Uummatissigut isumakkeerfiginnittaritsi

’Taamattaaq Ataatama qilammiusup ilissi pissavaasi, tamassi qatanngutisi uummatissigut isumakkeerfigisarinngikkussigik.’ — MATÎUSE 18:35.

1, 2. (a) Arnap ajortuliortartutut ilisimaneqartup qanoq ililluni Jesusip suliaanik pingaartitsinini takutippaa? (b) Jesus qanoq qisuariarpa?

ARNAQ atortittartuugunarpoq, inuup upperisarsiortup angerlarsimaffiani naammattoorneqarnissaa ilimananngitsoq. Tassaniinnera inuit ilaannut tupaallannartuuvoq, iliuusiali suli tupaallannarneruvoq. Angut ileqqorilluinnartoq ornippaa, suliaanillu pingaartitsinini takutinniarlugu qulliminik isigai asappai nutsaminillu allarterlugit.

² Angutip taassuma, Jesusip, arnaq ’illoqarfimmi ajortuliortutut’ ilisimaneqartoq ajattunngilaa. Illumili ittuusup, Simonip farisiiariusup, ajortuliortuunera isumakuluutigaa. Taava Jesusip oqaluttuaraa aningaasanik atukkiisartoq angutinik marlunnik akiitsugaqarfigineqartoq. Ataaseq annertuumik akiitsugaqarpoq — sulisup ukiuni marlunni akissarsiaata nalinga missaannik. Aappaata tamatuma qulerarterutaannaa akiitsugaraa — tassa sulisup qaammatini pingasuni akissarsiaata nalinganit minnerusoq. Akiliisinnaanngimmata atukkiisartup ’tamaasa akileeqqujunnaarpai’. Ersarippoq akiitsugaqarnerusimasoq asannittuliornissaminut pissutissaqarnerusoq. Taanna arnap asannittuliorneranut atassuseriarlugu Jesusip najoqqutassiaq manna eqqaavaa: ’Mikisumik isumakkeerfigineqartoq mikisumik asannittarpoq.’ Arnarlu oqarfigaa: ’Ajortinnik isumakkeerfigineqarputit.’ — Lúkarse 7:36-48.

3. Imminut qanoq aperisariaqarpugut?

³ Imminut aperigit: ’Arnaq taannaagaluaruma, imaluunniit taassumatut atugaqaraluaruma, naakkinnittuliorfigineqarlungalu taava allat naakkittaallunga isumakkeerfigiumassanngikkaluarpakka?’ Ima akissagunarputit: ’Soorunami naamik!’ Ilumuussaguilli isumakkeerfiginnikkajuttuuit? Ajornakusoortinnagu taamaaliortarpit? Kajumillutit taamaaliorajuppit, allallu illit isumakkeerfiginnittartutut isigissavaatsit? Paasiniariartigu sooq tamatta apeqqutit tamakku eqqarsaatigisariaqarivut.

Isumakkeerfigineqartariaqarpugut — isumakkeerfigineqartarlutalu

4. Inuttut pissutsivut eqqarsaatigalugit suna nassuerutigisariaqarparput?

⁴ Nalunngilluinnarparput naammalluinnanngitsuulluta. Aperineqarutta tamanna  miserratiginavianngilarput, immaqalu Juánasip agdlagai sujugdlît 1:8-mi allassimasoq eqqaassallugu: ’Ajorteqarata oqaraluarutta, immitsinnik salloqittarpugut sallusuissullu ilutsinniinngilaq.’ (Rûmamiut 3:23; 5:12) Immaqa inuit ilaasa naammalluinnanngitsuunerat sualuttumik ingasattumik ajortuliornerannik malunnaateqarpoq. Sualuttumik ajortuliorsorisimanngikkaluaruttaluunniit qularnanngitsumik arlaleriarluta assigiinngitsorpassuartigulli Guutip najoqqutassiaanik unioqqutitsisimassaagut — ajortuliorluta. Taamaanngila?

