’Kristusip Isumaa’ Ilisariniaruk

’Kiami Naalakkap isumaa ilisaraa ilitsersorsinnaallugu? Uagulli Kristusip isumaanik peqarpugut.’ — 1 KORINTUMIUT 2:16.

1, 2. Jehovap oqaatsimini Jesus pillugu sunik saqqummersitsisimava?

JESUS qanoq isikkoqarsimava? Nujai qanoq qalipaateqarpat? Amia? Isai? Qanoq angitigiva? Qanoq oqimaatsigiva? Ukiut hundredelikkuutaat ingerlanerini eqqumiitsuliortut Jesus assigiinngitsunik, ilaasa ilumoorunartunik ilaasalu ilumoorunanngitsunik, assilialiarisarpaat. Ilaasa angutitut peqqissutut, allalli qarsungasutut sanngiitsutullu, assilialiarisarpaat.

² Biibilimili Jesusip isikkua pingaarnerpaatinneqanngilaq. Jehovalli pingaaruteqarnerungaartoq alla saqqummersissimavaa, tassa Jesusip inuttut qanoq ittuunera. Iivangkiiliuni Jesusip oqaaserisimasai iliuuserisimasaalu piinnarnagit aammali misigissutsit itisuut eqqarsariaaserlu oqaasiisa iliuusiisalu tunuliaqutarisaat takutinneqarput. Oqaluttuat isumassarsiarititaasut sisamat taakkua Paulusip ’Kristusip isumaanik’ taasimasaanik paasisaqartippaatigut. (1 Korintumiut 2:16) Jesusip eqqarsaataasa, misigissusiisa kinaassusiatalu ilinniarnissaat uagutsinnut pingaaruteqarpoq.  Sooq? Minnerpaamik marlunnik pissutissaqarpoq.

3. Kristusip isumaanik ilinniarnitsigut aamma suna paasisaqarfigissavarput?

³ Siullermik Kristusip isumaanik ilisimasaqarnerup Jehova Guutip isumaanik paasisaqalersissavaatigut. Jesusip Ataatani ima qanitsigisumik atassuteqarfigigamiuk oqarsinnaasimavoq: ’Erneq kinaasoq allap ilisimanngilaa, Ataatap kisimi; Ataatarlu kinaasoq allap ilisimanngilaa, ernerup kisimi ernerullu nalunaarfigiumasaasa.’ (Lúkarse 10:22) Jesus ima oqarporlusooq: ’Jehova qanoq ittuusoq paaserusukkussiuk takusinnaavassinga.’ (Juánase 14:9) Iivangkiiliuni Jesusip eqqarsaatai misigissusiilu pillugit qanoq allassimasoqartoq misissoraangatsigu Jehovap eqqarsaatai misigissusiilu ilinniartarpavut. Taamaalilluta Guuti qaninnerulersinnaavarput. — Jâko 4:8.

4. Jesusitut iliuuseqassagutta suna ilinniaqqaartariaqarparput, aamma sooq?

⁴ Aappassaanik Kristusip isumaanik ilisimanninnerup ’tumaasa atuarnissaanut’ ikiorsinnaavaatigut. (1 Pîtruse 2:21) Jesusimik malinninneq imaaginnanngilaq oqaasiinik tusaaneq iliuusiinillu ilaarsineq. Oqaatsit iliuutsillu eqqarsaatinik misigissutsinillu aallaaveqartarmata, Kristus malissinnaavarput aatsaat taassumatut isiginnittaaseqarutta. (Filípimiut 2:5) Allatut oqaatigalugu Kristusitut inuussagutta taassumatut eqqarsarneq misiginerlu ilinniaqqaartariaqarpavut — naammalluinnanngitsuugatta sapinngisarput naapertorlugu. Taamaattumik maanna iivangkiiliunik allattut ikiortigalugit Kristusip isumaa misissornerussavarput. Siullermik Jesusip eqqarsariaasianut misigissusiinullu sunniuteqarsimasut ilaat sammissavavut.

