat inuit pisuussuteqanngitsut toqukkaat aqqunartiterlugilluunniit, imaluunniit ajunaarnersuit pinngortitamit pissuteqartut inuit inuunerannik pigisaannillu annertuumik annaasaqaataasut. Meeqqat kaattut ilorpasittunillu isillit qimaasimasullu sumiiffeqanngitsut sunik tamanik annaasaqarsimasut fjernsynimi takusarpavut. Oqaatsit siornatigut tusarsimanngisaannakkatta, soorlu naggueqatigiinnik nungutitsineq, AIDS, bakteriat atorlugit sorsunneq, El Niño, maannakkut assigiinngitsutigut isummakkut uummatikkullu isumakuluuteqalersittarpaatigut.

⁷ Aap, ullumikkut silarsuaq alianartunik ernumatsassimanernillu ulikkaarpoq. Taamaattorli aliikkutassaqartitsisut, pissutsit ilungersunassusiat suusupaginiarlugulusooq, aliikkutassiat imaqanngitsut, kusanarluanngitsut, akulikitsumillu kanngunartuliornermik nakuusernermillu imaqartut neqeroorutigisarpaat, taamaalillutik inuit allat ajorsangaarnerannik puigornissatsinnut tammartinniarluta. Kisianni sianiitsumik quiasaarineq soqqusaatsumillu illarneq aliikkutassiat taamaattut kingunerisaat  tassaanngillat nuannaarneq piviusoq. Nuannaarneq imaluunniit tipaatsunneq Guutip anersaavata inerititaa Satanip silarsuaata tunniussinnaanngivippaa. — Galâsiamiut 5:22, 23; Evfisumiut 5:3, 4.

8. Ullumikkut kristumiut sorleq pingaartinnerussavaat: illarneq imaluunniit qianeq? Nassuiaruk.

⁸ Nalunnginnatsigu silarsuaq qanoq alianartigisumik atugaqartoq, paasivarput maannakkut illarneq pingaartinneqarpallaartariaqanngitsoq. Maannakkut aliikkutassiat sukisaarsaatillu inuunitsinni salliutinneqartariaqanngillat ’nuannaarniarnerlu’ anersaakkut ittunik noqqaassuteqarniarnermit pingaarnerutinneqartariaqarnani. (Naleqqiuguk Nalunaajaasup oqaasii 7:2-4.) ’Silap piinik atuisut’ ’atuinngitsutut issapput,’ apustili Paulus allassimavoq. Sooq? ’Silap matuma pissusia peerumaarmat’ imaluunniit ’nikittarmat’. (1 Korintumiut 7:31, NV) Kristumiut ilumoortut ullut tamaasa inuuffigisamik ilungersunassusiat ilisimallugu inuupput. — Filípimiut 4:8.

Qiagaluarlutik pilluarput!

9. Pissutsit alianartut suut ulersuup siornani atuuppat, tamannalu ullumikkut uatsinnut qanoq pingaaruteqarpa?

⁹ Inuit ulersuup siornani inuusut inuuneq pingaartinngilaat. Ulluinnarni sammisassatik aallulluinnartarpaat „inuillu ajussusiat annertussiartuinnartoq“ aliasuutiginagu, ’nunarsuullu iluaatsuliornernik ulikkaarnera’ sumiginnarlugu. (1 Moses 6:5, 11) Jesusip pissutsit ajoraluartut tamakku innersuussutigai, siulittuutigaalu ullutsinni inuit tamatumunnga assingusumik qisuariarumaartut. Ima mianersoqqusivoq: ’Soorlumi ulluni taakkunani ulersuup siornagut iliortut nerillutillu imerlutillu nuliarlutillu uinillutillu ulloq taanna Noap umiarsuarmut iserfia tikillugu paasinagulu, aatsaalli ulersuaq nalliummat tamaasa nungutillugit, taamattaaq ikkumaarpoq inuup ernerata tikiuffissaani.’ — Matîuse 24:38, 39.

10. Israelikkut Haggajip nalaani inuusut qanoq takutippaat piffissaq Jehovap aalajangersagaa pingaaruteqartoq paasinagu?

¹⁰ Ukiut 1850-t missaat ulersuup kingorna, Haggajip nalaani, Israelikkuusut amerlasuut tamatumunnga assingusumik anersaakkut ittut soqutigivallaanngilaat. Namminneq soqutigisatik ulapputigisaramikkik paasinngilaat Jehovap soqutigisaasa pingaartinneqarnissaannut piffissanngortoq. Ima atuarpugut: „Innuttakka ima oqarput: ’[Jehovap] illussaanik nappaafissaq suli nalliutinngilaq.’ [Jehovalli oqaasia pruffiitikkut Haggajikkut pivoq imaalluni: ’Ilissinnut nalliussimanerpa piffissaq illuni qisunnik iikkersukkani ineqalerfissarsi uffa uanga illuga manna nakkaanikuinnaasoq? Taamaattumik ima oqarpoq katersaarsuit [Jehovaat]: „Eqqarsaatiginiarsiuk qanoq ittunik atugaqartusi.“’“ — Haggaj 1:1-5.

