„Upperneq pissutigalugu aalajaanneq“

FRANKIGIMI atuagaq Les Témoins de Jéhovah face á Hitler (Jehovap Nalunaajaasui Hitlerip akiani) Guy Canonicimit atuakkiarineqarsimasoq 1998-imi saqqummermat nersualaarneqaqaaq. Atuakkap siulequtaani oqaluttuarisaanermik allattartoq franskeq ataqqisaasoq Francois Bédarida ima allappoq: „Atuagaq ilassilluarneqartariaqarpoq. Pisariaqartinneqarnera piinnarnagu aammattaaq piffissaq eqqortoq saqqummerpoq. . . . Immikkut ilisimasallit saniatigut, kikkut nalunngilaat Naalagaaffiit Pingajuata ataani Jehovap Nalunaajaasui qanoq atugaqarsimanersut? Ukiut 12-t naalagaaffiup atanerani naakkittaangaartumik peqqarniitsumillu malersugaapput, tigusanullu inissiarsuit amilaarnartui misigaat. Upperisartik pillugu aamma taakkua akiliuteqangaarsimapput. Sooq oqaluttuarisaanerup kristumiut taakku puigorpai? . . .

Immikkut upperusiortut ikittunnguit, siammasissut ajoqutaanngitsullu sooq taama peqqarniitsigisumik aaqqissugaasumillu malersugaappat? Tassa ippinnartua. Jehovap Nalunaajaasui innuttaasuni ikinnerussuteqaannanngillat — kisitsisit naapertorlugit nassuiaanerit naapertorlugit innuttaasunit 60 millioniusunit 20.000-iupput — innuttaapputtaaq eqqissisimasut inatsisinik maleruaalluartut kimulluunniillu uloriarnartorsiortitsinngitsut. Suliffitik paarilluarusuunnarpaat meeqqatillu perorsarluarumallugit. . . .

Malersuineq uppertunit aalajaatsumik ajugaasumillu anersaakkut ittumik akiuunnermik akineqarpoq. Jesus Kristusimut uppernertik tunngavigalugu ilumikkut nakussatsinneqarput politeeqarnikkut naalakkersuinerup ataani timikkut persuttaasarnermik aallartittumik avatangiisinit tatinearnissaannut nallersuussinnaasumik — sapiissuseq martyrisullu toqutaaneq tikillugu.“

Jehovap Nalunaajaasui kristumiutut uppernertik pissutigalugu upperisarsiornikkut akaarinninnginnerup kingunerisaanik martyrisut toqutaanerisa oqaluttuarineqarnerat kajumissaataangaarpoq. Atuakkap allaatigineqarnerani Frankrigimi katuullit aviisianni, La Croix-mi, eqqortumik ima allassimavoq: „[Jehovap Nalunaajaasuisa] oqaluttuarisaanerannit ilisimaneqarpallaanngitsumit Guy Canonicip katersorsimavai upperneq pissutigalugu aalajaassutsimut uppernarsaatit oqaasissaarunnartut. Upperneq paasiuminarnerpaaq naggataa tikillugu aalassatsinneqarsinnaanngitsoq, allaat meeqqani. Eqqaassutissaq tamanna Jehovap Nalunaajaasui ilumut kristumiuunersut oqallinnermut aallartereersumut tunuliaqutaasariaqarpoq.“ (wE 15/10 99)