Jehova kingusinaarnavianngilaq
Jehova kingusinaarnavianngilaq
„Takorluukkammi . . . Nalliutiaanngikkaluarpat utaqqiinnarina, eqquutinngitsoorani piviusunngorumaarmat.“ — HABAKKUK 2:3.
1. Jehovap kiffai sumik aalajangiussaqarpat, taamaattumillu qanoq iliorpat?
„ALAPERNAARSUISSAANGA.“ Guutip pruffiitia Habakkuk aalajangersimarpalulluni taama oqarpoq. (Habakkuk 2:1) Ukiut 1900-kkut ingerlaneranni Jehovap kiffai aamma taama aalajangersimatigipput. 1922-mi ataatsimeersuarnermi pingaarutilimmi kajumissaarutigineqartoq manna ilungersuussillutik maleruarsimavaat: „Maannakkut oqaluttuarisaanerup pingaarnerpaaffiani inuuvugut. Ata, kunngi naalakkersuivoq! Ilissi oqariartortigaasi. Taamaattumik kunngi taassumalu naalagaaffia oqaluussissutigisigik, oqaluussissutigisigik, oqaluussissutigisigik.“
2. Sorsunnersuup siulliup kingorna tanitat suliniuteqarluarnissamut makiteqqitaagamik qanoq oqarsinnaasimappat?
2 Sorsunnersuup siulliup kingorna Jehovap tanitat ilumoortut sinneruttut suliniuteqarluarnissamut makiteqqippai. Habakkukitut tamarmik immikkut ima oqarsinnaasimapput: „Alapernaarsuiffimmut qaqissaanga qinerlungalu takuniarlugu Guutip qanoq oqarfigissaneraanga.“ Hebriiarit oqaasiat ’qinernermik’ imaluunniit ’aalapernaarsuinermik’ nutserneqartoq siulittuutini arlalinni atorneqarpoq.
„Eqquutinngitsuussanngilaq“
3. Sooq eqqumallutalu mianersortariaqarpugut?
3 Ullumikkut Jehovap nalunaajaasuisa mianersoqqussut oqaluussissutigigaangamikku Jesusip siulittuutaani pingaartumi oqaatsit kingulliit eqqaamajuartariaqarpaat: ’Taamaattumik eqqumagitsi, illup naalagaata tikiuffissaa nalugassiuk, unnukkulluunniit unnuap qeqqagulluunniit marloraalluunniit angutiviartaata qarlorfiagut ullaakkulluunniit tikiukkumaarnersoq; tassanngaannaq tikiulluni sinittusi naapeqinavaasi. Ilissinnulli oqaaserisara tamanut oqaaseraara: eqqumagitsi.’ (Mákorse 13:35-37) Habakkukitut Jesusillu oqaasii malillugit eqqumajuartariaqarpugut.
4. Qanoq ililluta Habakkukip ukiumi 628-mi u.n.s. atugaanut assingusumik atugaqarpugut?
4 Habakkukip allakkani ukiup 628-p u.n.s. missaani naammassisimagunarpai, Babylon naalagaaffissuartut nuimanerulinngikkallarmat. Jehovap Jerusalem tunussisimasoq pillugu eqqartuussutaa ukiuni arlalinni oqaluussissutigineqareersimavoq, sulili eqqartuussinerup tamatuma qaqugu naammassineqarnissaanik takussutissaqanngilaq. Kia ilimagaa ukiut 21-innaat tamatuma kingorna nalliutissasoq, Babylonilu Jehovap eqqartuussutaanik naammassinnittuussasoq? Uaguttaaq ullumikkut aaqqissuussaanerup maanna atuuttup naggatissaata ’ullua ullulluunniit qanoq ilinera’ ilisimanngilarput. Jesusilli ima mianersoqquaatigut: ’Taamaattumik ilississaaq piareersimaniaritsi, Inuup Ernera ilimasuffiginngisassigut tikiussammat.’ — Matîuse 24:36, 44.
