Jehovap Piumasaatut Iliorput

Pallorfiginninnerup ilumoortup siuarsarneqarneranut kajumittumik tunissut

ISRAELIKKUT Jehovap annaassisutut pissaanera takusimavaat. Takusimavaat Immap Aappalaartup erngi tupinnartuliornikkut avissaartut, immap naqqagut panertukkut ingerlasinnaaqqullutik Egyptenimiullu sakkutoorpassuinit qimaasinnaaqqullutik. Akianut apuukkamik isumannaatsumiillutik isiginnaarsinnaavaat erngit utertut malersuisut matullugit. Jehovap aniguisippai. — 2 Moses 14:21-31.

Ajoraluartumik Israelikkut ilaasa Guutip iliuuserisimasai taamaattussaannartut isigisimavaat. Moses Sinajip Qaqqaaniitillugu Aron pinnersaatiminnik kuultiusunik tunivaat tamakkuninngalu pallorfigisinnaasaminnik guutipilulioqqullugu. Uterami Mosesip takuai inuit pikitsitsiumatuut nerillutillu imertut qitillutillu nersuteeraasaliamillu guutisiortut. Jehovap peqqusineratut inuit 3000-t missaat — qularnanngitsumik pikitsitsinermik aallarniisut — toqunneqarput. Ullormi tamatumani Guutip innuttaasa ilikkarpaat Jehovamut tunniusimalluinnarnissartik qanoq pingaaruteqartigisoq. — 2 Moses 32:1-6, 19-29.

Tamatuma kinguninnguatigut Mosesip Guutip peqqussutaa naalallugu illernartuut, tupeq pallorfiginnittarfik angallanneqarsinnaasoq sanallugu aallartippaa. Sananermi tamatumani atortussat akisuut sanasullu eqqumiitsuliullaqqissut pisariaqartinneqarput. Inuit taakku suminngaaniissappat? Uagullu Biibilimi oqaluttuaq tamanna sumik ilinniarfigisinnaavarput?

Atortussat tunissutigineqarput piginnaanerillu neqeroorutigineqarlutik

Moses aqqutigalugu Jehovap Israelikkut ima peqquai: „[Jehovamut] pigititassamik pigisassinnit tunissuteqassaasi. Kikkulluunniit tunniussinissamut kajumittut [Jehovamut] pigititassanik aggiussissapput.“ Sunik tunissuteqarsimassappat? Mosesip ilaatigut eqqaavai kuulti, sølvi, kanngussak, ujalussiat, ilupaassiassat, amit, qisuit ujaqqallu erlinnartut. — 2 Moses 35:5-9.

Israelikkut pigisaqarluarpat tukkorlutik tunniussinnaasaminnik. Eqqaamajuk Egypten qimakkamikku pinnersaatinik kuultiusunik sølviusunillu atissanillu amerlasuunik nassataqarsimasut. Aap, „taamaalillutik Israelikkut Egyptenimiut pigisaannik piiaaffigaat “. * (2 Moses 12:35, 36) Siusinnerusukkut Israelikkut nuannaarlutik pinnersaatitik guutipilussiornermut atornerlussimavaat. Maannakkut pallorfiginninneq ilumoortoq siuarsarniarlugu aamma taama kajumitsigalutik pilliuteqarusussappat?

Maluginiagassaavoq Mosesip inuit ataasiakkaat qanoq angitigisumik tunisissanersut aalajangersimanngikkaa, aamma inuit tunisisussaasutut tunisinngikkunillu kangusuuteqassasut misigitinniarsimanngikkai. ’Kikkulluunniit tunniussinissamut kajumittut’ kajumissaarneqarput. Ersarippoq Moses isumaqartoq Guutip innuttai pinngitsaalineqartariaqanngitsut. Tamarmik immikkut sapinngisatik missiliorlugit tunisiumassasut tatigai. — Naleqqiuguk Korintumiunut agdlagkat aípait 8:10-12.

Sananermi atortussat kisimik pisariaqartinneqanngillat. Jehovap nangilluni Israelikkut ima oqarfigai: „Angutitasi eqqumiitsuliornermik paasisimasaqartut tamarmik aggissapput sanaassat [Jehovap] peqqussutigisai tamaasa sanajartorlugit.“ Inuit ilinniarsimasut pisariaqartinneqarput. ’Suliassanik tamanik eqqumiitsuliassanillu paasisimasaqartut’ — tassa qisunnik saffiugassanillu sulisinnaasut aammalu ujaqqanik silisisinnaasut ikkussisinnaasullu — pisariaqartinneqarput suliassaq naammassineqarsinnaaqqullugu. Soorunami Jehovap sulineq siulersussavaa, taassumalu ataqqinaatissaanut naammassilluagaassalluni. — 2 Moses 35:10, 30-35; 36:1, 2.

Israelikkut pigisatik piginnaanitillu atoqqullugit kajumissaarneqarnertik ajunngitsumik qisuariarfigaat.  Biibilimi oqaluttuarineqarpoq: „Uummatimikkut kajumissisinneqartut tamarmik aggiussipput toqqup naapeqatigiittarfiup sananeqarnissaanut sanaassartaanullu tamanut atisanullu illernartunut atugassanik [Jehovamut] pigititassanik. Angutit arnallu kajumissisinneqartut tamarmik aggiussipput.“ — 2 Moses 35:21, 22.

Qanoq ilinniutigisinnaagipput

Ullumikkut Guutip naalagaaffia pillugu nutaarsiassap nuannersup oqaluussissutiginera annertooq kajuminnermit tunissutit ajornarunnaarsippaat. Nunap piinik tunisisoqarnerusarpoq. Allatigulli qatanngutit kristumiut misilittakkatik naleqangaartut neqeroorutigisarpaat naalagaaffilersaarfinnik, ataatsimeersuarfinnik immikkoortortaqarfinnillu sanaartornissamut. Saniatigut angerlarsimaffinni Betelini 100-nit amerlanerusuni kiffartortut piginnaaneri assigiinngitsorpassuit atorneqartarput. Uummammit kajumillutik taamatut pilliuteqarsimasut tamarmik tatigilluinnarsinnaavaat Jehovap eqiasuillutik sulinertik puiussanngikkaa. — Eprîarit 6:10.

Aamma tamatta inuttut ataasiakkaarluta kristumiutut kiffartornermi peqataasarnerput taamaappoq. Tamatta kajumissaarneqarpugut piffissaq pisiareqqullugu ilungersorluta oqaluussinermut peqataasinnaaqqulluta. (Matîuse 24:14; Evfisumiut 5:15-17) Ilaat piffissaq tamaat oqaluussisartutut kiffartorsinnaapput. Allat inuttut atukkatik pissutigalugit oqaluussinermut taama annertutigisumik peqataasinnaanngillat. Taakkuattaaq pilliutigisartagaat Jehovap iluarai. Soorlu illernartuummut tunisisoqarsimaneratut Jehova aalangiisimanngilaq ataasiakkaat qanoq annertutigisumik tunissuteqarnissaannik. Kisianni uummatikkut, tarnikkut isumakkullu iluunngarluta nukivullu tamakkerlugit kiffartornissarput piumasaraa. (Mákorse 12:30) Taamaaliorutta qularissanngilarput pallorfiginninnerup ilumoortup siuarsarneqarneranut kajuminnermit tunissutivut akilissagai. — Eprîarit 11:6. (wE 1/11 99)

[Quppernerup ataani ilanngussaq]