Nunami eqqissiviitsumi eqqissineq piviusoq nassaaraat

„Upperusiortut nakuusertut ’amiilaarnartuat’ inigisaminit anillassimaaqaaq,“ nalunaarusiami 1969-imeersumi allassimavoq. Tassa taamanikkut Irlandi-avannarlermi eqqissiviilliornerit ulluni makkunani atuuttut aallartimmata.

NAAGGAARTUT katuullillu toqoraasuat — „angutit akerleriit nujuartat“ — politikkikkut upperisarsiornikkullu avissaartuuffiani Irland oqartussaaffigiumallugu sorsunneq sakkortusimmat upperusiortut nakuusernerat toqoraanerallu ullut tamaasa pisarput. Taamanimiilli „ukiuni 30-ngajanni nakuusertoqarnerani inuit 3600-t sinnerlugit toqutaapput, tusindillillu ikiligaallutik,“ The Irish Times-imi allassimavoq.

Sorsunnerat nutaajunngilaq. Irland ukiuni hundredelikkuutaani sorsuffiusimavoq. Ukiuni kingullerni Irland-avannarlermi toqutaasut amerlanerupput, Irlandili tamakkerlugu narrutsannermik saqitsaannermillu sorsunnerup nassataanik inuit inuunerat aserorneqarsimavoq.

Nunami eqqissiviitsumi tamatumani ajornartorsiutaasa piviusumik aaqqiissutissaat Jehovap Nalunaajaasuisa maanna ukiut 100-t sinnerlugit tikkuartarsimavaat. Aaqqiissutissaq tassaavoq Guutip naalagaaffia Jesus Kristusip kunngiuffigisassaa. (Matîuse 6:9, 10) 1969-imi eqqissiviilliornerit aallartimmata Jehovap nalunaajaasui 876-iusimapput. Ullumi 4500-t sinneqarput ilagiinni 100-nit amerlanerusuni. Imminnut sakkutuunngortittunut ilaasimasut suliniutiminnik asoorussisimasut misigisalikkersaarnerat tulliuttumi allaatigineqarput.

„Angisuunngoruma IRA-mut ilaasortanngussaanga!“

Michael * Irlandip Kunngitsuuffiani katuulitut alliartorsimavoq. Atuarfimmi Irlandip oqaluttuarisaanera Tuluit-Nunaannullu ukiuni hundredelikkuutaani akersuuttarnerat pillugit ilinniarsimavoq. Meeraalluni tulunnut „Irlandimiunik naqisimannittunut“ uumissuinini sakkortusiartuaartissimavaa. Qulinik ukioqarluni aanaminut oqarsimavoq: „Angisuunngoruma IRA-mut ilaasortanngussaanga!“ (Irlandimi Republikanerit Sakkutuui). „Isatserujusuarnera ulloq manna tikillugu puigorsinnaanngilara,“ oqaluttuarpoq. Kingusinnerusukkut paasisimavaa aatani Sorsunnersuup Aappaani tuluit sakkutuuinut ilaasimasoq. Aanaavali uini IRA-kkunnit  aallaaneqarluni toqutaaqqunagu saavanut pisimavoq.

Taamaakkaluartoq Michael inersimasunngorami uppeqatini katuullit Irland-avannarlermiittut ikiorusussimavai. „Taamanikkut allaanngilaq Irland-avannarlermi katuullinik ikiuiumallutik iliuuseqartutuaasut tassa IRA,“ oqarpoq. Nallittuisutut isigisani killissutigalugit IRA-mut ilaasortanngorsimavoq sakkunillu atuinermut sungiusarluni. Ikinngutai pingasut Irland-avannarlermi namminneq sakkutuunngortittut ilaannit aallaaneqarput.

