Sarkúmersitat-nik Atuartutut Pilluarta

’Pilluarput takorluukkersaarutit makkua oqaasiinik atuaasorlu tusaasullu, taakkunanilu allassimasunik toqquisut, piffissaq qaneqimmat.’ — SARKÚMERSITAT 1:3.

1. Apustili Johannesip qanoq atugaqarluni sarĸúmersitat allassimavai, takorruukkallu tamakku suna siunertaralugu allanneqarpat?

’UANGA Johannes . . . Guutip oqaasia pissutigalugu Jesusillu Kristusip nalunaajaataa pissutigalugu qeqertami Patmosimik atilimmi ippunga.’ (sarĸúmersitat 1:9) Taama atugaqarluni apustili Johannesip atuagaq sarĸúmersitat imaluunniit Apokalypse allappaa. Isumaqartoqarpoq Romamiut kaasariata Domitianip, kaasarimik guutisiornissamik peqqussisup kristumiunillu malersuititsisup, nalaani (ukiut 81-96 u.n.k.) qeqertamut Patmosimukartinneqartoq. Patmosimiitilluni Johannes arlalinnik takorruuisinneqarpoq, tamakkulu allassimavai. Kristumiut siulliit annilaartinniarlugit allanngilai, kisianni nakussatsinniarlugit, tuppallersarniarlugit qiimmassarniarlugillu allappai, taamanikkut siunissamilu annikilliornitik anigorniassammatigit. — apustilit suliait 28:22; sarĸúmersitat 1:4; 2:3, 9, 10, 13.

2. Sooq Johannesip uppeqataasalu atugaat kristumiunut ullumikkut inuusunut immikkut soqutiginaateqarpat?

² Biibilip atuagartaata tamatuma allanneqarnerata nalaani pissutsit kristumiunut ullumikkut inuusunut pingaaruteqarput. Johannes malersorneqarpoq Jehovamut erneranullu, Jesus Kristusimut, nalunaajaasuummat. Taanna uppeqataalu innuttaalluarniaraluartut, kaasarimut guutisioqataajumannginnamik uumissorneqarput. (Lúkarse 4:8) Ullumikkut nunat ilaanni kristumiut tamatumunnga assingusumik atugaqartariaqarput naalagaaffik aalajangiisinnaatitaanerarmat „upperisarsiornermut atatillugu suna eqqortuunersoq “. Taamaattumik sarĸúmersitat-ni oqaatsit aallarniutaasut tuppallersaatigisinnaavavut: ’Pilluarput takorluukkersaarutit makkua oqaasiinik atuaasorlu tusaasullu, taakkunanilu allassimasunik toqquisut, piffissaq qaneqimmat.’ (sarĸúmersitat 1:3) Aap, sarĸúmersitat-nik atuartut, mianersortut maleruaasullu pilluarneq piviusoq pilluaqqussuterpassuillu angussavaat.

3. Johannesimut sarĸúmersitat kimit aallaaveqarpat?

³ sarĸúmersitat kimit aallaaveqarpat, kikkullu aqqutigalugit tunniunneqarpat? Versimi siullermi allassimavoq: ’Jesus Kristusip saqqummersitai, Guutip taassumunnga tunniussai qilamik piumaartussat kiffaminut takuteqqullugit, inngilinilu aallartillugu kiffaminut Johannesimut tamakku nalunaarai.’ (sarĸúmersitat 1:1) sarĸúmersitat Jehova Guutimeersuupput Jesusimullu tunniuppai, taassumalu inngili aqqutigalugu Johannesimut tunniullugit. Misissornerugutsigu paasissavarput Jesusip tusarliussat ilagiinnut tunniukkamigit Johannesilu takorruutsikkamiuk aamma anersaaq  illernartoq atoraa. — sarĸúmersitat 2:7, 11, 17, 29; 3:6, 13, 22; 4:2; 17:3; 21:10; naleqqiuguk apustilit suliait 2:33.