Jesusip inunngunngikkallarami piusimanera

5, 6. (a) Ilagisartakkatsinnit qanoq sunnerneqarsinnaavugut? (b) Guutip angajulliliaata nunamukanngikkallarami qilammi kina ilagaa, qanorlu sunnerneqarpa?

⁵ Inuit ilagisartakkavut eqqarsaatitsinnut, misigissutsitsinnut iliuutsitsinnullu ajunngitsumik ajortumilluunniit sunniuteqarsinnaapput. * (Ussatit 13:20) Eqqarsaatigiuk Jesusip nunami inunngunngikkallarami qilammi kina ilagisimagaa. Johannesip iivangkiiliuani Jesusip inunngunngikkallarami ’Oqaatsitut’, tassa Guutip oqaaseqartitaatut, piusimanera oqaluttuarineqarpoq. Johannes ima allappoq: ’Pileqqaarneranni Oqaaseq ippoq, Oqaaserlu Guutimiippoq, Oqaaserlu guutiuvoq. Taanna pileqqaarneranni Guutimiippoq.’ (Juánase 1:1, 2) Jehova piujuaannarsimammat ’pileqqaarnera’ tassaasariaqarpoq Guutip pinngortitsisutut suliniuteqaqqaalernera. (Tussiaat 90:2) Jesus ’pinngortitat tamarmik siornatigut erniuvoq’. Taamaattumik pinngortitat anersaajusut allat tamarmik silarsuarlu avataaniittullu takussaasut pinngortinneqanngikkallarmata taanna piusimavoq. — Kulorsamiut 1:15; sarĸúmersitat 3:14.

⁶ Misissueqqissaartartut ilaasa naatsorsuutigaat silarsuaq avataaniittullu takussaasut minnerpaamik ukiuni 12 milliardilinni pioreersimasut. Missiliuussineq tamanna eqqortuugaluarpat Guutip ernituata Adamip pinngortinneqarnera sioqquterujussuarlugu Ataataminut qanittumik attaveqarnini iluaqutigisimassavaa. (Naleqqiuguk Mika 5:2.) Taamaalillutik asaqatigiillutillu imminnut qanittumik attaveqarput. Ilisimassutsitut kinaassusilikkatut ernituaq taanna inuttut pinngortitaanngikkallarami ima oqarsimavoq: „[Jehovamut] nuannaarutaavunga ullut tamaasa, kiinaatalu saani pinnguartuarlunga.“ (Ussatit 8:30) Soorunami Guutip ernera sunnerneqangaarsimassaaq taama sivisuutigisumik asanninnerup pilerfia najorsimagamiuk. (1 Juánase 4:8) Ernerup taassuma Ataatami eqqarsaatai, misigissusii iliuusiilu allanit tamanit ilisimaneruai taannalu assigisinnaalerlugu. — Matîuse 11:27.

 Nunami inuunera sunnerneqarneralu

7. Ilaatigut suna pissutigalugu Guutip ernera angajulliliaa nunarsuarmukartariaqarsimava?

⁷ Guutip ernera suli ilikkagassaqarsimavoq, Jehovammi ernini palasiunerutinniarpaa misiginneqataasoq ’qajannarsutsitsinnik naakkinnissinnaasoq’. (Eprîarit 4:15) Erneq ilaatigut nunarsuarmut tikiussimavoq suliassamut piumasarisat naammassissagamigit. Maani nunarsuarmi Jesusip inuttut uinilittut aalittullu atukkat sunnerneqarnerlu siornatigut taamaallaat qilammit takusimasani atortariaqalerpai. Maannakkut nammineq timimigut inuttut misigissuseqarneq malugisinnaalerpaa. Ilaannikkut qasullunilu, imerusullunilu kaattarpoq. (Matîuse 4:2; Juánase 4:6, 7) Aammattaaq ajornartorsiutit naalliuutillu assigiinngitsorpassuit atorsimavai. Taamaalilluni ’naalannermik ilikkarpoq’ palasiunertullu sulinissaminut piukkunnaateqalerluni. — Eprîarit 5:8-10.

