Nikallunganeq qanoq akiorneqarsinnaava?

Nikallunganeq qanoq akiorneqarsinnaava? Apeqqut taanna nakkutilliisunut arlalippassuarnut akuttoqatigiinnik Jehovap nalunaajaasuisa ilagiivinut angalasartunut apeqqutigineqarsimavoq. Akissutaat tunngavigalugit nikallunganermut pissutaasut misissoqqissaarsinnaavavut, misigissuserlu taanna kristumiunik tamanik eqquisinnaasoq qanoq akiorneqarsinnaasoq takullugu.

Soorunami misissueqqissaaginnarluni nikallunganeq qaangerneqarsinnaanngilaq, aallarniutitulli iluaqutaassaaq ilisarnaatai suunersut paasisinnaagaanni. Assersuutigalugu tassaasinnaapput qinunissamut namminerlu atuaqqissaarnissamut kajumikkunnaarneq, ataatsimiigiartarunnaarneq, qiimajunnaarneq allaallu immaqa uppeqatinut ilasserusukkunnaarneq. Ilisarnaatini erseqqinnerpaat ilagaat oqaluussinissamut kajumikkunnaarneq. Ilisarnaatit misissoriartigik qanorlu iliornissamut siunnersuutit ilaat takullugit.

Oqaluussinissamut kajumikkunnaarneq

Jesusip nalunngilaa oqaluusinissamik peqqussummut naalattut ajornartorsiutit suut nalaakkumaaraat. (Matîuse 28:19, 20) Ajoqersukkani ’savatut amaqqut akornannut’ oqaluussiartortillugit aallartikkamigit nalunngilaa qinugineqassasut. (Matîuse 10:16-23) Tamannali pillugu nikallortariaqanngillat. Amerlanertigut qinugineqarnertik Guutip kiffaasa qinunikkut Guuti saaffigigaangamikku tatigalugulu allaat nakussatsinneqarlutik anigortarsimavaat. — apustilit suliait 4:29-31; 5:41, 42.

Jesusip ajoqersugai tamatigut qinugisaaneq ajorput, kisianni amerlanertigut tikilluaqqusaaneq ajorput. (Matîuse 10:11-15) Ullumikkut Jehovap nalunaajaasuisa oqaluussinerat aammattaaq ilaanneeriarluni akerlilersorneqartarpoq. * Amerlasuut upperisaq nammineq aalajangigassatut allanullu oqaluuserisassaanngitsutut isigaat. Allat paqumisunneq pillugu attavigerusunneq ajorpaatigut. Qularnanngilluinnarpoq soqutigisaqanngissuseq, naammassisaqanngitsoorneq ajornartorsiutillu allat nikallorujussuartitssinnaasut. Qanoq ililluni akornutit tamakkua qaangerneqarsinnaappat?

Qanoq angusaqarluartoqarsinnaasoq

Oqaluussinermik nuannarinninnerput qanoq angusaqarnitsinnut ilaatigut aalajangeeqataasarpoq. Qanoq oqaluussinermut pikkorinnerulersinnaavugut? Tassunga atatillugu eqqaamasariaqarparput ’inunnik aalisartuugatta’ (Mákorse 1:16-18) Israelitoqqami aalisartut unnuami aalisartarput taamaalinerani pisaqarluarnerusinnaagamik. Uaguttaaq angalaarfigisartakkatsinnut naleqqussartariaqarpugut ’aalisariartariaqarpugut’ amerlanerit angerlarsimaneranni inuillu tusaarusunnissaasa ilimanarneruffiani. Unnukkuusinnaavoq, sapaatip-akunnerata naanerani imaluunniit piffissami allami. Angalalluni nakkutilliisup oqarneratut piffissat taakkua sumiiffinni ulloq naallugu sulisartunik najugaqarfigineqartuni atorluarsinnaapput.  Maluginiarsimavaa pingaartumik unnukkut oqaluussineq angusaqarfiulluartartoq. Tamatumalu saniatigut oqarasuaatikkut oqaluussinermi torrutiinnarlugulu oqaluussinermi arlallit naammattoorneqartarput.

