Uppertut ilagilisigut

’Uppertut tarnimikkut annakkumaartut ilagaatigut.’ — EPRÎARIT 10:39.

1. Sooq oqarsinnaavugut Jehovap kiffaasa tamarmik immikkut uppernerat naleqangaartoq?

TULLIANIK Naalagaaffilersaarfimmi Jehovamik pallorfiginnittut akornanniikkuit qinerniarit. Eqqarsaatigiuk najuuttut assigiinngitsutigut uppernertik qanoq ersersittaraat. Takuatit qatanngutit utoqqalisut ukiuni qulikkaani Jehovamut kiffartorsimasut, inuusuttut ullut tamaasa ilagisartakkaminnit tatineqarnermik atugaqartariaqartut, angajoqqaallu ilungersuussillutik meeqqaminnik Guutimik mianerinninnermik ilinniartitsisartut. Utoqqaanertat ilagiinnilu kiffartortut akisussaassusillit takuatit. Aap, takuatit qatanngutit anersaakkut ittut assigiinngitsunik utoqqassusillit Jehova kiffartorfiginiarlugu akornutinik assigiinngitsorpassuarnik atuisariaqartut. Tamarmillu uppissusiat naleqangaarpoq! — 1 Pîtruse 1:7.

2. Sooq Paulusip Eprîarinut agdlagkat, kapitali 10-mi 11-milu unnersuussutai ullumikkut iluaqutigisinnaavavut?

² Inuit naammalluinnanngitsut ikittuinnaat apustili Paulusitut paasilluartigisimavaat upperneq qanoq pingaaruteqartigisoq. Allassimavoq upperneq piviusoq uppertup ’tarnikkut annakkumaarneranik’ kinguneqartoq. (Eprîarit 10:39) Paulusip nalunngilaattaaq silarsuarmi uppinngitsumi matumani upperneq saassunneqarsinnaasoq qajannarsisinneqarlunilu. Hebriiarit kristumiut Jerusalemimiittut Judæamiittullu uppernerminnik aalajangiussiniartut isumakuluutigeqai. Maannakkut Eprîarinut agdlagkat-ni kapitali 10-p 11-llu ilaat misissortillugit maluginiartigu Paulusip qanoq ililluni uppernerat ineriartortikkaa. Tamatuma ilinniartissinnaavaatigut qanoq ililluta immitsinni allanilu upperneq aalajaannerusoq ineriartortissinnaagipput.

Takutiguk allat tatigigitit

3. Paulusip Eprîarit 10:39-mi allassimasaata qanoq takutippaa qatanngutini tatigigai?

³ Siullermik immaqa malugissavarput Paulusip atuartuni isumalluarnartumik isumaqarfigigai. Ima allappoq: ’Uagulli nigortut tammarumaartut ilaginngilaatigut, uppertulli tarnimikkut annakkumaartut ilagaatigut.’ (Eprîarit 10:39) Paulusip uppeqatini taamaallaat ajunnginnerpaamik isumaqarfigai. Malugiuttaaq allassimasoq ’uagut’. Paulus naapertuilluartuuvoq, atuartunili ammut isiginngilai isumaqarlunilusooq taakkunannga qutsinnerusumik naapertuilluarnerusumillu inissisimaffeqarluni. (Naleqqiuguk Nalunaajaasup oqaasii 7:16.) Akerlianik nammineq taakkununnga naligitippoq. Tatigaa nammineq atuartumilu kristumiut aalajaatsut unamminiarnartut annilaanganartut takkukkumaartut anigorsinnaagitik, sapiillutik tammaratik nigunngisaannassasut uppertullu ilagissagaat.