8. Jesusip nunarsuarmi meeraanera inuusuttuuneralu pillugit sunik ilisimasaqarpugut?

⁸ Jesus nunami inuttut inuulerami sunik misilittagaqalerpa? Biibilimi meeraanera annikitsuinnarmik oqaluttuarineqarpoq. Mattæusip Lukasillu kisimik inunngorneranut atatillugu pisimasut eqqartorpaat. Iivangkiiliunik allattut nalunngilaat Jesus nunamut tikiutinngikkallarami qilammi piusimasoq. Inunngunngikkallarami piusimanerata allanit tamanit paasinarnerulersippaa sooq inuttut taama ittunngorsimanera. Taamaattorli Jesus inuuvoq piviusoq. Naammalluinnartuugaluarluni inersimasunngortinnani meeqqatut inuusuttutullu inuusariaqarpoq, tamatigullu nutaanik ilinniartariaqarluni. (Lúkarse 2:51, 52) Biibilimi Jesusip meeraanermini atorsimasaasa ilaat qularnanngitsumik taassumunnga sunniuteqarsimasut Biibilimi eqqaaneqarput.

9. (a) Jesusip ilaqutariinni piitsuni inunngorsimaneranut sunik takussutissaqarpa? (b) Suut atugaralugit Jesus alliartorsimagunarpa?

⁹ Jesus ilaqutariinni piitsuni inunngorsimagunarpoq. Taama isummersinnaavugut Jesusip inunngorneranit ullut 40-t qaangiummata Josefip Mariallu naalaffimmi pilliutigisaat eqqarsaatigalugu. Savaaraq ikikkagassatut tuilu piaraq imaluunniit tui quluartartoq ajortaaruteqqussutitut pilliutiginagit ’tuit quluartartut aappariit ataatsit tuiaqqalluunniit marluk’ pilliutigaat. (Lúkarse 2:24) Mosesip inatsisai naapertorlugit piitsut taama pilliuteqarsinnaasarput. (3 Moses 12:6-8) Ukiut ingerlaneranni ilaqutariit amerliartorput. Jesusip tupinnartuliornikkut inunngornerata kingorna Josef Marialu minnerpaamik allanik arfinilinnik meerartaarput. (Matîuse 13:55, 56) Taamaattumik Jesus ilaqutariissuarni, qularnanngitsumik pigissaartuunngitsuni, alliartorpoq.

10. Suup takutippaatigut Maria Josefilu Guutimik mianerinnittuusut?

¹⁰ Jesus angajoqqaanit isumaginnilluartunit Guutimillu mianerinnittunit perorsarneqarsimavoq. Anaanaa Maria arnaavoq immikkut ittoq. Nalunngilarput inngilip Gabrielip ima saaffigisimagaa: ’Pilluarna, saammaassaasutit uumaa, Jehovap najorpaatit, arnani pilluaqqusaasutit-aa.’ (Lúkarse 1:28) Josefilu angutaavoq Guutimik mianerinnittoq.  Ukiut tamaasa aalajaalluni 150 kilometeritut isorartutigisoq ingerlavigalugu poorskisioriartorluni Jerusalemiliartarpoq. Maria ilaasarpoq, naak arnat Jerusalemimi poorskisiortarnerat Inatsisini peqqussutigineqanngikkaluartoq. (2 Moses 23:17; Lúkarse 2:41) Periarfissat taakkua ilaanni Josefip Mariallu Jesus 12-inik ukiulik sivisuumik ujareerlugu naalaffimmi ajoqersuisartut akornanni nanivaat. Jesusip angajoqqaani isumakuloqisut ima oqarfigai: ’Naluisinga Ataatama pii najussagikka?’ (Lúkarse 2:49) Jesusip oqaaseq ’ataataq’ ajunngitsumik asannittumillu isumaqartissimassavaa. Siullermik paasitinneqarsimassaaq Jehova Ataatavigigaa. Aappassaanik Josef Jesusimut ataatassatut pitsaasimassaaq. Soorunami Jehovap angut akaarnaatsoq nakuuserumatoorluunniit ernermi asasami perorsaasussaatut qinernavianngilaa.