Imminnut sakkutuunngortittut saassussineri Michaelip pakatsissutigigaluttuinnarsimavai, imminnullu sakkutuunngortittut assigiinngitsut imminnut akersuunneri narrutsannartut ernumassutigilersimallugit. IRA-mit suliaqartitaalluni inatsisinik unioqqutitsinermini parnaarussaaqqatilluni Guutimut qinusimavoq ataavartumik eqqissinermut naapertuilluarnermullu aqqutissap eqqortup nassaarinissaanut ikioqqulluni. Kingusinnerusukkut Jehovap nalunaajaasuinit angerlarsimaffimmini pulaarneqarpoq. Qangaaniilli paqumiginninnera akornutaasimavoq. Nalunaajaasummi tuluupput. Kaanngartikkuminaatsumik uummissuinerata tusarnaarnissaa ajornakusoortissimavaa. „Amerlanertigut tikilluaqqusanngeqaakka,“ oqarpoq, „taamaakkaluartoq oqaloqatigiumallunga aggertuarsimapput, paasiartuaalersimavaralu politikkikkut inuiaqatigiissutikkullu iluaatsuliortarnerit atuukkunnaartinniarlugit sorsuutigiuarsimasakka Guutip naalagaaffiata nungutilluinnarumaarai.“ — Tussiaat 37:10, 11; 72:12-14.

Piffissarlu pingaartoq nalliussimavoq IRA-p sakkutuuisa naalagaata Michael oqarfigimmagu: „Suliassaqartippatsigit.“ „Misigisimavunga tassa maanna aalajangertariaqassallunga,“ Michael oqarpoq, „naak suli kuisissimanngikkaluarlunga itisuumik ilummut anersaariarlunga oqarfigaara. ’Jehovamut nalunaajaasunngorama.’ Nalunngiinnarparami Jehova kiffartuukkumallugu.“ „Qarmap saavanut inissinneqarlutit aallaaneqartariaqaraluarputit,“ sakkutuut naalagaat akivoq. Qunusaarneqaraluarluni Michalip IRA qimappaa. Qunusuillisinneqarpoq Jehovap oqaasii isummakkut uummatikkullu sunniuteqartikkamigit. „Kingusinnerusukkut nuliara meeqqattalu ilaat Jehovamut tunniulluinnarput. Maanna uummatitsigut ilumoortumik eqqissivugut. Jehovalu qujamasuffigeqaarput sallusuissut ilisarisimagatsigu nunamilu eqqissiviitsumi eqqissinissamik tusarliussamik oqaluusseqataasinnaagatta. — Tussiaat 34:15; 119:165.

Kalluunnaveersaartuuneq ilumut illersuutaavoq

„Irland-avannarlermi Derrymi alliartorsimavunga,“ Patrick oqaluttuarpoq. „Meeraallungali eqqisiviilliornerit kisiisa ilisimavakka. Inuunermut isiginnittaasera eqqarsartaaseralu soorunami misigisannit sunnerneqarsimassaaq.“ Patrick ingasaassisumik pissuseqaleraluttuinnarsimavoq uumissuinermik inuiaassutsimik pingaartitsinermik  tulunnullu paqumisunnermik ineriartortitsisumik. Illua tungeriinni inuit upperisarsiortut kristumiunut malittarisassat tunngaviusut inuullu naleqassusianut najoqqutassiat narrunarsarsimagaat takuaa. Tamatuma kingunerisimavaa Patrickip upperisarsiornerit suulluunnit tunussimammagit guuteqannginneraasunngorsimavoq marxistivissuanngorlunilu. — Naleqqiuguk Matîuse 15:7-9; 23:27, 28.

„Eqqaamasakka siulliit tassaapput Irland-avannarlermi parnaarussat republikaneriusut nerinaveersaarnerat,“ Patrick oqarpoq. „Killitsissutigisimavara. Eqqaamavara Irlandimiut erfalasuat qullarlugu sumilu tamaani iikkani tulunnik akerlilersuillunga allattuisarlunga.15-iinnarnik ukioqarlunga nerinaveersaartut ilaat toqummat ilisaanerani IRA-mut alapernaarsuisuusimavunga.“ Soorlu taamanikkut pikitsitsisoqarnerani amerlasuut akuliussimasut aamma Patrick eqqissiviilliortunut akerliussutsimik takutitseqataasarsimavoq inuiaqatigiinni naapertuilluarneq naligiinnerlu anguniarlugu. Inuiaassutsimik ingasaassisunik ikinngutissarsiortorsimavoq, taakkualu ilarpassui tuluit oqartussaatitaannit parnaarussaatinneqarput.