4. Suut pissutigalugit Paulusip uppeqatini tatigai?

⁴ Sooq Paulus taama tatiginnitsigisinnaava? Naluaa hebriiarit kristumiut kukkusartut? Naamik. Sukumiisumik ilitsersorpai anersaakkut sanngiissutiminnik ajugaaffiginninnissaannut ikiorniarlugit. (Eprîarit 3:12; 5:12-14; 6:4-6; 10:26, 27; 12:5) Taamaattorli Paulus minnerpaamik marlunnik pissutissaqarluarpoq qatanngutiminik tatiginninnissaminut.  (1) Jehova ilaartarpaa Guutillu kiffai taassumatut isigisariniarlugit. Kukkuneri kisiisa pinnagit, ammali ajunngitsumik pissusii siunissamilu ajunngitsumik naammassinnissinnaanerat eqqarsaatigalugit, taassumatut isiginnittaaseqarpoq. (Tussiaat 130:3; Evfisumiut 5:1) (2) Paulusip anersaap illernartup pissaanera upperilluinnarpaa. Nalunngilaa akornutit inuttullu sanngiissutit suulluunniit akornutiginagit Jehovap ’pissaaneq angingaartoq’ imminut aalajaallutik kiffartortunut tunniussinnaagaa. (2 Korintumiut 4:7; Filípimiut 4:13) Taamaattumik Paulusip qatanngutiminut tatiginninnera naleqqulluartuuvoq, piviusorsiortuulluni ingasappallaarnanilu. Biibilimik tunngaveqarluarpoq.

5. Uagut qanoq ililluta Paulus tatiginninneratigut malinniarsinnaavarput, taamaaliornerlu qanoq kinguneqassava?

⁵ Paulusip tatiginninnera aamma allanut sunniuteqarpoq. Jerusalemimi Judæamilu ilagiinnut pingaaruteqarpoq Paulusip taama kajumissinartigisumik allaffigimmatik. Oqaasii ikiortigalugit hebriiarit kristumiut, assortuisunit juutiusunit mitaatigineqarlutillu ammut isigineqartartut, uummatimikkut aalajangerluinnarsinnaavaat uppertunut ilaaniarnissartik. Uaguttaaq ullumikkut taamaalioqatigiissinnaavugut? Allat kukkuneri pissusiilu eqqumiitsut takujuminarnerusarput. (Matîuse 7:1-5) Ikioqatigiilluarnerusinnaavugulli allat uppissusiat malugalugulu pingaartikkutsigu. Taamaalilluta kajumissaaqatigiikkutta uppissutsikkut ineriartornissarput ilimanarneroqaaq. — Rûmamiut 1:11, 12.

Guutip oqaasia atorluartaruk

6. Eprîarit 10:38-mi allassimasoq sumit issuagaava?

⁶ Paulusip aamma atuartartut uppissusiat ineriartortippaa Allakkat atorluartaramigit. Assersuutigalugu ima allassimavoq: ’„Iluartorli uppernikkut inuussavoq“, „nigorpalli tarnima nuannarissanngilaa“.’ (Eprîarit 10:38) Paulusip tassani pruffiiti Habakkuk issuarpaa. * Paulusip atuartuisa, hebriiarit kristumiut pruffiitit allassimasaannik ilisimannittut, qularnanngitsumik allassimaffiit tamakku nalunngilaat. Eqqarsaatigigaanni Paulusip suna siunertarigaa — kristumiut ukiup 61-ip missaani Jerusalemimi eqqaanilu inuusut uppernikkut nakussatsinneqarnissaat — naleqqulluartuuvoq Habakkuk issuarmagu. Sooq?

7. Habakkukip siulittuutini qanga allappaa, taamanilu pissutsit suut Judakkut atugaraat?

⁷ Habakkukip ukiut 20-t missaat Jerusalemip ukiumi 607-imi u.n.s. piuneerussaanerata siorna allakkani allakkunarpai. Pruffiitip takorruuisitaalluni takuai Kaldæamiut (Babylonimiut), ’inuiaat sukannersut periataartartut’, Judap nunaanut saassussisut Jerusalemilu piuneerulluinnarlugu tamannalu ilutigalugu inuiaqatigiit ajugaaffigalugit. (Habakkuk 1:5-11) Ajunaarnersuarli tamanna ukiut hundredet sinnerlugit tamatuma siorna Esajasip nalaanili siulittuutigineqareersimavoq. Habakkukip nalaani Jojakimip Josias ajunngitsoq kunngitut kingoraarpaa, Judamilu guutiitsuuneq atugaangaaqqilerpoq. Jehovap aqqani oqaluussisut Jojakimip malersortippai allaallu toqutsillugit. (2 Israelikkut 36:5; Jeremia 22:17; 26:20-24) Tupinnanngilaq pruffiiti Habakkuk erloqisitaalluni nillermat: „[Jehova], qanoq sivisuutigisumik?“ — Habakkuk 1:2.