11. Sutut Jesus ilinniartitaava, Biibilillu nalaani suliarisartagaq tamanna sunik nassataqartarpa?

¹¹ Nazaretimi najugaqartilluni Jesus sanasutut ilinniartitaavoq, qularnanngitsumik ataatassaminit Josefimit. Jesusip suliassaq tamanna ima pikkoriffigilersimatigaa ’sanasoq’-mik taaneqartarluni. (Mákorse 6:3) Biibilip nalaani sanasut illuliortarput, pequsiortarlutik (nerrivinnik, issiavinnik allanillu) nunalerinermilu atortussanik sanasarlutik. Atuakkiamini Dialog Med Jøden Tryfon-imi Justinus Martyr ukiuni 100-kkunni inuusoq Jesus pillugu allappoq: „Inuit akornanni inuutilluni sanasutut sulisarpoq assallatserutit ersuutillu sanasarlugit.“ Suliaq taamaattoq piuminartuunngilaq, taamanikkummi sanasut qisuit atugassatik pisiariinnarsinnaanngilaat. Qularnanngitsumik orpik atugassartik namminneq toqqartariaqarpaat, ulimariarlugulu angerlaattariaqarlugu. Taamaattumik Jesus immaqa aamma inuussutissarsiornermi, niuernermi aningaasallu naammattusaarnerinut unamminiarnartunik misigisaqartarsimassaaq.

12. Josefip Jesusip toqunera sioqqullugu toqusimaneranut sumik takutssutissaqarpa Jesusimullu tamanna qanoq kinguneqarsimava?

¹² Angajulliliaagami Jesus ilaqutariit pilersornerannut peqataasariaqarsimassaaq, pingaartumik Josefip Jesusimit siulliulluni toqusimanera pissutigalugu. * Zion’s Watch Tower-imi 1. januaari 1900-moortumi allassimavoq: „kinguaariinnit oqaluttuarsiat naapertorlugit Jesus suli inuusuttuusoq Joses toquvoq, Jesusilu sanasunngorluni ilaqutariinnut pilersuisuulerpoq. Tamanna Biibilimi tapersersorneqarunarpoq allassimammat Jesus nammineq sanasumik taaneqartoq, anaanaalu qatanngutaalu eqqaaneqartarmata, Josef eqqaaneqarani. (Mákorse 6:3) . . . Taamaattumik ilimanarpoq Naalakkatta ukiuni 18-ini pisimasumit [Lúkarse 2:41-49-mi] eqqaaneqartumit kuisinnini tikillugu ulluinnarni suliassat sammisarai. Qularnanngitsumik Mariap meeraasalu, ilaatigut Jesusip, uiusup ataataasullu asasap toqunerata qanoq annernartiginera misigisimassavaat.

13. Sooq Jesusip kiffartornini aallartikkamiuk inunnit allanit ilisimasaqarnerullunilu paasimasaqarnerullunilu misiginneqataanerua?

¹³ Ersarippoq Jesus illersugaasussatut ilorrisimaartussatullu inunngorsimanngitsoq. Nammineq timimigut inuinnaat inooriaasiat misigisimavaa. Ukiumi 29-mi Guutip Jesusimut suliassiissutaata naammassinissaanut piffissanngorsimavoq. Ukiakkut imermi kuisippoq Guutillu anersaakkut erneratut kinguassiarineqarluni. Taassumunnga ’qilak ammarpoq,’ Lukas allappoq. Tamanna isumaqarunarpoq maanna inunngunngikkallarami qilammi piusimanini eqqaasinnaaleraa, eqqarsaatini misigissutsinilu ilanngullugit. (Lúkarse 3:21, 22) Jesusip kiffartornini aallartikkamiuk ilisimassuseq, paasisimasaqarneq misiginneqataanerlu inuit allat pigisimanngisaannagaat pigisimavaa. Pissutissaqarluarpoq iivangkiiliunik  allattut Jesusip kiffartorneranut atatillugu pisimasut pingaarnerutillugit eqqaasarmatigik. Taamaattorli oqaaserisimasai iliuuserisimasaalu tamaasa allattorsinnaanngilaat. (Juánase 21:25) Isumassarsisitaallutilli allassimasaasa inuit inuusimasut pingaarnerpaartaata isumaanik ilisimasaqalersippaatigut.

