Qatanngutit utertissinnaavat

’Orniguk kisimiitillusilu oqaanniaruk. Tusarumappatit qatanngutit utertissavat.’ — MATÎUSE 18:15.

1, 2. Isumaqatigiinngisutit pillugit Jesus qanoq unnersuussiva?

JESUSIP nunami kiffartornerata naanissaanut ukioq ataasiujunnaartorluunniit ajoqersukkani pingaartumik unnersuuppai. Tamanna Matîuse kapitali 18-imi atuarsinnaavarput. Meeqqatut maniguunnissap pingaaruteqarneranik ajoqersuuppai. Erseqqissarpaa ’minninnguit ilaannik’ aserorsaasoqassanngitsoq, ’ukualu minninnguit’ tammaqqunagit ikiorneqartariaqartut. Taavalu iluaqutaasumik atoriaannaasumillu unnersuussivoq kristumiut isumaqatigiinngissutiminnik qanoq aaqqiisinnaanerannik.

² Immaqa oqaasii eqqaamavavut: ’Qatannguppit ajortuliorfigippatit, orniguk kisimiitillusilu oqaanniaruk. Tusarumappatit qatanngutit utertissavat. Tusarumanngippatilli ataatsimik marlunnilluunniit ilaqarlutit orniguk, siunersiutigisaq qanoq-ittorluunniit nalunaajaasut marlulluunniit pingasulluunniit oqaasiannik aalajangersarneqaqqullugu. Taakkualu tusarumanngippagit ilagiinnut oqaatiguuk; ilagiilli tusarumanngippagit Guutimik nalusutut ilanngaaserisutullu isumaqarfigissavat. (Matîuse 18:15-17) Unnersuussutit tamakku qaqugukkut maleruassavavut qanorlu isiginnittaaseqarluta taamaaliussaagut?

3. Allat kukkuneri amerlanertigut qanoq isigisariaqarpavut?

³ Allaaserisap matuma siuliani erseqqissarneqarpoq tamatta naammalluinnanngitsuullutalu kukkusaratta, isumakkeerfiginnittuunissarput ilungersuutigisariaqaripput. Ingammik taamaappoq uppeqatitta oqaaserisimasaa iliuuserisimasaaluunniit ajuallaatigisimagutsigu. (1 Pîtruse 4:8) Amerlanertigut unioqqutitsisup isumakkeerfiginissaa pitsaanerusarpoq — tassa isumakkeerfigalugu pisimasorlu puiorlugu. Taamaaliorneq kristumiut ilagiissaasa eqqissisimaqatigiinnerannut tapersiinertut isigineqarsinnaavoq. (Tussiaat 133:1; Ussatit 19:11) Kisianni ilaannikkut misigisinnaavugut qatanngummik ajuallatsitsisumik isumaqatigiinngissut aaqqinniarlugu iliuuseqartariaqarluta. Taamaattoqarnerani Jesusip unnersuussutaa atortuussaavoq.

4. Allat unioqqutitsippata qanoq ililluta najoqqutassiaq Matîuse 18:15-imi eqqaaneqartoq maleruarsinnaavarput?

⁴ Jesus ima siunnersuivoq: ’Orniguk kisimiitillusilu oqaanniaruk.’ Taamaaliorneq silatusaarneruvoq. Biibilimik nutsikkat qallunaatuut ilaanni allassimavoq ’kisimeeqatigalugu’ imaluunniit ’marluinnaatillusi’ oqaloqatigineqassasoq. Ajornartorsiut inussiarnersumik tatigeqatigiilluni oqaloqatigiissutigigaanni aaqqikkuminarnerusarpoq. Qatanngut ajuallannartumik iliuuseqarsimasoq oqaaseqarsimasorluunniit kisimeeqatigigukku immaqa kukkunini nassuerutigerusunnerussavai. Allanik tusarnaartoqarpat immaqa inuttut naammalluinnanngissutsi pissutigalugu kukkunini miserratigissavaa, imaluunniit iliuuserisimasani eqqortutut isigineqalersinniassallugu. ’Kisimiitillusili’ ajornartorsiut oqaloqatigiissutigigussiuk immaqa paasinarsissaaq paatsooqatigiinnerusoq piaaralunilu ajortuliornerunani. Tamassi paasigussiuk paatsooqatigiinnerusoq ajornartorsiut aaqqinneqarsinnaavoq, pisimasorlu pingaaruteqanngitsoq ajornartorsiuterujussuanngussanngilaq attaveqatigiinnersilu aserorneqassanani. Matîuse 18:15-imi najoqqutassiaq allaat ulluinnarni isumaqatigiinngissutit  minnerusut eqqarsaatigalugit atorneqarsinnaavoq.

