Siunissap ilisimanissaa ajornanngilaq!

Amerlanerit siunissaq ilumoorullugu eqqarsaatigisarpaat. Pilersaarusiorneq, silatusaartumik aningaasaliineq toqqissisimanerlu nuannaraat. Kisianni qularinagu oqartoqarsinnaava aqagu susoqassanersoq?

SIUNISSAMI susoqassanersoq paasiniarlugu amerlasuut assigiinngitsunik misileraasarsimapput. Sociologit ilaasa futurologinik taaguutillit, imaluunniit siunissamik misissueqqissaartartut, maannakkut ineriartorneq misissortarpaat, tamakkulu missiliuussiaminnut tunngaviutittarlugit. Aningaasarsiornermik ilisimatuut suliaminnut tunngatillugu aamma taamaaliortarput. Ullorissat najoqqutaralugit siulittuiniartartut ilisiitsullu horoskopit igalaamernit ammallorissut, angakkuarninnerillu tatigisarpaat malitserpassuaqarlutillu. Assersuutigalugu ullorissat najoqqutaralugit siulittuiniartartoq franskeq, Nostradamus suli nuannarineqangaarpoq, ukiuni hundredelikkuuttaani toqungareeraluarluni.

Tamakku imminnut pruffiitinngortissimasut tatiginarnatillu pakatsinartut paasinarsisimavoq. Pissutaavoq Jehova Guuti oqaasialu Biibili naatsorsuutiginnginnamikku. Taamaattumik apeqqutit tunngaviusut imaattut akissinnaanngilaat: ’Qanoq ilillunga qulakkeersinnaavara Biibilimi siulittuutit piviusunngorumaartut? Guutip inuiannut siunertaanut tamakku qanoq naapertuuppat? Siulittuutit uannut ilaquttannullu qanoq iluaqutaasinnaappat?’ Apeqqutit tamakku Biibilip akissutissaqartippai.

Aamma Biibilip siulittuutai assigiinngitsorpassuatsigut immikkut ittuupput. Ullorissat najoqqutaralugit siulittuisartut assiginagit Biibilimi siulittuutit inuit namminneq kajumissutsiminnik iliuuseqarsinnaatippaat. Taamaattumik siumut aalajangeriikkanit eqqugaasoqassanngilaq. (5 Moses 30:19) Allakkat Nostradamusip allagaatut ittut ileqqussatigut sumiluunniit ajoqersuutitaqanngillat, paasiuminaatsuunerisigullu malunnartuunerisigullu imaqannginneq tamanna paasitinnaveersaarneqarpoq. Akerlianilli Biibilimi siulittuutit ileqqussatigut najoqqutassianik aalajaatsunik tunngaveqarput. Nassuiarpaat sooq Guutip siunertani naammassissagaa. (2 Israelikkut 36:15) Jehovallu siulittuutai eqquutinngitsoorsinnaanngillat, ’Guuti sallusuitsuummat’. (Títuse 1:2) Tamanna pissutigalugu Guutip oqaasianit siulersortittut siunertaqarluartumik pilluarlutillu inuupput ilisimaatsuunatik tammartitaanatillu, piffissartillu naleqanngaartoq siunertaqanngisunut nukitillu atulussinnarnagit. — Tussiaat 25:12, 13.

Tunngavilersuutit tamakku ilarpassuilu Jehovap nalunaajaasuisa ataatsimeersuarneranni „Guutip oqaasia siulittuutaasoq“-mi 1999/2000-mi nunarsuaq tamakkerlugu ingerlanneqartuni sammineqarput. Oqalugiaatit, apersuinerit, takutitsinerit isiginnaartitsissullu Biibililersaartoq najuuttut, anersaakkut kingornussamut tupinnangaartumut tikkuussipput, Guutip oqaasianik siulittuutaasumik atuaqqissaartartut malinnittullu nuannaarutigisinnaasaannik. Allaaserisami tulliuttumi ataatsimeersuarnermi pingaaruteqartut pissanganartut uteqqinneqassapput.