8. Habakkukip maligassiaa kristumiunut ukiuni hundredelinni siullerni ullumikkullu inuusunut qanoq kajumississutaava?

 ⁸ Habakkukip naluaa Jerusalemip aserugaanissaa qanoq qanillitigisimasoq. Ukiuni hundredelinni siullerni kristumiut naluaat aaqqissuussaaneq juutit atugaat qaqugu naassasoq. Ullumikkuttaaq naluarput Jehovap aaqqissuussaanermut ajortumut maanna atuuttumut eqqartuussinissaanut ’ullussaq ullulluunniit qanoq ilinissaa’ qaqugu nalliutissasoq. (Matîuse 24:36) Taamaattumik Jehovap Habakkukimut akissutaa marlunnik immikkoortortalik malugisariaqarparput. Siullermik pruffiiti neriorsoqqissaarpaa naggatissaq piffissaminut nalliutissasoq. „Eqquutinngitsuussanngilaq!“ Guuti oqarpoq; immaqali inuit isaanni kingusinaartutut issinnaagaluarpoq. (Habakkuk 2:3) Aappassaanik Jehovap Habakkuk ima eqqaasippaa: „Iluartoq inuussaaq unneqqarissutsimigut.“ (Habakkuk 2:4) Tassaapput paasissutissat ilumoortut ersarissullu. Naggatissap qaqugu nalliunnissaa pingaarnerpaanngilaq, uagulli aalajaattuarnersugut pingaaruteqarpoq.

9. Jehovap kiffai naalattut qanoq ilillutik ’unneqqarissutsimikkut inuusinnaasimappat’ (a) ukiumi 607-imi u.n.s? (b) ukiup 66-ip u.n.k. kingorna? (c) Sooq uppernikkut nakussatsinneqarnissarput pingaaruteqarluinnarpa?

⁹ 607-imi u.n.s. Jerusalem aserorneqarmat Rekabikkut ilumoortut, Ebed-Melekip, Jeremiasip taassumalu allatsiata, Barukip, takuaat Jehovap Habakkukimut neriorsuutaa naammassineqartoq. Aserornermit annilaanganartumit aniguipput. Sooq? Jehovap aalajaannerat pillugu akileramigit. (Jeremia 35:1-19; 39:15-18; 43:4-7; 45:1-5) Tamatumunnga assingusumik hebriiarit kristumiut ukiuni hundredelinni siullerni inuusut Paulusip unnersuussutaa maleruarsimassavaat, Romamiummi sakkutorpassuisa ukiumi 66-imi Jerusalem saassummassuk, kristumiut taakku Jesusip mianersoqqussutaa maleqqissaarlugu qimaapput. (Lúkarse 21:20, 21) Aalajaannerat aniguinermik kinguneqarpoq. Uaguttaaq aalajaakkutta naggatissaq nalliuppat aniguisinnaavugut. Taamaattumik pissutissaqarluarpugut maannakkut aalajaatsumik uppissuseqarneq noqqaassutigissallugu!