4. Jehovap ullumikkut innuttani nunarsuarmiittut qanoq ililluni siulersorpai?

⁴ Jehovap kiffani nunarsuarmiittut ernini, ’ilagiit niaquat’, aqqutigalugu suli ajoqersortarpai. (Evfisumiut 5:23; Jesaja 54:13; Juánase 6:45) Jehovap innuttami ajoqersorneqarneranni aamma anersaani illernartoq atortarpaa. (Juánase 15:26; 1 Korintumiut 2:10) Soorlulu Jesusip ’kiffani Johannes’ ukiuni hundredelinni siullerni ilagiit anersaakkut inuussutissanik pilersorneranni atorsimagaa ullumikkut ’kiffaq ilumoorlunilu silatooq’, ’qatanngutini’ tanitat nunarsuarmiittut kiffani taakkualu suleqataat ’piffissaq eqqortoq nalliuttaraangat’ anersaakkut nerisassaqartinneranni atortarpai. (Matîuse 24:45-47; 25:40) ’Tunissutinik ajunngitsunik’ anersaakkut ittunik nerisassanik pilersitsisup kinaaneranik kikkullu aqqutaanerinik paasisaqartut pilluassapput. — Jâko 1:17.

Ilagiit Kristusimit siulersorneqartut

5. (a) Ilagiit kristumiut nakkutilliisuilu sunut assersuunneqarpat? (b) Naak inuttut naammalluinnanngitsuugaluarluta suup pillualersissinnaavaatigut?

⁵ sarĸúmersitat-ni kapitalini siullerni ilagiit kristumiut naneruuserfinnut assersuunneqarput. Nakkutilliisut inngilinut (tassa aallartitanut) ullorissanullu assersuunneqarput. (sarĸúmersitat 1:20) * Kristus imminut eqqartorluni Johannes ima allaqquaa: ’Ima oqarpoq ullorissanik taakkuninnga arfineq-marlunnik talerpimmigut tigumiartoq, naneruuserfiit taakkua arfineq-marluk kuultiusut akornanni saqisoq.’ (sarĸúmersitat 2:1) Tusarliussat arfineq-marluk ilagiinnut arfineq-marlunnut Asiaaqqamiittunut nassiunneqartut takutippaat ukiuni hundredelinni siullerni ilagiit utoqqaanertallu sanngiissuteqarlutillu nakuussuteqartut. Ullumikkuttaaq taamaappoq. Taamaattumik nuannaarnerulluta kiffartorsinnaavugut eqqaamajuarutsigu Kristus, niaqorisarput, ilagiit akornanniittoq. Nalunngilluinnarpaa qanoq pisoqartartoq. Nakkutilliisut assersuutaasumik ’talerpianiipput’, tassa taassuma naalakkersuinerata ataaniillutillu siulersorneqarput, taassumunngalu akisussaallutik ilagiinnut paarsisuunerminnik. — apustilit suliait 20:28; Eprîarit 13:17.

6. Suup takutippaa nakkutilliisuinnaanngitsut Kristusimut akisussaasut?

⁶ Imminulli salloqittassaagut isumaqarutta nakkutiilliisut kisimik Kristusimut  qanoq iliornerminnik akisussaasut. Tusarliussami ilaattut Kristus oqarpoq: ’Ilagiissoqatigiit tamarmik misigissapput uanga tassaasunga tartunillu uummatinillu misiliisoq; tuniumaarpassilu tamassi immikkut suliasi naapertorlugit.’ (sarĸúmersitat 2:23) Oqaatsit tamakku mianersoqqussutaallutillu kajumissaataapput — mianersoqquneqarpugut Kristusip pissutiginiakkavut ilorlerpaat ilisimammagit, kajumissaarneqarlutalu neriorsoqqissaarneqarpugut Kristusip ilungersornivut soqutigigai, sapinngisamillu iliuuseqarutta pilluaqqussagaatigut. — Mákorse 14:6-9; Lúkarse 21.3, 4.

