Sarkúmersitat-nit „Nutaarsiassat Nuannersut “

’Inngililu alla takulerpara qilaap missaagut timmisoq, iivangkiiliumik ittuinnartumik oqaatigisassaqartoq nunamiusunut tamanullu inuiaqatigiissunut immikkullu naggueqatigiissunut immikkullu oqaasilinnut immikkullu inuiaasunut.’ — SARKÚMERSITAT 14:6.

1. Jehovap Nalunaajaasuisa sarĸúmersitat upperigaluaraat, sooq oqarsinnaanngilagut tassaasut ’immikkut upperusiortut eqqartuussiffissamik pingaartitsivallaartut’?

UNNERLUUTIGINEQARNERMISSUT Jehovap Nalunaajaasui tassaanngillat ’immikkut upperusiortut eqqartuussiffissamik imaluunniit naggatissamik pingaartitsivallaartut’. Kisianni sarĸúmersitat Guutip oqaasianut isumassarsiarititaasumut ilaasutut isigaat. Ilumoorpoq sarĸúmersitat-ni inuit ajortut eqqartuunneqarnissaat eqqaaneqarmat. Oqaluussinerminnili Jehovap nalunaajaasuisa neriuut nuannersoq Biibilimeersoq pingaarnerutippaat, ilaatigut sarĸúmersitat-ni tusarliunneqartoq. Taamaalillutik oqaatsit siulittuutaasut imarisaat ilanagillu ilannganngilaat. — sarĸúmersitat 22:18, 19.

Nutaarsiassamik nuannersumik oqaluussisartut

2. Allassimaffiit suut Jehovap nalunnaajaasuisa oqaluussinerminni atorajuppaat?

² Jehovap nalunaajaasuisa tamanut oqaluussinerminnut tunngavilersuutaat issuarneqakulasoq Biibilimeersoq tassaavoq Jesusip oqaasii makku: ’Naalagaaffimmik iivangkiiliu tamanna oqaluussissutigineqassavoq inuit najugaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliussavoq.’ (Matîuse 24:14) ’Iivangkiiliu tamanna’ imaluunniit nutaarsiassaq nuannersoq tamanna sunaava? Jehovap nalunaajaasui amerlasuut sarĸúmersitat kapitali 20-p aamma 21-p, Kristusip ukiuni tusindini Naalagaaffianik naalakkersueqataanillu, inuiaqatigiinnillu toqup, aliasunnerup anniarnerullu peerulluinnarnissaannik eqqartuisut innersuutiginerisigut akissagunarput. — sarĸúmersitat 20:6; 21:1, 4.

3. Jehovap nalunaajaasuisa tamanut oqaluussinerat suliamut sumut assingussuteqarpa?

³ Nutaarsiassamik nuannersumik oqaluussisartutut Jehovap nalunaajaasui tusarliisumit qilammeersumit assersuutaasumit oqaaseqartitaapput, tusarliisup taassuma suliai sarĸúmersitat-ni allaatigineqarput. ’Inngililu alla takulerpara qilaap missaagut timmisoq, iivangkiiliumik ittuinnartumik oqaatigisassaqartoq nunamiusunut tamanullu inuiaqatigiissunut immikkullu  naggueqatigiissunut immikkullu oqaasilinnut immikkullu inuiaasunut.’ (sarĸúmersitat 14:6) ’Iivangkiiliup ittuinnartup’ tamatuma ilaatut nalunaarutigineqarpoq ’silamiut naalagaaffiat Naalakkatta tanitaatalu pigileraat’, ’nunamillu aseruisut aserornissaannut’ Jehovap piffissarititaa nalliutilersoq. (sarĸúmersitat 11:15, 17, 18) Tassaannginnerpa nutaarsiassat nuannersut?

sarĸúmersitat uatsinnut nassatarisaat

4. (a) Tunngaviusut ilumoortut suut sarĸúmersitat-ni kapitali 1-imi saqqummersinneqarpat? (b) Nutaarsiassaq nuannersoq iluaqutigissagutsigu sumik piumaffigineqarpugut?