Jesusip inuttut qanoq ittuusimanera

14. Iivangkiiliuni Jesus qanoq inuttut misiginneqataasutut, asannittutut itisuumillu misigissusilittut allaatigineqarpa?

¹⁴ Iivangkiiliuni Jesus inuttut misiginneqataasutut, asannittutut itisuunik misigissusilittut allaatigineqarpoq. Misigissutsit assigiinngitsorpassuit takutittarpai: pupissoq misiginneqatigaa (Mákorse 1:40, 41); inoqatini allamik isumataarumanngitsut pillugit aliasuppoq (Lúkarse 19:41, 42); aningaasanik taarsiisut piumatussusiat eqqorluartumik kamaatigaa. (Juánase 2:13-17) Jesusip allat misiginneqatigisinnaavai imalu killinneqarsinnaatigaluni allaat qialluni, misigissutsinilu isertorneq ajorpai. Ikinngutigilluakkani Lazarus toqummat Jesusillu qatanngutaa Maria qiasoq takugamiuk, ima killinneqartigaaq allat takkuanni qullililerluni. — Juánase 11:32-36.

15. Jesusip misiginneqataanera inunnik allanik isiginninneratigut iliuuseqarneratigullu qanoq erserpa?

¹⁵ Jesusip misigissusii ingammik ersersinneqartarput allanut isiginnittaasiatigut iliuuseqarneratigullu. Piitsut naqisimaneqartullu isumagisarpai ’tarnaat qasuerfissarseqqullugit’. (Matîuse 11:4, 5, 28-30) Napparsimasut samminissaannut ulapippallaarneq ajorpoq, assersuutigalugu arnap aanaartup nipaalluni atisai attormagit, imaluunniit qinusartoq tappiitsoq nipangerumanngimmat. (Matîuse 9:20-22; Mákorse 10:46-52) Jesusip inuit allat pissusii ajunngitsut malugisarpai nersortarlugillu; pisariaqaraangalli aamma avoqqaarlertarpoq. (Matîuse 16:23; Juánase 1:47; 8:44) Naak taamanikkut arnat pisinnaatitaaffeqarpallaanngikkaluartut Jesusip ataqqinnittumik iliorfigisarpai. (Juánase 4:9, 27) Paasinarpoq arnat arlallit pigisaminnik isumagisarmassuk. — Lúkarse 8:3.

16. Suup takutippaa Jesusip inuuneq nunallu pii oqimaaqatigiissumik isigisarai?

¹⁶ Jesusip inuuneq oqimaaqatigiissumik isigisarpaa. Nunap pii taassumunnga pingaaruteqarpallaanngillat. Qularnanngitsumik nunap piisigut pigisakippoq. Nammineq oqarpoq ’niaqquni iigarfissaqanngitsorluunniit’. (Matîuse 8:20) Taamaattoq allat nuannaartittarpai. Katittorsiornermut peqataagami — nipilersornermik, erinarsornermik nuannaarnermillu ileqquusumik nalliussineqartartumi — nuannaarnermut akornutaajumanngilaq. Naamik, taamatut nalliuttorsiornermi Jesus siullermik tupinnartuliorpoq. Viinni nungummat imeq viinninngortippaa pitsaasoq, imigassaq ’inunnik nuannaalersitsisarmat’. (Tussiaat 104:15; Juánase 2:1-11) Katittorsiorneq ingerlaqqissinnaalerpoq, uissarlu nuliassarlu peqqusiileqitinneqanngitsoorunarput. Aammattaaq Jesusip oqimaaqatigiissumik isiginnittaasia erserpoq arlaleriarluni eqqaaneqarmat kiffartornermini sivisuumik ilungersorlunilu sulisartoq. — Juánase 4:34.

