Ukiunut tusindilinnut pingaaruteqarnerpaanut piareersimaniarit!
Ukiunut tusindilinnut pingaaruteqarnerpaanut piareersimaniarit!
KRISTUSIP ukiuni tusindini naalakkersuinissaa inuiannut tamanut pilluaqqussuterpassuarnik kinguneqassaaq. Jesusip asannittumik siulersuineratigut inuit ullumikkut atugaannit alianartunit naammalluinnartunngortinneqassapput. Eqqarsaatigeriaruk tamanna inunnut ataasiakkaanut qanoq kinguneqassanersoq. Peqqilluinnarneq! Takorlooriaruk ullaat tamaasa iternermi ippassarnit inuummarinnerulluni. Angutit, arnat meeqqallu millionilikkuutaat piffissaq pilluarfiusoq tamanna qilanaaraat. Takkunnissaa tatigalugulu qinnutigisarpaat. Biibilimik atuaqqissaarsimagamik qularinngilaat pilluaqqussutissat tamakkua misigisinnaallugit.
Jesus Kristusilli ukiuni tusindini naalakkersuilertinnani naalagaassutsiminut assortuisut tamaasa nunarsuarmit peersittariaqarpai. Taamaaliussaaq sorsunnissami Biibilimi ’Harmagedonimik’ taaneqartumi. (sarĸúmersitat 16:16) Kristumiut ilumoortut nunamiittut sorsunneq tamanna peqataaffigissanngilaat. Tassaassaaq Guutip sorsunnera. Sumiiffimmi aalajangersimasumi ataasiinnarmi pinavianngilaq. Biibilimi allassimavoq tamatuma nunarsuaq tamakkissagaa. Kristusip naalakkersuineranut akeraasut tamarmik suujunnaarsinneqassapput. Taakkunannga aniguisoqassanngilaq. — Jeremia 25:33.
Tamatuma kingorna Jesusip Satan Diaavulu inngilipiluilu saassavai. Takorlooriaruk piumaartussaq manna Guutip sarĸúmersitat-nik allattumut saqqummersissimasaa: ’Inngili [Jesus Kristus] takuara qilammit aqqartoq, taassuma itinersuarmut matuersaataasoq pigigaa, kalunnersuillu tigumiarigai. Kuukkooriaasarsuarlu tiguaa, taanna pulateriaarsutoqaq, tamassalu Diaavulu Satanilu; qilersorpaalu ukiut tuusintillit qilersugaaqqullugu.’ (sarĸúmersitat 20:1, 2) Kingusinnerusukkut Satan inngilipiluilu naassaanngitsumik suujunnaarsinneqassapput. — Matîuse 25:41.
’Amerlangaartut kisinneqarsinnaanngitsut’ Harmagedonimit aniguissapput. (sarĸúmersitat 7:9) Inuit taakku Kristusip siulersussavai ’imermillu puilasunik inuunerup pianik’ tamakkiisumik iluaqutissarsitillugit soorlu savanik paarsisup savaatini imermut inuunartumut siulersortarai. (sarĸúmersitat 7:17) Harmagedonimit aniguisut Satanimit inngilipiluinillu akornusersorneqaratik anersaakkut siumukarsinnaassapput piffissallu ingerlanerani ajortiliussusertik ajugaaffigiartorlugu naammalluinnartunngorumaarlutik.
Kristusip asannittumik siulersuinerata ataani inuuneq atoruminarnerujartuinnassaaq. Jehova Guutip Jesus Kristus aqqutigalugu aliasunnermik anniaatinillu kinguneqarsinnaasut tamaasa peerluinnassavai. ’Qulliit tamaasa isaannit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq.’ (sarĸúmersitat 21:4) Pruffiiti Esajas tamanna pillugu ima siulittuivoq: „Taava tappiitsut isaat uisitaassapput, tusilartut siutaat ammarneqassapput. Tusiattoq tuttutut pissigarumaarpoq, oqajuitsuugaluaq qiimmattarluni appikkumaarpoq.“ (Jesaja 35:5, 6) Toqusullu ’mikusut angisuullu’ makissapput toqoqqinngisaannassallutillu. — sarĸúmersitat 20:12.
’Amerlangaartut’ Harmagedonimit aniguisussat maannakkut katersorneqalereerput. Kristusip ukiuni tusindini naalakkersuinissaanut piareersarput. Naluaat ukiuni tusindini Naalagaaffik tamanna qaqugu aallartissanersoq, qularinngilaalli Guutip piffissarititaa nalliuppat piumaartoq. Taakkua akornanniinnissannut periarfissaqarputit, piareersartariaqarputilli. Pigisavit tunineratiguunngitsoq sumiiffimmullu aalajangersimasumukarnikkuunngitsoq Biibilimilli atuaqqissaartarnikkut Jehova Guuti taassumalu siunertaa pillugit ilisimasaqalernikkut. Ilinnut akeqanngitsumik arlaannaatigulluunniit pisussanngortitaanak Jehovap nalunaajaasuisa nuannaarutigalugu takutikkusuppaat Biibilimik atuaqqissaartarneq ilaquttavillu qanoq iluaqutigisinnaagissi. Atuagassiamik matuminnga naqiterisitsisartut amerlanerusunik paasissutissikkusuppaatsit. (wE 1/11 99)
[Qupp. 7-mi ungalusaq]
Ukiut tusindillit taakku assersuutituunngitsoq assersuutitulluunniit paasineqartussaappat?
Sarĸúmersitat allanneqarneri assersuutaammata apeqqut manna pilerpoq: Ukiut tusindillit Kristusip naalakkersuiffissai assersuutituunngitsoq assersuutitulluunniit paasineqartussaappat?
Ilimanarluinnarpoq ukiut tusindit assersuutituunngitsoq paasineqartussaasut. Apustili Paulusip Kristusip ukiuni tusindini naalakkersuinissaa inuiannut eqqartuussiffissaq ullortut ataatsitut eqqaavaa. (apustilit suliait 17:31; sarĸúmersitat 20:4) Apustili Peter allassimavoq ulloq ataaseq nalunaaquttap-akunnerinik 24-nik sivisussusilik Jehovamut ukiutut tusinditut ittoq. (2 Pîtruse 3:8) Taamaattumik ’ulloq’ eqqartuussiffissaq tamanna ukiunik tusindinik sivisussuseqassagunarpoq. sarĸúmersitat 20:3, 5-7-imi oqariaatsip tamatuma sisamariarluni atorneqarnerata paasinarsisigunarpaa piffissaq aalajangersimasumik sivisussusilik pineqartoq — ’ukiut tusindillit’.