7. Kristumiut Filadelfiamiittut qanoq ilillutik Jesusip ’nikallujuissusermik oqaasia toqqorsimavaat’?

⁷ Kristusip ilagiit illoqarfimmi Filadelfiami Lydiamiittumi oqaluffigigamigit avoqqaarinagit neriorsuivoq, uagut soqutigisariaqakkatsinnik. ’Nikallujuissusermik oqaasera illit toqqorakku, uangattaaq usserneqarfimmit inuit najugaannut tamarsuarmut nalliuttussamit nunamiusut usserneqarfissaannit toqqorumaarpakkit.’ (sarĸúmersitat 3:10) Versi 8-p takutikkunarpaa kristumiut Filadelfiamiittut Kristusip peqqussutai maleruaannarnagit aamma unnersuussutai malillugit namminneq aalajaattuarsimasut. — Matîuse 10:22; Lúkarse 21:19.

8. (a) Jesus kristumiunut Filadelfiamiittunut sumik neriorsuiva? (b) Kikkut ullumikkut ’usserneqarfissamit’ eqqorneqarpat?

⁸ Jesus oqarsimavoq ’usserneqarfissamit toqqorumaarlugit’. Naluarput tamanna kristumiunut ukiuni hundredelinni siullerni inuusimasunut qanorpiaq isumaqarnersoq. Domitianip ukiumi 96-imi u.n.k. toqunerata kingorna malersorneqarneq unitsillatsiarneqaraluartoq, Trajanip nalaani (98-117 u.n.k.) malersorneqaqqilerput qularnanngitsumik misilinneqarnernik amerlanerusunik kingunilimmik. ’Naalakkalli ullua’, maannakkut ’ullut kingulliit’ inuuffigisavut ’usserneqarfiunerpaajupput’. (sarĸúmersitat 1:10; Daniel 12:4) Kristumiut tanitat sorsunnersuarmi siullermi tamatumalu kinguninnguatigut immikkut misilinneqarput. ’Usserneqarfik’ tamanna suli atuuppoq. ’Inuit najugaannut tamarsuarmut’ sunniuteqarpoq, aamma inunnut millionikkuutaanut amerlangaartunut annikilliornartussamit angisuumit aniguinissaminnik neriugisalinnut. (sarĸúmersitat 3:10; 7:9, 14) Pilluassaagut Jesusip ’nikallujuissusermik oqaasia’ maleruarutsigu, ima oqarmat: ’Naggatissamulli aalajangersoq annakkumaarpoq.’ — Matîuse 24:13.

Jehovap kisimi oqartussaaneranut naalatsigitinneq pillualersitsivoq

9, 10. (a) Jehovap issiavissaarsuanik takorruukkap qanoq killittariaqarpaatigut? (b) sarĸúmersitat-nik atuarneq qanoq pilluarnitsinnut ilasaataasinnaava?

⁹ sarĸúmersitat-ni kapitali 4-mi 5-imilu Jehovap issiavissaarsuanik qilammilu silarliliaanik takorruukkap ataqqinningaartittariaqarpaatigut. Qilammi anersaat pissaanillit nuannaarlutik Jehovap naapertuilluartumik kisimi oqartussaaneranut naalatsigitillutik qamannga pisumik unnersiutiginninnerisa killittariaqarpaatigut. (sarĸúmersitat 4:8-11) Uaguttaaq ima oqaqataasariaqarpugut: ’Issiavissaarsuarmi issiasup savaaqqallu pilluaqqussut ataqqinaallu naalannaallu pissaanersuarlu pigaat naassaanngilluinnartumik.’ — sarĸúmersitat 5:13.