5. Sooq pissutissaqarluarpugut Guuti qutsavigissallugu?

⁵ Taamaattumik immaqa Paulusip oqaatigisaatut atugaqarpugut: ’Ilissi [Jesusimut] ilanngullusi uummartippaasi ajortissinni uinissilu kipineqanngissusiani toqungagaluartusi, ajortitsinnillu tamanik isumakkeerfigaatigut.’ (Kulorsamiut 2:13; Evfisumiut 2:1-3) Malugiuk allassimammat: ’ajortitsinnik tamanik isumakkeerfigaatigut’. Tamanna annertoqaaq. Tamatta pissutissaqarluarpugut Daviditut qinunissatsinnut: „Aqqit pissutigalugu, [Jehova], iluaatsuliannik isumakkeerfiginnga unnit angigaluaqisut.“ — Tussiaat 25:10, 11.

6. Jehova isumakkeerfiginninnerlu eqqarsaatigalugit suna qularisariaqanngilarput?

⁶ Qanoq ililluta isumakkeerfigineqarsinnaavugut? Siullermik Jehova Guutip isumakkeerfiginninnissaq kissaatigimmagu. Pissusiisa ilisarnartut ilagaat. (2 Moses 34:6, 7; Tussiaat 86:5) Soorunami Guutip kissaatigaa qinunikkut saaffigissagitsinni isumakkeerfigineqarnissamillu qinnuigalugu. (2 Israelikkut 6:21; Tussiaat 103:3, 10, 14) Isumakkeerfiginninnissamullu taama ittumut inatsisitigut tunngavik pilersissimavaa — Jesusip utertitsissutitut pilliutaa. — Rûmamiut 3:24; 1 Pîtruse 1:18, 19; 1 Juánase 4:9, 14.

7. Suut eqqarsaatigalugit Jehova malinniarumasariaqarparput?

⁷ Guutip isumakkeerfiginninnissamut kajumissusia inoqatitsinnut qanoq ittuunissatsinnut maligassiuinertut isigisariaqarparput. Paulusip tamanna ima allalluni erseqqissarpaa: ’Ajunngitsumik iliorfigeqatigiigitsi isumassuigajullusilu isumakkeerfigeqatigiillusilu, soorlu Guutip isumakkeerfigigaasi Kristusimi.’ (Evfisumiut 4:32) Ersarippoq Paulus isumaqartoq Guutip maligassiaa ilinniarfigisariaqaripput, versimi tulliuttumi ima nangikkami: ’Taamaattumik Guuti qitornatut asanartutut malinniarsiuk.’ (Evfisumiut 5:1) Imminnut atassuteqarnera paasiviuk? Jehova Guutip isumakkeerfigisimavaatit — illittaaq Taanna malillugu allat ’isumassorlugillu isumakkeerfigisariaqarpatit’. Imminulli aperigit: ’Taamaaliortarpunga? Isumakkeerfiginninnissaq ajornakusoortikkukku ilikkarniarsarivara? Allat isumakkeerfigisarnerisigut Guuti malinniarsarivara?’

Isumakkeerfiginnittarneq sulissutigisisariaqarparput

8. Qatanngutitsinnut ilagiinniittunut atatillugu suna miserratigisinnaanngilarput?

⁸ Nuannissagaluarpoq kristumiut ilagiissaanni isumakkeerfigisariaqakkat ikittuinnaappata. Taamaanngilarli. Soorunami qatanngutitta kristumiut Jesusip asannittuliortarnera malinniarsaraat. (Juánase 13:35; 15:12, 13; Galâsiamiut 6:2) Silarsuup matuma ajortup eqqarsartaasia, oqariartaasia pissusiilu soraarunniarlugit sivisuumik ilungersorsimapput. Inuttut pissusertaaq pigiliukkusuppaat. (Kulorsamiut 3:9, 10) Kisianni sumiginnarsinnaanngilarput nunarsuaq tamakkerlugu ilagiit, aamma najukkatsinni ilagiit, inunnit naammalluinnanngitsunit katitigaanerat. Amerlanersaalli pissuserinnerulersimapput sulili naammalluinnanngitsuullutik.

9, 10. Sooq tupaallaatigissanngilarput anersaakkut qatanngutit akornanni isumaqatigiinngissuteqartoqarpat?

