Tukkortuuneq annertugaangat

KUNNGIMUT tunissuteqarnissannut periarfissaqalissagaluaruit sumik tunissagaluarpiuk? Silarsuarmimi pisuujunerpaajuppat ilisimassuseqarnerpaajullunilu? Tunissummik nuannarisinnaasaanik eqqaasaqarsinnaavit? Ukiut 3000-t matuma siorna Sabap kunngiata arnap kunngi taamaattoq — Israelip kunngia Salomon — tikeraaleramiuk tamanna eqqarsaatigisariaqarsimavaa.

Biibilimi oqaluttuarineqarpoq tunissutaanut ilaasimasut kuultit talentinik 120-nik nalillit ’balsamillu annertoqisut ujaqqallu erlinnartut’. Kuultitaannaat ullumikkut koruuninik 290 millioninik naleqassagaluarput. Uuliat balsamiusut, tipigissut katsorsaasinnaasut, kuultisulli naleqartinneqartarput. Biibilimi oqaatigineqanngilaq kunngip arnap Salomon uuliamik qanoq annertutigisumik tunisimaneraa, allassimavorli tunissutaa nallerneqanngisaannartoq. — 1 Kunngit 10:10.

Ersarippoq Sabap kunngia arnaq arnaasoq pisooq tukkortuusorlu. Aammattaaq tukkortuunera akiniarneqarpoq. „Kunngip Salomop, “ Biibilimi allassimavoq, „Sabap kunngia arnaq perusutaanik qinnutigisaanillu tamanik tunivaa kunngip tikeraanut tamanut tunissutigisartagaasa saniatigut.“ (2 Israelikkut 9:12) Ilumooraluarpoq kunngikkormiut tunioraanneq ileqqorisimagunaraat, Biibilimili immikkut taaneqarpoq Salomon ’tunissutigisartakkat saniatigut’ tunisisoq. (1 Kunngit 10:13) Salomon nammineerluni allassimavoq: „Pilluaqqussummik tunioraasup tamanna immini pilluaatigaa; allanik imeruersaasoq nammineq imeruersarneqarumaarpoq.“ — Ussatit 11:25.

Soorunami Sabap kunngiata arnap Salomon tikeraarniarlugu piffissamik atuisariaqarsimavoq ilungersuuteqartariaqarsimallunilu. Saba ullummikkut kunngiitsuuffiup Yemenip nalaaniissimagunarpoq; tassa kunngi arnap qatigattuullu atorlugit angalaqataasa Jerusalemimut 1600 km sinnerlugit angalasimavaat. Jesusip oqarneratut ’nunap isuanit aggersimavoq’. Sooq Sabap kunngia arnaq taama pisarissersortigisimava? Pingaarnerutillugu Salomonip ’ilisimassusia tusariartorlugu’ tikeraarsimavoq. — Lúkarse 11:31.

Kunnginik allakkat siullit 10:1, 2-mi allassimavoq Sabap kunngia arnaq ’tikiuttoq Salomon nalorsitsaarutinik misilinniarlugu. . . . Pulaarpaa uummammiugisaminillu tamanik oqaloqatigalugu’. Salomon qanoq qisuariarpa? „Salomop Sabap kunngiata apeqqutai tamaasa akiorpai. Kunngip minnerpaamilluunniit nalornisooruteqarnani apeqqutai tamaasa akisarpai.“ — 1 Kunngit 10:1-3.

Tusakkani takusanilu tupigusuutigalugit kunngi arnaq maniguulluni oqarsimavoq: „Pilluarput kiffatit sukkulluunniit ilinnik kiffartuussisartut ilisimassutsinnillu tusartartut.“ (1 Kunngit 10:4-8) Salomonip kiffai pisuussutinik avatangiiseqarnerat — naak taamakkaluartoq — pissutigalugu pilluarneranngilai. Salomonip kiffai pilluarnerarpai Salomonip ilisimassusia Guutimeersoq ulloq naallugu tusarnaarsinnaammassuk. Sabap kunngia arnaq Jehovap ullumikkut kiffaanut, Pinngortitsisup nammineerluni erneratalu Jesus Kristusip ilisimassusiannik iluaqutiginnittunut, maligassiuilluarpoq.

Kunngi arnap Salomonimut oqaasiata tullia aamma maluginiarnartuuvoq: „Unnersiutigineqarli [Jehova] Guutit.“ (1 Kunngit 10:9) Salomonip ilisimassusia atugarissaarneralu Jehovamit pilluaqqussutaasoq takusinnaasimagunarpaa. Tamanna Jehovap  siusinnerusukkut Israelikkunnut neriorsuutigisimasaanut naapertuuppoq. ’Ileqqoreqqusakka maleruarussigik,’ oqarpoq, „taava inuiaat allat silatuutut siuneqartutullu naatsorsuutissavaasi. Ileqqoreqqusat tamakku tamaasa tusarunikkit ima oqarumaarput: ’Ila inuiassuit uku silatussusii siuneqassusiilu!’ “ — 5 Moses 4:5-7.