⁴ sarĸúmersitat-ni kapitalimi siullermi Jehova „Alfa-tut Omega-tullu “ (NV) allaatigineqarpoq, tassa ’maannakkut ittoq siornagut ittoq tikiukkumaartoq, Ajugaqanngitsoq’. Erneralu Jesus Kristus tassaavoq ’nalunaajaasoq ilumoortoq, siulliulluni toqusunit erniusoq, nunap kunngiisa siulersortaat’. Allassimavortaaq Jesusip ’asagaatigut, aammigullu ajortaajaraatigut’. (sarĸúmersitat 1:5, 8) sarĸúmersitat taamaalillutik aallaqqaammulli ilumoortunik inuunermut pingaarutilinnik paasissutissiipput. Jehovap kisimi oqartussaanera akuerigunikku, Jesusip aava kuisaq Jehovallu taanna makitissimagaa Kristusilu maanna Guutimit nunarsuarmut kunnginngortitaasimasoq upperigunikku aatsaat ’nunamiusut’ nutaarsiassat nuannersut iluaqutigissavaat. — Tussiaat 2:6-8.

5. sarĸúmersitat-ni kapitali 2-mi 3-milu Kristus qanoq allaatigineqarpa?

⁵ sarĸúmersitat-ni kapitalit marluk tulliuttut takutippaat Jesus Kristusip qilammit asannilluni ajoqersukkami nunarsuarmiittut ilagiivi nakkutigigai. Allakkat imusat ukiuni hundredelinni siullerni ilagiinnut kristumiunut qinikkanut arfineq-marlunnut Asiaaqqamiittunut nassiunneqartut kajumissaarutinik unnersuussutinillu toqqaannartunik ullutsinnuttaaq naleqqulluartunik imaqarput. Ilagiinnut taakkununnga tusarliussat arlallit oqaatsinik imaattunik aallartikkajupput: ’Suliatit ilisimavakka’ imaluunniit ’ilisimavakka annikillisarnerit’. (sarĸúmersitat 2:2, 9) Aap, Kristusip nalunngilluinnarpaa ajoqersukkami ilagiivini qanoq pisoqartartoq. Ilaat asanninnertik, uppernertik, kiffartornertik, nikallujuinnertik aqqanullu oqaasianullu aalajaannertik pissutigalugit nersorneqarput. Allat avoqqaarineqarput Jehovamut erneranullu asanninnertik nillortissimagamikku imaluunniit kinguaassiuutitigut kanngunartuliornermut, guutipilussiornermut tunussinermulluunniit nakkarsimallutik.

6. Kapitali 4-mi takorruukkap sumik paasitippaatigut?

 ⁶ Kapitali 4-mi Jehova Guutip qilammi issiavissaarsuanik ataqqinangaartumik takorruugaq allaatigineqarpoq. Naalannassuseq Jehovap eqqaanut qilammilu naalakkersuisoqarnissaanut ilisarnaataasoq takullatsiarneqarpoq. Kunnginngortitat qilaap qiterpiaani issiavissaarsuaq avatangerlugu issiavissaarsuaqartut Jehova ataqqillugu pallorfigaat oqarlutik: ’[Jehova], Guuterput, ilinnut pigititassaapput naalannaat ataqqinaallu pissaanerlu, illit suut tamaasa pinngortikkakkit, illillu peqqusakkut ipput pinngortitaallutillu.’ — sarĸúmersitat 4:11.

7. (a) Inngilip nunarsuarmiut qanoq iliornissaannik kajumissaarpai? (b) Ilinniartitsinitta ilaa pingaartoq suua?

⁷ Tamanna inunnut ullumikkut inuusunut pingaaruteqarpa? Aap. Ukiuni tusindini Naalagaaffiup ataani inoorusukkunik ’inngilip qilaap missaagut timmisup’ oqaasii tusarnaaqqissaartariaqarpaat: ’Guuti mianerisiuk, taannalu naalannartissiuk, eqqartuussivissaa nalliummat.’ (sarĸúmersitat 14:6, 7) Jehovap nalunaajaasuisa Biibili tunngavigalugu ilinniartitsisarnerisa siunertaasa pingaarnerit ilaat tassaavoq ’nunamiusut’ Jehovamik ilisarsinissaat pallorfiginnilernissaallu, taassumalu Pinngortitsisuuneranik akuersinissaat taassumalu kisimi naapertuilluartumik oqartussaassusianut naalatsigitilernissaat.