5. Habakkuk 2:2, 3-mi Guuti qanoq kajumissinartunik oqaaseqarpa?
5 Jehovap pissutissaqarluarluni Habakkuk kajumissaarlugu ima peqquaa: „Takorluukkat erseqqissumik allaguk allaffissianut, ajornanngitsumik atuarneqarsinnaaniassammat. Takorluukkammi suli eqquutinngilaq eqquuffissaali qanillivoq, eqquutinngitsuussanngilaq!“ (Habakkuk 2:2, 3) Ullumikkut ajussutsip nakuusernerullu atugaanerujartuinnarnerata ersersippaa ’Jehovap ullussaata pingaaqisup siooranangaaqisullu’ nalliutinngitsiarnerani inuusugut. (Joel 3:4) Taamaattumik Jehovap nammineq oqaaserisaa manna qiimmaallannaqaaq:: „Eqquutinngitsuussanngilaq.“
6. Qanoq ililluta eqqartuussilerneq anigorsinnaavarput?
6 Qanoq ililluta eqqartuussineq qanittukkut naammassineqartussaq anigorsinnaavarput? Jehova iluartut iluaatsunut naleqqiullugit akivoq: „Isumaatsoq iluarsuseqanngilaq, iluartorli inuussaaq unneqqarissutsimigut.“ (Habakkuk 2:4) Naalakkersuisut inuiaqatigiillu pingaarniartut piumatuullu ukiut ingerlaneranni inuit millionilikkuutaat pisuussuteqanngitsut aavi kuisimavaat, ingammik sorsunnersuarni marlunni aamma naggueqatigiit akersuunnerini. Akerlianik Guutip kiffai tanitaasut eqqissinermik nuannarisallit aalajaattuarsimapput. Tassaapput „inuiaat iluartut ilumoornermik aalajangiussisut“. Inuiaat taakkua suleqataasalu, ’savat allat’, tamarmik peqqussut manna maleruarpaat: „[Jehova] tatigisiuk soraajuitsumik, [Jehova] qaarsuummat ataavartussaq.“ — Jesaja 26:2-4; Juánase 10:16.
7. Qanoq ililluta takutissinnaavarput Habakkuk 2:4-p ilinniutissartaa Paulusip eqqartugaa ilumut paasisimagipput?
7 Hebriiarinut allakkamini apustili Paulusip Habakkuk 2:4 issuarlugu, Jehovap innuttai allaffigai: ’Ilalaarnermi ilissinnut atoriaqarpoq, Guutip peqqusaa naammassisimallugu unnersuutigisaq pigileqqullusiuk; qilannguamimmi aggersussaq aggerumaarpoq mulussananilu. Iluartorli uppernikkut inuussavoq, nigorpalli tarnima nuannarissanngilaa.’ (Eprîarit 10:36-38) Uniinnarnissamut imaluunniit nunap piinik pingaartitsinermit nuannaarniutileritunermillu Satanip silarsuaata ilisarnaatigisaanit sunnerneqarnissamut piffissaanngilaq. Piffissaarutsinnata qanoq iliortariaqarpugut? Inuiaqatigiinnut Jehovap pigisaanut ilaagatta Paulusitut ’siunitsinniittut isattorlugit tikisassaq’, inuuneq naassaanngitsoq ’arpanniartariaqarparput’. (Filípimiut 3:13, 14) Jesus assigalugu ’tipaatsuutissaq uatsinnut saqqangiussaq pillugu ilalaartariaqarpugut’. — Eprîarit 12:2.
8. ’Nakuusertoq’ Habakkuk 2:5-imi eqqaaneqartoq kinaava, sunalu pillugu iluatsitsissanngila?
