Jehovamut tatiginnilluni attaveqarneq ineriartortiguk

’GUUTIMUT palligunniaritsi, taava ilissinnut palligutissaaq’ ajoqersugaq Jakob allappoq. (Jâko 4:8) Tussiaasiortorlu David erinarsorpoq: ’[Jehovamik] mianerinnittut Guuti peqatigalugu inuusarput,’ (Tussiaat 25:14) Ersarippoq Jehova Guutip kissaatigigaa tatigaluni attavigissagitsinni. Kisianni Guutip pallorfiginera inassutaasalu maleruarnerat pissutigiinnarlugit pinngitsoorata qanittumik attavigalugu misiginavianngilagut.

Illimmi? Nammineerlutit Guutimut qanittumik attaveqarpit? Tassunga attaveqarnitta qaninnerulernissaanik kissaateqarneq pissusissamisoorpoq. Qanoq ililluta Guutimut tatiginninneq ineriartortissinnaavarput? Uagutsinnut tamanna qanoq kinguneqassava? Biibilimi Ussatit kapitaliisa pingajuanni apeqqutit taakkua akineqarput.

Ajunngissuseq unneqqarissuussuserlu ersersikkit

Salomonip, qanga Israelikkunnut kunngiusimasup, Ussatit kapitaliisa pingajuat oqaatsinik ukuninnga aallartippaa: „Ernera, ajoqersuussutikka puigorniaqinagit inassutikkalu uummatinni pigiliullugit! Taakkuami ullunik ukiunillu amerlasuunik inuuffigisaqartissavaatsit annerusumillu pilluaateqalersillutit.“ (Ussatit 3:1, 2) Salomon Guutimit isumassarsisinneqarluni allammat, Jehova Guuti tassaavoq siunnersuutinik ataatamit pisunik tunniussisoq. Siunnersorneqarpugut Guutip oqaaqqissaarutai tusaaniaqqullugit — inatsisai ileqqoreqqusai, imaluunniit ajoqersuutai — Biibilimi allanneqarsimasut maleqqullugit. Taamaaliorutta, ’ulluvut ukiuvullu amerlisissavaat annerusumillu pilluaateqalersilluta’. Aap, maannakkumiit eqqissisimalluta inuusinnaavugut iliuutsillu, ajortumik iliuuseqartunik eqquigajuttut toqujaarpallaarnermut pissutaasinnaasut, ingalassimallugit. Tassungalu ilaavoq silarsuarmi eqqissineqarfiusumi naassaanngitsumik inuunissamik neriuut. — Ussatit 1:24-31; 2:21, 22.

Salomon nangippoq: „Iperarnaviikkit ajunngissuseq unneqqarissuussuserlu, ujamiliutikkit qungatsinnut uummatinnullu allallugit! Taava Guutimit inunnillu iluarisaalissaatit taakkunanngalu angutitut silassorissutut isigineqalerlutit.“ — Ussatit 3:3, 4.

Hebriiarit oqaasiat ’ajunngissutsimik’ nutserneqarsimasoq, aammattaaq ’ilumoorfiginnilluni asanninneq’-mik nutserneqarsinnaavoq, isumaqarsinnaavorlu, tapersersuineq ilumoorfiginninnerlu. Aalajangiussimavarput qanorluunniit pisoqaraluarpat Jehovamut qanittumik atassuteqaannarnissarput? Uppeqativut ilumoorfiginnilluta asanninnermik takutitsivigisarpavut? Qanittumik attavigiinnarnissat sulissutigivarput? Ulluinnarni oqaloqatigigaangatsigit ’oqaaseqartarpugut inussiarnersumik ajoqersuussutinik’ allaat pissutsini misilinneqarfiusuni? — Ussatit 31:26.

