Asanninnerup aqqutaata pitsaanerungaartup atuarnissaa ilikkaruk

Kosovo, Libanon Irlandilu. Nunat taakku ukiuni nutaanerusuni nutaarsiassani eqqartorneqakulapput. Inuit eqqaasinneqartarput aammik kuisinernik, qaartartumeerinernik toqoraanernillu. Soorunami upperisarsiorneq, naggueqatigiissutsikkut inuiaqatigiissutsikkullu allatigulluunniit assigiinngissutit pissutigalugit nakuuserluni akersuunerit aatsaat pilinngillat. Oqaluttuarisaanerup ingerlanerani taamaattoqartuaannarsimavoq, inuiaat naalliuutigingaarsimasaannik.

PIFFISSAP ingerlanerani sorsuttoqartuaannarsimanera eqqarsaatigalugu inuppassuit isumaqarput sorsunnerit pinngitsoortinneqarsinnaanngitsut inuillu imminnut uumissortarnerat pissusissamisoortutut isigalugu. Taamatulli isummerneq Guutip oqaasiani, Biibilimi, ajoqersuutigineqartunut akerliulluinnarpoq. Biibilimi ersarilluinnartumik allassimavoq: ’Asanninngitsup Guuti ilisarinngilaa; Guuti asassutaammat.’ (1 Juánase 4:8) Ersarippoq Pinngortitsisup kissaatigigaa inuit asaqatigiissasut.

Biibilimi allassimavortaaq inuk Guuti assilillugu pinngortitaasoq. (1 Moses 1:26, 27) Tamanna isumaqarpoq inuit Guutip pissuserisaanik, pingaartumik asanninnermik, ersersitsisinnaasut. Taamaammat sooq ukiut ingerlaneranni inuit asaqatigiinnerup tungaatigut taama iluatsitsinngitsoorsimatigippat? Tamanna Biibilimi nassuiarneqarpoq. Inuit siulliit, Adamip Evallu, Guuti pikitsitsiffigaat ajortuliorlutillu. Taamaattumik kinguaavisa tamarmik ajorti naammalluinnanngissuserlu kingornuppaat. Rûmamiut 3:23 ima nassuiaavoq: ’Tamarmik ajortuliorput Guutimi nersornaammik ajorsarlutik.’ Asannittuliorsinnaanerput Guutimeersoq ajortimit naammalluinnanngissutsimillu kingornussatsinnit sanngiillisinneqarsimavoq. Tamanna ima paasisariaqarpa inuit asaqatigiissinnaajunnaartut? Inoqatitsinnut asannittumik eqqissisimasumillu attaveqalersinnaaneq neriuutigisinnaavarput?

Guutimut asanninneq ilikkartariaqarparput

Jehova Guutip nalunngilaa naammalluinnanngitsuugaluarlutik inuit suli asannittuusinnaasut. Taamaattumik imminut iluarisaajumasut tamaasa sapinngisamik asannittooqqullugit piumasaqarfigai. Guutip ernerata, Jesus Kristusip, piumasaqaat tamanna erseqqissarpaa aperineqarami Israelikkunnut inatsisit ilaat sorleq pingaarnersaanersoq. Ima oqarpoq: ’„[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.“ Tassa inassut siulleq annerusorlu.’ Imalu nangippoq: ’Aappaatalu taamaaqatigaa: „Tullit ilittut asassavat.“ Inassutit tamakku marluk inatsisit tamarmik pruffiitillu allagaasa naaqqavigaat.’ — Matîuse 22:37-40.

Inuppassuilli isumaqarput takusinnaanngisaq asaneq ajornartoq, Jehova Guutilu anersaajummat takusinnaanngilarput. (Juánase 4:24) Taamaattorli Guutip iliuuserisaasa sunniutaat ullut tamaasa malugisarpavut, iluaqutissatsinnut pinngortitai tamatta  pisariaqartikkatsigik. Apustili Paulusip tamanna tikkuarpaa oqarami: ’Naak [Guuti] imminik nalunaajaatiginngitsuunngikkaluartoq, ajunngitsumik pisarami qilammit tunisarlusi sialunnik ukiunillu naggoriffiusunik uummatisilu qaarsillartittarlugit tipaatsutsittarlugillu.’ — apustilit suliait 14:17.

Naak inuit tamarmik Pinngortitsisup pilersissimasai arlaatigut iluaqutigigaluaraat, qujamasuttut qujanissamulluunniit killinneqartut amerlavallaanngillat. Taamaattumik Guutip uatsinnut ajunngitsuliai eqqaamasariaqarpavut pissusiilu nuannersut iliuusiini tamani ersittut eqqarsaatigisariaqarlugit. Taamaaliorutta Pinngortitsisorsuatta ilisimassusia pissaaneralu mianernangaartut takusinnaavavut. (Jesaja 45:18) Pingaartumillu tamatuma Guutip asannittuussusianik paasitissavaatigut, inuunermik tuniinnarnata aammali inuunerup nuannersorpassuinik nuannaarutiginnissinnaaneq ajornarunnaarsimmagu.