Naalannaat savaaqqamut pigititassaaq

8. (a) Kapitali 5-imi 6-imilu Kristus qanoq allaatigineqarpa? (b) Nutaarsiassamik nuannersumik tusarnaartut tamarmik takorruugaq tamanna qanoq ilinniutigisinnaavaat?

⁸ Kapitalini marlunni tulliuttuni, kapitali 5-imi 6-imilu Jesus Kristus savatut mappersakkanik arfineq-marlunnik naqissuserneqarsimasunik mappiisussaatitaasutut saqqummersinneqarpoq. Mappersakkani siulittuutitigut allaatigineqartut ullutsinni pipput. (Naleqqiuguk Juánase 1:29.) Sava assersuutaasoq nipinit qilammeersunit ima oqarfigineqarpoq: ’Illit mappersakkanik ukuninnga tigusisussaavutit naqissutaannillu mappiisussaallutit, toqutaagavit, aannillu Guutimut pisiarigakkit inuit immikkut naggueqatigiissunit immikkullu oqaasilinnit immikkullu inuiaasunit inuiaqatigiinnillu tamanit, Kunngiuffinngortikkakkillu palasinngortillugillu Guutitsinnut, nunamullu kunngiussapput.’ (sarĸúmersitat 5:9, 10) Takorruukkap tamatuma ilinniartippaatigut Kristusip aava kuisaq tunngavigalugu inuit assigiinngitsunik tunuliaqutallit qaaqquneqartut taannalu qilammeeqatigissagaat ’nunamullu kunngiussasut’. (Naleqqiuguk sarĸúmersitat 1:5, 6.) sarĸúmersitat-ni kingusinnerusukkut taakkua killilimmik amerlassuseqarnerat saqqummersinneqarpoq.

9. Kapitali 6-imi Kristus qanoq eqqartorneqarpa?

⁹ Takorruukkami tamatumani Kristus aamma takutinneqarpoq qaqortumik hiistertoq kunngitut ivertinneqartutut ’ajugaalluni ajugaassasoq’. Atugarliuutit aaqqilluinnassavai sarĸúmersitat-nilu hiistertut pingasut allat atugarliuutinut assersuutaasut, taakkualu ukiumit pingaartumit 1914-imiilli sorsunnernik, kaannersuarnik toqumillu kinguneqartarsimapput. (sarĸúmersitat 6:1-8) Kristusip, Guutip savaaraata, inuiaat annaanneqarnissaannut Jehovallu siunertaasa nuanningaartut naammassineqarnissaannut immikkut inissisimaffia Jehovap nalunaajaasuisa Biibilimik ilinniartitsisutaasa pingaarnerit ilagaat.

10. (a) Kapitali 7-imi paasissutissaq pingaartoq suna saqqummersinneqarpa? (b) Kristusip Naalagaaffimmik tunineqartut qanoq oqaatigai?

¹⁰ Kapitali 7-imi nuannersumik nutaarsiassaqarpoq. sarĸúmersitat-ni taamaallaat Jesusip ’savarpannguanik’ taasaasa Savaaqqap Ataataata Naalagaaffimmik  tunisassaasa amerlassusiat eqqaaneqarpoq. (Lúkarse 12:32; 22.28-30) Jehova Guutip anersaavanit naqissuserneqarput. (2 Korintumiut 1:21, 22) Apustili Johannes sarĸúmersitat-nik tunineqartoq ima uppernarsaavoq: ’Naqissuserneqartullu amerlassusiat tusarpara: 144.000-t.’ (sarĸúmersitat 7:4) Kapitalit tulliuttut ilaanni eqqaaneqaqqippoq kisitsit taanna ’nunamit immikkoortillugit pisiaasut’ Sionip qaqqaani qilammiittumi Savaaqqap kunngitut naalakkersueqatissaasa amerlassusiat. (sarĸúmersitat 14:1-4) Kristumiuuneraqatigiit iluanni upperisarsioqatigiit kisitsit tamanna erseqqaarinngitsumik uppernanngitsumillu nassuiartaraat, Biibilimik misissueqqissaartartup E. W. Bullingerip soqutiginartumik ima oqaatigisimavaa: „Tassa piviusoq pillugu paasissutissaq ersarissoq: Kapitalimi ataatsimiipput amerlassutsit aalajangersimasut akerliatullu amerlassutsit aalajangerneqarsimanngitsut.“

11. (a) kapitali 7-imi nutaarsiassaq nuannersoq suna eqqaaneqarpa? (b) ’Amerlangaartunut’ ilaasut qanoq siunissaqarpat?

