Sooq taama piffissakit-sigaagut?

PIFFISSAQ. Immaqa oqaaseq nassuiaruminaatsipparput, nalunngilarpulli piffissakittuaannartugut. Nalunngilarputtaaq piffissaaleqinartoq. Aap, oqartarpugut: „Ullut ingerlalertoqaat.“

Taamaattorli ersarippoq taalliortoq tuluk Austin Dobson eqqorluarnerusumik oqaaseqartoq 1877-imi ima allassimagami: „Oqarpit piffissaq peeruttoq? Naamik, piffissaq maaniiginnarpoq, uagummi peerutilerpugut.“ 1921-mi Dobson toqugami ukiuni 80-ingajanni toqungaoreersimavoq; piffissarli ingerlajuarsimavoq.

Piffissaq naammangaartoq

Inuiannik Pinngortitsisoq pillugu Biibilimi allassimavoq: „Qaqqat erniunngikkallarmata nunarsuarlu pinngortitaanngikkallarmat Guutiuvutit naassaanngilluinnartumut.“ (Tussiaat 90:2) Imaluunniit soorlu The New Jerusalem Bible-mi nutserneqartoq: „Naassaanngilluinnartumik Guutiuvutit.“ Taamaattumik piffissaq Guutitut naassaanngilluinnartumik atassaaq!

Guutimut naassaanngilluinnartumut akerliusumik inuit ima allaatigineqarput: „Uumitsannerpit ulluvut qaangiussulertortippai, ukiuvut suiallannerinnartut ipput. Ukiummi inuuffigisassavut tassa ukiut 70-it, imaluunniit 80-it, nukissaqassagutta, ukiutta ajunnginnersaat allaat sulipiloornermik ulikkaarput. Ukiummi ingerlalertoqaat, timmisugut soorlu.“ — Tussiaat 90:9, 10.

Sooq ullumikkut inuuneq taama sivikitsigaa, naak Biibilimi ersarissumik ajoqersuutigineqaraluartoq Guutip inuit naassaanngitsumik inuunissaat siunertarigaa? (1 Moses 1:27, 28; Tussiaat 37:29) Killeqanngitsumik inuuneq Guutip siunertarisaa pinnagu sooq inuit amerlanertigut agguaqatigiissillugu ullunit 30.000-init sivikinnerusumik inuusarpat? Sooq inuit taama piffissaaleqitigisarpat? Kina imaluunniit suna tamatumunnga akisussaava? Biibilimi tamanna ersarissumik paasinartumillu akineqarpoq. *

Piffissaaleqilluinnarneq

Utoqqasaat uppernarsarsinnaavaat ukiuni qulilinni kingullerni inuuneq ulappiffiunerujartuinnarsimasoq. Tusagassiortup Dr. Sybille Fritschip eqqartorpaa ukiut 200-t kingulliit ingerlaneranni sapaatip-akunneranut sulisarfik nalunaaquttap-akunneranit 80-init 38-nut millisinneqarsimasoq, „taamaattorli suli piffissaaleqineq uggorisarparput“. Ima nassuiaavoq: „Piffissaqarneq ajorpugut; piffissaq aningaasanik naleqarpoq; piffissaaleqineq issanngunarpoq; inuuneq ulappiffiulluinnarpoq.“

 Nassaat nutaat inuit nutaanik periarfississimavaat siornatigut takorloorneqarsinnaanngitsunik. Kisianni iliuuserisinnaasat periarfissallu amerliartuinnartillugit inuit taamaaliornissamut piffissakinnertik paatsiveerussimaassutigisarpaat. katsisimassutiginerusarpaat. Ullumikkut nunani amerlasuuni inuit nalunaaqutaq naapertorluinnarlugu inuusariaqarput, piffissamit piffissamut ulapputtarlutik. Ataataasoq nalunaaqutaq 7.00 suliartulissaaq, anaanaasup nalunaaqutaq 8.30 meeqqat atuarfimmukaatissavai, aataajusoq 9.40 nakorsiartariaqarpoq, ilaqutariillu tamarmik unnummut 19.30 ataatsimiigiarnissamut pingaarutilimmut pikisariaqarput. Sammisariaqakkat assigiinngitsorpassuit naammassisariaqaratsigik sukisaarsarnissamut piffissaqarpianngilagut. Taamaattumillu ulluinnarni qasunaannartumik sulineq ulapittuaannarnerlu maalaarutigaavut.

