Nigortut tammarumaartut ilaginianngilavut!

’Uagulli nigortut tammarumaartut ilaginngilaatigut.’ — EPRÎARIT 10:39.

1. Suut pissutigalugit Peter qununermut nakkaannarsimava?

APUSTILIT annilaarutigisimassavaat Naalakkamik asasamik Jesusip oqarfigimmatik tamarmik siammarlutillu qimassagaanni. Qanoq ilillutik taamaaliussanerpat — maannakkummi immikkut pisariaqartippai? Peter ilungersuussilluni oqarpoq: ’Tamakkerlutik mamiatsakkaluarpata uanga mamiatsassanngilanga.’ Aap, Peter sapiillunilu qunusuitsuuvoq. Jesusili killuutigineqarlunilu tigusaammat apustilit siammarput, Peterittaaq qimaavoq. Kingusinnerusukkut Jesus palasiunerup Kajfasip illuani apersorneqartillugu Peter isumakululluni silataani utaqqivoq. Unnuap nillertup ingerlanerani Jesusip malitsini tamaasa ilagalugit toqunneqarnissaa Peterip annilaangassutigigunarpaa. Silataaniittut ilaasa Jesusip qanittumik suleqataasa ilaattut ilisarilermanni annilaangaarpoq. Pingasoriarluni Jesusimut attaveqarnini miserratigilluinnarpaa — aap, ilisarinnginnerarluinnarpaa! — Mákorse 14:27-31, 66-72.

2. (a) Sooq ’nigortut’ Peter ilaginngilaat, naak taassuma Jesus miserratigisimagaluaraa? (b) Qanoq iliornissamut aalajangerluinnartariaqarpugut?

² Peterip qularnanngitsumik inuunermi sinnera pisimasoq alianartoq tamanna peqqissimissutigiuarsimassavaa. Unnuarli tamanna taamaaliorsimanera ima paasisariaqarpa Peter qunutuujusoq? Taamaaliorami ’nigortunut tammarumaartunut Paulusip’ eqqaasaanut ilaanerpa? (Eprîarit 10:39) Naamik, amerlanersavut isumaqarunanngillat Peter Paulusip eqqaasaanut ilaasoq. Sooq? Peter qunutuujuaannanngilaq, ataasiaannarluni unioqqutitsigaluarluni inuunermi sinnera sapiilluinnarlunilu uppissuseqangaarpoq. Uaguttaaq amerlanersatta kanngusulluta pisimasut aalajangersimasut eqqaamassagunarpavut, ersilingaarsimaffivut, kissaatigigaluarlugu nakimanata sallusuissut illersorsimannginnatsigu. (Naleqqiuguk Rûmamiut 7:21-23.) Qularisariaqanngilarput unioqqutitsinerit taamaattut ima paasisariaqanngitsut nigortut tammarumaartut ilagigaatigut. Taamaattorli aalajangerluinnartariaqarpugut nigortunut tammarumaartunut ilaajumanata. Sooq? Aamma qanoq ililluta tamanna pinngitsoortissinnaavarput?

Tammarnissamut nigorneq qanoq paasisariaqartoq

3. Pruffiitit Elias Jonasilu qanoq ilillutik qununermut nakkaannarsimappat?

³ Paulusip ’nigortut tammarumaartut’ eqqartoramigit sivikitsumik sapilersut pinngilai. Qularnanngitsumik Paulusip nalunngilaa Peterip Jesus miserratigisimagaa, paasisimavaalu allattaaq assingusumik misigisaqarsimasut. Elias, pruffiiti nakimaallunilu  isertuanngitsoq, ilaanni qunulersimavoq toqujumananilu qimaalluni kunngip nuliata Jesabelip toqumik sioorasaarmani. (1 Kunngit 19:1-4) Pruffiiti Jonas ingasannerusumik siooralersimavoq. Jehovap peqquaa Nineveliaqqullugu, illoqarfimmut nakuusertunik guutiitsunillu innuttalimmut. Jonas ingerlaannaq umiarsuarmut Tarsisiliartussamut — sammivimmut ornitassaminit 3500 kilometerinik ungasitsigisumiittumut — ikivoq! (Jona 1:1-3) Pruffiitilli aalajaatsut taakku aamma apustili Peter nigorsimasutut oqaatigineqarsinnaanngillat. Sooq?