11. Immitsinnut qanoq aperisariaqarpugut?

¹¹ Ullumikkut Jehovamut nalunaajaasuugatta Israelikkullu Haggajip nalaani  inuusut assigalugit Jehovamut akisussaaffeqarlutalu immikkut pisinnaatitaaffeqarluta, uaguttaaq eqqarsaatigisariaqarparput qanoq ittunik atugaqartugut. Silarsuarmi pissutsit Guutip aqqanut ataqqinaataanngitsut aliasuutiginerpavut? Erloqissutiginerparput inuit Guuteqarnera upperiumanngikkaanngassuk imaluunniit piaaralutik taassuma naapertuilluartunik najoqqutassiai sumiginnaraangatigik? Inuttut Ezekielip ukiut 2500-t matuma siorna takorruugaatut qisuariarnerpugut? Taakku pillugit ima allassimavoq: „[Jehovap] angut . . . allaammik qiterummiulik torlulaffigaa ima oqarfigalugu: ’Jerusalaat tamaat ingerlaviguuk, angutillu maajunnartut tassani suliarineqartut pillugit anersaarulullutik kappialasut qaavisigut nalunaaqutsikkit.’“ — Hesekiel 9:3, 4.

12. Hesekiel 9:5, 6-imi allassimasoq ullumikkut inuusunut qanoq pingaaruteqarpa?

¹² Oqaluttuap tamatuma ullutsinnut pingaaruteqarnera ersarippoq angutinut arfinilinnut sakkunik aserorterutissanik tigummiartunut peqqussut atuarutsigu: „Angut una malillugu Jerusalaat ingerlavigalugu naakkinninnasi asattuussinasilu toqoraagitsi. Utoqqaat, inuusuttut, niviarsiat, arnat meeqqallu toqorarlugit nungutissavasi; nalunaaqutsigaasulli attunngilluinnassavasi. Illernartuutiga aallarnerfigisiuk!“ — (Hesekiel 9:5, 6) Annikilliornartussaq qanilliartortoq tamanna anigussagutsigu paasisariaqarparput maannakkut ’qiaffissaqartoq’.

13, 14. (a) Inuit qanoq ittut Jesusip pilluarnerarpai? (b) Nassuiaruk sooq isumaqartutit allaatiginninneq tamanna Jehovap Nalunaajaasuinut naleqqulluartuusoq.

¹³ Soorunami Jehovap kiffaasa silarsuup matuma alianartunik atugaqarnera pillugu qiasarmata ima paasisariaqanngilaq pilluarsinnaanngitsut. Taamaanngivippoq! Tassaappummi nunarsuarmi inuit pilluarnerpaartaat. Jesusip pilluarnermut aalajangiisuusut allaatigai ima oqarluni: ’Pilluarput [anersaakkut pisariaqartitaqarnerminnik miserratiginninngitsut, NV]. . . aliasuttut . . . qanilaartut . . . iluarnermut kaattut imerusuttullu . . . nallittuisut . . . minguitsumik uummatillit . . . eqqissisitsisut . . . iluarneq pissutigalugu qinugineqartut.’ (Matîuse 5:3-10) Uppernarsaatissat amerlasuut takutippaat Jehovap Nalunaajaasuisa upperisarsioqatigiittut, upperisarsioqatigiinnit allanit tamanit allaanerusut, allaaserisamullu tamatumunnga naapertuullutik.

¹⁴ Ingammik 1919-imiilli pallorfiginninnerup ilumoortup pilerseqqinneqarneranit Jehovap innuttai pilluartut ’illarnerminnut’ pissutissaqarluarput. Anersaakkut ittumik qiimmaallannartumik misilittagaqarput, ukiuni 500-kkunni u.n.s. Babylonimit utersimasut assigalugit: „[Jehovap] allanngortippagu Sionip pineqaataa sinnatuinnartutut ikkumaarpugut. Taava qanivut immerneqassapput illarnermik, oqqavullu  qiimmattarnermik. . . . [Jehovap] angingaartumik iliorfigimmatigut tipaatsussaagut.“ (Tussiaat 126:1-3) Nuannaaraluarlutilli Jehovap Nalunaajaasuisa silatuusaarlutik nalitta ilungersunassusia eqqaamavaat. Silarsuassaq nutaaq piviusunngorpat nunarsuarmiullu ’inuuneq piviusoq tigoreerpassuk’ taava naassaanngitsussamut illarfissaqassaaq qiaffissaqarunnaarlunilu. — 1 Timûtiuse 6:19; sarĸúmersitat 21:3, 4.