Jehova ilumoorfiginnilluni asanninnermik pigisaqangaarpoq, taamaattumik „isumakkeerfiginnittarpoq“. (Tussiaat 86:5) Ajortuliarisimasavut peqqissimissutigisimagutsigit maannalu narlumuinnaq pisulluta, qularutigissanngilarput Jehovamit ’ullunik inuummarissiviusunik’ tunineqassalluta. (apustilit suliait 3:19) Jehova ilaartariaqannginnerparput allat unioqqutitsinerinik isumakkeerfigisarlugit? — Matîuse 6:14, 15.

Jehova ’unneqqarissutsip Guutigaa’, imminullu tatiginnittuujumasut unneqqarissuunissat kissaatigaa.  (Tussiaat 31:6) Marloqiusamik inuuneqarutta Jehovap ikinngutigiumassagaatigut ilimagisinnaavarput — kristumiut ikinngutivut ilagigaangatsigit ajunngitsumik ileqqoqarluta, takusinnaanngikkaangatigullu allatut ileqqoqarluta — angutit ’sallutuut’ kinaassusivimminnik isertuisut assigalugit? (Tussiaat 26:4) Sianiitsuliornerussaqaaq, tassami ’pinngortitanik taassumunnga ersinngitsoqanngilaq’. — Eprîarit 4:13.

Ajunngissuseq unneqqarissuussuserlu pinnersaatitut naleqangaartutut ’qungasitsinnut ujamiliussatut’ ipput, pissutsimmi taakkua uagutsinnut ajornarunnaarsippaat ’Guutimit inunnillu iluarisaalernissarput’. Ersitsuinnarmik taakkua takutittariaqanngilavut, aammali ’uummatitsinnut allattariaqarpavut’, imatut paasillugu kinaassusitsinnut ilaliulluinnartariaqarpavut.

Jehovamut tatiginnilluinnartuuneq ineriartortiguk

Kunngi silatooq nangippoq: „[Jehova] tunaariuk uummatikkut iluunngarlutit, namminerlu silaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ — Ussatit 3:5, 6.

Jehova tatiginnilluinnarnissatsinnut qinngaqqunnanngilaq. Tamanik pinngortitsisuuvoq, tamatumalu kingunerisaanik silatungaarpoq pissaaneqangaarlunilu. (Jesaja 40:26, 29) Siunertani tamaasa naammassisinnaavai. Aqqa isumaqarpoq „Taamaalisitsivoq“, neriorsuutiminillu naammassinnissinnaaneranut tatiginninnerulersippaatigut! ’Guutip sallusinnaanngitsuunera’, pissusiata ersersippaa nammineq sallusuissutaasoq. (Eprîarit 6:18) Pissusiisa malunnarnersaraat asanninneq. (1 Juánase 4:8) „Iluarpoq [Jehova] ingerlavimmini tamani, qanoq iliornermini tamani nallittuisarpoq.“ (Tussiaat 145:17) Guuti tatigisinnaanngikkutsigu, taava kina tatigisinnaavarput? Jehovamut tatiginninneq ineriartortissagutsigu soorunami ’misigalugulu takusariaqarparput avaaginnittuusoq.’ Biibilimi ilinniakkatta inuunitsinni atornerisigut, kingunerisaasalu ajunngitsut eqqarsaatiginerisigut. — Tussiaat 34:9.

Qanoq ililluta ’ingerlavitsinni tamani Jehova eqqarsaatigissavarput’? Tussiaasiortoq isumassarsisitaalluni allappoq: „Isumaliutigaara piliarsuit tamaat, eqqarsaatigaakkalu suliatit.“ (Tussiaat 77:13) Guuti takussaanngitsuummat tatiginnittumik attaviginera ineriartortinniaraanni suliaasa alutornangaartut innuttaminullu iliuuseqartarnerata eqqarsaatigeqqissaarnissaat pingaaruteqarpoq.

