Atuartartut apeqqutaat

Qinersineq Jehovap nalunaajaasuisa qanoq isumaqarfigaat?

Biibilip najoqqutassiaasa ersarissut Guutip kiffaanut ajornarunnaarsippaat qinersinermut peqataanissamut eqqortumik isiginnittaaseqarnissaq. Takussutissaqanngilaq taasineq periaaseralugu aalajangiisarnerup akerlerineqarneranik, assersuutigalugu siulersuisussersiornermi. Jehovap nalunaajaasuisa ilagiivini ataatsimiinnernut piffissat pigisallu qanoq atorneqarnissaat nappaanikkut aalajangerneqarajupput.

Politikkikkummi qinersinernut peqataanerit qanoq isumaqarfigineqarpat? Eqqaamasariaqarpoq nunat ilaanni demokrati atorlugu naalakkersorneqartuni allaat qinersisinnaatitaasut affaat sinnerlugit qinersisinnaatitaanertik atunngitsoortarmassuk. Jehovap Nalunaajaasuisa kikkulluunniit qinersisinnaatitaanerat assortunngilaat, politikkikkullu qinersisoqartarneranut akerliuneq ajorput. Naalakkersuisut inatsisit naapertorlugit qinigaanermikkut atorfinitsitaasimasut ataqqillugillu suleqatigaat. (Rûmamiut 13:1-7) Qineqqusaartumik qinersinissaq apeqqutaalerpat nalunaajaasup nammineq nalunngeqatiginnissutini Biibilimit ilinniartitaasoq namminerlu Guutimut naalagaaffimmullu akisussaaffimminik paasinninnini malillugit aalajangertarpoq. (Matîuse 22:21; 1 Pîtruse 3:16) Aalajangernermini ilaatigut uku pingaartittarpai:

Siullermik Jesus ajoqersukkani pillugit oqarpoq: ’Silarsuup inuisa ilaginngilaat, soorlu uangattaaq silarsuup inuisa ilaginngikkaannga.’ (Juánase 17:14) Jehovap nalunaajaasuisa aalajaallutik tunngavik tamanna malippaat naalakkersuinermut tunngasunut peqataassanatik. — Juánase 18:36.

Aappassaanik apustili Paulus nammineq ’Kristus sinnerlugu oqariartortitaalluni’ nalimini inuusunut oqarpoq. (2 Korintumiut 5:20; Evfisumiut 6:20) Jehovap nalunaajaasuisa upperilluinnarpaat Jesus maannakkut Guutip naalagaaffiani qilammiittumi kunngiusoq, namminnerlu aallartitatut  tamanna inuiaqatigiinnut nalunaarutigisussaagitsik. (Matîuse 24:14; sarĸúmersitat 11:15) Aallartitat nunami aallartitaaffigisaminni naalagaaffiup iluani pissutsinut kalluunnaveersaartuunissaat naatsorsuutigineqartarpoq. Guutip naalagaaffianit qilammiittumit aallartitaasutut Jehovap nalunaajaasui misigipput nunap najugarisamik politikkianut akuliuttussaanatik.

Eqqaamasariaqakkat pingaaruteqartut pingajoraat qinigaasumut taaseqataasoq akisussaaqataalertarmat qinikkami atorfimminut tunngatillugu suliaanut. (Naleqqiuguk 1 Timûtiuse 5:22.) Kristumiut eqqarsaatigilluartariaqarpaat akisussaaffik taamaattoq tigummerusunnerlugu.

Sisamassaanik Jehovap nalunaajaasuisa kristumiutut ataasioqatigiinnertik illersorpaat. (Kulorsamiut 3:14) Upperisarsiortut naalakkersuinermut akulerukkaangata ilaasortaat amerlanertigut avissaartuutilertarput. Jehovap nalunaajaasuisa naalakkersuinermut akulerunnatik Jesusimik malinninnermikkut kristumiutut ataasioqatigiinnertik atatiinnartarpaat. — Matîuse 12:25; Juánase 6:15; 18:36, 37.

