Sooruna neriorsuutivut eqqortittariaqarivut?

„ANGUT minnerpaamik neriorsuisoq qineruk; taassumami minnerusumik pakatsisikkumaarpaatit.“ Ilaanni Bernard Baruch, præsidentimut siunnersuisoq, maanna toqoreersoq, taama oqarpoq. Ullutsinni soorlulusooq neriorsuutit unioqqutinneqartussaasut. Aappariilerumalluni neriorsuutit, niuernermik isumaqatigiissutit aamma meeqqani piffissaqarfiginerujumallugit neriorsuutit pineqarput. Ikiliartuinnavissut isumaqarput neriorsuutit eqqortinneqartariaqartut.

Soorunami nassaassaqartuaannarpoq neriorsuutiminnik eqqortitsinianngisaannartunik. Allat neriorsuisarput naammassisinnaanngisaminnik, imaluunniit oqaatsitik unioqqutittarpaat ajornannginnerummat.

Miserratigineqarsinnaanngilaq nalaatsornikkut pisoqartillugu neriorsuummik eqqortitsinissaq ajornakusoorsinnaasoq. Kisianni neriorsuummik unioqqutitsinissaq taama soqutaanngitsigaa? Neriorsuutivut ilumooruttariaqarpavut? Jehova Guutip maligassiaa sammilaarutsigu paasitissavaatigut sooq allanut neriorsuilussinnassanngitsugut.

Jehovap neriorsuutini eqqortittarpai

Guutip pallorfigisatta atini neriorsuutimi eqqortinnissaannut attuumassuteqartippaa. Biibilip nalaani inuup atiata taassuma pissusii ersersittarpai. Ateq Jehova aamma taamaappoq isumaqarami „pilersitsivoq “. Neriorsuutimi eqquutitinnissaat siunertarisamilu naammassinissaat Guutip aqqata isumaata imarai.

Qanga inuiaqatigiinnut Israelikkunnut neriorsuutini tamaasa eqqortittaramigit Jehova aterminut naapertuuttumik iliortarpoq. Neriorsuutit tamakku pillugit kunngi Salomon oqarpoq: „Unnersiutigineqarli [Jehova], neriorsuutini eqqortilluinnarlugu innuttaminut Israelikkunnut nunassaannik tunisisimasoq! Kiffamigummi Mosesikkut oqaasiisa ajunngitsut ilaat ataasiinnarluunniit maangaannanngilaq.“ — 1 Kunngit 8:56.

Jehova ima tatigisassaatigimmat apustili Paulus imatut oqarsinnaasimavoq: ’Guutip Abraham unnersorfigigamiuk, angeqqiminik naqqisigissassaqannginnami imminik naqqissigaluni uppernarsaavoq.’ (Eprîarit 6:13) Aap, Jehovap atini qulakkeerutigaa neriorsuutimi unioqqutinnginnissaanut, allaat eqqortitsinissani qanorluunniit akeqassagaluarpat. (Rûmamiut 8:32) Jehovap neriorsuutiminik eqqortitsiuaannarnerata neriuutissippaatigut tarnimut inuunermulluunniit kisatut ittumik. — Eprîarit 6:19.

Jehovap neriorsuutai siunissarpullu

Neriugisatsinnut, uppernitsinnut, aap, inuunitsinnullu tamanut Jehovap neriorsuutaasa eqquunnissaat aalajangiisuuvoq. Suunuku neriuutigigivut? ’[Guutip] unnersuutaa naapertorlugu ilimagisaqarpugut qilassanik nutaanik nunassamillu nutaamik iluarsuseqarfissanik.’ (2 Pîtruse 3:13) Biibili tunngavigalugu aamma upperisinnaavarput ’toqusut makikkumaartut, iluartullu iluaatsullu’. (apustilit suliait 24:15) Qularutiginngivipparput inuuneq manna tassaanngitsoq inuuneq tamarmi. Apustili Johannes naapertorlugu ’uatsinnut unnersuutigisaa’ tassaavoq ’inuuneq naassaanngitsoq’. (1 Juánase 2:25) Kisianni Jehovap oqaatsimini neriorsuutai uatsinnut  tunniunneqartut siunissaannarmut atuuttussaanngillat. Maannakkorpiaq inuunermut siunertaqartitsilereerput.

