2000 ukioq immikkut ittuua?

UKIOQ 2000 immikkut pingaaruteqassava? Nunani kitaaniittuni ukioq taanna ukiut tusindillit pingajuanni ukiut aallaqqaatissaattut isigineqarpoq. Inuppassuit nalliuttorsiornissamut maannakkut piareersalereersimapput. Elektroniskiusumik nalunaaqutarujussualersortoqassaaq ukiut tusindillit nutaat aallartinnissannut sekundilersuisussanik ukiortaarsiornissarsuillu piareersarneqarlutik. Sumiluunniit illoqarfeeqqat illoqarfissuillu pisiniarfiini T-shirtit ukiut tusindillit makkua naanissaat pillugu allagartallit tuniniarneqarput.

Oqaluffeeqqani oqaluffissuarnilu ukiortaaq nalliuttorsiutigineqassaaq. Pilersaarutigineqarpoq paavi Johannes Paul II ukiup 2000-ip aallartinnerani Israeliliassasoq ukiut tusindillit nalliussiniarlugit ’katuullit ilagiissaasa qiimmattarlutik nalliuttorsuaannik’ taaneqartumi siuttuussalluni. Naatsorsuutigineqarpoq takornariat 2.500.000-t 6.000.000-illu akornanniittut, ilaat upperluartut ilaallu alapernaaginnartut, aappaagu Israeliliarumaartut.

Suna pissutaava? Vatikanip oqaaseqartitaa, Roger Cardinal Etchegaray, paavi sinnerlugu oqarpoq: „Ukioq 2000 tassaassaaq Kristusip taassumalu [Israelimi] inuusimaneranik nalliuttorsiornersuaq. Pissusissamisuuinnarpoq paavip tassunga tikeraarnissaa.“ Ukioq 2000 Kristusilu qanoq imminnut attuumassuteqarpat? Isumaqartoqarpoq Jesusip inunngorneraniit ukiut 2000-rpiat qaangiussimassasut. Taamaappali? Apeqqut taanna uterfigissavarput.

Upperisarsioqatigiit ilaasa ukioq 2000 isumaqartinneruaat. Upperaat Jesus aappaagu tamatumaluunniit missaani Uuliap Qaqqaani saqqummerumaartoq, sorsunnerlu Harmagedonimik taaneqartoq Biibilimilu sarĸúmersitat-ni eqqaaneqartoq Megiddop narsartaani piumaartoq. (sarĸúmersitat 16:14-16) Pisussanut tamakkununnga piareersaanertut Amerikamiut hundredellit illuminnik pigisamillu amerlanersaannik tuniniaapput Israelimut nuunniarlutik. Nuussinnaanngitsut iluaqutissaannut USA-mi evangelistit nuimanerusut ilaat neriorsuisimanerarneqarpoq Jesusip tikiunnera TV-mi — soorunami qalipaatilimmik — aallakaatinneqassasoq!

Nunani kitaaniittuni ukiut tusindillit tulliuttut aallarnersarneqarnissaannut pilersaarutit pimoorunneqarnerulerput. Nunanili allani inuit inuunerat taamaaginnarpoq. Taakkua, nunarsuup inuisa amerlanersaasa, upperinngilaat Jesus Nazarethimiu tassaasoq Messias. Imaassinnaavoq kitaamiusut ukiunik naatsorsuineq ajortut. * Assersuutigalugu musliimit amerlasuut immikkut ukiunik naatsorsueriaaseqarput. Musliimit ullorsiutaat naapertorlugu ukiup tullia tassaassaaq 1420, tassaananilu 2000. Musliimit pruffiitip Muhammedip Mekkamiit Medinamut nuunneraniit ukiut naatsorsortarpaat. Nunarsuaq tamakkerlugu ullorsiutit assigiinngitsut 40-t missaat atorneqarput.

Kristumiut ukioq 2000 immikkut pingaaruteqartittariaqarpaat? Ulloq januaarip aallaqqaataa 2000-imi immikkut ittuussava? Apeqqutit tamakku allaaserisami tulliuttumi sammineqarput.

[Quppernerup ataani ilanngussaq]