¹⁰ Tamanna ima paasisariaqarpoq qanoq iliornitsinni tamani nuannaarluta Jehovamut naalatsigitittariaqartugut. Apustili Paulus ima allappoq: ’Qanoq ilioraangassi oqalullusiluunniit sulillusiluunniit tamatigut Naalakkap Jesusip aqqani pisaritsi Guuti Ataataq qutsavigalugu taassumuuna.’ (Kulorsamiut 3:17) sarĸúmersitat atuarnerisigut  pillualissaagut isumakkut uummatikkullu iluunngarluta Jehovap kisimi oqartussaanera akuerigutsigu taassumalu piumasaa inuunitsinni tamatigut soqutigigutsigu.

11, 12. (a) Satanip nunarsuarmi aaqqissuussinera qanoq ililluni aalassatsinneqarluni suujunnaarsinneqassava? (b) sarĸúmersitat kapitali 7 naapertorlugu kikkut taamanikkussaq ’atassinnaassappat’?

¹¹ Nuannaarluni Jehovap kisimi oqartussaaneranut naalatsigitinneq pinngortitat ataasiakkaat tamarmik aammalu ataatsimut isigalugit pilluarnissaannut aalajangiisuuvoq. Qanittukkut Satanip silarsuaa assersuutaasumik ’nunap sajorujussuarneratigut’ aalassatsinneqarluni suujunnaarsinneqassaaq. Inuit Kristusip qilammi naalagaaffianut, Guutip eqqortumik naalakkersuineranut sinniisumut, naalatsigitikkumanngitsut qimaaffissaqassanngillat. Siulittuummi ima allassimasoqarpoq: ’Nunap kunngii naalagarsuillu sakkutuullu naalagaaneri pisuullu nakuarsuillu kiffaasullu tamarmik kiffaanngitsullu tamarmik qaarusunnut qaqqallu qunnerinut isertorput; qaqqanullu qaarsunullu oqarput: „Nakkarfigitigut isertorlutalu issiavissaarsuarmi issiasup kiinaanit savaaqqallu kamanneranit, kamannerata ullorsua nalliummat; kinalu atasinnaassava? “’ — sarĸúmersitat 6:12, 15-17.

¹² Apeqqummut tamatumunnga atatillugu apustili Johannes kapitalip tulliani amerlangaartut annikilliornartussamit angisuumit aniguisut pillugit oqarpoq ’issiavissaarsuup saani savaaqqallu saani qeqartut’. (sarĸúmersitat 7:9, 14, 15) Guutip issiavissaarsuata saani qeqarnerisa takutippaa issiavissaarsuaq tamanna akuerigaat Jehovallu kisimi oqartussaaneranut naalatsigitilluinnartut. Taamaattumik taassumannga iluarisaapput.

13. (a) Nunarsuarmiut amerlanersaasa suna pallorfigisarpaat,aamma qaavisigut assaasigulluunniit ilisarnaat qanoq isumaqarpa? (b) Sooq nikallujuissuseq pisariaqarpa?

¹³ Kapitali 13-imi allaatigineqarpoq nunarsuarmiut allat Satanip naalakkersuinikkut aaqqissuussaanera, nersummut qaasuttumut assersuunneqartoq, pallorfigigaat. Taakku ’qaavisigut’ imaluunniit ’assaasigut’ ilisarnaaserneqarput, tamatumalu takutippaa isummamikkut suliamikkullu aaqqissuussaaneq tamanna tapersersoraat. (sarĸúmersitat 13:1-8, 16, 17) Nangillunilu kapitali 14-imi allassimavoq: ’Kialuunniit nersut assingalu pallorfigigunigit qaarmigullu assammigulluunniit ilisarnaqusersikkuni, taannattaaq viinnimik kamaammik Guutip pianik akoqartinnagu ermutsimut kamannerata pianut immiussimasumik imissaaq . . . Aatsaat iluartut nikallujuinnerat, aatsaat Guutip inassutaanik Jesusimullu uppernermik aalajangiussisut pisariaqarput.’ (sarĸúmersitat 14:9, 10, 12) Piffissap ingerlanerani apeqqut manna pingaaruteqarnerujartorpoq: Kina tapersersorpiuk? Jehova taassumalu kisimi oqartussaanera imaluunniit naalakkersuinikkut aaqqissuussaaneq guutiitsoq nersummut assersuunneqartoq? Nersutip ilisarnaataanik ilisarnaaserneqarumanngitsut Jehovallu kisimi oqartussaaneranut naalatsigitillutik nikallujuitsut pilluassapput.