Tussiaasiortoq ima erinarsorpoq: „[Jehova] qanippoq torlorfigisiminut tamanut, . . . annikilliornerminni nillianerat tusartarpaa.“ (Tussiaat 145:18, 19) Guutip aamma qularunnaarsippaatigut ’qasusoq nakussatsittarlugu, nukillaangasoq pissatsittarlugu’. (Jesaja 40:29) Aamma tuppallernaqaaq nalunagu Guutip ’artukkatsinnik ussersinnavianngikkaatigut, kisianni aniguinissaq ussernartumut aappiullugu pinngortissagaa’. (1 Korintumiut 10:13) Neriorsuutit tamakkua ilaasa eqquunneri nammineerluta misigisimagutsigik, nalunngilarput Jehova tatigilluinnarsinnaallugu. Pilluaqqussutit neriorsuuterpassuarnut Guutip tunniuttagaanut eqqortittagaanullu tunngasut eqqarsaatigalugit, taassumunnga neriorsuutivut qanoq isigisariaqarpavut?

Guutimut neriorsuutivut eqqortittariaqarpavut

Neriorsuut pingaarnerpaaq tunniussinnaasarput tassaavoq Guutimut tunniulluinnarnerput. Taamatut alloriarutta takutissavarput Jehova naassaanngitsumik kiffartuukkusullugu. Guutip neriorsuutai artornanngillat, kisianni pissutsit aaqqissuussaaneranni matumani ajortumi inuutilluta piumasaata naammassinissaata ajornaatsuinnaanissaa ilimagisinnaanngilarput. (2 Timûtiuse 3:12; 1 Juánase 5:3) ’Issumut assallatserut aqunnialerutsigu’ Jehovamullu tunniulluinnarsimasutut kiffaalersimagutta erneranullu Jesus Kristusimut ajoqersuganngorluta, tunummut silarsuup piinut taamaatissimasatsinnut qivianngisaannassaagut. — Lúkarse 9:62.

Immaqa sanngiissuseq ajugaaffiginiarsuaarumaarlugu, kristumiutullu pissuseq immikkut ittoq ineriartortikkumallugu kristumiutulluunniit kiffartoriaaseq aalajangersimasoq sulissutigineruniarlugu qinunikkut Jehovamut neriorsuivugut. Neriorsuutinik tamakkuninnga eqqortitsinissatsinnut suut ikiuisinnaappat? — Naleqqiuguk Nalunaajaasup oqaasii 5:1-4.

Neriorsuutit ilumoortut uummammit isumamillu pilerfeqarput. Taamaattumik Jehovamut neriorsuigaangatta aamma qinunikkut uummaterput taassumunnga ammartariaqarparput ernumassutivut, kissaatigisavut sanngiissutsivullu ammasumik oqaluttuaralugit. Aamma qinunikkut Jehovamut neriorsuigutta aalajangernitta neriorsuutitsinnik eqqortitsiniarnitsinni nakussatsissavaatigut. Guutimut neriorsuutivut akiligassatut isigisinnaavavut. Angisuumik akiligassaqaraanni akilersorneqartariaqarpoq. Jehovamut neriorsuutitta eqqortinnissaannut piffissaq sivisuusinnaavoq. Kisianni sapinngisatsinnik akulikitsumik tunisarutsigu takutissavarput oqaatsivut aalajangiussimagivut, tamannalu naapertorlugu pilluaqqussavaatigut.

