Angut peqqusersuitsoq unnersuussummik ilassinnittoq

„ZAMBIAMI kuukkooriarsuit qaammammut inuit 30-t nerisarpaat.“ Ukiualuit matuma siorna Afrikami aviisimi taama allassimasoqarpoq. Uumasunik ilisimatuup paarmortunik misissuiniarluni pisaqartarsimasup oqaasii naapertorlugit „kuukkooriarsuaq ataaseq aalajangersimaneqassappat angutit aqqaneq-marluusariaqartut“. Kuukkooriarsuaq nukittoorsuarmik pamiulik angisuumillu allerulik uumasuuvoq ulorianartoq.

Pinngortitsisup qularnanngitsumik kuukkooriarsuaq „Livjatan“-imik taallugu eqqartoreeramiuk taanna ’uumasunut qunusuitsunut tamanut kunngiusoq’ atorlugu, kiffani Job pingaaruteqartumik ilinniartippaa. (Job 40:20, 41:25) Tamanna ukiut 3500-t matuma siorna pisimavoq nunami Uzimi, Arabiap avannaaniikkunartumi. Kuukkooriarsuaq eqqartortillugu Guuti Jobimut ima oqarpoq: „Kinami ima sapiisertigisinnaava Livjatan puffassaarsinnaallugu? Taava kia [ajugaaffigisinnaavaanga, NV]?“ (Job 41:1) Kuukkooriarsuaq ersigigaanni Pinngortitsisuanut assortuinissaq mianerineqassannginnerpa? Jobip ilinniartitaanini paasisimallugu kukkunini ersersippaa nassuerutigalugu. — Job 42:1-6.

Job eqqartorneqaraangat misilinneqarnermini aalajaalluni nikalluinnermigut maligassiuilluarnera immaqa eqqaasarparput. (Jâko 5:11) Jobilli uppernera suli sakkortuumik misilinneqarianngitsoq Jehovap qiimmattaatigilereersimavaa. Guutip nammineq naliliinera naapertorlugu Job „nunami tamarmi nalissaqanngilaq assuarnaatsuullunilu peqqusersuitsuugami Guutimillu mianerinnittuulluni ajortumik iliuuseqarnaveersaartuugami“. (Job 1:8) Job pillugu ilinniagaqarnerunissatsinnut kajumittariaqarpugut, taamaalioruttami paasinerulissavarput uaguttaaq Guuti qanoq nuannaartissinnaanerlugu.

Guutimut attaveqarneq siulliuvoq

Job pisoorsuusimavoq. Kuultiutimi saniatigut pigisarai savat 7000-it, qatigattuut 3000-it, siutituullu arnavissat 500-t, ussigit 1000-t aammattaaq kiffarpassuaqarsimalluni. (Job 1:3) Jobilli Jehova tunaartaraa, pisuussutini pinnagit. Imminut ima tunngavilersorsimavoq: „Kuulti isumalluutigisimanerpara, imaluunniit oqarsimanerpunga kuulti akuitsoq tatigalugu? Pisuussutima amerliartornerat nuannaarutigisimanerpara assamma suliaasigut pigisaqalersimaqigama?. . . taamaaliorsimagaluaruma tamanna iluanngitsuliaasimassagaluarpoq pillarneqaataasussaq; taava Guuti qutsinnermiittoq miserratigisimassagaluarpara.“ (Job 31:24-28) Jobitut Guutimut  attaveqarneq salliuttariaqarparput pigisanit pingaarnerutillugu.

Inoqatini naapertuilluartumik pisarpai

Jobip kiffani qanoq pisarpai? Nammineq oqarnermisut kiffaasa naapertuilluartutut inussiarnersutullu isigisarpaat: „Inussiaatikka angut arnarluunniit naammagittaalliuuteqartillugit naapertuilluartumik pineqartinngikkukkit, taava qanoq iliussaanga Guutip eqqartuutilerpanga, qanorlu akissavara saqitsaassut pillugu killisiulerpanga?“ (Job 31:13, 14) Jobip Jehovap naakkinninnera pingaartippaa taamaattumillu kiffaminut naakkinnittarluni. Job maligassiuilluarpoq, ingammik kristumiut ilagiivini nakkutilliisunut. Taakkuttaaq naapertuilluartuusariaqarput, nakerisarsiortuunatik inussiarnersuullutillu.