Upperluartut allaatigineqarluarput

10. Paulusip Mosesip uppernera qanoq allaatigaa, uagullu qanoq ililluta Moses tamatumani malinniarsinnaavarput?

¹⁰ Paulusip aamma atuartumi uppissusiat nakussatsippaa maligassaalluartut eqqartoramigit. Malugiuk Eprîarit kapitali 11-mi Biibilip inuttai qanoq allaatigineqarluartigisut. Assersuutigalugu allappoq Mosesip ’takussaanngitsoq isigalugulusooq iperarnaveersaaraa’. (Eprîarit 11:27) Allatut oqaatigalugu Jehova Mosesimut ima piviusuutigaaq Guuti takussaanngitsoq isigisinnaallugulusooq. Uagut aamma taama oqaatigineqarsinnaanerpugut? Jehovamut attaveqarneq eqqartussallugu piuminaraluarpoq, attaveqarnerli tamanna ineriartortillugulu nakussatsissagaanni suliniuteqartoqartariaqarpoq. Suliniuteqanngitsoortariaqanngilagut! Jehova uatsinnut ima piviusuutigiva aalajangigassaqaraangatta, aamma pingaarpasinngitsunik, taanna eqqarsaatigalutigu? Taama uppissuseqarluartigigutta allaat malersorneqarnikkut sualunnerpaakkut nikallujuissinnaassaagut.

11, 12. (a) Enok immaqa qanoq ililluni uppernikkut misilinneqarsimava? (b) Enok qanoq ililluni kajumissinartumik akilerneqarsimava?

¹¹ Aamma Enokip uppissusia eqqarsaatigiuk. Taassuma assortorneqangaarsimanera takorlooruminaassinnaavoq. Guutiitsunut taamani inuusunut assuarinnittumik eqqartuussinissamik tusarliussaq oqaluussissutigisariaqarsimavaa. (Jûtarse 14, 15) Angut aalajaatsoq taanna ima naakkittaatsigisumik nakuuserfiginnitsigisumillu malersorneqarmat Jehovap ’tiguaa’, ima paasillugu Enok toqunikkut sinitsikkaa akeqqanit  tiguneqartinnagu. Tamatumanngali pitsaanerusumik aammattaaq tunineqarpoq. — Eprîarit 11:5; 1 Moses 5:22-24.

¹² Paulus ima nassuiaavoq: ’[Enok] nuutsinneqanngikkallartilluni nersorneqarpoq Guutip iluarigaani.’ (Eprîarit 11:5) Tamanna qanoq paasisariaqarpa? Imaassinnaavoq Enok toqunngikkallartilluni takorruugaqartoq, immaqa nunarsuarmi paaratiisissamik inuuffigiumaakkaminik. Qanorluunniit pisoqarsimagaluarpat Jehovap Enok paasitippaa aalajaannera Guutimit iluarineqartoq. Enokip Jehovap uummataa nuannaartissimavaa. (Naleqqiuguk Ussatit 27:11.) Enokip inuunera eqqarsaatigalugu killinnaqaaq. Illittaaq aalajaallutit inoorusuppit? Taava maligassiat eqqaaneqartut eqqarsaatigikkit; inuttut piviusutut takorlooriarikkit. Upperlutit aalajaallutillu ullut tamaasa inuuniarit. Eqqaamajuttaaq uppertut Jehovap piffissami aalajangersimasumi neriorsuutiminik tamanik eqquutitsinissaa tunngavigiinnarlugu kiffartorfiginngikkaat. Aalajangerluinnarpugut Jehova naassaanngitsumik kiffartuutissallugu! Tassaavoq inooriaaseq pitsaanerpaaq, pissutsinik aaqqissuussaanermi matumani siunissamilu.

Aalajaatsumik uppissuseqarneq qanoq ineriartortinneqartoq

13, 14. (a) Paulusip Eprîarit 10:24, 25-mi oqaaserisai maleruarutsigik ataatsimiinnerit qanoq nuannaarutiginerusinnaavavut? (b) Kristumiut ataatsimiinneri pingaartumik sumik siunertaqarpat?