¹¹ Amerlassuseq aalajangerneqarsimanngitsoq sunaana Bullingerip pigaa? Versi 9-mi apustili Johannes allappoq: ’Kingorna takunnikkama, ata, amerlangaartut kisinneqarsinnaanngitsut, inuiaqatigiit immikkullu naggueqatigiissut immikkullu inuiaasut immikkullu oqaasillit tamarmik ilaat.’ (sarĸúmersitat 7:9) Amerlangaartut taakku kikkuuppat, ullumikkut Guutimut qanoq attaveqarpat qanorlu siunissaqarpat? sarĸúmersitat-ni akissut nunarsuarmiunut nutaarsiassaavoq nuanningaartoq. Ima atuarpugut: ’Tassaaku annikilliornartumit angisuumit pisut, atisatillu takisuut savaaqqap aavanik errorpaat qaqorsarlugillu.’ Kristusip aavanut kuisamut uppernermikkut ’annikilliornartumi angisuumi’ illersorneqassapput. Kristusip ’tasiussavai imermik puilasunut inuunerup piinut, Guutillu qulliit tamaasa isaannit allarterumaarpai’. (sarĸúmersitat 7:14-17) Aap, inuit millionilikkuutaat maannakkut inuusut amerlangaartunut kisineqarsinnaanngitsunut aaqqissuussaanerup ajortup maanna atuuttup naggatissaani aniguiumaartunut ilaasinnaapput. Kunngi Kristusip ukiuni tusindini naalakkersuinerani innuttaasut nunarsuarmi naassaanngitsumik inuunissamut siulersorneqassapput. Nutaarsiassaq nuannersuuvoq, ilaa?

’Eqqartuussineri ilumoorput iluarlutillu’

12, 13. (a) Kapitalit 8-mit 19-mut sumik imaqarpat? (b) Sooq inuit ilumoortut siulittuutit taakku eqqissiunnaarutigisariaqanngilaat?

¹² Kapitalit 8-mit 19-imut pissutiginerullugit sarĸúmersitat ajunaarnersuarnik annilaarnartunik siulittuutitut isigineqartarput. Kapitalini tamakkunani Satanip pissutsinik aaqqissuussinerata immikkoortuinut assigiinngitsunut eqqartuussummik tusarliussat sukannersut (qarlortarnernut, perlunnut puuguttanullu Guutip kamannerata piinut assersuunneqartut) saqqummersinneqarput. Eqqartuussutit tamakku siullermik eqqunngitsumik upperisarsiornermut (’Babylon Angisuumut’) kingornalu naalakkersuinikkut aaqqissuussinernut guutiitsunut, nersutinut qaasuttunut assersuunneqartunut, naammassineqassapput. — sarĸúmersitat 13:1, 2; 17:5-7; 15, 16. *

¹³ Qilaat qanoq minguiarneqartut kapitalini taakkunani allaatigineqarpoq, Satan inngilipiluilu nunarsuup eqqaanut iginneqarmata. Tamanna tunngavissaqarluartumik nassuiaatissatuaavoq sooq 1914-imiilli nunarsuarmi annikilliornerit taama  ingasatsiginerinut. (sarĸúmersitat 12:7-12) Satanip nunarsuarmi aaqqissuussinerata ajortup suujunnaarsinnissaa assersuutitigut allaatigineqarpoq. (sarĸúmersitat 19:19-21) Inuit ilumoortut pisussat ilungersunartut tamakku tupassutigisariaqarpaat? Naamik, Guutimmi eqqartuussutai naammassineqarpata qilammiorpassuit ima oqassapput: ’Halleluja [Jehova unnersiutigisiuk, NV], annaassut naalannaallu pissaanerlu Guutitta pigai, eqqartuussineri ilumoormata iluarlutillu.’ — sarĸúmersitat 19:1, 2.

14, 15. (a) Aaqqissuussaaneq ajortoq maanna atuuttoq qanoq ililluni naapertuilluartumik atorunnaarsinneqassava? (b) Sooq sarĸúmersitat immikkoortuat tamanna inuit ilumoortut nuannaarutissarsiffigisinnaavaat?