Jesus qanoq isumaqarpa?

5, 6. Ajortuliornerit qanoq ittut Matîuse 18:15-imi eqqarsaatigineqarpat, tamannalu qanoq oqaatsit ataqatigiinnerisa takutippaat?

⁵ Ilumoorussivissagatta Jesus ilungersunarnerusut pillugit unnersuussivoq. Ima oqarpoq: ’Qatannguppit ajortuliorfigippatit.’ ’Ajortuliorneq’ tassaasinnaavoq kukkuneq imaluunniit unioqqutitsineq sunaluunniit. (Job 2:10; Ussatit 21:4; Jâko 4:17) Jesusilli oqaasiisa ataqatigiinnerisa takutippaat ajortuliorneq sualunnerusoq pineqartoq. Ima ingasatsigaaq ajortuliortup ’Guutimik nalusutut ilanngaaserisutullu’ isigineqarnissaanik kinguneqarsinnaalluni. Oqariaaseq tamanna qanoq paasisariaqarpa?

⁶ Jesusip ajoqersugaasa oqaasiinik tusartut nalunngilaat nunaqqatimik inuit Guutimik nalusut ilagineq ajoraat. (Juánase 4:9; 18:28; apustilit suliait 10:28) Ilanngaaserisullu attaveqarfigiumanngivippaat, angutit taakku juutiugaluarlutik nunaqqatitik naqisimallugillu iluanaarniarfigisarmatigik. Tamatuma takutippaa Matîuse 18:15-17-imi ajortuliat sualunnerusut pineqartut, tassaanatillu inuit isumaqatigiinngissutaat isumakkeerfigineqarsinnaallutillu puiunnaarneqarsinnaasut. — Matîuse 18:21, 22. *

7, 8. (a) Ajortuliornerit qanoq ittut utoqqaanertat suliarisariaqarpaat? (b) Matîuse 18:15-17 naapertorlugu ajortuliornerit qanoq ittut kristumiut marluk namminneq oqaloqatigiissutigalugit aaqqissinnaavaat?

 ⁷ Mosesip inatsisai naapertorlugit ajortuliat ilaat ima ilungersunartigipput ajortuliorfigineqartup isumakkiiginnarsinnaanagit. Guutimik mitalliineq, tunussineq, guutipilussiorneq kinguaassiuutitigullu ajortuliornerit, soorlu kanngunartuliorneq, allasiorneq, anguteqatinoorneq arnaqatinoornerlu utoqqaanertanut (imaluunniit palasinut) nalunaarutigineqartariaqartarsimapput, taakkunanngalu suliarineqartariaqarlutik. Aamma kristumiut ilagiissaanni taamaappoq. (3 Moses 5:1; 20:10-13; 4 Moses 5:30; 35:12; 5 Moses 17:9; 19:16-19; Ussatit 29:24) Malugaarpulli ajortuliat Jesusip uani eqqartugai inuit marluk oqaloqatigiinnerisigut iluarsineqarsinnaasut. Assersuutigalugu tassaasinnaavoq kristumiu kamalluni sinngalluniluunniit allamik mamarliisoq; kristumiu atortussat aalajangersimasut atorlugit piffissamilu aalajangersimasumi naammasseriigassamik suliassamik isumaqatigiissuteqartoq; kristumiu akiligassanik naafferarlugu imaluunniit piffissami aalajangersimasumi akiliiumasoq; imaluunniit kristumiu suliffimini ilinniartitaaguni neriorsuisoq (allaat allamik suliffittaassagaluaruni) piffissami sumiiffimmiluunniit aalajangersimasumi sulisitsisuni unammillerniarnagu pisisartunilluunniit arsaarniarnagu. * Qatanngut taamaattunut tunngatillugu neriorsuutiminik unioqqutitsippat allamillu isumataarumanani ilumut tamanna ilungersunartuuvoq. (sarĸúmersitat 21:8) Unioqqutitsinerilli taamaattut akuliusimasut akornanni oqaloqatigiinnikkut aaqqinneqarsinnaapput.