14, 15. Harmagedonimik allaatigisamut suna ilaava, tamannalu uatsinnut qanoq pingaaruteqarpa?

¹⁴ Kisimi oqartussaaneq pillugu apeqqummut atatillugu ’inuit najugaannut tamanut’ naalakkersuisut Jehovap paasitissavai. Akerleriissut tamanna Harmagedonimi, ’sorsunnissami Guutip ajugaqanngitsup ullussarsuani piumaartumi’ aalajangerneqassaaq. (sarĸúmersitat 16:14, 16) Nunarsuup kunngiisa Jehovamut sorsunniarlutik katersuunnerat pillugu allaatigisaq soqutiginartumik ilaqarpoq.  Jesus takorruugaq kipitikkallarlugu oqarpoq: ’Ata, tillinniartutut tikiukkumaarpunga. Pilluarpoq eqqumasoq atisaminillu paarsilluartoq tamaqarani angalajumanani, kanngugisani takoqqunagu.’ (sarĸúmersitat 16:15) Tamatumani pineqarsinnaavoq itsaq naalaffimmi pigaartut Levikkuusut pigaarnerminni sinitsillutik naammattoorneqarunik qanoq pisoqartartoq. Taamaattoqaraangat atisaajarneqartarput tamarmik takkuanni kanngusuutissaannik.

¹⁵ Tusarliussaq ersarippoq: Harmagedon anigussagutsigu anersaakkut eqqumajuartariaqarpugut atisavullu assersuutaasut, Jehova Guutimut aalajaalluta nalunaajaasuunitsinnik ilisarnaataasut, paarisariaqarlugit. Pilluassaagut anersaakkut eqiasulinngikkutta ilungersuussillutalu Guutip naalagaaffia pilersinneqartoq pillugu ’nutaarsiassaq nuannersoq’ oqaluussissutigiuarutsigu. — sarĸúmersitat 14:6.

’Pilluarpoq takorluukkersaarutit oqaasiinik toqquisoq’

16. Sooq sarĸúmersitat-ni kapitalit kingulliit pilluarnissamut pissutissaqartippaatigut?

¹⁶ sarĸúmersitat-nik atuartut pilluartut qiimmatsangaassapput kapitalini kingullerni neriugisatsinnik nuannersunik — qilammik nutaamik nunamillu nutaamik, tassa qilammi naapertuilluartumik naalagaaffiup nunarsuarmi inuiaqatigiinnut nutaanut  minguiarneqartunut ’Jehovap ajugaqanngitsup’ ataqqinaatissaanik naalakkersuineranik neriuummik — atuaraangamik. (sarĸúmersitat 21:22) Takorruukkat nuannersut tamakkua naggataanni inngilip Johannes ima oqarfigaa: ’Oqaatsit tamakku ilumoorlutillu sallusuipput. [Jehovallu], pruffiitit anersaavisa Guutiata, inngilini aallartippaa qilamik piumaartussat kiffaminut takuteqqullugit. Ata, qilamik aggerumaarpunga. Pilluarpoq takorluukkersaarutit mappersakkani makkunani ittut oqaasiinik toqquisoq.’ — sarĸúmersitat 22:6, 7.

17. (a) sarĸúmersitat 22:6-ip sumik qularunnaarsippaatigut? (b) Suut ingalassimasariaqarpavut?