Ilisimassummik Tunisisumut sassartut amerlapput

Ukiuni nutaanerusuni millionilippassuit Jehovap peqatigiissortaanut kajungilersimapput takusinnaagamikku ’Israel Guutip pigisaa’ tassaasoq ’inuiassuit silatuut siuneqartullu’, taamaapput Guutip inatsisaanik najoqqutassiaanillu naammalluinnartunik siulersorneqaramik, namminneq pissaanermikkuunngitsoq. (Galâsiamiut 6:16) Kuisittut amerlassusiisa takutippaat ukiut tamaasa ajoqersukkat nutaat 100.000-ilikkuutaat anersaakkut Israelimut ima oqartut: „Ingerlaqatigissavassi tusaratsigu Guutip najoraasi.“ (Sakarja 8:23) Pallorfiginnittut taakkua nutaat tupigusuttarput takugaangamikku Jehova kiffaminik anersaakkut nerersuartitsisoq. Upperisarsiornermi peqataaffigisimasaminni tamatumunnga assingusumik takusimanngisaannarput. — Jesaja 25:6.

Tunisisumut annerpaamut tunissutit

Inuit qujamasuttut taama annertutigisumik pisimasut pissusissamisoortumik eqqarsaatigilissavaat Kunngi Tunisisorlu annerpaaq, Jehova Guuti, akiniarlugu sumik tunisinnaanerlugu. Biibilimi takutinneqarpoq Jehovamut tunniussinnaasarput annerpaaq tassaasoq ’pilliut qujaniut’. (Eprîarit 13:15) Sooq? Pilliut tamanna inuunermik annaassinermut toqqaannartumik attuumassuteqarmat, naggatissap nalaani maani Jehovap tamanna pingaartippaa. (Hesekiel 18:23) Tamatuma saniatigut nukiit piffissarlu napparsimasunut, nikallungasunut allanullu atukkat pilliutaapput Guutimut iluarinartut. — 1 Tásalûníkamiut 5:14; Eprîarit 13:16: Jâko 1:27.

Aningaasatigut tunissutit pingaaruteqarput. Biibilinik atuagassianillu Biibililersaarutinik kristumiullu katersuuttarfigisinnaasaannik pilersitsinissamut ajornarunnaarsitsisaramik. (Eprîarit 10:24, 25) Aamma tunissutitigut ikiuiniarnermi atortussat pissarsiarineqartarput sorsunnernerit pinngortitamilu ajunaarnersuit kingunerisaannik atugarliortut iluaqutigisaannik.

Tukkortuuneq pillugu Guutip oqaasia najoqqutassaalluartunik imaqarpoq. Assersuutigalugu ilinniarparput kristumiut aningaasanik amerlassusii aalajangersimasunik tunisissanngitsut, pisinnaasartilli, kajumissusertik uummammillu nuannaartumik tunisissasut. (2 Korintumiut 9:7) Ilaat tunisilluarsinnaapput allalli immaqa annikitsuinnarmik tunisisinnaallutik, soorlu Jesusip nalaani uillarneq piitsoq tunisisimasoq. (Lúkarse 21:2-4) Ajunngitsumik pissuteqarluni tunisisup tunissutai tamaasa pilliutaalu tamaasa Jehovap — silarsuarmik tamarmik piginnittup — pingaartikkai eqqarsalersitsinngila? — Eprîarit 6:10.

Jehovap innuttai nuannaarlutik tunisisinnaaqqullugit pisariaqartitanik assigiinngitsunik taakkualu qanoq matussuserneqarsinnaanerannik ilisimatinneqartarput. Taamaaliortoqaraangat Jehovap anersaavata illernartup kajumittut qisuariartittarpai. Israelitoqqami periaaseq tamanna atorneqartarpoq tupiusaliap kingusinnerusukkullu naalaffiup sananeqarneranut atatillugu. (2 Moses 25:2; 35;5, 21, 29; 36:5-7; 39:32; 1 Israelikkut 29:1-19) Ukiuni hundredelinni siullerni periaaseq tamanna atorlugu kristumiut Naalagaaffik pillugu nutaarsiassamik nuannersumik inuiannut tusarliussiniarlutik Israelimilu kaannersuup nalaani qatanngutiminnik ikiuiniarlutik aningaasanik pisariaqartunik pissarsisarput. — 1 Korintumiut 16:2-4; 2 Korintumiut 8:4, 15; Kulorsamiut 1:23.