⁸ Qanorli iliortoqarsinnaava? Jesusip siunnersuutaa pingasunik alloriarnertalittut isigineqartarsimavoq. Alloriarnerit tamakku immikkut misissoriartigik. Inatsisinut tunngatillugu maligassatut aalajangersimasutut isigissanngilavut, kisianni anersaava paasiniassavarput asannittumillu siunertaa aanngaanagu.

Qatanngutit utertinniarsariuk

9. Matîuse 18:15-imi unnersuussut maleruarutsigu suna eqqaamassavarput?

⁹ Jesus ima aallartippoq: ’Qatannguppilli ajortuliorfigippatit, orniguk kisimiitillusilu oqaanniaruk. Tusarumappatit qatanngutit utertissavat.’ Pasillerneq pissutigiinnarlugu taamaaliortoqarnavianngilaq. Uppernarsaatissaqartariaqarpoq imaluunniit paasissutissat erseqqissut tunngavigisinnaasariaqarlutik qatanngut iluarsisariaqagaanik unioqqutitsisimasoq paasitissagaanni. Piaartumik saaffigisariaqarpoq, pisimasoq alliartiinnginniassammat unioqqutitsisulluunniit isumaa manngertinnginniassammat. Aamma puiortariaqanngilarput nammineq pisimasoq eqqarsaatigiuarutsigu ajoqutigisinnaagatsigu. Akuliunneqartut kisimiillutik oqaloqatigiissutigisariaqarmassuk, allanik isumaqatissarsiorluni namminerluunniit eqqortuliornini imminut uppernarsarniarlugu allat saaffigieqqaartariaqanngillat. (Ussatit 12:25; 17:9) Sooq taamaaliortoqartariaqanngila? Oqaloqatigiinnissap siunertavia pissutigalugu.

10. Suna ikiortigalugu qatannguterput utertissinnaavarput?

¹⁰ Pillarnissaa nikanarsarnissaaluunniit siunertaanani qatanngutitta utertinnissaa suinertaasariaqarpoq. Ilumut eqqunngitsuliorsimaguni taava Jehovamut attaveqarnera navianartorsiortinneqarpoq. Soorunami kissaatigaarput kristumiutut qatanngutigiinnarnissaa. Eqqissisimalluni sukannersumik unnerluusserpaluttumilluunniit oqaaseqarnani kisimeeqatigalugu oqaloqatigigaanni tamatuma iluatsitsinissaa ilimanarneruvoq. Asannittumik oqaloqatigitillugu eqqaamasariaqarparput tamatta inuttut ajortiliullutalu naammalluinnanngitsuugatta. (Rûmamiut 3:23, 24) Qatanngutitta  paasileruniuk allat pisimasumik oqaluttuussimanngikkivut, ilumoorlutali ikiorusukkitsinni, qularnanngitsumik ajornartorsiut aaqqikkuminarnerussaaq. Inussiarnersumik paasiuminartumilu periaaseq tamanna ingammik iluaqutaasorujussuussaaq paasinarsippat tamatta kukkusimasugut paasinerluisimasugulluunniit. — Ussatit 25:9, 10; 26:20; Jâko 3:5, 6.

11. Qatanngutitta tusarumanngippatigut qanoq iliorsinnaavugut?

¹¹ Qatannguterput kukkusimaneranik tamatumalu ilungersunarneranik paasitissinnaagutsigu, immaqa allamik isumataassaaq. Paasisariaqarparpulli pingaarniarneq ajornartorsiutaasinnaasoq. (Ussatit 16:18; 17:19) Qatanngutip eqqunngitsuliornini aallaqqaammut miserratigippagu allamillu isumataarumanani, immaqa ingerlateqqinngikkallarnissaa silatusaarnerussaaq. Jesus oqanngilaq ’oqaanniarlugu ataasiaannarlutit orniguk’. Ajortuliaq iluarsineqarsinnaasoq pineqarmat aalajangersinnaavugut Galâsiamiut 6:1-imi allassimasutut anersaaqarluta kisimiitillutalu oqaloqatigeqqinniarlugu. Immaqa iluatsitsissaagut. (Naleqqiuguk Jûtarse 22, 23.) Taavami qularinngilluinnarutsigu qatannguterput ajortuliorsimasoq, nassuerutigiumanaguli?