Jobip inoqutiginngisani aamma soqutigilluinnarpai. Taamatut allanut isumassuineq tulliuttumi oqaasertalerneqarpoq: „Piitsut kissaataannik itigartissimanerpakka uillarnerillu isaat qaamaneerutitissimallugit? . . . Eqqartuussivimmi tapersersortissaqarnera qularinagu iliarsuk qunusaarsimagukku taava tuera qungatsinnit kaanngarli taleralu katalluni!“ (Job 31:16-22) Ilagiinni annikilliortunik imaluunniit pissakilliortunik ilisimasaqarutta taamatut isumassortariaqarpavut.

Jobip namminissarsiunngitsumik allanut soqutiginninnerata takornartanut inoroorsaartunngortippaa. Eqqortumik oqarsinnaasimavoq: „Takornartamilluunniimmi illuma silataani silaannarmi unnuisitsinngisaannarsimavunga; akunnikkumasunut illuma matui ammatittarpakka.“ (Job 31:32) Ullumi Guutip innuttaanut Job maligassiuilluarpoq. Sallusuissummik Biibilimeersumik soqutiginnilersut naalagaaffilersaarfitsinnut takkuttalersut inoroorsaarfigisarutsigit anersaakkut siumukartitseqataasinnaavoq. Soorunalimi aamma nakkutilliisunut angalasartunut kristumiunullu allanut inoroorsaartuusariaqarpugut. — 1 Pîtruse 4:9; 3 Juánase 5-8.

Job aammattaaq akerartortiminut eqqortumik isiginnittaaseqarsimavoq. Uummissortimi ilaat ajutoornermik eqqorneqaraluaraangata qiimmattaatigineq ajorpaa. (Job 31:29, 30) Akerlianilli ajunngitsuliorfigerusussimavai, soorlu tuppallersaasuni ilumoortuusaartut qinnukkusussimagai. — Job 16:2; 42:8, 9; jævnfør Matîuse 5:43-48.

Kinguaassiuutitigut ileqqorinneq

Job nuliaminut ilumoortuusimavoq arnamullu allamut naleqqutinngitsumik uummammigut misigissutsinik ineriartortitsinngisaannarsimalluni. Ima oqarpoq: „Isikka isumaqatigiissuteqarfigisimavakka niviarsiaq pileritsaallugu isigiumanagu. Arnamit pileritsatsinneqaruma tullimalu matuata killingani qamaarisaqarlunga, taava pillaatisiassattut nuliama angut alla karriutaanik aserorterissukkiliuk allanillu innaanneqarluni! Taamaaliorumami tamanna  kanngunartuliaassaaq, iluanngitsuliaassaaq pillarneqaataasussaq.“ — Job 31:1, 9-11.

Job kanngunartuliornissamut uummatini mingutsikkumanngilaa. Aqqutissaq peqqusersuitsoq aqqutigaa. Paasinarluinnarpoq Jehovap Guutip angut taanna aalajalluartoq kanngunartulianik usserneqarnermini akiuisartoq iluarilluinnarsimammagu. — Matîuse 5:27-30.

Ilaqutariit anersaakkut qanoq innerannut eqqumaneq

Jobip ernerisa ileqqorisimavaat ilaatigut nikittaallutik illuminni qassimiuaaqatigiittarlutik, taamaalisukkullu Jobip erneri paniilu tamarmik najuuttarput. Qassiumiuaaqatigiinnerit qaangiukkaangata Jobip meeqqami Jehovamut qanorluunniit ajortuliorsimassasoralugit assut isumakuluutigisarpaa. Biibilimi oqaluttuarineqarnera naapertorlugu Job imaaliorsimavoq: „Nikittaalluni qassimiuaaqatigiinnerit qaangiukkaangata Jobip ernini qaaqqutittarpai saammaannarsartikkumallugit. Ullaannguakkut makilluni ikikkagassanik pilliisarpoq ernini tamaasa immikkut pilliuteqartillugit, ima isumaliortarami: ’Immaqa ernikka ajortuliorsimassapput uummatimikkullu Guuti perloqqusimallugu.’“ (Job 1:4, 5) Jobip ilaquttami Jehovamut mianerinninissaat aqqutigeqqusaagullu ingerlanissaat soqutigilluartarsimammagit, ilaqutaanut tamanna killitsissutaasimassaqaaq.