Patrick nangilluni oqaluttuarpoq: „Aningaasaqarniarneq pissutigalugu piffissap ilaa Tuluit-Nunaanniisimavunga. Tassaniitillunga ikinngutima ilaat qaartartumeerisussatut aallartitaasut politiinit tigusaapput.“ Naak Patrick ingasattumik inuiaassutsimik pingaartitsisuusimagaluarluni pissutsini allanngortikkiartuaarsimavaa. Tulunnut paqumisussimanini itinerusumik tunngavissaqartinnagu takusinnaalersimavaa. „Paasiartuaalersimavara imminnut sakkutuunngortittut suliniutaat ajornartorsiutinik aaqqiissinnaanngivissut, iluaatsuliornerillu uannik erloqisitsisut peersinnaanagit. Imminnut sakkutuunngortittunik aqutsisut akornanni peqquserluttuliornerit naammalluinnanngissutsillu allat amerlavallaarput,“ oqarpoq. — Nalunaajaasup oqaasii 4:1; Jeremia 10:23.

Piffissap ingerlanerani Patrick Irland-avannarlermut uteqqippoq. Oqaluttuarpoq: „Angerlarama ikinngutima ilaasa Jehovap nalunaajaasuinut ilisaritippaanga.“ Jehovap nalunaajaasuinit Biibilimik atuaqqissaaqatigineqarnermini Patrick inuiaat akerleriissutigisartagaannut sorsuunnerannullu aaqqiissussamik piviusumik paasinnikkiartuaarsimavoq. Biibilimit najoqqutareqqusat isummaminut uummatiminullu sunniuteqariartuaartillugit anersaakkut siuariartupallassimavoq. (Evfisumiut 4:20-24) Oqaluttuarpoq: „Innuttaaqatigiit aaqqissuussaanerat maanna atuuttoq uppitinniarlugu pilersaarusiussaarpunga, akerlianilli Biibilip oqariartuutaa eqqissineq pillugu oqaluussissutigalugu allaat siornatigut ornikkusussimanngisaannartakkanni nunaqqatikka loyalistit tikissimallugit. Taamanikkut Belfastimi upperusiortut amerlasuunik toqoraasaleruttormata loyalitsit inuiaassutsimillu pingaartitsisut akornanni biilit assiaqutillit atornagit ingerlaarsinnaasutuaasut tassapput Jehovap nalunaajaasui. Irland-avannarlermi Jehovap nalunaajaasuisa allat paasisimasaattut paasilerpaa, kristumiut siulliit assigalugit kalluunnaveersaartuuneq ilumut illersuutaasoq. (Juánase 17:16; 18:36) Ima oqarluni naggasiivoq: „Eqqissiallannaqaaq ilisimalerlugu Jehovap Jesus Kristus aqqutigalugu inuiannut tamanut naapertuilluarneq piviusoq naqisimanninnermillu aniguisitsineq isumagiumaarai.“ — Jesaja 32:1, 16-18.

„Aallaasikka kisiisa illersuutigaakka“

„Politikkikkut upperisarsiornikkullu avissaartuuffiup nalaani alliartorsimavunga,“ William oqarpoq. „Naaggaartutut katuuliussutsimut tamarmut sakkortuumik paqumisuttarsimavunga uumissuilluinnarsimallungalu. Ajornanngikkaangat katuullit pisiniarfiutaannut iserumasanngilangaluunniit, ataasiaannarlungalu Kunngiitsuuffik Irland tikissimavara. Suliniuteqaqatigiinnut assigiinngitsunut ilaasarsimavunga, taakku ilagaat Orangeordeni — peqatigiiffik naaggaartut upperisaata taakkualu inuunermi naleqartitaasa atatiinnarnissaannik siunertalik.“ William 22-nik ukioqarluni Ulsterip illersornissamut sakkutooqatigiivinut, tuluit sakkutooqatigiivisa ilaannut, ilanngussimavoq. Sakkutooqatigiinnut ilaasut amerlanerit naaggaartuupput. Williamilu kingornussani illersorumallugu toqutsiumaqaaq. „Arlalinnik aallaaseqarsimavunga pisariaqarpallu nangaanngivillunga atorsinnaallugit. Sinikkaangama sakkumik akitsima ataaniititaqartarpunga.“

Inuunerali allanngorpoq. „Illutoqaq nutarsarlugu sanatillugu Jehovap nalunaajaasuanik  suleqateqarsimavunga, paasivaralu Jehovap nalunaajaasui immikkut ittumik pigisaqartut. Suleqatiginera uannut sunniuteqartorujussuusimavoq. Illu suliaritillugu eqqissiviilliornerit, upperisarsiorneq Guutilu pillugit apersussallugu periarfissaqalersimavunga. Akissutaasa paasiuminartut ersarissullu takunnissinnaalertissimavaannga Jehovap nalunaajaasui tassaasut inuit ataasiussuseqartut, nakuusernermik atuinngitsut, politikkimullu kalluunnaveersaartut malunnartumik Guutimut tullermullu asannittut.“ — Juánase 13:34, 35.