 Ullumikkut aamma taamaappoq. Jehovap kiffani pilluaqqusarpai, pilluaqqujuassavaalu silarsuarmi oqaluussinerit ilinniartitaanerillu annerpaartaannik naammassinninnissaannut pisariaqartitaannik tunisarlugit. — Matîuse 24:14; 28:19, 20.

Maannakkut pisariaqartitat

Nunani amerlasuuni Jehovap Nalunaajaasuisa sulinerinik killilersuiffiusimasuni ukiuni kingullerni pisortatigoortumik akuerisaalersimapput. Nunat taakkua ilarpassuini oqaluussisartut amerleriarujussuarnerannik kinguneqarsimavoq. Paasinartumillu Biibilinik atuagassianillu Biibililersaarutinik pisariaqartitsineq annertunerulersimavoq.

Naalagaaffilersaarfiit aamma atorfissaqartinneqaqaat. Maannakkorpiaq silarsuaq tamakkerlugu naalagaaffilersaarfiit nutaat 9000-t missaat pisariaqartinneqarput. Ullormut naalagaaffilersaarfik ataaseq sananeqartarpat, maannakkut pisariaqartinneqartut matussuserniarneri ukiunik 24-nit amerlanerusunik sivisussuseqassaaq. Aammattaaq ullumikkut ullormut ilagiit nutaat arfineq-marluk missaat pilersinneqartarput. Taakkua ilarpassui silarsuup ilaani pigissaarfiunnnginnerusuniipput. Taakkuali ilarpassuini illunik akisuunik pisariaqartitsisoqanngilaq. Sumiiffiit ilaanni naalagaaffilersaarfiit pisariaqartitanik matusisut innuttaaqagiinnullu nalunaajaataalluartut 40.000 koruunit sinnilaarlugit nalillit sananeqarsinnaapput.

Ukiuni hundredelinni siullerni kristumiut ilaat allanit pigissaarnerusimapput. Apustili Paulus allassimavoq: ’Ataaseq naligineqassavoq: maannakkut ilissi peqangaarsusersi taakkua piitsuussusiannut ikiuutaassaaq taakkua peqangaarsusiat ilissi piitsuussutsissinnut ikiuutaasinnaaqqullugu, ataaseq naligineqaqqullugu.’ (2 Korintumiut 8:13, 14) Ullumikkut assingusumik naligiissaarilluni silarsuarmi Biibilinik,  atuagassianik Biibililersaarutinik, naalagaaffilersaarfinnik, ikiuutinik allanillu pisariaqartunik pilersuisoqartarpoq. Taamatut tukkortuuneq tunisisumut tigusisumullu pilluaqqussutaavoq angisooq. — apustilit suliait 20:35.

Peqatigiiffiup atuagassiamik matumannga atuartartuinit tukkortuunit allagarsiarisartagaanit erserpoq, amerlasuut ikiuerusuttut tuniseriaatsilli assigiinngitsorpassuit arlaat sorleq atorunikku pitsaanerussanersoq nalornissutigalugu. Qularnanngitsumik apeqqutaasinnaasut akiniarnerini allaaserisap matuma ungaluusartaa iluaqutaassaaq.

Salomonip naalakkersuinerata nalaani kunngit taassuminnga tusaamannittut „nunarsuarmit tamarmit “ tikeraartarsimavaat. Biibilimili naalakkersuisoq ataasiinnaq sukumiisumik allaatigineqarpoq — Sabap kunngia arnaq (2 Israelikkut 9:22, 23) Tukkorluni pilliuteqarpoq. Pilluaqqusaangaarporli — ima annertutigisumik allaat tikeraarnermi naggataa tungaani ’tupigusungaalerluni’. — 2 Israelikkut 9:4.

Siunissami Jehova, Kunngi Tunisisorlu annerpaaq, imminut pilliuteqartunut Salomonip iliuuserisinnaasimasaanit annertunerungaartunik iliuuseqassaaq. ’Tupigusungaalissapput’ Jehovammi ullormi eqqartuussiffissami mianernangaartumi inuuginnartiinnassanngilai, aammattaarli ’assani ammassavai pinngortitallu tamaasa ajunngitsuutiminik qaarsillartillugit’. — Tussiaat 145:16. (wE 1/11 99)

 [Qupp. 28-mi ungalusaq]

Qanoq ililluni kajumissutsimit tunissuteqartoqartartoq

NUNARSUAQ TAMAKKERLUGU SULIAMUT

Amerlasuut aningaasanik naatsorsuutiminni nakkaatitsivimmut „Tunissutit Naalagaaffiup sulianeranut — Matîuse 24:14“-imik allagartalimmut nakkartitassaminnik immikkoortitsisarput. Tunissutigineqarsimasut qaammatip naanerani ilagiinnit Napasuliaq Alapernaarsuiffiup Peqatigiiffianut nassiunneqartarput.