4, 5. (a) Versit ataqatigisaasa qanoq paasitissinnaavaatigut Paulus qanoq isumaqartoq Eprîarit 10:39-mi allassimagami ilaat ’tammarumaartut’? (b) Paulus qanoq isumaqarpa allakkami ’uagut nigortut tammarumaartut ilaginngikkaatigut’?

⁴ Malugiuk Paulusip oqaaserisimasaa: ’Uagulli nigortut tammarumaartut ilaginngilaatigut.’ ’Tammarumaartut’ qanoq paasisariaqarpa? Griikerit oqaasiat taanna isumaqarsinnaavoq naassaanngitsumik suujunnaarnissaq. Tamanna oqaatsit ataqatigisaannut naleqqulluartuuvoq. Paulus siuliani mianersoqqusilluni allassimavoq: ’Sallusuissummi ilisarereeraluarlugu piaaraluta ajortuliorutta taava ajortit pillugit pilliutigisaqarunnaarpoq, kisianni siooranartumik eqqartuunneqarnissaq utaqqisariaqassavoq, ilungersornerlu ikualasoq akerartortunik nungutitsissasoq.’ — Eprîarit 10:26, 27.

⁵ Taamaattumik Paulusip uppeqatini ima allaffigigamigit: ’Uagulli nigortut tammarumaartut ilaginngilaatigut,’ isumaqarpoq nammineq atuartunilu kristumiut aalajaatsut aalajangersimalluinnartut Jehova qimanngisaannassallugu kiffartorfigiunnaassanagulu. Taamaaliornermi naassaanngitsumik suujunnaarnissamik kinguneqassaaq. Judas Iskariot nigorsimavoq tammarlunilu, sallusuissummullu akeraasut allat piaaralutik Jehovap anersaavanut assortuisut aamma taamaaliorsimapput. (Juánase 17:12; 2 Tásalûníkamiut 2:3) ’Ersisut’ imaluunniit qunusut tatsimi ikualasumi  assersuutaasumi suujunnaarsinneqartussat ilagaat. (sarĸúmersitat 21:8) Taakku ilagiumanngilavut!

6. Satan Diaavulup qanoq iliornissarput kissaatigaa?

⁶ Satan Diaavulup kissaatigaa nigussasugut tammarlutalu. ’Qoqassiillaqqissuugami’ nalunngilaa tammariartorneq annikitsutigut aallartittartoq. (Evfisumiut 6:11) Toqqaannartumik malersuinikkut angunngikkaangamiuk, terlinganeeraluni kristumiut uppissusiat qajannarsisittarpaa. Jehovap nalunaajaasui nakimaatsut ilungersortullu nipangersikkusuppai. Misissoriartigik hebriiarinut kristumiunut Paulusip allaffigisimasaanut periaatsit suut atortarsimagai.

Kristumiut qanoq nigortinneqarsimasut

7. (a) Ilagiit Jerusalemimiittut sumik tunuliaqutaqarpat? (b) Paulusip atuartaasa ilaat anersaakkut qanoq ittuusimappat?

⁷ Takussutissaqarpoq Paulusip ukiup 61-ip u.n.s. missaani hebriiarit allaffigisimagai. Ilagiit Jerusalemimiittut tamalaarpassuarnik atugaqarsimapput. Jesusip toqunerata kingorna nakuusernikkut malersorneqarnerup kristumiut illoqarfimmit qimaatippai. Kingusinnerusukkut pissutsit eqqissisimanarnerulermata kristumiut amerliartorsimaqaat. (apustilit suliait 8:4; 9:31) Ukiut ingerlaneranni arlaleriarlutik malersorneqarlutillu ajornartorsiortinneqartarput. Paulusip hebriiarit allaffigimmagit ilagiit eqqissinermik atugaqaleqqissimagunarput. Taamaattoq ilagiit tatineqartarput. Jesusip Jerusalemip aserornissaanik siulittuineranit ukiut 30-ngajaat qaangiussimapput. Ilaat qularnanngitsumik isumaqarput naggatissaq muluallaalersoq immaqalu inuutillutik nalliunnavianngitsoq. Allat, ingammik uppertunngorlaat, suli malersorneqangaarnermit misilinneqarsimanngillat, taamaattumillu paasisimanngilaat misilinneqarnermi nikallujuinneq qanoq pingaartigisoq. (Eprîarit 12:4) Qularutissaanngilaq Satanip pissutsit tamakku atornerlukkusukkai. ’Qoqassiinerit’ suut atorpai?