William Biibilimik atuaqqissaalerluni qaammatit sisamat qaangiummata upperisarsiornikkut politikkikkullu peqatigiinnit ilaasortaaffigisaminit tamanit tunuarsimavoq. „Uannut alloriarneq angisuujuvoq,“ oqarpoq, „tassami ukiorpassuarni ileqqut malittaralugit pingaartitarisimasakka iperartariaqarsimavakka.“ Sulili sakkortunermik misilinneqarneq nalaassimanngilaa. „Irland-avannarlermi pissutsit pissutigalugit misigisarsimavunga aallaasikka kisiisa illersuutissatuaralugit. IRA-mi imminnut sakkutuunngortittunik ’inatsisinut naapertuuttumik toqutassatut’ isigineqarsimavunga. Taamaattumik aallaasit taakku pigiunnaarnissaat ajornakusoorsimavoq.“ Biibilip ajoqersuutaa soorlu Jesaja 2:2-4-mi allassimasoq eqqarsartaatsinnik allanngortitsiartuaarsimavoq. Takusinnaalersimavaa Jehova piviusumik illersuutissaasoq, soorlu kristumiunut ukiuni hundredelinni siullerni inuusunut illersuutaasimasoq. Taamanili Williamip aallaasini pigiunnaarsimavai.

William oqaluttuarpoq: „Nuannarinerpaasama ilaat tassaavoq inuit siornagut toqumut akeqqatut isigisimasakka maanna qamannga pisumik ataavartumillu ikinngutigilersimagakkit. Aammattaq nuannaarutigeqaara neriuut Biibilimeersoq oqaluussissutigisinnaagakku allaat siornagut angalaarfigisinnaanngisaraluanni. Sallusuissutsip uannut ilaquttannullu sunniuteqarluarsimaneranut Jehova peqatigiissortaalu qujamasuffigiuarusuppakka.“

’Pissutsit siunertaqanngivissut’

Robertip Teresallu tunuliaqutaat assigiinngitsupilussuupput. „Ilaqutariinnit naaggaartuulluartunit pivunga,“ Robert oqarpoq. „Ilaquttama ilaat imminnut sakkutuunngortittunut suliniuteqaqataalluartuusimapput. Uanga nammineq tuluit Ulsterip illersornissamut sakkutooqatigiivinut 19-nik ukioqarlungali ilaalersimavunga. Piffissaq sivisunerusoq Teresap najugaqarfia eqqaalu nakkutigisarisimavara. Unnuit ilaanni nalinginnaasumik nakkutigisartakkannit allaanerusumik suliakkerneqarpunga. Unnuaq taanna biili landroveri angallatissaraluara qaartartumeerneqarpoq. Sakkutuut marluk toqutaapput, allallu marluk ikiligaallutik.“

Robertip isumaliutigisalersimavaa inuuneq sumik siunertaqarnersoq. „Guuti upperiuarsimavara, kisianni Irland-avannarleq qimerlooraangakku pissutsit siunertaqanngitsutut isikkoqartarput. Guutimullu qinusalersimavunga. Qinnuigaara ilumut piuguni inuunera eqqortumik qanoq atussaneriga takuteqqullunga. Eqqaamavara Guutimut oqarlunga upperisarsiorneq ilumoortoq arlaani nassaassaasinnaassasoq!“ Ullut ikittut qaangiummata Robert Jehovap nalunaajaasuinik pulaarneqarpoq atuagassianillu tunineqarluni. Unnuk taanna Robert sakkutuutut angalaareerluni unnuaroraa angerlarami atuagassiat atualerpai aatsaallu ullaakkut tallimanut atuarlugit naavai. „Ingerlaannaq paasivara sallusuissutaasoq,“ oqarpoq, „takusinnaavaralu imarisai tamarmik Biibilimut toqqaannartumik tunngaveqartut.“ (2 Timûtiuse 3:16) Biibililu misissulerpaa, sivitsunngitsorlu inuunini Guutimut tunniulluinnarlugu.