Tallimassaanik kingullertullu Jehovap nalunaajaasuisa kalluunnaveersaartuunertik pissutigalugu nakimaallutik Guutip naalagaaffia pillugu oqaluussissutigisartik pingaaruteqartoq naalakkersuinikkut qanorluunniit isumalinnut oqaluussissutigisinnaavaat. — Eprîarit 10:35.

Qulaani taaneqartut najoqqutassiat Biibilimeersut eqqarsaatigalugit nalinginnaavoq Jehovap nalunaajaasuisa nammineerlutik aalajangiisinnaatitaanertik atortaraat inatsisitigut qinerseqataannginnissamut aalajangernerminni. Nunanimi innuttaasunut inatsisit malillugit qinersinissamik akisussaaffeqartitsisuni? Taamaattoqartillugu nalunaajaasoq nammineq nalunngeqatiginnissutini Biibilimilu allassimasut malillugit aalajangertussaavoq. Nammineq aalajangertussaapput qinersiartussanerlutik. Ineeqqami qinersivimmi sulerinersoq taassuma Guutillu kisimik susassaraat.

Vagttårnet-imi 15. marsi 1951-imoortumi qupperneq 92-imi allassimavoq: „’Kaasarip’ qinersinissamut innuttaasut pinngitsaalippagit . . . [Jehovap nalunaajaasui] taasivimmukarsinnaapput. Kajumissaarneqarput tassani qinersivissartik immersoqullugu. Qinersisartut immersugassami qanoq pinissaa nammineq aalajangertussaavaat. Taamaattumik tassani Guutip nalunaajaasui peqqussutai naapertorlugit uppernertillu tunngavigalugu Gutip kiinaata saani iliuuseqartussaapput. Pisussaatitaanngilagut oqarfigissallugit immersugassaq qanoq pissaneraat.“

Arnaq kristumiu qanoq iliussava uimi uppinngitsup qinersiartoqquppani? Uimi oqartusaassusiata ataaniippoq, soorlu kristumiut oqartussaasut qulliunerusut ataaniittut (Evfisumiut 5:22; 1 Pîtruse 2:13-17) Nammineq aalajangissavaa uimi qinersiartoqqusinera naalassanerlugu. Tamatumani allanit isornartorsiorneqartariaqanngilaq. — Naleqqiuguk Rûmamiut 14:4.

Nunami qinersinissamut peqqussuteqarfiunngitsumi qinersinngitsunilli iluarinninngiffioqisumi allaat immaqa ajortumeerneqarnermik pillarneqarnermillu kinguneqartitsiviusinnaasumi kristumiu qanoq iliussava? Taamatut assingusunilluunniit pisoqartillugu kristumiu nammineq aalajangertariaqarpoq. ’Kialuunnit nammineq nammagassani nammassavaa.’ — Galâsiamiut 6:5.

Qinersinermut atatillugu mamiatsaatigineqarsinnaavoq Jehovap nalunaajaasuisa ilaat qinersivimmukarpata ilaalli taamaalioratik. Oqaluttoqalersinnaavoq Jehovap nalunaajaasuisa isumaat allanngorartuusoq. Paasisariaqarporli kristumiut inuttut ataasiakkaatut nalunngeqatiginnissutsikkut apeqqutit ataasiakkaat Jehova Guutimut namminneq aalajangertussaammatigik. — Rûmamiut 14:12.

Jehovap nalunaajaasui pissutsini paasiuminaatsuni inuttut namminneq aalajangiigaangamik, kristumiutut kalluunnaveersaartuunertik nakimaallutillu oqalunnissartik qulakkeerluinnartarpaat. Qanorluunniit pisoqaraluarpat Jehova Guutip nakussatsissagaatik, ilisimassuseqalersissagaatik upperisaminnullu akerliusunut sunulluunniit akuersiinnannginnissaminnut ikiussagaatik tatigaat. Taamaaliornermikkut tussiasiortutut Jehovamut tatiginninnermik ersersitsipput, taanna allakkami: „Illit tassa qaarsora, pallittaalisara, tasissersuutinnga ingerlatillungalu aqqit pissutigalugu.“ — Tussiaat 31:4. (wE 1/11 99)