8 Habakkuk 2:5-imi allaatigineqarpoq angut ’nakuusertoq’ Jehovap kiffai assiginagit iluatsisinnaanngitsoq ’qanini aatsartikkaluarlugu toqusut inaattut’. Kinaana taanna ’qaarsillajuitsoq’? Habakkukip nalaani Babylon assigalugu naalakkersuinikkut pissaanillit — naalagaaffiit fascistiusut, nazistiusut, kommunistiusut allaallu demokratiskiuneragaasut — ’angummut’ assersuutigineqartut sorsunnikkut pilerngullutik nunat pissaaneqarfigisatik allisinniartuarpaat. Taassuma toqusut inaat pisuussuteqanngitsut tarninginik aamma immerpaa. ’Angutilli’ katersaasup ilumuunngitsup taassuma, Satanip silarsuaanut ilaasup anneruniaqisullu, ’inuiaat tamaasa imminut naalatsigitikkaluarlugit inuiaqatigiillu tamaasa pisassamisut katersoraluarlugit’, iluatsitsissanngilaq. Jehova Guutip kisimi inuiaat tamaasa ataasiussuseqalersisinnaavai, Naalagaaffillu Messiasikoortoq ikiortigalugu taamaaliorumaarpoq. — Matîuse 6:9, 10.
Eqqanartut tallimat siulliat
9, 10. (a) Habakkuk aqqutigalugu Jehova maanna sumik nalunaarpa? (b) Naapertuilluanngitsumik pissarsiat eqqarsaatigalugit ullumikkut pissutsit qanoq ittuuppat?
9 Pruffiitini Habakkuk aqqutigalugu Jehovap maanna eqqanartut tallimat, nunarsuup Guutip kiffaanik aalajaatsunik najugaqarfigineqarnissaanut piareersaatitut eqqartuussinerit, tusarliuppai. Eqqortuliorusuttut taakku Jehovameersumik ’appikkumaarput’ imaluunniit Ny Verden-Oversættelsen naapertorlugu ’ussammik saqqummiussiumaarput’. Habakkuk 2:6-imi allassimavoq: „Eqqanaq illit, allat pigisaannik katersuisutit! Qanoq sivisutigisumik sallunaveerutinik katersuipiluuginnassanerpit?“
10 Uani naapertuilluanngitsumik pissarsiat pineqarput. Silarsuarmi inuuffigisatsinni pisuut pisuunerujartorput piitsullu piitsuunngoriartuinnarlutik. Inuinnaat amerlasuut kaattut ikiaroornartunik tuniniaasut peqquserluttullu aningaasarpassuarnik katersisarput. Naatsorsuutigineqarpoq nunarsuup inuisa 25 procentii piitsooriaqqiffissaarullutik inuusut. Nunani amerlasuuni pissutsit erloqinartorujussuupput. Nunarsuarmi naapertuilluarnermik erinigisallit oqarput: „Qanoq sivisutigisumik“ naapertuilluanngitsuliornerit tamakku atuutissappat? Naggatissarli qanillivoq! Takorluugaq „eqquutinngitsuussanngilaq“.
11. Inuit aavinik kuisineq pillugu Habakkuk qanoq allassimava, suullu takutippaa ullumikkut aammik kuisinerpassuaqartoq?
11 Pruffiitip guutiitsoq ima oqarfigaa: „Illit inuiappassuit piiaaffigigakkit inuiaat tamarmik amiakkuisa illit piiaaffigissavaatsit, akiniaallutik inuiaat aavat illit kuisat pillugu, nunamut illoqarfimmullu nakuusernerit aaviaanitillu pillugit.“ (Habakkuk 2:8) Ullumikkut nunarsuaq tamakkerlugu aammik kuisinerpassuaqarpoq. Jesus toqqaannartumik oqarsimavoq: ’Pannamik tigusisut nungullutik pannamik toqunneqassapput.’ (Matîuse 26:52) Taamaattorli ukiut 1900-kkut ingerlaneranni inuiaqatigiit naggueqatigiillu aammik kuiseqataasut inuit 100.000.000-t sinnerlugit toqunerannut pisooqataapput. Aammik kuiseqataasunut eqqanaq!
Eqqanartut aappaat
12. Eqqanartut aappaat Habakkukip oqaatigisaa sunaava, sunalu pillugu qularissanngilarput peqquserlulluni iluanaaruteqarneq iluaqutaanavianngitsoq?