Aammattaaq neriorsuutivut ilumoorukkivut uppernarsarsinnaavarput akulikitsumik qinunikkut, immaqa ullut tamaasa, eqqarnerisigut. Ataatatsinnut qilammiusumut takutissavarput pingaartikkivut, taamaalillutalu ataatsikkullu neriorsuutitsinnik eqqaasinneqartassaagut. Tamatumunnga atatillugu David maligassaalluarpoq. Erinarsorluni Jehova qinnuigaa: „Kappialanera tusaruk, Guuti, tusaaniaruk qinnutiga. . . . Aqqit unnersiutigissavara naassaanngitsumut, neriorsuutikkalu eqquutitillugit ullut tamaasa.“ — Tussiaat 61:2, 9.

Oqaatsivut eqqortittarutsigik allanit tatigineqarneq angussavarput

Guutimut kristumioqatitsinnulluunniit neriorsuutivut asuliinnartissanngilavut. Jehova periaatsimik aalajangersimasumik iliuuseqarfigisinnaanngilarput qatanngutivullu allatut iliorfigalugit. (Naleqqiuguk Juánasip agdlagai sujugdlît 4:20.) Qaqqami oqaluutsimini Jesus oqarpoq: ’Oqaasersi imaakkili: aap, aap, naagga, naagga.’ (Matîuse 5:37) Ilaatigut ’uppeqatitsinnut ajunngitsuliorsinnaavugut’ qulakkeerniartuaannarutsigu allat oqaatsivut tatigisinnaagaat. (Galâsiamiut 6:10) Neriorsuutivut eqqortittuaannarutsigik allat tatiginerulissavaatigut.

Neriorsuut unioqqutinneqartoq aningaasartaqaraangat ajoqusiineq annerusarpoq. Taarsigassarsianik akilersuinissaq, suliassamilluunniit naammassinninnissaq niuernermiluunniit isumaqatigiissummik eqquutitsinissaq pineqaraluarpata kristumiup oqaatsini eqqortittariaqarpai. Taamaaliorneq Guutimit iluarineqarpoq ’qatanngutigiillu isumaqatigiillutik najortigiinnerannut’ tatigeqatigiinnerannullu pingaartorujussuaq nakussatsinneqartarpoq. — Tussiaat 133:1.

 Neriorsuutinik eqqortitsinngitsoortoqarpat ilagiit inuillu toqqaannartumik pineqartut ajoquserneqarsinnaapput. Nakkutilliisoq angalasartoq oqarpoq: „Niuernermut tunngasumik assortuunnerit — inuk ataaseq misigippat isumaqatigiissummik unioqqutitsisoqartoq — tamanna tamanit ilisimaneqalertarpoq. Tamanna pissutigalugu qatanngutit ilaasa pineqartoq illersulerpassuk naalagaaffilersaarfimmilu pissutsit sukanganarsisinnaapput.“ Taamaattumik pingaaruteqaqaaq isumaqatigiissuteqarnerit tamarmik eqqarsaatigineqarluartarnissaat allaganngortittarnissaallu. *

Nioqqutissat akisuut nioqqutigisarunigit imaluunniit arlaannik aningaasanik nalilinnik aallarniuteqarniaraanni mianersortariaqarpoq, ingammik nammineq iluanaarutigissagunigit. Aammattaaq mianersortariaqarpoq ingasaassinaveersaartariaqarlunilu nioqqutissat aalajangersimasut peqqinnissamulluunniit tunngasut iluaqutissartaasa ingasaallugit ilimasaarutiginnginnissaat piviusunngorsinnaanngimmata. Asanninnerminit killinneqarlutik kristumiut navianartut tamaasa naammassiniakkamut atassuteqartut nassuiartariaqarpaat. (Rûmamiut 12:10) Qatanngutit amerlanersaat niuernermik misilittagakikkamik immaqa tatigiinnarpaatigut uppeqatigigamitigut. Alianasoqaaq tatiginninnerat atornerlukkutsigu!