¹⁴ Jehovap nunarsuarmik aseruisut peersinnagit naapertuilluartumik aaqqissuussaaneq pilertinnianngilaa. (sarĸúmersitat 11:17, 18; 19:11-16; 20:1, 2) Inuk kinaluunniit naalakkersuisullu kikkulluunniit taamaaliornissamut piginnaaneqaratillu pissaaneqanngillat. Jehova taassumalu Kunnginngortitaa Eqqartuussisuutitaalu, Kristus Jesus, kisimik naapertuilluartumik taamaaliorsinnaapput. — 2 Tásalûníkamiut 1:6-9.

¹⁵ Aaqqissuussaanerup ajortup maanna atuuttup suujunnaarnissaa Jehovap siunertarimmagu, angutit arnallu „maajunnartut suliarineqartut pillugit anersaarulullutik kappialasut “ nuannaarutigisinnaavaat, soorlu sarĸúmersitat-ni ersarissumik takutinneqartoq. (Hesekiel 9:4) Takkua paasisariaqarpaat maannakkut inngilip nutaarsiassamik nuannersumik oqaatiginnittup kajumissaarutaata maleruarnissaanut piffisanngortoq: ’Guuti mianerisiuk . . . eqqartuussivissaa nalliummat; pallorfigisiullu qilammillu nunamillu immamillu ermillu puilasarfiinik pinngortitsisoq.’ (sarĸúmersitat 14:7) Neriuppugut inuit taakku Jehova pallorfigalugulu kiffartorfigissagaat nalunaajaasui ’Guutip inassutaanik maleruaasut Jesusillu nalunaajaataanik piginnittut’ peqatigalugit. — sarĸúmersitat 12:17.

Ukiuni tusindini Naalagaaffik nuanningaartoq

16. (a) Sooq kristumiuuneraqatigiit ukiuni tusindini Naalagaaffimmik neriuut akueriumanngilaat? (b) Suna pillugu Jehovap nalunaajaasuisa upperaat qinnut ’Ataatarpooq’ piviusunngorumaartoq?

¹⁶ sarĸúmersitat-ni kapitali 20-mit 22-mut ukiuni tusindini Naalagaaffimmik neriuutip tunngavia Biibilimeersoq nanineqarsinnaavoq. Biibilip ilaani tassaniinnaq eqqartorneqarpoq ukiut tusindit qilammi nunarsuarmilu naassaanngitsumik pilluarnermut aallaqqaataasussat. Kristumiuuneraqatigiit oqaluffeqarfiisa ukiuni tusindini Naalagaaffimmik neriuut akueriumanngilaat. Oqaluffeqarfiit ajoqersuutigisarmassuk inuit ajunngitsut qilaliassasut ajortullu anniarfiliartinneqassasut, nunarsuarmi paratiisissaq atorfissaqartinnginnerarpaat. Qinnut ’Ataatarpooq’ Guutip piumasaata ’qilammisut nunamissaaq’ pinissaanik qinnutaasoq kristumiuuneraqatigiit ilagiivini  ilaasortat amerlanersaannut isumaarussimavoq. (Matîuse 6:10) Jehovalli nalunaajaasui taamaanngillat. Upperilluinnarpaat Jehova Guutip nunarsuaq ’soqanngitsussanngornagu, kisianni inoqartussanngorlugu pinngortikkaa’. (Jesaja 45:12, 18) Taamaattumik ukiuni tusindini Naalagaaffik pillugu siulittuutitoqqat, ’Ataatarpooq’ aamma sarĸúmersitat-ni oqaatsit, imminnut naapertuupput. Ukiuni tusindini naalakkersuinermini Kristusip isumagissavaa Jehovap piumasaata nunarsuarmi qilammisut pinissaa.

17. Suup takutippaa oqaatsit ’ukiut taakku tusindit’ assersuutaanngitsumik paasisariaqartut?

¹⁷ sarĸúmersitat kapitali 20-mi versini arfineq-marlunni siullerni oqaatsit ’ukiut tusindit’ arfinileriarlugit atorneqarput. Maluginiarnarpoq sisamariarluni (kalaallisuumi pingasoriarluni) aalajangersimarpaluttumik ’taakku’-mik allassimasoq. Tamatuma takutippaa ukiut aalajangersimasut 1000-t pineqartut, tassaananilu piffissaq sivisooq sivisussusia aalajangersimanngitsoq, soorlu kristumiuuneraqatigiit Biibilimik oqaaseqarfiginnittartuisa isumaqartinniaraatigut. Ukiuni tusindini naalakkersuinermi qanoq pisoqassava? Pingaarnerpaamik Satan ukiuni taakkunani ajoqusiisinnaajunnaarsinneqassaaq. (sarĸúmersitat 20:1-3; naleqqiuguk Eprîarit 2:14.) Nutaarsiassaq nuannerluinnartoq!