Aammattaaq Jehovamut qinunitsigut takutipparput ’eqqarsaatigigipput’. Kunngi David „ulloq naallugu“ Jehovamut torlulajuarpoq. (Tussiaat 86:3) Akulikitsumik David unnuaq naallugu qinusarpoq, soorlu inoqajuitsumut qimaagami. (Tussiaat 63:6, 7) Apustili Paulus ima kajumissaarivoq, ’Tamatigut anersaakkut qinuttuinnaritsi’. (Evfisumiut 6:18) Qanoq akulikitsigisunik qinusarpugut? Guuti qamannga pisumik nammineerluta oqaloqatigisinnaagatsigu nuannaarutigaarput? Misilinneqaatinik misigisaqaraangatta ikioqqulluta qinnuigisarparput? Pingaaruteqartunik aalajangiitinnata siulersoqulluta qinunikkut saaffigisarparput? Jehovap asanerulertarpaatigut peqqusersuilluta qinunikkut saaffigigaangatsigu. Neriorsorneqarpugullu qinnutivut tusarumaarai ’ingerlavissavullu nalimmassarlugit’.

Sianiilliornerussaaq ’nammineq silaqassuserput tatigigutsigu’ imaluunniit Jehova tatigilluinnarsinnaallutigu silarsuarmi inuit nuimasut tatigigutsigik. Salomon ima mianersoqqusivoq: „Silatuutut imminut isigeqinak.“ Imatulli kajumissaarivoq: „[Jehova] mianeruuk ajortorlu nigorsimallugu! Tamanna timinnut peqqissaatigissavat nukittorsaatigalugulu qasugaangavit.“ (Ussatit 3:7, 8) Qanoq iliornivut tamarmik, eqqarsaativut misigissutsivullu Jehovap iluarinngisaanik iliuuseqarusunginnitsinnik ersersitsisariaqarput. Mianerinninnerup taamaattup ajortumik iliuuseqartinnaveersaassavaatigut, anersaakkullu peqqissiartornermik ineriartornermillu kinguneqassaaq.

Jehova pitsaanerpaanik tuniuk

Qanoq ililluta allatut Guutimut qanillisinnaavugut? „[Jehova] ataqqinaaseruk pigisannik, naatitavit tamarmik inereqqaataannik“ kunngi kajumissaarivoq. (Ussatit 3:9) Jehovamik ataqqinninnerup nassataraa ataqqingaarnera aqqatalu tamanut nersornartinnera oqaluussissutigineqarnerani peqataallunilu tapersersuinikkut. Pigisatsinnik Jehovamik ataqqinaasiinitsinnut ilaapput piffissarput, piginnaanivut, nukivut pigisavullu tigussaasut. Taakkua tassaagunarput naaqqaataasut  — tunniussinnaasavut pitsaanerit. Pigisatsinnik atuinerput aalajangersimanitsinnut takussutissaannginnerpa ’Guutip naalagaaffia iluarnerlu taassuma pia piniaqqaaripput’? — Matîuse 6:33.

Jehova pisuussutitsinnik ataqqinartikkutsigu akilerneqarumaarpugut. Salomon imatut neriorsueqqissaarpoq: „Taava quitit imaqalerumaarput naammattorsuarnik, tunguiaaffitillu utsersorumaarput paarnat isserannik.“ (Ussatit 3:10) Anersaakkut pisuussutit immini pigisatigut pisuunngortitsineq ajorput, kisianni pisuussutivut Jehovap ataqqinaatissaanut atorutsigik pilluaqqusaangaarnernik kinguneqassapput. Guutip piumasaata naammassinera Jesusimut ’nerisassatut’ inuussutissatut ippoq. (Juánase 4:34) Taamatuttaaq inuussutissanik pissarsissaagut, Jehovap ataqqinaatissaanik ajoqersuganngortitsilluni sulinermi peqataagutta. Sulinermi tamatumani aalajaakkutta, anersaakkut peqqumaasivivut ulikkaangaassapput. Nuannaarnerput — viinnimut nutaamut assersuutigineqartoq — utsersorumaarpoq.