„Nalunaajaasut tamatigut Biibili innersuussutigisarpaat“

Akerlianilli Teresa katuuliussutsimik tunuliaqutaqarpoq ingasattumillu inuiaassutsimik pingaartitsisuulluni. Oqaluttuarpoq: „Niviarsiaallunga Sinn Féin-imut * ilaasortaasimavunga.“ Teresa nassuerpoq: „Taamaalillunga imminnut sakkutuunngortittut suliniutaannik tapersersuisimavunga. Sakkutuut sorsunnermi atortussanut akissaannik katersuiniaqataasarlunga. IRA-mut nalunaartartuusimavunga nunaqqatima akornanni qanoq pisoqartarnersoq. Perulluliornerit peqataaffigisarsimavakka politiinut sakkutuunullu ujaqqanik millooqataasarsimallunga.“

Teresap ilaqutaasa ilaat Jehovap nalunaajaasuinit Biibilimik atuaqqissaaqatigineqalermat  namminertaaq alapernaalersimavoq. Guutip oqaasiata pissaanera Teresamut assut sunniuteqalersimavoq. Nalunaajaasut tamatigut apeqqutivut Biibili innersuussutigalugu akisarpaat,“ oqarpoq. „Daniel 2:44-mi neriorsuutip isikka uisissimavai. Takusinnaalersimavara Guutip naalagaaffia tassaasoq iluaatsuliornernut tamanut sorsuutigiuarsimasannut nungutitsisussaq.“ Imminnut sakkutuunngortittut assigiinngitsut peqqarniitsuliortarnerat uumigigaluttuinnarsimavaa. Assersuutigalugu sakkutuut inuillu allat peqqarniitsuliornikkut toqutsisarnerat, ikiliisarnerat imaluunniit ilaqutariinnik aliasutitsisarnerat pillugit nutaarsiassat inunnit nallittuisunit piitaajuitsunillu qanoq qiimmattaatigineqarsinnaasoq Teresap paasisinnaanngilaa. Aammattaaq Biibilip sallusuissutaanut Teresa qisuariarpoq eqqarsartaatsinilu Guutip najoqqutareqqusaanut saatsillugu. Inuunini Jehovamut tunniuppaa sivitsunngitsorlu kuisissimalluni. — Ussatit 2:1-5, 10-14.

Teresap Irland-avannarlermi Jehovap Nalunaajaasuisa ilagiivini Robert naapissimavaa. Oqarpoq: „Siullerpaamik Robert naapikkakku paasiuminaatsippara ungasinngitsoq tikillugu tuluit sorsunnermut sakkuisa ilaattut isigisimasara maanna eqqissivillunga oqaloqatigisinnaalersimagakku. Uumissuinermik paqumisunnermilu misigissutsit peerneqarsinnaanngitsutut issimasut maanna Guutip oqaasia ikiortigalugu peerneqarsimapput.“ Robertilu arlalinnik soqutigisaqaqatigiillutik misigipput uumissuinermik paqumisunnermillu ileqqutoqqat kulturillu assigiinngitsut aallaavigisaannik avissaartinneqarunnaarsimallutik. Annermik ataqatigiinnerulersitsisoq tassaavoq Jehova Guutimut asanninnerat. Katipput maannalu suleqatigiillutik nunami eqqissiviitsumi inunnut assigiinngeqisunik tunuliaqutalinnut upperisalinnullu eqqissineq piviusoq Guutimit pisoq oqaluussissutigalugu.

Irlandimi allat assingusumik misigisaqarput. Guutip oqaasiata isumassarsiarititaasup tusarnaarneratigut inuit ’ilisimaqqissaarniutitigut salloqittaatitigullu piunngitsutigut’ ajoqersuutiginiagaannit qimarratiginninnipput. (Kulorsamiut 2:8) Maanna Guutip neriorsuutaanut Biibilimi allassimasunut tamakkiisumik tunaarinnipput. Nuannaarutigaat tusarumasut tamarmik siunissamik eqqissinermik neriuummik pissarseqataatissinnaagamikkik — siunissamik upperusiortut peqqarniisaarnerinik inissaqartitsinngitsumik. — Jesaja 11:6-9. (wE 15/12 99)

[Quppernerup ataani ilanngussat]

[Qupp. 10-mi assiliartaq]

Imminnut sakkutuunngortittut sorsunnerat Irland-avannarleq tamakkerlugu iikkani nersorneqartarpoq