 ⁹ Biibilimi Guutip erseqqissarpaa ilagiit iluanni, qatanngutitta akornanni, naammalluinnanngissuseq naatsorsuutigisariaqaripput. Assersuutigalugu eqqarsaatigiuk Kulorsamiut 3:13-imi Paulusip oqaaserisimasai: ’Immissinnut unnerluutissaqaraluarussi kamageqatigiillusilu isumakkeerfigeqatigiigitsi; soorlu [Jehovap, NV] isumakkeerfigigaasi, taamattaaq ilissi pigitsi.’

¹⁰ Malugisariaqarpoq tamatumani eqqaasinneqaratta Guutip uatsinnik isumakkeerfiginninnera uagullu allanik isumakkeerfiginnittariaqarnerput imminnut attuumassuteqartut. Sooq tamanna unamminiarnartuusinnaava? Paulusip nassuerutigaa ’immitsinnut unnerluutissaqarsinnaasugut’. Aap, ilaannikkut pissutsit taamaattassapput. Ukiuni hundredelinni siullerni, allaat kristumiut ’iluartut’, ’qilammi pissamaartitaasumik neriugisaqartut’, tamanna misigisimavaat. (Kulorsamiut 1:2, 5) Ullumikkut kristumiut ilumoortut amerlanersaat anersaamit paasitinneqarsimanngimmata tassaasut ’Guutip qinigarisai iluartut asanartut’ allaanerunissaa ilimanarpa? (Kulorsamiut 3:12) Isumaqartariaqanngilagut ajorluinnartoqartoq ilagiinnitsinni — pissutissaqartumik pissutissaqanngitsumilluunniit — unnerluutissaqartoqarpat imaluunniit ajuallattoqarpat.

11. Ajoqersukkap Jakobip sumik eqqaasippaatigut?

¹¹ Jesusip qatanngutissaata Jakobip oqaasiisa aamma takutippaat ilaannikkut qatanngutitsinnik isumakkeerfiginnittariaqarnissarput naatsorsuutigisariaqaripput. ’Kina arlarsi ilisimatuullunilu sianisuuguni taassuma ilisimatuutut piuaalluni ileqqorissutsimigut suliani nittarligit. Annerussinersuarmilli saqitsaannermillu uummammiugisaqarussi usorsitsaarniaqinasi sallusuissullu uniorlugu sallunasi.’ (Jâko 3:13, 14) Kristumiut ilumoortut ’annerussinersuarmik saqitsaannermillu uummammiugisaqarsinnaagamik’? Aap, Jakobip oqaasiisa takutilluarpaat ukiuni hundredelinni siullerni kristumiut ilagiissaanni taamaattoqarsimasoq, ullumikkullu aamma taamaattoqartassasoq.

12. Ukiuni hundredelinni siullerni ilagiinni Filippimiittuni suna ajornartorsiutaasimava?

¹² Tamatumunnga assersuutaapput kristumiut tanitat marluk Paulusimut suleqataalluartutut ilisimaneqartut. Evodia Syntykelu, ilagiinni Filippimiittuni ilaasortaasut, pillugit immaqa atuarsimavutit. Pisimasoq erseqqissumik allaatigineqanngilaq, kisianni Filípimiut 4:2, 3 naapertorlugu taakku isumaqatigiinngissuteqarsimapput. Eqqarsaqqaarnani inussiarniitsumik oqaaseqarneq, qanigisamik ajuallatsitsineq imaluunniit ingiarniunneq sinnganerlu tamatumunnga aallarniutaasimava? Qanorluunniit pisoqarsimagaluarpat ima ilungersunartigilersimavoq allaat Paulusip Romamiitilluni tusarsimavaa. Anersaakkut qatanngutit arnat taakku immaqa oqaloqatigiikkumajunnaarsimapput ataatsimiinnerni anaapinnaveersaarsimapput, imaluunniit imminnut nikanarsarlutik ikinngutiminnut oqaluttarsimapput.

13. Evodiap Syntykellu qularnanngitsumik qanoq ilillutik ajornartorsiutertik aaqqissimavaat, uagullu tamanna qanoq ilinniarfigisinnaavarput?