8. Juuterpassuit kristumiut ilagiissaat pilersinneqaqqammersoq qanoq isigaat?

⁸ Juutit Jerusalemimiittut Judæamiittullu kristumiut ilagiissaat pilersinneqaqqammersoq narrugaat. Paulusip allagaasa imarisaat misissorutsigik paasisinnaavarput juutit upperisarsiornikkut siuttuisa pingaakujuttut malinnittaasalu qanoq kristumiut mitaatigisimagaat. Immaqa oqarsimapput: ’Ukiuni hundredelikkuutaani Jerusalemimi naalaffissuaqarsimavugut! Ataqqisaasumik palasiuneqarpugut tassani palaseqatini peqatigalugit kiffartortartumik. Ullut tamaasa pilliisoqartarpoq. Inatsiseqarpugut inngilit aqqutigalugit Mosesimut tunniunneqartunik Sinajip Qaqqaani tupinnartuliarpassuartigut atulersinneqarsimasunik. Upperusiortut nutaat taakku — kristumiut juutinit avissaarsimasut — tamakkuninnga pigisaqanngillat!’ Kristumiut mitallernermit tamatuminnga eqqorneqartutut misilinneqarpat? Hebriiarit kristumiut ilaasa assortorneqarneq isumakuluutigigunarpaat. Paulusip allagai piffissamut eqqortumut ikiuutaapput.

Sooq tammarnissamut nigunngisaannartariaqartut

9. (a) Eprîarinut agdlagkat-ni pingaartumik suna erseqqissarneqarpa? (b) Kristumiut qanoq ilillutik naalaffimmit Jerusalemimiittumit pitsaanerusumik naalaffeqarpat?

⁹ Paulusip qatanngutini Judæamiittut marlunnik pissutissaqartippai tammarnissamut nigunngisaannarnissaannut. Misissoriartigik. Siullermik Eprîarinut agdlagkat tamarmiusut ersersippaat kristumiunut pallorfiginninnermut aaqqissuussaaneq pallorfiginneriaatsinit allanit tamanit pingaarnerungaartoq. Allakkani tamakkerlugu Paulusip tamanna nassuiarpaa. Naalaffik  Jerusalemimiittoq piviusumut annerungaartumut, tassa Jehovap naalaffissuanut anersaakkut ittumut, ’assannik sanasimanngitsumut’, assersuutaannaavoq. (Eprîarit 9:11) Kristumiut immikkut pisinnaatitaaffeqarput pallorfiginninnermut aaqqissuussaanermi anersaakkut ittumi tamatumani kiffartorsinnaagamik. Angerutsip pitsaanerusup, angerusisaap neriorsuutigisap, Mosesimit annerusumik, Jesus Kristusimik akunnermiliuttullip, ataani kiffartorput. — Jeremia 31:31-34.

10, 11. (a) Sooq oqarsinnaanngilagut Jesus sumit naggueqarnini pissutigalugu naalaffimmi anersaakkut ittumi palasiunertut kiffartornissaminut piukkunnanngitsuusoq? (b) Jesus qanoq ililluni palasiunertut naalaffimmi Jerusalemimiittumi palasiunertut kiffartortumit piukkunnaateqarnerua?

¹⁰ Kristumiut aamma Jesus Kristusimik pitsaanerungaartumik palasiuneqarput. Taassuma Aron siuaasarinngikkaluarpaa, ’Melkizedekili assigalugu’ palasiuneruvoq. (Tussiaat 110:4) Melkizedekip sumit naggueqarnera eqqaaneqanngikkaluarpoq, taannali illoqarfitoqqami Salemimi kunngiullunilu palasiuneruvoq. Taamaattumik siulittuutitigut Jesusimut assersuutaalluarsimavoq, inunnik naammalluinnanngitsunik naggueqarneq tunngaviginagu pingaarnerusumilli, Jehovap uppernarsaanera tunngavigalugu, palasitut ataqqinassuseqartumut. Melkizedek assigalugu Jesus palasiunertuinnanngitsoq aammali kunngitut toqunngisaannartutut kiffartorpoq. — Eprîarit 7:11-21.