¹³ Paulusip eqqartorpaa hebriiarit kristumiut qanoq ilillutik assigiinngitsutigut uppernertik nakussatsissinnaagaat. Periaatsit ilaat marluk misissoriartigik. Nalunngilarput Eprîarit 10:24, 25-mi kajumissaarneqartugut kristumiut ataatsimiinnerinut aalajangersimasumik najuuttaqqulluta. Malugiulli Paulusip oqaasiisa isumassarsiarititaasut takutinngikkaat allamik iliuuseqarata ataatsimiinnerit najuuffigiinnassagivut. Paulusip  takutippaa ataatsimiinnerni periarfissaqartugut ilisareqatigiinnissatsinnut, kaammattoqatigiinnissatsinnut Guutimullu kiffartornerunissamut kajumissaaqatigiinnissatsinnut. Tunisinissaq siunertaralugu, tigusinissaq siunertariinnarnagu, aggertarpugut. Taamaaliorutta ataatsimiigiartarnerput nuannaarutiginerussavarput. — apustilit suliait 20:35.

¹⁴ Kristumiut ataatsimiinneri najuffigisarpavut pingaartumik Jehova Guuti pallorfigerusullugu. Taamaaliorsinnaavugut qinuneq erinarsoqatigiinnerlu peqataaffigalugit, tusarnaaqqissaarluta aammalu ’qarlut anitaannik’ pilliuteqarluta — ima paasisariaqarpoq Jehova unnersiutigigipput akeqataasarluta ataatsimiinnerillu peqataaffigalugit. (Eprîarit 13:15) Tamakkuninnga anguniagaqarutta ataatsimiinnernilu tamani tamakku noqqaassutigalugit, uppernikkut nakussatsinneqassaagut.

15. Sooq Paulusip hebriiarit kristumiut kajumissaarpai kiffartornertik aalajangiuteqqullugu, sunalu pillugu unnersuussineq tamanna ullumikkuttaaq naleqqulluartuua?

¹⁵ Uppernerput oqaluussisarnitsiguttaaq nakussatsinneqarsinnaavoq. Paulus ima allappoq: ’Aalajangiunniartigu neriugisarput qularnaatsumik nassuerutigalugu, ilumoormat unnersuisoq.’ (Eprîarit 10:23) Allat unittuulersut takugutsigik nikallujuinnissaannut kajumissaarniartariaqarpavut. Qularutissaanngilaq Satanip hebriiarit kristumiut kiffartorunnaarnissaannut tatiniarsarigai, soorluttaaq ullumikkut Guutip innuttai tatisarai. Tatineqarutta qanoq iliussaagut? Paulus qanoq iliortoq eqqarsaatigiuk.

16, 17. (a) Paulus qanoq ililluni oqaluussinissaminut sapiillisimava? (b) Kristumiutut kiffartorneriaatsit ilaat nangaassutigigutsigu qanoq iliortariaqarpugut?

¹⁶ Kristumiut Thessalonikamiittut Paulusip ima allaffigai: ’Kisianni siornagut Filippimi anniartitaallutalu asissugaagatta, soorlumi ilisimasusi, taamaattoq Guutitsigut ersisuerluta Guutip iivangkiiliua ilissinnut assoruungaarluta oqaluutigiartorparput.’ (1 Tásalûníkamiut 2:2) Paulus suleqataalu qanoq ilillutik Filippimi ’anniartitaallutillu asissugaappat’? Biibilimik misissuisartut ilaat naapertorlugit griikerit oqaasiat Paulusip tamaani atugaa isumaqarsinnaavoq narrunarsaataasumik, kanngunartumik mamianartumillu iliorfiginninneq. Filippimi oqartussaasut Paulusikkut anaatamik unatartippaat, parnaarussaatillugillu kiggitsivimmut kiggisillugit. (apustilit suliait 16:16-24) Paulusip naakkittaatsuliorfigineqarnini qanoq qisuariarfigaa? Ajoqersuiartorluni angalanermini illoqarfik tulliuttoq, Thessalonika, tikikkamiuk qunullunilu mianersorpa? Naamik, ’ersisuerpoq’. Qununini ajugaaffigaa, nikallujuillunilu oqaluussiuarpoq.