Qatanngutit angutit inersimalluartut ikiuisinnaapput

12, 13. (a) Iliuuserisassat aappaatut Jesusip suna eqqaavaa? (b) Unnersuussut tamanna maleruarutsigu suna eqqumaffigisariaqarparput?

¹² Illit sualuttumik ajortuliorsimaguit kissaatigissagunarpat allat ingerlaannaq nikalluutissanngikkaatsit. Jesusip aamma takutippaa qatannguterput utertinniarlugu, ilagiit sinneri peqatigalugit Guutip iluarisaanik kiffartuinnarsinnaaqqullugu alloriarneq siulleq naammagiinnassanngikkipput. Jesusip nassuiarpaa alloriarnerup tulliuttup sumik nassataqarnera: ’Tusarumanngippatilli ataatsimik marlunnilluunniit ilaqarlutit orniguk, siunersiutigisaq qanoq-ittorluunniit nalunaajaasut marlulluunniit pingasulluunniit oqaasiannik aalajangersarneqaqqullugu.’

¹³ Jesus oqarpoq: ’Ataatsimik marlunnilluunniit ilaqarlutit orniguk.’ Oqanngilaq oqaloqatigereerlugu kikkunnut tamanut ammasumik pisimasoq eqqartorsinnaagipput, nakkutilliisoq angalasartoq tamatuminnga paasitissinnaagipput imaluunniit qatanngutit allat tamatuminnga allaffigisinnaagivut. Immaqa qularinngilluinnarparput qatannguterput unioqqutitsisimasoq — tamannali uppernarsineqanngilaq. Nikallornartunik siaruarterisariaqanngilagut, immaqa kingusinnerusukkut ilumuunnginnerinik paasineqartunik, taamaaliornermi mamarliineruvoq. (Ussatit 16:28; 18:8) Jesusili oqarsimavoq ataatsimik marlunnilluunniit ilaqarluta ornissagipput. Sooq? Aamma kikkut ilagisinnaavavut?

14. Alloriarnerit aappaannut atatillugu kikkut ilagineqarsinnaappat?

¹⁴ Siunertaraarput qatanngutitta utertinnissaa ajortuliorneranik paasitinneratigut allamillu isumataarnissaanut isumaqatiginngisaminillu  Guutimillu eqqisseqatiginninnissamut kajumissaarneratigut. Tamanna anguniarlugu pitsaanerpaassaaq qatanngutit ilagineqartut unioqqutitsinermut takunnittuusimappata. Immaqa taamatut pisoqarmat najuupput, imaluunniit niuerniarnermut atatillugu pisimasoq (imaluunniit pisimanngitsoq) pillugu ilumoortumik ilisimasaqarlutik. Tamatumunnga ilisimannittoqanngippat pisunut taamaattunut misilittagaqartut ilagineqarsinnaapput, taakkua nalilersinnaagamikku pisimasoq ilumut unioqqutitsinertut isigineqassanersoq. Aammattaaq kingusinnerusukkut pisariaqassagaluarpat, qanoq oqartoqarsimaneranik paasissutissanillu saqqummiunneqartunik qanorlu iliortoqarsimaneranik uppernarsaasuusinnaapput. (4 Moses 35:30; 5 Moses 17:6) Taamaattumik arlaannaannilluunniit illersuinaveersaartuuginnanngillat; ilaapput qatanngutertik utertinniarlugu.

15. Sooq kristumiut utoqqaanertat iluaqutaasinnaappat alloriarnerit aappaanni?

¹⁵ Ilaatinneqartut tassaasariaqanngillat ilagiinni utoqqaanertat. Angutilli inersimalluartut utoqqaanertaasut immaqa anersaakkut siuneqassusiat iluaqutaasinnaavoq. Utoqqaanertat taakku „assigissavaat anorersuarmut oqquiffik sialussuarmullu oqqiffik, inoqajuitsumi kuunnguit kuuttut, nunami imissaaleqisumi qaarsorsuup alanngortaa “. (Jesaja 32:1, 2) Qatanngutitik eqqarsalersinniarlugit oqaloqatiginissaannut ikiornissaannullu misilittagaqarluarput. Unioqqutitsisoq pissutissaqarluarpoq ’inunnik tunissutit’ taakku tatigissallugit. * (Evfisumiut 4:8, 11, 12) Qatanngutit angutit inersimalluartut tusarnaartoralugit pisimasut oqaluuserigaanni qinoqatigigalugillu, ajornartorsiut aaqqikkuminaappasikkaluartoq iluarsineqarsinnaavoq. — Naleqqiuguk Jâko 5:14, 15.

