Juulli Jesus ilaatinnagu?

„Juullimut tungatillugu nalliuttorsiornerit naammagiinnarsinnaasimanngilakka. Jesusip inuuneranut ajoqersuutaanullu akerliulluinnartutut isigaakka.“ — Mohandas K. Gandhi.

INUPPASSUIT Gandhi isumaqatiginngilluinnassavaat. Ima oqarumassapput: ’Naalakkersuisoq hindusiortoq kristumiut nalliuttorsuat pillugu qanoq paasisimasaqarami?’ Kisianni eqqaaneqartariaqarpoq juulli ukiut ingerlaneranni nunarsuaq tamakkerlugu siammarsimasoq kulturinullu assigiinngitsunut sunniuteqartarluni. Ukiut tamaasa decembarimi soorlu sumi tamaani nalliuttorsuaq taanna nalliuttorsiutigineqartalersimavoq.

Assersuutigalugu Asiamiut 145 millionit missaat juulliorsiortarput. Ukiut qulit ingerlaneranni 40 millioninik amerlisimapput. Gandhillu ’nalliuttorsiornerit’ eqqaagamigit juullip silamiorpaluttortai, soorlu ingasattumik atuivallaarneq ersarissoq, eqqarsaatigigunigit, miserratigineqarsinnaanngilaq tamakku amerlanertigut naalliuttorsiornermit pingaartinneqarnerpaasartut. Atuagassiami Asiaweek-imi allassimavoq: „Asiami juulli — Hongkongimi nalliuttorsiorpaluttunik qulleqarneraniit Beijingimi hotelini juullip orperujussuinut aamma Singaporemi nersutaatit nerrivii juullerpaluttunik pinnersakkat tikillugit — tamakku tamarmik silamiut pingaartitarivaat (tamakkunani niuerniarneq pingaartinneqarnerpaalluni).“

Ulluni nutaanerusuni juullimi Jesus sumiginnarneqartarpa? Oqaluffeqarfiit ukiut hundredellit sisamassaanniilli decembarip ulluisa 25-ianni juulli nalliuttorsiutigisarsimavaat, taamani ilagiit katuuliusut aalajangermassuk Jesusip inunngorfia ulloq taanna nalliuttorsiutigineqassasoq. Kisianni ungasinngitsukkut USA-mi apersuineq naapertorlugu apersorneqartut 33 procentiinnaat isumaqarput Jesusip inunngornera juullimut atatillugu pingaarnerpaasoq.

 Illit qanoq isumaqarpit? Ussassaarutit ingasattut, juullip orpiata pinnersarneqarnera, juullimi pilluaqqussutit nalliuttorsiornermilu pisut assigiinngitsorpassuit akornanni ilaannikkut misigisarpit Jesus puiorneqarsimasorlusooq?

Ilaat isumarunarput nersutaatit nerriviinik pinnersaanermikkut juulli Jesusimik nalliuttorsiorninngorteqqissallugu. Qularnanngitsumik ivertitat taamaattut takusimassavatit, inuusaliat mikisunnguit naalunngiarsummik Jesusimik nersutaatit nerrivianiittumik, Mariamik, Josefimik, savanik paarsisunik, ’ilisimasunik pingasunik’ imaluunniit ’kunnginik pingasunik’, uumasunik isiginnaartunillu avatangerneqarsimasut. Amerlasuut isumaqarput nersutaatit nerriviisa taakkua naalunngiarsummik Jesusitallit inuit juullip isumavianik eqqaasikkaat. Atuagassiaq U.S. Catholics naapertorlugu „nersutaatit nerriviinik ivertitat iivangkiiliuni oqaluttuarineqartunit paasiuminarnerulersitsipput, naak aamma iivangkiiliuni oqaluttuarineqartut oqaluttuarisaanermut naapertuutinnginnerannut malunnaataagaluartut “.

Nersutaatit nerrivii qanoq ilillutik isumaqalersitsisinnaappat Biibilimi iivangkiiliuni oqaluttuarineqartut oqaluttuarisaanermut naapertuutinngitsuusut? Miserratigineqarsinnaanngilaq inuusannguit eqqumiitsuliatut qalipatat Kristusip inunngornera oqaluttualiaannaasutut isikkoqalersissinnaagaat. Nersutaatit nerrivii mattuttumit ukiuni 1200-kkunni inuusumit nuannarineqartitaalersimasut siornatigut pingaartinneqarsimanngikkaluarput. Nalliuttorsiornermulli tamatumunnga atasut allat assigalugit tamakku ullumikkut niuernermut iluaqutaallualersimapput. Italiami Napolimi arlalinnik pisiniarfeqarpoq ukioq naallugu nersutaatit nerriviisa inuusartaannik, presepi-nik taaneqartunik, tuniniaasunik. Inuusat nuannarineqarnerpaat ilaat tassaanngillat iivangkiiliuni oqaluttuarineqartuni inuttaasut, tassaallutilli ullumikkut tusaamasaasut, soorlu prinsesse Diana, Mother Teresa aamma atisaliortoq Gianni Versace. Sumiiffinni allani prepesi sukulaammit, pastamit uillunilluunniit sananeqartarput. Taamaattumik tupinnanngilaq ilaasa nersutaatit nerriviisa taamaattut oqaluttuarisaanermut atassuteqarnerat takujuminaatsittarmassuk.

Nersutaatit nerriviisa tamakku qanoq ilillutik iivangkiiliuni oqaluttuarineqartut paasiuminarnerulersissinnaavaat? Iivangkiiliuni oqaluttuarineqartut oqaluttuarisaanermut naapertuutinnginnamik? Allaat inuit qularnerpaat nassuerutigisariaqarpaat Jesus ilumut inuusimasoq. Taanna piffissap ingerlanerani sumiiffiit ilaanni aalajangersimasumi ilumut meeraasimassaaq. Nersutaatit nerriviinik isiginnaaginnarnermit paasissutissanik pitsaanerusunik, taassuma inunngorneranut atatillugu qanorpiaq pisoqarsimaneranik erseqqissumik paasissutissiisinnaasumik peqartariaqarpoq.

Ilumut taamaattoqarpoq. Oqaluttuarisaanermik ilisimatuut marluk imminnut attaveqaratik Jesusip inunngorneranik oqaluttuat allassimavaat. Ilaannikkut isumaqaruit juullip nalaani Jesus sumiginnarneqartartoq, kajumissaarniarpatsigit oqaluttuat taakku nammineq misissoqqullugit. Taakku oqaluttuatoqqanik oqaluttualiaannarnillu imaqanngillat, kisianni oqaluttuaq pissanganartoq — Jesusip inunngorneranik oqaluttuaq ilumoortoq — imaraat.

[Suminngaanneernera]

quppernerit 3-6-imi aamma 8-9-mi sinaakkut: Fifty Years of Soviet Art