¹³ Ilagiinni ilaaffigisanni tamatumunnga assingusumik pisoqarsimaneranik tusarsimavit naamminerluunniit misigisagaqarsimavit? Allaat ullumikkut taamaattoqarsinnaavoq. Taamaattoqarpat qanoq iliorsinnaavugut? Taamanikkut Paulusip qatanngutit arnat tunniulluinnarsimasut taakku kajumissaarpai ’Naalakkami isumaqatigeeqqullugit’. Immaqa pineqartoq oqaloqatigiissutigisimavaat isumaqatigiinngissut aaqqinniarlugu immikkullu tamarmik isumakkeerfigeqatigiinnissamik kissaateqarlutik ersersillugu,  taamaalillutillu Jehovap isumakkeerfiginnittuunera malillugu. Pissutissaqanngilagut isumaqassalluta Evodia Syntykelu taamaaliorsimanngitsut, uaguttaaq taamaaliorsinnaavugut. Ullumikkuttaaq isumakkeerfiginnittuuneq taamaattoq iluatsittumik ersersinneqarsinnaavoq.

Eqqisseqatigiigitsi — isumakkeerfiginnigitsi

14. Sooq inuttut isumaqatigiinngissutit puiuinnarnissaat amerlanertigut ajornanngila pitsaanerussallunilu?

¹⁴ Kristumioqatillu akornassinni ajornartorsiuteqarussi isumakkeerfiginissaanut suna pisariaqarpa? Nassuerutigisariaqarpoq taamaaliornissaq ajornaatsuunngitsoq, Biibilimili maligassiat iluaqutaasut siunnersuutillu atoriaannaasut nassaarineqarsinnaapput. Siunnersuut pitsaasoq — naak akueriuminaakkaluartoq maleruaruminaakkaluartorlu — tassaavoq pisimasup puigornissaa. Ajornartorsiuteqaleraangat, soorlu Evodiami Syntykemilu taamaassimasoq, pineqartut tamarmik misigajupput aappaasoq eqqunngitsuliortoq unioqqutitsisorluunniit. Tamarmik isumaqarsinnaapput aappaani pisuussuteqarnerusoq taannalu ajoqusiinerusoq. Pisimasorli puiuinnarsinnaanngilarput isumakkeerfiginnillutalu? Aappaasoq ilumut pisuussuteqarneruppat, illit isumakkeerfiginninnissamut periarfissaqarnerussaatit taamaalillutillu ajornartorsiut aaqqillugu.

15, 16. (a) Mikap Jehova Guuti qanoq allaatigaa? (b) Guuti ’ajortaannik isumakkeerfiginnittoq’ qanoq paasisariaqarpa?

¹⁵ Puiunngisaannartigu isumakkeerfiginninnerup tungaatigut Guuti malissagatsigu. (Evfisumiut 4:32–5:1) Taassuma isumakkeerfiginninneq unioqqutitsinernillu puiguinissaq pillugit isuma pruffiitip Mikap ima allaatigaa: „Ilittummi ittumik Guuteqanngilaq, [Jehova]. Illit innuttavit aniguisortaat ajortaannik isumakkeerfigaatit. Kamassimajuaannanngilatit, ilumoortumik asavatsigut.“ — Mika 7:18.

¹⁶ Allassimammat Jehovap ’ajortinnik isumakkeerfigigai’ ima paasisariaqanngilaq ajortuliat eqqaamasinnaanngikkai. Eqqarsaatigikkit Samson aamma David, tamarmik sualuttumik ajortuliorsimasut. Guutip tamatuma kingunerujussuatigut ajortuliaat eqqaamasinnaavai; uagut allaat ajortuliaasa  ilaat ilisimavavut Guutip Biibilimi allanneqartimmagit. Guutittali isumakkeerfiginnittartup angutit taakku marluk naakkinnittuliorfigai, upperluartutullu uatsinnut maligassiulluartutut eqqaallugit. — Eprîarit 11:32; 12:1.

17. (a) Suup ikiorsinnaavaatigut allat kukkunerinik unioqqutitsinerinillu isumakkeerfiginninnissatsinnut? (b) Taamaalioraangatta qanoq ililluta Jehova malittarparput? (Takuuk quppernerup ataani ilanngussaq.)