Jehova ullut tamaasa saaffigisarparput qinnuigalugulu nerisassat timikkut pisariaqartitatta matussuserneqarnissat isumageqqullugu? (Matîuse 6:11) Pigisavut tamaasa Ataatatsinnit asannittumit qilammiusumit pisaraavut. Jehovap nersornaatissaanut pigisatsinnik atuinitta annertussusia missiliorlugu, pilluaqqussutinik suli aammalu tuningaassavaatigut. — 1 Korintumiut 4:7.

Jehovap perorsaatissiissutaa ilassiuk

Israelip kunngiata nalunngilaa tatigineqarnissaq angujumallugu Jehovap perorsaatissiissutaanik ilassinninnissaq qanoq pingaaruteqartigisoq, tamanna pillugu imatut siunnersuuteqarpoq: „Ernera, [Jehovap] anusinngorsaanera asiginnaqinagu, avoqqaarinninneri nikalluutiginiaqinagit. [Jehovammi] asasani anusinngorsartarpaa soorlu ataatap ernini asasani taama iliorfigisaraa.“ — Ussatit 3:11, 12.

Perorsaatissinneqarnittali ilassinissaa tamatigut ajornaatsuinnaatinneq ajorparput. ’Perorsaammilli pineqarneq atortillugu nuannertarinngilaq, qiimanaatsuullunili,’ apustili Paulus allappoq, ’kingornali eqqissinartumik iluarnissamik tassuuna sungiusagaasut pissaanik kingunissaqararaaq.’ (Eprîarit 12:11) Ilitsersorneqarneq perorsaatissinneqarnerlu ilinniartinneqarnitsinnut ilaavoq pinngitsoorneqarsinnaangitsoq Guutimut qaninnerulersitsisoq. Ilitsersorneqarnerput angajoqqaatsinneeraluarpat imaluunniit ilagiinnit kristumiunit,  atuaqqissaartillutaluunniit Biibilimi paasisavut eqqarsaatigeqqissaarutsigik, Jehovaminngaaneersuuvoq uagutsinnullu asanninneranut ersiutaalluni. Silatusaassaagut ilassigutsigu.

Ilisimassut siuneqarluarnerlu aalajangiutikkit

Tulliullugu Salomonip erseqqissarpaa Guutimut qanimut attaveqarnerup ineriartortinnissaa kissaatigigaanni ilisimassutsip siuneqassutsillu pingaaruteqassusia. Oqarpoq: „Pilluarpoq ilisimassummik nassaartoq, inuk siuneqarluarnermik pissarsiaqartoq. Ilisimassutsip pissarsiarinissaa sølvip pissarsiarinissaanit pingaarneruvoq, iluanaarutissartaalu kuultimit anneruvoq. . . . Aalajangiussisiminut tamanut orpiuvoq inuunartoq, pilluarput taassuminnga iperaanaveersartut.“ — Ussatit 3:13-18.

Kunngip oqaatsit uku atorlugit eqqaasippaatigut Jehovap ilisimassusia siuneqassusialu pinngortitarsuani alutornangaartumi takuneqarsinnaasut: „[Jehovap] nunarsuaq tunngavilerpaa ilisimassutsimigut, qilak siaarpaa siuneqassutsimigut. . . . Ernera, silatussuseq isumatussuserlu annaanaveersaarniakkit alartaaserlugillu. Taakku ilinnut inuussutaassapput qungatsinnilu ujamiullutik kusanangaartut.“ — Ussatit 3:19-22.

Ilisimassuseq siuneqassuserlu pissusiupput Guutimut qanittumik attaveqartunut ilisarnaataasut. Pissutsit taakku ineriartortiinnassanngilavut, aammattaarli aalajangiutissavavut Biibilip peqqissaartumik atuaqqissaartuarneratigut ilikkakkattalu inuunitsinni atornerisigut. „Taava ingerlavinni aarlerissutissaqassanngilatit,“ Salomon nangippoq, „isikkannullu naakkiuffissaqarnak.“ Ilavaalu: „Annilaangassutissaqassanngilatit innaraangavit, sinilluartarlutillu nallaraangavit.“ — Ussatit 3:23, 24.