Oqaluussinermi nikallujuitsuuneq imminut akilersinnaavoq. Europap Kangiani Afrikallu nunaata ilaani oqaluussineq maanna siuariartorpoq, nutaallu amerlasuut ilanngussimapput. Nunat ilaanni sivisuumik inerititaqarfiusinnaanngitsutut naatsorsuunneqarsimasuni ilagiippassuit aallartinneqarsimapput. Taamatuttaaq pisoqarpoq oqaluussiffiit ilaanni akulikitsunik oqaluussiffigineqartartuni. Namminerli oqaluussiffigisartakkami taamatut angusaqanngikkaanni qanoq iliortoqarsinnaava?

Isumalluartuujuaannarit

Inuit soqutiginninnginnerat pissutigalugu nikallunganeq pinngitsoortinneqarsinnaavoq eqqaamajuaraanni Jesusip oqarneratut oqaluussinerup suna siunertarigaa. Ajoqersukkani ilitsersorpai qinngaqqunnanngitsut ujassagaat. Naatsorsuutigissanngikkaat amerlasoorsuit isumataarumaartut. Arlaleriarluni eqqaasippai amerlanersaat nutaarsiassamik nuannersumik tusarumassanngitsut, soorlu aamma Israelikkut ikittuinnaat pruffiitinut qanga tusarnaartarsimasut. — Hesekiel 9:4; Matîuse 10:11-15; Mákorse 4:14-20.

„Pilluarput anersaakkut pisariaqartitaqarnerminnik miserratiginninngitsut “ qujamasullutik tusaajumavaat ’naalagaaffimmik tusagassaq nuannersoq’. (Matîuse 5:3, NV; 24:14) Guuti piumasaa malillugu kiffartuukkusuppaat. Oqaluussinerup inernerinut apeqqutaanerpaasarput inuit uummataasa qanoq ittuuneri uagut oqariartuutigisatta apuunneranut pikkorissuserput apeqqutaavallaarani. Soorunami sapinngisarput tamaat iliortariaqarpugut nutaarsiassap nuannersup pissuserissumik oqaluusissutiginissaanut. Inerneranulli Guuti apeqqutaavoq, Jesusimi oqarpoq: ’Uannut pisinnaasoqanngilaq Ataatap aallartitsisima kajungersinngippani.’ — Juánase 6:44.

Nutaarsiassaq nuannersoq oqaluussissutigigaangatsigu Jehovap aqqa ilisimaneqalersittarparput. Inuit tusaajumappata tusaajumanngippataluunniit aqqata illernartup annertunerusumik illernarsisinneqarneranut peqataassaagut. Aammattaaq oqaluussinitsigut takutipparput Kristusip ajoqersugarigaatigut aamma nalitsinni suliassat suliarineqartut pingaarnersaat suleqataaffigigipput. — Matîuse 6:9; Juánase 15:8.

Allanut atassuteqarneq pissutigalugu nikallunganeq

Allanut, ilaquttanut ilagiinniittunulluunniit, atassuteqarneq ilungersunartoq nikallussutaasinnaavoq. Assersuutigalugu paasineqanngitsutut misigisoqarsinnaavoq. Imaluunniit uppeqatitta naammalluinnanngissussiisa nuannaarunnaartissinnaavaatigut. Aammattaaq taamaattoqartillugu Biibilimi ilitsersuutit iluaqutigilluarsinnaavavut.

’Qatanngutit tamarmik’ silarsuarmi tamarmiittut anersaakkut qatanngutigiissuupput. (1 Pîtruse 2:17) Kisianni ’isumaqatigiinngilaarnerit’ inuiaqatigiinnut ataasioqatigiissunut ilaasutut misiginerput malunnarunnaarsissinnaavaat. Ukiuni hundredelinni siullerni kristumiut ajornartorsiutit taamaattut pinngitsoortissinnaasimanngilaat, apustili Paulusimmi arlaleriarluni ilaat isumaqatigiinnissaannik eqqaasittariaqarsimavai. Assersuutigalugu kristumiut arnat marluk Evodia Syntykilu kajumissaarsimavai saqitsaakkunnaarlutik isumaqatigiinniaqullugit. — 1 Korintumiut 1:10; Evfisumiut 4:1-3; Filípimiut 4:2, 3.