„Pakkussivissaqarpoq pakkussinngitsoorfeqarlunilu“

15. Sooq kristumiut ikinngutinik qinersinerminni immikkoortitsisarpat?

¹⁵ Kristumiut immikkoortitsisinnaassuseqartariaqarput ikinngutigisassatik eqqarsaatigalugit. Paulusip mianersoqqussutaa eqqaamasarpaat: ’Tammarnaveeritsi; ajortut ikinngutigalugit ileqqut ajunngitsut aserortarput.’ (1 Korintumiut 15:33) Kunngi Salomon silatooq allassimavoq: „Sianisuunik peqateqartoq ilisimassuseqalersarpoq, silaatsulli ikinngutaa ajortumeertussaasarpoq.“ — Ussatit 13:20.

16, 17. Jehovap nalunaajaasuisa peeraqarneq, aappassiariinneq aappariinnerlu qanoq isisgisarpaat, aamma sooq?

¹⁶ Jehovap kiffaasa inuit immissut Jehovamik asannittut taassumalu naapertuilluassusianik nuannarisaqartut ikinngutimissut qinertarpaat. Ikinngutimik ilaginissaat nuannaarutigalugulu pingaartittarpaat, kisianni inuusuttut akornanni peeralersoqattaarpallaarneq naak ullumikkut nunani amerlasuuni nalinginnaagaluartoq akuerinngilaat. Peeraqarneq nuannaarniarnerinnartut isiginagu aappariinnissamulli piarersaanertut pingaartutut isigisarpaat, aatsaallu timikkut, isumakkut anersaakkullu inersimalersimasut — Biibililu naapertorlugu katinnissamut kiffaanngissuseqartut — taamaaliorsinnaapput. — 1 Korintumiut 7:36.

¹⁷ Ilaat isumaqassapput peeraqarnermik aappariinnermillu isiginnittaaseq tamanna qanganisarpalaartoq. Jehovalli nalunaajaasuisa ilagisartakkanit tatineqarneq pissutigalugu ikinngutinik qinersinertik imaluunniit peeraqarnermik aappariinnermillu isiginnittaasertik allanngortikkumanngilaat. Nalunngilaat ’ilisimassut qitornamigut iluartuutitaasartoq’. (Matîuse 11:19) Jehovap suut tamaasa nalunngilai, taamaattumik taamaallaat ’Naalakkami’ katinnissamik siunnersuutaa ilumooruppaat. (1 Korintumiut 7:39; 2 Korintumiut 6:14) Kukkusumik isuma manna, aappariinneq iluatsitsinngippat avinnissaq averusernissarluunniit akuerisaasut, isumaqatiginnginnamikku tuaviorlutik katikkumanngillat. Aapparisassap naleqqulluartup naninissaanut piffissaq naammattoq atorniarpaat, paasigamikku aappariittut neriorsuereerunik Jehovap inatsisaa atortuusoq: ’Tamanna pillugu marluujunnaarlutik uiniupput ataaseq. Taamaattumik Guutip katititai inuup avissaartissanngilai.’ — Matîuse 19:6; Mákorse 10:9.

18. Suna aappariinnermut pilluartumut pitsaasumik aallarniutaasinnaava?

¹⁸ Aappariinneq inuuneq naallugu akisussaaffiuvoq pilersaarusiorluartariaqartoq.  Angut soorunami imminut aperissaaq: ’Arnaq taanna uannut tulluartuua?’ Aammali ima aperinissaa pingaaruteqarpoq: ’Uanga taassumunnga tulluartuunerpunga? Kristumiutut inersimalluarnerpunga, pingaartumillu, anersaakkut pisariaqartitaanik isumassuisinnaanerlunga?’ Uissaq nuliassarlu tamarmik nammineq Jehovamut akisussaaffeqarput anersaakkut nukittuunissaminnut, aappariinnermullu aalajaatsumut Guutip akuerisinnaasaanut peqataasinnaanissaminnut. Aappariit kristumiut tusindilikkuutaat uppernarsarsinnaavaat tamakkiisumik kiffartorneq aappariinnermut pilluartumut pitsaasumik aallarniutaasoq, kiffartornermi tamatumani tunisineq tigusinermit pingaartinneqarnerusarmat.