Uaguinnaanngitsormi piffissakippugut

Guutip akeraa, Satan Diaavulu, inuit maannakkut sivikippallaartumik inuunerannut pissutaasoq, maannakkut nammineq ajussutsiminit eqqorneqalerpoq. (Naleqqiuguk Galâsiamiut 6:7, 8.) sarĸúmersitat 12:12-imi Naalagaaffiup Messiasikkoortup qilammi pilersinneqarnera eqqaaneqarmat neriuutissaqartilerpaatigut: ’Tamanna pillugu qilaat taakkunanilu ineqartusi ukorsii, tipaatsugitsi. Eqqanaq nuna immarlu, Diaavulu ilissinnut aqqarmat kamattorsuulluni, piffissakissutsi nalunnginnamiuk.’

Biibili malillugu ukiunik naatsorsuisarneq tatiginartoq aamma Bibiilip siulittuutaasa eqquukkiartornerat naapertorlugit maannakkut ’piffissakissutsip’ tamatuma naalernerani inuuvugut. Nuannaarutigisinnaavarput nalunnginnatsigu Satan erniinnaq piffissaarutivissasoq! Qilersugaareerpat inuit naalattut naammalluinnartunngortinneqassapput Jehovallu aallaqqaataaniilli siunertaatut naassaanngitsumik inuusinnaalissallutik. (sarĸúmersitat 21:1-4) Taamanikkussaq piffissaaleqisoqarunnaassaaq.

Takorloorsinnaaviuk naassaanngitsumik inuuneq — inuujuarneq — qanoq paasisariaqartoq? Taamanikkussaq piffissaaleqiffigisaqartariaqassanngilatit. Naammassinngisaqaraluaruit aqagu, sapaatip akunnerata tulliani imaluunniit ukiup tulliani, aap, naassaanngitsussamut, naammassinissaanut piffissaqarumaarputit!

Piffissaq maannakkut atuuttoq silatuumik atoruk

Nalunnginnamiuk inuit sunnerneqarnissaannut killilimmik piffissaqarluni, Satanip inuit ulapittuartinniarsarai, Guutip naalagaaffia pilersinneqareersoq pillugu nutaarsiassaq nuannersoq tusaqqunagu. Taamaattumik siunnersuut Guutimeersoq manna maleruartariaqarparput: ’Taamaattumik mianersoqqissaaritsi saqilluarniarlusi, ilisimaatsutut pinnasi ilisimatuutulli; ullullu piginnaaffiusut asiutinnaveersigik, ullut ajormata. Tamanna pillugu siuneqanngitsunngornaveeritsi, [Jehovalli] peqqusaa sunaasoq sianiginiarsiuk.’ — Evfisumiut 5:15-17.

Piffissarput silatuumik atortariaqarparput pingaaruteqarluinnartut sammillugit, ataavartumik piffissarput asiuutittariaqanngilarput pingaaruteqanngitsut pisariaqanngitsullu sammillugit. Mosesitut isumaqartariaqarpugut taassuma Jehova uummammit pisumik ima qinnuigigamiuk: „Ilinniartitsigut ulluvut kisittaqqullugit uummatitsigut ilisimalersilluta.“ — Tussiaat 90:12.

Aap, ullumikkut kikkut tamarmik ulapipput. Taamaattorli Jehovap nalunaajaasuisa kajumissaarniarpaatsit piffissap erlinnartup pigisavit ilaa Guutip naalagaaffiata ataani naassaanngitsumik inuunissap anguniarnissaanut Guutip piumasaqaataanik ilinniarnissannut atoqqullugu. Sapaatip-akunneri tamaasa nalunaaquttap-akunnera ataasiinnaq Biibilip atuaqqissaarnissaanut atortarukku ’Jehovap peqqusaa sunaasoq sianigilersinnaavat’, taamaalillutillu nammineq oqaatsit makkua piviusunngornissaat misigiumaarlugu: „Nigorsimajuk ajortoq, ajunngitsuliorillu, taava eqqissillutit tamatigut inuusinnaassaatit. Iluartut nuna kingornutissavaat najugaqassallutillu tassani naassaanngitsussamut. — Tussiaat 37:27, 29. (wE 1/10 99)

[Quppernerup ataani ilanngussaq]