Assersuutigalugu naasut kusanartut assigiinngitsorpassuit Guutip nunarsuarmi pinngortissimasai eqqarsaatigikkit. Nuanneqaaq kusanartunik tamakkuninnga takunnissinnaassuseqartilluta nuannaarutiginnissinnaassuseqartillutalu pinngortissimammatigut! Aammattaaq Guutip inuussutissatsinnik nerisassarpassuarnik tunisimavaatigut. Isumassuinertoqaaq ooqattarisinnaassuseqartilluta mamarsarsinnaatilluta pinngortissimagamisigut! Tamakku tamarmik takutinnginnerpaat Guutip ilumut asagaatigut pitsaanerpaamillu piniaraatigut? — Tussiaat 145:16, 17; Jesaja 42:5, 8.

Pinngortitat aqqutigalugit Pinngortitsisup imminik saqqummersinnermi saniatigut aamma oqaatsini Biibili aqqutigalugu Guutitut qanoq ittuunini takutippaa. Jehova Guutip qanga asannittumik iliuuserisimasai siunissamilu qanittumi inunnut pilluaqqussutigiumallugit neriorsuutigisai amerlangaartut Biibilimi allaatigineqarput. (1 Moses 22:17, 18; 2 Moses 3:17; Tussiaat 72:6-16; sarĸúmersitat 21:4, 5) Aammattaaq Biibilimi saqqummersinneqarpoq Guutip inuiannut asannittuliornerisa pingaarnerpaartaat — ernituaminik utertitsisutut pilliuteqarsimanera ajortimit toqumillu aniguisinnaanngortilluta. (Rûmamiut 5:8) Aap, Pinngortitsisorput asannittoq pillugu ilisimasaqarnerujartortilluta uummammit pisumik taassuminnga asanninnissatsinnut killinneqarnerussaagut.

Inoqatitsinnik asanninneq ilikkartariaqarparput

Soorlu Jesusip eqqartoraa Guutip uummatikkut, tarnikkut isumakkullu iluunngarluta asanerata saniatigut aamma tullerput uatsitut asasariaqarparput. Aap, Guutimut asanninnitta  inoqatitsinnik asanninnissatsinnut pinngitsaalivaatigut. Apustili Johannes ima nassuiaavoq: ’Asanartusi ukorsii, Guutip taama asammatigut uaguttaaq asaqatigiinniassaagut.’ Imalu erseqqissaarivoq: ’Ima oqartoq: „Guuti asavara, “ qatanngunnilu uumissorlugu, taanna sallutuuvoq. Qatanngunnimi takusani asanngikkuniuk qanoq Guuti takunngisani asasinnaavaa? Matuminngalu taassumannga inanneqarpugut, Guutimik asannittup qatanngunnissaaq asassagaa.’ — 1 Juánase 4:11, 20, 21.

Ullumikkut silarsuarmi inuuffigisatsinni inuit amerlanersaat malunnartumik namminissarsiortuupput, ’imminik asallutik’, soorlu Biibilimi siulittuutigineqarsimasoq. (2 Timûtiuse 3:2) Taamaattumik asanninnerup aqqutaata pitsaalluinnartup atuarnissaa ilinniassagutsigu ilungersorluta ’isumakkut nutaanngortariaqarpugut’ Pinngortitsisorput asannittoq ilaarlugu, inuillu naammalluinnanngitsut ilaarniarnagit. (Rûmamiut 12:2; Evfisumiut 5:1) Guutip allaat inuit ’qujasuitsut ajortullu ajunngitsumik iliorfigisarpai’, aamma ’seqerni ajortunut ajunngitsunullu nueqqusarpaa, sialleqqusisarlunilu iluartunut iluaatsunullu’. Ataatarput qilammiusoq taama maligassaalluartigimmat, uaguttaaq allanut inussiarnersuullutalu ikiuiumatuujusariaqarpugut. Taamaalilluta takutissinnaavarput ’Ataatatsinnut qilammiusumut’ asannittumut qitornaalluta. — Lúkarse 6:35; Matîuse 5:45.

Ilaannikkut ajunngitsuliornerit taamaattut inuit allat Guutimik ilumoortutuamik pallorfiginnittunngornerannik kinguneqartarput. Ukiualuit matuma siorna illumi ningiup Jehovamut nalunaajaasuusup sanilini Biibilip tusarliussaanik oqaluussiffigeriaraluarpaa, itigartinneqarluinnarlunili. Tamannali nikallussutiginngilaa. Akerlianik saniliminut inussiarnerlunilu ikiuiumatuujuarpoq. Ilaanni sanilini illumut allamut nutsertoq ikiorpaa. Ilaannilu sanilimi eqqarliminik niuffiorniartup timmisartoqarfiliaanneqarnissaa isumagaa. Kingusinnerusukkut saniliata taassuma Biibilimik atuaqqissaaqateqarnissani akueraa, piffissallu ingerlanerani naak uiminit assortorneqangaaraluarluni kristumiunngorpoq ilungersuussisoq. Aap, asannittuliornerit tamakku pilluaqqussutinut ataavartussanut tunngaviliipput.