¹¹ Palasiuneq Jerusalemip naalaffiani kiffartortoq assiginagu Jesus ukiut tamaasa pilliisariaqanngilaq. Taassuma nammineq inuttut inuunini naammalluinnartoq ataasiaannarluni pilliutigaa. (Eprîarit 7:27) Naalaffimmi pilliutigineqartut tamarmik Jesusip pilliutaanut assersuutaannaapput. Pilliutaata naammalluinnartup upperluartut tamaasa ajortuliaminnik isumakkeerfigineqarluinnarnissaannik periarfissippai. Aamma kajumissinaqaaq atuarlugu Paulus allassimammat palasiuneq taanna tassaasoq Jesus taannaajuartoq kristumiut Jerusalemimiittut nalunngisaat. Maniguulluni, inussiarnerlunilu ’qajannarsutsitsinnik naakkinnissinnaavoq’. (Eprîarit 4:15; 13:8) Kristumiut tanitat taakkua Kristusip ataani palasitut kiffartornissaq qilanaarutigisinnaavaat! Qanoq ilillutik eqqarsaatigisinnaavaat juutiussutsimut ajortunngorsimasumut atatillugu ’kimeqanngitsut amigartullu’ kingumut uterfiginissaat? — Galâsiamiut 4:9.

12, 13. (a) Nigunngisaannarnissamut pissutaasoq alla suna Paulusip eqqaavaa? (b) Sooq hebriiarit kristumiut nikallujuissimanertik kajumississutigisinnaavaat tammarnissamut nigunngisaannarnissaminnut?

¹² Paulusilli hebriiarit suli pissutissaqartippai tammarnissamut nigunngisaannarnissaannut: tassa namminneq nikallujuissimanerat. Ima allappoq: ’Ullulli qaangiuttut eqqaaniarsigik, taamani qaammarsagaalereerlusi naalliullusi sorsungaarneq ilalaarlusi atorassiuk.’ Paulusip eqqaasippai oqaasipiluit annikilliornerillu atoramikkik ’isiginnaartitsivimmi saqqummersinneqartutut’ misigisimasut. Ilaat parnaarussaasimapput; allat misiginneqataallutik parnaarussaasut tapersersortarsimavaat. Aap, uppernikkut nikallujuissutsikkullu maligassaalluarsimapput. (Eprîarit 10:32-34, NV-mi quppernerup ataani ilanngussaq) Sunali pillugu Paulusip eqqaavaa misigisimasat alianartut ’eqqaaniassagaat’? Tamakku nikallunganartuusinnaannginnamik?

¹³ Naamerluinnaq. Hebriiarit ’ullut qaangiuttut eqqaaniarunikkik’ eqqaamassavaat qanoq Jehovamit misilinneqarnermikkut atatinneqarsimallutik. Taassuma ikiuineratigut Satanip saassussinerisa ilarpassui akioreersimavaat. Paulus ima allappoq: ’Guutimi iluaatsuunnginnami sulinersi asanninnersilu aqqa pillugu ileqqorisarsi  puiussanngilai.’ (Eprîarit 6:10) Aap, Jehovap aalajaallutik suliaat tamaasa eqqaamavai; killeqanngitsumik eqqaamannissinnaanermini toqqorpai. Tamatuma eqqaasippaatigut Jesus kajumissaarimmat ’pequutinik qilammi katersueqqulluta’. Pequutit taamaattut tillinneqarsinnaanngillat; oquit manngertornerulluunniit aserorsinnaanngilaat. (Matîuse 6:19-21) Pequutit taamaattut aatsaat aserorneqarsinnaapput kristumiu nigorlunilu tammarpat. Taamaappat qilammi pequutigisaralui tamarmik tammassapputtaaq. Tassami, Paulusip hebriiarit kristumiut pissutissaqartilluarpai nigunngisaannarnissaannut! Sooq ukiorpassuarni aalajaallutik kiffartorsimanerat asuliinnartinneqassava? Nikallujuittuarneq pitsaanerungaassagaluarpoq.