Utertinniarlugu ilungersorneq kingulleq

16. Alloriarnerit pingajuat Jesusip eqqartugaa sunaava?

¹⁶ Alloriarnerit aappaat iluaqutaanngippat alloriarnerit pingajuat pisariaqassaaq, tamatumanilu ilagiinni nakkutilliisut peqataassapput. ’Taakkua [ataaseq marlulluunniit] tusarumanngippagit ilagiinnut oqaatiguuk; ilagiilli tusarumanngippagit Guutimik nalusutut ilanngaaserisutullu isumaqarfigissavat.’ Tamanna qanoq paasisariaqarpa?

17, 18. (a) Assersuutip suup paasitissinnaavaatigut oqaatsit ’ilagiinnut oqaatiguuk’ qanoq paasisariaqarnersut? (b) Ullumikkut tamanna qanoq maleruarsinnaavarput?

¹⁷ Ima paasisariaqanngilaq ajortuliaq unioqqutitsinerluunniit ilagiinnut tamanut ataatsimiinnermi nalinginnaasumi imaluunniit immikkut ittumi sammineqassasoq. Guutip oqaasiani periaaseq eqqortoq allaatigineqarpoq. Paasiniariartigu Israelitoqqami pikitsitsisoqarpat, nerivallaartoqarpat imerajuttoqarpalluunniit qanoq iliortussaasimanersut: „Aappariit erneqarunik naalasseriitsumik anneruniarumatuumillu ataataminut anaanaminullu naalakkumanngitsumik anusinngorsaraluaraangannilu maleruutilerumanngitsumik, taava aappariit taakkua illoqarfiup isaaffianukaatissavaat, illoqarfimmi utoqqaanertanut, taakkulu ima oqarfigissallugit: ’Ernerput una naalasseriitsuuvoq anneruniartuullunilu oqaatsivut naalakkumassanagit. Aamma pigisaminik atuipiluttuuvoq imerajuttuullunilu.’ Taava illoqarfiup angutitaasa tamarmik ujaqqanik milloorlugu toqussavaat.“ — 5 Moses 21:18-21.

¹⁸ Inuiaqatigiit tamarmik imaluunniit naggueqatigiit tamarmik angutip ajortuliorneri tusartussaanngilaat eqqartuusseqataasussaanatiluunniit. Utoqqaanertat piginnaatitaasut ilagiit sinnerlugit suliarinnittussaapput. (Naleqqiuguk Mosesimik allakkat tallimaat 19:16, 17, tassani ’palasit eqqartuussisullu tamatuma nalaani eqqartuussisuutitaasut’ eqqaaneqarmata.) Ullumikkuttaaq taamaappoq. Alloriarnerit pingajuat pisariaqartinneqaraangat  kristumiut utoqqaanertat ilagiinnut sinniisut pisimasoq suliarissavaat. Unali suli anguniagaraat: ajornanngippat qatanngutip kristumiup utertinnissaa. Ingasaassiniartuunnginnermikkut, siumut eqqartuusseriinnginnermikkut kinaassusersiortuunnginnermikkullu tamanna takutippaat.

19. Utoqqaanertat tamatuminnga suliassinneqartut suna anguniagarissavaat?

¹⁹ Piviusut nalilerniassavaat pisimasunillu ilisimannittut apersussallugit paasiniarlugu ajortuliortoqarsimanersoq (sulilu ajortuliortoqartarnersoq). Ilagiit ajortunngornissamut anersaamullu silamiorpaluttumut illersorniassavaat. (1 Korintumiut 2:12; 5:7) Biibili tunngavigalugu piukkunnaatitik naapertorlugit ’ajoqersuut peqqissinartoq eqqorlugu’ kajumissaarissapput ’assortuisut akisutissaarutissinnaaqqullugit’. (Títuse 1:9) Neriunarpoq unioqqutitsisoq Israelikkutut Jehovap pruffiitianit ima allaatigineqartutut isiginnittaaseqassanngitsoq: ’Qaaqqusigaluarama akinngilasi oqalukkaluaramalu naalanngilasi, iliorlusili iluarinngisannik piumasarinngisakkalu qinerlugit.’ — Jesaja 65:12.