Ullutsinni pisariaqarpoq ilaqutariinni ittuusut ilaquttatik Guutip oqaasiani, Biibilimi qanoq allassimasoqarneranik ilinniartissallugit. (1 Timûtiuse 5:8) Aammattaaq ilaquttat qinnuttarnissaat naleqqulluarpoq. — Rûmamiut 12:12.

Misilinneqarnermini aalajaalluarpoq

Biibilimik atuartartut amerlanerit Jobip sualuttumik misilinneqarneri nalunngilaat. Satan oqarsimavoq Job annikilliuleruni Guuti perloqqujumaaraa. Jehovap taama unammillerneqarnini akueraa, ingerlaannarlu Satanip Job perlussiortippaa. Pigisani sulisunilu tamaasa annaavai. Soorunami suli ajorneruvoq soorunami meerai tamarmik toqummata. Sivitsunngitsoq Satanip Job perlutsippaa aluinit kasseranut ajuarsuartillugu. — Job, kapitalit 1 aamma 2.

Job qanoq issimava? Nuliata Guuti perloqquinnaqqullugu kajumissaaraluarmani oqarpoq: „Arnatut silaatsutut oqalupputit! Ajunngitsut Guutimit pisut tigusinnaasaratsigit ajortut aamma tigusariaqannginnerpavut?“ Biibilimilu nangilluni allassimavoq: „Job tamakkuninnga tamanik pineqaraluarluni oqaatsimigut ajortuliunngilaq.“ (Job 2:10) Tassa Job nikallujuilluni aalajaappoq uppernarsarlugulu Satan sallutuusoq. Uagut aamma taamatut misilinneqartilluta nikallujuinniarta uppernarsisillugulu Jehovamut asanninnivitta tassunga kiffartorusulersikkaatigut. — Matîuse 22:36-38.

Maniguulluni unnersuunneqarnini ilassivaa

Job assigiinngitsutigut maligassiuilluaraluarluni naammalluinnanngitsuuvoq. Nammineq oqarpoq: „Minguitsoq minguttuumit pinngorsinnaava? Ataatsimilluunniit taamaattoqarsinnaanngilaq.“ (Job 14:4; Rûmamiut 5:12) Job assuarnaatsuunerarlugu Guuti oqarmat ima paasisariaqarpoq kiffaminit ajortiliusunit nunami inuusunit piumasaqaataa naapertorlugu Job iliorsimasoq. Tamanna eqqarsaatigalugu qiimmaallannartorujussuuvoq.

Job misilinneqarnermini nikallujuissimavoq, sanngiiffiali qulaarpaat. Jobip atugarliuutinik eqqugaasimanera tusareerlugu tuppallersaaniaraluit pingasut tikeraarput. (Job 2:11-13) Job Jehovamit pillagaanerarpaat sualuttumik ajortuliorsimammat. Jobip soorunami eqqunngitsunik pasillerneqarnini aliasuutigaa, ilungersorlunilu imminut illersorniarluni. Ilungersornerminili ajortuliorsimannginnini uppernarsiniarlugu ingasaassivoq. Toqqaannanngikkaluamik allaat oqarpoq Guutimit naapertuilluarnerulluni. — Job 35:2, 3, NV.