18. (a) Sooq ukiuni tusindini Naalagaaffik ’ullormik eqqartuutiffimmik’ taaneqarsinnaava? (b) Ukiut tusindit kingorna qanoq pisoqassava?

¹⁸ Kristusip ’ukiuni tusindini kunngioqatissai’ ’eqqartuussisinnaatitaammata’ ukiut taakku tassaapput ’ulloq eqqartuutiffik’ ukiunik tusindinik sivissusilik. (sarĸúmersitat 20:4, 6; naleqqiuguk apustilit suliait 17:31; 2 Pîtruse 3.8.) Toqusimasut makikkumaarput, ’annikilliornartumillu angisuumit’ aniguisimasut peqatigalugit taamanikkussaq iliuutsitik naapertorlugit naapertuilluartumik eqqartuunneqassapput. (sarĸúmersitat 20.12, 13) Ukiut tusindit taakku naappata inuillu inaarutaasumik misilinneqassammata Satan sivikitsumik qilerussaarneqassaaq, tamatumalu kingorna Satan, inngilipilui nunarsuarmilu inuit pikitsitsiumatuut taassuminnga malinnittut naassaanngilluinnartumik suujunnaarsinneqassapput. (sarĸúmersitat 20:7-10) Inuit misilinneqarnerminni aalajaattuartut atii ’mappersakkani inuunerup piini’ piigassaanngitsumik allanneqassapput, taakkualu nunarsuarmi paratiisiusumi naassaanngilluinnartumik Jehova pilluarlutik kiffartorfigisinnaallugulu pallorfigisinnaassavaat. — sarĸúmersitat 20:14, 15; Tussiaat 37:9, 29; Jesaja 66:22, 23.

19. (a) Sooq qularisariaqanngilarput sarĸúmersitat-ni neriorsuutit nuannersut eqquukkumaartut? (b) Allaaserisami tulliuttumi suna sammissavarput?

¹⁹ Nutaarsiassaq nuannersoq tamanna sarĸúmersitat-ni atuarneqarsinnaavoq. Neriorsuilussinnarnerinnaanngillat soorlu inuit taamaattartut. Apustili Johannes allappoq: ’Issiavissaarsuarmi issiasoq oqarpoq: „Ata, suut tamaasa nutaanngortippakka.“ Uannullu oqarpoq: „Allagit, oqaatsit tamakku sallusuillutillu ilumoormata.“’ (sarĸúmersitat 21:5) Nutaarsiassap nuannersup tamatuma pivisunngornissaa misigissagutsigu qanoq iliortariaqarpugut? sarĸúmersitat-ni inunnut Guutimik nuannaartitsiumasunut unnersuussuterpassuaqarpoq. Unnersuussutit tamakku maleruartarutsigik maannakkut naassaanngitsumillu nuannaarutigingaassavavut, soorlu allaaserisami tulliuttumi nassuiarneqartoq. (wE 1/12 99)

[Quppernerup ataani ilanngussaq]

Uteqqiinermi apeqqutit

□ sarĸúmersitat-ni kapitali 4-mit 6-imut tunngaviusut ilumoortut suut nutaarsiassamut nuannersumut pingaarnernut ilaappat?

□ sarĸúmersitat-ni kapitali 7-imi sumik nuannersumik nutaarsiassaqarpa?

□ Sooq inuit ilumoortut sarĸúmersitat-ni eqqartuussinissamik tusarliussat eqqissiunnaarutigisariaqanngilaat?

□ Ukiuni tusindini naalagaaffik qanoq ililluni ’ulluua eqqartuutiffiusoq’?

[Atuaqqissaarnermi apeqqutit]

[Qupp. 11-mi assiliartaq]

Kunngi Jesus Kristusip sorsunnerit, kaannersuit toqulu nunarsuarmit peerluinnassavai