12 Eqqanartut aappaanni Habakkuk 2:9-11-mi eqqaaneqarpoq ’naapertuilluanngitsumik iluanaarutissarsiortoq, qutsissumi initaarumalluni imminut annaanniarluni ajunaarnissamit’. Peqquserlulluni iluanaarutit iluaqutaanavianngillat, soorlu tussiaasiortup oqaasiini aamma ersertoq: „Isumakuloqinak pisuunngoraluarpat angut, illuanilu pisuussutit amerligaluarpata. Toquguni sumik nassatassaqanngilaq, pisuussutaasa ilivermut ilaginavianngilaat.“ (Tussiaat 49:17, 18) Apustili Paulus silatuumik siunnersuivoq: ’Silami matumani pisuusut inakkit perrooqqunagit pisuussutilluunniit allanngujaqisut isumalluutigeqqunagit Guutili isumalluutigeqqullugu, taassuma atugassatsinnik sunik tamanik tuningaartarmatigut.’ — 1 Timûtiuse 6:17.
13. Sooq Guutip mianersoqqussutaa tusarliuttuartariaqarparput?
13 Guutip eqqartuussutaasa ullumikkut oqaluussissutigineqarnissaat immikkut pingaaruteqarpoq! Inuppassuit Jesus kunngissatut ’Jehovap aqqani tikiuttutut’ nersormassuk, farisiiarit akerliliipput. Jesusili akivoq: ’Oqarfigaassi: Uku nipangeraluarpata ujaqqat nillissapput.’ (Lúkarse 19:38-40) Ullumikkullu Guutip kiffaasa silarsuup matuma guutiitsuunera qulaanngippassuk, ’ujarak qarmamit nilliassaaq’. (Habakkuk 2:11) Taamaattumik qunusuilluta Guutip mianersoqqussutaa tusarliunniartigu!
Eqqanartut pingajuat aammillu kuisinermut pisuussuteqarneq pillugu apeqqut
14. Upperisarsiornerit qanoq ilillutik aammik kuisinermut pisuuppat?
14 Eqqanartut pingajuanni Habakkukip eqqartugaani aammik kuisinermut pisuussuteqarneq pineqarpoq. Habakkuk 2:12-imi allassimavoq: „Eqqanaq illit illoqarfimmik tunngaviliisutit aammik kueraanikkut, iluaatsuliornikkut illuliortitsisutit!“ (Habakkuk 2:12) Pissutsit aaqqissuussaaneranni matumani aammik kuisineq iluaatsuliornerlu ataqatigiikkajupput. Aamma malugineqartariaqarpoq upperisarsiornerit assigiinngitsut oqaluttuarisaanerini sorsunnerit naakkittaannerpaartaannut pisuusimasut. Assersuutigalugu taaneqarsinnaapput ilerfiarnerit kristumiuunerartut musliiminut sorsunnerat; Spaniami Latinamerikamilu katuullit allanik upperisalinnik killisiuisarnerat; Europami naaggaartut katuullillu ukiuni 30-ni sorsussimanerat; aamma aammik kuisinerpaaffiusut sorsunnersuit marluk, tamarmik nunani kristumiuunerartuni pilersinneqarsimasut.
15. (a) Oqaluffeqarfinnit tapersersorneqarlutik akuerineqarlutilluunniit inuiaqatigiit qanoq iliortuarpat? (b) Naalagaaffiit Peqatigiit sakkussamaateqaleraluttuinnarneq unitsisinnaavaat?