Guutip Job asavaa, taamaattumillu angut inuusuttoq oqartippaa Job kukkunerarlugu. Allassimavoq: „Taava Elihu Jobimut kamangaalerpoq . . . Taassuma Job kamaffigaa imminut pinnani Guuti pisuutimmagu.“ Elihummi maluginiarsimavaa Job oqartoq: „Iluassuseqarpunga, Guutilli naapertuilluartumik iliorfiginngilaanga.“ (Job 32:2; 34:5) Elihulli „tuppallersaasut“ pingasut isumaqatiginngilai kukkullutik oqarmata Guutip Job pillaraa ajortuliai pillugit. Akerliani tatiginnilluni Elihup Job aalajaannerarpaa imatullu siunnersorlugu: ’Unnerluutigineqaatit taassumunnga [Jehovamut] saqqummiunneqareeraluartoq utaqqilussinnarputit.“ Jobip Jehova utaqqiinnartariaqarsimagaluarpaa imminut illersorniaannarluni oqalupallanniaannarani.  Elihup Job uppernarsaavigaa: „Pissarsuuvoq iluassuseqangaarlunilu, tamatigullu naapertuilluartumik iliortarpoq.“ — Job 35:14; 37:23.

Jobip eqqarsartaasia iluarsisariaqarsimavoq. Taamaattumik Jehovap ilinniartippaa inuup mikingaassusianik Guutip angingaassusianut sanilliullugu. Jehovap nunarsuaq, imarsuit, ulloriarpassuit, uumasut pinngortitallu tupinnangaartut allarpassuit tikkuarpai. Naggataatigut Guutip Livjatan — kuukkooriarsuaq eqqartorpaa. Jobip maniguulluni unnersuunneqarnini ilassivaa, taamaattumik tassuunatiguttaaq maligassiuilluarpoq.

Jehovamut kiffartorluta ajunngitsumik iliorsimagaluaruttaluunniit kukkusarpugut. Sualuttumillu kukkuneruppat immaqa arlaatigut Jehovamit oqaaqqissaarneqassaagut. (Ussatit 3:11, 12) Immaqa allassimaffimmik eqqaasaqarsinnaavugut ilerasutsilersitsisumik. Immaqalu Napasuliaq Alapernaarsuiffik-mi atuagassianiluunniit allani kukkussutigisatsinnik ersersitsisisunik naammattuugaqarluta. Aamma imaassinnaavoq kristumioqatitta ilaata inussiarnersumik Biibilip najoqqutassiaanik malinngitsoorsimasatsinnik eqqaasikkaatigut. Taamatut oqaanneqarneq qanoq qisuarfigisarparput? Job peqqissimerpaluttumik nipeqarpoq oqarami: „Taamaattumik oqaaserisimasaraluakka tamaasa utertippakka peqqissimineralu takutillugu issumi arsanilu issiallunga.“ — Job 42:6.

Jehovamit akissarsisinneqartoq

Jehovap kiffani Job akissarsisippaa ukiunik 140-nik inuunera ilallugu. Piffissap ingerlanerani annaasimasamininngaaniit pigisaqarnerulerpoq. Naak naggataatigut Job toqugaluartoq Guutip silarsuassaani nutaami makititaanissaa qularnanngilaq. — Job 42:12-17; Hesekiel 14:14; Juánase 5:28, 29; 2 Pîtruse 3:13.

Ilumoorluta Jehova kiffartuukkutsigu Biibilimilu assigiinngitsutigut oqaanneqartarluta ilimagissavarput Guutimit iluarisaassasugut pilluaqquneqarlutalu. Taamaalilluta Guutip silarsuassaani nutaami inuunissatsinnut neriuuteqarlualissaagut. Aammalu pingaarnerusumik: Jehova ataqqissavarput. Aalajaatsumik inooriaaserput akilerneqarumaarpoq, uppernarsaataaqataassallunilu Guutip innuttaasa namminnissarsiunngitsumik kiffartortaraat, uummammilli tamakkiisumik asagamikku. Immikkut pisinnaatitaaffissuuvoq Jehovap uummataa Jobitut nuannaartissinnaagatsigu, maniguulluni unnerssuussumik ilassinnittoq. — Ussatit 27:11. (wE 15/3 2000)

[Qupp. 29-mi assiliartaq]

Jobip asannilluni angajoqqaaqanngitsut, uillarnerit allallu isumassorpai.

[Qupp. 31-mi assiliartaq]

Job akissarsisinneqangaarpoq maniguulluni unnersuussumik ilassinnikkami