Jehovap peqatigiissortai pisariaqartippavut

IMA oqartumik tusarsimavit: „Guuti upperaara, kisianni isumaqanngilanga upperisarsioqatigiinnut aalajangersimasunut ilaasortaasariaqarlunga“. Siornagut nuannaralugu naalagiartuarsimasut ilaat taama oqarajupput, upperisarsioqatigisaminni anersaakkut pisariaqartitamik matussutissinneqartannginnerat pakatsissutigigamikku. Inuppassuit upperisarsiornerit assigiinngitsut pakatsissutigigaluarlugit guutisiortuaannarumanerarput. Isumaqarput nammineerlutik pallorfigigunikku pitsaanerusoq oqaluffinni imaluunniit uppeqatigiinni aalajangersimasuni taamaaliornermit.

Biibilimi qanoq allassimasoqarpa? Guutip kristumiut upperisarsioqatigiinnut ilaanissaat piumasaraa?

Kristumiut siulliit peqatigiissortanut ilaanertik iluaqutigaat

Ukiumi 33-mi piinsip ulluani Jehovap anersaani illernartoq uppertunut ataasiakkaanut sumi tamaaniittunut kuinngilaa, kisianni angutinut arnanullu eqimattanut ’katisimasunut’, tassa Jerusalemimi illup qaliani inersuarminiittunut. (apustilit suliait 2:1) Taamanikkut kristumiut ilagiit nunarsuaq tamakkerlugu peqatigiissortaqalertussatut pilersinneqarput. Tamanna kristumiunut siullernut iluaqutaalluinnarsimavoq. Sooq? Siullermik pingaarutilimmik suliassinneqarsimapput Guutip naalagaaffianik nutaarsiassaq nuannersoq oqaluussissutigalugu piffissap ingerlanerani ’inuit najugaat tamakkissagaat’. (Matîuse 24:14) Ilagiinni uppeqatit misilittagaqarnerusut uppilerlaat oqaluussinissaannut ilinniartissinnaasimavaat.

Sivitsunngitsoq Guutip nalagaaffia pillugu tusagassaq Jerusalemip qarmarsui qaangerujussuarlugit siaruarpoq. Ukiut 62-ip 64-illu akornanni apustili Peter kristumiunut ’Pontusimi Galatiamilu Kappadokiamilu Asiamilu Bityniamilu nunasisunut siammarsimasunut’, ullumikkut Tyrkiap nunataaniittunut allakkani siulliit, allassimavai. (1 Pîtruse 1:1) Aammattaaq Palæstinami, Libanonimi, Syriami, Grækenlandimi Italiamilu aammalu Cypernimi Kretamilu uppertoqarsimavoq. Paulus Kolossamiunut ukiumi 60-imi 61-imiluunniit allammat, nutaarsiassaq nuannersoq ’pinngortitani tamani qilaap ataaniittuni oqaluussissutigineqarsimavoq’. — Kulorsamiut 1:23.

Kristumiut peqatigiissortanut ilaanerat allamik pitsaaquteqarpoq tassa kajumissaaqatigiissinnaagamik. Kristumiuni ilagiinni qinoqatigiissinnaapput, oqalugiaamik kajumissinartumik tusarnaarsinnaallutik, allakkanik illernartunik atuaqqissaarsinnaallutik uppernikkullu nakussatsinnartumik misigisalikkersaarsinnaallutik. (Korintumiunut agdlagkat sujugdlît, kapitali 14.) Angutillu inersimalluartut ’Guutip savaatai paarisinnaavaat’. — 1 Pîtruse 5:2.

Ilagiinnut kristumiunut ilaasortatut imminnut ilisarisimalertarput asaqatigiilerlutillu. Ukiuni hundredilinni siullerni ilagiit kristumiut katerisimaaqatigiinneq oqimaatsutut isiginngilaat. Akerlianilli ineriartornartuullunilu nukittornartuusimavoq. — apustilit suliait 2:42; 14:27; 1 Korintumiut 14:26; Kulorsamiut 4:15, 16.

Nunarsuaq tamakkerlugu ilagiit imaluunniit peqatigiissortat peqatigiittariaqarnerannut pissutaasoq alla tassaavoq ataasiussuseqartitsimmat. Kristumiut ’assigiissumik oqaluttarnissaq’ ilinniartarpaat. (1 Korintumiut 1:10) Tamanna pingaaruteqarsimavoq, ilagiinnimi ilaasortat assigiinngitsorujussuarnik ilinniagaqarlutillu tunuliaqutaqarmata. Tamarmimmi assigiinnik oqaaseqanngillat, soorunalumi kinaassusii assigiinnatik. (apustilit suliait 2:1-11) Ilaatigut kristumiut akornanni isumaqatigiinngivittoqartarpoq, kisianni isumaqatigiinngissutit aaqqinniarneranni ilagiinnit  ikiorneqartarlutik. — apustilit suliait 15:1, 2; Filípimiut 4:2, 3.