Arlaannut saqitsaassigutta taava qanoq ililluta qatanngutinut asanninnivik uummarsaqqissinnaavarput? Taamaaliorsinnaavugut eqqaamagutsigu Jesusip aamma taakkua toqussutigigai, aamma tamatta utertitsissutitut pilliutaa upperalugu ersersissimagatsigu. Puiortariaqanngilarputtaaq qatanngutigut piumassagunartut Jesus assigalugu pilluta inuunertik annaasinnaallugu.

Ukiualuit matuma siorna oqaluussisartup inuusuttup kufferti qaartartumik imalik Parisimi naalagaaffilersaarfiup silataanut inissinneqarsimasoq nangaanngivilluni tiguaa. Init quleriit arlalissuit majuartarfiisigut ammut  arpattariaqarsimavoq kuffertip tissaluttuliamut iginnginnerani, tassanilu qaartartoq qaarpoq. Aperineqarami sooq inuunini navianartorsiortissimaneraa akivoq: „Tamatta navianartorsiortugut paasivara. Isumaqarpungalu tamatta toqutaanissatsinnit uanga toquguma ajunnginnerusoq.“ * Pissutissaqarluinnarpugut nuannaarutigissallugu uppeqatitta Jesusip maleqqissaarnissaa piareersimaffigimmassuk.

Aammattaaq iluaqutaavoq eqqarsaatigissallugu Sorsunnersuit Aappaata nalaani tigusanut inissiani Jehovap nalunaajaasuisa suleqatigiinnerat. * Tamatumalu kingorna qatanngutivut Malawimi taakkunatulli kristumiuulluartutut aalajaassimapput. Nammineq ilagiissitsinni misilinneqarnitsinni qatanngutitta taamatut iliuuseqarsinnaanerat aalaterneqaatiginngilarput, ulluinnarnilu aaqqiagiinnginnerit akerleriissuteqarsinnaanerillu uniffiginagit sapinngisarput tamaat qatanngutitta attavigilluarnissaannut iliuuseqarluta? Kristusip eqqarsartaasia ineriartortikkutsigu ulluinnarni qatanngutitsinnut attaveqarnerput nikallungalissutiginagu nakussatsissutigissavarput.

Misigissutsit nikallussutaasinnaasut

„Utaqqivallaarneq tarnikkut anniaataalersarpoq, kissaatigisaq pissarsiaasimasoq orpittut inuunartutut ippoq.“ (Ussatit 13:12) Jehovap kiffaasa ilaat isumaqarput massakkut aaqqissuussaanerup naggatissaa muluallaartoq. Kristumiut kristumiuunngitsorpassuillu nammineq timimikkut malugaat ulluvut ’ulluusut kingulliit ajornartunik nalliuttoqarfiusartut’. — 2 Timûtiuse 3:1-5.

Kristumiuunngitsut assiginagit kristumiut nuannaarutigisariaqarpaat eqqarsaatigalugu atukkavut misilinneqaataasut Jesusip tikiuteqqinnissaanut ilisarnaatinut ilaammata, takussutissaallutillu ungasinngitsukkut Guutip naalagaaffiata massakkut aaqqissuussaaneq ajortoq atorunnaarsikkumaaraa. (Matîuse 24:3-14) Pissutsilluunniit ajorneruleraluarpata, qularnanngivissumik piffissami ’naalliunnartoqangaarfiusumi’ taamaassaaq, naalliuutit uagutsinnut nuannaarutingussapput Guutip silarsuassaanut nutaamut aallarnersaataagamik. — Matîuse 24:21; 2 Pîtruse 3:13.

Kristumiup eqqarsaatimigut Naalagaaffiup ullutsinni pissutsinut akuliunnissaa kinguartikkuniuk, pigissaarnerulernissamut piffissap annertusiartuinnartup atornissaanut tammartitaassutigisinnaavaa. Kristumiutut akisussaaffiit naammassinissaat ajornakusoorpoq assersuutigalugu suliffimmut aliikkusersornermullu piffissaq nukiillu tamaasa atoraanni. (Matîuse 6:24, 33, 34) Pakatsinermik taamalu nikallunganermik pilersitsisarpoq. Angalalluni nakkutilliisup oqarsimaneratut: „Piviusorsiornerunngilaq aaqqissuussaanermi matumani silarsuaq nutaassaq assileriaraluassallugu.“