¹⁷ sarĸúmersitat-nik atuartut pilluartut eqqaamassagunarpaat ’mappersakkat’ aallaqqaataani assingusumik allassimasoqartoq. (sarĸúmersitat 1:1, 3) Oqaatsit taakkua qularunnaarsippaatigut Biibilip atuagartaasa kingulersaanni siulittuutigineqartut tamarmik ’qilamik’ imaluunniit qanittukkut ’piumaartut’. Naggatissap nalaani piffissaq imaalereermat sarĸúmersitat-ni siulittuutigineqartut pingaarutillit erniinnaq tulleriiginnarlutik piviusunngoralissasut qularnanngilaq. Taamaattumik Satanip aaqqissuussinerata patajaappasinneranik sinnassartissanngilagut. Atuartup eqqumasup mianersoqqussutit ilagiinnut arfineq-marlunnut Asiaaqqamiittunut tusarliunneqartut eqqaamassavai, taamaattumillu napiaaniutit, soorlu nunap piinik pingaartitsivallaarneq, guutipilussiorneq, kanngunartuliorneq, ilatsiinnarneq, tunussineq immikkoorniarnerlu, ingalassimassallugit.

18, 19. (a) Sooq Jesus suli ’aggersimanngila’, Johannesillu neriuutigisaa suna uaguttaaq neriuutigisinnaavarput? (b) Suna siunertaralugu Jehova ’aggerumaarpa’?

¹⁸ sarĸúmersitat-ni Jesus arlaleriarluni oqarpoq: ’Qilamik aggerumaarpunga.’ (sarĸúmersitat 2:16; 3.11; 22:7, 20a) Babylon Angisuumut, Satanip aaqqissuussineranut inunnullu Jehovap kisimi oqartussaaneranut, Naalagaaffik Messiasikkoortoq aqqutigalugu ersersinneqartumut, naalatsigitikkumanngitsunut tamanut eqqartuussissalluni suli ’aggersimanngilaq’. Apustili Johannesitut oqarpugut: ’Aammen. Aggerna, Naalagaq Jesusiaa.’ — sarĸúmersitat 22:20b.

¹⁹ Jehova nammineq oqarpoq: ’Ata, akiliutiga nassataralugu qilamik aggerumaarpunga, kinaluunniit suliai naapertorlugit tuniumaarlugu.’ (sarĸúmersitat 22:12) Neriorsuutigisaasunut ’qilammut nutaamut’ imaluunniit ’nunamut nutaamut’ ilaagaluarutta inuunermik naassaanngitsumik akissarsiassatta nuannersup utaqqinerani, inuit ilumoortut tamarmik qaaqquneqarneranni peqataasariaqarpugut: ’„Aggerna! “ Imerusuttorlu aggerli; piumasullu imeq inuunartoq akeqanngitsumik piliuk.’ (sarĸúmersitat 22:17) Neriuppugut taakkuttaaq sarĸúmersitat-nik isumassarsiarititaasunik aammalu isumassarsisitsisunik pilluarlutik atuarumaartut! (wE 1/12 99)

[Quppernerup ataani ilanngussaq]

Uteqqiinermut apeqqutit

□ Jehovap kikkut aqqutigalugit sarĸúmersitat tunniuppai, tamatumanngalu suna ilinniarparput?

□ Sooq ilagiinnut arfineq-marlunnut Asiaaqqamiittunut tusarliussat atuarnerisa pillualersissavaatigut?

□ ’Usserneqarfissami’ qanoq illersorneqarsinnaavugut?

□ sarĸúmersitat-nik imaqartumi mapparsakkani allanneqartut maleruarutsigik pilluarneq qanoq ittoq misigissavarput?

[Atuaqqissaarnermi apeqqutit]

[Qupp. 17-mi assiliartaq]

Nutaarsiassap nuannersup aallaavianik ilisarinnittut pilluarput

[Qupp. 20-mi assiliartaq]

Pilluarput eqqumajuartut