Tunissutit: Aningaasat kajumissutsimit tunissutit toqqaannartumik nassiunneqarsinnaapput uunga: Vagttårnet, Stenhusvej 28, 4300 Holbæk, giro 640-3468. Pinnersaatit nalillillu allat aamma tunissutigineqarsinnaapput. Allagarsertariaqarpulli tunissutaanerannik nalunaartumik.

Sillimmasiissutit: ’ Inuunermut sillimmasiissutit ’ utoqqalinersiutissatulluunniit nammineq katersukkat Napasuliaq Alapernaasuiffiup Peqatigiiffianut pisassanngortinneqarsinnaapput. Taamaalisoqarniartillugu tamatigut Peqatigiiffik ilisimateqqaarneqartariaqarpoq.

Bankkontot, pappialat nalillit pigisallu aalaakkaasut: Bankkontomi uninngatitat, pappialat nalillit pigisallu aalaakkaasut tuniuminartut Napasuliaq Alapernaarsuiffiup Peqatigiiffianut tunniunneqarsinnaapput. Taamaalisoqarniaruni aamma Peqatigiiffik ilisimatinneqaqqaassaaq.

Kingornussassat: Aningaasaatit inatsisitigut atuuttumik testamentiliornikkut Napasuliaq Alapernaarsuiffiup Peqatigiiffianut kingornussassanngortinneqarsinnaapput. Pitsaassaaq Peqatigiiffik immaqalu ilagiit tamatuma kopiianik tunissallugit. Ilisimatitsissutigisinnaavarput Vagttårnets Bibel- og Traktatselskab kingornussassat akileraarutaannut akiliineq ajormat.

Periarfissat allat (pisussaasutut nalunaarutit allallu): Ilagiinni ilaaffigisanni utoqqaanertat tunissuteqarnissamut periarfissanik allanik paasiniaaffigisinnaavatit.

Jehovap Nalunaajaasuisa sulinerat kajumissutsimit tunissutaannarnik tapersersorneqarpoq soorlu ataani issuarneqartumi takuneqarsinnaasoq: „[Tamakku] . . . tamarmik kajumissutsiminnik sulisunit akissarsiaqarneq ajortunit suliarineqartarput, taamaalilluni aningaasartuutit sapinngisamik appasitsinneqarlutik. Illumiit illumut angalaarluni oqaluussisarneq atuagassianillu agguaassineq Jehovap Nalunaajaasuisa akissarsiaqaratik suliarisarpaat. Tamarmik [aningaasartuutitik] namminneq akilertarpaat. Utoqqaanertat ilagiinnik nakkutilliisut ilagiinnilu kiffartortut akissarsiaqaratik kiffartuussisarput. Kiffartuussinerminni aningasaajaatit tamaasa namminneq akilertarpaat.

Siulersuisoqatigiinni ilaasut allallu Biibilinik atuakkanillu Biibilimut ilinniutaasunik piareersarnermik naqiterinermillu taamaaqataannillu suliaqartut tamarmik allanik akissarsiaqanngillat kisianni akeqanngitsumik nerisaqarlutillu inigisaqarput namminerisaminnillu pisariaqartitaminnut anginngitsumik [ajunngitsorsiassaqartitaallutik]. Aammattaaq allamik atorfeqaratik nakkutilliillutik angalasartut taama ittumik isumagineqartarput. . . .

Jehovap Nalunaajaasuisa ataatsimiititsinerini tamani, ilagiissiminni aammattaaq ataatsimeersuarnerni, aningaasanut nakkaatitsiveqarpoq tunisiumasut nakkartitsiffigisinnaasaannik. Aningaasanik katersuisitsineqarneq ajorpoq. Pissarsiamik qulerarterutaannik akileraartaqqusaanngillat ilagiinnullu ilaasortatut akiliummik akileeqqusaanatik.“ — Brochurimit Jehovap Nalunaajaasui — Ataasiuussuseqarlutik Guutip peqqusaanik silarsuarmi tamarmi naammassinnittut-mit, qupernermi 28-mit, issuagaq.

[Qupp. 27-mi assiliartat]

Jehovap Nalunaajaasuisa sulinerat nammineq kajumissutsimit tunissutinik tapersersorneqarpoq