Iluaqutaasinnaasut pitsaanerpaat ilaat marluk

Anersaakkut qanoq issuseq paasineqareerpat taava nikallunganeq qanoq akiorneqarsinnaassava? Iluaqutaanerpaat ilagaat nammineerluni atuaqqissaartarneq. Sooq? „Eqqaasikkamisigut iliuuserisavut sooq iliuuserinerivut, “ angalalluni nakkutilliisoq oqarpoq. Alla oqarpoq: „Akisusaaffittuinnaq isigalugu oqaluussigaanni, oqimaalligaluttuinnartarpoq.“ Kisianni peqqissaartumik nammineerluni atuaqqissarnerup naggatissap qanilliartornerani suliassami peqataasutut misigisimanerput malunnarnerulersittarpaa. Tassunga atatillugu Biibilip eqqaasittuarpaatigut Guutip piumasaanik iliornermi pilluarnivik misigissagutsigu anersaakkut nerilluarsimasuunissaq pisariaqartikkipput. — Tussiaat 1:1-3; 19:8-11; 119:1, 2.

Allat nikallunganermik qaangiiniarneranni utoqqaanertat ikiorsinnaavaat qiimmassarlugit paarsisutut pulaarnerisigut. Taamatut oqaluussisartut angerlarsimaffiinut pulaarnerminni ilisimatissinnaavaat tamatta immikkut  pingaartinneqartorujussuusugut Jehovallu innuttaani pingaartumik inissisimaffeqartugut. (1 Korintumiut 12:20-26) Utoqqaanertaq pulaartakkamini periaatsimik imaattumik misilittagaqarluarpoq: „Qanoq naleqartiginerat erseqqissartarpara sunik naammassisaqarsimanerinik eqqaasinnerisigut. Jehovap isaani naleqangaarnerat paasitittarpara, erneratalu taakku pillugit aani kuigaa. Tunngavilersuut taanna tamatigut iluatsittarpoq. Biibilimit tunngavilersorluaraangakkit nikallungasut nutaanik anguniagaqarnissaminnut piukkuulersarput, assersuutigalugu ilaqutariittut qinoqatigiinnerit, Biibilimik atuarneq atuaqqissaarnerlu.“ — Eprîarit 6:10.

Pingaaruteqarpoq utoqqaanertat paarsisutut pulaartillutik isumaqalersitsinnginnissaat Jehovamit iluarisaaneq sapernartuusoq. Akerlianilli kristumiu nikallungasoq ikiortariaqarpaat Jesusip ajoqersugaasa nammataasa oqissusianik paasinninnissaanut, aamma kristumiutut kiffartornerput nuannaarutissarsiffigisaripput. — Matîuse 11:28-30.

Nikallunganeq qanoq ajugaaffigineqarsinnaasoq

Nikallunganermut sunaluunniit pissutaagaluarpat taamatut misigisimaneq akiorneqartariaqarpoq. Eqqaamajuk kisimiilluta akiuutinnginnatta. Nikallunganermik eqqugaagutta ikinngutitta kristumiut pingaartumik utoqqaanertat ikiuiniarlutik neqeroornerat akuerisariaqarparput. Nikallunganerput annikillisissinnaavaat.

Tamanilli annerusumik nikallunganitta ajugaaffiginissaanut ikioqqulluta Guuti qinnuigissavarput. Jehovamut qinunitsinni tatiginninnerput ersersikkutsigu, immaqa isumagissavaa nikallunganitsinnik qaangiinissarput. (Tussiaat 55:23; Filípimiut 4:6, 7) Qanorluunniilli pisoqaraluarpat taassuma kiffaasut tussiaasiortup oqaasii uagutsinnut oqaaserineqartutut pigiliussinnaavavut: „Pilluarput inuit ilinnik qiimmattaatiginnittut, [Jehova], saqipput kiinnavit qaamasuani. Pissaanerpit pinnersaaserpai, nassupput massitsippat saammaannikkut.“ — Tussiaat 89:16-18. (wE 15/11 99)

[Quppernerup ataani ilanngussat]

[Qupp. 25-mi assiliartaq]

Utoqqaanertat paarsisutut pulaarnerisa ineriartornartut kristumiut ikiorsinnaavaat nikallunganerminnik ajugaaffiginninnissaannut