15 Sorsunnersuup aappaata nalaani pisimasut ajornerpaartaasa ilaat tassaavoq nazistit Europami juutinik allanillu pisuussuteqanngitsunik millionilikkuutaanik toqoraarnerat. Aatsaat ungasinngitsukkut palaseqatigiit katuullit Romalerisut Frankrigimi nassuerutigaat inuit hundredetusindilikkuutaat nazistit katersuutsitsiviannut toqorarfiusunut aallartinneqartarnerat akerlilinngitsoorsimallugu. Taamaattorli inuiaqatigiit aammik kuisinissanut suli amerlanerusunut piareersartarput, oqaluffeqarfinnit tapersorneqarlutik akuerineqarlutilluunniit. Ungasinngitsukkut atuagassiami Time-mi nunani tamalaani saqqummersartumi russit ortodoksit oqaluffeqarfiat pillugu allassimavoq: „Oqaluffeqarfik uummarteqqinneqartoq aamma siornatigut takorloorneqarsimanngitsumik pingaartumik sunniuteqartalerpoq: russit sakkutoorpassuinut. . . . Timmisartut sorsuutit sakkutuullu inaasa pilluaqquneqartarnerat maanna nalinginnaalersimavoq. Moskvami Danilovskijip mattuffiani, russit biskorpiuneqarfianni, novembarimi oqaluffeqarfiit allaat Ruslandip atomimik sakkussamaatai pilluaqquaat.“ Naalagaaffiit Peqatigiit silarsuarmi ajuvissunik sakkussamaateqaleraluttuinnarnerat pinngitsoortissinnaavaat? Naamik. Londonimi aviisi Guardian naapertorlugu Nobelip eqqissinermik nersornaasiuttagaanik nersornaasigaasimasoq oqarsimavoq: „Eqqissisimananngeqaaq eqqarsaatigalugu FN-ip isumannaallisaanermut rådiani ataavartumik ilaasortat tallimat tassaasut silarsuup sakkussiortuisa pingaarnersaat.“
16. Jehovap inuiaqatigiit sorsuttut qanoq iliorfigissavai?
16 Jehovap inuiaqatigiit sorsuttartut eqqartuutissavai? Habakkuk 2:13-imi allassimavoq: „Inuiaat sulilussinnarput innerup nungutitassaanik, inuiaqatigiit ilungersulussinnarput. Tamanna katersaarsuit [Jehovaannit] pisimannginnerpa?“ (Habakkuk 2:13) Aap, ’katersaarsuit Jehovaata’ inngilerpassuani qilammiittut sakkugissavai inuiaat inuiaqatigiillu sorsukkumatuut nungutikkunigit.
17. Inuiaqatigiit nakuusertut eqqartuunneqareerpata Jehovamik ilisarsineq nunarsuarmi qanoq annertutigissava?
17 Jehovap inuiaqatigiit taakku nakuusertut eqqartuutereerpagit qanoq pisoqassava? Habakkuk 2:14-imi ima akissutissaqarpoq: „[Jehovalli] naalannassusianik ilisarsinerup nuna tamakkissavaa soorlu ermit matoqqagaat immap naqqa.“ Siunissaq nuanningaartoq! Harmagedonimi Jehovap kisimi oqartussaassusia naassaanngilluinnartumik qutsisisinneqassaaq. (sarĸúmersitat 16:16) Neriorsoqqissaarpaatigut ’isikkami tummarfia’, nunarsuaq, ataqqinaasisissallugu. (Jesaja 60:13) Inuiaat tamarmik inuunerminni Guutip aqqutigeqqusaata maleruarnissaa ilikkassavaat, Jehovap siunertaanik nuanningaartunik ilisarsinermik nuna tamakkertillugu soorlu ermit matoqqagaat immap naqqa.
Eqqanartut sisamaat tallimaallu
18. Eqqanartut sisamaat suna Habakkukip nalunaarutigaa, tamannalu ullumikkut qanoq silarsuup ileqquani ersippa?
18 Habakkuk 2:15-imi eqqanartut sisamaat ima oqaatigineqarpoq: „Eqqanaq aalakoornartumik imigassiortutit ikinngutitit imertinniarlugit, putumatinniarlugit tamaqanngitsut isiginnaarumallugit.“ Tamanna maannakkut silarsuatsinni atukkanut kanngunartunut ajortunngorsimasunullu eqqaanarpoq. Kanngunartuliortarneq, allaat upperissarsioqatigiinnit assuarlerajunngitsunit tapersersorneqartoq, atugaanerujartuinnarpoq. Nappaatit kinguaassiuutitigut tunillaattartut soorlu aids nunarsuaq tamakkerlugu perlussiortitsipput. Inuit namminissarsiortut maanna inuusut Jehovap ’naalannassusia’ ersersinngilaat, akerlianilli ajortunngoriartuinnarput Guutimillu eqqartuunneqangajalerlutik. Silarsuup matuma pinerlukkumatuup ’kanngunartoq qaarsillaatigaa ataqqinaatissaq pinnagu’, qanittukkullu ermutsimik Jehovap kamannerata pianik, piumasaanut assersuutaasumik, tunineqassaaq. ’Ataqqinarsimagaluarluni narrunarsarneqassaaq’. — Habakkuk 2:16.