Miserratigisinnaanngilarput Guutip asanninnera pissuteqanngitsoq pitsaasunik pissuserpassuaqarnatta. Akerlianilli asavaatigut naak sanngiissutivut naammalluinnanngissutsivullu amerlagaluaqisut. Taamaattumik inoqativut sanngiissuterpassuaqaraluartut asanissaat ilinniartariaqarparput. Sungiusarutsigu allat pissusii pitsaasut takuniarlugit pingaartinniarlugillu kukunerinik ujartuinata asanarnerutissavavut. Taakkununnga asanninnerput immaqa asanninnermit najoqqutassianit aqunneqartumit annerulersinnaavoq, ikinngutigilluakkat imminnut tunniussimanerannik nuannarinnilluarnerannillu malunnarsitinneqarluni.

Asanninnerit alliartortiguk

Asanninneq ikinngutigiinnerlu ineriartortinneqartariaqarput, taamaaliussagaannilu ilumoorneq peqqusersuinnerlu pingaaruteqarput. Ilaasa kukunitik isertorniartarpaat ikinngutiginiakkaminnit iluarineqarumallutik. Amerlanertigulli akerlianik sunniuteqartarpoq piffissap ingerlanerani piviusut paasineqarpata ilumuunngissuseq taamaattoq iluarineqarneq ajormat. Taamaattumik allat qanoq ittorpiaanitsinnik paasitinnissaat ersigisariaqanngilarput — naak ajugaaffiginiakkatsinnik sanngiissuteqaraluarluta. Taamaalilluta siunissami ikinngutigiinnissamik aqqutissiuisinnaavugut.

Assersuutigalugu nunami Asiap kangianiittumi ilagiinni qatanngut arnaq utoqqaq atuarfimmi ilinniagakitsuusimavoq. Tamannali allanut isertorneq ajorpaa. Assersuutigalugu ammasumik ilumoorlunilu oqartarpoq Biibilip siulittuutai oqaluttuarisaanerullu ingerlanera tunngavigalugit ’Guutimik nalusut ulluisa’ 1914-imi naasimanerat inunnut allanut nassuiarsinnaanagu. * Kisianni  kiffartornermi ilungersuussinermigut qatanngutinullu asanninnermigut tukkortuunermigullu maligassiuilluarnermik allanit asannittumik ’ilagiit sapangaataannik’ taaneqartarpoq.

Kulturit ilaanni misigissutsinik ammasumik ersersitsineq iluarineqarpallaarneq ajorpoq, inuit allat pissuserilluni qanillinaveersaarnissaaannut perorsaasoqartarluni. Soorunami inussiarnerlutalu pissuserissaartuartariaqarpugut, allanulli misigissutsivut naqisimasariaqanngilavut isertornagilluunniit. Jehovap innuttaminut toqqakkanut, itsaq Israelikkunnut, misigissutsini kanngusuutiginngilai imali oqarfigigai: ’Asanninnermik soraajuitsumik asavakkit.’ (Jeriamiap agdlagai 31:3) Tamatumunnga assingusumik apustili Paulus uppeqatini Thessalonikamiittut ima oqarfigisimavai: ’Taama asangaarlusi nuannarisaqarpugut aviffigiumallusi, Guutip iivangkiiliuinnaanik pinnata, inuunitsinnilli allaat, tassa uatsinnut asanarsigassi.’ (1 Tásalûníkamiut 2:8) Taamaattumik inoqatitsinnut tunniusimaneq piviusoq ineriartortinniaraangatsigu Biibilimi ajoqersuutigineqartunut naapertuulluassaaq misigissutsit taamaattut naqisimanagit ammasumik ersersittarnissaat.

Ilungersuussiuartariaqarpugut

Inuit allat asannittuliorfiginissaannik ilinniarneq ingerlajuartussaavoq. Taamaaliussagutta ilungersuussiuartariaqarpugut nammineq naammalluinnanngissutsivut qaangerniartariaqaratsigik silarsuullu matuma asanniuitsup sunniinera assortortariaqarlugu. Taamaaliornerli pilluaqqussuterpassuarnik kinguneqartarmat imminut akilersinnaavoq. — Matîuse 24:12.

Allaat silarsuarmi matumani naammalluinnanngitsumi inoqativut attaveqarfigilluarnerulersinnaavavut, uatsinnut allanullu nuannaarnermik, eqqissinermik nalerisimaarnermillu kinguneqartumik. Taamaalilluta ilungersuussigutta takutissavarput Guutip silarsuassaani nutaami naassaanngitsumik inuunissamut neriuuteqarnissamut qinngaqqunnarnata. Tamanillu pingaarnerusumik asanninnerup aqqutaata pitsaanerungaartup atuarnissaata ilikkarnerata kingunerissavaa Pinngortitsisitsinnit asannittumit iluarisaaneq pilluaqqusaanerlu, maannakkut naassaanngitsumullu! (wE 15/10 99)

[Quppernerup ataani ilanngussaq]

[Qupp. 12-imi assiliartaq]

Kristumiutut asanninneq ajunngitsuliornikkut ersersinneqarsinnaavoq

[Suminngaanneernera]

UN PHOTO 186226/M. Grafman