Apeqqutit ilungersunartut pingaarutillit ilagiit utoqqaanertaannit suliarineqarsinnaanngitsut nakkutilliisunut angalasartunut Paulusitut ittunut saqqummiunneqartarput. Ajoqersuutit pillugit apeqqutit pingaarnerit Jerusalemimi qitiusumik siulersuisoqatigiinnut ingerlateqqinneqartarput. Aallaqqaammut siulersuisoqatigiit Jesus Kristusip apustilerai, kingusinnerusukkulli Jerusalemimi ilagiit utoqqaanertaannik ilaqalerput. Siulersuisoqatigiit taakkunanngalu aallartitat oqaluussinermik aaqqissuussinissamut assigiinngitsunik kiffartuuteqartussanik angutinik qinersisinnaanermut ajoqersuutillu pillugit aalajangiisinnaanermut Guutimit oqartussaatitaanerat ilagiit ataasiakkaat akueraat. Apeqqut pineqartoq siulersuisoqatigiinnit aalajangiiffigineqaraangat aalajangernerat ilagiit akuerisarpaat ’tuppallersaallu tipaatsuutigisarlugu’. — apustilit suliait 15:1, 2, 28, 30, 31.

Aap, ukiuni hundredelinni siullerni Jehovap peqatigiissortat atorpai. Ullumikkut qanoq ippa?

Ullumikkut peqatigiissortat pisariaqartippavut

Ullumikkut Jehovap Nalunaajaasuisa nutaarsiassamik nuannersumik oqaluusseqquneqarnertik ilumooruppaat, soorlu kristumiut siulliit ukiuni siullerni taamaaliorsimasut. Suliaq tamanna ilaatigut Biibilinik atuagassianillu Biibililersaarutinik agguaassillutik ingerlappaat. Taamaaliorniaraanni aaqqissuussisoqartariaqarpoq.

Atuagassiat Biibililersaarutit suliarilluagaasariaqarput, misissoqqissaarneqartariaqarlutik, naqiterneqarlutik naggataatigullu ilagiinnut nassiunneqarlutik. Kristumiut ataasiakkaat namminneq piumassutsiminnik atuagassiat atuarusuttunut agguaatissanerlugit aalajangissavaat. Taamaalilluni Guutip naalagaaffianik tusagassaq millionilinnut tusarliunneqartarpoq. Nutaarsiassamik nuannersumik oqaluussisartut aaqqissuussamik oqaluussiumasarput. Taamaaliortarput angalaartarfiit ilaasa akulikippallaamik ilaasalu qaqutigoorpallaamik angalaarfigineqarnerisa eqqumaffiginerisigut. Oqaluussineq aaqqissugaasariaqarpoq.

’Inuup kinaassusia Guutip pinngimmagu’, Biibili atuagassiallu Biibililersaarutit nutserneqartariaqarput. (apustilit suliait 10:34) Atuagassiaq una ullumikkut oqaatsini 132-ni saqqummertarpoq, atuagassiaqataalu Iteritsi! oqaatsini 83-ini saqqummertarluni. Tamanna anguniarlugu nunarsuaq tamakkerlugu nutserinerit aaqqissugaalluartariaqarput.

Kristumiut ataatsimiinneri ataatsimeersuarnerilu ilagiinni ilaasortat qiimmassaatigisaqaat. Periarfissani taamaattuni oqalugiaammik Biibilimik tunngavilimmik tusarnaartarput, Biibilimik atuaqqissaarlutik qinoqatigiillutik ineriartornartunillu misigisalikkersaarlutik. Ukiuni hundredelinni siullerni uppeqatitik assigalugit nakkutilliisumik angalasartumik asannittumik tikinneqartarnertik nuannaarutigisarpaat. Taamaattumik kristumiut ullumikkut tassaapput ’savaatit ataatsit, paarsisoq ataaseq’. — Juánase 10:16.

Jehovap Nalunaajaasui soorunami naammalluinnanngitsuupput soorluttaaq ukiuni hundredelinni siullerni naligisaat taamaattut. Taamaakkaluartoq ataasiussuseqarlutik sulipput. Tamatuma kinguneraa nunarsuaq tamakkerlugu Guutip naalagaaffianik oqaluussineq. — apustilit suliait 15:36-40; Evfisumiut 4:13. (wE 1/1 2000)

[Qupp. 28-mi assiliartaq]

Kristumiut ullumikkut tassaapput ’savaatit ataatsit, paarsisoq ataaseq’