Sooq tammarnissamut nigunngisaannartariaqartugut

14. Kristumiut ukiuni hundredelinni siullerni inuusut assigalugit unamminiarnartut suut atortariaqarpavut?

¹⁴ Ullumikkuttaaq kristumiut nigunngisaannarnissaminnut pissutissaqarluarput. Siullermik eqqaamasariaqarparput pallorfiginninnermut minguitsumut Jehovap tunniussimasaanut peqataasinnaagatta immikkut pisinnaatitaaffiusoq. Kristumiut ukiuni hundredelinni siullerni inuusut assigalugit uaguttaaq misigaarput upperisanut nuannarineqarnerusunut ilaasortat mitallersaraatigut oqaluffissuamik tupinnartut ileqqutoqqamillu pingaakujuutiginerisigut. Jehovalli qularunnaarsippaatigut pallorfiginninnerput iluarigini. Tassami, ullumikkut pilluaqquneqartarpugut kristumiut ukiuni hundredelinni siullerni misigisimanngisaannik. Pilluaqqussutit suut? Kristumiut taakku naalaffiup anersaakkut ittup pilersinneqarnerata nalaani inuupput. Ukiumi 29-mi Kristus kuisikkami naalaffimmi tamatumani palasiunerulerpoq. Kristumiut taakkua ilaasa takuaat Guutip ernera tupinnartuliortoq. Allaat toqunerata kingorna tupinnartuliortoqartarpoq. Siulittuutigineqartutulli tupinnartuliornerit tamakku ukiut ingerlaneranni atorunnaarput. — 1 Korintumiut 13:8.

15. Siulittuut suna ullutsinni eqquukkiartorpa, tamannalu uatsinnut qanoq pingaaruteqarpa?

¹⁵ Uagulli naalaffissamik siulittuutip pingaartup Hesekiel kapitalini 40-mit 48-mut allaatigineqartup pingaarnerusumik eqquutitinneqalernera inuuffigaarput. * Assersuutigalugu Guutip pallorfiginninnermut aaqqissuussaata minguitsup pilerseqqinneqarnera misigisimavarput. Naalaffik anersaakkut ittoq taanna upperisarsiornikkut ajortunngorsimanermit guutipilussiornermillu tamanit minguiarneqarsimavoq. (Hesekiel 43:9; Malaki 3:1-5) Eqqarsaatigiuk minguiarneqarneq tamanna qanoq iluaqutigigipput.

16. Ukiuni hundredelinni siullerni kristumiut allanngoriartorsimaneq alianartoq suna misigaat?

¹⁶ Ukiuni hundredelinni siullerni kristumiut ilagissaasa siunissaat taarpaseqaaq. Jesusip siulittuutigisimavaa narsaatitut qajuusiassanik aammali naatsiiapilunnik siaruarteriffigineqartutut ikkumaartoq, qajuusiassat naatsiiapiluillu immikkoortinneqarsinnaannginngajassasut. (Matîuse 13:24-30) Taamalu pisoqarpoq. Ukiut hundredellit siulliit naalerneranni apustili Johannes utoqqalisimasoq ajortunngornissamut assiaqutitut kingullertut sunniuteqarmat tunussineq siammariartulereersimavoq. (2 Tásalûníkamiut 2:6; 1 Juánase 2:18) Apustilit toqunerata kingunitsiannguani palaseqatigiit immikkut ittut savaatinik naqisimannittut immikkullu atisallit pilersinneqarput. Tunussineq aseruunnertut siammarpoq. Kristumiunut ilumoortunut tamanna takullugu alianaqaaq! Takuaat pallorfiginninnermut  minguitsumut aaqqissuussaaneq pilersinneqaqqammersoq pallorfiginneriaatsimit ajortunngorsimasumit tunuartinneqartoq. Kristusip ilagiinnik pilersitsineraniit ukiut hundredenit ikinnerusut qaangiummata tamanna pisimavoq.

17. Ullumikkut kristumiut ilagiissaat ilagiinnit ukiuni hundredelinni siullerni piusimasunit sivisunerusumik piusimanerat qanoq pingaaruteqarpa?