19. Sooq kristumiut ilaasa aappaqannginnissartik qinertarpaat?

¹⁹ Kristumiut ilaat ’pakkussinngitsoorallarput’ aalajangersimagamik aappaqanngikkallarniarlutik nutaarsiassaq nuannersoq siuarsarniarlugu. (Nalunaajaasup oqaasii 3:5) Allat aappaqalernissartik kinguartikkallartarpaat anersaakkut piukkunnarsarniarlutik tulluartumik aappaqalernisaminnut. Aammali eqqaamasariaqarpavut kristumiut kisimiittut aappariinnerup ajunngequtaanik qanigisaqarnissamillu maqaasigisaqartut kisianni tulluartumik aapparisinnaasaminnik nassaarneq ajulersut. Qularinngissinnaavarput Jehovap nuannaarutigigaa taakkua aappaqalerniarniarminni najoqqutassiat Guutimeersut unioqqutikkumanngimmatigik. Uaguttaaq taakkua ilumoornerat pingaartittariaqarparput tulluartumillu periaaseqarluta annertoqqusersortariaqarlugit.

20. Suna pillugu allaat aappariit ilaat ilaannikkut ’pakkussinngitsoortarpat’?

²⁰ Aappariittaaq ilaannikkut ’pakkussinngitsoortariaqarpat’? Taamaassinnaavoq, Paulus ima allassimammat: ’Imannali oqarpunga, qatanngutikka: ullussat sivikipput; kingorna nuliaqaraluartut nuliaqanngitsutut issapput.“ (1 Korintumiut 7:29) Taamaattumik aappariinnerup nuannersortai pilluaqqussutaalu ilaannikkut akisussaaffiit teokratiimut tunngasut pissutigalugit tunuartinneqarallartariaqarput. Tamatuminnga oqimaaqatigiissumik isiginnittaatsip aappariinneq sanngillisinagu nakussatsissinnaavaa, uiusoq nuliaasorlu tarmarmik eqqaasinneqarmata aappariinnermi Jehova aalajaatsitsisuullunilu ilaasariaqartoq. — Nalunaajaasup oqaasii 4:12.

21. Sooq aappariit meeraqalerusuttut isornartorsiussanngilagut?

²¹ Aappariit ilaasa meeraqannginnissaq qinertarpaat Guutimut kiffartornerminni kiffaanngissuseqarnerujumallutik. Tassaavoq pilliut annertooq, Jehovallu tamanna naapertorlugu akilerumaarpai. Biibilimi nutaarsiassaq nuannersoq pissutigalugu aappaqannginnissaq kajumissaarutigineqartillugu, tamanna pissutigalugu meeraqannginnissaq toqqaannartumik kajumissaarutigineqanngilaq. (Matîuse 19:10-12; 1 Korintumiut 7:38; naleqqiukkit Matîuse 24:19 aamma Lúkarse 23:28-30.) Taamaattumik aappariit tamarmik namminneq atukkatik misigissutsitillu naapertorlugit tamanna aalajangertariaqarpaat. Qanorluunniillu aalajangeraluarunik aappariit isornartorsiorneqartariaqanngillat.

22. Suup paasisinnaanissaa uatsinnut pingaaruteqarpa?

²² Aap, „qilaap ataani pisartut suut tamarmik aalajangersimasumik piffissaligaapput“. Allaat „sorsuffissaqarpoq eqqissivissioqatigiiffissaqarlunilu“. (Nalunaajaasup oqaasii 3:1, 8) Allaaserisami tulliuttumi nassuiarneqassaaq sooq pingaaruteqartoq taakkua arlaannut sorlernut maannakkut piffissanngornersoq paasissallugu. (wE 1/10 99)

Nassuiarsinnaavigit?

□ Sooq pingaaruteqarpa nalunagu ’suut tamarmik aalajangersimasumik piffissaligaasut’?

□ Sooq ullumikkut ’qianissamut’ pissutissaqarpa?

□ Sooq kristumiut naak ’qiagaluarlutik’ ilumut pilluarpat?

□ Kristumiut ilaasa qanoq takutippaat isumaqarlutik ullumikkut ’pakkussinngitsoorfiusoq’?

[Atuaqqissaarnermi apeqqutit]

[Qupp. 16-imi, 17-imilu assiliartat]

Naak kristumiut silarsuarmi pissutsit ’qiassutigigaluaraat’ . . .

. . . tassaapput silarsuarmi inuit pilluarnerpaartaat

[Qupp. 18-imi assiliartaq]

Tamakkiisumik kiffartorneq aappariinnermut pilluartumut aallarniutaavoq pitsak