17. Jesusip ilinniartitsillaqqittorujussuunera sooq tupinnanngila, ajoqersuutaatalu suna ersersippaa?

¹⁷ Jesus ilinniartitsillaqqissorujussuusimavoq. Ilinniartitsisarnermini ulluinnarni inuuunermut tunngasut nalunngilluakkani  atortarpai. (Matîuse 13:33; Lúkarse 15:8) Ilinniartitseriaasia ilaarneqarsinnaanngilaq — tamatigut ersarilluni paasinarlunilu atoriaannaagami. Pingaarnerpaarli tassaasimavoq ajoqersuinerani tusarliussaq. Ilinniartitsinerata ersersittarpaa qamannga pisumik kissaatigigaa tusarnaartut Jehovap eqqarsaatai, misigissusii iliuusiilu paasissagaat. — Juánase 17:6-8.

18, 19. (a) Assersuusiat piviusorpaluttut suut atorlugit Jesusip Ataatani allaatigaa? (b) Allaaserisap tulliani suna misissussavarput?

¹⁸ Jesus assersuusiortaqaaq Ataatanilu assersuusiat eqqaamajuminartut atorlugit saqqummersittarlugu. Guutip naakkinninnera nalinginnaasumik eqqaaneqarsinnaavoq. Pitsaanerungaarporli Jehova assersuutigineqarmat ataatamut isumakkeerfiginnittumut ima killinneqartigisumut ernini angerlartoq takugamiuk ’arpalluni qungasiagut eqikkaa kunillugulu’. (Lúkarse 15:11-24) Upperisarsiornikkut siuttut inuinnaat nikagisarmatigik Jesusip kulturiat ingasattoq itigartippaa, nassuiarlugulu Ataatami ilassiortuusup isaani ilanngaaserisup maniguuttup ilungersortumik qinnutaa farisiiarip pingaarniartup qinnutaanit pingaartinnerugaa. (Lúkarse 18:9-14) Jesusip Jehova saqqummiuppaa Guutitut isumaginnittutut qupalorarsunnguamik nunamut nakkartumik arajutsisaqanngitsutut. ’Taamaattumik erseqinasi,’ Jesusip ajoqersukkani oqarfigai. ’Qupalorarsuppassuarnit pingaarneruvusi’. (Matîuse 10:29, 31) Paasinarpoq Jesusip ’ajoqersueriaasia pillugu inuit uissuummilluinnarmata’ taassumunnga kajungilerlutik. (Matîuse 7:28, 29, NV) Ilaanni ’inupparujussuit’ Jesus najuinnarpaat piffissaq nerisassarsiornermut atornagu! — Mákorse 8:1, 2.

¹⁹ Qujamasussinnaavugut Jehovap oqaatsimini Kristusip isumaa saqqummersimmagu. Qanorli ililluta allanut attaveqarnitsinni Kristusip isumaanut assingusumik isumaqarneq pigiliussinnaavarput ersersillugulu? Tamanna allaaserisami tulliuttumi misissussavarput. (wE 15/2 2000)

[Quppernerup ataani ilanngussaq]

Eqqaamavigit?

• Sooq ’Kristusip isumaanik’ ilinniarnissarput immikkut pingaaruteqarpa?

• Inunngunngikkallarami Jesusip kina najorpaa?

• Nunami inuutilluni Jesus sumit sunnerneqarpa suullu atortariaqarlugit?

• Iivangkiiliut Jesusip kinaassusia pillugu sumik paasitippaatigut?

[Atuaqqissaarnermi apeqqutit]

[Qupp. 10-mi assiliartaq]

Jesus ilaqutariissuarni, qularnanngitsumik pigissaartuunngitsuni, alliartorsimavoq

[Qupp. 12-mi assiliartaq]

Ilinniartitsisut Jesusip 12-inik ukiullip paasisimasai akissutaalu tupigussutigeqaat