Kristumiutut niuernermi periaatsit unneqqaserluttut atorlugit ingerlatsisinnaanngilagut imaluunniit inuit allat soqutigisaat soqutiginngivillugit. (Evfisumiut 2:2, 3; Eprîarit 13:18) Jehovap ’ineqarfiani najugassarsisinnaassagutta taassuma iluarissappatigut tatigisassaassariaqarpugut. Allaat ’nammineq ajunaarutigissagaluarutsiguluunniit uppernarsaatitsinnik aalajangiussisimaannassaagut’. — Tussiaat 15:1, 4.

Israelimi eqqartuussisoq Jefta uppernarsaavoq Guutip Ammonikkunnut ajugaatippani uteruni parsiarlugu illumit anisoq siulleq ikikkagassatut pilliutigissallugu. Parsiarlugu anisoq tassaavoq qitornatuaa, taamaakkaluartoq neriorsuutini taamaatinngilaa. Panini uummatikkut iluunngarluni akuersisoq pilliutigaa Guutip illernartuutaani ataavartumik kiffartortussatut — pilliut qularnanngitsumik annernarsimasoq assigiinngitsutigullu akisungaartoq. — Eqqartuussisut 11:30-40.

Ilagiinni nakkutilliisut isumaqatigiissutiminnik eqquutitsinissaminnut immikkut ittumik akisussaaffeqarput. Timûtiusimut agdlagkat sujugdlît 3:2 naapertorlugu nakkutilliisoq ’assuarnaatsuussaaq’. Oqaaseq ’assuarnaatsoq’ griikerit oqaasiannit „tigusassaanngitsutut, isornaatsutut, eqqortumik assuarineqarsinnaanngitsutut “ isumalimmit nutserneqarpoq. „Isumaqaannnanngilaq angut taanna ajunngitsumik tusaamaneqartoq kisianni aamma nersornaatigisariaqarpaa.“ (A Linguistic Key to the Greek New Testament) Nakkutilliisoq assuarnaatsuusussaammat neriorsuutai tatigineqartuarsinnaapput.

Neriorsuutit allat eqqortinneqartussat

Kristumioqatiginngisatsinnut neriorsuutivut qanoq isigisariaqarpavut? Jesus oqarpoq: ’Qaamasorsi qaamali inunnut, ajunngitsuliasi taakkununnga takoqqullugit ataatarsilu qilammiusoq unnersiutigeqqullugu.’ (Matîuse 5:16) Neriorsuutitsinnik eqqortitsisarnitsigut kristumiut tusarliusaannik allat tusarumalersinnaavavut. Naak silarsuarmi tamarmi unneqqarissutsimut najoqqutassat millisinneqariartoraluartut inuit amerlanersaasa assuarnaassuseq iluaraat. Guutimut tullermullu asanninnerput takutissinnaavarput neriorsuutitta eqqortittarnerisigut, tamannalu naapertuilluassutsimik  asannittunit orniginartinneqassaaq. — Matîuse 22:36-39; Rûmamiut 15:2.

Ukiumi oqaluussiffiusumi 1998-imi Jehovap nalunaajaasuisa nalunaaquttap-akunneri milliardit sinnerlugit atorpaat Guutip naalagaaffianik nutaarsiassamik nuannersumik tamanut oqaluussissutiginninnerminni. (Matîuse 24:14) Immaqa oqaluussiffigisatta ilaat tusarnaarumanngillat, kristumiut ilaasa niuernermik allamilluunniit tunngasumik oqaatsiminnik eqqortitsinnginnerat pissutigalugu. Guuti ilumoortoq kiffartuupparput, taamaattumik inuit pissusissamisoortumik unneqqarissuunissarput ilimagaat. Unneqqarilluta ilumoorlutalu ’Guutip annaassissitta ajoqersuutaa tamatigut naalannarsisinniassavarput’. — Títuse 2:10.