Aap, aarlerinata ingerlassaagut innarlutalu eqqissilluta sinilluta ’perlussap tassanngaannaq tikiuttussap’ Satanip silarsuaanut ajortumut tillinniatut unnuami tikiunnissaata utaqqinerani. (1 Tásalûníkamiut 5:2, 3; 1 Juánase 5:19) Allaat naalliunnartoqangaartumi qanittukkut pisussami una qularutigissanngilarput: „Siooragissanngilatit tassanngaannaq annilaartitaanissat anorersuarlu inunnut ajortunut nalliuttussaq, tunaarisassat tassaammat [Jehova]. Taassuma isikkatit paarissavai napititaaqqunak.“ — Ussatit 3:25, 26; Matîuse 24:21.

Ajunngitsuliorit

„Ajorsartut ajunngitsuliorfigikkit, sapinngikkuit ikiuiumanngitsooqinak!“ Salomon oqaaqqissaarivoq. (Ussatit 3:27) Allanut ajunngitsuliornerup nassataraa pigisat erliginagit allat iluaqutissaannik tunisineq, taamaaliortoqarsinnaavorlu assigiinngitsorpassuartigut. Allanilli qanittumik Guutimut ilumoortumut attaveqalernissaannut ikiuineq maannakkut ’naggatissap nalaani’ tassaannginnerpa taakkununnga iliuuserisinnaasatta pitsaanerpaartaat? (Daniel 12:4) Taamaattumik maannakkut piffissanngorsimavoq ilungersorluni Guutip naalagaaffiata oqaluussissutigineqarneranut ajoqersuganngortitsinermullu peqataanissamut. — Matîuse 28:19, 20.

Kunngi silatooq aammattaaq ingalassimasassanik taasaqarpoq: „Inoqatinnut ima oqassanngilatit: ’Angerlaannarallaat, aqagu aggeqqinniarna, taava tuniumaarpakkit.’ Pilersaarutipiloqarfigeqinagu inoqatit eqqanni najugaqartoq ajortussamik ilimasunngitsoq. Pissutissaqarnak saqitsaasseqinak ilinnut ajortumik iliuuseqanngitsumut. Nakuusersoq sinngageqinagu iluatsitsisarnera pillugu, tumai atuallanniaqinagit.“ — Ussatit 3:28-31.

Salomonip oqaaqqissaarutini tunngavilerpaa ima oqarluni: „Tunussisoq [Jehovamut] maajunnartuuvoq, peqqusersuitsulli [Jehova] ilagiiffigaat. [Jehovap] perloqqusarpaa iluaatsut illuat; pilluaqqusarpaali iluartut inigisaat. Mitaatilliisunut mitaatilliisarpoq, qanilaartunulli saammaassisarpoq. Isumatuut ataqqinaat pisassaraat, isumaatsulli assut kanngunarsisitaassapput.“ — Ussatit 3:32-35.

Jehovamit tatigineqassagutta tunussisuussanngilagut ajortunillu pilersaaruteqarata. (Ussatit 6:16-19) Taamaallaat Jehovap isaani eqqortumik iliorutta, pilluaqqusinera iluarinninneralu pissarsiarisinnaavavut. Aammattaaq allat ataqqinninnerat misigisinnaavarput ilisimassut Guutimeersoq malillugu iliuuseqartugut malugippassuk. Taamaattumik silarsuarmi maani ajortumi nakuuserfiusumilu tunussinerit itigartikkit. Aalajangerta aqqutikkut naapertuilluartukkut ingerlaniarluta Jehovamullu tatiginnittuuneq ineriartortillugu! (wE 15/1 2000)

[Qupp. 30-mi assiliartaq]

’Jehova ataqqinaaseruk pigisannik’