20. Jesusip oqaasii naapertorlugit qanoq pisoqassava ajortuliortoq tusarumananilu allamik isumataarumanngippat?

²⁰ Ajoraluartumik ajortuliortut ikittuaqqat taama isiginnittaaseqarput. Taamaappat Jesusip peqqussutaa ersarippoq: ’Guutimik nalusutut ilanngaaserisutullu isumaqarfigissavat.’ Jesus oqanngilaq naakkittaatsuliorfigineqassasoq ajoquserniarneqassasorluunniit; kisianni apustili Paulusip peqqussutaa ersareqaaq: ajortuliortut peqqissimiumanngitsut ilagiinnit anisitaasariaqarput. (1 Korintumiut 5:11-13) Alloriarnerup tamatuma allaat angorusutarput kingunerisinnaavaa: ajortuliortoq utertillugu.

21. Ilagiinnit anisinneqartut sumik periarfissaqarpat?

²¹ Taama kinguneqarsinnaanera Jesusip ernermik tammarsimasumik assersuusiaanit takuneqarsinnaavoq. Sivisungaatsiartumik ataatami illuani asannittumik inooqatigiinnerup avataaneereerluni ajortuliortoq taanna ’ilitsorilerpoq’. (Lúkarse 15:11-18) Paulusip Timoteus allaffigaa unioqqutitsisut ilaat piffissap ingerlanerani allamik isumataarumaartut, ’ilitsorilissasullu Diaavulup nigaanit’. (2 Timûtiuse 2:24-26) Qamannga pisumik neriuppugut ajortuliortut peqqissimisimanngitsut taamaattumillu ilagiinnit anisitaasariaqartut, paasiumaaraat sumik annaasaqarsimanerlutik — Guutimit iluarisaaneq, asannittumik peqatigiinneq kristumiunullu aalajaatsunut qanittumik attaveqarneq — silattoqqillutillu.

22. Immaqa qanoq ililluta piffissap ingerlanerani qatannguterput utertissinnaavarput?

²² Jesus isumaqanngilaq inuit Guutimik nalusut ilanngaaserisullu annaassinnaanngitsut. Ilanngaaserisut ilaat, Mattæus Levimik atilik, allamik isumataarsimavoq, Jesus ’malilerlugu’ allaallu apustilitut toqqarneqarluni. (Mákorse 2:15, 16; Lúkarse 15:1) Ullumikkut ajortuliortup ’ilagiit tusarumanngippagit’ taakkunanngalu anisitaasariaqarpat, utaqqisinnaavugut paasiniarlugu piffissap ingerlanerani allamik isumataassanersoq eqqortulioqqilerlunilu. Taamaaliorpat ilagiinnullu ilaasortanngoqqippat pilluassaagut qatannguterput pallorfiginninnermut ilumoortumut utertinneqarmat. (wE 15/10 99)

[Quppernerup ataani ilanngussat]

Eqqaamavigit?

□ Ajortuliornerit qanoq ittut pingaartumik Matîuse 18:15-17-imi eqqarsaatigineqarpat?

□ Alloriarnermi siullermi suna eqqaamasariaqarparput?

□ Alloriarnerit aappaanni kikkut ikiorsinnaavaatigut?

□ Alloriarnerit pingajuanni kikkut ilaasinnaappat, qanorlu ililluta immaqa piffissap ingerlanerani qatannguterput utertissinnaavarput?

[Atuaqqissaarnermi apeqqutit]

[Qupp. 20-mi assiliartaq]

Juutit ilanngaaserisunik ilaqarnaveersaartarput, Jesusilli Mattæus ’allamik isumataartoq’ imminillu malinnilersoq toqqarpaa

[Qupp. 22-mi assiliartaq]

Ajornartorsiutit amerlanertigut ’marluinnaatilluni’ aaqqinneqarsinnaasarput