Oqaluussinermi periarfissaqarpugut oqaatsivut eqqortissallugit inuit tusarliussamik soqutiginnittut pulaaqqinnerisigut. Pulaaqqissallugit neriorsuigutta aamma taamaaliornissarput eqqaamasariaqarparput. Neriorsuuterput naapertorlugu orneqqikkutsigik ’ajorsartut ajunngitsuliorfigaavut, sapinngikkuttalu ikiuiumanngitsoornata’. (Ussatit 3:27) Qatanngutip arnap imatut oqaatigaa: „Qasseeriarlunga soqutiginnittut naapittarpakka oqartut oqaluussisartoq uteqqinnissaminik neriorsuisimasoq uteqqinnanili. Soorunami nalunngilara soqutiginnittoq immaqa angerlarsimasimanngitsoq, imaluunniit oqaluussisartoq uteqqinnginnerminut pissutissaqavissimasoq. Kisianni allanit taamatut oqaatigineqarusunngikkaluaqaanga, taamaattumillu naapitakka pulaaqqinniarlugit ilungersuutigisarpara. Kinaluunniit eqquutitiffiginngikkukku, isumaqarpunga Jehova qatanngutikkalu pitsaanngitsumik isigineqalersissallugit.“

Ilaanni immaqa uteqqikkusunneq ajorpugut isumaqaratta inuk pineqartoq iluamik soqutiginninngitsoq. Qatanngut arnaq taanna oqarpoq: „Soqutiginninnerup qanoq ittuunera nalilersornianngilara. Misilittakkamami takutissimavaat naliliinera siulleq amerlanertigut kukkusuusartoq. Taamaattumik isumalluarniartarpunga inuillu tamaasa qatanngutissatut isiginiartarlugit.“

Kristumiutut kiffartornitsinni allatigullu tamatigut tatigisassaanerput takutittariaqarparput. Ilumoorpoq ilaannikkut iliuuseqarnermit oqaannarneq ajornannginnerusartoq. Ilisimasoq oqarpoq: „Amerlasuut namminneq unneqqarissusertik qaqqaqqalaarutigisarpaat, sumili tatiginartumik inoqarpa? “ (Ussatit 20:6) Ilungersorluta iliuuseqarnitsigut tatigisassaalersinnaavugut oqaatsivullu piviusunngortillugit.

Guutimit pilluaqqusaangaarnerit

Unneqqaserluttuliorneruvoq piaaraluni asuliinnaq neriorsuigaanni, taamaaliornerlu checkimik naleqanngitsumik allannermut assersuunneqarsinnaavoq. Neriorsuutiminilli eqqortitsisoq annertuumik akissarsiassaqarpoq pilluaqqussutissarpassuaqarlunilu. Unneqqarissutsimut pilluaqqusaanernullu ilerasuuteqannginneq ilaavoq. (Naleqqiuguk apustilit suliait 24:16.) Ilerasunnissaraluatsinnut taarsiullugu qamannga pisumik eqqissineq toqqissisimanerlu pigissavavut. Oqaatsivut eqqortittarutsigik ilagiit ataasiussusiannut ilasaartaassaaq, tamannalu tatigeqatigiinnissatsinnut pinngitsoorsinnaanngilluinnarparput. ’Ilumoortumik oqaaseqarluta’ aamma Guutip unneqqarissup kiffaasut malunnartinniarpugut. — 2 Korintumiut 6:3, 4, 7.

Jehovap oqaatsini eqqortittarpai, aamma „oqaq sallutooq “ uumigaa. (Ussatit 6:16, 17) Ataatarput qilammiusoq malinniarutsigu taassumunnga qaninnerulissaagut. Taamaammat neriorsuutitsinnik eqqortitsisarnissatsinnut pissutissaqarluarpugut. (wE 15/9 99)

[Quppernerup ataani ilanngussaq]

[Qupp. 11-mi assiliartat]

Jeftap neriorsuutini eqqortippaa naak annernartuugaluartoq

[Qupp. 12-imi assiliartat]

Pulaaqqinnissannik neriorsuiguit uteqqitsinnatit piareersaqqis- saaqqaartariaqarputit