¹⁷ Aap, Jehovap ajortuliat ’isumakkeerfigisinnaasimavai’ *, Davidip arlaleriarluni qinnutigisimasaatut. (2 Samuel 12:13; 24:10) Tamatumani Guuti malinniarsinnaavarput qatanngutivullu naammalluinnanngimmata kukunerinik unioqqutitsinerinillu isumakkeerfigalugit? Takorlooriaruk timmisartumi aallalersumi issiallutit. Igalaakkut itsuarlutit takuat ilisarisimasat aallartarfiup eqqaani qeqartoq meerarpalullunilu mitaartoq. Nalunngilat kamattoq eqqarsaatigaa illit mitaarfigineraatit. Immaqali illit pineqanngilatit. Kingunitsianngua timmisartoq qullarsarluni sangummat ilisarisimasat aanngariartortoq takuat. Nalunaaquttap-akunnera ataaseq qaangiummat kilometerit hundredelippassuit ingerlareerpusi, ajuallatsiniarpasinneralu puigorsimallugu. Taamatulli isumakkeerfiginninneq ajornannginnerussaaq Jehovatut isiginnittaaseqarutta silatusaarlutalu allat unioqqutitsinerannik isumakkeerfigigutsigik. (Ussatit 19:11) Ukiut qulit qaangiuppata imaluunniit Guutip ukiuni tusindini naalagaaffia ukiuni 200-ni ingerlareerpat ajuallannartut taamaattut soqutaanngippasissanngillat? Soormi soqutiginngiinnaraanni?

18. Unioqqutitsineq puiorsinnaanngikkutsigu siunnersuut suna malissinnaavarput?

¹⁸ Jehova qinunikkut ajornartorsiummik saqqummiussiffigereerlugu isumakkeerfiginninniaraluarluni, taamaaliorsinnaanani misigineq qaqutigoortuusinnaavoq. Taava qanoq iliorsinnaavugut? Jesusip kajumissaarpaatigut isumaqatiginngisaq saaffigeqqullugu eqqissinissarlu anguniarlugu nammineq ajornartorsiummik aaqqiiniaqqulluta. ’Taamaattumik tunissutissat tunisivimmi pilliutigiartorukku, tassanilu eqqaaleruit qatannguppit sumik patsiseqarfigigaatit, taava tunissutissat tunisiviup saanut qimallugu qatanngutit saammarsariartoqqaarallaak, kingornalu tunissutissat pilliutigiartoruk.’ — Matîuse 5:23, 24.

19. Isuma suna pigisariaqarparput, qanorlu isumaqarnaveersaartariaqarpugut qatanngutivut eqqisseqatigissagutsigik?

¹⁹ Maluginiarnarpoq Jesus oqarsimanngitsoq qatannguterput saaffigissagipput nammineq eqqortuliorsimanitsinnik taassumalu eqqunngitsuliorsimaneranik uppernarsaaviginiarlugu. Immaqa qatannguterput eqqunngitsuliorsimavoq. Ilimanarneruvorli tamatta kukkusimanerput. Qanorluunniit pisoqarsimagaluarpat isumaqatiginngisap nassuertinnissaa anguniagaassanngilaq. Tamanna anguniarlugu saaffigigutsigu iluatsitsinavianngilagut. Unioqqutitsisimanerup — piviusuusup eqqarsaataannaasulluunniit — sukumiisumik oqaloqatigiissutiginissaa aamma anguniagaasariaqanngilaq. Kristumiutut asannittutut eqqissisimalluni oqaloqatigeereerluni paasinarsippat ajornartorsiut paasinerluinermik aallaaveqartoq, tamarmik aaqqiiniarsinnaapput. Oqaloqatigiinneq immaqa isumaqatigiivinnermik kinguneqanngilaq, tamannali tamatigut pisariaqarpa? Pitsaanerussanngila pineqartut tamarmik minnerpaamik isumaqatigiissutigisinnaappassuk Guuterput isumakkeerfiginnittartoq kiffartorfigiumallugu? Tamanna eqqumaffigigunikku tamarmik qamannga pisumik ima oqarnissaat immaqa ajornannginnerussaaq: „Ajuusaarutigaara naammalluinnanngitsuunitsinni isumaqatigiinngissuteqaratta. Neriuppunga puiussagipput.“