¹⁷ Tamatumunnga akerliusoq eqqarsaatigiuk. Ullumikkut pallorfiginninneq minguitsoq apustilit inuunerata kiffartorneratalu nalaanni piusimanerminit ukiuni amerlanerusuni pioreersimavoq. Atuagassiap matuma 1879-imi saqqummeqqaarneraniilli manna tikillugu Jehovap pallorfiginninnermik minguitsuunerujartuinnartumik pilluaqqusimavaatigut. 1918-imi Jehovap Kristus Jesusillu naalaffik anersaakkut ittoq minguiarniarlugu iserfigaat. (Malaki 3:1-5) 1919-imiilli Jehova Guutip pallorfiginninnermut aaqqissuussinera minguiarneqariartuaarsimavoq. Biibilip siulittuutaanik najoqqutassiaanillu paasisaqarnerujartorsimavugut. (Ussatit 4:18) Kia tamanna isumagaa? Inuit naammalluinnanngitsut isumagisinnaanngilaat. Jehovap, ernerminik ilagiit niaquattut ivertitsisup, kisimi piffissami ajortunngorsimasumi matumani innuttani illersorsinnaavai. Taamaattumik Jehova qutsaviginngitsoortariaqanngilarput ullumikkut pallorfiginninnermut ilumoortumut peqataasinnaagatta. Aalajangerniartalu tammarnissamut nigunngisaannassalluta!

18. Tammaqqunata nigunngisaannarnissatsinnut sumik pissutissaqarpugut?

¹⁸ Hebriiarit kristumiut assigalugit aamma allamik pissutissaqarpugut qununata nigunngisaannarnissatsinnut — tassa nikallujuissimanerput. Ungasinngitsukkut Jehova kiffartorfigilerutsigu imaluunniit ukiorpassuarni aalajaalluta kiffartorfigereeraluarutsigu, kristumiutut suliniuteqarsimavugut. Ilatta amerlasuut malersorneqarneq, soorlu parnaarussaaneq, inerteqqutit nakuusernerillu atorsimavaat imaluunniit pigisaminnik arsaarneqarlutik. Amerlanerusut ilaquttaminnit assortorneqarsimallutik, mitaatigineqarlutik illaruaatigineqarlutillu sumiginnarneqarsimapput. Tamatta nikallujuilluta Jehova aalajaalluta kiffartorfigiuarsimavarput naak unamminiarnartut misilinneqarnerillu atortariaqaraluarlugit. Taamaaliornitsigut nikallujuippugut Jehovap puiunngisaanik; qilammi pequutinik katersuisimavugut. Taamaattumik aaqqissuussaanitoqqamut ajortunngorsimasumut qimassimasatsinnut uternissamut piffissaanngivippoq. Sooq eqiasuilluta sulisimanerput asuliinnartissavarput? Ingammik maannakkut naggatissaq ’qilannguamik’ nalliussammat taamaappoq. — Eprîarit 10:37.

19. Allaaserisami tulliuttumi suna sammissavarput?

¹⁹ Aalajangerniarta uagut ’nigortut tammarumaartut’ ilagiumanagit! Akerlianik ’uppertut’ ilaginiartigik. (Eprîarit 10:39) Qanoq ililluta qulakkeersinnaavarput uppertunut ilaalluta, qanorlu ililluta uppeqativut taamaaliornissaannut ikiorivut? Allaaserisami tulliuttumi tamanna sammissavarput. (wE 15/12 99)

[Quppernerup ataani ilanngussaq]

Eqqaamavigit?

□ Tammarnissamut nigorneq qanoq paasisariaqarpa?

□ Hebriiarit kristumiut Paulusip allaffigisai qanoq tatineqangaarsimappat?

□ Paulusip hebriiarit nigunngisaannarnissamut sumik pissutissaqartippai?

□ Tammaqqunata nigunngisaannarnissamut aalajangernissatsinnut sunik pissutissaqarpugut?

[Atuaqqissaarnermi apeqqutit]

[Qupp. 15-mi assiliartaq]

Naak Peter inunnut qununermut nakkaannaraluartoq ima paasisariaqanngilaq taanna ’nigortut tammarumaartut ilagigaat’