¹⁷ Paulusip nakimaatsuunini sumit piva? Imminit? Naamik. Oqarpoq ’Guutitsigut’ ersisuerluni. Biibilimik nutserisunut qinerlerfissiami nassuiarneqarpoq oqaatsit taakku isumaqarsinnaasut „Guutip ersineq uummatitsinnit peerpaa“. Oqaluussinermi nakimaatsutut misiginngikkuit oqaluusseriaatsiniluunniit aalajangersimasuni peqataarusuppallaarnatit, soormi Jehova qinnuigigukku ilinnut taamaalioqqullugu? Qinnuigiuk qununeq uummatinnit peeqqullugu. Qinnuigiuk oqaluussinissannut sapiissuseqarteqqullutit. Namminerlu iliuuseqarit. Assersuutigalugu alla oqaluusseriaatsimut illit ersissutigisannut sapinngitsoq oqaluusseqatigissallugu isumaqatigiissuteqarfigiuk. Tassaasinnaavoq pisiniarfinni, aqqusinermi imaluunniit torrutiinnarlugu telefonikkulluunniit oqaluussineq. Oqaluusseqativit aallarniutigalugu takutissinnaavaatit nammineq qanoq iliortarluni. Kingorna illit nammineq sapiillutit misilittariaqarpat.

18. Oqaluussinissamut sapiilligutta qanoq pilluaqquneqassaagut?

¹⁸ Eqqarsaatigiuk sapiillileruit qanoq kinguneqarsinnaasoq.  Nikallujuikkuit taamaatitsinngikkuillu, qularnanngitsumik misiginngitsoorsinnaasaraluannik oqaluussinermi misilittagaqarlualissaatit. (Takuuk qupperneq 26.) Nalerisimaarlutit misigissaatit Jehova nuannaartillugu artornartitannik iliuuseqarsimagavit. Taassuma pilluaqqusinera qununerpillu ajugaaffiginissaanut ikiuinera misigiumaarpat. Uppernikkut nakussatsinneqassaatit. Tassami, allat uppernikkut ineriartortikkutsigik namminertaaq uppernitsigut nakussatsinneqassaagut. — Jûtarse 20, 21.

19. ’Uppertut’ qanoq nuannerluinnartumik akilerneqarumaarpat?

¹⁹ Taamaattumik aalajangerniarit nammineq allallu uppernikkut nakussatsinneqarnissarsi sulissutigiumallugu. Taamaaliorsinnaavutit Guutip oqaasia atorlugu nammineq allanillu ineriartortitsinikkut, upperluartut Biibilimi eqqaaneqartut eqqarsaatigalugit, inuttut ilumut inuusimasutut isigalugit, kristumiut ataatsimiinnerinut piareersarlutit peqataasarlutillu, taavalu immikkut pisinnaatitaaffipput oqaluussineq aalajangiulluinnarlugu. Taamaalioruit qularissanngilat ’uppertut ilagigaatsit’. Puigussanngilat inuit taamaattut nuannerluinnartumik akilerneqassasut. Taakku ’tarnimikkut annakkumaarput’. * Qanortoq illit uppernikkut aalajaattuarit, Jehova Guutillu naassaanngitsumik inuutillisit! (wE 15/12 99)

[Quppernerup ataani ilanngussat]

Qanoq akissavit?

□ Paulusip qanoq takutippaa hebriiarit kristumiut tatigigini, uagullu tamanna qanoq ilinniutigisinnaavarput?

□ Sooq naleqqulluartuua Paulusip pruffiiti Habakkuk innersuutigimmagu?

□ Upperluartut kikkut Biibilimi eqqaaneqartut Paulusip allaatigilluarsimavai?

□ Uppernikkut ineriartortitsissagaanni qanoq iliornissaq Paulusip siunnersuutigaa?

[Atuaqqissaarnermi apeqqutit]

[Qupp. 23-mi assiliartaq]

Filippimi narrunarsaataasumik iliorfigineqarami Paulus sapiillilluni oqaluussiuarpoq

[Qupp. 25-mi assiliartaq]

Illit sapiillillutit oqaluusseriaatsit assigiinngitsut misilissinnaavigit?