19. Eqqanartut tallimaannut aallarniutigalugu suna sammineqarpa, oqaatsillu taakku ullumikkut qanoq pingaaruteqartigaat?
19 Eqqanartut tallimaannut aallarniutitut qiperukkanik guutisiornermut mianersoqqussuteqarpoq. Jehovap pruffiiti kimittuumik oqaaseqartippaa: „Eqqanaq taanna qisuinnaasumut oqartoq: ’Iterniarit!’ — ujaqqamullu oqajuitsumut: ’Makinniarit!’ Taama ittoq siunersiorneqaruni akisinnaassanerpa? Kuultimik sølvimillu qalligaagaluarpoq anersaamilli ilumiugisaqannguarnani!“ (Habakkuk 2:19) Ulloq manna tikillugu kristumiuunerartut kristumiunngitsullu sanningasulinnut, niviarsiap Mariap assinganut inunnillu uumasunillu assilialianik pallorfiginnittarput. Assilialialli taakkua arlaannaalluunniit makissinnaanngilaq pallorfigisini annaanniarlugit Jehova eqqartuussiartorpat. Guultimik sølvimillu qalligaagaluarlutik naleqanngivipput Guutip ittuinnartup Jehovap naalannassusianut taassumalu pinngortitaasa uumassusillit naalannaataannut naleqqiullugit. Taassuma aqqa asseqanngitsoq naasaanngitsumik unnersiutigitigu!
20. Naalaffimmik aaqqissuussaani qanoq ittumi nuannaarluta kiffartorsinnaavugut?
20 Aap, Guuterput Jehova nersorneqangaartariaqarpoq. Mianerinningaarluta guutipilussiornermut mianersoqqussutaa ilumoorunniartigu. Ata! Jehova suli oqaluppoq: „[Jehova] naalaffiutimini illernartumi ippoq; nunamiut tamarmik nipangerlit taassuma saani.“ (Habakkuk 2:20) Pruffiitip qularnanngitsumik naalaffik Jerusalemimiittoq eqqarsaatigaa, uagulli ullumikkut immikkut pisinnaatitaaffeqarpugut Jehova naalaffimmik aaqqissuussaani anersaakkut ittumi kiffartorfigisinnaagatsigu, Naalagarput Jesus Kristus palasiuneralugu. Naalaffiup tamatuma’silarliaani’ nunarsuarmiittumi katersuuttarpugut, kiffartortarluta, qinusarluta Jehovallu aqqata illernartup ataqqinaatissaanik tunisarlugu. Ataatarput qilammiusoq asannittoq uummatikkut iluunngarluta pallorfigisinnaagatsigu nuannaarutigilluinnarparput. (wE 1/2 2000)
Eqqaamavigit?
• Qanoq sunnertariaqarpaatigut Jehovap ima oqaasiata: „Eqquutinngitsuussanngilaq“?
• Eqqanartut Habakkukip oqaatigisai qanoq ilillutik ullutsinni atuuppat?
• Sooq Guutip mianersoqqussutaa tusarliuttuartariaqarparput?
• Naalaffiup silarliliaani sorlermi kiffartorsinnaavugut?
[Atuaqqissaarnermi apeqqutit]
[Qupp. 15-mi assiliartaq]
Ullumikkut Guutip kiffaasa Habakkukitut paasivaat Jehova kingusinaarnavianngitsoq
[Qupp. 18-mi assiliartaq]
Jehova naalaffiutaata anersaakkut ittup silarliliaani pallorfigisinnaanerata immikkut pisinnaatitaaffiunera pingaartippiuk?
[Qupp. 16-mi suminngaanneernerat]
Asseq: U.S. Army