20. Apustilit maligassiaat sumik ilinniarfigisinnaavarput?

²⁰ Eqqaamajuk apustilittaaq isumaqatigiinngissuteqartarsimammata, assersuutigalugu ilaat allanit ataqqineqarnerorusuttarsimapput. (Mákorse 10:35-39; Lúkarse 9:46; 22:24-26) Tamanna pissutigalugu najummassimanartoqarsimavoq, immaqalu ajuallattoqarsimassalluni allaalluunniit narrunarsagaasoqarsimassalluni. Isumaqatigiinngissutilli tamakku isumakkeerfigeqatigiissutigisimavaat suleqatigiiginnarlutillu. Kingusinnerusukkut ilaat ima allappoq: ’Inuunermimmi nuannarinnikkumasup ullussallu ajunngitsut takujumallugit oqqi pitsaalissavaa ajortumeeqqunagu qarlunilu peqquserluttumik oqaloqqunagit, ajortoq nigorlugu ajunngitsuliorli, eqqissinissaq kajungeralugulu noqqaassutigiliuk.’ — 1 Pîtruse 3:10, 11.

21. Isumakkeerfiginninneq eqqarsaatigalugu Jesus qanoq ilitsersuiva?

²¹ Maanna isumakkeerfiginninermut atatillugu ataaseq sammereerparput: Guutip ajortuliatsinnik amerlasuunik isumakkeerfigisimavaatigut, taamaattumillu taanna malillugu qatanngutivut isumakkeerfigisariaqarpavut. (Tussiaat 103:12; Jesaja 43:25) Aammali alla sammineqassaaq. Qinnut najoqqutassaasoq oqaatigereerlugu Jesus ima nangippoq: ’Inuimmi tammartarnerinik isumakkeerfigigussigik, Ataatassissaaq qilammiusup isumakkeerfigissavaasi.’ Ukiup ataatsip missaata kingorna tamanna uteqqippaa ajoqersukkani ima qinoqqullugit ajoqersoramigit: ’Ajortitsinnik isumakkeerfigitigut, uaguttaaq akiitsortivut tamaasa isumakkeerfigigatsigik.’ (Matîuse 6:12, 14; Lúkarse 11:4) Toqunissi sioqqutitsiarlugu ima oqarpoq: ’Qinullusi qeqarussi kimut patsiseqaraluarussi isumakkeerfigisiuk, Ataatassinnuttaaq qilammiusumut tammartarnissinnik isumakkeerfigeqqullusi.’ — Mákorse 11:25.

22, 23. Isumakkeerfiginnikkumassuseqarnerput siunissatsinnut qanoq ililluni attuumassuteqarpa?

²² Aap, uagut qatanngutitsinnik isumakkeerfiginnikkumanerput Guutimit isumakkeerfigineqartuarnissatsinnut aalajangiisooqataalluinnarpoq. Kristumiut akornanni isumaqatigiinngissuteqaleraangatta imminut aperisinnaavugut: ’Guutimit isumakkeerfigineqarnissaq pingaarnerunnginnerpa qatanngutip unioqqutitsinimininnguata, inuit naammalluinnanngissusiannut ersiutaannaasup, uppernarsarnissaanit?’ Akissutaa nalunngilarput.

²³ Ajornartorsiulli annertuneruppat, tassaananilu inuit akornanni isumaqatigiinngissut pingaaruteqannginnerusoq? Jesusip Matîuse 18:15-18-imi unnersuussutaa pissutsini qanoq ittuni atortussaava? Allaaserisami tulliuttumi tamanna misissussavarput. (wE 15/10 99)

[Quppernerup ataani ilanngussaq]

 Eqqaamavigit?

□ Isumakkeerfiginninnerup tungaatigut Jehova qanoq maligassaalluarpa?

□ Qatanngutivut ilagiinniittut eqqarsaatigalugit suna eqqaamasariaqarparput?

□ Isumaqatigiinngissuteqaraangatta amerlanertigut qanoq iliortariaqarpugut?

□ Pisariaqarpat qanoq iliorsinnaavugut qatannguterput eqqisseqatigiumallugu?

[Atuaqqissaarnermi apeqqutit]

[Qupp. 16-imi assiliartaq]

Ilagiinniittut ilaat isumaqatigiinngissuteqarfigigutsigu isiginngitsuusaarniartariaqarparput; piffissap ingerlanerani ajornartorsiut soqutaarpasigunnaassammat